عبدو-abdu

03/12/2023

الحاجة الوحيدة لي عمرها ترجع واخا دير لي درتي هي "الوقت". فهاد المرحلة لي كنعيشو كيكون عندنا بزاف دالرغبات، و بزاف ديال الأحلام، و بزاف ديال الوقت، و بزاف ديال المسؤولية فبناء مستقبل لي غيرضي دوك الرغبات لي عندنا، مسؤولية نبنيو عقلية تعاونا نسيرو الحاضر و نوجدو للمستقبل و ندفنو شنو مبغيناش من الماضي و نهزو منو شنو بغينا، زيد عليها مسؤولية بناء شخصية قوية باش نقدرو نديرو هادشي كامل و كتر. كيكون عندنا بزاف من كولشي إلا "لفلوس" ههه الحاجة لي كتخربق لينا الموازين، بغينا نعيشو و ماعندناش لقدر الكافي ديال لفلوس لي يعيشنا شنو بغينا فهاد المرحلة حيت يالاه كنبنيو حياتنا المالية.
هذا أهم تضارب واقع لينا فمرحلة الشباب ماحيلتك تخدم و تجمع فلوس دير بيهوم مينفعك ماحيلتك لمرحلة الشباب التي لن تعود يوما و لي خاسها لفلوس باش تعيشها على حقها و طريقها. بغينا و لكن خاسنا! ههه. قريت هاد الأيام واحد الجملة كتقول "لفلوس كترجع و لكن الوقت ماكيرجعش"، جملة كتشجع على أنك مضرب حسبة لفلوس و تزربعهم في سبيل المتعة! هادي العاطفة لي كتقول هادشي.
ولكن إيلا جيتي تفكر فيها بالعقل غاتلقى أن المعادلة باش تكون صحيحة غيخسك ضرب و تقيّس حيت داك الوقت ديال الشباب لي بغيتي تعيشو مفيّك هو نفسو الوقت لي ضربتي فيه تامارة باش تحصل على دوك لفلوس لي بغيتي تزربع دابا! الوقت لي ماغايرجعش! و بالتالي غيخسك تمتع بلقدر لي غيرضيك بلا متفرّط فالمجهود و الوقت لي كنت ضربتي فيه تاماااااااااااااارة. و المتعة هنا كاينة فالرحلة، من نقطة الصفر إلى النتيجة لي ماغتخليكش ضرب لحساب شي نهار لواش تخسر فلوسك عليك ولا تجمعهم.

الطموح لي كيدير الواحد فهاد الوقت ماحدو صغير و ضهرو ممتقلش بزاف بالمسؤوليات باش يوصل فين بغا هو لي المفروض يكون ممتع. فإيلا ماكنتيش كدخل فلوس عن طريق شي حاجة لي كتحبها، بالتوازي مع شنو كادير مارس شي حاجة كتحبها لأن عنصر المتعة ولابد منو بطريقة أو بأخرى و الحياة بدون متعة راها لا تُطاق. و فهاد الرحلة، بين محطة و لوخرة، كافئ راسك و شري راحة بالك بدوك لفلوس لي حصلتي عليهوم بلا إفراط و عاوتاني متبخلش على راسك.
هادشي لي كاين مكانزعمش ندوي فيديو ديريكت حيت تانكون عيان شويا كانضل غير نكتب تحياتي ليكوم ❤️🥰.

