28/12/2023
අරිට්ඨ පෙරුමාල්ට විහිලු කරන්න ට ලියවුන "අතුරු මිතුරු පද පෙළ"
අතුරු මිතුරු දඹදිවතුරු -රාජකපුරු සෙට්ටියා
අලුත ගෙනා මනමාලිට හාල් පතක් ගරලා....
කුඩා ළමුන් පිරිසක් ඉහත පැදි පෙළ කියමින් අත් පෙළට තබා යම් ක්‍රීඩාවක යෙදේ.අයෙක් මෙය කියවමින් අතින් අතට තට්ටු කරමින් ක්‍රීඩාවේ නිරත වේ.
අපද කුඩා කළ මේ ක්‍රීඩාව කර ඇත්තෙමු.එහෙත් මෙහි අග මුල සොයන්නට කිසි විටෙක උත්සහා නම් නොකරන්නට ඇත.
ඇත්තෙන්ම මෙහි අක්මුල් සෙවීමෙදී ඉතා රසවත් කතාවක් හමු වුණා.ඇත්තටම මේක සෙල්ලමට යොදාගන්න කලින් ලියවුනේ කෙනෙක්ව අපහසුතාවයට පත් කරන්න ලියන දැන්වීමක් නැත්නම් සරළව කිවොත් කැලෑ පත්තරයක් කීවොත් ඔබ විශ්වාස කරාවිද දන්නේ නෑ.
කතාව මෙහෙමයි.මේකේ අතීතය සීතාවක රාජධානිය දක්වා දිවයනවා.ඒ කාලේ සීතාවක රාජධානිය පාලනය කලේ රාජසිංහ රජ්ජුරුවෝ.හරිම තේජවන්ත වගේම ගොඩක් රස කතා මේ රජ්ජුරුවෝ එක්කත් බැඳිලා තියෙනවා.
මේ රජතුමාගේ කාලේ ලංකාවට ඉන්දියාවෙන් පෙරුමාල් වරු සත් කට්ටුවක් ලංකාවට ආවලු.මෙයින් එක්කෙනෙක් වුන 'අරිට්ඨ කීවෙන්ඩු' කියන පෙරුමාල් වරයා රජු එක්ක ඉතා හොඳ සම්බන්ධයකුත් හදාගත්තා.
කොහොමින් කොහොම හරි 'මනම්පෙරුම මොහොට්ට්' කියන නමින් සිංහලයට කුලවද්දන ලද (සිංහල කෙනෙක් බවට පත්වීම) මේ පුද්ගලයා උපායෙහි වගේම රණකාමීත්වයෙන් පිරුණ දක්ෂයෙක් වුණා.
ඔහු කොතරම් දක්ෂයෙක් වුනාද කීවොත් අවසානයට රජසිංහ රජ්ජුරුවෝ තමන්ගේ ආගම වෙච්ච ශිව ආගමට පවා හරවගන්න මොහු සමත් වුණා.
රාජසිංහ රජ්ජුරුවෝ මියගියේ උණ කටුවක් ඇනිලා කියලා කතාව හැමෝම දන්නවනේ.ඒකෙදී ඇත්තටම වෙලා තියෙන්නේ රජතුමා මිය ගියාට පස්සේ කිරුළ හිමිවන බව දන්න රාජසූරීය කියන රජතුමාගේ මුණබුරත් දොඩම්පේ ගණිතයත් එකතු වෙලා තුවාලයට විශ බඳිමින් කළ කුමන්ත්‍රණයක් නිසා කියලා කතාවක් තියෙනවා.
ඉතින් රාජසිංහ රජතුමා මියගියාට පස්සේ කිරුළ දරන්නේ රාජසූරිය කියන කුමාරයා.මෙම රාජප්‍රාප්තියට ඉස්සෙල්ලා කීව මාන්නප්පෙරුම අකමැති වෙනවා.
රාජසූරිය රජතුමා දොඩම්පේ ගණිතයාගේ දුවෙක් මානියංගම කියන පැත්තේ නවත්වලා රෑට රෑට බලන්න යනවාලු.
ඒ අවස්ථාවෙදි ඔහු කරන්නේ රජතුමාගේ වැඩිමහල් සොයුරිය වුන මත්තමගොඩ මහ බිසෝ බණ්ඩාර එක්ක එකතු වෙලා රාජසූරිය රජතුමාව මරා දමලා මහබිසෝ බණ්ඩාරගේ අවුරුදු පහක පොඩි පුතා වුන 'නිකපිටියේ බණ්ඩාර' ව රජ කරනවා.
