Era's Eye

04/02/2025

ဆက်လက်အကူအညီပေးရန် ယူကရိန်းမှ မြေရှားသတ္တုများကို ထရန့်တောင်းဆို

ဖေဖော်ဝါရီလ (၄) ရက်။

အမေရိကန်သမ္မတ ဒေါ်နယ်ထရန့်က ယူကရိန်းနိုင်ငံကို ဆက်လက်အကူအညီပေးရန်အတွက် ယူကရိန်းနိုင်ငံမှ မြေရှားသတ္တုများနှင့် လဲလှယ်ပေးလိုကြောင်း ပြောကြားခဲ့သည်။

အမေရိကန်ပြည်ထောင်စုသည် ယူကရိန်းနှင့် သဘောတူညီချက်တစ်ခုပြုလုပ်ရန် ကြိုးပမ်းနေပြီး မြေရှားသတ္တုတွေကို ရယူလိုကြောင်း ထရန့်က သတင်းထောက်များအား ပြောကြားခဲ့သည်။ ဥရောပနိုင်ငံများသည် အမေရိကန်နှင့် အလားတူအကူအညီမျိုး ယူကရိန်းကို မပေးကြောင်း ထရမ့်က ပြစ်တင်ခဲ့သည်။

"ငါတို့ကြားထဲမှာ သမုဒ္ဒရာတစ်ခု ရှိတယ်။ သူတို့က အဲ့လို မဟုတ်ဘူးလေ။ ဒီကိစ္စက ငါတို့ထက် သူတို့အတွက် ပိုအရေးကြီးတယ်" ဟု ထရန့်က ပြောကြားခဲ့သည်။

ယူကရိန်းသည် အမေရိကန်၏အကူအညီများ ဆက်လက်ရရှိရန်အတွက် လစ်သီယမ်၊ တိုက်တေနီယမ်နှင့် အခြားမြေရှားသတ္တုများနှင့် ပတ်သက်ပြီး အပြုသဘောဆောင်သော သဘောထားကို ပြသခဲ့ကြောင်း ထရန့်က ပြောကြားခဲ့သည်။

ယင်းသို့ အဆိုပြုထားသော သဘောတူညီချက်သည် ယူကရိန်းစစ်ပွဲနှင့် ပတ်သက်၍ ထရန့်၏ ရည်ရွယ်ချက်များကို ထိုးထွင်းသိမြင်စေနိုင်သည်။ ထရမ့်သည် ယူကရိန်းအစိုးရထံ လက်နက်များ ထောက်ပံ့ရန် အမေရိကန်၏ ဝန်ထုပ်ဝန်ပိုးကို ကာလရှည်ကြာ စောဒကတက်ခဲ့သော်လည်း သူတာဝန်ယူချိန်မှစ၍ အကူအညီများ ရပ်ဆိုင်းမလား သို့မဟုတ် ဆက်လက်ပေးဆောင်မလား ဆိုသည်ကိုမူ အသေးစိတ် ရှင်းလင်းပြောကြားခြင်း မရှိသေးပေ။

သတင်းရင်းမြစ်။ CNN ဂျပန်

04/02/2025

မဲပလီစခန်းက ထွက်ပြေးနေတဲ့ စစ်ကောင်စီဗျူဟာမှူးအပါအဝင် (၂၀)ခန့်ကို လိုက်လံချေမှုန်းနေတယ်လို့ဆို

ဖေဖော်ဝါရီလ (၃)ရက်။

ဘီးလင်းအခြေစိုက် စစ်ကောင်စီရဲ့ မဲပလီဗျူဟာစခန်းကနေ ထွက်ပြေးနေတဲ့ ဗျူဟာမှူးအပါအဝင် အင်အား (၂၀)ခန့်ကို လိုက်လံချေမှုန်းနေတယ်လို့ နဂါးဖြူစစ်ကြောင်းရဲ့ ဒီကနေ့မှာ ထုတ်ပြန်ထားချက်အရ သိရပါတယ်။

"မဲပလီဗျူဟာစခန်းကနေ အကြမ်းဖက်စစ်ကောင်စီက ‌ဗျူဟာမှူးအပါအဝင် အင်အား (၂၀)ခန့်ကို တော်လှန်ရေးပူးပေါင်းတပ်ဖွဲ့တွေက လိုက်လံချေမှုန်း တိုက်ခိုက်နေပါတယ်"လို့ ဆိုပါတယ်။

စစ်ကောင်စီရဲ့ စစ်ရေးအရ အချက်အခြာကျတဲ့ မဲပလီဗျူဟာစခန်းကို KNLA ဦးဆေုင်တဲ့ တော်လှန်ရေးပူးပေါင်းတပ်ဖွဲ့တွေက ဖေဖော်ဝါရီလ (၁)ရက်နေ့ နံနက် (၁၀)နာရီခွဲအချိန်မှာ အပြီးသတ်သိမ်းပိုက်နိုင်ခဲ့တာပါ။

စခန်းသိမ်းတိုက်ပွဲထဲ စစ်ကောင်စီက လေကြောင်းပစ်ကူ (၅)ကိုမ် ပစ်ကူပေးပြီး စစ်ကောင်စီရဲ့ နတ်ကြီးစစ်စခန်းကနေ လက်နက်ကြီးနဲ့ (၁၁)ကြိမ်ထက်မနည်း ပစ်ကူပေးခဲ့တယ်လို့ ဖော်ပြထားပါတယ်။

စခန်းသိမ်းတိုက်ပွဲမှာ စစ်ကောင်စီဘက်က (၄၀)ဦးထက်မနည်း သေဆုံးခဲ့သလို ဗိုလ်ကြီးတစ်ဦးအပါအဝင် စစ်သုံ့ပန်း (၂၇)ဦး ဖမ်းမိခဲ့ကာ ၁၂၀မမ ဟောင်ဝစ်ဇာလက်နက်ကြီး၊ ပွိုင့်ဖိုက်နဲ့ လက်နက်ခဲယမ်းများစွာ သိမး်ဆည်းရမိခဲ့တယ်လို့ ထုတ်ပြန်ထားပါတယ်။

ဒါ့အပြင် တိုက်ပွဲထဲ တော်လှန်ရေးပူးပေါင်းတပ်ဖွဲ့တွေဘက်က ရဲဘော် (၄)ဦး မြင့်မြတ်စွာ အသက်ပေးလှူခဲ့ရတယ်လို့လဲ သိရပါတယ်။

04/02/2025

စစ်အုပ်စုရွေးကောက်ပွဲ နိုင်ငံကိုပြိုကွဲစေတယ်လို့ NUG၊ NUCC၊ NLD၊ CRPH နဲ့ ချင်းညီနောင်တို့ ပူးတွဲထုတ်ပြန်

ဖေဖော်ဝါရီလ (၃)ရက်။

အကြမ်းဖက်စစ်အုပ်စုရဲ့ ရွေးကောက်ပွဲက မြန်မာနိုင်ငံကို ပြိုကွဲစေပြီး ပဋိပက္ခတွေ တိုးပွားလာစေမှာဖြစ်တယ်လို့ NUG၊ NUCC၊ NLD၊ CRPH နဲ့ ချင်းညီနောင်(CB)တို့က ဒီကနေ့မှာ ပူးတွဲထုတ်ပြန်ထားတယ်လို့ သိရပါတယ်။

ထုတ်ပြန်ချက်ထဲ စစ်အုပ်စုက ရွေးကောက်ပွဲကျင်းပဖို့ အခွင့်အာဏာမရှိတဲ့အပြင် အခု နိုင်ငံရေးအခြေအနေက ရွေးကောက်ပွဲကျင်းပနိုင်တဲ့ အခြေအနေမဟုတ်ဘဲ အတုအယောင်ရွေးကောက်ပွဲကို အဓမ္မကျင်းပဖို့ ပြင်ဆင်နေတာလို့ ဆိုပါတယ်။

စစ်အုပ်စုရဲ့ ရွေးကောက်ပွဲကြောင့် ဒေသထဲ မတည်ငြိမ်တယတွေ ပိုမိုပေါ်ပေါက်လာစေမှာဖြစ်တဲ့အတွက် ပြည်သူနဲ့ နိုင်ငံတကာအသိုက်အဝန်းက ပူးပေါင်းပါဝင်တာ၊ ပံ့ပိုးကူညီတာနဲ့ အသိအမှတ်ပြုတာတွေ ရှောင်ကြဉ်ကြဖို့ တိုက်တွန်းထားပါတယ်။

နောက်ပြီး ဒေါ်အောင်ဆန်းစုကြည်အပါအဝင် ဖမ်းဆီးခံ နိုင်ငံရေးခေါင်းဆောင်တွေနဲ့ နိုင်ငံရေးအကျဉ်းသားတွေ လွတ်မြောက်ဖို့ဟာ နိုင်ငံရဲ့ လက်ရှိပြဿနာကို ဖြေရှင်းနိုင်ဖို့အတွက် အလွန်အရေးကြီးတယ်လို့ ထည့်သွင်းပြောဆိုထားပါတယ်။

ပူးတွဲထုတ်ပြန်ချက်ထဲ စစ်အာဏာသိမ်းတာကို ဖယ်ရှားပြီး စစ်တပ်ရဲ့ နိုင်ငံရေးမှာ ပါဝင်နေတာ အဆုံးသတ်ဖို့၊ ၂၀၀၈ခြေ/ဥ ဖျက်သိမ်းဖို့၊ သက်ဆိုင်တဲ့ အစုအဖွဲ့တွေ လက်ခံတဲ့ အခြေခံဥပဒေရေးဆွဲဖို့နဲ့ ဖက်ဒရယ်ဒီမိုကရေစီပြည်ထောင်စုသစ် တည်ဆောက်ဖို့ဆိုတဲ့ နိုင်ငံရေးဦးတည်ချက် (၆)ရပ်ကို ချမှတ်ထားပါတယ်။

ဒ့ါအပြင် အသွင်ကူးပြောင်းရေးကာမှာ ပြည်သူရဲ့ဆန္ဒကို အခြေခံပြီး သက်ဆိုင်သူအားလုံးပါဝင်တဲ့ နိုင်ငံရေးဆွေးနွေးပွဲတွေမှာ ညှိနှိုင်းဆောင်ရွက်ကာ ဘယ်လိုအငြင်းပွားတာတွေမဆို မိတ်ဖက်ပဋိပက္ခတွေအနေနဲ့ ငြိမ်းချမ်းတဲ့နည်းနဲ့ မှတ်ယူဖြေရှင်းသွားမယ်လို့ ပြောဆိုထားပါတယ်။

အကြမ်းဖက်စစ်အုပ်စုဟာ နိုင်ငံပြိုကွဲစေဖို့ တွန်းပို့နေတဲ့ အဓိကတရားခံဖြစ်ကာ ကျူးလွန်တဲ့ ရာဇဝတ်မှုတွေအတွက် မဖြစ်မနေ တာဝန်ခံရမှာဖြစ်တာကြောင့် တပ်မတော်သားတွေအနေနဲ့ ဂုဏ်သိက္ခာရှိတဲ့ တပ်မတော်ပေါ်ထွန်းဖို့ ပူးပေါင်းကြဖို့ တိုက်တွန်းထားပါတယ်။

