Era's Eye News and Media

16/01/2025

မန္တလေးမှာ ဆိုင်ကယ်စီးလာတဲ့ အမျိုးသားတစ်ဦးကို စစ်ကောင်စီတပ် ပစ်ခတ်ရာက သေ‌ဆုံးခဲ့

ဇန်နဝါရီလ (၁၆)ရက်။

ဒီကနေ့ နံနက် (၅)နာရီခွဲအချိန်က မန္တလေး ပြည်ကြီးတံခွန်မြို့နယ်မှာ ဆိုင်ကယ်စီးလာတဲ့ အမျိုးသားတစ်ဦးကို စစ်ကောင်စီတပ်က ပစ်ခတ်ခဲ့ရာ သေဆုံးခဲ့တယ်လို့ ‌မြို့ခံတွေရဲ့ ပြောဆိုချက်အရ သိရပါတယ်။

"ဖြစ်တာက ပြည်ကြီးတံခွန် (၁၂၅)လမ်း၊ (၅၉)နဲ့ လမ်း(၆၀)ကြား (စ)ဈေးအနောက်ဘက်မှာဖြစ်တာ။ ဆိုင်ကယ်စီးလာတဲ့ အမျိုးသားကို ကားပေါ်ကနေ စခ၊ရခတွေက သေနတ်နဲ့လှမ်းပစ်တာ"လို့ ရပ်ကွက်နေသူတစ်ဦးက ဆိုပါတယ်။

ဆိုင်ကယ်စီးလာသူ အမျိုးသားတစ်ဦးကို စစ်ကောင်စီတပ်ဖွဲ့ဝင်တွေက Hondafit အိမ်စီးကားပေါ်ကနေ သေနတ်နဲ့ပစ်ခတ်ခဲ့တာကြောင့် ထိမှန်သေဆုံးခဲ့ပြီး အကြောင်းအရင်းအသေးစိတ်ကိုတော့ အတည်မပြုနိုင်သေးပါ။

အခုလို ပစ်ခတ်ခဲ့တဲ့ဖြစ်စဉ်ကို စစ်ကောင်စီသတင်းချန်နယ်တွေကတော့ ဆိုင်ကယ်ကို စစ်ဆေးဖို့ ရပ်တန့်ခိုင်းချိန် ဆိုင်ကယ်အနောက်ကနေ လိုက်ပါလာသူက ဓါးနဲ့ခုတ်တာကြောင့် ပစ်ခတ်ခဲ့တာလို့ ဖော်ပြထားပါတယ်။

ဖြစ်စဉ်ထဲ ဆိုင်ကယ်မောင်းနှင်လာတဲ့ အမျိုးသားကတော့ ထွက်ပြေးလွတ်မြောက်ခဲ့ပြီး သေနတ်ထိမှန်ခဲ့သူဟာ ယာဝမ်းဗိုက် ကျည်ဖောက်ထွက်ဒဏ်ရာ ရရှိခဲ့ပြီး နေရာမှာပဲ သေဆုံးသွားခဲ့တယ်လို့ သိရပါတယ်။

စစ်ကောင်စီတပ်ရဲ့ ပစ်ခတ်ခံရတာကြောင့် သေဆုံးသွားခဲ့တဲ့ အမျိုးသားရဲ့ ရုပ်အလောင်းကို လူမှုကူညီရေးအသင်းက လူနာတင်ယာဉ်နဲ့ မန္တလေးဆေးရုံကြီးကို ပို့ဆောင်ခဲ့တယ်လို့ ဖော်ပြထားပါတယ်။

စစ်ကောင်စီတပ်ဖွဲ့ဝင်တွေဟာ ပြည်သူတွေကို မထင်ရင်မထင်သလို ဖမ်းဆီးသတ်ဖြတ်နေကာ သေဆုံးသွားသူတွေနဲ့ ဖမ်းမိသူတွေကို အကြောင်းအမျိုးမျိုးပြပြီး မတရားပုဒ်မတပ်တာတွေ ပြုလုပ်နေတာလို့ သိရပါတယ်။

16/01/2025

ရန်ကုန်မှာ အငှားယာဉ်မောင်းတစ်ဦး ဓါးဒဏ်ရာတွေနဲ့ သေဆုံးမှုဖြစ်ပွား

ဇန်နဝါရီလ (၁၆)ရက်။

မနေ့က ည (၉)နာရီ (၅၀)မိနစ်အချိန်က ရန်ကုန်တိုင်း ဒေါပုံမြို့နယ်မှာ အငှားယာဉ်မောင်း အမျိုးသားတစ်ဦး ဓါးဒဏ်ရာတွေနဲ့ သေဆုံးမှုဖြစ်ပွားခဲ့တယ်လို့ မြို့ခံတွေရဲ့ ပြောဆိုထားချက်တွေအရ သိရပါတယ်။

"ဒေါပုံ ဇေယျာသီရိ(၆)လမ်းထိပ် ပေ(၈၀)လမ်းပေါ်မှာ တက္ကစီကားပေါ် အကြမ်းဖက်ခံထားရပြီး ဓါးဒဏ်ရာတွေနဲ့ သေဆုံးနေတာကို တွေ့တာပါ။ အကြမ်းဖက်ခံရပြီး သေဆုံးတဲ့သူက ဇေယျာသီရိရပ်ကွက်ထဲ နေတဲ့သူပါ"လို့ ဆိုပါတယ်။

သေဆုံးသူ အငှားယာဉ်မောင်း အမျိုးသားဟာ ဒေါပုံမြို့နယ် ဇေယျာသီရိရပ်ကွက်နေသူဖြစ်ပြီး ကားပေါ်မှာ လည်ပင်းပြတ်ရှဒဏ်ရာနဲ့ ဘယ်ဘက်ရင်အုံထိုးသွင်းဒဏ်ရာတို့နဲ့ သေဆုံးခဲ့တာလို့ သိရပါတယ်။

ဓါးဒဏ်ရာတွေနဲ့ သေဆုံးခဲ့တဲ့ အငှားယာဉ်မောင်းကို သက်ဆိုင်ရာလူမှုကူညီရေးအသင်းတွေက အရေးပေါ်လူနာတင်ယာဉ်နဲ့ ရန်ကုန်ဆေးရုံကြီးသို့ ပို့ဆောင်ခဲ့တယ်လို့ ပြောဆိုထားပါတယ်။

အခုလို အငှားယာဉ်မောင်း သတ်ဖြတ်ခံရတဲ့ဖြစ်စဉ်နဲ့ပတ်သက်ပြီး အကြောင်းအရင်းအသေးစိတ်ကိုတော့ မသိရသေးဘဲ အခုဖြစ်စဉ်ကြောင့် အခြားအငှားယာဉ်မောင်းတွေ သတိထားကြဖို့ အသိပေးတာတွေ ရှိနေပါတယ်။

စစ်တပ်အာဏာသိမ်းတာကြောင့် ရန်ကုန်မြို့အပါအဝင် မြို့ကြီးတွေမှာ လုယက်သတ်ဖြတ်တဲ့ဖြစ်စဉ်တွေ မကြာခဏဆိုသလို ဖြစ်ပွားနေပြီး ပြည်သူတွေအနေနဲ့ လူမှုဘဝလုံခြုံရေး စိုးရိမ်မှုတွေရှိနေကြတယ်လို့ သိရပါတယ်။

16/01/2025

ဖားကန့်မှာ ရွှံ့နွံကန်ပြိုကျတဲ့ဖြစ်စဉ်ထဲ သေဆုံးသူ (၃၁)ဦးအထိရှိခဲ့

ဇန်နဝါရီလ (၁၆)ရက်။

ဖားကန့်မြို့ ဆိပ်မူကျေးရွာအုပ်စုရှိ စပေါ့ကျေးရွာအနီး ရွှံ့နွံကန်ပြိုကျတဲ့ဖြစ်စဉ်ထဲ သေဆုံးသူ (၃၁)ဦးအထိရှိခဲ့တယ်လို့ မြေပြင်ကူညီပေးနေတဲ့ လူမှုကုညီရေးအဖွဲ့တွေရဲ့ ဒီကနေ့မှာ ပြောဆိုထားချက်အရ သိရပါတယ်။

"စပေါ့ရွာမှာ ရွှံ့နွံကန်ပြိုကျတာမှာ (၃)ရက်ထဲ ရှာဖွေခဲ့တာ ရွံတွေအောက်ကနေ သေဆုံးအလောင်းတွေ ပြန်တွေ့ခဲ့တာပါ။ မနေ့ကအထိ ရုပ်အလောင်း (၃၁)လောင်းအထိ ပြန်တွေ့ထားပြီးဖြစ်ပါတယ်။ သေဆုံးသူထဲ ကိုယ်ဝန်သည်တစ်ဦး ပါတယ်"လို့ ဆိုပါတယ်။

ဇန်နဝါရီလ (၁၃)ရက်နေ့ နံနက်အစောပိုင်းအချိန်က စပေါ့ကျေးရွာရှိ ကျောက်မျက်တူးဖော်ရေးကုမ္ပဏီလုပ်ကွက်က ရွှံ့နွံကန်ပြိုကျတာမှာ နေအိမ် (၅၀)ကျော် ရွှံ့နွံအောက်နစ်မြုပ်ခဲ့တယ်လို့ သိရပါတယ်။

ရွှံ့နွံကန်ပြိုကျတာမှာ (၃)ရက်တာထဲ ရှာဖွေတွေ့ရှိခဲ့တဲ့ ရုပ်အလောင်း (၃၁)လောင်းမှာ ကလေးငယ်တွေနဲ့ အမျိုးသမီးတွေ ပါဝင်သလို ကိုယ်ဝန်ဆောင်သည် အမျိုးသမီးတစ်ဦးလဲ ပါဝင်ခဲ့တယ်လို့ ပြောဆိုထားပါတယ်။

