Galle Times

27/01/2025

ගාල්ලේ කැකුළු හාල් හිඟය නිමා කරමින් පාලන මිලට කැකුළු හාල් වෙළඳපොළට...

26/01/2025

ගාල්ල නාගොඩ කැප්පිටියාගොඩ අඟුරුවල පාලම මෝටර් රථයක් ඇළට වැටී පුද්ගලයෙකු අද (26) සවස මියගොස් ඇතැයි පොලිසිය පවසයි.

මෙලෙස මියගොස් ඇත්තේ 44 හැවිරිදි පුද්ගලයෙකු බවද පොලිසිය පවසයි.

නාගොඩ සිට බද්දේගම දෙසට ධාවනය වෙමුන් තිබූ මෝටර් රථයක් ගාල්ල නාගොඩ කැප්පිටියගොඩ අඟුරු වල පාලම මතින් පහලට වැටීමෙන් පුද්ගලයකු මිය ගොස් ඇත.

අනතුර සිදුවන විට එහි පැමිණ ඇත්තේ ඔහු පමණක් බවද පොලිසිය පවසයි.

24/01/2025

ජීවිතේදි හම්බෙලා තියනවද,,

හදිස්සි අත මාරුවකට ඉල්ලගන්න සල්ලි, ඉල්ලන්න කලින් ආයේ දෙන Quality මිනිස්සු

ආරාධනාවක් නැති තැන් වලට, නොයන Genuine මිනිස්සු

තමං වෙනුවෙන් පොඩි හරි උදව්වක් කරන අයට, Thanks කියලා ඒ සහයෝගයට, වටිනාකමක් දෙන Quality මිනිස්සු

තමංගේ අතින් පොඩි හරි වැරද්දක් වෙද්දි, Sorry කියලා, ඒ වැරදි හදාගන්න Genuine මිනිස්සු

අනිත් අයව පාවිච්චි නොකර, තමංගේ හැමදේම තනියම කරගන්න Quality මිනිස්සු

ඕනෙම කෙනෙක්ට දෙන පොරොන්දු, ඒ විදියටම රකින Genuine මිනිස්සු

වැඩිය කයිවාරු නැති, අවශ්‍ය දේ විතරක් කතා කරන Quality මිනිස්සු

තමංගෙම Standard එකකට මනුස්සකම් එක්ක, අනිත් අයව ආශ්‍රය කරන Genuine මිනිස්සු

තමංගේ වැරද්දක් වෙන කෙනෙක් පෙන්නලා දෙද්දි, ඒක පිලිගෙන හදාගන්න Quality මිනිස්සු

තමංගේ වගකීම් ඒ විදියට ඉටු කරන, Genuine මිනිස්සු

මං හිතන්නේ ජීවිතේ හමුවීම් වලින්, හොදම හමුවීම් තමා එහෙම Quality Genuine මිනිස්සු හමුවීම...

එහෙම අය එක්ක ජීවත් වෙන්න ලේසි හරිම නිදහස්..

අපි කරන්න ඕනේ අපිත් දවසින් දවස අපේ Qualities හදාගන්න අතරේ, අර වගේ Genuine මිනිස්සුන්ව ආශ්‍රය කරන එක..

ස්තුතිය - මෙය ලියු මුල් හිමිකරුට

24/01/2025

ගුවන් තොටුපොළේ කම්බ හොරු...

දවස ගිය අවුරුද්දෙ අවසාන මාස වලින් එකක් වුන නොවැම්බර් 27 තැන කටුනායක, බණ්ඩාරනායක ගුවන්තොටුපළ

ගුවන් ගතවෙන්න බලාපොරොත්තු වෙන, විදේශයක ඉඳලා ලංකාවට එන්න බලාපොරොත්තු වෙන කාටත් මේක වැදගත් නිසයි ලියන්නෙ.

අපි ලංකාවට එන්න ගුවන් යානයට ඇතුළු උනේ ඩුබායි වලින්.

