22/11/2022
ဆယ်ကျော်သက်ရဲ့ vibesက အဆုံးသတ်သွားခဲ့ပြီ ထင်တယ်။
ဆယ်ကျော်သက်နဲ့အသက်၂၀ကျော်ဟာ တိုတောင်းသလိုနဲ့ရှည်လျားခဲ့ပြီးရှည်လျားသလိုနဲ့တိုတောင်းခဲ့တယ်။အပြောင်းအလဲတွေများခဲ့ပြီး အထိအခိုက်တွေများခဲ့သလို ၊ တည်ငြိမ်မှုတွေလည်းရှိလာပြီး ဆိတ်ငြိမ်မှုတွေလည်း ဝင်ရောက်လာတယ်။
ဘဝဟာအခုမှ အစဆိုလည်း ငါတို့ဟာ အဖူးအငုံ ဘဝထက်တော့ တစ်ဆင့်ထပ်မြင့်သွားခဲ့ပြီမဟုတ်ပေလား။
ဆယ်ကျော်သက်ဆိုတဲ့အရွယ်ကုန်ဆုံးပြီးနှစ်တွေမှာ
တစ်ချိန်ကအတူတူ ဆော့ကစားခဲ့တဲ့သူငယ်ချင်းတချို့က စောစောစီးစီး လက်ထပ်သွားကြပြီ တချို့ကရှည်လျားတဲ့ပညာရေးလမ်းကိုအခုမှ စပြီးလှမ်းဖို့ဟန်ပြင်နေတုန်း၊တချို့က အလုပ်လုပ်နေပြီ။ အဲ့ကတစ်ဆင့်ငါသိလိုက်တယ် ဘဝဆိုတာဘယ်လိုပုံစံနဲ့မဆို သူ့အချိန်နဲ့သူသာလည်ပတ်နေခြင်းဆိုတာ
ငယ်ငယ်က မတည်ငြိမ်ခဲ့တဲ့ သူငယ်ချင်းတွေက တည်ငြိမ်လာပြီ ၊တချိန်ကအေးဆေးလှချည်ရဲ့လို့ထင်မိခဲ့တဲ့လူတချို့ကတော့ လောကပင်လယ်ကိုငါတို့ထက်ပို ကျွမ်းကျွမ်းကျင်ကျင် လည်လည်ဝယ်ဝယ်ကို ကူးခတ်နေကြပြီ။
ဆယ်ကျော်သက်ဘဝဟာ ထိခိုက်ရှနာလွယ်ပြီး
ပျော်စရာကောင်းခဲ့၊ဝမ်းနည်းရခဲ့ ၊ကြေကွဲလွယ်ခဲ့
ပြန်တွေးတဲ့အခါလည်း အရာအားလုံးကအမှတ်တရတွေအဖြစ်ပါပဲ။
ဆယ်ကျော်သက်မှာ ငါတို့ဟာ
သူများတွေကို လွယ်လွယ်ချစ်တတ်ခဲ့ပြီး ကိုယ့်ကိုယ်ကိုယ်တော့ မချစ်တတ်ခဲ့၊ ဆယ်ကျော်သက်ရဲ့အချစ်ဟာ ဂစ်တာသံတွေ သီချင်းသံတွေနဲ့တင် နှလုံးသားဆည်းလည်းတွေကမြည်နေလေရောလား ။
ငါထင်တယ်ငါတို့ဟာ ဆယ်ကျော်သက်ကလိုအချစ်မျိုးနဲ့တော့ ထပ်မချစ်မိလောက်တော့ဘူး
ထင်တယ်။
လမ်းတွေတကယ်တိတိကျကျကွဲသွားတဲ့ ဘော်ဒါတွေကိုမြင်ရတဲ့အခါမှ ဪ..ငါတို့ကတကယ့်ကိုဘဝခရီးလမ်းကိုစလျှောက်ကြပြီပဲလို့သိရတယ်။
ဘဝဟာ အဆုံးသတ်လို့ထင်တဲ့နေရာကနေလည်း
အစဖြစ်နိုင်ကြောင်းဟာ ဆယ်ကျော်သက်ဘဝရဲ့ သင်ခန်းစာတစ်ခုပဲ ။
