Khubelu News Agency

26/06/2024

Shout out to my newest followers! Excited to have you onboard! Thato Loke, Mahase Mofokeng, Limpho Chris, Letebele Lihale Ke Nna, Matsele Potsane, Rakhetsi Khetsi, Mapoloko Mabeleng, Rosa Machenene, Thalabrench Maroi

01/12/2022

01/12/2022

Tl'o inoese ka nkho

Hela, pela e n'e hloke mohatla ke ho romeletsa, oeso. Ho fosahetse he, ha le uena u nts'u romeletsa ka ba bang ho re ba tl'o u mamella Palo ea buka koano maqhubung a Radio Lesotho, etsoe u tla fetoa ke seboholi se ntsoe le monate, se leleme le paqameng ka puo e mashoetla. Mona re bua ka Ts'episo Malunga oa bo-rona koano Khubelu. Tl'o inoese ka nkho he, oeso, matsatsing a beke ha hora ea bosupa e fetile ka metsotso e mashome a mane a metso e mehlano (19:45) ho isa h**eng ea borobeli.

Likhomo !!!!

27/10/2022

To our MAJESTY😂😂😂👏

30/05/2022

Upon completion of her standard 7, Lisekiso went to Tatai High School. Even here, her difficulties were still on her educational way! Instead of waning, they became worse!
However, she could make it despite how disturbing they were. After her very last year in high school, all her family members' hearts and those of her teachers were brimming over with joy over her obtaining distinctions in Form E.
After completing her studies in tertiary level, and following her obtaining permanent job as a high school teacher, she now delivers motivational speech to young kids in her village:

"Poverty, a root cause beneath who I am, today! I worked very hard at school in an attempt to transform myself from who I was yesterday to who I am, today!"

30/05/2022

"Poverty, a root cause beneath who I am, today!"
Lisekiso is a 19-year-old girl born and raised at Tatai, one of the very remote and backward villages along Khubelu river. Because of her family having a very weak financial muscle, Lisekiso could go to school on an empty stomach some days. She could therefore not concentrate in class, and she could also remain non-participative as lessons went on. The other challenge she was facing was that of going to school bare-footed in Winters as her parents could not afford to buy her school shoes. Thus, she was exceptional in the entire class; going on her bare feet while all learners were in their black shoes.
However, in spite of these challenges and many more uncountable, she could still make it in her exams. No other learner could obtain grades that were higher than those of Lisekiso in all subjects.
This she achieved through her hardworking, determination, detication and responsibility towards her academic work.
Despite how much devoted she was towards her work, other learners could state, after her passing with distinctions that a root cause beneath her academic success was that she was in love with her teachers. Her teachers were explained to had allocated her higher grades because of their being in love with her, and this her peers could say after every time they were given feedback.

Their being envious towards Lisekiso because of her success resulted into also sowing seeds of hatred among them towards her.
This morning Lisekiso is ill in hospital with her face covered in bondages that are turning red, soaked with the blood streaming endlessy out of her dangerous wounds! Will she make it back? Nobody knows let's expect!
Prior to her being rushed to the hospital, Lisekiso was beaten up to death by two girls from her class who were previously complaining over her having grabbed their boyfriends, two male teachers from Tatai Primary School.
However, we all know what the cause was, envy towards her.

25/04/2022

Love of the football⚽⚽⚽

24/03/2022

Personal blog

14/03/2022

Future and willing entrepreneurs can follow the page

15/01/2022

18/12/2021

Nts'epeli'a nts'epe

Hela, batho ke balotsana ba mofuta oa bona, bana beso! Le ka nts'epa mona, la ba 'na la hlapanya, la re ha ho moloki ea kang 'na, mohlomong le ipapisitse le kamoo le ntsebang, athe ha le lemohe kamoo ke leng noha, leqitolo, lehoarahoara, ua tseba, ntho'a ho betsa hlana-phetho, qiti-maqethoha, ea ho phethoha joaloka khoaba la Mariha. E, la lieha ho lemoha h**e ruri ke motse o khabileng ka liotloana, o mpang he, o tletse likho le mathata ka hare ka koana.
Ausi 'Mantja hase mokhelo mofuteng ona oo le 'na ke ikenyeletsang. O s'a ee a bolokisoe chelete ea mokhatlo ruri ka le reng etlare ha Ts'itoe e ikakatlela letheka tjena, ho rekoe mejaro ea lijo, ho nt'o aroloa.
E tsamaile e sa hane nako e ntle ea Morena, ea thekenyeletsa pele, likhoeli tsa akana, tsa e-shoa, tsa qhobela mona ho Ts'itoe, khoeli ea khora malapeng a mekhatlo.
Re kopanong mona haeso Tatai, re rera kamoo joale re lokelang ho ea reka kateng. Ausi oa rona, mots'oari oa matlotlo o shebahala soabile joaloka mokopu oa solotsi, o itse potlololo! sa theepe e utloa selakalaka sa Hlabula ha re ntse re rera mona. Ebe ke'ng joale? Che, boo, ha re hate butle, re tla utloa ha metsotso e e-ja babeli.

