Rotsirotsy Tononkalo - XL Radio

26/10/2023

MISAOTRA ANAO POETA

Soratra sy teny voafantinao teny an'habakabaky ny trombanao mirongatra
sy ventsonao nipongatra
No indro narindranao ho tonga tsara rafitra,
Ho kanto mahafinaritra ny masonay mamaky
ireo soratrao miranty...
Naharevo koa ny sofinay mandre, rehefa ianao miantsa.

Korisam-peninao no indro fa mitafa.
Mivimbina hamamiana sy tsiky sesilany,
mivatsy koa fitia... ary ankoatra izany,
tao narakitrao ny toro sy ny anatra
Entinay miaina.
Ianao ilay tsy mba sasatra
Mikiry tsy malaina
Mampita fahendrena
Mampianatra hatrany hahery sy hanantena
Manabe ny maro ho tonga olom-pirenena
vanona sy marina
Hikendry ny hanarina
ireo lavon'ny onjam-piainana.

Tsy nataonao hitarainana
ireo adidy maro iantsorohanao
Fa am-pitia hatrany no anoloranao
ny kanto sy ny soa
sy tsara mahasoa
tanaty soratrao.
Na aza hatramin'izao...
Tsy vitsy ireo mpanenjika sy ireo mpanasoketa.
Ny tanjonao tsy miova: "manome ho an'ny rehetra"
Fa "Soratra... kanto no sady manabe" no ataonao tarigetra.
Ka... misaotra anao Pôeta!

Ny Kintana Fitarikandro
(14-10-2022)

03/05/2023

Tsara ariva eh 🙋
Alefaso eto indray ary ny tononkalonao

24/03/2023

💔💔💔

23/03/2023

HITSIRIRITRA FARANY

Fotsiny aho hitia dia hitsiriritra farany
Hiampofo anao an'eritra,irery an'efitranoko
Fotsiny aho hianoka na aza ianao malalany
Sisa anio ihany raha mety mba hindramiko

Hindramiko mangina ts'ataoko mihitsy fantany
Alaiko an-tsokosoko haka toerana ao an-tratrako
Fa fotsiny aho hankafy dia hanonofy farany
Hamafa faratampony ireo dinitry ny ratrako

Fandrao mantsy any aorina hitroatra ny haromatany
Ka hamoha fotamandry amin'ny andro firavoana
Manahy aho sao tsy ho tantiko ny rehetra mety ho vokany
Sy ny hanadinany ahy raha afaka hateloana

K'avelao aho mba haniry dia hanota faramparany
Handoko ny habakabako minitra vitsy monja
Fa rehefa izay no vita dia ho tò ny fahasambarany
Ka tsy hisalatra intsony itsy fitopatopan'onja

Satria fotsiny aho nitia dia nitsiriritra farany
Niampofo anao an'eritra,irery tan'efitranoko
Fotsiny aho nihanoka dia nanonofy ilay anjarany
Hany singa nampiaina ny andalan-tononkaloko

Mahalia❤✨
20230322-2256


Vahela sy Mahalia

08/03/2023

Eh! Andao indray iaraka aminay e!Apetraho eto ny asa soratrao.
ROTSIROTSY TONONKALO
19H30-21H00 Sur

07/03/2023

"HO FANAJANY ANAO..."

Nanindrona ny fony ilay ianao nilaza handao,
Hisitraka olon-kafa tsy ho sambatra eo an-tratrany,
Kanefa moa nekeny raha ho fiadananao,
Dia...
Nohezahiny nafenina tsy ho hitanao ny ratrany...

Tsy nahitany tory ilay ianao nahita vao,
Hanoroka kanefa tsy hanoroka ny vavany,
Kanefa moa nekeny raha ho fahasambaranao,
Dia...
Nohezahina nafenina ny ranomason-tavany...

Toa tsy eken'ny sainy ary tsy hinoany hatramin'izao,
Ilay ianao hitantana ihany fa tsy ny rantsan-tanany,
Kanefa moa nekeny raha ho fahasoavanao
Dia...
Nohezahiny nafenina ny sento izay tsy tanany...

(...)
Nitsikitsiky kely izy nahita anareo roa
Dia...
Mody tsy niraika fa dia nandroso hatrany,
Kanefa tany anatiny mba nisy ny hambom-po
Hoe...
Anjara toerany eo fa tsy an'ny hafa izany...

Kanefa ho fanajany an'izay safidinao
Dia naleony aloha nangina nanjohy ny fara-tazana,
Tiany ianao raha sambatra amin'ny olona vaovao
Fa...
Izany koa 'ngamba aminy no tena hoe fitiavana...

