22/05/2024
🕯️ລະລຶກເຫດການສຳຄັນ ວັນວິສາຂະບູຊາ (Vesak Day) ເດືອນ 6 ເພັງ🙏🙏🙏
1️⃣ ເປັນວັນທີ່ ພຣະສັມມາສັມພຸດທະເຈົ້າ ປະສູດ
- ວັນສຸກ ຂຶ້ນ 15 ຄ່ຳ ເດືອນ 6 ປີຈໍ. ທີ່ສວນລຸມພີນີວັນ ລະຫວ່າງກາງກຸງກະບິນລະພັດ ແລະ ກຸງເທວະທະຫະ. ກ່ອນພຸດທະສັກກະຣາຊ 80 ປີ.
2️⃣ ເປັນວັນທີ່ ພຣະສັມມາສັມພຸດທະເຈົ້າ ຕັດສະຮູ້
- ວັນພຸດ ຂຶ້ນ 15 ຄ່ຳ ເດືອນ 6 ປີລະກາ. ໃຕ້ຮົ່ມໂພ ແຄມຝັ່ງແມ່ນ້ຳເນຣັນຊະຣາ ເມືອງອຸຣຸເວລາເສນານິຄົມ. ກ່ອນພຸດທະສັກກະຣາຊ 45 ປີ.
3️⃣ ເປັນວັນທີ່ ພຣະສັມມາສັມພຸດທະເຈົ້າ ປະຣິນິພພານ.
- ວັນອັງຄານ ຂຶ້ນ 15 ຄ່ຳ ເດືອນ 6 ປີມະເສງ. ທີ່ສາລະວາໂນທະຍານ ເມືອງກຸສິນາຣາ ແຄວ້ນມັລລະ.
✍️ການປະສູດ (ເກີດ) ມີ 2 ຄວາມໝາຍ:
1. ພາສາຄົນ ໝາຍເຖິງ ການເກີດທາງເນື້ອໜັງໄດ້ແກ່ ເກີດເປັນເຈົ້າຊາຍສິທທັດຖະຣາຊະກຸມມານ.
2. ພາສາທັມ ໝາຍເຖິງ ການເກີດເປັນພຣະພຸດທະເຈົ້າ ຫຼັງຈາກຕັດສະຮູ້.
✍️ ການປະຣິນິພພານ ມີ 2 ຄວາມໝາຍ
1. ພາສາຄົນ ໝາຍເຖິງ ການຕາຍທາງຮ່າງກາຍ ເມື່ອອາຍຸ 80 ປີ.
2. ພາສາທັມ ໝາຍເຖິງ ການດັບສິ້ນແຫ່ງກິເລສ ເມື່ອອາຍຸ 35 ປີ ເມື່ອດັບກິເລສໝົດສິ້ນແລ້ວ ກໍຕັດສະຮູ້. ໃນພາສາທັມ ໝາຍເຖິງພຣະພຸດທະເຈົ້າຍັງບໍ່ຕາຍ ພຣະອົງເຄີຍຕັດໄວ້ວ່າ “ຜູ້ໃດເຫັນທັມ ຜູ້ນັ້ນເຫັນຕະຖາຄົດ”
👉ດັ່ງນັ້ນຄຳທີ່ເວົ້າວ່າ ປະສູດ ຕັດສະຮູ້ ປະຣິນິພພານ ເປັນວັນດຽວກັນ ວິນາທີດຽວກັນ ໝາຍເອົາພາສາທັມ ພໍກິເລສດັບລົງ ຄວາມສະຫວ່າງສະໄຫວທາງປັນຍາອຸບັດຂຶ້ນ ຄືການຕັດສະຮູ້ນັ້ນເອງ. ທັງ 3 ເຫດການນີ້ເກີດວິນາທີດຽວກັນນັ້ນເອງ.
📍 ເພີ່ມເຕີມ: ວັນວິສາຂະບູຊາ (Vesak day) ຍັງໄດ້ຖືກຍົກຍ້ອງໃຫ້ເປັນວັນສຳຄັນສາກົນ (International Day) ຕາມຂໍ້ມະຕິສະມັດຊາໃຫຍ່ແຫ່ງສະຫະປະຊາຊາດ (UN) ທີ54/112 ລົງວັນທີ 13 ທັນວາ ພ.ສ 2542.