Kamor'a metsotso e se me kae, ke bana basali bana re keneng mokhatlo le bona, ba mo honametse joaloka linots'i li honametse ea li khoatholitseng mokoting. E mong ke eo a re, "Khele! U ja likete tsa rona tse mashome a mabeli, mosali tooe!" O rialo a nts'a mo tlantla, a mo binakela le ba bang.
Utloa h'a ikarabela o re'ng, "Aebo, hle, bo-'m'e! Ha se ke ra tla qabanngoa ke lipampiri tsena empa e le khale hakana re phela 'moho mona ka boiketlo! Hao cheletana ee ea lipampiri e se ka re fapanya ha kaa?" O rialo joale leru lela la masoabi le apohile ka tieo sefahlehong sa hae, a phutholohile.
Ao! Ao! Ao! Ea ka a ka se cho! Ba hlasa, ua tseba, basali bao, ea ka bona bohobe bo lomositsoeng ho feta tekanyo kapa eona phiri e tsoaletse pel'a tsela, e sa hloke eng kapa eng e tanakellang baka seo.

28/11/2021

Nkutloe, Molimo oa ka!

Abuti Leetoane o koqame ka letolo fats'e; oa rapela, o rapela Molimo oa hae, eo a mo ts'epileng.
"Kea u kopa Molimo oa ka, Molimo oa sephiri; nkutloe, u amohele lithapelo tsa ka; tsohle tsa ka li tsamaee bothebelele leetong lena la marato hoba ruri hajoale li eme tlekelele! ha ho tsoelo pele. E, ke rojoa pelo, kea hlaloa, Molimo oa ka! Bao ke k'huk'unthang le bona ba ea e hlobola joko ea lerato, ba monyoha ho eona joaloka noha e e-tsoa lesoleng. Ebe ke u sitetsoe kae, Molimo oa ka oa thapelo ea sephiri, ke tsoe ke etsa kamoo u ratang, ho lokisa litaba?

Kea u qela, kea u ts'epa, ke lumela ho uena, kea u rata, Molimo oa ka. Kea u qela, Molimo oa Isaaka, Molimo oa Jakobo, Molimo oa Abrahama, ntoanele molamu oa hlooho. Kea u qela Molimo oa mollo o moholo, lerumo le leholo, tsoalo le leholo, ke re u be le 'na. Kea u qela Molimo oa thaba ea Senai, Molimo oa seliba sa Jakobo.
Kea u qela uena ea leng teng, ea neng a le teng, ea tla 'na a be teng le kamoso. Ke kopa uena Morena oa ho loka, Morena oa khotso, Morena oa Salome. E, uena ea matla 'ohle, Qalo le Qetello, Melistiki, Mollo o timeletsang, tsoho ea bafu, bophelo bo sa feleng.
Kea u qela uena Mots'epehi oa 'nete, uena oa ho ahlola ba phelang le ba shoeleng.🙏🏽🙏🏽
Eba le 'na, Mongak'a, tsohle tsa ka li soeufale, li totobale mono li ke metsi a leoatle kapa lehloa lithabeng. A k'u ntlhatsoe, u ntlhakolisise, se tlohe senyopotsi sena, se fele tu! ua tseba, se nyamele joaloka moholi o utloa mahlaseli a letsatsi ha le chaba.
Kamor'a ho nthusa ke tla ea u etsetsa tsohle, Mongak'a, etsoe ke ee ke re bua, Monghali, le 'na u ntaele joaloka ba bang, u nthome mosebetsing, ke u sebeletse. Ke ee ke re matla, leruo le bocha tsa ka u se ke ua li khesa, u li amohele ka lerato lohle. E, ha ke na tsona tse ntle tsa ho u khahlisa, mongak'a, empa ha ke hopola uena, 'na nka qenehela'ng, ntate ea matla 'ohle? Ruri, ha ho letho leo nka le qenehelang, etsoe hona ke sehlabelo sa ka, seo e leng 'na ka sebele.

19/11/2021

Poko-boholo e isoe ho Molimo oa Basotho

Ea shoa metsotsoana, e tsoala metsotso, le eona ea shoa e tsoala lihora, 'me tsona li qhobela ho otleng ha eane ea leshome le metso e 'meli, ha bosiu bo ikakatlela letheka. E, hora ea bohlokoa, ua tseba, ho ngoan'a 'm'ae le ntat'ae, empa ka kotloloho ngoan'a sechaba, bana beso! E, eena oa ho leka maoala 'ohle ho ntlafatsa puo ea letsoele, e khoelethane mono, e be mashoetla. E, eena oa ho itella ho phehela Basotho sejo se mathe-maloli, seo kamoso ba tlang ho imona menoana ka sona, 'me ba se je joalo se fela se nkha lets'ehoana, e seng hlemetoane.
Re bua ka eena Mphatlalatsane, naleli ea meso, seokamela lichaba, leleka-litsetse, ntho ea ho bitoha holim'a bo-Thaba-kholo e lopalla le bophara ba leholimo e leba bophirima, e nts'e phatsima litlhase tsa puo e manoni, tsa ho khants'a puo ea letsoele hoja e fifetse.
Re bua ka oona mosha oa mosikong oa Thaba-kholo, bana beso, oo ruri o fulang o nts'o qamaka, o sireletsa puo ea letsoele, 'me oo mahlo a ts'oelimang litlhase tsa kelo-hloko, esere lira tsa atleha ho timetsa lesupa-tsela lena le puo.

