29/03/2020
كاين خلل كبير الخوت غادي يضرنا بزاف بخصوص موضوع التحليلات واللي عندها علاقة بالوفيات وعدد الحالات المحتملة.. تبعو معايا
المعطى رقم واحد: عدد التحليلات عندنا ضعيف بزاف 1976 من فوقاش؟ من 17 فبراير حتى لدابة 28 مارس ( فمدة ديال 40 يوم ) أي تقريباً بمعدل ديال 50 تحليلة فالنهار.
المعطى الثاني: هو أن إنتقال الفيروس كايكون بدرجة كبيرة إبتداءً من يومين قبل بداية الأعراض (لأن la charge virale ديال الفيروس كاتكون مرتفعة) بمعنى مثلاً شي واحد تصاب.. مدة الحضانة كاتقدر توصل 14 يوم قبل ما يبداو الأعراض وفالمعدل كاتكون بين 4-5 أيام .
المعطى الثالث: معدل الوفيات اللي واصل 6,41%
المعطى الرابع: هو عدد الحالات المكتشفة واللي هو 402
وكمعطى إضافي للمقارنة عندنا ألمانيا فاش كانت دارت 160000 تحليلة طلعوليها 9274 حالة وكانت سجلات 26 وفاة.. فيمانسبة عدد الوفيات فألمانيا 0,75%
دابة شنو واقع فداك جبل الجليد اللي تحت البحر..
المغرب ما عندوش إمكانيات يدير بزاف ديال التحليلات فالنهار يالله كايدير بين 50 و 200 تحليلة وعندو المختبرات متمركزين وسط المغرب بعاد على الجهات. إذاً السياسة اللي دار هو غادي نديرو التحليلات فقط للناس اللي عندهم أعراض ظاهرة (حيت هادي هي الإمكانيات ديالنا ).
نضربو مثال بكريم :
كريم تصاب مسكين وهو فالنهار الأول ديال الأعراض ديالو عندو داكشي خفيف وشك فراسو. كريم غادي يعيط، فاش غادي يدوز فالميزان ديال واش يجيو عندو ولا لا (حساب المعايير المغربية) غادي يسقط إذاً غادي يقدر يدوزو عندو وياخذو العينات باش يديرو التحليلات حتى يكون فأعرض متقدمة أي فاليوم الرابع غالباً وعندو داكشي واضح..
كريم حسب هاد المعطى عندو 6 أيام كلها يقدر يعدي فيها الناس (كأحسن سيناريو) - يومين قبل و 4 أيام بعد فاش تزادو عليه الأعراض - إذاً إحتمال يعدي الناس كبر من كون كان كريم تم التعامل معه حسب المعايير الألمانية..
كريم فاش غادي يهزو التحليلات ديالو خاص يتسنى حتى اليوم اللي من بعد أي (باش يجيو عندو ويهزوه وياخذو العينات ويسيفطوهم حتى للرباط ويتسناو 6h باش يدوزو التحليلات خاص نهار أخر) إذاً كريم غادي يكون دخل فالنهار الخامس والأعراض تزادت أكثر وهنا على حساب المناعة ديالو شنو غادي يوقع ليه.
دابة هادشي كامل كايدل على أنه إذا المغرب رفع من عدد التحليلات فالنهار لدكشي اللي دارت ألمانيا مثلاً غادي يبانو الأف ديال الحالات اللي غادي يتم التعامل معاهم بسرعة إبتداءً من النهار الأول ديال الأعراض وبالتالي (نسبة عدد الوفيات غادي ينقص بزاف حيت غادي نبداو نستقبلو المرضى بسرعة)
وحتى المدة باش إنتقال العدوى غادي تهبط بزاف فالمثال ديالنا (واللي هو معمول به عالمياً) غادي تنقص من 6 أيام ل 3 أيام.. إذاً الدولة غادي تقدر تسيطر على الوباء بسرعة..
هادشي علاش المغرب خاص يرفع من عدد التحليلات لعلى الأقل واحد 2500 تحليلة بحال فرنسا كأضعف الإيمان. وهادشي قبل مايكثرو الحالات ويتزاد الضغط على السبيطارات ديك الساعة غادي تكون الكارثة.
---
المصادر :
- الصفحة الرسمية لوزارة الصحة
- موقع : https://www.worldometers.info/coronavirus
- الموقع الرسمي لكوفيد19 المغرب : http://www.covidmaroc.ma/Pages/AccueilAR.aspx
- الصفحة الرسمية لجائحة كورونا بألمانيا على ويكيبيديا والتي بها 124 مصدر موثوق
- الموقع الرسمي ل OMS منظمة الصحة العالمية