දැන් සීතාවක පාලනය කරන්නේ අවුරුදු පහක නිකපිටියේ බණ්ඩාර.එහෙම කීවට ඇත්තටම පරිපාලනමය කටයුතු ඔක්කොම වගේ සිදුකලේ අර කීව මාන්නප්පෙරුම.
මේ කාලේ පෘතුගීසි රටේ පාලනයට එහෙන් මෙහෙන් අත දාන කාලේ.රටේ වෙරළබඩ කොටසක් අල්ලගෙන වෙළඳාම් කර කර හිටපු පෘතුගීසින්ට මේක ආරංච් වෙනවා.අරාජික වෙල කියලා හිතපු සීතාවක අල්ලගන්න දියෝගුද සිල්වා කියන පෘතුගීසි යුධ නායකයා සේනාවක් අරන් එනවා.නමුත් සීතාවක ඇත්තටම පාලනය කරපු මාන්නප්පෙරුම නැත්නම් අරිට්ඨ කීවෙණ්ඩු එළව එළවා පහරදීලා පෘතුගීසි එළවනවා.
උපායෙහි දක්ෂ අරිට්ඨ කීවෙණ්ඩුටත් රටේ රජ කම ගන්න ආසවක් ඇතිවෙනවා.නමුත් උරුමය නැතුව රජ වෙන්න නම් බෑ.ඒකට උපායක් විදියට ඔහු කරන්නේ බිසෝ බණ්ඩාරගේ දුව තමන්ට විවාහා කරලා දෙන්න කියලා ඉල්ලපු එක.
බිසෝ බණ්ඩාරටත් ඕක එකපාර ප්‍රතිශේප කරන්න බැරි වුණා.සියලු දේම දැනන් හිටියෙත් පාලනය කලෙත් මාන්නප්පෙරුම.
බිසෝ බණ්ඩාර කරන්නේ මේ ගැන මහ අතපත්තුවේ දොලොස් හමුදාව බාර අතපත්තු ආරච්චිට මේ ගැන කියනවා.
අතපත්තු කලේ කැළෑ පත්තරයක් ගහලා හැමතැනම ප්‍රචාරය කළ එක.ගැමියන් ලවා මාන්නප්පෙරුම යද්දි ඕකේ තියෙන කවි කියවනවලු ඇහෙන්න.මේ ලැජ්ජාව ඉවසගන්න බැරුව මාන්නප්පෙරුම මොරවත්තට පලා ගියේ ලු.
මාන්නප්පෙරුම නැතුව සීතාවක පාලනය අපහසු බව දැනගෙන නැවත එහෙම වරදක් නොවෙන්න පොරොන්දු කරන් ආයෙම මාන්නප්පෙරුම සීතාවකට කැඳවන්න බිසෝ බණ්ඩාරට සිදුවෙනවා.
ඒත් අර කවි ගායනා නම් නතර වුණේ නෑලු.පොඩි ළමයි සෙල්ලමට වගේ ඒවා දිගටම ගායනා කළ අතර
" අතුරු මිතුරු දඹදිවතුරු රාජ කපුරු සෙට්ටියා
අලුත ගෙනා මනමාලිට හාල්පතක් ගරලා
ඉහළ ගෙටත් බෙදාළා පහල ගෙටත් බෙදළා
උස කොල්ලෝ පේලියයි මිටි කොල්ලෝ පේළියයි
කුකුළ කපලා වැට මුල්ලේ කිකිළි කපලා වැට මුල්ලේ
කලු කපුටා සුදු වනතුරු මෝල් ගහේ දළු ලනතුරු බලා හිඳින් සෙට්ටියෝ"
මින් කියවෙන්නේ කිසිදු දිනෙක සිංහල මනාලියක් ලෙස කුමරියව සෙට්ටියා නොහොත් පෙරුමාල් හට නොලැබෙන බව උපහාසයෙන් ප්‍රකාශ කිරීමකි.
කොහොම නමුත් අවසානයේ මුලු සීතාවකත් එක්කම තරහ වුන මාන්නප්පෙරුම පෘතුගීසි වෙතට සේනාවක් අරගෙන යනවා.ගිහින් ජයවීර බණ්ඩාර විදියට කුලවැද්දුම් ලබලා පෘතුගීසි එක්ක ඇවිත් සීතාවක යටත් කරගන්නවා.
කොහොම හරි අවසානයේ ජයවීර බණ්ඩාර රාජ්‍යත්වය ගැන කුමන්ත්‍රණයක් නිසා පෘතුගීසි අතින්ම මිය යනවා.
අතුරු මිතුරු හැදුනේ ඔන්න ඔහොමයි.
උපුටා ගැනීමකී කතෘ නොදනී.ස්තූතියී