Re bua ka lona lenong la khutlong tsa Thaba-kholo, leo manala e leng mejoebejoebe, 'me leo ka 'ona le inolang puo ea letsoele hoja e qoetse lefifing le ts'abehang, la ho timela.
Re bua ka eona phakoe ea lomong tsa Thaba-kholo, tse phats'oa mono ke masepa a makhoaba, eo manala e leng mekoetsepe-koetsepe mono, ea ho hlatha e hlenhlanyetsa soeleng lira tse kholo tsa letotolo lena le matla, puo ea letsoele.
Re bua ka lona leshokhoa la mosikong oa Thaba-kholo, ntho ea ho baba, e babela bohle ba lobang puo ea rona, seikokotlelo sena se matla.
Re bua ka 'ona 'mamasianoke oa khutlong tsa Thaba-kholo, ntho ea ho lata koana le koana, e tla e le masetlaoke, e jareletse moqeqeko oa tse ahelang Mosotho sehlaha sena se mofuthu, puo ea letsoele, lere la ts'epe.
Ke 'nete ho thoe Hlatsinyane se ithorise bohale, hoba kannete, motho o motle a boleloa ke ba bang, empa rona rea ipaka.

16/11/2021

Ho joalo ho phela

Nako eona e n'e tsamaee, e thekenyeletse pele; matsatsi a shoe, a tsoale libeke, le tsona li shoe li tsoale likhoeli, ke re le tsona ha li ke li itheke moroalo, li ee li shoe, li qhobele ho feleng ha mengoaha. A! Matla a tlholeho ruri!
Ho feta hona ha nako, ho ba bang ho tlisa monyaka, athe ho ba bang ho baka mahlomola, litlokotsi tsa mofuta oa tsona. E, motho a sohlokehe ke tsa ho phela, a be marantha, a pulufale. Ka nako e 'ngoe ho sohlokeha hona e hle be ho nameng, ua tseba, a kule motho oa batho, a hule ka falese nako e telele. Leeto e n'e se mokhelo.
Kantle ho ho ema tsi! ha methapo ea pelo bosiu, o na boetse a e-na le lehlaba le fets'eolang, la nako e telele. E, le ne le mo hlorisa, eka lona leino le opang.
Haele siung bona teng, moshana enoa o hlile a khoecha a le nts'ing tsa lebitla. O ile a ikutloa a le hole-hole, lefifing, fats'eng le hole, ho utloahala ua tseba ho re moea o fothohile linameng! Nameng ho eena o n'a sa ikutloe, a mpa a utloa tsa fats'e la moea leo a leng ho lona, sepakapakeng, lepalapaleng leo ekang lela khupa e neng e siee mahe ho lona.
Utloa na o re'ng h'a re phetela:
"Ke sitoa ho hlalosa, oeso, empa ke utloile ke ne ke le fats'eng lesele ho lena re phelang ho lona. Pelo ea ka e n'e eme tlekelele! empa hona hoa kajeno ho n'o fapane hole le ha mehla."

Seeta se tuka malakabe, bana beso, se chesa ea se roetseng. E, lebatama la ho cha ha sona le utluoa ke eena moseroali feela. Motho bohloko ha bo mo fets'eolaka, bo mo otla habohloko, ke eena a inots'i oa ho utloa bohloko boo. Ke rialo hoba ka nako e 'ngoe batho ba ee ba nke motho hasesane h'a re tjena, a its'upa, a ipala mona le mane, empa le teng ba ahlame joaloka ngaka e fositse mokubetso mohla a orohileng, a ileng ka la Simione. Ho joalo ho phela he, beso!