19/07/2023

ها واحد السلااااااام عليكم بعدا الاصدقاء الزوينين موهيم بعض المرات كانكون كالس حتى كانبغي غير نشارك معاكوم شي حاجة لي كاينة فقلبي و كانبغي نكتبها ليكوم و نشاركها معاكم كاع الناس لي عندي سواء الدراري سواء الدريات ، و خا كانكتب و مكانحسش باليد ديالي حتا كاتكبت لي كاين فقلبي ليكوم ، غير قبلو عليا راه كانبغي ندوي فيديو لكن الكتابة كانفضلها 😁🙏🏻 .
ماعليناااااااا موهيم ، الحاجة لي كانشوف و ساكت هي أنه سبحان الله كاين بزاااف مايتقال صراحة ، و راه ماشي فشكل تكون كتبان لشي حد فشكل !!! قراها مزيان و أجي نشرح ليك .
حتا شي حد ماعايش بلاصة لاخور .. حنا مختالفين .ظ التجارب تختلف ، المواقف تختلف ، النفسية تختلف ، العقلية تختلف ، الوسط يختلف ، الأهداف تختلف ... كولشي كيختالف .ظ و بالتالي كل واحد فينا عايش حياة فشكل ، باحتياجات فشكل ، بمبادئ فشكل و بأولويات فشكل .. و هادشي علاش كل واحد فينا كيبان فشكل لاخور! و هادشي ماشي فشكل ، بال العكس تماما ، هذا هو الطبيعي ، الاختلاف .
هذا لا يعني أن كل واحد يبقى كيفما هو و فنفس البلاصة لي فيها هو دابا .د و إنما المقصود هو أنك ماتحكمش على شي حد غير حيت حياتو مختالفة على حياتك .
و يلا بغتي دير و تكون بحال شي حد كون و دير و لكن بلا ماتحاول تبيدل كولشي فيك ، حيت اختلافنا على بعضنا هو لي كيميز كل واحد فينا على لاخور ، طهلااااو و تصبحو على خير ❤️😌.

03/02/2023

حم حم اجي تفهم اشنو كاتعني احتياطي المغرب من العملة الصعبة .
فالمغرب كانبيعو و نشريو بناتنا بالدرهم عندي عندك و هادي حاجة معروفة ، لكن ماشي كااااااع المنتوجات موجودة فالبلاد فشحااال من حاجة كنجيبوها من الخارج بحال البيترول و لا القمح و الزيد زيد ، و زيد ان المشكل انه السوق العالمية ماكاين غير devis هو لي خدام و فالغلبية ديال الحالات كانحتاجوا الدولار حيث كاين منتوجات فالعالم لي كاتباع غير بالدولار و لا بالاورو حيت كانتعاملوا مع اوروبا بزااااف ، مهم فين غادي نجيبوا حنا ابا عبدو هاد العملة الصعبة ههههه زعما كانطبعوها عندنا لاااا المصدر ديال العملة الصعبة كثار و من بينهوم
اولاااا : فاش كانبيعوا السلع و الخدمات تا حنى كانتخلصو بالدولار و لا بالاورو
ثاااانياااا : فاش كيجو السياح يتساراو فالبلاد و الجالية المغربية المقيمة بالخارج لي كايصيفتو الفلوس لعائلتهوم و لا صحابهوم و هذا مصدر مهم فبلادنا المغرب
ثااالثاااااا :فاش كانتسلفوا الفلوس و زيد الاستثمارات الخارجية فالمغرب ... الخ
المهم هاد الدولار و لا الاورو كاااامل لي كيدخل كيدوز لواحد الصندوق احتياطي ديال البلاد من العملة الصعبة ياك و لا لكن فين كاتمشي هاد العملة الصعبة ؟؟ واخا راه هاد الصندوق منو كانشريو لي محتاجين من خارج البلاد و لا شي مغربي بغى امشي افوج على راسو و لا استثمر فالخارج كيدي معاه الدوفيز و لا فاش كنبغي نرجعوا الدين لي علينا و زيد و زيد مهم باختصار الصندوق ديما عامر و راه خاصو اعمر باش بلادنا تحرك ، و تقدر تشري لي بغات من الخارج و لكن يلا مشى الدوفيز مابقاش فهاد الحالة كيكون عندنا عجز و هنا خاص ضروري تمشي عند FMI باش تسلفك بالشروط لي بغات هي يعني غادي تولي تحكم ليك الاقتصاد ديال البلاد و المهم هندها هو تكون قادر دخل فلوس أكثر باش ترجع هي فلوسها ، هذا علاش التخدلات ديالها دائما مااااشي فصالح المواطن البسيط
و فالتصريح الاخير ديال بنك المغرب الاصول الاحتياطية الرسمية للمملكة المغربية هي 340 مليار ديال الدرهم .
طهلااااااو ❤️

02/09/2022