ウェブサイトとは何ですか？

https://www.facebook.com/280586965145141/

Tokyo Myanmar Homies, 大谷田1, Adachi-ku (2024)

17/10/2024

ကိုယ်တောင်းဆိုသမျှ Photo Shoot ပိုစ့်တိုင်းကို

အကောင်းဆုံး ကြိုးစားပေးသော

ညီမလေး 😇😇

12/10/2024

ဒီနောက်ပိုင်းတွေမှာ
အနည်းဆုံးတော့
တခုခု ကျန်နိုင်မယ့်
Content တွေ
အဆက်မပြတ် ထွက်ရှိနိုင်အောင်
ကြိုးစားနေလျက်ရှိပါကြောင်း😇😇

17/09/2024

တအားဆူကြတာပဲနော် 😌

လှူတာကို တင်ပြလို့ ဆူတာက တမျိုး
လှူတာကို မတင်ပြလို့ ဆူတာကတမျိုး

တိတ်တိတ်လေးလှူနေတော့လဲ မလှူဖူးလားတဲ့
လူသိသူသိ လှူပြန်တော့လဲ ပြစားမှု့တဲ့

ငြိမ်နေရင်လဲ နေလို့
ထနေရင်လဲ ထလို့ 🫢🫢🫢

Facebook သုံးတက်လာကတည်းက
မိဘက သိပ်ဆုံးမရတယ်ဆိုတာ မရှိတော့ဘူး
ဖေ့စ်ဘွတ်ပေါ်က ဆုံးမစာတွေဖတ်ရင်းနဲ့တင်
တော်တော်လိမ္မာနေပြီ🫢

01/09/2024

The Japan Life and Work Chronicles Part 5
zin myo @ eric
2024-9-1(Sun)

25/08/2024

The Japan Life and Work Chronicles Part 4

zin myo @ eric

2024-8-25(Sun)

18/08/2024

မာကိုပိုလို (Marco Polo Netflix Series)

ဒီတခေါက် ဂျပန်ပိတ်ရက်ရှည်မှာ ကိုရိုနာမိပြီး အပြင်မထွက်ဖြစ်တာနဲ့ Netflix က မာကိုပိုလိုဆိုတဲ့ စီးရီးကို ကြည့်ဖြစ်ခဲ့ပါတယ်။

ငယ်ငယ်က သမိုင်းသင်ခဲ့ရတုန်းက ကြားဖူးတဲ့ မာကိုပိုလို ကို အခုချိန် ပြန်စဥ်းစားကြည့်တော့ ခရီးသွားပြီးနယ်မြေသစ်နဲ့ ပတ်သက်တာတခုခု လုပ်ခဲ့တဲ့သူလို့ပဲ မှတ်မိတော့တယ်။

စီးရီး Season 2 ခုလုံးကို ကြည့်ပြီးသည့်နောက် မပြီးပြတ်သေးတဲ့ နောက်ဆက်တွဲတွေ ကျန်နေသေးတာကြောင့် နောက်ထပ်ကြည့်ချင်သေးပေမဲ့၊ ဇာတ်လမ်းထုတ်လုပ်မှုစရိတ်မြင့်မားပြီး ကြည့်ရှုသူ နည်းပါးခဲ့တာကြောင့် Netflix မှ ထုတ်လုပ်မှုကို ရပ်ဆိုင်းခဲ့ပုံရပါတယ်။

ကမ္ဘာ့အကြီးမားဆုံးအင်ပါယာဖြစ်ခဲ့တဲ့
မွန်ဂိုဧကရာဇ် ဂျင်ဂျစ်ခန်ခေတ်နောက်ပိုင်း မွန်ဂိုဧကရာဇ် Kublai Khan ရဲ့ မွန်ဂိုအင်ပါယာအတွင်း အုပ်ချုပ်မှုပုံစံ၊ ခန်းနားလှတဲ့ အာရှယဉ်ကျေးမှု၊ နန်းတွင်းမိသားစု အရှုပ်အထွေးနှင့် ပြည်တွင်းပြည်ပ ရန်စွယ်အန္တရာယ်များကို နှိမ်နင်းမှုများဖြင့် ဇာတ်လမ်းကို တင်ဆက် ထားပါတယ်။ သမိုင်းဆိုင်ရာအချက်လက်များကို ကိုးကားပြီး၊ Kublai ခေတ်ရဲ့ အရှေ့နိုင်ငံနှင့် အနောက်နိုင်ငံတို့ကြား အပြန်အလှန်ဆက်ဆံမှု၊ ကုန်သွယ်မှုပုံစံ၊ အဲဒီခေတ်ကာလကို ပေါ်လွင်ထင်ဟပ်လာစေအောင် ကုန်ကျစရိတ်များစွာဖြင့် လွတ်လပ်စွာ ဖန်းတီးထားသော စီးရီးတခုဖြစ်တာ သိရပါတယ်။