10/11/2021

Kajeno ea e nyeka

Hela, namane e nyekoa ke'm'a eona, bana beso! E, tsuonyane e alangoa ke 'm'a eona mono; ha ho khoho e alamang tsuonyane ea e 'ngoe. E, motsoali ea tsoetseng, ea nang le ngoana, oa o tseba motlopotlo oa ho tsoala hoba oa mo sisinya kamehla, a hlokomele mali a hae. Ke re o tla hana ho thoe ngoana o mo kene menong joaloka mosifa oa pere ka liketso tse mpe, o tla mo ts'oarela, a mo fe lerato le khaphatsehang leha a sa nts'a mo tlabiketse litorong. Ke botsoali ba sebele bo joalo.
Empa ho sa ntse ho e-na le batsoali ba makatsang, ba fetohetseng botsoali bona ba sebele. Ba nyahlatsang bana ba sa le tlaase, ba ba siee lepalapaleng joaloka mots'etlase oa pere, bana e ke mahe, ua tseba, a siiloeng ke khupa lepalapaleng kapa lona leraka le shoetsoeng ke molebo. Jonna, bohloko ba sena ngoaneng oeee! Boa chalametsa, bo eo re tlepe koana botebong ba pelo, e be sono ka Ngoana; a hole ka pelo e bohloko mono, a hloka khotso. Hase mantloane, motse o se nang mabitla, ho fetoha namane ea kanyesetsa, empa mo-u-tsoali a phela.
Leetoane le eena senoelo sena ha sea ka sa mo fapoha. Eitse hoba 'm'ae a shoe, ntat'ae a mo nyahlatsa sa oona mooko oa pere. Ngoana a holisoa ke ba ha bo 'm'ae. Ba itella eena ka bofutsana ba bona mono, ba mo rekela liphahlo, ba mo ruta, ba mo etsa motho, a ts'oana le bana ba bang. Har'a ho phela hona, ngoana ntho ea mo luba, empa he, ba se e lemohe. E, e n'e khasa mehopolong ea hae, e mo nts'ofalitse menahano, eona e farasa, e lopalla, e leba hole-hole lefifing. Eona e n'e le polelo e reng, "Hobane'ng ntate a ntahlile, ebe u nahana joang ka 'na?"
He, ea mo sohloka maikutlo ena polelo ngoana, a hola ka pelo e bohloko hoo le ho bua kapa ho ts'eha a neng a ho etsa ngope-set'soha, ba be ba re o khopo, empa ba sa lemohe se mo khoebethang maikutlong. A! Ho phela ho joang na?
Ea thekenyetsa nako, ea ka eona pere e sikile monn'a Mosotho mono; moshana oa rona a b'a fihla ka koana ka Lijunifesithing. Ke eo ntat'ae a iketsa moloki, o boea sekoele.

08/11/2021

Hobane'ng 'na?

Hela, monono ke moholi ke mouoane, bana beso; o n'a e ngabaotse lenaka Mosotho oa mehleng ea masoetso h'a rialo. Ke eno Mantja, bo mo feletse e le ruri botle bola a neng a khaba ka bona, a ikhohomosa, a qhosha, a hoanka joaloka mohlabani a nyoretsoe ntoa h'a tsamaea. E, botle bohle bo ipheletse, ba nyamela joaloka oona moholi o utloa mahlaseli a letsatsi ha le chaba.
Ke eno morali'a rona, o tsorame tulong sa lekhala, ka mokhoroaneng oa habo, o itlhophere sa khoho e sa tsoa nkeloa litsuonyane ke phakoe. Sefahlehong, linama li manne, li motetse ho qeta; mehlare e hohometse, e lutse feela mono. A khochetse mahlo ale a neng a le bonojoana sa a leeba, a mots'eo-ts'eo koana, a ts'oelima sa a mots'ets'ele o qhaulitsoe holim'a ntlo, o ts'oeroe ke lithakhisa. Nko ela e neng e rethebane hamonate e koraletse, e tsoile ho qeta, ea ts'abeha ho ea e bohileng, ekare hoja e itseka ho fothoha sefahlehong mono, e khole phalo, ua tseba, e balehele litsietsi tse aparetseng monga eona. Lipounama li aparetsoe ke litlhetlhekoa, pekane ke motsoalle ho tsona, li pulufetse ho qeta. Ja u siele matsoho! Ke marapo a maputsoa-putsoa mono, eka a qetetse ho utloa metsi khale boo re sitoang ho bo thants'a; a li tlhabela, a seririella sa khopane, a hoasha. Re boetse re tella maoto! Linama li manne ho 'ona, a ma putsoa, a khopane; mangole a li kotola sa a petsana ea selemo, e sa tsoa tsoaloa. Re ka se qete, ua tseba, ha re ka u hlalosetsa ka ausi eo!

Ebe sesosa sa ho ranthana ho ho kaa ke sefe he? Utloa h'a re fetola!
"Ntho ea nququta, ntate, ea nkhoebetha ka pelong ho 'na! Ke ile ka qhala kemaro likhoeling tsa ho feta, 'me ke hloka khotso pelong ho 'na. Hobane'ng 'na ke etsahalletsoe ke see?" o rialo pelo e sisa, ke eo e sututsa meokho, eona ea re fahla-fahla mahlong, tsa lelemela linoka tsa mahlomola marameng.