නතර වෙලා හිටි හෝටලයෙන් පිටවෙන්න කලින් සේරම බෑග් එකට තියලා ෆොටෝ එකක් ගත්තා. ඒක කලේ මගේ බිරිඳගේ කීමට. මීට කලින් විදේශ ගතවුනු කිසිම දාක මම ඒ විදියට ගමන් මලු වල ඡායාරූප අරගෙන තිබ්බෙ නෑ. ඒත් මේ වතාවෙ පොඩි අය පහක් එක්ක සේරම නමයක් හිටි නිසා අපිට අරගෙන එන්න තිබ්බ ගමන් මලු ප්‍රමාණය තරමක් වැඩි උනා. බිරිඳ මට ඒවායේ ෆොටෝ එකක් ගන්න කිව්වෙ ගුවන් යානයෙන් ආවට පස්සෙ ඒවා හරියට තෝර ගන්න පහසු වෙන්න ඕන නිසා.

නොදන්න අයට දැනගන්න ඕන නිසා මම ගුවන් ගමනකදී ගමන්මළු සම්බන්ද ක්‍රියාවලිය කෙටියෙන් විස්තර කරන්නම්. දන්න අය මේ කොටස මග ඇරලා කියවන්න

"ගුවන් තොටුපලට ඇතුළු වුනාම ගුවන් යානයට ඇතුළු වෙන්න කලින් අපිට අපේ ගමන් මලු ගුවන් සමාගමට අයිති කවුන්ටරයකට බාර දෙන්න වෙනවා. එතනදී එයාල බාර ගන්න ඒ ගමන් මලු නැවත අපිට ලබා දෙන්නෙ ගමනාන්ත තොටුපළේදි. ගමනාන්තයට ආවම ගුවන් යානයෙන් බැහැලා ඇවිත් ආගමන විගමන කටයුතු නිම කරලා තීරුබදු සාප්පු සංකීරණ පහු කරලා අවසානයේදි තමා ගමන් මලු නැවත අපිට ලබාගන්න පුලුවන්.

අපිට ගුවන් යානය තුලදි අරගෙන එන්න පුලුවන් දල වශයෙන් කිලෝ හතත්, දහයත් අතර ගමන් මල්ලක් විතරයි"

ආයෙම කතාවට එමු.

කොහොමින් හරි ලංකාවට ඇවිත් පෙර කී කටයුතු නිම කරලා ඇවිත් බලද්දි අපි ගුවන් සමාගමට බාර දීපු ගමන් මලු වලින් එකක් අඩුයි. හිතා ගන්න දල වශයෙන් කිලෝ 25 කට ආසන්න බෑග් එකක් අතුරුදන්.

මුලින්ම හිතුවෙ වෙන කෙනෙක් පටලැවීමකින් අපේ එක ගෙනියලා කියලයි. ඒත් අවසානයේ කිසිම ගමන් මල්ලක් ඉතුරු නොවී සේරම බෑග් හිමිකරුවන් රැගෙන ගියාම අපේ ඒ මතය වැරදි බව තේරුම් ගියා. ගුවන් සමාගම මේ වෙනුවෙන් යම්කිසි සොයා බැලීමක් කලත් එයාලට මේක සොයාගන්න බැරුව ගියා. ඒ වෙනුවෙන් පැමිණිලි කරන්න ගිය තැනදී මේ දේ උනේ අපිට විතරක් නොවෙන බව තේරුම් ගියේ තව කීපදෙනෙක් ඒ මොහොතේ පැමිණිලි වෙනුවෙන් එතනට වෙලා ඉන්න බව පෙනුනාම. (අභිමානවත් 😀) ශ්‍රී ලාංකීය ගුවන් තොටුපළේ ඕනෑම වේලාවක ගුවන් මගියෙක් පත්වෙන්න පුලුවන් මේ වගේ ගැටලුවකට මුහුණ දෙන්න කිසිම ක්‍රම වේදයක් දකින්න තිබුනේ නැහැ. අවම වශයෙන් ක්ෂණිකව ආරක්ෂක කැමරා පරීක්ෂාවක් කරන්නවත් හැකියාවක් ලැබුනේ නැහැ.එයට ප්‍රධාන හේතුව ගුවන් සමාගම්, ගුවන් තොටුපළ ආරක්ෂක අංශය, රේගුව , ආගමන විගමන යන ආයතන අතර අන්‍යොන්‍ය සබදතාවය නැති කමයි.
දෙවෙනි නිගමනය උනේ ගුවන් සමාගම අපේ ගමන් මල්ල ඩුබායි ගුවන්තොටුපලේ දී යානයට පටවලා නැති බවට. ඒ නිසා ඒ වෙනුවෙන් දින දෙකක කාලයක් ඉවසීමෙන් ඉන්න අපිට සිද්ද උනා.