Nataony izay rehetra mba azony natao,
Dia...
Noporofoiny foana mba ''ho fanajany anao..."

~~~ NALA~~~

06/03/2023

TIAKO AKIA IANAO

Tiako akia ianao,
Mamiko ao am-po
Toy ireo maraina vao...
Fanantenana soa !

Ny tsikinao malefaka
Mitondra ainga vao,
Ny feonao miresaka
Toa tsy mba hankalao !

Fa voninkazo manitra
Mamerovero fatratra
Toa andon'iny lanitra,
Manjelatra, mitaratra.

Rehefa takariva
Tara-bolan-tsinana
Ka ny alina madiva
Dia satriko hiankianana...
..sy hitosiana koa
Ny eo anilanao
Dia ravo isika roa...
Oh ! Tiako akia ianao !

DadaRabe
12/02/23
Ambato

03/03/2023

Ny Ako Eseji

''Hanambady ianao''

Ny aty izany izao maraina malomaloka,
fa any ianao 'ndeha hiatoka
hanaiky sy hilaza fa tanteraka ho vadiny.
Ao ianao dia mihomana ho vady andefimandriny.

Any izay ianao!
Andalam-piampitana amin'ny fiainana vaovao.
Andalam-piomanana ny ho eny an'alitara,
Manomana tanteraka ny voady izay ho ambara.
..Saingy...ny eto izao maratra
fa ho antanan'olon-kafa
ny nofisina hatrizay.
Eeee!!Any ianao 'zay.

Ny eto izao mandrovitra ny takelan-tsarintsika.
Ny ato te hamita
hanapitra fisiana.
Eny e,any ianao ry tiana.

Andeha... hivazavaza anatrehan'ny tontolo fa babony dia babony.
Dia...avy eo 'zany ianao vadiny dia vadiny?
Dia indrisy ny ato 'zao,
An-dalana tanteraka amin'ny fiainana vaovao.
Mihitsy tsy hanantena
fa an-dalana tanteraka amin'ny famonoana tena.

Ny Ako Eseji

02/03/2023

.. T S O D R A N O 🥺💔

Raha izy no hitanao fa
afaka hitondra ny tena fahasambarana.
Raha izy no hitanao fa
afaka hampianoka ny tena fiadanana.
Dia tsodrano ny ahy no omeko
na aza mampisento ny amintsika roa.

Fa tsarovy hatrany ny hoe:
tsy ny olona rehetra mibaboka ho tia no tena tia tokoa.
Tsy ny filazany fa vonona hiaradia sy tsy handratra ny aty fo no porofo fa tsy lainga.
Androany izy mivoady fa rahampitso dia hanainga hitady hafa indray. 💘

Dia amin'izay fotoana izay,
Mety ianao ahatsapa fa teto nisy fo nitia tsy nisy fetra.
Mety ianao ahatsiaro ny amintsika roa
sy ny lasana rehetra
Saingy efa vita hatreo. 💔

Dia eto ampiafaran'ny tantarantsika roa
Eto ampiandohan' ny misinareo koa
Tsotra ny ahy ny teny
Miadàna akia ry Neny a!
F' ireny fitarainako,
Ny fijaliana niainako mbola hiriko iainanao.
Mbola hiriako....Kanefa aoka ihany,
Sambàra hatrany akia, any anilany any. 🥺

Mihaja Ramanakava ✍️

02/03/2023

(...)
Dia io indray ianao fa tazako eto an-jotra...
Nandrasako hipoitra izay arahaba kely na kopakopa-tanana voavimbinao avy any.....fa nofy ihany izany.
Mantsy fahatsiarovana no sisa mba navelan' ny finamanantsika.
Ny foko aza torovana, raha sendra ka mahita
hoe mbola io ianao fa mitana lohalaharana
ao anaty lisitry ny pejim-piresahana...

Dia nahagaga koa,
f' ianao 'lay tia manenjika manisy sary fo ny ranty nozaraiko...intsony tsy nitranga...
Raha sendra nosavaiko, dia... nandalo ihany ianao fa nanisy tana-manga.
Moa tsapa tato ho ato...
fa sisa hena-maso no mamatotra ny tananao tsy
hanilika ahy ho namana;
fa raha ny hetsi-po ananana, inoako f' efa levon' ny volana nisesy:..Tsapako nihalefy izay kely avy aminao miohatra izay nomeko.
Fa raha ny nisy teto, sarotra ny handainga raha hoe ianao no adino.
Sarotra ny hino hoe ianao 'lay nantenaina ho vahatra ifaharana:
no tonga olom-pantatra nanosi-bohon-tanana.

Atao ahoana moa e!
Natao ny tsy hamboraka fa feno be ny fo ka sao vao maika haratra,
Dia ity no fara-hafatr' ilay namanao voadaka teo am-bava-fony..sasatry ny niandry isaky izay hatory,
' lay mpanao "soava mandry" fa tsy valiana akory.