02/11/2021

Sesafeleng sea hlola

Abuti Boikemelo o pealetse le lechoabola la hae mono thoteng ea Tatai. Letsatsi le lutse phuoaneng, maboko a bona bobeli a bela, a ptjatla mono, ekare hoja a tloha a bohloha. Boikemelo o jele morali'a rona ka nts'i, o mo shalimile, ua tseba. O tsoa molomo:
"Ho joalo ho phela he, moratuoa. Re ile ra simolla ho ratana, ra k'huk'untha, bobeli ra ba bo-Nts'oekhe. Ka u inola bolibeng ba litsietsi, moratuoa, hoja pelo ena ba e thukhumantse, ua tseba, ba e nts'ofalitse, u bile u re uena u ke ke ua hlola u ratana hoba leloko la Adama ke meleko. E, ka u hloibila u le lefifing le ts'abehang, u sa itsebe. Empa kajeno u nts'ia pooaneng, ke sala ke ka mosetlat'se oa katola; u boela ho bale ba ho u thukhumanya pelo. E, u boela ho bona hoba kajeno u folile ke 'na. Leha ho le joalo, ha ke makale hoba kea tseba fariki e hlotse e boella seretseng e sa tsoa hlatsuoa mono, kapa eona ntja e 'ne boelle mohlatsa khabareng.
Mantsoe a ka a mafelo ke ana he, moratuoa:
Erekaha senkhanang se nthola moroalo, ha ke na bothata ha u mphuralla, etsoe u fokotsa moqeqeko o mahetleng a ka mona, u nts'ihlolla moroalo oa phiphithahali e nthatang. Empa u tla nkhopola moratuoa, lefat'se le u sohlokile, ua tseba! E, ke hona le tla u sehlefalla, hohle tao u hatang, u tlabikele ts'ehlo e metsu e ts'abehang. E, le tla pota lebili la ho phela ha hau, le pote le ntse le u khoasollela liqilikoehali tsa mathata, a u nyakurele ka mahloaneng. Empa esere ha tsena li u etsahalla, ua ts'oha u re ke u loile hoba rona ba thapelo ea sephiri, ba re hatiketseng litorong ba ee ba lle ka rona hamorao ha ho phela ho ba sehlefaletse, ba re rea ba loea, empa bathoana ba batho le sa mala re sa se tsebe.
U be hlokolosi, u hate ka bohlale u hopola ho re le pele li na le baji. E, hata ka bohlale, u be seea-ha-mahlatsi, esere khabareng ua lla meokho qhi-qhi!"
Ao, o rialo ba arohana, meokho e fahlatsa marameng ho ausinyana oa batho.

29/10/2021

Khotso tsoete! pelong ea sehoai

Ea leka-leka meholi litlhorong tsa lithaba, maru le 'ona h'a itheka moroalo, a phethesela, a ea holimo le tlaase. Ho e-so ho ee kae, la re nti! La hlonama leholimo, la hlomoha, ho tloha koana botebong ba pelo ea lona ha kopotsa liba sa menyepetsi. Ao, pelo ea a chofa masoli, ea a sututsa ka sekhahla, a tla ts'oloha mahlong a lona, leholimo. Eaba ea ts'oloha, e hasa lefat'se menyepetsi ea leholimo, ua tseba, ea le aparela, mongobo oa tetebela mobung, oa kena fats'e.

Ke eo nako e thekenyetsa joaloka katola e sikile monn'a Mosotho. E, a e-shoa matsatsi, a tsoalla lihoai lebeke, libeke le tsona lia shoa, li tsoalla lihoai likhoeli. Ke eo Mphalane e hata butle, e tebuka ho atamelana le Pulungoana, li atamelana ka bokhabane joaloka mohlankana le moroetsana ba lerato le metso e rarahaneng mahareng a bona. Lia akana, mocheso oa phahama, o e-hloa mekoalaba joaloka oona o lipakeng tsa mohlankana le moroetsana ha ba shakarelane, ba qamachelane joaloka lehoefe le khomaretse moriring.
Ao, ea ts'oloha p**a le ho feta ha nako, sehoai se khotso ke eona, e tletse khotso pelong ea sona; e tletse tsoete!

10/08/2021

Eitse ha le haba ho ea sunya nko mobung, likhomo tsa be li menoha le mehlala ho leba mahae. Lipholo ke liqiqitahali, manaka lia petlekile, li letsa totoloana. Litsoetse, 'mele li sataletse, li hloretse manamane, li chesoa ke matsoele. Metjoli, melomo e papatehile, e entse litlhetlhekoa hoo ebileng e tsoileng pekane, matsoho ke marapo a maputsoa-putsoa, maphako a komotela baeka, a ba joetsa likakata, ntho li hana ho fela. Hang hoba litjepa li re kutu! hae ka mpa tse sasametseng ho qeta, tsohle lia hlahleloa ho futhumetsa moiteli. Kamor'a mona, metjoli e li neha likotlo, e leba ka matlung moo e ilo phomosetsoa tsa mantsiboea.

07/08/2021

Selemo sa Basotho thoaaa! Ea e-ba lehlanahlana ho lihoai; mehoma ea leotsoa le hona ho loetsoa, har'a lithotahali tsa masimo bo-Tsoku li khethetsa makoeba melomong, joko e li phumula melala, setoropo le sona ha sea itheka moroalo ho li sehla melala. Sephali se lla litloebelele, ho mpefetse. Sekara se ribolla mokabata oa lekote, mongobo o sala shalabeng ho otloa ke moea o puputlang ka matla le letsatsi le fet'seolang ka mocheso. Hlatsinyane e phathahane sa monn'a Mosotho a phunya paola, lekoteng, ea tlolaka, ea ts'emats'ema, e tsoma liboko lekoteng. Peo ha e boele mobung lihoai tse khabane!!!

29/07/2021

Poko-boholo e isoe ho Molimo oa Basotho

Ao, la kajeno la lula hloohong tsa mengala, ntate; mocheso ea e-ba o fet'seolang phuoaneng. E, e le oona oa ho belisa boko ba Boikemelo, hoo moshana oa batho a neng a utloa eka bo tla tloha bo bohloha. Boikemelo, pelo e n'e ile mafisa h'a nts'a pealetse mona holim'a mosaba-saba oa thota, Phokeng. Mehopolo e n'e nt'sofetse, e farasitse, e ile hole-hole, lefifing leo a sa le tsebeng; e furaletse boeena thoteng moo. O n'a ipotsa na eena ke ea malimabe hakaakang, ka ho hlola a pheshisitsoe, mosa-feleng ke baroetsana, kantle ho mabaka a totobetseng, haese la ho re he, o Sesotho o se shoshota ka linko, le hona o nt'sa se khoelethaneng mono, sa Mosotho oa mehleng ea masoetso, ea loanelang ka matla t'sebeliso e ntle ea puo. Ruri, ho ea ka eena hona e n'e le senyopotsi seo a lokelang ho ea se hlatsoa ka poli kapa khoho e t'soeu koana phororong.
Metsoalle ea hae le ba bang, pejana ba ne ba ee ba re ho eena o tla Lula a sesa ka har'a letamo la litlokotsi joalo ke ho furalla Molimo oa Bakeresete, Jehovah oa makhotla, ntate ea mosa, ea mohau, a khomarela Molimo o moholo, Molimo oa Basotho, Ramaseli.
H'a re mahlo tloha, o bona moroetsana a e-tla a mo tobile ho hlaha koana Taung, ho leba hona Phokeng. E n'e le motletlentle oa thope mono, o t'sabileng lefat'se. Mahlo a bonojoana a phatsima litlhase tsa lerato, a le maphat'soana sa leholi la motsoetse. Nko e rethebane hamonatjana mono, eka Ramaseli o e bopile ka boiketlo bohle, ho se lepotla-potla la letho. Meno a n'a soeufetse, ngoana h'a keketeha eka shome lea oa. Jo! E re re felle hona mona ka tlhaloso, re lebe khubung ea taba, moo ntlo e chang.
Eare hoba ba teanye mahlo, Boikemelo a bona ho re enoa ke ea mo rometsoeng ke Ramaseli le Balimo ba Phokeng. He, ntho lia sebetsa ha motho a lumela ho tsona!
Ba akana ka thabo, ba khomarelana, ba qamachelana, ha e-ba mofuthu. Ao, joale tlholeho ea sebetsa, ntate. Mali a phalla, a kitima methapong ea bacha ba rona.

26/07/2021

Ke hlapetse lengetaneng le chesang
Abuti Boikemelo, morao tjena o senyehile maikutlo hoo a entseng hlana-phetho, qiti-maqethoha. E, o phethohile joaloka lona lekhoaba la Mariha hantle. Kereke h'a sa e kena, o fetohetse likano e le ruri. Oa ipotsa na hobane'ng borapeli bo ile ba jala t'sehlo e kaalo tseleng ea hae ea ho phela. Kannete, oa ipotsa ngoan'a batho na ke ka eng thapelo e ileng ea khannela 'm'ae ho ea nyaloa lelapeng le bileng soto ho eena, hoo a bileng a li bona matsoele, a menoha le mehlala ho leba koana habo, ha bo-Boikemelo moholo.
Boikemelo o paletsoe haholo kajeno kaha esale a jeoa ke pelo ho tloha boseeng ba hae kamor'a ho hlokahala ha 'm'ae h'a fihla moo habo.
O ipotsa ka tieo na ke ka eng, thapelo ea sephiri, e ileng ea mo jalla mahlomola a joalo bophelong ba hae. Ruri, a kopana malapa a mabeli ka sepheo sa ho rapela, athe thapelo e tla tsoalla moea o se nang koli mahlomola. E, tsa baba litholoana tsa eona ho eena, ea ka leshokhoa.
Athe Molimo oo o neng o rapeloa lekunutung o joang?
H'a boetse a hetla koana ha nkhon'ae, setsoala 'm'ae, o bona mathata. Lelapa le tlaba-tlaba e le ruri ka har'a letamo la mathata. E se mathata feela bo, empa a popota. Ho khokhothelang meutloa pelong ea mohlankana enoa ke kamoo malapa ana bobeli esaleng a jere litlokotsi kateng, empa a rapela ka thata, ho 'ona theko ea lemati e sa tsejoe le kajeno, etsoe esale ho koaloa, ho buloa ka thapelo, e se thapelo feela empa ea sephiri, 'maka-mathata a Boikemelo.
Motho oa rona pelo e senyehile, e nt'sofetse mehopolo, maikutlo a farasitse, a mo ngamola hlooho. Ache, o bile o fihlela ho le molemo ho nyahlatsa Jehovah oa makhotla, ntate ea Mosa, ea mohau hoba joale ho mo khomarela ke ho bitsa mathata a fetang ana, ho ea ka mothoana oa rona.
Ruri, sephiri ke thapelo ea mofuta oa eona, e batlang batho ba mamellang mathata, ba tiisetsang, ba metseletsang mathe le mali, kannete, hoba ebang ho se joalo, motho o tla khatlana koana, a oe ho fele ka eena.

