17/12/2024
លិខិតសូមអភ័យទោសពី MOONTON Games
ប្រាសាទអង្គរវត្ត គឺជាតំណាងដ៏រុងរឿងនៃស្ថាបត្យកម្មខ្មែរបុរាណ ដែលជាចំណុចកំពូលនៃសិល្បៈខ្មែរដ៏រុងរឿង និងជាកេរដំណែលដ៏មានតម្លៃសម្រាប់មនុស្សជាតិ។ សំណង់ដ៏មហិមា និងចម្លាក់ដ៏ល្អវិចិត្រ បានបង្ហាញពិភពលោកឱ្យឃើញពីភាពអស្ចារ្យនៃអរិយធម៌ខ្មែរដ៏ចំណាស់ ដែលបន្សល់ទុកនូវការកោតសរសើរ និងការចាប់អារម្មណ៍យ៉ាងខ្លាំងចំពោះអាថ៌កំបាំង និងភាពអស្ចារ្យនៃប្រាសាទនេះដល់មនុស្សគ្រប់ជំនាន់។
យើងខ្ញុំមានការសោកស្តាយយ៉ាងខ្លាំងចំពោះកំហុសក្នុងការបង្ហាញរូបភាពប្រាសាទអង្គរវត្តខុសប្រទេស ក្នុងអំឡុងពេលការប្រកួតផ្តាច់ព្រ័ត្រ M6។ កំហុសនេះបានធ្វើឱ្យប៉ះពាល់យ៉ាងខ្លាំងដល់អារម្មណ៍របស់អ្នកកម្សាន្ដក៏ដូចជាប្រជាជនកម្ពុជាទាំងអស់ និងធ្វើឱ្យមានការខកចិត្តចំពោះការសាទរ និងការរំពឹងទុកនៃការចូលរួមប្រកួតជើងឯកពិភពលោក M6 របស់ប្រទេសទាំងអស់ រួមទាំងប្រទេសកម្ពុជាផងដែរ។
MOONTON Games គោរពយ៉ាងខ្ពស់ចំពោះអរិយធម៌ពិភពលោក និងអារម្មណ៍ជាតិសាសន៍នីមួយៗ។ យើងខ្ញុំសូមសម្តែងនូវការសោកស្តាយយ៉ាងក្រៃលែងចំពោះផលប៉ះពាល់ដែលហេតុការណ៍នេះបានបង្កឡើងដល់សហគមន៍ ហើយយើងខ្ញុំនៅទីនេះ សូមធ្វើការសូមអភ័យទោសដោយស្មោះអស់ពីចិត្ត។ លើកង្វះខាតភាពម៉ត់ចត់ក្នុងការគ្រប់គ្រងការប្រកួតអន្តរជាតិ។ គណៈកម្មការនឹងរៀនសូត្រពីបទពិសោធន៍នេះ ហើយយើងនឹងធ្វើការត្រួតពិនិត្យឲ្យកាន់តែតឹងរ៉ឹងលើលទ្ធផល ជាពិសេសព័ត៌មានដែលទាក់ទងនឹងវប្បធម៌ក្នុងតំបន់ សង្កត់ធ្ងន់លើសារៈសំខាន់នៃការបង្ហាញតំបន់នានាឱ្យបានត្រឹមត្រូវក្នុងការប្រកួតអន្តរជាតិ និងលើកកម្ពស់ទំនួលខុសត្រូវសង្គមរបស់យើងខ្ញុំក្នុងនាមជាអ្នករៀបចំការប្រកួត។
ការប្រកួត M Series ត្រូវបានរៀបចំឡើងចំនួនប្រាំមួយលើកមកហើយ។ យើងខ្ញុំពិតជាមានការកោតសរសើរយ៉ាងក្រៃលែងចំពោះសមត្ថភាពដ៏ឆ្នើមរបស់ក្រុម MLBB Esports តំណាងប្រទេសកម្ពុជាផងដែរ។
យើងខ្ញុំក៏បានទទួលអារម្មណ៍ភាពរីករាយរបស់អ្នកកម្សាន្ដ និងអ្នកគាំទ្រប្រទេសកម្ពុជា តាមរយៈការរៀបចំ MSC ឆ្នាំ២០២៣ ផងដែរ។ អស់រយៈពេលជាច្រើនឆ្នាំមកនេះ យើងខ្ញុំក៏ទទួលបានអារម្មណ៍កក់ក្តៅយ៉ាងជ្រាលជ្រៅពីក្តីស្រឡាញ់ និងចំណង់ចំណូលចិត្តរបស់អ្នកកម្សាន្ដក្នុងប្រទេសកម្ពុជាចំពោះ MLBB និងវិស័យ esports របស់យើង។ យើងខ្ញុំសូមសម្តែងនូវក្តីសង្ឃឹមយ៉ាងមុតមាំក្នុងការបង្កើតអនុស្សាវរីយ៍ដ៏មានតម្លៃបន្ថែមទៀតជាមួយគ្នារាប់មិនអស់ដែលជាកម្មសិទ្ធិរវាង MLBB និងអ្នកកម្សាន្ដក្នុងប្រទេសកម្ពុជានៅពេលអនាគត។
ជាថ្មីម្តងទៀត សូមអនុញ្ញាតឱ្យយើងខ្ញុំសូមសម្តែងនូវការសុំទោសយ៉ាងជ្រាលជ្រៅបំផុតចំពោះផលប៉ះពាល់នៃឧប្បត្តិហេតុនេះបានបង្កឡើងដល់សហគមន៍។ បទពិសោធន៍មួយនេះនឹងទុកជាមេរៀនដ៏សំខាន់សម្រាប់យើងខ្ញុំក្នុងការខិតខំកែលម្អហ្គេម និងព្រឹត្តិការណ៍នានាឱ្យកាន់តែប្រសើរឡើង និងយកចិត្តទុកដាក់លើវប្បធម៌គ្រប់ប្រទេសជាកាតព្វកិច្ចចម្បង។
យើងពិតជាសូមអរគុណដោយស្មោះចំពោះការគាំទ្រដ៏ធំធេងរបស់អ្នក។