အခုအခါ ရွှံ့နွံကန်ပြိုကျတဲ့ ဖြစ်စဉ်ထဲ ရှာဖွေကယ်ဆယ်ရေးလုပ်ငန်းကို ရပ်နားခဲ့ပြီဖြစ်ကာ သေဆုံးသူတွေကို ဒီကနေ့ နေ့လယ် (၁)နာရီအချိန်မှာ သင်္ဂြိုလ်သွားမှာဖြစ်ပါတယ်။

စပေါ့ရွာထိပ်ရှိ နွံကန်ပြိုကျလာနိုင်တာကို အခုလဆန်းပိုင်းမှာ KIO တာဝန်ရှိသူတွေက သတိပေးတာနဲ့ လုပ်ငန်းတွေ ရပ်ဆိုင်းထားဖို့ အကြောင်းကြားခဲ့ပေမယ့် ဆက်လက်လုပ်ကိုင်နေရာက ဖြစ်စဉ်ဖြစ်ပွားခဲ့တာလို့ သိရပါတယ်။

16/01/2025

ကော့ကရိတ်မြို့မှာ စစ်ကောင်စီဒရုန်းကြောင့် အရပ်သားတစ်ဦး သေ‌ဆုံး

ဇန်နဝါရီလ (၁၆)ရက်။

ဇန်နဝါရီလ (၁၄)ရက်နေ့က ကော့ကရိတ်မြို့အခြေစိုက် စစ်ကောင်စီတပ်က တိုက်ပွဲဖြစ်ပွားတာမရှိဘဲ ကမိုင်ကုန်းကျေးရွာကို ဒရုန်းဗူံတွေနဲ့ ကြဲချတိုက်ခိုက်ခဲ့တယ်လို့ KNU ရဲ့ မနေ့က ထုတ်ပြန်ထားချက်အရ သိရပါတယ်။

"မောင်းမရွာအုပ်စု ကမိုင်ကုန်းရွာကို စကစက တိုက်ပွဲဖြစ်ပွားတာမရှိဘဲ ဒရုန်းဗုံးတွေနဲ့ လိုက်ပြီး ကြဲချတိုက်ခိုက်ခဲ့တာပါ။ တိုက်ခိုက်တဲ့အထဲ အရပ်သားတစ်ဦး မီးလောင်ဒဏ်ရာရခဲ့ပြီး တစ်ဦးကတော့ ဆေးရုံပို့ချိန် သေဆုံးသွားပါတယ်"လို့ ဆိုပါတယ်။

စစ်ကောင်စီရဲ့ ဒရုန်းနဲ့ ဗုံးကြဲတာတွေကြောင့် ကမိုင်ကုန်းရွာနေ အသက် (၂၇)နှစ်အရွယ် စောသားသား ထိမှန်ကာ မီးလောင်ဒဏ်ရာရခဲ့ပြီး (၅၇)နှစ်အရွယ် စောပလုံးချီ(ခ)ဦးမောင်အောင်မြင့်ဟာ ပြင်းထန်ဒဏ်ရာနဲ့ ဆေးရုံပို့ချိန် သေဆုံးခဲ့ပါတယ်။

ဇန်နဝါရီလ (၁၁)ရက်နေ့ကလဲ လယ်ဒိုမြို့နယ်ထဲ စစ်ကောင်စီက လက်နက်ကြီးနဲ့ ပစ်ခတ်ခဲ့ရာ ကျောက်စရစ်ကျေးရွာစာသင်ကျောင်းအနီးနဲ့ အင်တိုင်းကုန်းကျေးရွာအနီး ကျရောက်ပေါက်ကွဲခဲ့တယ်လို့ KNU က ထုတ်ပြန်ထားပါတယ်။

ဒါ့အပြင် ဇန်နဝါရီလ (၇)ရက်နေ့က မူးမြို့နယ် သပြေညွှန့်စခန်းရှိ စစ်ကောင်စီတပ်က ကမူလိုကျေးရွာနေ (၃၅)နှစ်အရွယ် စောမောင်ချိုကို ဖမ်းဆီး ပစ်ခတ်သတ်ဖြတ်ခဲ့သေးတယ်လို့ ပြောဆိုထားပါတယ်။

စစ်ကောင်စီဟာ KNU ရဲ့ အုပ်ချုပ်နယ်မြေတွေထဲကို ဒရုန်းနဲ့ ဗုံးကြဲတာ၊ လက်နက်ကြီးတွေ လေကြောင်းတွေနဲ့ ပစ်ခတ်တိုက်ခိုက်တာတွေ မကြာခဏ ပြုလုပ်နေကာ အရပ်သားထိခိုက်သေဆုံးတာတွေ ရှိနေတယ်လို့ သိရပါတယ်။

16/01/2025

ပုံနှိပ်ထုတ်ဝေသူတွေ ဥပဒေဖောက်ဖျက်ရင် တရားစွဲမယ်လို့ စစ်ကောင်စီပြော

ဇန်နဝါရီလ (၁၆)ရက်။

ပုံနှိပ်သူနဲ့ ထုတ်ဝေသူတွေအနေနဲ့ ဥပဒေစည်းကမ်းချက်တွေ ဖောက်ဖျက်ရင် ဥပဒေနဲ့အညီ တရားစွဲမယ်လို့ စစ်ကောင်စီရဲ့ ဒီကနေ့မှာ သတိပေးထုတ်ပြန်ထားချက်အရ သိရပါတယ်။

ပုံနှိပ်တာနဲ့ ထုတ်ဝေတဲ့လုပ်ငန်းဥပဒေပါ ပြဋ္ဌာန်းချက်တွေနဲ့အညီ ထုတ်ဝေစာတွေကို ဖတ်ရှုလေ့လာစိစစ်ပြီး ကြပ်မတ်စိစစ်နေတယ်လို့ စစ်ကောင်စီပြန်ကြားရေးက ဆိုပါတယ်။

ဒါ့ကြောင့် ဥပဒေစည်းကမ်းချက်တွေကို ဖောက်ဖျက်ကျူးလွန်သူတွေကို လုပ်ငန်းအသိအမှတ်ပြုလက်မှတ်တွေ ရုပ်သိမ်းတာ၊ တရားမဝင်ထုတ်ဝေစာအနေနဲ့ ထုတ်ပြန်တာနဲ့ တရားစွဲတာတွေ ‌ဆောင်ရွက်နေတယ်လို့ သိရပါတယ်။

ဒီကနေ့ စစ်ကောင်စီရဲ့ ထုတ်ပြန်ချက်ထဲ ညစ်ညမ်းစာတွေကို ပုံနှိပ်၊ ထုတ်ဝေခဲ့တာကြောင့် လုပ်ငန်းပိတ်သိမ်းထားတဲ့ ပုံနှိပ်သူနဲ့ ထုတ်ဝေသူ (၃)ဦးစာရင်းကို ထုတ်ပြန်အသိပေးကြေညာထားတာပါ။

စစ်ကောင်စီဟာ ပုံနှိပ်တာနဲ့ ထုတ်ဝေတဲ့လုပ်ငန်းတွေကို ဟီရိဩတ္တပ္ပကင်းတဲ့ လူ့အဖွဲ့အစည်းက လက်မခံတဲ့ ခံစားနားလည်တာကို လွဲမှားစေနိုင်တာကြောင့်ဆိုပြီး လုပ်ငန်းပိတ်သိမ်းတာနဲ့ တရားစွဲတာတွေ ပြုလုပ်နေတာပါ။

စစ်ကောင်စီလက်ထက် လွတ်လပ်စွာ ထုတ်ဖော်ပြောဆိုရေးသားခွင့် ကန့်သတ်ထိန်းချုပ်တာတွေ ပိုမိုပြုလုပ်လာပြီး ပုံနှိပ်တိုက်နဲ့ စာပေတိုက် (၁၅)ခုအထိ ပိတ်သိမ်းခံထားရတယ်လို့ သိရပါတယ်။

16/01/2025

မုံရွာအခြေစိုက် နမခတိုင်းစစ်ဌာနချုပ် ရှော့တိုက်ဒုံးတွေနဲ့ ပစ်ခတ်ခံရ၊ စစ်ကောင်စီဘက်က ဗိုလ်ကြီးတစ်ဦးအပါအဝင် (၆)ဦး ပွဲချင်းပြီးသေဆုံး

ဇန်နဝါရီလ (၁၆)ရက်။

ဇန်နဝါရီလ (၁၄)ရက်နေ့ ည(၉)နာရီခွဲကျော်အချိန်က မုံရွာအခြေစိုက် စစ်ကောင်စီရဲ့ နမခတိုင်းစစ်ဌာနချုပ်ကို ၁၀၇မမ ရှော့တိုက်ဒုံးတွေနဲ့ ပစ်ခတ်ခဲ့တယ်လို့ Brave Warriors for Myanmar(BWM)ရဲ့ မနေ့က ထုတ်ပြန်ထားချက်အရ သိရပါတယ်။

"မုံရွာအခြေစိုက် စစ်ရှုံးစစ်ကောင်စီရဲ့ နမခထဲကို ၁၀၇မမ ရှော့တိုက်ဒုံး (၄)လုံးနဲ့ တိုက်ခိုက်ခဲတာပါ။ စကစဘက်က ဗိုလ်ကြီးတစ်ဦးအပါအဝင် (၆)ဦး ပွဲချင်းပြီး သေဆုံးပြီး (၃)ဦး ဒဏ်ရာရလို့ အရေးပေါ်ကြပ်မတ်ဆောင် တင်ထားရတယ်လို့ သိရပါတယ်"လို့ ဆိုပါတယ်။