နိုင်ငံတကာအနေနဲ့လဲ မြန်မာပြည်သူတွေ ခံစားနေရတဲ့ ဒုက္ခတွေကို ကုစားနိုင်ဖို့ တော်လှန်ရေးအင်အားစုတွေနဲ့ ပူးပေါင်းကာ ထိရောင်တဲ့ အကူအညီတွေ ပေးဖို့အပါအဝင် စစ်အုပ်စုကို အသိအမှတ်ပြု ဆက်ဆံတာကို ရပ်တန့်ဖို့ ထည့်သွင်းတောင်းဆိုထားပါတယ်။

တော်လှန်ရေးအင်အားသုတွေအနေနဲ့ ပြည်သူတွေ လိုလားတောင့်တတဲ့ ဖက်ဒရယ်ဒီမိုကရေစီပြည်ထောင်စုကြီး ပေါ်ပေါက်ဖို့အတွက် စည်းလုံးညီညွတ်စွာနဲ့ အတူဆက်လက်တိုက်ပွဲဝင်သွားမယ်လို့လဲ ထုတ်ပြန်ထားချက်အရ သိရပါတယ်။

04/02/2025

ပခုက္ကူမှာ အတင်းအဓမ္မ တပ်သားစုဆောင်းခံရသူတစ်ဦး လက်နက်ခဲယမ်းတွေနဲ့ အလင်းဝင်

ဖေဖော်ဝါရီလ (၃)ရက်။

ပခုက္ကူမြို့မှာ စစ်ကောင်စီရဲ့ အတင်းအဓမ္မစုဆောင်းခံရတဲ့ တပ်သားတစ်ဦး လက်နက်ခဲယမ်းတွေနဲ့ အလင်းဝင်လာခဲ့တယ်လို့ Burma Revolution Danger ရဲ့ ဒီကနေ့မှာ ထုတ်ပြန်ထားချက်အရ သိရပါတယ်။

အလင်းဝင်လာသူဟာ ပခုက္ကူမြို့ရှိ စစ်ကောင်စီရဲ့ တပ်မ (၁၀၁)လက်အောက်ခံ ခလရ(၂၅၂)က မောင်ဝင်းဆန်းထွန်း ကိုယ်ပိုင်အမှတ်(ပစ-၁၂၇၈၀၆)ဆိုသူဖြစ်တယ်လို့ ဆိုပါတယ်။

သူဟာ ဇန်နဝါရီလ (၃၀)ရက်နေ့ ညပိုင်းအချိန်က စစ်ကောင်စီလက်အောက်ကနေ ထွက်ပြေးလွတ်မြောက်လာခဲ့ပြီး ဖေဖော်ဝါရီလ (၁)ရက်မှာ Burma Revolution Danger တပ်ဖွဲ့ထံ ခိုလှုံလာခဲ့တာလို့ သိရပါတယ်။

တပ်သား မောင်ဝင်းဆန်းထွန်းဟာ သူနဲ့အတူ MA-1 တစ်လက်၊ MA-2 တစ်လက်၊ ကျည်ဘောက် (၃)ခု၊ 5.56 ကျည် (၁၂၀)တောင့်တို့ကို ယူဆောင်ပြီး ခိုလှုံလာခဲ့တာလို့ ပြောဆိုထားပါတယ်။

အခုလို လက်နက်ခဲယမ်းတွေနဲ့အတူ အလင်းဝင်ခိုလှုံလာတဲ့ စစ်ကောင်စီတပ်သားကို ဆုငွေ ကျပ်သိန်း(၁၀၀)အပြင် Redmi Note 13Pro တစ်လုံး ချီးမြှင့်ခဲ့တယ်လို့ ထုတ်ပြန်ထားပါတယ်။

အကြမ်းဖက်စစ်တပ်က အရာရှိအရာခံဗိုလ်တွေ၊ တပ်သားတွေနဲ့ ပျူစောထီးတွေအနေနဲ့ အမြင်မှန်ရကြပြီး အကြမ်းဖက်စစ်တပ်လက်အောက်မှာ မနေဘဲ နီးစပ်ရာတော်လှန်ရေးတပ်ဖွဲ့တွေဆီ အလင်းဝင်ဖို့ တိုက်တွန်းထားတယ်လို့ သိရပါတယ်။

03/02/2025

မလေးရှားဝန်ကြီးချုပ် ထိုင်းဝန်ကြီးချုပ်ဟောင်းသက်ဆင်နှင့်တွေ့ဆုံ၊ မြန်မာအကြောင်း ဆွေးနွေးခဲ့ဟုဆို

ဖေဖော်ဝါရီလ (၂) ရက်။

ဖေဖော်ဝါရီလ (၁) ရက်၊ တနင်္ဂနွေနေ့က မလေးရှားဝန်ကြီးချုပ်က ထိုင်းဝန်ကြီးချုပ်ဟောင်းသက်ဆင်နှင့်တွေ့ဆုံ ဆွေးနွေးခဲ့ကြပြီး မြန်မာနိုင်ငံ နွံနစ်နေမှုနဲ့ ခရစ်တိုငွေကြေး (cryptocurrency) ပြဿနာ အပါအဝင် ပြသနာအမျိုးမျိုးကို ဆွေးနွေးခဲ့ကြတယ်လို့ သိရပါတယ်။။

အင်္ဂလိပ်နှင့် မလေးဘာသာဖြင့် Facebook ပို့စ်တစ်ခုတွင် မလေးရှားဝန်ကြီးချုပ်က သက်ဆင်နဲ့ တွေ့ဆုံမှုဟာ အကျိုးဖြစ်ထွန်းကြောင်း ဖော်ပြခဲ့ပြီး မြန်မာနိုင်ငံအခြေအနေနဲ့ ခရစ်တိုငွေကြေး (cryptocurrency) ဖွံ့ဖြိုးတိုးတက်မှုကို ဘယ်လိုကိုင်တွယ်ရမယ်ဆိုတဲ့ကိစ္စ အပါအဝင် အဓိကကိစ္စရပ်တွေကို ဆွေးနွေးခဲ့ကြတယ်လို့ သိရပါတယ်။

“နောက်တော့ ညစာစားပွဲမှာ စင်္ကာပူ နိုင်ငံခြားရေး ၀န်ကြီးဟောင်း ဂျော့ယို (George Yeo) နဲ့ အတူ စကားစမြည်ပြောဖြစ်ခဲ့ပါတယ်” လို့ သူက ထပ်လောင်း ပြောကြားခဲ့ပါတယ်။

ထိုင်းဝန်ကြီးချုပ်ဟောင်းသက်ဆင်ဟာ နိုင်ငံခြားကို ထွက်ခွာပြီး မလေးရှားဝန်ကြီးချုပ် အန်ဝါနဲ့ တွေ့ဆုံဆွေးနွေးဖို့အတွက် ဘတ် ၅ သန်းတန် အာမခံစာချုပ်ပေးထားခဲ့တဲ့အတွက် သောကြာနေ့က ထိုင်းရာဇ၀တ်တရားရုံးက နိုင်ငံက ထွက်ခွာခွင့်ပြုလိုက်ပြီး ဖေဖော်ဝါရီ ၂ ရက်ကနေ ၃ ရက်နေ့အထိ မလေးရှားနိုင်ငံမှာ တွေ့ဆုံတဲ့သတင်း ထွက်ပေါ်လာတာ ဖြစ်ပါတယ်။

သက်ဆင်ရဲ့ကြေညာချက်မှာ တရားရုံးက သက်ဆင်ရဲ့ ပန်ကြားမှုကို နိုင်ငံခြားရေးဝန်ကြီးက ထောက်ခံခဲ့ပြီး အဲ့ဒီပန်ကြားချက်ဟာ ဝန်ကြီးချုပ်ဟောင်းရဲ့ ဘုရင့်အပေါ် မလေးမစားမှုကိစ္စနဲ့ပတ်သက်ပြီး စုံစမ်းစစ်ဆေးမှုအပေါ် သက်ရောက်မှု ရှိမှာမဟုတ်ကြောင်း အာမခံချက်ပေးခဲ့ပါတယ်။ အဲ့ဒီအမှုကြောင့် သက်ဆင်ကို တရားရုံးက ခွင့်ပြုချက် မရှိဘဲ နိုင်ငံခြားကို ခရီးမထွက်ဖို့ တားမြစ်ထားခဲ့ပါတယ်။

သက်ဆင်ရဲ့ ခရီးစဉ်ဟာ ထိုင်းနိုင်ငံအတွက် အကျိုးရှိပြီး နှစ်နိုင်ငံကြား ကောင်းမွန်တဲ့ဆက်ဆံရေး တည်ဆောက်နိုင်မယ်လို့လည်း ဝန်ကြီးက ပြောကြားခဲ့ပါတယ်။

ဘတ်ငွေ ၅ သန်းတန် ငွေချေးစာချုပ်အပြင် ရာဇ၀တ်တရားရုံးက သက်ဆင်ကို မလေးရှားက ပြန်လာပြီးနောက် သုံးရက်အတွင်း တရားရုံးနှင့် လူဝင်မှုကြီးကြပ်ရေးအရာရှိတွေဆီကို အစီရင်ခံဖို့ အမိန့်ပေးခဲ့ပါတယ်။

သက်ဆင်ဟာ ၂၀၁၅ ခုနှစ်တွင် တောင်ကိုရီးယားမီဒီယာတွေနဲ့ တွေ့ဆုံမေးမြန်းမှုမှာ ပေါ်ပေါက်ခဲ့တဲ့ ဘုရင့်အသရေဖျက်မှု ဥပဒေ ချိုးဖောက်မှုအတွက် ရာဇ၀တ်မှုဆိုင်ရာစွဲချက်တွေနဲ့ ရင်ဆိုင်နေရပါတယ်။

ရာဇ၀တ်တရားရုံးဟာ နိုင်ငံကူးလက်မှတ်ကို သိမ်းဆည်းခဲ့ပြီး သူ့အနေနဲ့ ပြည်ပကို သွားရောက်ရန်ရှိပါက အာမခံအနေနဲ့ မနှစ်က ဇွန်လမှာ ဘတ်ငွေ ၅၀၀,၀၀၀ အာမခံထားဖို့ သတ်မှတ်ခဲ့ပါတယ်။

မလေးရှားဟာ အခုနှစ်မှာ အာဆီယံဥက္ကဋ္ဌအဖြစ် ဆောင်ရွက်နေပြီး ၀န်ကြီးချုပ် အန်ဝါအီဘရာဟင်ဟာ သက်ဆင်အား အလွတ်သဘော အကြံပေးအဖြစ် ဒီဇင်ဘာလမှာ ခန့်အပ်ခဲ့ပါတယ်။

