28/08/2023
សម្រេចចិត្តបែបណាទើបត្រឹមត្រូវ?
ក្នុងការសម្រេចចិត្តមនុស្សម្នាក់ៗ ប្រហែលជាមានភាពភ័យខ្លាច ព្រោះថានៅក្នុងការសម្រេចចិត្តក្នុងការធ្វើអ្វីមួយ គឺយើងអាចប្រឈមនឹងការសម្រេចចិត្តខុស ខាតប្រយោជន៍ឬបាត់បង់ឪកាសជាដើម ជាពិសេសទៀតនោះ ការសម្រេចចិត្តនឹងរឹងរិតតែប្រឈមនឹងហានិភ័យ ប្រសិនបើយើងខ្វះបទពិសោធ។ ប៉ុន្តែនៅក្នុងជីវិតរបស់យើងគឺតម្រូវឲ្យយើងធ្វើការសម្រេចចិត្តជានិច្ចនិរន្តរ៍។ យើងនឹងត្រូវធ្វើការសម្រេចចិត្តនៅលើរឿងរ៉ាវកាន់តែធំ និងមានទំនួលខុសត្រូវ ព្រមទាំងហានិភ័យកាន់តែខ្ពស់ នៅពេលដែលយើងមានបទពិសោធកាន់តែច្រើន និងវ័យកាន់តែចាស់ទុំ។ តាមពិតទៅយើងមិនអាចធានាយ៉ាងប្រាកដថាគ្រប់ការសម្រេចចិត្តរបស់យើង
សុទ្ធតែត្រឹមត្រូវ និងផ្តល់ផលប្រយោជន៍ចំពោះយើងរហូតនោះទេ។ ប៉ុន្តែ យើងអាចធ្វើឲ្យការសម្រេចចិត្តរបស់យើងក្លាយជារឿងត្រឹមត្រូវសម្រាប់ខ្លួនឯង។ អ្វីទៅជាការសម្រេចចិត្តត្រូវចំពោះខ្លួនឯង? ត្រូវចំពោះខ្លួនឯង គឺមាន
ន័យថា ទោះជាលទ្ធផលបែបណាក៏ដោយដែលកើតចេញពីការសម្រេចចិត្តនោះ គឺយើងនឹងទទួលយកវា ព្រោះថាការសម្រេចចិត្ត វាគ្រាន់តែជាចំណុចចាប់ផ្តើមប៉ុណ្ណោះ លទ្ធផលល្អឬមិនល្អវាអាស្រ័យទាំងស្រុងលើសកម្មភាព
របស់យើង។ ដូច្នេះ ដើម្បីទទួលបានលទ្ធផលល្អគឺយើង ត្រូវតែធ្វើសកម្មភាព និងត្រូវត្រួតពិនិត្យសកម្មភាពរបស់យើងជាប្រចាំ ហើយធ្វើយ៉ាងណាឲ្យការសម្រេចចិត្តរបស់គឺជារឿងត្រឹមត្រូវសម្រាប់ខ្លួនឯងបំផុត។