နမခတိုင်းစစ်ဌာနချုပ် တိုက်ခိုက်ခံရတဲ့ဖြစ်စဉ်ထဲ စစ်ကောင်စီဘက်က DSA အပတ်စဉ် (၆၂)ဆင်း ဗိုလ်ကြီး ကောင်းထက်ဇော်အပါအဝင် (၆)ဦး ပွဲချင်းပြီး သေဆုံးကာ တပ်ကြပ်ကြီးတစ်ဦးအပါအဝင် (၃)ဦး ဒဏ်ရာရခဲ့တယ်လို့ ဖော်ပြထားပါတယ်။

ပစ်ခတ်ခဲ့တဲ့ ရှော့တိုက်ဒုံးတွေဟာ နမခတိုင်းစစ်ဌာနချုပ်ထဲ ပေါက်ကွဲခဲ့တာကြောင့် ဒုတိုင်မှူးအဆောင် ထိမှန်ကာ ပြိုကျပျက်စီးခဲ့ပြီး နောက်ထပ် ထိခိုက်ပျက်စီးတာတွေကို ဆက်လက်စုံစမ်းနေတယ်လို့ ရေးသားထားပါတယ်။

နမခဟာ စစ်ကိုင်း၊ မကွေးမြောက်ပိုင်းနဲ့ ချင်းပြည်တို့ရှိ စစ်ရှုံးစစ်ကောင်စီရဲ့ တိုက်ခိုက်ရေးလက်ရုံးတပ်ဖွဲ့တွေကို အဓိကအမိန့်ပေး ကွပ်ကဲနေကာ အဲ့ဒီဒေသထဲရှိ တော်လှန်ရေးအင်အားစုတွေအတွက် ကြီးမားတဲ့ အတားအဆီးလို့ ပြောဆိုထားပါတယ်။

အဲ့ဒီဒေသတွေကို တော်လှန်ရေးအရှိန်အဟုန် ယုတ်လျော့စေဖို့နဲ့ ပြည်သူတွေကို အဓိကညှင်းပန်းနှိပ်စက်ဖို့ ကြိုးကိုင်နေတဲ့ စစ်ဌာနချုပ်ဖြစ်တာကြောင့် စစ်ဆင်ရေး(၃၀)အနေနဲ့ တိုက်ခိုက်ခဲ့တာလို့ ‌ထုတ်ပြန်ထားပါတယ်။

အဲ့ဒီစစ်ဆင်ရေးကို Brave Warriors for Myanmar(BWM)က ဦးဆောင်ပြီး Shawdow(မုံရွာ)၊ Anonymous Heroes၊ Chindwin Fighter၊ ဒေါင်းမျိုးဆက် ဗိုလ်မုတ်ဆိတ်နဲ့ Democratic Ranger အဖွဲ့တို့ ပူးပေါင်းလုပ်ဆောင်ခဲ့တာလို့ သိရပါတယ်။

16/01/2025

အစ္စရေးနှင့် ဟားမတ်စ်တို့သည် ဂါဇာကမ်းမြောင်ဒေသတွင် တိုက်ပွဲများ ရပ်စဲရန် သဘောတူညီခဲ့ပြီး ဇန်နဝါရီလ (၁၉) ရက်နေ့တွင် စတင်မည်ဖြစ်သည်။
ဇန်နဝါရီလ (၁၆) ရက်။
အစ္စရေးနှင့် အစ္စလမ္မစ်အဖွဲ့ ဟားမတ်စ်တို့သည် ဂါဇာကမ်းမြှောင်တွင် တိုက်ပွဲများရပ်တန့်ရန်နှင့် ဟားမတ်စ်အဖွဲ့ ဖမ်းဆီးထားသည့် ဓားစာခံများနှင့် အစ္စရေးထောင်ထဲမှ ပါလက်စတိုင်းအကျဉ်းသားများကို ဖြည်းဖြည်းချင်း ပြန်လွှတ်ပေးရန် သဘောတူညီခဲ့ကြသည်။ ဆွေးနွေးပွဲကို စေ့စပ်ညှိနှိုင်းပေးသော ကာတာ၊ အမေရိကန်နှင့် အီဂျစ်တို့က ၁၅ ရက်မြောက်နေ့တွင် ကြေညာချက်ထုတ်ပြန်ခဲ့ခြင်းဖြစ်သည်။
အပစ်အခတ်ရပ်စဲရေး သဘောတူညီချက်သည် ဇန်နဝါရီလ (၁၉) ရက်နေ့တွင် အသက်ဝင်မည်ဟု ကာတာဝန်ကြီးချုပ်နှင့် နိုင်ငံခြားရေးဝန်ကြီး မိုဟာမက်က ပြောကြားခဲ့သည်။
အပြီးသတ် အပစ်အခတ်ရပ်စဲရေး ဖြစ်ကြောင်း သိရပြီး ယင်းအပစ်အခတ်ရပ်စဲရေးတွင် အဆင့် (၃) ဆင့်ပါရှိမည် ဖြစ်သည်။
ပထမအဆင့်တွင် ဓားစာခံ ၃၃ ဦးကို ဟားမတ်စ်တို့က လွှတ်ပေးမည်ဖြစ်ပြီး အမေရိကန်နိုင်ငံသား (၂) ဦးပါဝင်မည်ဟု သိရပါသည်။ ယင်းနောက် လူသားချင်းစာနာမှု အကူအညီများ ဂါဇာကမ်းမြောင်သို့ စတင်ရောက်ရှိမည်ဖြစ်ကြောင်း သိရပြီး အစ္စရေးစစ်တပ်က ဂါဇာကမ်းမြောင်မှ တဖြည်းဖြည်း ရုပ်သိမ်းသွားမည်ဟု သိရှိရသည်။
အိမ်ဖြူတော်မှာ တိုက်ပွဲတွေရပ်ပြီး ဓားစာခံတွေ လွတ်မြောက်ရေး သဘောတူညီချက်ကို ကြေညာခဲ့သည့် အမေရိကန် သမ္မတ ဘိုင်ဒင်က “တိုက်ပွဲတွေ ရပ်စဲပြီးရင် ဒုတိယအဆင့်မှာ အမြဲတမ်း အပစ်အခတ်ရပ်စဲရေး ဆွေးနွေးဖို့ မျှော်လင့်ထားတယ်” ဟု ပြောပါသည်။ အမြဲတမ်းအပစ်အခတ်ရပ်စဲရေးဆိုင်ရာ စည်းကမ်းချက်များကို လာမည့်ခြောက်ပတ်အတွင်း အပြီးသတ်နိုင်မည်ဟု ဘိုင်ဒင်က ပြောကြားခဲ့သော်လည်း စေ့စပ်ညှိနှိုင်းမှုများ ဆက်လက်ပြုလုပ်နေချိန်တွင် တိုက်ပွဲများ ဆက်လက်ရပ်တန့်သွားမည်ဖြစ်ကြောင်း သိရသည်။
သဘောတူညီချက်အရ၊ ဟားမတ်စ်နှင့် အခြားစစ်သွေးကြွအုပ်စုများသည် ၂၀၂၃ ခုနှစ် အောက်တိုဘာလ ၇ ရက်နေ့တွင် ဖမ်းဆီးထားသည့် ဓားစာခံ ၃၃ ဦးကို လွှတ်ပေးမည်ဟု မျှော်လင့်ရသည်။ “အမေရိကန် ဓားစာခံတွေကိုလည်း လွှတ်ပေးမယ်” ဟု ဘိုင်ဒင်က ပြောပါသည်။
အပြန်အလှန်အားဖြင့် အစ္စရေးက အကျဉ်းထောင်ထဲတွင် ရှိနေသည့် ပါလက်စတိုင်း ရာပေါင်းများစွာကို ပြန်လွှတ်ပေးမည် ဖြစ်သည်။ အိုးမဲ့အိမ်မဲ့ ပါလက်စတိုင်းသားများသည် ၎င်းတို့၏ ရပ်ကွက်များသို့ ပြန်နိုင်မည်ဖြစ်ပြီး လူသားချင်းစာနာမှု အကူအညီများ ဂါဇာကမ်းမြောင်သို့ စတင်ရောက်ရှိမည်ဖြစ်ကြောင်း ဘိုင်ဒင်က ရှင်းပြခဲ့သည်။
တတိယအဆင့်တွင် အသတ်ခံခဲ့ရသော ဓားစာခံများ၏ အလောင်းများကို ၎င်းတို့၏ မိသားစုများထံ ပြန်လည်ပေးအပ်နိုင်ပြီး ဂါဇာကမ်းမြောင်ဒေသအတွက် အကြီးစား ပြန်လည်တည်ဆောက်ရေး အစီအစဉ်ကို စတင်တော့မည်ဟု ယုံကြည်ရသည်။
အပစ်အခတ်ရပ်စဲရေးကို အမေရိကန် ရွေးကောက်ခံသမ္မတ ဒေါ်နယ်ထရန့်က ၎င်း၏ လူမှုမီဒီယာတွင် ကြေညာခဲ့ပြီး သဘောတူညီချက်သည် သမ္မတရွေးကောက်ပွဲတွင် ၎င်း၏အောင်ပွဲ၏ ရလာဒ်ဖြစ်ပြီး အပစ်အခတ်ရပ်စဲရေး ကြိုးပမ်းနေကြောင်း ကမ္ဘာကို အသိပေးခဲ့ကြောင်း အလေးပေးဖော်ပြခဲ့သည်။ ထရန့်၏ အရှေ့အလယ်ပိုင်းဆိုင်ရာ အထူးသံတမန် စတီဗ်ဝတ်ကော့ဗ် (Steve Witkoff) သည် အပစ်အခတ်ရပ်စဲရေး ဆွေးနွေးပွဲများတွင် ပါဝင်ခဲ့သည်။
သတင်းရင်းမြစ်။ CNN ဂျပန်

