05/05/2024
Mézanmi, jou a larenn rivé !
Athanaise Ludovique Bach Dino, yo té ka kriyé-w Man Soso. Nou ka gloriyé-w jou 2 mé 2024 lasa.
Men wi ! Ou fèt on jou 2 mé 1918 an konmin Tibou.
Ou viv pannan 99 lanné ! Mi fanm mi !
Kanmenmsa, pou vou, lavi-la pa té on sik-a-koko a tèt wòz, men ou sé on fanm-doubout ki konnèt maré ren a-y solid. Pou sa tousèl, ou sé on fòs, on limyè pou nou.
Aahhh Man Soso nou savé la ou yé la, ou dwèt ka dansé touléjou !
Man Soso sé té moun toubòlman !
Jòdijou nou ka louanjé mémwa a-w, fòs a-w.
Man Soso, sé tantann a-w ki lévé-w. I pa voyé-w lékòl.
Apré siklòn 28, ou k’ay rété Lapwent èvè manman-w. Ou k’ay lensisyon.
Ou ka koumansé travay a 16, 17 lanné. Ou ka fè mennaj aka moun ; lè ou ka koumansé vi a madanm a-w, ou ja gyòk gyòk a-w, davwa ou pa bamou a p’onmoun !
Ou Lapwent lè ou ka akouché prèmyé timoun a-w, Gi Konkèt, on gran mèt Ka, ki maké listwa a mizik Gwadloup.
Dayèpouyonn, sé-w menm ki di sé Lapwent ou vin konnèt bal a òwkès, la tout kalité dansé té ka jwenn.
Aprésa, ou ka chayé Jabren, ou ka maré kann. Sé lamenm ou ka wouvè Baw a léwòz a-w. Sé la osi tifi a-w ka fèt ; é ou ka kontré Sonò.
Ou ka fè tout kalité moun rantré an gwoka, kon Simòn Minervin fè èvè-w : ti Nèg kon gwokyap, madanm kon misyé. Moun ka malpalé-w, ka sali charité a-w ; men ou byen fouben. Chak kenzenn, baw-la ka kontinyé bay.
Gason a-w Gi Konkèt ka maché èvè sendika ; toutmoun vin konnèt-li. Sanblé politik, mizik, kilti ka fèt Jabren, adan baw-la, la gran mouvman a lalit fèt, anba gidonnaj a Tènizyen Nomertin, pou nonm é fanm Gwadloup rivé pran doubout a yo.
Ou ka kenbé baw-la kon dontèz, é ou ka wousouvwè tout kalité moun ; ou pa té ka gadé ni ras ni koulè a yo.
Men sa ou pisimyé, sé Gwotanbou-la. Ou enmé dansé, chanté, é ou ka ba onpakèt madanm plas pou yo dansé, chanté, é jwé tanbou osi adan Léwòz.
Ou té ni fòs épi kouraj, ou pa té pè, ou té savan, davwa gras a-w dòt madanm vin mayé èvè Gwoka-la.
Ou monté an filawo on jou 22 òktòb 2017. Yo gloriyé-w an gran, sèten Gangann té kontan sa.
Fanmkika pa ka obliyé-w. Jòdla sé jou a-w, fèt a-w. Nou ka chonjé tousa ou lésé ban-nou. Nou ka chonjé valè ou té ka défann.
Lonnè é Rèspé Larenn Man Soso.
Photo France Antilles, 22 octobre 2017
N°1 mé 2024