03/02/2025

အနောက်ဘက်ကမ်း အစ္စရေးစစ်ဆင်ရေးမှာ အနည်းဆုံး ပါလက်စတိုင်း အနည်းဆုံး ၅၀ သေဆုံး

ဖေဖော်ဝါရီလ (၃) ရက်။

ဇန်နဝါရီကတည်းက အစ္စရေးတို့ သိမ်းပိုက်ထားတဲ့ အနောက်ဘက်ကမ်းရှိ ပါလက်စတိုင်း လက်နက်ကိုင်တပ်ဖွဲ့တွေကို ပစ်မှတ်ထားရှင်းလင်းသည့် စစ်ဆင်ရေးကြီးမှာ အနည်းဆုံး ပါလက်စတိုင်း ၅၀ ထက်မနည်း သေဆုံးခဲ့ကြောင်း အစ္စရေးစစ်တပ်က ဖေဖော်ဝါရီ ၂ ရက်နေ့မှာ ကြေညာခဲ့ပါတယ်။ လူပေါင်း ၁၀၀ ကျော်ကို ဖမ်းဆီးပြီး စစ်ဆင်ရေး ဆက်လက်လုပ်ဆောင်သွားမယ်လို့လည်း ပြောကြားခဲ့ပါတယ်။ ပါလက်စတိုင်းတို့ကလည်း အစ္စရေးရဲ့ တိုက်ခိုက်မှုအတွင်း အရပ်သားအများအပြား သေဆုံးခဲ့ရတယ်လို့ ဆိုပါတယ်။

အစ္စရေးလ် မီဒီယာတွေရဲ့ ဖော်ပြချက်အရ ၀န်ကြီးချုပ် နေတန်ယာဟုဟာ အမေရိကန်ကို ဖေဖော်ဝါရီလ ၂ ရက်နေ့မှာ ရောက်ရှိခဲ့တယ်လို့ ဆိုပါတယ်။ ဂါဇာကမ်းမြှောင်မှာ အပစ်အခတ်ရပ်စဲရေး ဆက်လက်လုပ်ဆောင်ဖို့နဲ့ အစ္စရေးနှင့် ဆော်ဒီအာရေးဗီးယားကြား သံတမန်ဆက်ဆံရေး ပုံမှန်ပြန်လည်ထူထောင်ရေးတို့ကို ဆွေးနွေးဖို့ သမ္မတထရန့်နဲ့ တွေ့ဆုံဖို့ မျှော်လင့်ထားတယ်လို့ ဆိုပါတယ်။

ဖေဖော်ဝါရီ ၂ ရက်နေ့မှာ အစ္စရေးစစ်တပ်ဟာ အနောက်ဘက်ကမ်းက ဂျနင်းဒုက္ခသည်စခန်းမှာ ရှိတဲ့ အဆောက်အဦ ၂၃ လုံးကို အကြမ်းဖက်သမားတွေရဲ့ အခြေစိုက်စခန်းလို့ ကြွေးကြော်ကာ ဖျက်ဆီးခဲ့တယ်လို့ သိရပါတယ်။ ပါလက်စတိုင်းသတင်းအေဂျင်စီရဲ့အဆိုအရ ဒုက္ခသည်စခန်းရှိ အဆောက်အအုံတွေမှာ ဖောက်ခွဲရေးပစ္စည်းတွေ တပ်ဆင်ထားပြီး ဖောက်ခွဲရေးပစ္စည်းတွေကို တစ်ပြိုင်နက်တည်း ဖောက်ခွဲခဲ့တယ်လို့ သိရပါတယ်။

ဗီဒီယိုထဲမှာတော့ ဒုက္ခသည်စခန်းအတွင်း ပေါက်ကွဲမှုများစွာကို တပြိုင်နက်တည်း ဖြစ်ပွားနေတာကို တွေ့ရတယ်။ ထူထပ်တဲ့မီးခိုးငွေ့တွေလည်း ကောင်းကင်ယံမှာ ပျံ့လွင့်နေပါတယ်။

အနောက်ဘက်ကမ်းမှာ အစ္စရေးရဲ့ စစ်ရေးဆောင်ရွက်မှုကို တုံ့ပြန်ရန်အတွက် ပါလက်စတိုင်းအာဏာပိုင်အဖွဲ့ဥက္ကဋ္ဌ မိုဟာမက် အာဘတ်စ် (Mahmoud Abbas) က ကုလသမဂ္ဂလုံခြုံရေးကောင်စီ အရေးပေါ် အစည်းအဝေးပြုလုပ်ဖို့ တောင်းဆိုလိုက်ပါတယ်။ အီဂျစ်မီဒီယာတွေရဲ့ အဆိုအရ ဂါဇာကမ်းမြောင်တောင်ဘက်စွန်းရှိ ရာဖာစစ်ဆေးရေးဂိတ်မှာ ဒဏ်ရာရရှိသူတွေနဲ့ ဖျားနာနေသူတွေကို အီဂျစ်နိုင်ငံကို ဆက်လက်ရွှေ့ပြောင်းဖို့ ကြိုးပမ်းမှုတွေ ဆက်လက်လုပ်ဆောင်နေတယ်လို့ သိရပါတယ်။

သတင်းရင်းမြစ်။ ကျိုဒိုသတင်း၊ ရိုက်တာ။

ဓာတ်ပုံ။
အနောက်ဘက်ကမ်းရှိ ဂျနင်းတွင် အစ္စရေးတပ်ဖွဲ့များက အဆောက်အအုံ ၂၃ ခုကို ဖောက်ခွဲဖျက်စီးစဉ် (Reuters/Kyodo News)

03/02/2025

အမှတ်စဉ် (၁၈၃) နွေဦးတော်လှန်ရေးသံဃကွန်ရက်က စီစဉ်သော တနင်္လာနေ့စကားဝိုင်း
“ (၄)နှစ်ပြည့် တော်လှန်ရေးအခြေအနေနှင့် တိုင်းပြည်၏အနာဂတ်“ ခေါင်းစဉ်ဖြင့် ဆွေးနွေးသွားကြမည်ဖြစ်ပါသည်။
#ဆွေးနွေးသွားကြမည့်ဆရာတော်များ-
- ကိုးဂုဏ်ပိုင်ရှင်ဆရာတော်
- ဆရာတော် ဦးဝါယမ
- ဓမ္မမေတ္တာ ဆရာတော်
#ဆွေးနွေးမည့်နေ့ရက်
Date: 3- 2- 2025
Myanmar Time: 8:00 PM
♻️ ဆွေးနွေးပွဲ စတင်သည့်အချိန်တွင်
ဖော်ပြပါ Linkမှတဆင့် ဝင်ရောက်နိုင်ပါသည်။
🔺https://bit.ly/4hDAYSy
#ထုတ်လွှင့်မည့် pageများ –
✅နွေဦးတော်လှန်ရေး သံဃကွန်ရက်
✅Mizzima - News in Burmese
✅The Tanintharyi Times
✅Compassie Voor Myanmar
✅မောင်း
✅D-Day News
✅လူထုခေတ်
✅မြို့တော်
✅MeKong News - မဲခေါင်သတင်း
✅Unsung Team
✅မျက်မှောက်ခေတ်
✅နွေဦးတော်လှန်ရေးမြန်မာမွတ်စလင်မ်ကွန်ရက်
✅Red News Agency
✅Chindwinyoma News- Burmese Edition
✅Ayeyarwaddy Times - TV
✅နွေဦးတော်လှန်ရေးဘာသာပေါင်းစုံကွန်ရက်
✅Delta News Agency
✅Independent Mon News Agency
✅သံလွင်ခတ် - Than Lwin Khet News
✅Learn and Share - လေ့လာဝေမျှ
✅CJ Platform
✅Rehmonnya FM
✅Tun Kyi
❗Please Like and Share our page

03/02/2025

မြန်မာ (၂၇၀)ကျော် စင်္ကာပူနိုင်ငံသားအနေနဲ့ ပြောင်းလဲခံယူခဲ့တယ်လို့ စစ်ကောင်စီပြော

ဖေဖော်ဝါရီလ (၃)ရက်။

မြန်မာနိုင်ငံသား (၂၇၈)ဦး စင်္ကာပူနိုင်ငံသားအနေနဲ့ ပြောင်းလဲခံယူခဲ့တယ်လို့ စစ်ကောင်စီသံရုံးရဲ့ ဒီကနေ့မှာ ထုတ်ပြန်ထားချက်အရ သိရပါတယ်။

စင်္ကာပူနိုင်ငံသားတွေအနေနဲ့ ပြောင်းလဲခံယူခဲ့သူတွေဟာ ၂၀၂၄ခုနှစ်ထဲ စစ်ကောင်စီသံရုံးကို မြန်မာနိုင်ငံသား စိစစ်ရေးကတ်ပြားမူရင်း(မှတ်ပုံတင်) လာရောက်အပ်နှံခဲ့တယ်လို့ ဆိုပါတယ်။

နိုင်ငံသားပြောင်းလဲခံယူသူတွေ သံရုံးထောက်ခံစာကို ဖေဖော်ဝါရီလ (၂၈)ရက်နေ့မတိုင်မီ သံရုံးရဲ့ ရုံးဖွင့်ရက်တွေမှာ ကာယကံရှင်ကိုယ်တိုင် လာရောက်ထုတ်ယူနိုင်တယ်လို့ အသိပေးထားပါတယ်။

သံရုံးထောက်ခံစာ ထုတ်ယူတဲ့အခါ မြန်မာနိုင်ငံကူးလက်မှတ်မူရင်းနဲ့ Processing Letter မူရင်းတို့ကို တပါထဲ ပြန်လည်အပ်နှံရမယ်လို့လဲ ပြောဆိုထားပါတယ်။

အခုလို မြန်မာနိုင်သားအဖြစ်ကနေ စင်္ကာပူနိုင်ငံသားအဖြစ် ပြောင်းလဲခံယူတာတွေဟာ အရင်ကလဲရှိခဲ့ဖူးပေမယ့် စစ်ကောင်စီလက်ထက်ဖြစ်တဲ့ အခုအကြိမ်မှာ‌တော့ ပိုမိုများပြားလာခဲ့တာလို့ သိရပါတယ်။

03/02/2025

ယူကရိန်းရှိ တိုက်ခန်းတစ်ခန်းကို ရုရှားက တိုက်ခိုက်မှုကြောင့် ၁၄ ဦး သေဆုံးခဲ့ပြီး ကိယက်ဗ်နှင့် မော်စကိုတို့သည် ဘော်ဒါဆောင်ကျောင်း တိုက်ခိုက်မှုအတွက် တဖက်နှင့်တဖက် အပြစ်တင်

ဖေဖော်ဝါရီလ (၂) ရက်

ယူကရိန်းနိုင်ငံအလယ်ပိုင်းရှိ လူနေအဆောက်အအုံတစ်ခုအား ရုရှား၏ တိုက်ခိုက်မှုတစ်ခုအတွင်း ကလေးနှစ်ဦးအပါအဝင် လူ ၁၄ ဦးထက်မနည်း သေဆုံးခဲ့ကြောင်း၊ ယခုသီတင်းပတ်ကုန်တွင် နိုင်ငံတစ်ဝှမ်း တိုက်ခိုက်မှုများစွာထဲမှ တစ်ခုဖြစ်သည်ဟု ယူကရိန်းအရေးပေါ်ဌာနက ပြောကြားခဲ့သည်။