15/01/2025

တောင်ကိုရီးယားသမ္မတဖမ်းဆီးထိန်းသိမ်းခံရတဲ့ဖြစ်စဉ်
++++++++++++++++++++
စစ်အုပ်ချုပ်ရေးကြေညာမှုဖြစ်စဉ်မှာ အပြစ်ရှိတယ်လို့ စွပ်စွဲပြစ်တင်ခံထားရတဲ့ တောင်ကိုရီးယားသမ္မတ ယွန်းဆွတ်ယိုလ်ဟာ ဗုဒ္ဓဟူးနေ့က ဖမ်းဆီးထိန်းသိမ်းခံလိုက်ရပြီး တောင်ကိုရီးယားသမိုင်းမှာ တာဝန်ထမ်းဆောင်ချိန်အတွင်း ပထမဆုံးအဖမ်းခံရတဲ့ သမ္မတဖြစ်လာခဲ့ပါတယ်။

ယွန်ဆွတ်ယိုဟာ ပြီးခဲ့တဲ့လအတွင်းက တိုင်းပြည်ကို အရေးပေါ်မာရှယ်လောထုတ်ပြန်ကြေညာကာ စစ်အုပ်ချုပ်ရေးကြေညာခဲ့ပြီးနောက်မှာ အာဏာပိုင်တွေရဲ့ ဖမ်းဆီးထိန်းသိမ်းမှုကို ရှောင်ရှားဖို့အတွက် နေအိမ်မှာ ရက်သတ္တပတ်ပေါင်းများစွာ ပုန်းအောင်းနေခဲ့တာဖြစ်ပါတယ်။

ဗုဒ္ဓဟူးနေ့ကတော့ ရဲတပ်ဖွဲ့ဝင် ၃၀၀၀ ခန့်ဟာ ယွန်ဆွတ်ယိုလ်ရဲ့ နေအိမ်ကို ပိတ်ဆို့ဖမ်းဆီးကာ မော်တော်ယာဉ်တန်းနဲ့ အဂတိလိုက်စားမှုတိုက်ဖျက်ရေးအေဂျင်စီ (CIO) သို့မဟုတ် အဆင့်မြင့်အရာရှိတွေ အကျင့်ပျက်ခြစားမှုကို စုံစမ်းစစ်ဆေးတဲ့ရုံးကို ပို့ဆောင်လိုက်ကြတယ်လို့ တောင်ကိုရီးယားသတင်းတွေမှာ ဖော်ပြကြပါတယ်။

တောင်ကိုရီးယားဂျာနယ်လစ်တွေဟာ မြို့တော်ဆိုးလ်ရဲ့တောင်ဘက် ဂွါချီယွန်က ရုံးရှေ့မှာ ယွန်ဆွတ်ယိုလ် ကားပေါ်က ဆင်းလာတဲ့ပုံကို ဖော်ပြခဲ့ကြပြီး အဲဒီရုံးမှာ ၄၈ နာရီကြာ စုံစမ်းစစ်ဆေးခြင်းခံရနိုင်တယ်လို့ ဆိုပါတယ်။ အဲဒီနောက်မှာတော့ ယွန်ဆွတ်ယိုလ်ကို ပြန်လွှတ်ပေးဖို့ ဒါမှမဟုတ် အချိန်ကြာကြာဖမ်းဆီးထိန်းသိမ်းဖို့ ၀ရမ်းထုတ်မယ်လို့လည်း သိရပါတယ်။

အထိန်းသိမ်းမခံရမီ ရိုက်ကူးထားတဲ့ ဗီဒီယိုမှတ်တမ်းမှာ ယွန်ဆွတ်ယိုလ်က သူ့အနေနဲ့ သွေးထွက်သံယိုမှုမှန်သမျှကို ရှောင်ရှားဖို့ဆုံးဖြတ်ခဲ့ပြီး စုံစမ်းစစ်ဆေးခြင်းနဲ့ ဖမ်းဆီးခြင်းဟာ တရားဝင်မှု ရှိ၊မရှိကို မေးခွန်းထုတ်ခဲ့ပါတယ်။

“ ဒီနေ့ ကျတော့်အိမ်ထဲကို သူတို့က မီးသတ်ဆေးဗူးတွေသုံးပြီး ဖောက်ထွင်းဝင်ရောက်လာကြပါတယ်။ CIO ရဲ့ စုံစမ်းစစ်ဆေးခြင်းနဲ့ ဖမ်းဆီးထိန်းသိမ်းမှုဟာ တရားမဝင်ပေမယ့် သွေးထွက်သံယိုမှုတွေမဖြစ်အောင် တုံ့ပြန်ဖို့ ဆုံးဖြတ်ခဲ့ပါတယ်” လို့ ယွန် က အဲဒီဗီဒီယိုထဲမှာ ပြောထားခဲ့တာဖြစ်ပါတယ်။

ဗုဒ္ဓဟူးနေ့အစောပိုင်းက ဖြစ်စဉ်မှာ ယွန်ဆွတ်ယိုလ်ကို ဖမ်းဆီးဖို့ ကြိုးစားနေတဲ့ ရဲတပ်ဖွဲ့ဝင်တွေနဲ့ သူ့ကို အားပေးထောက်ခံသူတွေကြား ပြဿနာအချို့လည်း ရှိခဲ့ပါတယ်။ ထောက်ခံသူတွေက ယွန်ဆွတ်ယိုလ်ရဲ့ အခြေအနေနဲ့ 2020 ရွေးကောက်ပွဲမှာ မဲလိမ်လည်မှုရှိခဲ့တယ်လို့ စွပ်စွဲခံထားရတဲ့ အမေရိကန်ရွေးကောက်ခံ သမ္မတဒေါ်နယ်ထရန့်အနေအထားနဲ့ နှိုင်းယှဉ်ပြခဲ့ကြပါတယ်။

ယွန်ရဲ့ရှေ့နေတွေကတော့ ဖမ်း၀ရမ်းက တရားမဝင်ဘူးလို့ ဆိုပါတယ်။ တရားရုံးဟာ မှားယွင်းတဲ့ တရားစီးရင်မှုမျိုးကို ချမှတ်ခဲ့တာဖြစ်ပြီး စုံစမ်းစစ်ဆေးဖို့ ဖွဲ့စည်းထားတဲ့အဖွဲ့အစည်းဟာ လုပ်ပိုင်ခွင့်မရှိတဲ့ အဖွဲ့အစည်းလို့ ရှေ့နေတွေက ပြောပါတယ်။ ဒီဇင်ဘာလ 3 ရက်နေ့က စစ်အုပ်ချုပ်ရေးကြေညာခဲ့တဲ့နောက်ပိုင်း တောင်ကိုရီးယားနိုင်ငံမှာ မကြုံစဖူးနိုင်ငံရေးမတည်ငြိမ်မှုတွေဖြစ်ပေါ်ခဲ့ရပြီး အဲဒီဖြစ်စဉ်တွေမှာ အပြစ်ရှိတဲ့ ယွန်ဆွတ်ယိုလ်ကို စွပ်စွဲပြစ်တင်ဖို့ လွှတ်တော်အမတ်တွေက မဲခွဲဆုံးဖြတ်ခဲ့ကြတာဖြစ်ပါတယ်။

တောင်ကိုရီးယားသမ္မတဖမ်းဆီးထိန်းသိမ်းခံရတဲ့ဖြစ်စဉ်++++++++++++++++++++စစ်အုပ်ချုပ်ရေးကြေညာမှုဖြစ်စဉ်မှာ အပြစ်ရှိတယ်...

15/01/2025

စစ်ကောင်စီတပ်ရဲ့ အထိုင်ချတပ်စခန်း (၄)ခုကို တိုက်ခိုက်သိမ်းပိုက်နိုင်ခဲ့တယ်လို့ တောင်ပိုင်းစစ်ဒေသထုတ်ပြန်

ဇန်နဝါရီလ (၁၅)ရက်။

ပြီးခဲ့တဲ့နှစ် ဒီဇင်ဘာလထဲ စစ်ကောင်စီတပ်ရဲ့ အထိုင်ချစခန်း (၄)ခုကို တိုက်ခိုက်သိမ်းပိုက်နိုင်ခဲ့တယ်လို့ တောင်ပိုင်းစစ်ဒေသရဲ့ မနေ့က ထုတ်ပြန်ထားချက်အရ သိရပါတယ်။

အဲ့ဒီစခန်းတွေဟာ ရေးမြို့မြောက်ပိုင်း အမှတ်(၈)ပြည်ထောင်စုလမ်းပေါ်ရှိ လမိုင်းက ကမော့ကနင်လမ်းပိုင်း ကွမ်ကျိုက်ကျေးရွာစခန်း၊ ရေဖြူမြို့နယ် ကံပေါက်ဒေသရှိ ရေကန်တောင် မိုက်ခရိုဝေး တာဝါတိုင်တပ်စခန်း၊ ဖာပွန်မြို့ ဆင်စွယ်စခန်းနဲ့ တောင်သုံးလုံးစခန်းတို့ဖြစ်တယ်လို့ ဆိုပါတယ်။

