02/08/2023
اليكم تجربتي الشخصيه في العمل في مجال المقاهي :
اولا قبل كل شي لازم نتفقو علي انه مجال المطاعم والمقاهي عمل معقد جدا ومتغرع لعدة جوانب وهي كالتالي :
اولا المسؤليات : انت كصاحب مقهي او مطعم تقع عليك مسؤليه كبيره من ناحية التفاني في تقديم الافضل والتفاني جدا في موضوع النظافه والتفاني في موضوع الاهتمام بالزبائن وخصوصا النوع الميزاجي منهم .
ثانيا : فيه عدة نقاط لازم تتباعد عنها نهائيا وماتستهينش بي ولا وحده منها لانها ستؤدي الي تبعات متعبه وخسائر وهي :
1_ لازم تكون متغرغ جدا لمشروعك وتكون متواجد بشكل شخصي خصوصا فالايام الاولي من الافتتاح وماتعطيش الاداره لاي شخص كان .
2_ اختيارك للموظفين لازم يكون دقيق جدا لدرجه انك لازم تدرس كل شي عن كل اسطا حتي اموره الاجتماعيه لانها حاتنعكس عالخدمه فيما بعد .
3_ حاول بقدر الامكان او بشكل نهائي ان تبتعد عن العماله الوطنيه ( الليبيه) ولا يغرك اي شاب ليبي يقولك انا متع خدمه ودق و و و ... كلها شعارات فضفاضه .
4_ ماتحاولش تضحك وترخي الحبل مع الموظفين ابدا في موضوع القيافه والنظافه وفي تقديم الاكل ومواعيد الحضور .
5_ حدد الاختصاصات بشكل دقيق جدا بين الموظفين وخصوصا الاجانب لانهم فالعاده مايحبوش بعض .
5_ ابتعد عن استلام طلبيات التوصيل للمواد الخام وامشي للجمله واشري بنغسك كل شي علي عينك وبمعرفتك لان اغلب المعامل تغش فالوزن وفالجوده خصوصا معامل البطاطا وتشريح اللحوم .
6_ اختيار تخصص او صنف معين احسن ليك من تعدد الاصناف عالاقل كبدايه .
7_ ماتسمحش لاي موظف او اسطا عندك بان يتدخل في الاصناف الي انت تبي تخدمها او يتدخل في التعامل مع الزبائن او يتدخل في اختيار الموظفين او انه يجيب صاحبه يخدم وخصوصا لو كان ليبي وهدي اهم نقطه يجب تجنبها .
8_ في نهاية اليوم اشرف علي عمالة التنظيف شخصيا وماتعطيش الثقه في موضوع النظافه .
ثالثا الاجراأت القانونيه : الترخيص والشهايد الصحيه لازم تكون موجوده وهي سهلة وغير معقده ولكن احذر من الوقوع في شرك بعض رجال الحرس البلدي الي يبحث عن اي حجه للحصول علي مخالفه واحيانا ابتزاز ..
رابعا: موضوع الدعايه مهم جدا جدا ويجب عليك ان لا تقصر فيه نهائيا واستخدم السوشيال ميديا بكل انواعها وماتبخلش فالصرف عليها وتاكد انك انت مدير الصفحه او شخص مقرب جدا وخلي مناشيرك يوميه ..
حاول قدر الامكان ان تعمل علي عروض التخفيض لانها جيده في استقطاب الزبائن ولكن بدراسه وليس بخساره .
اهتم بكل التفاصيل الدقيقه ولو كنت قليل خبره مش عيب انك تستشير الناس السابقه وتتعلم بس خليك ماشي خطوه خطوه وماتتسرعش فالجري ورا الارباح .
هذا جانب من تجربتي في شغل المطاعم حبيت نشاركم بيه لعله يغيد اي شخص من الاصدقاء ..
نسال الله ان يوفقني واياكم
تقبلو تحياتي 🤗 .