විසඳුමක් නැති තැන අවසානයේ තීරණය උනේ ගුවන්තොටුපල පොලීසියේ සහය ලබාගන්න.
ඔය වගේ දේකදි පොලීසියේ ක්‍රියාකරන අලස සහ නිද්‍රාශීලී ක්‍රියා පිලිවෙල ගැන ආයෙ අමුතුවෙන් කියන්න ඕන නෑනේ.

ඒත් ගුවන්තොටුපල පොලීසිය කටයුතු කලේ අපි කිසිසේත් අපේක්ෂා නොකල විදියට. අධික උනන්දුවකින් මේ කාරණය වෙනුවෙන් ක්‍රියාකල පොලීසිය එයාලගෙ බලය පාවිච්චි කරලා ආරක්ෂක කැමරා ඒ මොහොතේම පරීක්ෂාවට කටයුතු කලා.

එක තැනැත්තියක් අපේ ගමන් මල්ල අරගෙන යන විදිය අපි සොයාගත්තෙ එහෙම. එයා ඒක කරන්නෙ හිතාමතා බවට කිසිම සැකයක් තිබ්බෙ නැත්තේ ඒ හා සමාන වෙනත් ගමන්මල්ලක් ඉතිරිව් නොතිබුන නිසයි.

අවසානයේ ඒ තැනැත්තිය කුලියට ගත් වාහයේ තොරතුරු ඔස්සේ වැරදිකාරිය වගේම අදාළ ගමන් මල්ලසොයා ගන්නට හැකියාව ලැබුනා.
ගමන පිටත් වීමට කලින් ගත්ත ඡායාරූපය, ගමන් මල්ල ලොක් කරලා තිබීම, (ඒක කඩලා තිබුණා) නොවුනානම් ඒ ගමන් මල්ල අයිති අපිටම බවට ඔප්පු කරන්න කිසිම ක්‍රමවේදයක් තිබුණේ නැහැ. මොකද බෑග් එක හොරකම් කරගෙන ගිය තැනැත්තිය ඒකෙ තිබුණු ගුවන්සමාගම නිකුත් කරන සියලුම ටැග් ඉවත් කරන්න තරම් සූක්ෂම වෙලා
තිබ්බා.

පොලීසියෙ දීර්ඝ ප්‍රශ්න කිරීමමෙන් පස්සෙ අධිකරණයට ඉදිරිපත් කිරීමෙන් දින 12ක් රක්ෂිත බන්ධනාගාර ගත කර ඉන්පසුව වන්දි මුදලක් ලබාගන්නත් හැකිවුනේ පොලීසියේ නිවැරදි කාර්‍යක්ෂම ක්‍රියා පිළිවෙත හා අධ්කරණ ක්‍රියාදාමය හරහා.

පස්සෙ මේක අහඹු සිද්ධියක් නොවෙන බව තේරුම් ගියේ වසරකට ගමන් මලු නැතිවීමේ ප්‍රමානය එක්දාස් අටසීයක් බව දැනගත්තට පස්සෙයි.