.." Tsy miova retsy ny eto a! Ho namana eny foana,
miandry anao hiverina na aza arivo taona."
(...)

SM🖊

02/03/2023

...OROKA MPINAMANA...
Io namanamana io aloha efa lesoka hatrizay.
Efa tevana namarina, nahapotika tantara.
io mpinamanamana io, mifanoraka indraindray.
Efa hita teto izany, nanana aho dia mahalala.
Minoa ahy mihitsy ianao fa hivadikabika io.
Ianao indray no ho lasa ratsy hoe tsy mahatokitoky.
Nefa ireo hiaraha-mahalala, mpinamana fa tsy madio.
mpinamana rehefa mazava, alina eo dia hifampitosy.
Minoa ahy ianao ry zandry fa hipoitra io atsy ho atsy.
Vao ho maizim-bolana eo, hanoroka amin'izay jodasy.
Amboary dien'izao ny saina, sao dia mbola hanantena.
Fa iny oroka iny mantsy, tsy alatra iny fa nomeny,
Tsy alatra iny fa nekeny..... ZARA AINGA

01/03/2023

Rotsirotsy Tononkalo
Apetraho ao anaty taria indray ary ny sangan'asanao.

01/03/2023

VELY KANONTA

Efa nionona ela ny foko,
Intsony tsy ilaiko mpamangy
Madio izao ny lamba maloto
ka aoka tsy hamoha fota-mandry

Lalam-baovao no izorako
Tsy hiherika izay nahafay
Tsy ahita an'ilay fahatsorako
sao hilaza abobo eo indray

Ka mody hitrotro fifonana
hitantara an'izao sy izao
Ny marina tsy azo takonana
Tsy fantatro akoriny ianao

Raha mahalala ny tena fitia
mba naheno ny foko tomany
Raha nanao "aleloia" taty
tsy nanonona "amen" tany

Izaho efa tonga mpandresy
Nanadino ny lasa taloha,
izay ianao vao hikonfesy
hangataka famindrampo?

Tamin'ireny aho tsy nisy nanoina
raha niantso ny hoe "miverena"
Ianao no nivadi-pinoana
tsy nariana fa nanary tena

A-N

😉

28/02/2023

NANAO VELOMA FARANY....

Dia....
Andeha hiala sasatra ny nofony marefo
Fa tofoky ny ratra sy ny fijaliana teto
Trotraky ny ady sy ny sedra mankadiry
Trobaky ny bala sy ny vaingan'hirifiry
Ny fony mbola zaza....
Ho potika sy rava
Any ambany rangolahy ny fony sy ny vatany
Ny varavaram-bato no hopitalin-dratrany
Sisa tsy voakombon'ny holatra sy fery
Ho vovoka sahady ny fon'ilay anjely
Nizioga ny tsy zakany.......
Dia...izao no nosoratany
Talohan'ny nialany hikopaka any an-koatra
"Niezaka niady aho kanefa mafy loatra
Ny tolona natrehako teto an-tany teto
Malemy aho ka malemy,marefo aho ka marefo
Tomany aho ka tomany....
Lazao any aminy
Fa...tena tiako izy iny, tiako sy tsy foiko
Na aza nampitondra ny ratra tao am-poko
Veloma hono hoe,masina ka masina
Mivavaka ho anao any ankoatran'ny fisiana
Ilay tokana maratra"

✓Rolly Casimir✓
in VAINGAN-DRANOMASO

23/02/2023

"Misintsika roa"

Tiako hitomoetra hatramin'ny zato taona hoavy ny misintsika roa
Iriako tsy ho voafetra fa ho tia sy hanaja vady efa neken'ny fo
Dia hiaraka hianjoria
Fa n'iza koa hanakana dia isika hifankatia
Na iza hamboly sampana, isika hiara-dia
Tsy ho resin'ny fotoana

Ka n'inona ho sedraina, isika ho eo foana
Na toy inona taraina, ny fo tsy avela ho moana
Fa ho koloina hatrany
Tsy avela hirona an-kady sy ho vontona tomany
Tsy ilaozan'adiady fa laroina teny mamy
Dia samy ho tamana

Ka n'inona ho kisetran'ny làlana malama
Na toy inona amboletran'ny tenim-pandraràna
Haniry antsika isaraka
Betsaka ny mpialona no miandry antsika ho raraka
Ho sasa-poana ireny fa vao mainka isika miaraka
Tsy sanatria ho toro

Tokana no Mpiaro mahatonga antsika hijoro
Vavaka no ampinga tsy hamela antsika hikoro
Na hiemotra any aoriana
Mantsy ilay "fo roa" mitovy zavatra iriana:
"Manaiky sy ekena, mitia no sady tiana"

TEFY
1/12/22

22/02/2023

Tonga ilay fotoana...
Rotsirotsy Tononkalo.
Ataovy ao anaty "commentaire" ary ny asa soratrao.