တိုက်ခိုက်သိမ်းပိုက်ခဲ့တဲ့စခန်းတွေကို နယ်မြေရှင်းလင်းတာတွေ ဆောင်ရွက်ခဲ့ပြီး အဲ့ဒီစခန်းတွေနဲ့ အခြားတိုက်ပွဲတွေကနေ ၁၂၀မမ၊ ၈၁မမနဲ့ ၆၀မမ စိန်ပြောင်းတွေအပါအဝင် အခြားလက်နက်ငယ်အချို့နဲ့ ခဲယမ်းတွေ သိမ်းဆည်းရရှိခဲ့တယ်လို့ ဖော်ပြထားပါတယ်။

အဲ့ဒီတစ်လတာထဲ စစ်ကောင်စီတပ်နဲ့ အပြန်အလှန် ထိတွေ့တိုက်ပွဲပေါင်း (၆၂)ကြိမ်နဲ့ စစ်ကောင်စီတပ်စခန်းတွေနဲ့ စစ်ကြောင်းတွေကို ဒရုန်းအပါအဝင် လက်နက်ကြီးတွေနဲ့ (၈၂)ကြိမ်ထက်မနည်း ပစ်ခတ်ခဲ့တယ်လို့ ရေးသားထားပါတယ်။

အဲ့ဒီတိုက်ပွဲတွေထဲ စစ်ကောင်စီဘက်က တပ်သား (၁၅၁)ဦး သေဆုံးခဲ့ပြီး (၈၉)ဦး ဒဏ်ရာရရှိခဲ့ကာ တော်လှန်ရေးပူးပေါင်းတပ်တွေဆီ အလင်းဝင်လာသူ (၅)ဦးရှိခဲ့ပြီး ကောင်းမွန်စွာ ကြိုဆို စောင့်ရှောက်ထားတယ်လို့ ပြောဆိုထားပါတယ်။

စစ်ကောင်စီတပ်သားတွေရဲ့ အကြမ်းဖက်လုပ်ရပ်တွေကြောင့် တလတာထဲ ပြည်သူ (၂၄)ဦး သေဆုံးခဲ့ကာ ထိခိုက်ဒဏ်ရာရရှိသူ (၄၈)ဦးနဲ့ မတရားဖမ်းဆီးခံရသူ (၃၄၉)ဦးရှိကာ အကြမ်းဖက်လုပ်ရပ်တွေက လျော့နည်းမသွားဘဲ အရင်လတွေထက် များပြားလာတယ်လို့ ထုတ်ပြန်ထားပါတယ်။

တောင်ပိုင်းစစ်ဒေသထဲ တိုက်ပွဲတွေကို PDF တပ်ရင်းတပ်ဖွဲ့တွေ၊ ပကဖတွေ၊ LDF တွေ၊ KNLA၊ BPLA၊ ABSDF၊ MSRF၊ NMSP-AD နဲ့ TPLF တို့အပြင် အခြားပူးပေါင်းတပ်ဖွဲ့တွေနဲ့ ဒရုန်းတပ်ဖွဲ့တွေ ပူးပေါင်းပါဝင်ခဲ့တယ်လို့ သိရပါတယ်။

15/01/2025

ပြီးခဲ့သည့် သီတင်းပတ်က ထိုင်းနိုင်ငံသို့ ရောက်ရှိလာပြီးနောက် ပျောက်ဆုံးနေသည့် တရုတ်အမျိုးသမီးနှစ်ဦးကို မြန်မာနိုင်ငံမှ ထိုင်းရဲများ ကယ်ထုတ်
++++++++++++++++++++++++++++++++++++++

၎င်းတို့သည် တတိယနိုင်ငံသို့ ခရီးထွက်ခဲ့ပြီး ထိုင်းရဲများက ၎င်းတို့ကို ရှာဖွေရန် တရုတ်အာဏာပိုင်များနှင့် ညှိနှိုင်းဆောင်ရွက်ပေးခဲ့သည်။

ပြီးခဲ့သည့် သီတင်းပတ်က ထိုင်းနိုင်ငံသို့ ရောက်ရှိလာပြီးနောက် ပျောက်ဆုံးနေသည့် တရုတ်အမျိုးသမီး နှစ်ဦးကို တတိယနိုင်ငံ (မြန်မာနိုင်ငံ) တွင် တွေ့ရှိခဲ့ပြီး အိမ်ပြန်ပို့ပေးခဲ့ကြောင်း ထိုင်းအကြီးတန်း ရဲအရာရှိတစ်ဦးက အင်္ဂါနေ့တွင် ပြောကြားခဲ့သည်။

ထိုင်းရဲမှူးချုပ် သက်ချိုင်း ပီးတန်နီးလဘတ် (Thatchai Peetaneelabut) ကဝူကျားချီ (Wu Jiaqi) ၂၁ နှစ်နှင့် သူမ၏ သူငယ်ချင်းတို့ကို တရုတ်အာဏာပိုင်များက တွေ့ရှိခဲ့ပြီး တရုတ်နိုင်ငံသို့ ဘေးကင်းစွာ ပို့ဆောင်ခဲ့ကြောင်း ပြောကြားခဲ့သည်။

ဝူ၏ဖခင်သည် ဇန်နဝါရီ ၇ ရက်က သုဝဏ္ဏဘူမိလေဆိပ် ရဲစခန်းတွင် ပျောက်ဆုံးနေသူအား တိုင်ကြားခဲ့သည်ဟု သက်ချိုင်းက ပြောသည်။ ၎င်း၏သမီးနှင့် ၎င်း၏သူငယ်ချင်းသည် ဇန်နဝါရီ ၆ ရက်က ထိုင်းနိုင်ငံသို့ ရောက်ရှိလာပြီး ၎င်းထံမှ ဘာသတင်းမှ မကြားသိရ တော့ကြောင်း ရဲကို ပြောကြားခဲ့သည်။

အဆိုပါ အမျိုးသမီးနှစ်ဦးသည် လေဆိပ်မှ အဖြူရောင် ဗင်ကားဖြင့် ဘန်ကောက်မြို့ လာဒ်ခရာဘန် (Lat Krabang) ဧရိယာရှိ ဟိုတယ်တစ်ခုသို့ သွားခဲ့ပြီး ထိုနေရာတွင် တစ်ညတာ နေထိုင်ခဲ့ကြောင်း စုံစမ်းစစ်ဆေးသူများက တွေ့ရှိခဲ့သည်။ နောက်တစ်နေ့ နံနက် ၉ နာရီတွင် ၎င်းတို့ ထွက်ခွာသွားသော်လည်း ဟိုတယ်မှ ကင်မရာ ချွတ်ယွင်းမှုကြောင့် ထွက်ခွာသွားသည်ကို CCTV တွင် မှတ်တမ်းတင်ထားခြင်း မရှိကြောင်း သက်ချိုင်းက ပြောသည်။
အဆိုပါ အမျိုးသမီးနှစ်ဦးသည် တတိယနိုင်ငံ (မြန်မာနိုင်ငံ) သို့ ခရီးသွားခဲ့ကြောင်း ရဲတပ်ဖွဲ့က နောက်ပိုင်းတွင် သိရှိခဲ့ရပြီး ထိုင်းရဲများက ၎င်းတို့ကို ရှာဖွေရန် တရုတ်အာဏာပိုင်များနှင့် ညှိနှိုင်းဆောင်ရွက်ပေးခဲ့ကြောင်း ၎င်းက ပြောသည်။

တရုတ်အာဏာပိုင်များက ၎င်းတို့အား တွေ့ရှိပြီး တနင်္လာနေ့တွင် အိမ်သို့ပြန်ပို့ခဲ့ကြောင်း၊ ဝူ၏ဖခင်က သုဝဏ္ဏဘူမိလေဆိပ်ရဲတပ်ဖွဲ့ထံ တိုင်ကြားချက်ကို ပြန်လည်ရုပ်သိမ်းခဲ့ပြီး ၎င်းတို့၏အကူအညီအတွက် ထိုင်းအာဏာပိုင်များကို ကျေးဇူးတင်ကြောင်း သက်ချိုင်းက ပြောကြားခဲ့သည်။

ယခုလအစောပိုင်းက ထိုင်းနိုင်ငံမှ မြန်မာနိုင်ငံသို့ ပြန်ပေးဆွဲခေါ်ဆောင်သွားသော တရုတ်သရုပ်ဆောင် ရှင်းရှင်း (Xingxing) ကို တွေ့ရှိရာနေရာနှင့် အာဏာပိုင်များက ၎င်း၏သမီးနှင့် ၎င်း၏သူငယ်ချင်းများကို တွေ့ရှိရာနေရာသည်အတူတူပင်ဖြစ်ကြောင်း သိရှိခဲ့ရကြောင်း ဝူ၏ဖခင်က သတင်းထောက်များအား ပြောကြားခဲ့သည်။

ထိုင်းနိုင်ငံ တာ့ခ်ခရိုင်နယ်စပ်ရှိ တရုတ်ဖုန်းခေါ်ဆိုလိမ်လည်မှုများကြောင့် နာမည်ဆိုးဖြင့်ကျော်ကြားသည့် ရွှေကုက္ကိုတွင် အမည်ရင်း ဝမ်ရှင်း (Wang Xing) ဟူသော တရုတ်သရုပ်ဆောင်အား မြန်မာအာဏာပိုင်များက ဇန်နဝါရီ ၇ ရက်၌ ရှာဖွေတွေ့ရှိခဲ့သည်။