ယူကရိန်းသမ္မတ ဗလာဒီမာဇလန်းစကီးက ရုရှားသည် ပေါလ်တာဗာ (Poltava) ရှိ အဆောက်အအုံအား စနေနေ့ နံနက်အစောပိုင်းတွင် ပစ်မှတ်ထားပြီး တိုက်ခိုက်မှုမှာ နောက်ထပ်ကျူးလွန်သည့် အကြမ်းဖက် ရာဇ၀တ်မှုဖြစ်သည်ဟု ခေါ်ဆိုခဲ့သည်။

အပစ်အခတ်ရပ်စဲရေး အအမြန်ဆုံးရရှိရန် ကတိပြုထားသည့် ဒေါ်နယ်ထရမ့် ယခုအခါ အိမ်ဖြူတော်တွင် ရောက်ရှိလာခဲ့သော်လည်း ယူကရိန်းတွင် တိုက်ပွဲများ ရပ်တန့်သွားခြင်း မရှိသေးပါ။

သာလွန်သော ရုရှား၏ လူအင်အားနှင့် အရင်းအမြစ်များကို ရင်ဆိုင်နေရသည့် ယူကရိန်းစစ်တပ်သည် အရှေ့ဘက် ရှေ့တန်းစစ်မျက်နှာတွင် ရုရှားထိုးစစ်ကို ဆက်လက်တွန်းလှန်နေပါသည်။

ပေါလ်တာဗာ (Poltava) တွင် တိုက်ခိုက်ခံရသူများထဲတွင် အိုလီနာ ရာဗော်စကာ (Olena Yavorska) ၊ သူမ၏ခင်ပွန်း ဒီမီထရို (Dmytro) နှင့် ၎င်းတို့၏ ၉ နှစ်အရွယ်သမီး ဆိုဖီယာ(Sofia) တို့ပါဝင်ကြောင်း Facebook တွင် ကြေညာချက်တင်ခဲ့သည့် အိုလီနာ၏ လုပ်ဖော်ကိုင်ဖက်များ၏ ပြောကြားချက်အရ သိရသည်။

"ရုရှားသည် ကျွန်ုပ်တို့၏ လုပ်ဖော်ကိုင်ဖက်နှင့် သူမ၏ မိသားစုကို သတ်ခဲ့သည်" ဟု အိုလီနာ အလုပ်လုပ်သည့် ယူကရိန်း ထောက်ပံ့ပို့ဆောင်ရေးကုမ္ပဏီ နိုဗာ ပေါ့ရှတာ (Nova Poshta) ၏ ပူးတွဲပိုင်ရှင် ဗလိုဒီမာ ပိုပါရှက်နစ် (Volodymyr Popereshniuk) က တနင်္ဂနွေနေ့တွင် ပြောကြားခဲ့သည်။ "အိုလီနာသည် ဇီဝဗေဒပညာရပ်ကို ဆရာဖြစ် သင်ကြားခဲ့သော်လည်း ၂၀၁၅ ခုနှစ်တွင် သူမသည် နိုဗာ ပေါ့ရှတာ (Nova Poshta) ကုမ္ပဏီသို့ ဝင်ရောက်ခဲ့သည်။ ရာဗော်စကား (Yavorska) မိသားစုသည် ပျက်စီးသွားသော အဆောက်အဦ၏ ဒုတိယထပ်တွင် နေထိုင်ပါသည်။”

နိုင်ငံ၏အမျိုးသားရဲဌာနမှ အရေးပေါ်ဝန်ဆောင်မှုများနှင့် စိတ်ပညာရှင်တို့က လူ ၂၀၀ နီးပါးကို အကူအညီပေးနေကြောင်း နိုင်ငံပိုင် အရေးပေါ်ဝန်ဆောင်မှုဌာနက တနင်္ဂနွေနေ့တွင် ပြောကြားခဲ့သည်။ ကယ်ဆယ်ရေးလုပ်ငန်းများကို ဆက်လက်လုပ်ဆောင်နေကြောင်း ၎င်းက ဆက်လက်ပြောသည်။

တစ်ချိန်တည်းတွင်ပင် ပြီးခဲ့သည့် နွေရာသီက ယူကရိန်းက တုန်လှုပ်အံ့သြသင့်ဖွယ်ရာ ရုရှားနိုင်ငံတွင်းရှိ Kursk ဒေသကို ထိုးဖောက်ဝင်‌ရောက်မှုစတင်ပြီးနောက် ဘော်ဒါဆောင်ဟောင်းတစ်ခုအား စနေနေ့က အသေခံ ဗုံးခွဲတိုက်ခိုက်ခဲ့ခြင်းအတွက် ယူကရိန်းနှင့် ရုရှားတို့သည် တဦးနှင့်တဦး အပြစ်တင်ခဲ့ကြသည်။

ဆွဒ်ဟာ (Sudzha) မြို့ရှိ စာသင်ကျောင်းကို ရုရှားလေတပ်၏ ပဲ့ထိန်းလေကြောင်းဗုံးနှင့် ပစ်ခတ်ခဲ့သည့်အတွက် ဒေသခံလေးဦးထက်မနည်း သေဆုံးပြီး အဆောက်အအုံထဲတွင် နေထိုင်သူများကို ဘေးလွတ်ရာသို့ ရွှေ့ပြောင်းပေးရန် ပြင်ဆင်နေသည်ဟု ယူကရိန်းစစ်တပ်က ပြောပါသည်။ နောက်ထပ် လူ ၈၄ ဦးကို ကယ်ဆယ်နိုင်ခဲ့ပြီး လေးဦးသည် ဒဏ်ရာပြင်းထန်သည်ဟု သိရသည်။ ဤတိုက်ခိုက်မှုကို စစ်ရာဇ၀တ်မှုဟု ယူကရိန်းစစ်တပ်က ခေါ်ဆိုခဲ့သည်။

တစ်ချိန်တည်းမှာပင် ရုရှားစစ်တပ်က ယူကရိန်းက ဘော်ဒါဆောင်ကို တိုက်ခိုက်ခြင်းအတွက် အပြစ်တင်ခဲ့ပြီး ၎င်းကို စစ်ရာဇ၀တ်မှုဟုလည်း ခေါ်တွင်ခဲ့သည်။

“[ယူကရိန်း] ဆန်မီ (Sumy) ဒေသမှ ရန်သူ့ဒုံးကျည်များ ပစ်လွှတ်မှုကို ရုရှားလေကြောင်းရန် ကာကွယ်ရေးစနစ်များက တွေ့ရှိခဲ့ကြောင်း ရုရှားစစ်တပ်က တနင်္ဂနွေနေ့တွင် ကြေညာချက် ထုတ်ပြန်ခဲ့သည်။

ထုတ်ပြန်ချက်တွင် ယူကရိန်းသည် ရန်စလှုံဆော်မှုကို အသုံးချပြီး Kursk ဒေသ၏ သီးခြားနယ်မြေတစ်ခု၌ “ကမ္ဘာပေါ်ရှိ လူထုအမြင်ကို အာရုံပြောင်းစေရန် လှုံ့ဆော်မှု” အဖြစ် အသုံးပြုနေသည်ဟု ရုရှားက ယူကရိန်းကို စွပ်စွဲထားသည်။

ယူကရိန်းနှင့် ရုရှားတို့၏ ပြောဆိုမှုများကို CNN မှ သီးခြားအတည်ပြုနိုင်ခြင်း မရှိပါ။

ရုရှားနိုင်ငံမှ တိုက်ခိုက်မှုအသစ်များ ပြုလုပ်နေချိန်တွင် ယူကရိန်း၏ လေကြောင်းရန် ကာကွယ်ရေးတပ်များသည် ဒရုန်းအများအပြားကို ညတွင်းချင်း ပစ်ချနိုင်ခဲ့ကြောင်း ယူကရိန်းနိုင်ငံ၏ လေတပ်က တနင်္ဂနွေနေ့တွင် ပြောကြားခဲ့သည်။

မြို့တော် ကိယက်ဗ်အပါအဝင် နိုင်ငံတစ်ဝှမ်းရှိ ဒေသများသို့ ပစ်လွှတ်ခဲ့သည့် ဒရုန်း ၅၅ စင်းအနက်မှ ၄၀ ကို ယူကရိန်း လေတပ်က ပစ်ချခဲ့ကြောင်း၊ သို့သော် ခါကိဗ့် (Kharkiv) နှင့် ဆန်မီ (Sumy) ဒေသများသည် ရန်သူများ၏ တိုက်ခိုက်မှုကြောင့် ထိခိုက်ခဲ့ကြောင်း ထပ်လောင်း ပြောကြားခဲ့သည်။

ယူကရိန်း စွမ်းအင်အခြေခံအဆောက်အဦများကို ဖေဖော်ဝါရီ ၁ ရက်ညတွင် ဒေသအများ အပြားတွင် ပစ်မှတ်ထားတိုက်ခိုက်ခံခဲ့ရကြောင်း ယူကရိန်းလေတပ်မှ ပြောကြားခဲ့သည်။

သတင်းရင်းမြစ်။ CNN

03/02/2025

အာရပ်နိုင်ငံများသည် ဂါဇာကမ်းမြောင်ဒေသတွင် ပါလက်စတိုင်းများ ဆက်လက်နေထိုင်ခွင့်ကို အလေးပေးလက်ခံထားပြီး ပြည်နယ်နှစ်ခု အဖြေရှာမှု ဆောက်ရွက်ရန် တောင်းဆို

ဖေဖော်ဝါရီလ (၃) ရက်။

ဆော်ဒီအာရေးဗီးယား၊ အီဂျစ်၊ ကာတာ၊ ဂျော်ဒန်နဲ့ အာရပ်စော်ဘွားများပြည်ထောင်စုတို့က ပါလက်စတိုင်းအာဏာပိုင်တွေနဲ့ အာရပ်အဖွဲ့ချုပ်က ကိုယ်စားလှယ်တွေနဲ့အတူ ဂါဇာကမ်းမြောင်ဒေသမှာ “အရေးကြီးတဲ့ အပစ်အခတ်ရပ်စဲရေးကို ကြိုဆိုကြောင်း ဒီကနေ့ ဆွေးနွေးပွဲအပြီး ပူးတွဲကြေညာချက်ကို ထုတ်ပြန်လိုက်ပါတယ်။ ဒီသဘောတူညီချက်ကို အကောင်အထည်ဖော်ရာမှာ အမေရိကန်ပြည်ထောင်စုရဲ့ အခန်းကဏ္ဍကို ကျေးဇူးတင်ပါတယ်” လို့ ထုတ်ပြန်ချက်မှာ ဖော်ပြခဲ့ပါတယ်။