මෙතනදී මේ ගැටලුවට මුහුණ දුන්නේ ඈත පළාතක කෙනෙක් නම්,වසර ගණනාවක් විදේශයක ශ්‍රමය කැප කර දුවා දරුවන් වෙනුවෙන් යමක් අරගෙන එන තාත්තෙක් නම්, අම්මෙක් නම්, දෙමාපියන් වෙනුවෙන් යමක් රැගෙන ආ දුවෙක්, පුතෙක් නම් තත්වය මොනවගේ වෙයිද.

ඔයාලත් ඔයාලගෙ ගමන් මලු ගැන පරිස්සම් වෙන්න..අපි වාසනාවන්ත උනාට වෙනකෙනෙක්ට එහෙම නොවෙන්න පුලුවන්.

සටහන - Sameera Tharindu Bopage

23/01/2025

පාර්ලිමේන්තු⁣ මන්ත්‍රීවරුන්ගෙන් ආහාර සඳහා දෛනිකව අය කළ රුපියල් 450ක මුදල, රුපියල් 2000ක් දක්වා ඉහළ දැමීමට ගෘහකාරක සභාවේදී තීරණය කර තිබේ....

21/01/2025

ගාල්ල නගරයේ තැන තැන කසල දමා යන කුණු ත්‍රස්තවාදය...

මේ ඔබ දකින්නේ ගාල්ල ඉහළ ඩික්සන් පාරේ වන සංරක්ෂණ දෙපාර්තමේන්තුව අසල පිහිටි කුඩා රක්ෂිතය තුළට කුණු දමා ඇති ආකාරය සහ ගාල්ල ජාතික රෝහලට යන අනගාරික ධර්මපාල මාවතේ මාර්ග අසළ කුණු දමා ඇති ආකාරයයි...

මේ උදාහරණ දෙකක් පමණයි මේ ආකාරයට ගාල්ල නගරයේ තැන් තැන්වල අක්‍රමවත්ව කසල බෑග් දමා යන ආකාරයක් නිරීක්ෂණය වන අතර එහි වැදීමක් මිසක් අඩුවීමක් දක්නට නොලැබෙන අතර මෙය ත්‍රස්තවාදයක් ලෙස නම් කළ හැකිය

මේ ආකාරයට අක්‍රමවත්ව නගරය තුළ කුණු බැහැර කරන පුද්ගලයන් අල්ලා ගෙන එසේ අක්‍රමවත් කුණු බැහැර කරන්නන්ට එරෙහිව දැඩි පියවර ගත යුතුය

රට තුළ නිවැරැදි සාර්ථක කසළ කළමනාකරණයක් සිදුකිරීමට නම් ජනතාවගේ ආකල්පවල වෙනසක් අවශ්‍යය..

මේ කසළ ගැටලුවට හේතු වී තිබෙන්නේ නොදැනුවත්භාවය නිසා නොවෙයි. අවශ්‍යතාවක් නොමැතිකමයි. එබැවින් මේ ආකාරයේ ක්‍රියා නිසා මේවායේ අනිටු ප්‍රතිඵල විඳීමට සිදුවන්නේ රටේ මහජනතාවට මෙන්ම පරිසරයටයි.

එම නිසා මාර්ගයේ තැන තැන කසල දමා යන කුණු ත්‍රස්තවාදයට එරෙහිව දැඩිව නීතිය ක්‍රියාත්මක කළ යුතු අතර පවතින නීති ප්‍රමාණවත් නොවන්නේ නම් නව නීති සම්මත කරගත යුතුය..

සටහන - Galle Times

21/01/2025

ඔය තියෙන කඹේ දශක ගාණක් තිස්සෙ ඔතන එල්ලෙනවා. සමහරවිට මේක කියවන ඔයා ඉපදෙද්දිත් ඕක ඔතනම තියෙන්න ඇති.
ඉස්සර ඉස්කෝල වල පිහිනුම් තටාක තිබ්බෙ නෑ. ඒ නිසා දකුණෙ බොහොමයක් පාසල්වල පිහිනුම් කන්ඩායම් තමන්ගෙ පුහුණුවීම කලේ මුහුදෙ..

