13/03/2024
Title:Ng'alaldos kotab kimagetok
Kitun kong'et akiyot ne kimi osnet Kocheng'oti kumik ak kerichek kwo kot koimenit.Kingosiogu Kemboi koweksei kaa kogas anyun bich che king'alaldos.Kilany ketit Barak ak kosis amu kiingen kole ngot ko bunik bichoto komuch kobar anan koguoyen ine.
Kingota kounyegei eng ketit Barak kogas anyun kong'alaldos pichukai akobo chitab kokwet ne ki chio.Kolen age"Ara katakotyachkei nebo Aramirmet?"Kowolchi ake kole "Sere,kanyor saram ;werit ak tie" Koteeb anyun ake kole "Ara kakibarchi ano lagochut?"Kowol age anyun kole"Barei iyotet chepto,kobar Soet ng'etet."Kitiem konyit anyun bichukai ogiyot Koro kwong'ut amu kimo komi chi kobate kimagetok.
Kingobata kasarta ne koi,kogatoi korir emet,kochortagei ogiyot ak kwo kochakta gaa.kiit anyun ak kogas Iman kole nga kogesich saram eng kamirmet.Kiutie anyun ng'alek che kigas kimagetok kong'alaldos agoi betut be kigitun chepto kobwat anyun.Kogur boiyo agenge komwoch ng'alek Ako maiyan ng'alekab ogiyot chichoto.Kingomanach chepto ak korik betutab iyotet,Koimgei mising,kikitiem ketoret Ako maimugak.Kosich lakwet ak kogeskei ine.
Kiguur Ogiyot boisiekab kokwet tugul ak komwochi ng'alekab Kimagetok.Kolenji"Boisiechu,ongen ole Ng'alaldos kotab kimagetok?Kingesiche lagochut ko kiami osnet koimenit ak aunyegei ketit Barak kogagas bich kobwonei.Ogeero,kiagas kimagetok komaoten akobo meetab saramek che kagisich eng kamirmet.Kole Barei iyotet chepto ak kobar Soet ng'etet.Nguni amache mising Kerib ng'etet SI mabar Soet."Kibiit anyun ng'oiyondit ib kong'et boiyo ne o ak kole."Kokwoni,Oeb it.Kimwa chi bo keny kole miach lembech,amache Kerib ng'alekab ogiyot ak ngokas awendob ng'otwek kerat ak kekerchi ko ng'etet ab Aramirmet SI matun bar Soet.
Kiibata betusiek che matianit,Koit Soet ne kisogorkei ak komach kobar mestowek che kimi akwot.Kibiit wagat kolen "awen bo ng'otwo..osaru olmekenyu..'Kimang murenik ak ng'otwek ak kerat ng'etet ab Aramirmet SI mawo awendob.Kingo kakebar Soet,Kosom werikai kole"Ochamwo angot aro is kityo ,ngalen kakebar Soet.'
Kigitiach ak kwo ole kigienye Soet.Kingorikyi yot ,Konam kiy neu kiptaleit ak koterter kobutyi metitab Soet.Kitor kuinetab Soet kosore karosoik akoi muguleldo.
Eng arogenet neo,koyan bike tugul ng'alekab ogiyot kole: Ng'alaldos kotab kimagetok.