ဂါဇာကို ပြန်လည်တည်ဆောက်ရေးကာလမှာ ပါလက်စတိုင်းသားတွေ ဆက်လက်နေထိုင်ခွင့်ကို အလေးပေးကာ “သမ္မတဒေါ်နယ်ထရန့် အစိုးရနဲ့ လက်တွဲလုပ်ဆောင်ရန်” မျှော်လင့်ထားကြောင်း ဂါဇာကို ပြန်လည်ထူထောင်ရေးကာလမှာ ပါလက်စတိုင်းသားတွေရဲ့ နေထိုင်ခွင့်ကို အလေးထားထောက်ခံပြီး ဂါဇာကို ရှင်းဖို့ ထရန့်ရဲ့ပြီးခဲ့တဲ့အပတ်က ပြောကြားချက်နဲ့ ဆန့်ကျင်ဘက် သဘောထားဖြစ်ပါတယ်။

ဂါဇာကမ်းမြောင်ဒေသကို လူသားချင်းစာနာထောက်ထားမှုအကူအညီများ အတားအဆီးမရှိ စီးဆင်းမှုလိုအပ်နေတယ်လို့ ထပ်လောင်းပြောကြားခဲ့ပြီး ပါလက်စတိုင်း အကူအညီပေးရေးဆိုင်ရာ ကုလသမဂ္ဂအေဂျင်စီ UNRWA ကို ရပ်တန့်ဖို့ ကြိုးပမ်းမှုတွေကို ပယ်ချခဲ့ပါတယ်။ အစ္စရေးရဲ့ UNRWA ကို တားမြစ်ထားချက်ဟာ အခုသီတင်းပတ်အစောပိုင်းမှာ အသက်ဝင်ခဲ့ပါတယ်။

အာရပ်နိုင်ငံများအုပ်စုဟာ ပါလက်စတိုင်းနယ်မြေတွေကို စည်းလုံးညီညွတ်မှုနဲ့ နှစ်နိုင်ငံဖြေရှင်းချက်ရဲ့ တစ်စိတ်တစ်ပိုင်းအဖြစ် ၁၉၆၇ နယ်နိမိတ်အတိုင်း ပြန်သတ်မှတ်ဖို့ တောင်းဆိုထားပါတယ်။

03/02/2025

မဲဇာလီရဲစခန်း တိုက်ခိုက်ခံရပြီး စစ်ကောင်စီတပ်ဖွဲ့ဝင်တွေ စခန်းစွန့်ခွာထွက်ပြေး

ဖေဖော်ဝါရီလ (၃)ရက်။

ဇန်နဝါရီလ (၃၁)ရက်နေ့က ပွင့်ဖြူမြို့နယ်ရှိ စစ်ကောင်စီရဲ့ မဲဇလီရဲစခန်းကို ဒရုန်းတွေနဲ့ ပစ်ခတ်တိုက်ခိုက်ခဲ့တယ်လို့ Earthquake People's Defense Force ရဲ့ ဒီကနေ့မှာ ထုတ်ပြန်ထားချက်အရ သိရပါတယ်။

"ပွင့်ဖြူမြို့ မဲဇလီရဲစခန်းကို ဒရုန်းတွေနဲ့ တိုက်ခိုက်ခဲ့တာမှာ စစ်ကောင်စီတပ်သားတွေနဲ့ ရဲတွေ ထိခိုက်တာတွေရှိခဲ့ပြီး စခန်းကို ယာယီစွန့်ခွာသွားကြတယ်"လို့ ဆိုပါတယ်။

မဲဇလီရဲစခန်း တိုက်ခိုက်ခံရတဲ့ဖြစ်စဉ်‌ထဲ စစ်ကောင်စီဘက်က ထိခိုက်တာတွေရှိခဲ့ကာ အသေးစိတ်ကိုတော့ မသိရသေးဘဲ စစ်ကောင်စီတပ်သားတွေနဲ့ ရဲတွေ ယာယီစခန်းစွန့်ခွာသွားကြတယ်လို့ ဖော်ပြထားပါတယ်။

နောက်ပြီး ဖေဖော်ဝါရီလ (၁)ရက်နေ့ကလဲ မင်းဘူးမြို့နယ်ရှိ လက်ပတောစခန်းကို ဒရုန်းနဲ့ တိုက်ခိုက်ခဲ့သလို မဲဇလီစခန်းကို စစ်ကူလာတဲ့ စစ်ကောင်စီစစ်ကြောင်းနဲ့ ပွင့်ဖြူမြို့ မဒကုန်းရွာအနီး တိုက်ပွဲဖြစ်ပွားခဲ့တယ်လို့ ရေးသားထားပါတယ်။

အဲ့ဒီတိုက်ပွဲထဲ အထိနာသွားတဲ့ စစ်ကောင်စီဟာ မဲဇလီကျေးရွာဝန်းကျင်ကို လေ‌ယာဉ်နဲ့ ဗုံးကြဲတိုက်ခိုက်တာ၊ လက်ပတောကျေးရွာအနီးရှိ ကျေးရွာတွေကို လက်နက်ကြီးပစ်ခတ်တာတွေ ပြုလုပ်ခဲ့တယ်လို့ ပြောဆိုထားပါတယ်။

ဒါ့အပြင် စစ်ကောင်စီဟာ ပါ‌ရာမော်တာနဲ့ ဗုံးသီးချတိုက်ခိုက်တာအပါအဝင် ပတ်ဝန်းကျင်ကျေးရွာတွေက ပြည်သူတွေရဲ့ နေအိမ်တွေကို မီးရှို့တာတွေကို ယုတ်မာစွာ ပြုလုပ်နေတယ်လို့ ထုတ်ပြန်ထားပါတယ်။

အဲ့ဒီတိုက်ခိုက်တာကို မြိုင်ပကဖ၊ ပေါက်ပကဖ၊ မင်းဘူးခရိုင် တပ်ရင်း(၆၊၄)၊ Jocker ပြောက်ကျားတပ်ဖွဲ့(MYG)၊ Young Force People Defence Force(PKU)၊ စေတုတ္တရာပအဖနဲ့ Earthquake People's Defense Force တို့ပူးပေါင်းတိုက်ခိုက်ခဲ့တာလို့ သိရပါတယ်။

03/02/2025

ရေဦးမြို့ပေါ်မှာ PDF နဲ့ ပတ်သက်ဆက်နွယ်တယ်ဆိုပြီး စစ်ကောင်စီက ဖမ်းဆီးတာတွေပြုလုပ်

ဖေဖော်ဝါရီလ (၃)ရက်။

အခုရက်ပိုင်းကစပြီး ရေဦးမြို့ပေါ်ရှိ ရပ်ကွက်တွေမှာ ပြည်သူတွေကို PDF တွေနဲ့ ပတ်သက်ဆက်နွယ်တယ်ဆိုပြီး စစ်ကောင်စီက လိုက်လံဖမ်းဆီးနေတယ်လို့ ဒေသခံတွေထံက သိရပါတယ်။

"(၁)ရက်နေ့ကစပြီး စစ်ခွေးအုပ်စုက မြို့ပေါ်က ရပ်ကွက်တွေမှာ ပြည်သူတွေကို PDF နဲ့ ဆက်နွယ်ပတ်သက်တယ်လို့ စွပ်စွဲပြီး ဝင်ရောက်ဖမ်းဆီးနေတာ။ ဖမ်းဆီးခံရတဲ့သူ အရေအတွက်တော့ မသိသေးဘူး"လို့ ဆိုပါတယ်။

PDF နဲ့ဆက်နွယ်ပတ်သက်တယ်လို့ စွပ်စွဲကာ စစ်ကောင်စီက ရေဦးမြို့ပေါ်ရှိ ‌ဗိုလ်အောင်ဇေယျရပ်ကွက်၊ ရေဦးကုန်းရပ်ကွက်နဲ့ ရွှေပြည်သာရပ်ကွက်တွေကို ဝင်ရောက်ဖမ်းဆီးခဲ့တာလို့ သိရပါတယ်။

စစ်ကောင်စီရဲ့ စွပ်စွဲဖမ်းဆီးတာတွေနဲ့ပတ်သက်ပြီး လူဦးရေ အတိအကျကိုတော့ မသိရသေးကာ အဲ့ဒီနေ့ ညပိုင်းအချိန်မှာလဲ မြောက်ဘက်ခြမ်းရွာတွေဘက်ကို လက်နက်ကြီး (၄)လုံးထက်မနည်း ပစ်ခတ်ခဲ့ပါသေးတယ်။

"နေ့ခင်းဘက်မှာ ပြည်သူတွေကို ဖမ်းဆီးပြီးတော့ စစ်ခွေးအုပ်စုက ညဘက် (၁၁)နာရီ (၄၀)မိနစ်လောက်မှာ ဟိန်းဆီဆိုင်စစ်ခွေးဂိတ်ကနေ ၈၁မမ လက်နက်ကြီး (၄)လုံးထက်မနည်း မြောက်ဘက်ခြမ်းရွာတွေဘက်ကို ရမ်းကားပစ်ခတ်ခဲ့တာ"လို့ ဆက်ပြောပါတယ်။

စစ်ကောင်စီက ပစ်ခတ်လိုက်တဲ့ လက်နက်ကြီးတွေဟာ ဖိန်းကားရွာထဲနဲ့ ဘုန်းကြီးကျောင်းအနီးကို (၂)လုံး ကျရောက်ပေါက်ကွဲခဲ့တာကြောင့် အသက်(၇၀)ဝန်းကျင်ခန့် အဘွားအိုတစ်ဦး ပေါင်ထိမှန်ဒဏ်ရာရရှိခဲ့တယ်လို့ ဆိုပါတယ်။

ဒါ့အပြင် ဒီကနေ့ နံနက်ပိုင်းအချိန်ကလဲ ရေဦးမြို့ပေါ်မှာ စစ်ကောင်စီတပ်တွေ လှုပ်ရှားတာတွေရှိနေကာ ပြည်သူတွေ အသွားအလာ ဆင်ခြင်ကြဖို့နဲ့ ပေါ်တာဆွဲတာတွေရှိနိုင်တာကြောင့် အထူးဂရုစိုက်ကြဖို့ အသိပေးတာတွေ ရှိနေတယ်လို့ သိရပါတယ်။

03/02/2025

တရုတ်လူမျိုး သောင်းနဲ့ချီဝင်လာတဲ့ ဘုရားသုံးဆူမြို ရွှေကုက္ကိုလ်လိုမျိုး ဖြစ်လာနိုင်တယ်လို့ဆို

ဖေဖော်ဝါရီလ (၃)ရက်။

စည်ကားလာတဲ့ ကရင်ပြည်နယ်၊ ကြာအင်းဆိပ်ကြီးမြိုနယ်ရှိ ဘုရားသုံးဆူမြိုဟာ ကျားဖြန့်အပါအဝင် ဒုစရိုက်လုပ်ငန်းမျိုးစုံနဲ့ နာမည်ကြီးနေတဲ့ ရွှေကုက္ကိုလ်လိုမျိုး ဖြစ်လာနိုင်တယ်လို သုံးသပ်ပြောဆိုထားချက်တွေအရ သိရပါတယ်။

