14/10/2023
بالأمس كنت عازبا ضارب الدنيا بركلة ماعنديش جلبان للقليع كما يقال .
كنوض مع العشرة كنبلع وجبة الفطور وكنخرج من الدار ولا أدري لليوم إتجاه فاين غانعطي الراس ؟
غالب الأحيان تلقي بي الأقدار في الفيلاج حتى لو ماكان عندي حتى شغلة تما .
ومع داك الدخول والخروج بزاف مرة راكب ومرة على الرجل ، وقدام واحد #الدار جات على الطريق ديما كنت كنشوف واحد البنت كدور تما ، سير واجي يا ليام حتى واحد نهار جابتها فرصة فالطريق وهدرت معاها ، ومع أنني لم أواجه شي بنت فحياتي على أرض الواقع ، ماعرفتش كيفاش ولا يمكن حيت مالقيت مانقول ، نيشان قلت ليها بغيت نتزوج بك ، أنا عجبتيني وعلى حسابك كندوز من هنا ، لا الفيلاج هو مبتغاي إنما فقط غير باش نشوفك ، أحسست حينها أنني خاطر فالهدرة وعاندي مانقول .
وخا لم ترد عليا واكتفت بقولها :
"حيد شي واحد ماجي شي واحد ماجي" ، وانسابت مع الطريق حتى غابت عن عيناي ، في الطريق للفيلاج ، تفكيري انصب بالكامل على فكرة الزواج ومع راسي كنهدر وكنقول جهرا إذا ضيعت هاد البنت عمري نلقا فحالها ، بقيت كنقول هو الزواج ماشي ضروري تبقا تخطط هو غير شعطة ، أبرر لنفسي بقول شحال من واحد تزوج وهو ماعندوش حتى باش يشري صابونة ، قررت بالزربة هاد الليلة نقولها للواليد ، مالها شنو فيها كاع .
غير رجعت للدار بالليل ، فالصباح صبحت عليهم وهما كيفطرو ، قال لي الواليد :
-كيفاش هاد النهار إستيقظت باكرا ، فاين زايد على الصباح ؟
-ضحكت باش يجي السؤال التالي :
-ما المضحك في الأمر ؟
-شوفو أنا خاصني نتزوج ، وبنت فلان هدرت معاها ، باينة موافقة ، خاصكم تمشيو تهدرو مع ولي أمرها .
-لا دبا كمليتيها ، خبر هذا وعلى الصباح ، إوا أولدي فاش خدام ؟ شنو عندك شي فلوس مجموعين ؟ عندك شي دار ؟ ولا عندك السنطيحة وبانت ليك فالزواج لا غير ؟
-شوف المهم أنا والله حتى تزوجوني ، إذا مابغيتوشي نمشي نعمل شي حاجة فراسي ، أقراني بولادهم.
-لا لا لا أنا والله ما نوقف في طريقك ، بغيتي تزوج ، البيت ديالك ها هو ونزيدك بيت آخر وماتعرفني مانعرفك إلا بالخير ، تجيبها تسكنو بوحدكم ، نبقاو مزيانين مع بعضنا وتحمل المسؤولية ديالك هذا راه الزواج بناء أسرة ماشي التخرميز ، أنا نزيدك الله يكمل عليكم بالخير .
المهم ومع أن البنت في صغرها تمنت لو أن فارس أحلامها يأتي إليها راكبا على فرس كما سبق لها وأن رأت ذلك في سلسلات عدة للرسوم المتحركة ، يخيل إليها فداك الوقت بإمكان ذلك أن يحدث معها ولما لا ؟ ومع أن الأحلام لا بد لها من أن تصطدم بالواقع ، لم يكن لديها خيارات عدة سوى القبول بهذا الفارس الذي جاء إليها على قدميه ، تبرر لنفسها ربما قد يكون الحصان مات ليه وصافي ، المهم كاين الشبه ، ما يهمها أن تصبح زوجة ويقال لها زوجة فلان حتى هي مارسماش شي طريق فحياتها ، كانت تنتظر وتقول للي جا بسم الله على طريقة امرابط .
طاح الحك وصاب غطاه
ما علينا كما الناس كاملين وكما هو مألوف دازت مراسيم الزفاف وفق الطقوس والأعراف المعهودة لدى ساكنة المنطقة ككل.
أخيرا صار ينادى علي بالنسيب ، وفي العاجل القريب سأصير أبا .
شي حاجة سميتها "إن شاء الله " ماعندوش فالقاموس اللغوي ديالو .
السيد ولا مسؤول مابقاش ساكن مع دارهم ولا ساكن بوحدو منفرد مع زوجته يقضي بداك جوج بيوت للي عطاه الأب ديالو ، السيد ناوي على تأسيس أسرة زعما.
داك سيمانة الباكور دازت دغيا عليه ، قل شي شهر تقريبا مع داك البركة للي عطاه الأب ديالو ، قربت تتسالا ، هو عارف أن الأيام لن ترحمه ، لما كان عازبا بعض المرات مع الأزمة للي كتضربو كان كيشوف البقصة فالارض كتحساب ليه درهم ، كيبقا ماشي ماجي للفيلاح تقول محسور ولا مايعرفوش يسحاب ليه كيمشي يفتح الحوانت ، زاد كملها ناض تزوج، عاد عرف أن الآتي غير الله يحفظ للي عطا الله عطاه نشوفو فاين غادي نخرجو مع هاد الزواج وهذا ماكان...
#يتبع...(واقيلا)