ගාල්ලෙ අපි ඔය පින්තූරෙන් පේන පරණ වරායෙ තියෙන ජැටිය හෙවත් ජෙටියෙදි.

ජැටිය කොනෙන් මුහුදට පනින කෙනා ආයෙ ජැටිය උඩට නගින්නෙ ඔය කඹේ ආධාරයෙන්.මම මුලින්ම ඔතනට ගිය කාලෙ ඕක තිබ්බෙ වරායෙ දකුණු කෙළවරට වෙන්න තිබ්බ ජැටියෙ..පස්සෙ ඔය තියෙන ජැටියෙම දකුණු කෙලවරේ..දැන් තියෙන්නෙ වමේ, තැන වෙනස් උනාට කඹේ සංස්කෘතියයි පෙනුමයි එහෙමමයි...

මුහුදෙ ගියාම පීනන්න බැරි එව්වො යන්නෙ ලයිට් හවුස් එක පැත්තෙ නාන්න...පුලුවන් එව්වොයි පීනගන්න බැරි උනත් හිත හයිය එව්වොයි එන්නෙ මෙතනට.

දැන් හැම තැනම ස්විමින් පූල් තියෙන නිසා තව මොනතරම් කාලයක් ඔය කඹේ ඔතන තියේවිද කියල මම දන්නෙ නෑ. හැබැයි දහස්, දහ දහස් වතාවක් මුහුදෙන් ගොඩට එන්න මම ඕකෙ එල්ලිලා තියෙනවා...ගාල්ල කියන්නෙ ඒ මිනිස්සුන්ටම ආවේනික සුන්දර සංස්කෘතියක් තියෙන අපූරු පළාතක්.

හෙට අනිද්දට දකුණ උණුසුම් කරන බිග් මැච් සීසන් එක පටන් ගනීවි. ඒකත් ගාල්ලටම ආවේනික අපූරු විදියකට බලාගන්න ඔයාලට පුළුවන් වේවි.

මෙදා පාර බිග් මැච් එක දවස් තුනයි 🏏 🏏 🏏

සටහන - Sameera Tharindu Bopage

19/01/2025

ගාල්ල ජාතික රෝහලේ 09 වාට්ටුවට මල් මිටක් 💐🙏💐🙏

සියළුම ශ්‍රී ලාංකිකයකයන් ආවරණය වන නිදහස් සෞඛ්‍ය පද්ධතියක් සමඟ රටෙහි සෞඛ්‍ය දර්ශකයන් මේ වනවිට වඩාත් හොඳ ප්‍රගතියක් පෙන්නුම් කරමින් තිබෙන බව ලෝක බැංකුව ඇතුළු ජාත්‍යන්තර සෞඛ්‍ය සංවිධාන සදහන් කරන මොහොතක මෙරට සෞඛ්‍ය සේවයේ ගුණාත්මක භාවය වෙනුවෙන් සහ ඒ සඳහා කැපවන වෛද්‍යවරුන් ඇතුළු සෞඛ්‍ය අංශ සේවකයන් සිදු කරනුයේ විශිෂ්ට සේවයකි.

ගාල්ල ජාතික රෝහල යනු ශ්‍රී ලංකාවේ තුන්වෙනි ප්‍රධානතම ජාතික රෝහලයි. ඒ අතරින් එහි පවත්වාගෙන යන සුවිශේෂී වාට්ටුවක් ගැනයි මේ කතාව..

ගාල්ල ජාතික රෝහලේ 09 වන වාට්ටුවට යන රෝගීයෙකුට මෙන්ම අමුත්තෙකුට දැනෙන හැඟිම ගෙවන වාට්ටුවකට ඇතුළත් වූ හා සමානය..