"အခု ဘုရားသုံးဆူမှာ တရုတ်တွေ ဝင်လာတာရှိတယ်။ သူတိုတွေက လိုင်စင်မဲ့ကားကောင်းကောင်းတွေကို ထိုင်းဘက်ကနေသွင်းပြီး သူတိုပိုင်ရာဆိုင်ရာ ပေးကမ်းထားတဲ့ အဖွဲအစည်းတွေရဲ့ တံဆိပ်တွေကို နံပါတ်ပြားမှာကပ်ပြီး စီးနေကြတာ။ ပြီးရင်သူတိုက အိမ်ကောင်းကောင်းမှာနေတယ်။ ဗမာအိမ်ဖော်တွေနဲ့နေတယ်။ နောက်ပိုင်း မကြာခင်ပေါ့ ရွှေကုက္ကိုလ်လိုမျိုး ကြီးထွားလာနိုင်တယ်"လို မြိုခံတစ်ဦးက ဆိုပါတယ်။

ဘုရားသုံးဆူမြိုမှာ တရုတ်နိုင်ငံသားတွေ ဝင်ရောက်တာတွေ ရှိလာသလို ထိုင်းနိုင်ငံဘက်ကနေ လိုင်စင်မဲ့ကားတွေ တင်သွင်းပြီး BGF၊ DKBA နဲ့ KNU စတဲ့ အဖွဲအစည်းတွေရဲ့ တံဆိပ်တွေနဲ့ စီးနင်းသွားလာနေကြတာလို သိရပါတယ်။

အခုအခါ မြဝတီမြို ရွှေကုက္ကိုလ်မှာ ကျားဖြန့်တွေကို တိုက်ဖျက်နှိမ်နင်းတာတွေကြောင့် အဲ့ဒီဘက်က တရားမဝင်လုပ်ငန်းတွေဟာ ဘုရားသုံးဆူဘက်ကို ရောက်ရှိလာသလို ရာဘာခြံတွေမှာ လူဦးရေ ရာဂဏန်းအထိ နေထိုင်နိုင်တဲ့ အဆောက်အဦးတွေ ဆောက်လုပ်တာတွေ ရှိနေပါတယ်။

"သူတို(တရုတ်)တွေက ငွေရင်းငွေနှီးရှိတော့ ဘုရားသုံးဆူမြိုပြင်က ရာဘာတောတွေမှာ လုံးချင်းတိုက်အကြီးကြီးတွေဆောက်ပြီး လူ(၅၀၀) (၁၀၀၀)လောက် နေနိုင်အောင် ရွှေကုက္ကိုလ်လိုမျိုး KK Park လို လုပ်ချင်နေကြတဲ့ပုံစံမှာ ရှိနေတယ်လို သိရတယ်။ အဲ့သတင်းကတော့ တကယ်အတိအကျပဲ၊ ဒီဘက်က မြေကပေါတော့ သူတိုဝယ်မယ်၊ ပြီးရင် ခြံခတ်မယ်။ လုံခြုံရေးငှားမယ်ပေါ့။ အဖွဲတွေကို ပေးထားကမ်းထားတာဆိုတော့ သူတို လုပ်ချင်တာ လုပ်မယ်ဆိုတဲ့ ပုံစံမျိုး"လို သူက ဆက်ပြောပါတယ်။

ဘုရားသုံးဆူမြိုဟာ လျှပ်စစ်မီးကို ထိုင်းနိုင်ငံကနေ ရရှိနေသလို ကျားဖြန့်တွေ ဝင်လာပါက အင်တာနက်လိုင်းကို ထိုင်းဘက်ကနေသာ ရယူနိုင်တာဖြစ်တဲ့အတွက် မကြာခင် ဘုရားသုံးဆူမြိုကို လျှပ်စစ်မီးနဲ့ အင်တာနက်လိုင်းတွေ ဖြတ်တောက်လာနိုင်တယ်လို သိရပါတယ်။

အခုအခါ ဘုရားသုံးဆူမြိုအနီးတဝိုက်ကို တရုတ်နိုင်ငံသား စုစုပေါင်း သောင်းနဲ့ချီပြီး ဝင်ရောက်လာခဲ့ကာ ကာစီနိုလုပ်ငန်းတွေနဲ့ ပြည့်တန်ဆာလုပ်ငန်းတွေကို ကျယ်ကျယ်ပြန့်ပြန့် လုပ်ဆောင်လာနေကြပြီလိုလဲ ဆိုပါတယ်။

ဘုရားသုံးဆူမြိုဟာ တရုတ်နိုင်ငံသားတွေနဲ့ စည်ကားလာသလို စစ်ကောင်စီရဲ့ စစ်မှုမထမ်းမနေရဥပဒေကြောင့် ထွက်ပြေးလာကြတဲ့ လူငယ်တွေလဲ အများအပြားရှိနေပြီး ကောင်းတဲ့ဘက်က စည်ကားလာတာမျိုး မဟုတ်ဘူးလို သိရပါတယ်။

အခုလို ဘုရားသုံးဆူမြိုဟာ ဒုစရိုက်မြိုတော်ဖြစ်လာတဲ့အပေါ် စိတ်မကောင်းဖြစ်ရကာ စစ်ကောင်စီအနေနဲ့ အာဏာတည်မြဲရေးသာ လုပ်ဆောင်နေတာကြောင့် ဒုစရိုက်လုပ်ငန်းတွေကို ထိထိရောက်ရောက် နှိမ်နင်းနိုင်မှာမဟုတ်ဘူးလို ပြောဆိုထားချက်တွေအရ သိရပါတယ်။

ဓာတ်ပုံ။
DKBA နံပါတ်တပ်ထားသည့်ကားတစ်စီးကို တွေ့ရစဉ်

03/02/2025

ဘုတလင်မှာ စစ်ကောင်စီဒရုန်းကြောင့် ကျောင်းထိုင်ဘုန်းကြီးတစ်ပါး ပျံလွန်တော်မူခဲ့

ဖေဖော်ဝါရီလ (၃)ရက်။

ဖေဖော်ဝါရီလ (၁)ရက်နေ့က ဘုတလင်မြို့အနီး စိမ့်တောတောရဘုန်းကြီးကျောင်းကို စစ်ကောင်စီက ဒရုန်းနဲ့ ဗုံးသီးကြဲချ တိုက်ခိုက်ခဲ့တယ်လို့ ကနီမြို့နယ်ပကဖ လက်ရုံးတပ်ရဲ့ မနေ့က ထုတ်ပြန်ထားချက်အရ သိရပါတယ်။

"အဲ့ဒီနေ့ ညနေပိုင်းက ဘုတလင်မြို့ပေါ် စစ်ခွေးတွေ အထိုင်ချတပ်စွဲထားတဲ့ နေရာတွေကို ကာကွယ်ရေးတပ်ဖွဲ့တွေက တိုက်ခိုက်ခဲ့ကြတာပါ။ အဲ့ဒီမှာ စခတွေက စိမ့်တောတောရဘုန်းကြီးကျောင်းကို ဒရုန်းနဲ့ ဗုံးသီးတွေ ရမ်းသန်းကြဲချတာကြောင့် ဘုန်းကြီးတပါး ပျံလွန်တော်မူခဲ့တာ"လို့ ဆိုပါတယ်။

စစ်ကောင်စီတပ်ဟာ ပစ်ခတ်ခံရပြီးနောက် ဘုတလင်မြို့အနီးရှိ စိမ့်တောတောရဘုန်းကြီးကျောင်းကို ဒရုန်းနဲ့ ဗုံးသီး (၂)ကြိမ် ရမ်းသန်းကြဲချခဲ့တာလို့ ဖော်ပြထားပါတယ်။

စစ်ကောင်စီရဲ့ ဗုံးသီးကြဲချတာကြောင့် သက်တော်(၅၀)ကျော်၊ ဝါတော်(၃၀)ကျော်ရှိတဲ့ ကျောင်းတိုင်ဘုန်းကြီး ဉူးက္ကဒ္ဓိဗလ ပျံလွန်တော်မူခဲ့တယ်လို့ ရေးသားထားပါတယ်။

အဲ့ဒီဖြစ်စဉ်မတိုင်မီ ညနေ (၄)နာရီခဲအချိန်က ဘုတလင်မြို့ပေါ်ရှိ စစ်ကောင်စီတွေ တပ်စွဲထားတဲ့ ထွေအုပ်ရုံး၊ ရဲစခန်းနဲ့ ဘောလုံးကွင်း စတဲ့နေရာတွေကို ကာကွယ်ရေးတပ်တွေက အီနာဂါဗုံးသီးတွေအပါအဝင် လက်နက်ငယ်တွေနဲ့ ပစ်ခတ်ခဲ့တယ်လို့ သိရပါတယ်။

အဲ့ဒီလိုတိုက်ခိုက်ခံရတာကြောင့် စစ်ကောင်စီတပ်တွေဘက်က ထိခိုက်တာတွေရှိခဲ့သလို အထိနာခဲ့တဲ့ စစ်ကောင်စီတပ်က လက်နက်ကြီး၊ လက်နက်ငယ်တွေအပါအဝင် ဒရုန်းနဲ့ ဗုံးသီးကြဲချ တိုက်ခိုက်ခဲ့တယ်လို့ ပြောဆိုထားပါတယ်။

အဲ့ဒီစစ်ဆင်ရေးကို ကနီမြို့နယ်ပကဖ လက်ရုံးတပ်၊ သိမ်းငှက်ပြောက်ကျားတပ်ဖွဲ့(ကနီ)နဲ့ ဒေသခံကာကွယ်ရေးအဖွဲ့တွေ ပူးပေါင်းလုပ်ဆောင်ခဲ့တာလို့ ထုတ်ပြန်ထားချက်အရ သိရပါတယ်။

03/02/2025

ဘုရားသုံးဆူမြို့စည်ကားလာတာ ပျက်စီးမှုရဲ့အစလား?

ခေတ်မျက်လုံးကဒီအပတ်တင်ပြတဲ့အကြောင်းအရာကတော့မြဝတီကကျားဖျံငွေလိမ်ဂိုဏ်းတွေ လက်ရဲဇက်ရဲဖြစ်လာပြီး တရုတ်သရုပ်ဆောင်တဦးကို လိမ်လည်ပြီး ကေကေပတ်ကို ခေါ်ဆောင်ခဲ့တာနဲ့နောက်ဆက်တွဲ တရုတ်လူမျိုးတွေကို ခေါ်ဆောင်တာ ဆက်တိုက် ပေါ်ထွက် လာပြီးနောက် ဘုရားသုံးဆူဖက်ကို တရုတ်ဂိုဏ်းတွေ အုံနဲ့ကျင်းနဲ့ ရွေ့ပြောင်းသွားကြတဲ့ သတင်းကို အတည်ပြုနိုင်ဖို့ဘုရားသုံးဆူနယ်မြေအကြောင်းကိုသိတဲ့ ABSDF ရဲဘော်ဟောင်း ကိုပေါ်ထင်ကို မေးမြန်းထားပါတယ်။

“ဘုရားသုံးဆူစည်ကားလာတာ တိုးတက်မှုလား ပျက်သုဥ်းမှုလား?” ကို ကြည့်ရှုနိုင်ကြပါတယ်။

ခေတ်မျက်လုံးအယ်ဒီတာအဖွဲ့

ဘုရားသုံးဆူမြို့စည်ကားလာတာ ပျက်စီးမှုရဲ့အစလား?ခေတ်မျက်လုံးကဒီအပတ်တင်ပြတဲ့အကြောင်းအရာကတော့မြဝတီကကျားဖျ....