အာရှယဉ်ကျေးမှု ပုံရိပ်ယောင်ပွဲ
မွန်ဂိုအင်ပါယာ၏ ကျယ်ပြောလှပြီး မတူကွဲပြားလှတဲ့ မျိုးနွယ်စုယဥ်ကျေးမှုများကို အသေးစိတ် သရုပ်ဖော်ပြထားတဲ့အပြင်၊ အနုစိတ်သော ဒီဇိုင်းများဖြင့် Khan ရဲ့ နန်းတွင်းခမ်းနားထည်ဝါမှုဟာ အာရှယဉ်ကျေးမှုမြင့်မားခြင်းကို ကိုယ်စားပြုနေပါတယ်။ ဝတ်စုံများ၊ ရှုခင်းများနှင့် ဗိသုကာလက်ရာများကို အမြင်အာရုံ စွဲဆောင်မှုအပြည့်ဖြင့် အာရှရဲ့ကြွယ်ဝမှုကို မီးမောင်းထိုး ဖမ်းစားထားပါတယ်။

ရှုပ်ထွေးသောဇာတ်ကောင်များနှင့် ယဉ်ကျေးမှုအတိမ်အနက်
Marco Polo ကိုဗဟိုပြုထားသော ဇာတ်လမ်းဖြစ်သော်လည်း စီးရီးတလျှောက် အခြားအာရှဇာတ်ကောင်စရိုက်များကိုလည်း သိသိသာသာ အလေးပေးဖော်ပြထားပါတယ်။ ဧကရာဇ် Kublai Khan ဆိုရင် လောကီစည်းစိမ်အပြည့်ဖြင့် အောင်
နိုင်သူဖြစ်ရုံတင်မက ကြီးမားကျယ်ပြန့်သော အင်ပါယာကို အုပ်ချုပ်ရန် စိန်ခေါ်မှုများကို တောက်လျှောက် နပန်းလုံးနေရပါတယ်။ သစ္စာစောင့်သိမှု၊ ပရိယာယ် နှင့် ယဉ်ကျေးမှုဖလှယ်မှုတို့ဖြင့် သူရဲ့ လွှတ်တော်
ခန်းမ တရားရုံး၏ သရုပ်ဖော်မှုသည် အဲဒီခေတ်ကာလ၏ ရှုပ်ထွေးသော လူမှုရေး၊ နိုင်ငံရေး ရေချိန်များကို ဖော်ညွှန်းပြသထားပါတယ်။

အရှေ့နှင့်အနောက်လမ်းဆုံ
မွန်ဂိုတို့နှင့် Marco Polo ဆက်ဆံထိတွေ့ များမှ ဖြစ်ပေါ်လာတဲ့ အပြန်အလှန်ဆွဲဆောင်မှု၊ နားလည်မှုအလွဲများကို ပြသထားပါတယ်။ Polo ရဲ့ မျက်လုံးများကနေတစ်ဆင့် အနောက်နိုင်ငံများမှ အာရှယဉ်ကျေးမှုကို အံ့သြမှင်သက်စွာ ရှုမြင်ပုံများကို ကြည့်ရတဲ့ အာရှမှာနေတဲ့ သူတယောက်အနေနဲ့ အနည်းငယ် အားရကျေနပ်စိတ်တော့ ဖြစ်မိပါတယ်။

ကိုယ်ခံပညာနှင့် ဗျူဟာ
အာရှရုပ်ရှင် ထုံးတမ်းစဉ်လာများအတိုင်း ကိုယ်ခံပညာကို အဓိကထားပြီး တိုက်ခိုက်သည့် အပိုင်းများကို ကောင်းမွန်စွာ ပုံဖော်ထားပါသည်။ လူများများသုံးပြီး၊ သေဆုံးပျက်စီးလောင်းကျွမ်းရတဲ့ ပြကွက်များကို ပေါပေါပဲပဲ မလုပ်ထားတာကြောင့်
ကြည့်ရှုရတဲ့သူကို ဆွဲဆောင်မှုအပြည့်ဖြင့် စစ်မှန်တဲ့အရသာကို ရစေပါတယ်။

