07/11/2024
#ກອງປະຊຸມຄັ້ງທີ I ຂອງຄະນະຊີ້ນໍາວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ຂັ້ນສູນກາງ
ໃນວັນທີ 7 ພະຈິກ 2024 ນີ້ ທີ່ຫ້ອງວ່າການສໍານັກງານນາຍົກລັດຖະມົນຕີ ໄດ້ມີກອງປະຊຸມຄັ້ງທີ I ຂອງຄະນະຊີ້ນໍາວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ຂັ້ນສູນກາງຂຶ້ນ ໂດຍໃຫ້ກຽດເປັນປະທານຂອງ ທ່ານ ສາດສະດາຈານ ປະລິນຍາເອກ ກິແກ້ວ ໄຂຄໍາພິທູນ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ຫົວໜ້າຄະນະຊີ້ນໍາວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກຂັ້ນສູນກາງ, ເຂົ້າຮ່ວມໃນກອງປະຊຸມຄັ້ງນີ້ ມີທ່ານລັດຖະມົນຕີປະຈໍາສໍານັກງານນາຍົກລັດຖະມົນຕີ, ລັດຖະມົນຕີກະຊວງກະສິກໍາ ແລະ ປ່າໄມ້, ບັນດາຮອງລັດຖະມົນຕີຈາກກະຊວງທີ່ກ່ຽວຂ້ອງ, ຫົວໜ້າກົມໃຫຍ່ການເມືອງກະຊວງປ້ອງກັນປະເທດ, ຮອງຜູ້ວ່າການທະນາຄານແຫ່ງ ສປປ ລາວ, ປະທານສະພາການຄ້າ ແລະ ອຸດສາຫະກໍາແຫ່ງຊາດລາວ, ຜູ້ອໍານວຍການທະນາຄານພັດທະນາຊົນນະບົດທີ່ເປັນຄະນະຊີ້ນໍາວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກຂັ້ນສູນກາງ ພ້ອມດ້ວຍຄະນະກອງເລຂາຊ່ວຍວຽກຄະນະຊີ້ນໍາວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ເຂົ້າຮ່ວມທັງໝົດ 40 ກວ່າທ່ານ.
ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອເຜີຍແຜ່ຂໍ້ຕົກລົງຂອງທ່ານ ນາຍົກລັດຖະມົນຕີວ່າດ້ວຍການແຕ່ງຕັ້ງຄະນະຊີ້ນໍາວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກຂັ້ນສູນກາງ ສະບັບເລກທີ 121/ນຍ, ລົງວັນທີ 02 ກັນຍາ 2024, ຮັບຟັງການລາຍງານກ່ຽວກັບການຈັດຕັ້ງປະຕິບັດວຽກງານພັດທະນາຊົນນະບົດ ແລະ ແກ້ໄຂ ຄວາມທຸກຍາກ ໃນໄລຍະ ປີ 2021-2023 ຜ່ານມາ ແລະ ທິດທາງແຜນການຮອດປີ 2025, ປຶກສາຫາລືເປັນເອກະພາບ ກ່ຽວກັບການແບ່ງຄວາມຮັບຜິດຊອບພາຍໃນຄະນະ ແລະ ການພິຈາລະນາຮັບຮອງເອົາແຜນການເຄື່ອນໄຫວຂອງຄະນະຊີ້ນໍາວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກຂັ້ນສູນກາງເພື່ອເປັນບ່ອນອີງໃນການຈັດຕັ້ງປະຕິບັດ