ရုပ်ရှင်ရိုက်ကူးရန်အတွက် ဖြားယောင်းပြီး WeChat မှဆက်သွယ် ဖိတ်ခေါ်မှုမှတစ်ဆင့် ထိုင်းနိုင်ငံသို့ ရောက်လာပြီးနောက် တရုတ်ဂိုဏ်းမှ ပြန်ပေးဆွဲခြင်းခံခဲ့ရကြောင်း ရှင်းရှင်းက ထိုင်းရဲများအား ပြောကြားခဲ့သည်။ "အဲ့ဒီဂိုဏ်းက သူ့ကို မြန်မာနိုင်ငံမှာ ဖမ်းဆီးထားပြီး တရုတ်နိုင်ငံမှာရှိသူတွေကို လိမ်လည်ဖို့ chat app တွေကို ဘယ်လို အသုံးပြုရမယ်ဆိုတာ လူတွေကို လေ့ကျင့်သင်ကြားပေးဖို့ ဖိအားပေးခိုင်းစေခဲ့ပါတယ်။" ဟု သူက ပြောဆိုထားပါသည်။

သတင်းရင်းမြစ်/ဓာတ်ပုံ။ The Nation

15/01/2025

စစ်ကိုင်း၊ မကွေးနဲ့ မန္တလေးက တပ်ဖွဲ့တွေကို လက်နက်တပ်ဆင်ပေးခဲ့တယ်လို့ အမှတ်(၁)စစ်ဒေသ ထုတ်ပြန်

ဇန်နဝါရီလ (၁၅)ရက်။

စစ်ကိုင်းတိုင်း၊ မကွေးတိုင်းနဲ့ မန္တလေးတိုင်းတို့က အထူးတိုက်ခိုက်ရေးတပ်ဖွဲ့တွေကို လက်နက်တပ်ဆင်ပေးခဲ့တယ်လို့ အမှတ်(၁)စစ်ဒေသရဲ့ ဒီကနေ့မှာ ထုတ်ပြန်ထားချက်အရ သိရပါတယ်။

အဲ့ဒီအခမ်းအနားကို ဇန်နဝါရီလ (၁၂)ရက်နေ့က ပြုလုပ်ခဲ့ပြီး အမှတ်(၁)စစ်ဒေသ ကွပ်ကဲမှုအောက်ရှိ စစ်ကိုင်း၊ မကွေးနဲ့ မန္တလေးတို့က ရဲဘော်တွေပါဝင်တဲ့ အပတ်စဉ်(၄) အထူးတိုက်ခိုက်ရေးတပ်ဖွဲ့ကို လက်နက်တပ်ဆင်ပေးခဲ့တာလို့ ဆိုပါတယ်။

လက်နက်တပ်ဆင်ပေးခဲ့တဲ့ အပတ်စဉ်(၄) အထူးတိုက်ခိုက်ရေးတပ်ဖွဲ့ဟာ ပင်လည်ဘူးမြို့သိမ်းတိုက်ပွဲမှာ ရွံ့ရွံ့ချွံချွံ တိုက်ပွဲဝင်ခဲ့ကြတဲ့ တပ်ဖွဲ့တစ်ဖွဲ့ ဖြစ်တယ်လို့ သိရပါတယ်။

အခုလို လက်နက်တပ်ဆင်ပေးတဲ့ အခမ်းအနားကို အမှတ်(၁)စစ်ဒေသက တာဝန်ရှိသူတွေ တက်ရောက်ခဲ့ကြတယ်လို့ ထုတ်ပြန်ထားပါတယ်။

အခုအခါ မြေပြန့်ဒေသ စစ်ဆင်ရေးကို အရှိန်တိုးမြှင့်ကာ ထိုးစစ်ဆင်တိုက်ခိုက်ဖို့ တော်လှန်ရေးတပ်ဖွဲ့တွေက ပြင်ဆင်နေပြီး တိုက်ပွဲထဲ ပါဝင်ကြဖို့ကိုလဲ တပ်သားသစ်တွေ ဖိတ်ခေါ်ထားပါတယ်။

စစ်ရှုံးစစ်ကောင်စီအနေနဲ့ နိုင်ငံတဝန်း တိုက်ပွဲတွေမှာ ဆိုးဝါးစွာ ရှုံးနိမ့်တာတွေနဲ့ ရင်ဆိုင်ကြုံတွေ့နေရသလို စိတ်ဓါတ်ပျက်ပြားတာနဲ့ လက်နက်ချ အလင်းဝင်တာတွေ ပိုမိုများပြားလာတယ်လို့ သိရပါတယ်။

15/01/2025

စစ်ကောင်စီလက်အောက်ခံ PNO ပြည်သူ့စစ်က ဖမ်းမိခဲ့တဲ့ PNLA ရဲဘော် (၅)ဦးကို နှိပ်စက်သတ်ဖြတ်ခဲ့

ဇန်နဝါရီလ (၁၅)ရက်။

ဇန်နဝါရီလ (၁၃)ရက်နေ့ နံနက် (၁၀)နာရီ (၁၅)မိနစ်အချိန်က တိုက်ပွဲထဲ ဖမ်းမိခဲ့တဲ့ ရဲဘော် (၅)ဦးကို စစ်ကောင်စီလက်အောက်ခံ PNO ပြည်သူ့စစ်အဖွဲ့က နှိပ်စက်စတ်ဖြတ်ခဲ့တယ်လို့ PNLA ရဲ့ မနေ့က ထုတ်ပြန်ထားချက်အရ သိရပါတယ်။

"ဆီဆိုင်မြို့ ထီစုံရွာအနီး တိုက်ပွဲထဲမှာ ဖမ်းဆီးခံရတဲ့ ရဲဘော် (၅)ဦးကို စကစလက်အောက်ခံ PNO ပြည်သူ့စစ်အဖွဲ့က နှိပ်စက်သတ်ဖြတ်ခဲ့တာ။ အသတ်မခံရခင်အချိန်က အဲ့ဒီရဲဘော်တွေ အသက်ရှင်နေတာကို PNO ထုတ်ပြန်ခဲ့တဲ့အထဲ တွေ့ရပါတယ်"လို့ ဆိုပါတယ်။

ဇန်နဝါရီလ (၁၂)ရက်နေ့က ဆီဆိုင်မြို့ ထီစုံရွာအနီး စစ်ကောင်စီနဲ့ PNO ပူးပေါင်းစစ်ကြောင်းနဲ့ PNLA စစ်ကြောင်းတို့ တိုက်ပွဲပြင်းထန်ခဲ့ကာ စစ်ကောင်စီဘက်က စစ်ကြောင်းမှူး (၁)ဦးအပါအဝင် (၂၀)ကျော်သေဆုံးပြီး PNLA ဘက်က ရဲဘော်တစ်ဦး ကျဆုံးကာ (၅)ဦး ဖမ်းခံခဲ့ရပါတယ်။

တိုက်ပွဲထဲ ဖမ်းမိခဲ့တဲ့ PNLA ရဲဘော်တွေကို စစ်ကောင်စီလက်အောက်ခံ PNO ပြည်သူ့စစ်အဖွဲ့က စစ်သုံ့ပန်းဥပဒေနဲ့အညီ လိုက်နာဆောင်ရွက်တာမရှိဘဲ ပအိုဝ်းလူမျိုးအချင်းချင်း နှိပ်စက်သတ်ဖြတ်တာလို့ ပြောဆိုထားပါတယ်။

PNLA တပ်ဖွဲ့အနေနဲ့ စစ်အာဏာရှင်စနစ်ကို တိုက်ခိုက်နေတဲ့ တိုက်ပွဲတွေထဲ ဖမ်းမိခဲ့တဲ့ စစ်သုံ့ပန်းတွေနဲ့ PNO ပြည်သူ့စစ်တပ်ဖွဲ့ဝင်တွေကို နှိပ်စက်သတ်ဖြတ်တာ မပြုလုပ်ခဲ့သလို စစ်သုံ့ပန်းဥပဒေနဲ့အညီ ထိန်းသိမ်းထားတာလို့ ထုတ်ပြန်ထားပါတယ်။

ပြီးခဲ့တဲ့ ၂၀၂၂ခုနှစ် စက်တင်ဘာလတုန်းကလဲ စစ်ကောင်စီလက်အောက်ခံ PNO ပြည်သူ့စစ်တပ်ဖွဲ့ဝင်တွေက ရွာအလည်ပြန်တဲ့ PNLA ရဲဘော် (၅)ဦးကို ဖမ်းဆီးသတ်ဖြတ်ခံ့ဖူးတယ်လို့ ပြောဆိုထားပါတယ်။

ပအိုဝ်းလူမျိုးအချင်းချင်းဟာ ရန်သူမဟုတ်ဘဲ စစ်အာဏာရှင်စနစ်ကသာ တတိုင်းပြည်လုံးရဲ့ ရန်သူဖြစ်ကာ အခု တနိုင်ငံလုံး ဖြစ်ပွားနေတဲ့ တိုက်ပွဲဟာ စစ်အာဏာရှင်စနစ် တိုက်ဖျက်နေတဲ့ တိုက်ပွဲလို့ ထုတ်ပြန်ထားချက်အရ သိရပါတယ်။

ဓာတ်ပုံအပြည့်အစုံကို တယ်လီဂရမ်ချန်တွင် ဝင်ရောက်ကြည့်ရှုနိုင်ပါသည်။
https://t.me/eraseye/3359