သမိုင်းဆိုင်ရာ လွတ်လပ်မှုနှင့် ယဉ်ကျေးမှုဆိုင်ရာ ကိုယ်စားပြုမှု
တခု သတိထားရမှာက ဒီ Marco Polo ဇာတ်လမ်းကို ကြည့်တဲ့အခါ အမှန်တကယ်ဖြစ်ပျက်ခဲ့တဲ့ သမိုင်းဖြစ်ရပ်မှန်ကို တင်ပြထားတာမျိုးမဟုတ်တာကြောင့် စိတ်ကူးယဉ်ဇာတ်လမ်းလက်ရာအဖြစ် ရှုမြင်ရန် အရေးကြီးပါတယ်။ အနောက်တိုင်းဒါရိုက်တာက ခံစားတင်ပြတဲ့ အရှေ့တိုင်းဒေသနောက်ခံဇာတ်လမ်းကို လွတ်လွတ် လပ်လပ် ကြည့်ရှုနိုင်ဖို့ ဖြည့်စွက်ပြောပြတာဖြစ်ပါတယ်။ Marco Polo ရဲ့ ရှုထောင့်ကနေ ဇာတ်ကြောင်းကို တင်ပြထားတာကြောင့် အနောက်တိုင်းရှုထောင့်ကို ဦးစားပေးလွန်းတယ်လို့ ခံစားရပါတယ်။ အကယ်၍ အာရှဇာတ်ကောင်များရဲ့ ရှုထောင့်ကိုလည်း ပိုမိုမျှမျှတတ တင်ပြနိုင်လျှင် ပိုကောင်းမလားဟု ယူဆမိပါတယ်။

အချုပ်ပြောရလျှင် Marco Polo စီးရီးဟာ အရှေ့အနောက်ဆုံခဲ့တဲ့ သမိုင်းတွင် အရေးပါသော ဖြစ်ရပ်တစ်ခု အသက်ဝင် ပုံပေါ်လာစေရန် ကောင်းမွန်တဲ့ ကြိုးပမ်းမှုတခုဖြစ်ပါတယ်။ ဇာတ်လမ်းတွင်းတွင် ပါဝင်ခဲ့သော အညှီအဟောက်နှင့် ရဲရင့်
ကြမ်းတမ်းတဲ့ ပြကွက်အချို့ကြောင့် ၁၆ နှစ်
အောက်ကလေးများ၊ မိသားစုဝင်များ အတူတူ ကြည့်ဖို့ အဆင်မပြေသော ဇာတ်လမ်းတွဲတခုလည်း ဖြစ်ပါတယ်။

ကျနော်ကတော့ Dr. Strange ဇာတ်ကားထဲက Mr.Wongနဲ့ ဆင်တူတဲ့ Kublai Khanဇာတ်ကောင်ကို သရုပ်ဆောင်တဲ့သူကို သဘောအကျဆုံးပါ။ ပေါပေါပဲပဲ မဟုတ်ဘဲ effect တွေ သေချာထည့်ရိုက်ပြထားတဲ့ သမိုင်း ခရီးသွား Adventure ဇာတ်လမ်းကြိုက်တဲ့သူဆိုရင် ကြည့်ကြည့်ဖို့ ညွှန်းပေးလိုက်ပါတယ်။ ပေးလိုက်ရတဲ့အချိန်နဲ့ တန်တဲ့ဇာတ်ကားတခုဖြစ်တာကြောင့် ပိတ်ရက်ရတဲ့အခါ အေးဆေးကြည့်ဖို့ကိုလည်း တိုက်တွန်းလိုက်ပါတယ်။

(မှတ်ချက်၊ ဇာတ်လမ်းထဲမှာ ဘန်ဒိုသိုင်းကျွမ်းတဲ့ နားတောင်းနဲ့ မြန်မာတောသား(The Jungles of Burma) ဘဲတဘွေ ပါသေးတယ်😅😅)

အာလုံး အဆင်ပြေ လွတ်မြောက်နိုင်ကြပါစေ:)
zin myo @ eric
2024/8/18(Sun)

