30/09/2025
စပိန်အသင်းတွေရဲ့ ချန်ပီယံလိဂ် ပွဲစဉ် ၂...........................................................
✍️ ဟိန်းသန့်
ဒီကြားရက် အင်္ဂါ၊ ဗုဒ္ဓဟူးညတွေမှာ ချန်ပီယံလိဂ်ရဲ့ပွဲစဉ် ၂ ဆက်မယ်။ ဒီပွဲစဉ် ၂မှာလည်း စပိန်အသင်းအများစု ပွဲကျပ်တွေ ဆက်နွှဲရဖို့ ရှိနေပြန်တယ်။ စပိန်အသင်းတွေက ဒီရာသီချန်ပီယံလိဂ်မှာ အင်္ဂလန်အသင်းတွေပြီးရင် ဒုတိယအများဆုံး ဝင်ပြိုင်ခွင့်ရထားတဲ့ အသင်းတွေ။ ပြီးခဲ့တဲ့ ပွဲစဉ် ၁တုန်းက စပိန်အသင်းအများစုရဲ့ပြိုင်ဘက်တွေက အင်္ဂလန်အသင်းတွေ ဖြစ်ခဲ့တယ်။ စပိန် ၅သင်းမှာ ၄သင်းက အင်္ဂလန်အသင်းတွေနဲ့တွေ့ခဲ့ပြီး ဗီလာရီးရဲလ်၊ ဘီလ်ဘာအိုနဲ့ အက်သလက်တီကိုအသင်းတွေက ရှုံးပြီး ဘာစီလိုနာ တစ်သင်းသာ အနိုင်ရခဲ့တယ်။ စပိန်နောက်တစ်သင်းဖြစ်တဲ့ ချန်ပီယံလိဂ် အရှင်သခင်ကြီး ရီးရဲလ်မက်ဒရစ်ကတော့ ပြင်သစ်ကလပ်မာဆေးနဲ့ တွေ့ပြီး အနိုင်ခဲ့လို့ စပိန် ၅သင်းမှာ နိုင်ပွဲရတာ ၂သင်းပဲရှိပြီး ၃သင်းက အရှုံးနဲ့ စခဲ့ရတယ်။
ဒီတစ်ပတ်မှာလည်း စပိန် ၅သင်းမှာ ပြီးခဲ့တဲ့ ပွဲစဉ် ၁မှာ အင်္ဂလန်အသင်းတွေနဲ့ ရင်ဆိုင်ခဲ့ရတဲ့ ၄သင်းစလုံးရဲ့ ပြိုင်ဘက်တွေက ဂျာမနီ၊ အီတလီနဲ့ပြင်သစ်စတဲ့ ဥရောပထိပ်သီးလိဂ် ၅ခုထဲက အသင်းတွေ ဖြစ်နေပြန်တယ်။ အက်သလက်တီကိုနဲ့ ဘီလ်ဘာအိုအသင်းတွေက ဂျာမန်အသင်းတွေဖြစ်တဲ့ ဖရန့်ဖတ်၊ ဒေါ့မန်အသင်းတွေနဲ့ တွေ့မယ်။ ဗီလာရီးရဲလ်ကတော့ အီတလီရဲ့ ဂျူဗင်တပ်နဲ့ ရင်ဆိုင်ရမှာဖြစ်ပြီး ဘာစီလိုနာကတော့ ပြင်သစ်ကလပ် လက်ရှိချန်ပီယံ ပီအက်စ်ဂျီနဲ့ကစားရမှာဆိုတော့ အကျပ်ဆုံးလို့ ပြောလို့ရနေတယ်။ ဒါပေမဲ့ ဒီ ၄သင်းမှာ အက်သလက်တီကို၊ ဗီလာရီးရဲလ်နဲ့ ဘာစီလိုနာအသင်းတွေက အိမ်ကွင်းမှာ ကစားရမှာဖြစ်ပြီး ဘီလ်ဘာအိုပဲ အဝေးကွင်းမှာ အစဉ်အလာကြီးတဲ့ ဒေါ့မန်နဲ့ သွားရင်ဆိုင်ရမှာဆိုတော့ အခက်ဆုံးအသင်းလို ဖြစ်နေတယ်။ ကျန်တဲ့ ရီးရဲလ်မက်ဒရစ်ကတော့ ဒီတစ်ပတ်လည်း ပွဲအချောင်ဆုံး ဖြစ်နေပြန်တယ်။ သူတို့ရင်ဆိုင်မှာက အခုမှ ချန်ပီယံလိဂ်လိုပြိုင်ပွဲကြီးရဲ့ နောက်ဆုံးအဆင့်ကို ပထမဆုံးအကြိမ်ဝင်ပြိုင်ခွင့်ရဖူးတဲ့ ကာဇက်စတန်နိုင်ငံမှ အယ်လ်မာတီအသင်းဆိုတော့ ရီးရဲလ်လို အရှင်သခင်ကြီးနဲ့ ယှဉ်လိုက်ရင် အဖက်ဖက်ကကို ကွာလွန်းတဲ့ ပြိုင်ဘက်လို့ ပြောလို့ရနေတယ်။ တစ်ခုပဲပြောစရာ ရှိတာက ရီးရဲလ်ဟာ ဒီအသင်းလေးကို အဝေးကွင်းမှာ သွားရင်ဆိုင်ရမှာဆိုတော့ မက်ဒရစ်မြို့ကနေ အသွားအပြန် မိုင် ၁၀၀,၀၀၀လောက် ခရီးနှင်ဖို့ ရှိနေတာပဲ ဖြစ်
တယ်။ ဒါကြောင့် စပိန်အသင်းတွေထဲ ရီးရဲလ်က ခရီးအဝေးဆုံးသွားကစားရမယ့်အသင်း ဖြစ်လာတယ်။ ပွဲကတော့ ချောင်ပါရဲ့၊ ဒါပေမဲ့ ခရီးပန်းမှုဒဏ် အများဆုံးခံရတော့မယ်ဆိုတော့ ရီးရဲလ်အတွက်လည်း ပေးဆပ်မှုတော့ ရှိနေတဲ့ပွဲလို့ ပြောလို့ရပါလိမ့်မယ်။
အယ်လ်မာတီပရိသတ်တွေကတော့ အင်္ဂါညမှာ ကစားမယ့် ရီးရဲလ်မက်ဒရစ်နဲ့ အိမ်ကွင်းပွဲအတွက် အတော်လေးကို စိတ်လှုပ်ရှားနေကြတယ်။ ကမ္ဘာကျော်အသင်းနဲ့ ကမ္ဘာကျော်ကစားသမားတွေကို မျက်ဝါးထင်ထင်အားပေးကြဖို့လည်း ပြင်ဆင်နေကြတယ်။ ဒါက သူတို့တစ်သက်တာမှာ ကြုံတောင့်ကြုံခဲ။ ကိုယ့်အသင်းကိုယ်အားပေးဖို့ထက် ရီးရဲလ်အသင်းရဲ့ နာမည်ကြီးကစားသမားတွေ ကစားတာကို ကြည့်ရဖို့ကသာ သူတို့အတွက် အရေးကြီးဆုံးဖြစ်နေကြတယ်။ ပရိသတ် ၂၃,၀၀၀သာ ဆံ့တဲ့ကွင်းအတွက် ကြိုတင်လက်မှတ်ဝယ်ယူဖို့ အွန်လိုင်းကနေ စာရင်းပေးထားကြသူချည်းပဲ ၈၀,၀၀၀ကျော်နေပြီလို့လည်း သိရတယ်။ လက်မှတ်ခက ဒေါ်လာနဲ့တွက်ရင် ၅၀မှ ၅၀၀အထိလောက် ရှိပြီး ကာဇက်စတန်နိုင်ငံသားတစ်ယောက်ရဲ့ တစ်လချင်းပျမ်းမျှဝင်ငွေက အနည်းဆုံး ဒေါ်လာ ၁၇၀သာ ရှိတာကိုကြည့်ရင် ကာဇက်စတန်သားတွေ ရီးရဲလ်မက်ဒရစ်ကိုကြည့်ဖို့ ဘယ်လောက် စိတ်အားထက်သန်နေကြသလဲဆိုတာကိုပါ မြင်နိုင်တယ်။ အယ်လ်မာတီဟာ နော်ဝေကလပ် ဘိုဒိုဂလင့်၊ ဆိုက်ပရပ်စ်မှ ပါဖို့စ် အသင်းတွေနဲ့အတူ ချန်ပီယံလိဂ်ကို ပထမဆုံး ကစားဖူးတဲ့အသင်း၊ ဒီနောက်ဆုံးအဆင့်ကိုရောက်ဖို့ ခြေစစ်ပွဲအဆင့်တွေမှာ အိုလံပီယာလျူဘလျီယာနာ၊ KUPS၊ ဘရာတစ္စလာဗာနဲ့ ဆဲလ်တစ်လိုအသင်းတွေ ကျော်ဖြတ်လာခဲ့ရတာဖြစ်ပြီး အဖွင့်ပွဲမှာတော့ စပို့တင်းလစ္စဘွန်းကို အဝေးကွင်းမှာ ၄-၀နဲ့ အရှုံးပေးထားရတယ်။
အင်္ဂါနေ့မှာ အက်သလက်တီကိုမက်ဒရစ်ကလည်း အိမ်ကွင်းမှာ ဖရန့်ဖတ်ကို လက်ခံကစားရမယ်။ ဖရန့်ဖတ်က လက်ရှိ ဘွန်ဒက်စ်လီဂါမှာ အဆင့် ၄၊ ချန်ပီယံလိဂ် ပွဲစဉ် ၁အပြီးမှာ ထိပ်ဆုံးနေရာယူထားတဲ့အသင်း၊ အဖွင့်ပွဲမှာ ဂါလာတာစာရေးကို ၅-၁နဲ့ ဂိုးပြတ်အနိုင်ရထားတဲ့အပြင် နောက်ဆုံး ကစားခဲ့တဲ့ ဘွန်ဒက်စ်လီဂါမှာလည်း မိုချင်ဂလတ်ဘတ်ကို အဝေးကွင်းမှာ ၆-၄နဲ့ ဂိုးပြတ်နိုင်ထားလို့ နောက်ဆုံး ၂ပွဲမှာ သွင်းဂိုး ၁၁ဂိုးနဲ့ တိုက်စစ်အစွမ်းပြနေတဲ့အသင်းလည်း ဖြစ်တယ်။ ဒါကြောင့် အရင်လို ခံစစ်တောင့်တင်းမှုမျိုးမပြနိုင်သေးတဲ့ အက်သလက်တီကိုကတော့ ဖရန့်ဖတ်တိုက်စစ်ကို မနည်း ထိန်းချုပ်ရတော့မယ်။ ဒါပေမဲ့ အက်သလက်တီကိုကလည်း နောက်ဆုံးကစားထားတဲ့ မက်ဒရစ်ဒါဘီမှာ ရီးရဲလ်မက်ဒရစ်ကို အိမ်ကွင်းမှာ ၅-၂နဲ့ ဂိုးပြတ်အနိုင်ရထားလို့ တက်ကြွနေလိမ့်မယ်။ တီကိုတိုက်စစ်ကလည်း နောက်ဆုံး ၂ပွဲမှာ ၈ဂိုးရထားလို့ သူတို့တိုက်စစ်ကစားပုံကလည်း အဆင့်တစ်ခုတော့ ရှိနေတာ အမှန်ပဲ။ ဒါကြောင့် အခုပွဲက ၂သင်းတိုက်စစ်အားပြိုင်ကြမယ့်ပွဲ ဖြစ်လာနိုင်တယ်။ ၂သင်းစလုံးရဲ့ ခံစစ်ကစားပုံတွေကလည်း အားရစရာသိပ်မရှိလှသေးတာချင်းကလည်း တူနေကြလို့ ဂိုးတွေအပြန်အလှန်သွင်းကြမယ့်ပွဲတစ်ပွဲ ဖြစ်လာမလား စောင့်ကြည့်ရတော့မယ်။
