රිදීවිහාර ඉතිහාසය
වයඹ පළාතේ, කුරුණෑගල , වෑඋඩවිල්ලි හත්පත්තුවේ, මාදුරේ කෝරළේ, රිදීගමපිහිටා ඇති රිදී විහාරස්ථානය වසර 2000කට වඩා වු ඓතිහාසික වටිනාකම් වලින් යුත් විහාරස්ථානයකි. අනුරාධපුර - පොළොන්නරු - මහනුවර යන යුග තුනක සනිටුහන් වර්තමානය දක්වා ඉතිරිවී තිබීම විශේෂයෙන් සැලකිය යුතුවේ.ඉතිහාසගත තොරතුරු වලට අනුව දුටුගැමුණු මහරජතුමාගේ කාලයේදී අනුරාධපුරයේ සිට මලය රට දක්වා ගමන් ගැනෙන පාරක් මෙම පුජා භූමිය හරහා
තිබුණු අතර වෙළදාම් කටයුතු සදහා වෙළෙදුන් එය භාවිතා කොට ඇත. එක් දිනක් වෙළද පුත්රළයෙක් තම ගැල් නවත්වා සතුන් ලිහා දමා ටික වේලාවක් විවේකීව හිද ගමන් අරඹන්නට සිතූ විට කැලයට ගොස් ඇති අතර උන් සොයා යන මගදී වරකා ගෙඩියක් ලැබී එයින් කොටසක් මෙහි වැඩවිසූ ඉන්ද්රටගුප්ත මහ රහතන් වහන්සේට පිළිගන්වා ඇත. ඉන්පසු උන්වහන්සේ එම වෙළෙන්දාට පාර පෙන් වු අතර එය මහ විහාරය නොහොත් අද රන් පිළිම වහන්සේ වැඩ වසන ලෙන හරහා වැටී තිබුණි. එම ලෙන තුළදී මේ වෙළෙන්දාට රිදී ඉල්ලමක් ලැබී ඇති අතර ඔහු එම පුවත එවක ලක් දෙරණ පාලනය කළ දුටුගැමුණු මහරජතුමාට දන්වා සිටියේය.
ඉන්පසු දුටුගැමුණු මහරජතුමා මෙම ස්ථානයට අවුත් රිදී ගෙන ඒවා රුවන්වැලි මහා සෑය සකස් කිරීමට යොදා ගත්තේය. මෙසේ රිදී ලැබුණු නිසා එවක ඇම්තොට දනව්ව වු මේ පුදබිම රිදී විහාරය වු අතර එයට කළගුණ සැලකීමක් වශයෙන් දුටුගැමුණු මහ රජතුමා විසින් මහා විහාරයේ වීදුරු වලින් ආවරණය කොට ඇති රන් පිළිම වහන්සේ නිර්මාණය කොට ඇත.