ප්‍රියමනාප සිනහවකින් යුතු එහි සේවය කරන වෛද්‍යවරුන් ඇතුළු යුතු සෞඛ්‍ය කාර්ය මණ්ඩලයේ හැසිරීම කතා විලාශය එම වාට්ටුවට ඇතුළත්වන රෝගියකුට මානසිකව සහනයක් ගෙන දෙන්නෙකි..

ඉතාමත් පිළිවෙලට වැඩකටයුතු සිදුවන මෙම වාට්ටුවේ පිරිසිදුකම ඉතාමත් ඉහළ මට්ටමක පවතීන අයුරු එහි යන ඕනෑම කෙනෙකුට නිරීක්ෂණය කළ හැකිය.

පිළිවෙලට වැඩ කටයුතු සිදුවන මෙම වාට්ටුවේ සනීපාරක්ෂක පහසුකම් ඉහළ මට්ටමක පවතින අතර වෛද්‍යවරුන්, හෙදියන් ඇතුළු කනිෂ්ඨ සෞඛ්‍ය කාර්ය මණ්ඩලය තම තමන්ගේ රාජකාරිය නිසි ලෙස ඉටුකරන අයුරුද නිරීක්ෂණය වේ.

ගාල්ල ජාතික රෝහලේ මෙවැනි වාට්ටු ගැන සොයා බැලීමේදී අපට දැනගන්නට ලැබුණේ මේ ආකාරයට ගාල්ල ජාතික රෝහලේ වාට්ටු රැසක් ක්‍රියාත්මක වන බවයි.

රටක දියුණුවේ අඩිතාලම යහපත් ආකල්පයි..ඒ අනුව අපේ රටේ ජනතාවගේ යහපත් ආකල්ප වර්ධනය කර ගැනීම යනු ඉදිරි අනාගතයට හොඳ ආයෝජනයක් මෙන්ම යහපත් දියුණු සමාජයක මූලාරම්භයක් වනු ඇත.

පිරිසිදුකම සහ විනය වර්ධනය කිරීම අතින් රෝහලක දක්නට ලැබෙන මෙය ඉතාමත් ධනාත්මක ප්‍රවණතාවයකි. එය දිගටම පවත්වාගෙන යා යුතුය..

මෙරට මහජනතාව වෙනුවෙන් සෑම රෝහලකටම වාට්ටුවකටම අවශ්‍ය යටිතල පහසුකම්, අත්‍යවශ්‍ය සෞඛ්‍ය පහසුකම් ලබාදීම රජයේ වගකීමකි..

ගුණාත්මක සෞඛ්‍ය සේවාවක් වෙනුවෙන් කැපවන ගාල්ල ජාතික රෝහලේ 09 වාට්ටුවේ වෛද්‍යවරුන් ඇතුළු සෞඛ්‍ය කාර්ය මණ්ඩලයට මල් මිටක් 💐💐💐

ඡායාරූප සහ සටහන - Galle Times
2025.01.19

19/01/2025

රටේ ජනතාවගේ ප්‍රජාතන්ත්‍රවාදී අයිතිය වෙනුවෙන් අරගලයක නිරත වූ ජ්‍යෙෂ්ඨ මාධ්‍යවේදී වික්ටර් අයිවන් මහතාට නිවන් සුව ලැබේවා.....

18/01/2025

නයිජීරියාවේ ඉන්ධන ටැංකියක් පුපුරා යාමෙන් සිදුවූ අනතුරකින් පුද්ගලයින් 60කට අධික පිරිසක් මේ වන විට මියගොස් ඇතැයි විදෙස් මාධ්‍ය වාර්තා කර තිබේ.

එම මාධ්‍ය වාර්තා කර ඇත්තේ ඉන්ධන ටැංකිය පෙරළීයාමෙන් පසු ඉන්ධන ලබා ගැනීමට මිනිසුන් පොරකමින් සිටියදී මෙම ඉන්ධන ටැංකිය පුපුරා ගොස් ඇති බවය.