23/07/2021

Sephiri sa nququta, sa nqeta
Boithatelo o ituletse ka qhofeng la habo, mane Phokeng. Ngoanana, linama li manne sefahlehong mona, masapo a qhobaletse, a rahile letlalo hoo ekang a tloha a le phunya, a iponahatsa kantle. Litlhaheng mona mehlahare e hohometse, 'me le teng linama ho motela ke hoa ho khotsoa. Mahlo a tsorehile joaloka a khomo e hlabang, ebile joale eka hoja a tloha a kholeha lehateng, a eo ptjatlana koana. Meriri ea phophoma, e fefoha ho qeta. Ha re khutlela sefahlehong, se thokoafetse kamehla, hoa bonahala he, ho re pelo ea monga sona e lutse e ngeta, e choba, e otla joaloka oache ea leqaqa. Etlare a sa tsoa hlapa mono le ho ineta ka Vaseline, o bone eona e loant'sana le letlalo hoo e beng e le siee le boetse le thokoafetse.
Molaleng mona a koraletse masapo, le 'ona ua bona h**e a itseka ka tieo ho tsoela kantle ho letlalo, leha koana he, lona le a hlola ho latela matla a lona. Seriti se ile hole koana le ntho eo re sa e tsebeng; e se hlothile ea mo furalla a se na botho.
Botle bane bo neng bo neng e le phephesela eo a e hlomang ho mema bahlankana le banna ha bo eo, bo hlothiloe ke eona ntho ela re sa e tsebeng.
Ao, 'na eo mathata e leng lijo tsa ka, ka baka la ho hlahela ka har'a 'ona le ho holela ka har'a 'ona, ke se ke mo hloma potso, ke mo fatisisa ka sena se mo jang, se hlorisang moea oa hae, se mo hlorisang joaloka leino le opang.
Utloa h'a mphetola:
"Ao, ntate oa batho, u boletse teng, ehlile ntho ea nququta, ea nqeta ka sefubeng ho 'na. Bosiu, kea hlobaela, kea t'soenyeha, 'me hangata bo ee bo se ke tonne mahlo. Bana ba bararo ba sa nthobatseng, ba hlolang ba nkhalefetse bosiu. E mong o ema holim'a mosamo, ba bang mahlakoreng a ka ha ke bothile liphateng. Khalefo ea bona e tuka malakabe, ke eona ea phiri e tsoaletse pel'a tsela kapa nyalasi e nyeletse kotopong. Ba re na ke ba bolaetseng. Ruri, hoja ke tsebile h**e etlaba kajeno ke t'soenyehile hakana, nka be ke sa qhala kemaro makhetlo a mararo nakong eo ke neng ke iphetotse moalo oa banna."

22/07/2021

Bo joalo bophelo
Ho tsoha ho le mahleke, kajeno; ntja e ingoaile ka oto la pele. A loebehlana maru, a phethesela ka mokhoa osele. Mong o bile a re, "Ka nkhono ka 'Mantja, ana a emere lehloa."
Lifahlehong, batho ba aparetsoe ke mehoabali e t'sabehang. E, eona ea menyepetsi e ntseng e t'soloha mahlong a bona ke serame. Mat'somila le 'ona h'a itheka moroalo har'a pherekano ena; a hoshotseha mosa-feleng linkong tsa Basotho, ho mpefetse ka tio.
Naha e thokoafetse, e hlorile ka mokhoa o makatsang. Litjepa li kotlopane, boea bo hlabarile ho qeta.
Ho le tjena, ntate Senyopotsi o hata a kena ha mokeresete e mong mona Phokeng. Monga lelapa ha hae ho rapeloa ka thata kamehla; lemati ha se ntho eo ho tsejoang theko ea lona hoba kannete esale ho koaloa, ho buloa ka thapelo ho tloha lelapa lena le sa thehoa koana. Ho litho tsa lelapa lena, matolo a opa ho qeta kaha ka 'ona, kamehla, ho khumameloa Jehovah oa makhotla, ea Mosa, ea mohau.
A sa hlaha feela mosali oa seaparo, a re thu-thu! Le monna oa motsamai. Mosali ke eo a hloenya ka mahloaneng, a tsoa molomo:
"Hei! Hei! Sekatana ha ka! Ke'ng ka marantha a tjee a liaparao, sekatana tooe! Hoja ua nt'siruha esale hajoale, ke e-so ho u bont'se ha pere e tsoala!"
Ao, monna oa batho a menoha le mehlala a aparetsoe ke leru la masoabi mono. O tatamala joalo mokeresete a mo felehetsa ka sehlethela sa mathe.
Mobali a re utloe, ha re re ha hae ho koqangoa ka matolo letsatsi ka leng; ho rapeloa Jehovah, oa makhotla, ntate ea mosa ea mohau! Athe ba joang bekeresete? Hobane'ng ba le moea o fotholang lifate tjee, empa motho a a phenyekollaka buka e nt'so, e molomo o mofubelu, kamehla? Ba le pota ka kae lengolo le moo le reng, "rata oa heno joalokaha u ithata."?
Empa leha ho le joalo hase bohle ba joalo. Ho sa ntse ho e-na le bathoana ba batho, ba latelang mangolo ana, leha koana he, ba 'ne ba khoptjoe mona le mane, etsoe ha ho tjaka-tlhoka-koli.
Moeti oa rona ke eane moea o mo otla ho furalla lelapa la thapelo. Kobo e hoballela morao.