15/01/2025

နိုင်ငံရေးဆွေးနွေးပွဲတွေ ဖြစ်ပေါ်စေဖို့ အပစ်ရပ် (၇)ဖွဲ့ ဆွေးနွေး

ဇန်နဝါရီလ (၁၅)ရက်။

သက်ဆိုင်သူ‌တွေ အားလုံးပါဝင်တဲ့ နိုင်ငံရေးဆွေးနွေးပွဲတွေ ဖြစ်ပေါ်လာစေဖို့ အပစ်ရပ်(၇)ဖွဲ့က မနေ့က ဦးဆောင်အဖွဲ့အစည်းအဝေးတရပ်ကို ကျင်းပခဲ့တယ်လို့ ထုတ်ပြန်ထားချက်အရ သိရပါတယ်။

အဲ့ဒီအစည်းအဝေးထဲ အခုဖြစ်ပေါ်နေတဲ့ နိုင်ငံရေး၊ စီးပွားရေး၊ စစ်ရေးနဲ့ ပြည်သူတွေ နေ့တိုင်းကြုံနေရတဲ့ လူမှုဒုက္ခမျိုးစုံကို သုံးသပ်ခဲ့ပြီး နိုင်ငံရေးအကြပ်အတည်းက လွန်မြောက်နိုင်ဖို့ ဆွေးနွေးခဲ့တယ်လို့ ဆိုပါတယ်။

၂၀၂၅ခုနှစ်ထဲ ဖြစ်ပေါ်လာနိုင်မယ့် နိုင်ငံရေးအခင်းအကျင်းနဲ့အညီ ဆောင်ရွက်နိုင်ဖို့ ကြိုတင်ပြင်ဆင်ထားရှိနိုင်ဖို့ကိုလဲ ဆွေးနွေးခဲ့တယ်လို့ ဖော်ပြထားပါတယ်။

နောက်ပြီး ငြိမ်းချမ်းရေးလုပ်ငန်းစဉ် ဖော်ဆောင်ဖို့အပါအဝင် EAO တွေထဲ coordination နဲ့ cooperation ပိုမိုရရှိစေဖို့နဲ့ ပြည်တွင်းနိုင်ငံရေးဘောင် ချဲ့ထွင်တဲ့လုပ်ငန်းစဉ်တွေ တိုးမြှင့်ဆောင်ရွက်ဖို့ ကြိုးပမ်းဆောင်ရွက်သွားမယ်လို့ ပြောဆိုထားပါတယ်။

အပစ်ရပ် (၇)ဖွဲ့ရဲ့ ဦးဆောင်အဖွဲ့အစည်းအဝေးကို သဘာပတိအနေနဲ့ အဖွဲ့ခေါ‌င်း‌ဆောင် ဗိုလ်ချုပ်ကြီး ယွက်စစ်အပါအဝင် အဖွဲ့ဝင်တွေ၊ အတွင်းရေးမှူးအဖွဲ့ဝင်တွေနဲ့ လုပ်ငန်းကော်မတီတွေ စုစုပေါင်း (၂၂)ဦး တက်ရောက်ခဲ့တယ်လို့ ထုတ်ပြန်ထားပါတယ်။

အဲ့ဒီအဖွဲ့မှာ RCSS၊ NMSP၊ ALP၊ PNLO၊ LDU၊ DKBA နဲ့ KNU/KNLA-PC တို့ပါဝင်ကာ အပစ်ရပ် (၇)ဖွဲ့ဟာ စစ်ကောင်စီနဲ့ ငြိမ်းချမ်းရေးဆွေးနွေးနေတဲ့ အဖွဲ့တွေဖြစ်တယ်လို့ သိရပါတယ်။

15/01/2025

ဒုစစ်ခေါင်းဆောင် စိုးဝင်း လွိုင်ကော်ရောက်နေချိန် ရှော့တိုက်ဒုံးနဲ့ ပစ်ခတ်ခံရ

ဇန်နဝါရီလ (၁၅)ရက်။

မနေ့က ည (၇)နာရီအချိန်က ဒုစစ်ခေါင်းဆောင် စိုးဝင်း လွိုင်ကော်မြို့ကို ရောက်ရှိနေချိန် ၁၀၇မမ ရှော့တိုက်ဒုံးတွေနဲ့ ပစ်ခတ်ခံခဲ့ရတယ်လို့ BWM ရဲ့ ဒီကနေ့မှာ ထုတ်ပြန်ထားချက်အရ သိရပါတယ်။

လွိုင်ကော်မြို့ကို ဒုစစ်ခေါင်းဆောင် စိုးဝင်း ရောက်နေချိန် ပြည်နယ်ခန်းမနဲ့ ဒေသကွပ်ကဲမှုစစ်ဌာနချုပ်(ဒကစ-လွိုင်ကော်)တို့ကို ရှော့တိုက်ဒုံးတွေနဲ့ တပြိုင်ထဲ ပစ်ခတ်ခဲ့တာလို့ ဆိုပါတယ်။

ဒုစစ်ခေါင်းဆောင်ဟာ ကယားပြည်နယ်နေ့အခမ်းအနားအတွက် လွိုင်ကော်မြို့ကို ရောက်ရှိနေတာကို သတင်းရရှိတာကြောင့် ပြည်နယ်ခန်းမကို ရှော့တိုက်ဒုံး (၅)လုံးနဲ့ ဒကစ-လွိုင်ကော်ကို (၂)လုံး ပစ်ခတ်ခဲ့တာလို့ ဖော်ပြထားပါတယ်။

အခုလို ပစ်ခတ်တာတွေကြောင့် ကျရောက်ပေါက်ကွဲသံတွေ ကြားရတယ်လို့ ဒေသခံတွေကလဲ ပြောဆိုထားကာ ထိခိုက်ပျက်စီးတဲ့အခြေအနေကိုတော့ ဆက်လက်စုံစမ်းနေတယ်လို့ ထုတ်ပြန်ထားပါတယ်။

အဲ့ဒီတိုက်ခိုက်တာကို Brave Warriors for Myanmar(BWM)အပါအဝင် Mountain Knight Civilian Defence Force(MKCDF)နဲ့ Anti-Coup People's Liberation Force-ACPLF)တို့ ပူးပေါင်းတိုက်ခိုက်ခဲ့တာပါ။

စစ်ဆင်ရေးကို ဖော်ဆောင်ခဲ့ကြတဲ့ တော်လှန်ရေးရဲဘော်တွေအားလုံး အချိန်ယူပြီး ခက်ခက်ခဲခဲနဲ့ ပြန်လည်ဆုတ်ခွာခဲ့ရကာ အခုအခါ ဘေးကင်းလုံခြုံတဲ့နေရာတွေကို ရောက်ရှိနေပြီဖြစ်တယ်လို့ သိရပါတယ်။

15/01/2025

ဇန်နဝါရီလ (၁၅)ရက်။

အထွေထွေရွေးကောက်ပွဲကို မဖြစ်မနေ ပြုလုပ်သွားမယ်လို့ စစ်ခေါင်းဆောင် မင်းအောင်လှိုင်က ဒီကနေ့မှာကျရောက်တဲ့ (၇၃)နှစ်မြောက် ကယားပြည်နယ်နေ့အခမ်းအနားကို ပေးပို့တဲ့သဝဏ်လွှာမှာ ပြောဆိုခဲ့တယ်လို့ သိရပါတယ်။

လွတ်လပ်ပြီး တရားမျှတတဲ့ ပါတီစုံဒီမိုကရေစီ အထွေထွေရွေးကောက်ပွဲကြီး ကျင်းပနိုင်ဖို့ လိုအပ်တဲ့ ပြင်ဆင်တာတွေကို ဆက်လက်ဆောင်ရွက်နေတယ်လို့ ပြောဆိုထားပါတယ်။

နောက်ပြီး တိုက်ခိုက်တာတွေကို တိုင်းရင်းသားအဖွဲ့အချို့က လုပ်ဆောင်တာဟာ အမျိုးသားရေးစိတ်ဓါတ်ကင်းမဲ့ပြီး နိုင်ငံရေးအရ ရင့်ကျက်မှုမရှိတာနဲ့ ကိုယ့်ဒေသ ကိုယ့်တိုင်းရင်းသားကို သစ္စာဖောက်တာလို့ စစ်ခေါင်းဆောင်က စွပ်စွဲထားပါသေးတယ်။

နိုင်ငံထဲ လက်နက်ကိုင်ပဋိပက္ခဖြစ်ပွားနေတာဟာ နှစ်ပေါင်း (၇၆)နှစ်ကျော်လွန်လာပြီဖြစ်ကာ လက်နက်ကိုင်ပဋိပက္ခတွေ ဘာကြောင့်ဖြစ်ပွားတယ်ဆိုတာကို ပြန်လည်ဆန်းစစ်ကြဖို့ကိုလဲ သူက ပြောဆိုထားပါသေးတယ်။

နိုင်ငံရေးအယူအဆကွဲလွဲတာတွေကို နိုင်ငံရေးနည်းနဲ့ မဖြေရှင်းဘဲ လက်နက်စွဲကိုင်ခဲ့ကြရာက လက်နက်ကိုင်ပဋိပက္ခ ဖြစ်ပွားနေတာဖြစ်ပြီး တည်ငြိမ်အေးချမ်းမှုမရှိတာလို့ ဆိုပါတယ်။

တဖက်မှာတော့ စစ်ရှုံးနေတဲ့ စစ်ခေါင်းဆောင်က ရွေးကောက်ပွဲလုပ်ဖို့ ကြိုးစားနေတာနဲ့ ငြိမ်းချမ်းရေးဆွေးနွေးဖို့ ဖိတ်ခေါ်နေတာတွေဟာ နိုင်ငံရေးထွက်ပေါက်အပါအဝင် နိုင်ငံတကာမျက်နှာစာအတွက် အယောင်ပြသာဖြစ်တယ်လို့ ပြောဆိုထားချက်တွေအရ သိရပါတယ်။