ဗုဒ္ဓဟူးညမှာတော့ ဗီလာရီးရဲလ်၊ ဘီလ်ဘာအိုနဲ့ ဘာစီလိုနာပွဲတွေ ဆက်ကစားမယ်။ ဒီ ၃သင်းမှာ ဘီလ်ဘာအိုက အဝေးကွင်းမှာ ဂျာမန်ထိပ်သီး ဒေါ့မန်နဲ့ ကစားရမှာဖြစ်ပြီး ဗီလာရီးရဲလ်နဲ့ ဘာစီလိုနာက အိမ်ကွင်းပွဲတွေ နွှဲရမှာဖြစ်တယ်။ လက်ရှိခြေစွမ်းတွေအရတော့ စပိန် ၃သင်းထဲ ဘီလ်ဘာအိုက အစိုးရိမ်ရဆုံးလို့ ပြောရမယ်။ ဘီလ်ဘာအိုဟာ ချန်ပီယံလိဂ်ပွဲတွေ စခါနီးမှ အသင်းမှာဒဏ်ရာပြဿနာတွေ တိုးလာလို့ အခက်တွေ့နေတယ်။ နောက်ဆုံး ၅ပွဲဆက် နိုင်ပွဲ ပျောက်သွားခဲ့ပြီး အတော်လေးရုန်းကန်နေရတာလည်း တွေ့ရတယ်။ ချန်ပီယံလိဂ် အဖွင့်ပွဲမှာလည်း အာဆင်နယ်ကို အိမ်ကွင်းမှာ ၂-၀နဲ့ ရှုံးထားလို့ အခုပွဲကို အမှတ်စရအောင် သတိကြီးကြီးနဲ့ ကစားလာနိုင်ပေမယ့် အဝေးကွင်းမှာ အိမ်ရှင်ဒေါ့မန်ရဲ့ ကစားအားကို မနည်းထိန်းချုပ်ရမှာ သေချာတယ်။ ဒေါ့မန်ဟာ လက်ရှိ ဘွန်ဒက်စ်လီဂါမှာ ဘိုင်ယန်မြူးနစ်အောက် အဆင့် ၂နေရာမှာ ရပ်တည်နေပြီး ချန်ပီယံလိဂ်အဖွင့်ပွဲမှာတော့ ဂျူဗင်တပ်နဲ့ အဝေးကွင်း ၄-၄သရေရလဒ်ထွက်အောင် ကစားထားတယ်။ ဂျူဗင်တပ်လိုအသင်းကြီးကို အဝေးကွင်းမှာ ၄-ဂိုးအထိသွင်းထားနိုင်တဲ့ ဒေါ့မန်ရဲ့ တိုက်စစ်အားကလည်း အားရစရာလို့ ပြောရမယ်။ ဘီလ်ဘာအိုထက် ချန်ပီယံလိဂ်အတွေ့အကြုံလည်း ပိုများနေတဲ့အပြင် အိမ်ရှင်အခွင့်အရေးကပါ ရှိနေလို့ ဘီလ်ဘာအိုရဲ့ လက်ရှိခြေစွမ်းနဲ့ဆို အတော်မလွယ်မယ့်ပွဲဖြစ်နေတယ်။ ဗီလာရီးရဲလ်နဲ့ ဂျူဗင်တပ်ပွဲကလည်း ပွဲကောင်းဖြစ်မှာ သေချာတယ်။ ၂သင်းစလုံး ရာသီအဖွင့် ခြေစွမ်းကလည်း မဆိုးကြဘူး။ ဗီလာရီးရဲလ်က လာလီဂါမှာ အဆင့် ၃၊ ဂျူဗင်တပ်က စီးရီးအေမှာ အဆင့် ၄ဆိုတော့ သိပ်မကွာလှဘူး။ ဂျူဗင်တပ်က ပွဲစဉ် ၁တုန်းက ဒေါ့မန်ကို ၄-၄သရေကစားပြီး ဗီလာရီးရဲလ်ကတော့ စပါးကို ၁-၀နဲ့ ရှုံးထားတယ်။ ဒါကြောင့် ဒီပွဲ ၂သင်းစလုံး အမှတ်ရအောင် ကစားနိုင်ဖို့ လိုနေတယ်။ ဒီ ၂သင်း ၂၀၂၂ချန်ပီယံလိဂ်မှာဆုံခဲ့ကြတုန်းကတော့ ဗီလာရီးရဲလ်က ၁ပွဲနိုင်၊ ၁ပွဲသရေ ကစားထားနိုင်တယ်။ ၂၀၁၉မှာ ခြေစမ်းပွဲကစားကြတုန်းကလည်း ဗီလာရီးရဲလ်ကပဲ နိုင်ထားလို့ ဂျူဗင်တပ်ဟာ ဗီလာရီးရဲလ်နဲ့ဆုံတိုင်း အနိုင်မရဖူးသေးဘူး။ အခုလည်း ကစားရမှာက စပိန်မြေမှာဆိုတော့ ဂျူဗင်တပ်ပိုရုန်းရမယ့်ပွဲဖြစ်နေတယ်။ ဗီလာရီးရဲလ်ကလည်း နည်းပြမာဆယ်လီနိုလက်ထဲမှာ တစ်ရာသီပြီး တစ်ရာသီ တိုးတက်မှုပြနေတယ်။ လူငယ်အများစုနဲ့ အသင်းကိုပြန်တည်ဆောက်ထားပြီး ဒီရာသီအဖွင့်ကိုလည်း တည်တည်ငြိမ်ငြိမ်ပွဲထွက်နေတယ်။ နောက်ဆုံးကစားခဲ့တဲ့ လာလီဂါ၃ပွဲဆက်တိုက်လည်း အိုဆာဆူနာ၊ ဆီဗီလာနဲ့ဘီလ်ဘာအို ၃သင်းစလုံးကိုအနိုင်ရထားလို့ ဂျူဗင်တပ်နဲ့ အိမ်ကွင်းပွဲအတွက် အဆင်သင့် ပိုဖြစ်နေနိုင်တယ်။
ဗုဒ္ဓဟူးနေ့အတွက် ပရိသတ်စိတ်အဝင်စားဆုံးပွဲကတော့ ဘာစီလိုနာနဲ့ ပီအက်စ်ဂျီပွဲပါပဲ။ ဘာစီလိုနာနဲ့ မဆုံချင်ပါဘူးလို့ တဖွဖွပြောလေ့ရှိတဲ့ ပီအက်စ်ဂျီနည်းပြအန်းနရစ်ကတော့ သူ့ဆန္ဒ မပြည့်ဘူး ဖြစ်သွားတယ်။ အန်းနရစ်ဟာ ဘာစီလိုနာကို ဇာဗီနည်းပြအဖြစ်တာဝန်ယူခဲ့စဉ် ၂၀၂၄ချန်ပီယံလိဂ်မှာလည်း ဆုံခဲ့ဖူးပြီး အိမ်ကွင်းမှာ ၃-၂နဲ့ ရှုံးခဲ့ပေမယ့် ဘာစီလိုနာရဲ့ နူးကမ့်မှာတော့ ၄-၁နဲ့ ဂိုးပြတ်ပြန်အနိုင်ယူပြီး ပီအက်စ်ဂျီကို နောက်တစ်ဆင့်တက်စေခဲ့ဖူးတယ်။ နောက်ပြီး ပီအက်စ်ဂျီဟာ ဘာစီလိုနာရဲ့အိမ်ကွင်းမှာ နောက်ဆုံးကစားထားတဲ့ ၂ပွဲစလုံး ၄-၁ရလဒ်တွေနဲ့ချည်း အနိုင်ရထားဖူးလို့ ဒီတစ်ကြိမ်တွေ့ဆုံမှုအတွက်လည်း ဘာစီလိုနာကွင်းကို ယုံကြည်မှုရှိရှိ ရောက်လာဖို့ များနေတယ်။ အန်းနရစ်ကတော့ တိုက်စစ်အားသန် ၂သင်းရဲ့ပွဲဖြစ်လို့ ဒီပွဲက ပွဲကောင်းတစ်ပွဲအဖြစ် ပရိသတ်ကို ဆွဲဆောင်နိုင်လိမ့်မယ်လို့ ဆိုပေမယ့် ၂သင်းစလုံးမှာ ဒဏ်ရာပြဿနာတွေကြောင့် ကစားသမားကောင်းတွေ ၄၊ ၅ဦးလောက်စီအထိ မပါနိုင်လို့ ပရိသတ်တွေအတွက်ရော အသင်းတွေအတွက်ပါ လူစုံတက်စုံမပါနိုင်မှုအပေါ် စိတ်မကောင်းဖြစ်ရပါတယ်လို့လည်း ဆိုခဲ့တယ်။ အန်းနရစ်ပြောသလိုပဲ ၂သင်းထိပ်တိုက်တွေ့ခါနီးမှာ ဒဏ်ရာပြဿနာတွေကလည်း မြင့်တက်လာတယ်။ ဘာစီလိုနာဆိုရင် ဂိုးသမားဂါစီယာကအစ ဂါဗီ၊ ဖာမင်း၊ ရာဖင်ဟာတို့လို အဓိကကစားသမားတွေ ဒီပွဲကို လွဲမှာ သေချာနေကြပြီး ယာမဲလ်ကလည်း မသေချာသေးဘူး ဖြစ်နေတယ်။ ဘာစီလိုနာဟာ နောက်ဆုံး ကစားခဲ့တဲ့ပွဲမှာ ဆိုစီဒက်ကို ၂-၁နဲ့ အနိုင်ယူပြီး လာလီဂါထိပ်ဆုံးနေရာကို သိမ်းပိုက်နိုင်လိုက်ပေမယ့် ဒဏ်ရာရ အဓိကကစားသမားတွေမပါနိုင်ခဲ့လို့ နိုင်ပွဲရဖို့ အတော်လေး ရုန်းကန်ခဲ့ရတယ်။ ထုံးစံအတိုင်း ခံစစ်က ဂိုးအရင်ပေးခဲ့ရလို့ နောက်မှ ပြန်လိုက်အနိုင်ယူခဲ့ရတာဖြစ်ပြီး အိုဗီဒိုနဲ့ ရှေ့မှာ ကစားခဲ့တဲ့ ပွဲတုန်းကလည်း အဲဒီလိုပဲ နောက်မှ ပြန်လိုက်ကစားခဲ့ရသေးတယ်။ ဒီလိုပုံစံနဲ့က ပီအက်စ်ဂျီလို လက်ရှိချန်ပီယံအသင်းတစ်သင်းကို ရင်ဆိုင်ရာမှာတော့ လွယ်မှာ မဟုတ်ဘူး။ ပီအက်စ်ဂျီဟာ အန်းနရစ်လက်ထက်မှာ ကစားပုံလည်း ပိုကျစ်လျစ်လာတဲ့အသင်းဖြစ်လို့ တိုက်စစ်မှာ လူမစုံတဲ့ ဘာစီလိုနာအတွက် ဂိုးရဖို့အတွက်တောင် ခက်ခက်ခဲခဲ ကစားယူရဖို့ များနေတယ်။ ဒါပေမဲ့အန်နရီကေးပြောသလိုပဲ တိုက်စစ်အပြိုင်ဖွင့်ကစားကြမယ့် ဒီပွဲက ပရိသတ်တွေအတွက်တော့ ပွဲကောင်းတစ်ပွဲဖြစ်လာစေမှာပဲ ဖြစ်တယ်။
‼️ မောင်တြိဂံအပါအဝင် ဝါရင့်
ဂျာနယ်ကလောင်ရှင်များရဲ့ ဝန်းရံမှု၊
တာဝန်ယူမှု၊ တာဝန်ခံမှုအပြည့်ရှိတဲ့
Hello Soccer ရဲ့ အွန်လိုင်းဝန်ဆောင်မှုကို
ရယူလိုပါက ပေ့ချ်မက်ဆင်ဂျာကို ဖြစ်စေ၊
Viber နံပါတ် 09-791138672 ကို ဖြစ်စေ၊
Phone 09-954253645 ကို ဖြစ်စေ
ဆက်သွယ်နိုင်ပါတယ် ခင်ဗျာ...