16/07/2021

Hoja ka tseba

Ntate Boikemelo o tjapaletse moalong ka qhofeng la hae. O likiloe ke mosali le bana. Mahlo a phatsima litlhase tsa masoabi. O tsoa molomo:
"Bana ba ka, ke masoabi ke sena se nketsahaletseng hoba khale ke ngangabala ha le nkeletsa, le re ke itlhokomele khahlanong le sefuba-mohlolo sena.
Kajeno hlooho ea ka e pshabaola habohloko, hoo ke e-nang le motsekelo. Hoa opa 'metsong hoo e leng bothata ba kob'a khomo ho 'na ho metsa lijo. E ntahlehetse tatso ea lijo, 'me ke se ke e-ja seoelo. Le monkho ke o utloela thateng, e ka ba oa tsona lijo le eng kapa eng feela. Kea fora-fora hoo ka nako e 'ngoe ke beng ke nyokholohe, haeba ke iqobeletse ho ja. Let'sollo le nthefutse hoo ke feletseng likobong, kajeno. Mesifa ea opa, e shoa bohatsu hoo ekang ke shoele litho tsena. Athe sefubeng mona teng eka ho ribehiloe mokabata oa pitla hoo ke sitoang ho phefumoloha hantle. Hoseng ha kajeno ke tloketsoe ke ho khohlela, leha koana ke omeletse, ho se likhohlela. Le ho thimola ha ho mphe t'soea hoo nko ea ka e fetohileng seliba se kopotsang mamina.
Hoja ka tseba ho re kajeno ho tla ba tjena, nka be ke ile ka le mamela ha le re ke itlhokomele khahlanong le lefu lena. E, nka be ke ile ka khothalla ho khoesa maseke kamehla le hona ho nyanyatsa matsoho ka sanithaesara, esita le ho etsa tse ling tse hlokoang ho lebanya thebe le lefu lena.
Le t'sabe K'horona hoba ea bolaea, ba heso," o menyeletsa joalo mahlo a hakeela. O bososela ka tsela esele a ba shalimme lifahlehong. O koella mahlo, o nyebella a le liatleng tsa bona.

24/06/2021

TSEBISO!!!!TSEBISO

Bapatsa le rona ho holisa khoebo(u rekisa eng kapa eng, mohlala, poone, linawa, liphoofolo le tse ling), Mokha oa lipolotiki, Kereke le tse ling

Papatso Ke mahala hofihlella nako e beiloeng Ke Khubelu Radio/ Khubelu news Agency

Bua le rona ka mokhorong ho 63573864 kopa u kene lebokoseng

WWW.Khubelu radio.com
Tell: 63573864

Listen to your favorite local or national radio stations or podcasts. Follow breaking news and exclusive sports stories. Discover shows or music events near you.

24/06/2021

Lejoe la t'sita tseleng ea ngoan'a Mosotho
Ntate Boikemelo o ituletse ka qhofeng la hae le setloholo sa hae. O tsoa molomo:
"Ho joalo, ngoan'aka. Naha e ratang taoelopele ea chaba sa eona e betla litalenta tsa sona ka mekhoa e fapaneng. Empa haeso moo na ho joalo? Le letho!
Ke rona bana re itlhophere kajeno; bufuma ke kobo re apere. Sesosa sa sena ke puo ea selata, e fetohileng lejoe la t'sita tseleng ea rona ea katleho. E, re na le litoro tsa mefuta, empa Sejahlapi se re eme pele ho li fihlela.
Bang re ne re lakalitse ho ba lingaka, masole, litichere esita le basebetsi bohle ba bohlokoa nt'setso-peleng ea Lesotho, empa joo! Sehlooho se bakiloeng ke lejoe la t'sita!
Motseng mona ke phiphitha e t'sabehang ea bacha ba litoro tsa bohlokoa, empa boholo re sitiloe ho kenya letsoho nt'setso-peleng ea naha ena ka lebaka la Senyesemane, seo e seng puo ea letsoele.
Ke methoaela feela e atlehileng ho fihlela litoro tsa eona hoba feela e pasitse puo ena.
Hoja ke ne ke le ea hulang teu mafapheng a nang le kob'a bohali, ke ne ke tla re lithuto tsohle li etsoe ka Sesotho, hoba re betla likoankoetla tsa Basotho, e seng tsa Manyesemane. Kea u joetsa, ueso, naha e n'e tla hatela pele linthong tsohle," o menyeletsa joalo menyepetsi e nts'e qhitsa sefahlehong. O e qhela ka lebeko mono.