02/02/2025

ဒီမိုကရက်တစ်ပါတီ အမျိုးသားကော်မတီ (DNC) သဘာပတိအသစ် ကင်မာတင် (Ken Martin) က ထရန့်ရဲ့ အခွန်အကောက်နဲ့ပတ်သက်ပြီး 'တော်တော်စိတ်ဆိုးသင့်တယ်' ဟု ပြော

ဖေဖော်ဝါရီလ (၂) ရက်။

DNC ကို ဦးဆောင်ဖို့ မနေ့က ရွေးကောက်ပွဲမှာ အနိုင်ရခဲ့တဲ့ ဒီမိုကရက်တစ် အမျိုးသား ကော်မတီ ဥက္ကဌ ကင်မာတင် က “အလုပ်သမား မိသားစုတွေဟာ ထရန့်ရဲ့ အခွန်စည်းကြပ်မှု ကုန်ကျစရိတ်ကို ကျခံပေးရလိမ့်မယ်” လို့ ပြောပါတယ်။

"ဒါကတော့ ထရန့်ရဲ့ မှားယွင်းတဲ့ အကောက်ခွန်မူဝါဒနဲ့ ပတ်သက်တဲ့ အရာပါပဲ၊ ထရန့်က ဒီ အခွန်အခတွေအတွက် ကော်ပိုရိတ် ဘီလီယံနာတွေကို ပေးဆောင်စေမှာ မဟုတ်ပါဘူး။ အလုပ်လုပ်တဲ့ မိသားစုတွေနဲ့ အသေးစား စီးပွားရေးလုပ်ငန်းတွေကို ကျခံရအောင် လုပ်မှာပါ" လို့ မာတင်က ပြောကြားခဲ့ပါတယ်။

"သူဟာ သူ့ရဲ့သေးငယ်တဲ့ နိုင်ငံရေးဂိမ်းတွေမှာ အမေရိကန် အလုပ်သမားတွေကို အပေါင်အဖြစ် အသုံးပြုနေပါတယ်။ သမ္မတက ငါ့မိသားစုကို ပြေလည်အောင် အကူအညီပေးမယ်လို့ ကတိပေးခဲ့ပြီး ဒီလိုအခွန်မူဝါဒချရင် ငါ တော်တော် ဒေါသထွက်မိလိမ့်မယ်။ ဒါကြောင့် မင်း လဲဒေါသထွက်သင့်တယ်။"

မနေ့က ရွေးကောက်ပွဲမှာ DNC ကို ဦးဆောင်ဖို့ အရင်က ဦးဆောင်ခဲ့တဲ့ ဂျေမီဟဲရစ်ဆင် (Jaime Harrison) ရဲ့ နေရာအတွက် မာတင်ကို ရွေးချယ်ခံကြပါတယ်။

ညီညွတ်တဲ့အော်တိုလုပ်သားများသမဂ္ဂ (United Auto Workers) ဥက္ကဋ္ဌက
အခွန်ကောက်ခံမှုကို တုံ့ပြန်‌ပြောကြားခဲ့ပါတယ်။

မကြာခဏဆိုသလို ထရန့်ကို ဝေဖန်သူ United Auto Workers ဥက္ကဋ္ဌ ရှောင်းဖိန် (Shawn Fain) က X တွင် ထရန့်ဟာ "အပြာရောင်ကော်လာ အလုပ်သမားကောင်းတွေရဲ့ အလုပ်အကိုင်တွေကို တိုးမြှင့်ဖန်တီးလိုတာနဲ့ပတ်သက်ပြီး အလေးအနက်ထားခဲ့ရင် သူဟာ ကျွန်တော်တို့ရဲ့ ကျိုးပျက်သွားတဲ့ ကုန်သွယ်ရေး သဘောတူညီချက်တွေကို ပြန်လည်ညှိနှိုင်းဖို့ ချက်ချင်းရှာဖွေသင့်တယ်" လို့ မနေ့က ပို့စ်တစ်ခုမှာ ပြောကြားခဲ့ပါတယ်။

လုပ်သားဆန့်ကျင်ရေးမူဝါဒကို ဆယ်စုနှစ်များစွာ ဖျက်သိမ်းတာအတွက် ပထမဆုံး ခြေလှမ်းအဖြစ် အမေရိကန်ထုတ်ကုန်အလုပ်တွေကို ကာကွယ်ဖို့ ပြင်းထန်တဲ့ အကောက်ခွန် အရေးယူမှုကို UAW က ထောက်ခံတယ်" လို့ ဖိန်းက ထုတ်ပြန်ချက်မှာ ဖော်ပြထားပါတယ်။

“လူဝင်မှုကြီးကြပ်ရေး ဒါမှမဟုတ် မူးယစ်ဆေးဝါးမူဝါဒကို တိုက်ဖျက်ရာမှာ စက်ရုံအလုပ်သမားတွေကို နယ်ရုပ်လေးတွေအဖြစ် အသုံးပြုတာကိုတော့
ကျွန်တော်တို့ မထောက်ခံပါဘူး။”

ဓာတ်ပုံ (၁) ဒီမိုကရက်တစ်ပါတီ အမျိုးသားကော်မတီ (DNC) သဘာပတိအသစ် ကင်မာတင် (Ken Martin)
ဓာတ်ပုံ (၂) United Auto Workers ဥက္ကဋ္ဌ ရှောင်းဖိန် (Shawn Fain)

02/02/2025

ထရန့်၏ အခွန်စည်းကြပ်မှုကို ကနေဒါ၊ မက္ကဆီကိုနှင့် တရုတ်တို့က လက်တုံ့ပြန်မည်ဟုဆို
++++++++++++++++++

ဖေဖော်ဝါရီလ (၂) ရက်။

အမေရိကန်၏မဟာမိတ် ကနေဒါနှင့် မက္ကဆီကိုတို့ကလည်း အမေရိကန်အပေါ် လက်တုံ့ပြန်ရန် တန်ပြန်အခွန်စည်းကြပ်မှုကို အကောင်အထည်ဖော်မည်ဟု ပြောကြားခဲ့သည်။ ရင်းနှီးသောကုန်သွယ်ဖက်များအကြားတွင် နောက်ထပ် စီးပွားရေးအ‌ခြေအတင်ဖြစ်မှုကို အချက်ပြသည့် လှုပ်ရှားမှုတစ်ခုဖြစ်သည်။

ကနေဒါ၊ မက္ကဆီကိုနှင့် တရုတ်နိုင်ငံတို့မှ ကုန်ပစ္စည်းများအပေါ် အခွန်စည်းကြပ်ခြင်းဆိုင်ရာ သမတအမိန့်ကို သမ္မတဒေါ်နယ်ထရန့်က လက်မှတ်ရေးထိုးပြီး နာရီအနည်းငယ်အကြာတွင် သုံးနိုင်ငံသည် အဆိုပါ လုပ်ရပ်ကို ပြစ်တင်ရှုတ်ချပြီး လက်တုံ့ပြန်သည့် အစီအမံများကိုတန်ပြန်ချမှတ်မည်ဟု ထုတ်ဖော်ပြောဆိုခဲ့ ကြသည်။

ရင်းနှီးသောကုန်သွယ်ဖက်များကြားတွင် နောက်ထပ်စီးပွားရေး အခြေအတင်ဖြစ်မှုကို အချက်ပြသည့် ထရန့်၏အပြုအမူကို တုံ့ပြန်သည့်အနေဖြင့် ၎င်းတို့၏ ကိုယ်ပိုင်အခွန် စည်းကြပ်မှုကို အကောင်အထည်ဖော်မည်ဟု အမေရိကန် မဟာမိတ်ကနေဒါနှင့် မက္ကဆီကိုတို့က ပြောကြားခဲ့သည်။

အမေရိကန်၏ ပြိုင်ဖက်ဖြစ်သော တရုတ်နိုင်ငံသည် လက်တုံ့ပြန် စည်းကြပ်ခွန်များ သို့မဟုတ် အခြားသော သီးခြားအစီအမံများကို ဖော်ပြထားခြင်း မရှိသော်လည်း ကမ္ဘာ့ကုန်သွယ်ရေးအဖွဲ့ထံ တရားစွဲကာ လိုအပ်သော တန်ပြန်အရေးယူမှုများ ပြုလုပ်မည်ဖြစ်ကြောင်း ပြောကြားခဲ့သည်။

အမေရိကန်သို့ ဖန်းတနယ်လ်မူးယစ်ဆေးနှင့် အထောက်အထားမဲ့ ရွှေ့ပြောင်းအခြေချသူများ စီးဆင်းမှုတွင် ၎င်းနိုင်ငံတို့၏ အခန်းကဏ္ဍပါဝင်မှုနှင့်ပတ်သက်၍ ထရန့်သည် မက္ကဆီကိုနှင့် ကနေဒါမှ သွင်းကုန်များအပေါ် အခွန် ၂၅% တိုးကောက်မည်ဖြစ်ပြီး ကနေဒါစွမ်းအင်ထုတ်ကုန်များမှအပ ၁၀% အခွန်စည်းကြပ်ရမည့်အပြင်၊ အလားတူအကြောင်းပြချက်ဖြင့် တရုတ်နိုင်ငံမှ သွင်းကုန်များအပေါ် အခွန် ၁၀ ရာခိုင်နှုန်း တိုး၍ကောက်ခံမည်ဖြစ်သည်။

အချို့ကို ခြွင်းချက်ပေးပြီး အမေရိကန်သည် အင်္ဂါနေ့တွင် အခွန်အများစုကို စတင်ကောက်ခံမည် ဖြစ်သည်။ အသေးစိတ်ကိုမူ ဖော်ပြခြင်းမရှိဘဲ အကျပ်အတည်း ကျော်လွှားသည်အထိ အခွန်ကောက်ခံမှုသည် ဆက်လက်တည်ရှိနေမည်ဟု အိမ်ဖြူတော်က ပြောကြားခဲ့သည်။

