01/12/2025
អភិបាលស្រុកស៊ីធរកណ្ដាល ជំរុញការប្រើប្រាស់បច្ចេកទេសកសិកម្មថ្មី ដល់ប្រជាកសិករ ក្នុងកិច្ចប្រជុំដែលរៀបចំដោយសមាគមសហព័ន្ធយុវជនសេដ្ឋកិច្ចកម្ពុជា
(ខេត្តព្រៃវែង) ៖ នាព្រឹកថ្ងៃទី១ ខែធ្នូ ឆ្នាំ២០២៥ លោក យឹម យូគង់ អភិបាលស្រុកស៊ីធរកណ្ដាល បានអញ្ជើញជាអធិបតីបើកកិច្ចប្រជុំផ្សព្វផ្សាយស្ដីពីបច្ចេកទេសកសិកម្មទំនើប ដើម្បីលើកកម្ពស់ផលិតភាព និងគុណភាពកសិផលក្នុងមូលដ្ឋាន។
កិច្ចប្រជុំនេះ រៀបចំឡើងដោយសមាគមសហព័ន្ធយុវជនសេដ្ឋកិច្ចកម្ពុជា (CEYF) ដោយមានការចូលរួមពីតំណាងក្រុមហ៊ុនដៃគូសហការ, ប្រធានការិយាល័យកសិកម្ម ធនធានធម្មជាតិ និងបរិស្ថានស្រុក, លោក លោកស្រី មេឃុំ, មន្រ្តីកសិកម្មឃុំ និងប្រជាកសិករសរុបមកពីឃុំទាំង ១១ ក្នុងស្រុកស៊ីធរកណ្ដាល ខេត្តព្រៃវែង។
ថ្លែងក្នុងឱកាសនោះ លោកអភិបាលស្រុក បានសង្កត់ធ្ងន់ថា វិស័យកសិកម្ម គឺជាឆ្អឹងខ្នងដ៏សំខាន់នៃសេដ្ឋកិច្ចមូលដ្ឋាន ដែលតម្រូវឱ្យប្រជាកសិករទាំងអស់ ខិតខំទទួលយកនូវចំណេះដឹងថ្មីៗ ដើម្បីប្រែក្លាយរបរកសិកម្មបែបប្រពៃណី ទៅជាកសិកម្មសម័យទំនើប និងឆ្លាតវៃ។ លោកបានជំរុញឱ្យមានការអនុវត្តបច្ចេកទេសថ្មីៗ ក្នុងការកាត់បន្ថយការចំណាយ បង្កើនទិន្នផល និងធានាបាននូវគុណភាពកសិផល ស្របតាមតម្រូវការទីផ្សារទាំងក្នុង និងក្រៅប្រទេស។
លោកអភិបាលក៏បានថ្លែងអំណរគុណដល់សមាគមសហព័ន្ធយុវជនសេដ្ឋកិច្ចកម្ពុជា និងក្រុមហ៊ុនដៃគូ ដែលបានចូលរួមយ៉ាងសកម្មក្នុងការផ្ដល់វគ្គបណ្ដុះបណ្ដាល និងចែករំលែកបទពិសោធន៍សំខាន់ៗពាក់ព័ន្ធនឹង៖
ការជ្រើសរើសពូជដំណាំមានគុណភាពខ្ពស់។
ការប្រើប្រាស់ជី និងថ្នាំកសិកម្មប្រកបដោយប្រសិទ្ធភាព និងសុវត្ថិភាព។
បច្ចេកទេសគ្រប់គ្រងទឹក និងដីឱ្យបានត្រឹមត្រូវ។
វត្តមានរបស់ប្រជាកសិករទូទាំងស្រុកស៊ីធរកណ្ដាល បានបង្ហាញពីការយកចិត្តទុកដាក់ខ្ពស់ចំពោះការអភិវឌ្ឍន៍វិស័យកសិកម្ម និងការត្រៀមខ្លួនរួចជាស្រេចក្នុងការប្រែក្លាយចំណេះដឹងទាំងនេះ ទៅជាសកម្មភាពជាក់ស្តែង ដើម្បីបង្កើនប្រាក់ចំណូលគ្រួសារ និងរួមចំណែកដល់សន្តិសុខស្បៀងក្នុងតំបន់។
កិច្ចប្រជុំផ្សព្វផ្សាយបច្ចេកទេសកសិកម្មនេះ ត្រូវបានរំពឹងថា នឹងក្លាយជាកម្លាំងចលករដ៏សំខាន់មួយ ក្នុងការលើកស្ទួយសមត្ថភាព និងផលិតភាពរបស់កសិករស្រុកស៊ីធរកណ្ដាល ឆ្ពោះទៅកាន់កំណើនសេដ្ឋកិច្ចប្រកបដោយចីរភាព។