නයිජර් ප්‍රාන්තයේ ෆෙඩරල් මාර්ග ආරක්ෂණ බළකායේ ප්‍රධානීවරයා පැවසුවේ පෙට්‍රල් ලීටර් 60,000ක් රැගත් ට්‍රක් රථයක් අගනුවර වන අබූජා සහ උතුරු කඩුනා නගරය සම්බන්ධ කරන මාර්ගයේදී ගමන් කරමින් සිටියදී මෙම අනතුරට මුහුණ දී ඇති බවය.

එමෙන්ම විදෙස් මාධ්‍ය වාර්තා වැඩිදුරටත් සඳහන් කර ඇත්තේ සිද්ධියෙන් මියගොස් ඇති බොහෝ පිරිස් හඳුනාගත නොහැකි ලෙස පිළිස්සී ඇති බවය.

එමෙන්ම මියගොස් ඇති පිරිස තවත් ඉහළ යා හැකි බවත් එම මාධ්‍ය වැඩිදුරටත් වාර්තා කර තිබේ.

18/01/2025

🔴UPDATE🔴 - ගාල්ල තනිපොල්ගහ හන්දිය ප්‍රදේශයේ ප්ලාස්ටික් වෙළඳ සැලක හටගත් ගින්න මේ වනවිට පාලනය කර තිබේ. ගින්න මට පැවැත්වීම සඳහා ගාල්ල මහ නගර සභා ගිනි නිවන ඒකකයේ ගිනි නිවන රථ හතරක්, නාවික හමුදාවේ ගිනි නිවන රථයක්, ජල බවුසර තුනක්, පොලිසිය ප්‍රදේශවාසීන් සහ නාවික හමුදාව එක්ව ගින්න පාලනය කර තිබේ..

18/01/2025

ගාල්ල තනිපොල්ගහ හන්දිය ප්‍රදේශයේ විශාල ගින්නක්.. ගාල්ල මාපලගම ප්‍රධාන මාර්ගය තනිපොල්ගහ ප්‍රදේශයෙන් වසාදැමේ.. ගින්න නිවීම සඳහා ගිනි නිවන රථ තුනක් සමගින් නාවික හමුදාව හා ප්‍රදේශවාසීන් දැඩි උත්සාහයක

18/01/2025

මහජන උපයෝගීතා කොමිසමේ නිර්දේශ පරිදි ඊයේ (17) මධ්‍යම රාත්‍රියේ සිට විදුලිය ගාස්තු 20% අඩු කිරීම ක්‍රියාත්මක කරන බව බලශක්ති අමාත්‍යාංශය ප්‍රකාශ කර තිබේ...

18/01/2025

හෙට (19) සිට අමෙරිකාවේ Tiktok අක්‍රීය කරන බව Tiktok සමාගම නිවේදනය කලේය...

17/01/2025

එළඹෙන ඉරිදා සිට අමෙරිකා එක්සත් ජනපදය තුළ ටික්ටොක් යෙදවුම තහනම් කෙරෙන බව විදෙස් මාධ්‍ය වාර්තා කර තිබේ.
එරට ශ්‍රේෂ්ඨාධිකරණය ලබාදුන් තීන්දුවකට අනුව මෙය ක්‍රියාත්මක කරන බව එහි සදහන්ය

17/01/2025

2025 වසරේ ලොව සංචාරය කිරීමට හොඳම ස්ථාන 25 අතරට ශ්‍රී ලංකාව – BBC Travel

BBC නාලිකාව 2025 වසරේ සංචාරය කිරීමට හොඳම ස්ථාන 25 අතරට ශ්‍රී ලංකාව නම් කර තිබේ ඒ අනුව එම ශ්‍රේණිගත කිරීම් අනුව ශ්‍රී ලංක.....