မက္ကဆီကို၊ ကနေဒါနှင့် တရုတ်တို့သည် ယမန်နှစ်က အမေရိကန်သို့ သွင်းကုန်စုစုပေါင်း၏ ၄၀ ရာခိုင်နှုန်းကျော်ရှိသည်။ ပါးကိုက်လျှင် နားကိုက်မည်ဆိုသည့် နိုင်ငံတို့၏ခေါင်းဆောင်များထံမှ သူတို့က တန်ပြန်အခွန်စည်းကြပ်မည့် ကြေညာချက်များသည် အမေရိကန်နှင့် ပြည်ပရှိ စားသုံးသူများအတွက် ကုန်စျေးနှုန်းများ မြင့်တက်စေပြီး အစားအသောက်၊ အီလက်ထရွန်းနစ်နှင့် ကားများကဲ့သို့သော ကုန်ပစ္စည်းများ၏ ဈေးနှုန်းများကို မြင့်တက်လာစေမည်ဖြစ်သည်။
ဂျပန်နိုင်ငံမီဒီယာများ၏ အဆိုအရ ကနေဒါရှိ ဂျပန်ကုမ္ပဏီများလည်း အကျိုးသက်ရောက်မည်ဖြစ်သည်ဟု သိရသည်။ ဂျပန်ကားပစ္စည်းထုတ်ကုမ္ပဏီအများစုသည် ကနေဒါနိုင်ငံတွင် စက်ရုံများတည်ဆောက်၍ ပစ္စည်းများထုတ်ပြီး အမေရိကန်သို့ တင်ပို့ကြသည်ဟု သိရသည်။

ယခုအချိန်အထိ ကနေဒါဝန်ကြီးချုပ်ဂျပ်စတင်ထရူးဒိုး( Justin Trudeau) သည် နိုင်ငံ၏ တုံ့ပြန်မှုက မည်သို့မည်ပုံမည်ပုံ ရှိမည်ကို အသေးစိတ်ဖော်ပြသည့် တစ်ဦးတည်းသော ခေါင်းဆောင်ဖြစ်နေခဲ့သည်။ ကနေဒါသည် အမေရိကန် ကုန်ပစ္စည်း ၁၅၅ ဘီလီယံ ဒေါ်လာ အပေါ် တွင် အခွန် ၂၅ ရာခိုင်နှုန်း ကောက်ခံခြင်းဖြင့် ကနေဒါ တင်ပို့မှုအပေါ် ၂၅ ရာခိုင်နှုန်း အခွန်စည်းကြပ်ရန် ထရမ့်၏ဆုံးဖြတ်ချက်ကို ကနေဒါမှ တုံ့ပြန်မည်ဟု စနေနေ့ညက ကြေညာခဲ့သည်။

ထရူးဒိုးသည် အမေရိကန် ကုန်ပစ္စည်းများမှ ဒေါ်လာ ၁၅၅ ဘီလီယံသည် ကနေဒါဒေါ်လာ သို့မဟုတ် အမေရိကန်ဒေါ်လာ ဖြင့် သတ်မှတ်မည်ကိုမပြောခဲ့ပေ။ ကနေဒါဒေါ်လာ ၁၅၅ဘီလီယံသည် အမေရိကန်ဒေါ်လာ ၁၀၆ ဘီလီယံခန့် ရှိမည်ဖြစ်သည်။ အမေရိကန်ကုန်ပစ္စည်းများအပေါ် အခွန်စည်းကြပ်မှုတွင် "အင်္ဂါနေ့တွင် ဒေါ်လာ ၃၀ ဘီလီယံတန်ဖိုးရှိ ကုန်ပစ္စည်းများအပေါ် ချက်ချင်း အခွန်ကောက်ခြင်းများ" ပါ၀င်ကြောင်း စနေနေ့ညနေခင်း သတင်းစာရှင်းလင်းပွဲတွင် ထရူးဒိုးက ပြောကြားခဲ့သည်။ ထရန့်က ကနေဒါကုန်ပစ္စည်းများအပေါ် စည်းကြပ်ခွန်များ စတင်ကောက်ခံမှုနှင့်တချိန်တည်း အင်္ဂါနေ့တွင် ကောက်မည်ဖြစ်သည်။

ကနေဒါကုမ္ပဏီများနှင့် ထောက်ပံ့ရေးကွင်းဆက်များသည် အခြားရွေးချယ်စရာများကို ရှာဖွေ ကြိုးပမ်းနိုင်ရန် ကျန်အကောက်ခွန်များကို သုံးပတ်ခန့်အကြာမှ စတင်မည် ဖြစ်ကြောင်း ၎င်းက ပြောကြားခဲ့သည်။

"အမေရိကန်ရဲ့ အခွန်စည်းကြပ်မှုလိုပဲ၊ ကျွန်တော်တို့ရဲ့ တုံ့ပြန်မှုက အလှမ်းဝေးပြီး အမေရိကန် ဘီယာ၊ ဝိုင်နဲ့ ဘာဘွန် (အရက်)၊ လိမ္မော်ရည်အပါအဝင် သစ်သီးဖျော်ရည်တွေ၊ ဟင်းသီး ဟင်းရွက်တွေ၊ ရေမွှေးတွေ၊ အဝတ်အစားတွေနဲ့ ဖိနပ်တွေလိုမျိုး နေ့စဉ်သုံး ပစ္စည်းတွေ ပါမှာပါ" ဟု ထရူးဒိုးက ပြောကြားခဲ့သည်။

"အိမ်သုံးအသုံးအဆောင်တွေ၊ ပရိဘောဂနဲ့ အားကစားသုံးပစ္စည်းတွေ၊ သစ်သားနဲ့ ပလတ်စတစ်လိုမျိုး ပစ္စည်းတွေအပါအဝင် အဓိက လူသုံးကုန်ပစ္စည်းတွေ အပါအဝင်၊ အများကြီးပါပါတယ်။"

ထရူးဒိုးသည် အမေရိကန်-ကနေဒါ မဟာမိတ်အဖွဲ့၏ ရှည်လျားသောသမိုင်းကြောင်းကို အလေးပေးပြောကြားခဲ့ပြီး "သမ္မတ ထရန့်ဟာ အမေရိကန်ပြည်ထောင်စုအတွက် 'ရွှေခေတ်' သစ်ကို ဦးတည်လိုပါက၊ ပိုမိုကောင်းမွန်တဲ့လမ်းကြောင်းဟာ ကျွန်တော်တို့ကို အပြစ်ပေးခြင်း မဟုတ်ဘဲ ကနေဒါနဲ့ ပူးပေါင်းရန်သာဖြစ်တယ်" ဟု စောဒကတက်ခဲ့သည်။

ဝန်ကြီးချုပ်သည် ထရန့်၏လှုပ်ရှားမှုသည် "အမေရိကန်ပြည်သူတွေအတွက် အမှန်တကယ် အကျိုးဆက်တွေ ရှိလာလိမ့်မယ်" ဟု အမေရိကန်လူမျိုးများကို တိုက်ရိုက်မိန့်ခွန်း ပြောကြားခဲ့သည်။

စတိုးဆိုင်များတွင် အမေရိကန်လုပ်ထုတ်ကုန်များထက် ကနေဒါထုတ်ကုန်များကို သုံးစွဲရန်နှင့် နွေရာသီအားလပ်ရက်အစီအစဉ်များကို ပြောင်းလဲပြီး ကနေဒါတွင် နေထိုင်ရန်စသည့် "သင်တို့အတွက်" လုပ်ရန် နည်းလမ်းများ စဉ်းစားရန် ကနေဒါနိုင်ငံသားများကို တိုက်တွန်းခဲ့သည်။

ထရုးဒိုး ၏ ကြေညာချက်အပေါ် မှတ်ချက်ပေးရန် တောင်းဆိုချက်ကို အိမ်ဖြူတော်က ချက်ချင်း တုံ့ပြန်ခြင်း မရှိပေ။

မက္ကဆီကိုသမ္မတ ကလော်ဒီယာ ရှိန်းဘန်း (Claudia Sheinbaum) က “မက္ကဆီကို အကျိုးစီးပွားကာကွယ်ရေးအတွက် အကောက်ခွန်မဲ့ အစီအမံတွေ ပါ၀င်တဲ့ ကျွန်မတို့ လုပ်ဆောင်နေတဲ့ Plan B ကို အကောင်အထည်ဖော်ဖို့ စီးပွားရေးအတွင်းရေးမှူးအား ညွှန်ကြားထားကြောင်း လူမှုကွန်ရက်စာမျက်နှာ X ၏ ပို့စ်တွင် စနေနေ့၌ စပိန်ဘာသာဖြင့် ပြောကြားခဲ့သည်။

သို့ရာတွင် ဒီအစီအစဉ်နှင့် ပတ်သက်ပြီး အသေးစိတ်ကိုတော့ ကြေညာထားခြင်း မရှိသေးပါ။

ရှိန်းဘန်းက X ပို့စ်တွင် စည်းကြပ်ခွန်များကို ပြစ်တင်ဝေဖန်ခဲ့ပြီး “ကျွန်မတို့ကို ရာဇ၀တ်အဖွဲ့အစည်းတွေနဲ့ မဟာမိတ်ဖွဲ့တယ်လို့ စွပ်စွဲပြီး မက္ကဆီကိုအစိုးရကို အိမ်ဖြူတော်က ဆဲဆိုကြိမ်းမောင်းတာကို ပြတ်ပြတ်သားသား ပယ်ချပြီး ကျွန်မတို့ရဲ့နယ်မြေအတွင်း ဝင်ရောက်စွက်ဖက်ဖို့ ရည်ရွယ်ချက်ထားနေတာကို ရှုံချတယ်" ဟု အပစ်တင်ခဲ့သည်။

"မက္ကဆီကိုက ဖန်းတနယ်လ်မူးယစ်ဆေးကို အမေရိကန်ကို မရောက်ရှိစေချင်ရုံသာမက ဘယ်နေရာကိုမဆို မရောက်စေချင်ပါဘူး" ဟု သူမက ထည့်သွင်းပြောကြားခဲ့သည်။

“ဒါကြောင့် အမေရိကန်အနေနဲ့ မူးယစ်ဆေးဝါး ရောင်းဝယ်ဖောက်ကားတဲ့ ရာဇ၀တ်ဂိုဏ်းတွေကို နှိမ်နင်းချင်တယ်ဆိုရင် ကျယ်ကျယ်ပြန့်ပြန့် ပူးပေါင်းဆောင်ရွက်ရမှာ ဖြစ်ပေမယ့် တာဝန်ခွဲဝေမှု၊ အပြန်အလှန်ယုံကြည်မှု၊ ပူးပေါင်းဆောင်ရွက်မှုနဲ့ တဦးရဲ့အချုပ်အခြာအာဏာကို တဦးက လေးစားလိုက်နာဖို့လိုပါတယ်။ ဒါက ညှိနှိုင်းလို့ မရပါဘူး” ဟု ၎င်းက ဆက်လက်ပြောသည်။ ပူးပေါင်းဆောင်ရွက်တာကတော့ ရတယ်၊ လက်အောက်ငယ်သားအဖြစ်ကတော့ လက်မခံဘူး" ဟု သူမက ပြောခဲ့ပါသည်။