15/01/2025

[အထူးသတင်း]

တောင်ကိုရီးယား ပူးတွဲစုံစမ်းစစ်ဆေးရေးဌာနချုပ်က သမ္မတ ယွန်ကို ဖမ်းဆီးကြောင်း ကြေညာလိုက်သည်။

ဇန်နဝါရီလ ၁၅ ရက်။

တောင်ကိုရီးယား သမ္မတယွန်ကို အရေးပေါ် စစ်အုပ်ချုပ်ရေး ကြေညာချက်ကို တုံ့ပြန်သည့်အနေဖြင့် ရဲတပ်ဖွဲ့နှင့် အခြားအဖွဲ့အစည်းများ ပူးပေါင်းထားသည့် ပူးတွဲစုံစမ်းစစ်ဆေးရေးဌာနချုပ်မှ ယနေ့ နံနက် ၁၀ နာရီ ၃၀ မိနစ်ခန့်တွင် နိုင်ငံတော်ပုန်ကန်မှု သံသယဖြင့် သမ္မတယွန်အား ဖမ်းဝရမ်းထုတ်ခဲ့ပြီး ဖမ်းဆီးခဲ့ကြောင်း သိရပါသည်။

တောင်ကိုရီးယားတွင် လက်ရှိအာဏာရယူထားသည့် သမ္မတတစ်ဦးကို ဖမ်းဆီးလိုက်ခြင်းသည် ပထမဆုံးအကြိမ် ဖြစ်ပါသည်။

သတင်းရင်းမြစ်။ NHK

14/01/2025

ထိန်းချုပ်နယ်မြေတွေမှာ အစိုးရရုံးဖွင့်ဖို့ စီစဉ်နေတယ်လို့ NUG ပြော

ဇန်နဝါရီလ (၁၄)ရက်။

ထိန်းချုပ်ထားတဲ့ နယ်မြေတွေမှာ ဝန်ကြီးဌာနရုံးတွေ ဖွင့်လှစ်အခြေစိုက်ဖို့ စီစဉ်နေတယ်လို့ NUG သမ္မတရုံးရဲ့ ပြောခွင့်ရ ဦးကျော်ဇောရဲ့ ထုတ်ပြန်ပြောဆိုထားချက်တွေအရ သိရပါတယ်။

အခုရက်ပိုင်းထဲ စစ်ကိုင်းတိုင်းမှာ ဝန်ကြီးဌာနရုံးတွေ အခြေစိုက်ပြီး ဖွင့်လှစ်သွားမယ့် အခြေအနေနဲ့ပတ်သက်လို့ သတင်းတွေ ပေါ်ထွက်လာတဲ့အပေါ် ဦးကျော်ဇောက သတင်းဌာနတွေကို အခုလို ပြောဆိုခဲ့တာပါ။

"စစ်ကိုင်းတိုင်းတခုထဲတော့ မဟုတ်ပါဘူး၊ ဘယ်မှာ ရုံးထိုင်မယ်ဆိုတာကလဲ လုံခြုံရေးအရ ပြောလို့မရပါဘူး။ ထိန်းချုပ်နယ်မြေတွေမှာ ဖွင့်ဖို့ အကောင်အထည်ဖော်နေပါတယ်"လို့ သူက ဆိုပါတယ်။

NUG အနေနဲ့ တော်လှန်ရေးအရှိန်မြှင့်တင်ဖို့ ပြည်တွင်းမှာ ဝန်ကြီးဌာနတွေ အခြေစိုက်ပြီး အခုလထဲ ရုံးဖွင့်လှစ်ကာ မြေပြင်အုပ်ချုပ်ရေးယန္တရားတွေ ဖော်ဆောင်သွားမယ်လို့ သိရပါတယ်။

နောက်ပြီး ထိန်းချုပ်နယ်မြေတွေ များလာတာနဲ့အတူ အုပ်ချုပ်ရေးယန္တရားတွေ တည်ဆောက်ကာ မဟာမိတ်ဆက်ဆံရေးတွေကိုလဲ ပိုထိရောက်စေဖို့ ဝန်ကြီးဌာနတွေကို ပြည်တွင်းမှာ အခြေစိုက်ဖို့ စီမံနေတာလို့ ဆက်ပြောပါတယ်။

အခုအခါ ပြည်တွင်းထဲ ဝန်ကြီးဌာနအချို့ ရောက်ရှိနေသလို စီစဉ်နေတဲ့ ဝန်ကြီးဌာနတွေလဲရှိကာ ပြည်တွင်းရှိ ဝန်ကြီးဌာနအနေနဲ့ ပြည်ပမှာ ကျန်နေသေးတဲ့ ရုံးဌာနတွေနဲ့ ဟန်ချက်ညီညီ လုပ်ကိုင်သွားမယ်လို့ ဆိုပါတယ်။

စစ်ကိုင်းတိုင်းထဲ NUG လက်အောက်ခံ ပ(၃)လုံးအဖွဲ့တွေနဲ့ ဒေသ‌ခံပြည်သူတွေအကြား မလိုလားအပ်တဲ့ ပြဿနာတွေ ရှိနေသလို NUG အနေနဲ့ မြေပြင်မှာ ထိထိရောက်ရောက် အုပ်ချုပ်နိုင်တာမရှိသေးဘူးလို့ ပြောဆိုထားချက်တွေအရ သိရပါတယ်။

14/01/2025

ရွှေဘိုထောင်က လွတ်ရက်စေ့ပြီး လွတ်လာတဲ့ နိုင်/ကျဉ်းတွေ ပြန်လည်ဖမ်းဆီးခံနေရ

ဇန်နဝါရီလ (၁၄)ရက်။

ရွှေဘိုထောင်ကနေ လွတ်ရက်စေ့ပြီး လွတ်လာတဲ့ နိုင်ငံရေးအကျဉ်းသားတွေကို စစ်ကောင်စီရဲ့ ရွှေဘိုမြို့မရဲစခန်းက ပြန်လည်ဖမ်းဆီးနေတယ်လို့ PPNM ရဲ့ ဒီကနေ့မှာ ထုတ်ပြန်ထားချက်အရ သိရပါတယ်။

"ရွှေဘိုထောင်ကနေ လွတ်ရက်စေ့ပြီး လွတ်မြောက်လာတဲ့ နိုင်ငံရေးအကျဉ်းသားတွေကို မိသားစုတွေဆီ မပို့ဘဲ ရွှေဘိုမြို့မရဲစခန်းထဲ ထပ်မံဖမ်းဆီးချုပ်နှောင်ထားတာ။ ထောင်ဗူးဝအထွက်မှာ ပြန်ပြီးအဖမ်းခံရတဲ့သူအများစုက နိုင်ငံရေးအကျဉ်းသား အမျိုးသားတွေ၊ မိသားစုနဲ့လဲ အဆက်အသွယ်ဖြတ်ထားတယ်"လို့ ဆိုပါတယ်။

အခုလို ပြန်လည်ဖမ်းဆီးတာကို ပြီးခဲ့တဲ့နှစ် အောက်တိုဘာလကစပြီး ပြုလုပ်ခဲ့ကာ အခုလထဲ လွတ်ရက်စေ့ပြီး ပြန်လွတ်လာသူတွေကို ပုဒ်မတပ်တာမရှိဘဲ မြို့မရဲစခန်းမှာ အကျဉ်းချထားသူ (၁၀)ဦးကျော်ရှိတယ်လို့ သိရပါတယ်။

မြို့မရဲစခန်းရှိ စခန်းမှူးနဲ့ တာဝန်ရှိသူတွေအနေနဲ့ ငွေကြေးတတ်နိုင်သူတွေကို ငွေတောင်းယူပြီး ပြန်လွှတ်ပေးတာတွေကို စီးပွားရေးဆန်ဆန် ပြုလုပ်နေကာ ငွေကြေးမတတ်နိုင်သူတွေကို စစ်တပ်တပ်စွဲထားတဲ့ မှန်သာဘုန်းကြီးကျောင်းထဲ ဖမ်းဆီးထားတယ်လို့ ပြောပါတယ်။

အခုလနဲ့ ဖေဖော်ဝါရီအပါအဝင် ကျန်တဲ့လတွေမှာ လွတ်ရက်စေ့ပြီး ပြန်လွတ်လာကြမယ့် နိုင်ငံရေးအကျဉ်းသားတွေ အများအပြားရှိနေပေမယ့် အခုလို ပြန်လည်ဖမ်းဆီးခံရမယ့် အခြေအနေတွေနဲ့ ရင်ဆိုင်နေရတယ်လို့ သိရပါတယ်။

အခုအခါ ပြန်လည်ဖမ်းဆီးခံထားရသူတွေကို ဥပဒေမဲ့ ဆက်လက်ဖမ်းဆီးတာ မဖြစ်စေဖို့ ထိထိရောက်ရောက် တားဆီးပေးနိုင်တဲ့ အခြေအနေတွေ မရှိတဲ့အတွက် များစွာ စိတ်မကောင်းဖြစ်ရတယ်လို့ PPNM က ပြောဆိုထားပါတယ်။

ဒါ့ကြောင့် ကျန်တတ်စွမ်းတဲ့ အဖွဲ့အစည်းတွေအနေနဲ့ တားဆီးတာ၊ ရှုံ့ချတာနဲ့ အရေးယူတာတွေကို ထိထိရောက်ရောက် လုပ်ဆောင်ပေးဖို့ ထုတ်ပြန်တိုက်တွန်းထားတယ်လို့ သိရပါတယ်။