10/08/2024

🌥️တိမ် 🌥️

"ကောင်းကင်ကြီးကို မော့ကြည့်ဖို့

ဘယ်တော့မှ မေ့မနေခဲ့ဘူး။

အထူးသဖြင့်

ဒီလို နေသာတဲ့ နေ့မျိုးတွေမှာပေါ့။

ဒီနေ့တနေ့တော့

ဘာပဲဖြစ်ဖြစ် ငါ မော့ကြည့်ခဲ့ပြီးပြီ။

ကမ္ဘာကြီးက

အံ့သြစရာကောင်းလောက်အောင်ကို

သဘာဝတရားကြီးနဲ့ ချပြလိုက်တာ။

အကြီးအကျယ် ငလျင်လှုပ်ခဲ့တဲ့

မနေ့က သူမဟုတ်သလို။

ကင်းဗတ်တစ်ခုပေါ်မှာ စုတ်တံကြီးများနှင့်

ခြယ်သထားသော တိမ်ဖြူ တိမ်ညို တွေက

တယောက်နှင့်တယောက် မတူညီတဲ့ ဇာတ်လမ်းကို

ပြောပြကြနေကြတယ်။

တချို့က စိမ့်ဝင်သွားတဲ့ ခေါင်းအုံးတွေလို

နူးညံ့ပျော့ပျောင်းနေတယ်။

အရိပ်များနှင့် အလင်းများကို ကာရံညီညီ

သက်ဝင်လှုပ်ရှားနေတဲ့ ကောင်းကင်ခုလုံးရဲ့

အခိုက်အတန့် တခုချင်းစီဟာ

ရိုးရှင်းပြီး မယုံနိုင်လောက်အောင် လှပမှုများဖြင့်

ပတ်ဝန်းကျင်ကို ခေတ္တအဆက်ပြတ်စေပြီး၊

ကျနော်တို့ကို တဒင်္ဂအသက်ရှုရပ်စေကာ

အကောင်းမြင် တန်ဖိုးထားတတ်

လာစေပါတယ်"

အားလုံးအဆင်ပြေ လွှတ်မြောက်နိုင်ကြပါစေ။

zin myo @ eric
2024-8-10(Sat)

09/08/2024

ဂျပန်မှာ ဘာကြောင့် သဘာ၀ဘေးအန္တရာယ်တွေ ဒီလောက်များနေရတာလဲ။

သဘာဝဘေးအန္တရာယ်ကြုံလာရင် ဘယ်လိုရင်မလဲ။

ကြိုပြီး ဘာတွေပြင်ဆင်ထားဖို့ လိုမလဲ။

စာရှည်တာကြောင့် အချိန်ရတဲ့ခါမှ အေးဆေး ဖတ်ရှု လေ့လာကြည့်ပါ။

ဂျပန်နိုင်ငံမှာ သဘာဝဘေးအန္တရာယ်တွေ ခဏခဏ ကျရောက်ရတဲ့ အဓိကအကြောင်းအရင်းကတော့ ဂျပန်နိုင်ငံရဲ့ တည်နေရာဟာ အနောက်ဘက်ပစိဖိတ်သမုဒ္ဒရာအောက်ကျောက်သားအလွှာနှင့် အရှေ့ဘက်ယူရေးရှားမြေအောက်ကျောက်သားအလွှာများ ပွတ်တိုက်မိရာနေရာဖြစ်တာကြောင့် ငလျင်လှုပ်ခတ်မှု များသောနိုင်ငံ တနိုင်ငံဖြစ်ပါတယ်။ တဆက်တည်းမှာငလျင်နှင့်အတူ ဆူနာမီလည်း ပါလာနိုင်သည့်အပြင် တိုင်ဖွန်းမုန်တိုင်းများ၊ မိုးသည်းထန်စွာ ရွာသွန်းမှုများ မကြာခဏ ဖြစ်ပွားလေ့ရှိကာ၊ ရေကြီးရေလျှံမှုတွေ၊ တောင်ပြိုမြေပြိုမှုများလည်း ဖြစ်ပေါ်လေ့ရှိတဲ့ နိုင်ငံတခုလည်းဖြစ်ပါတယ်။

ဒါကြောင့် အချိန်မရွေးဖြစ်ပွားနိုင်တဲ့ ဘေးအန္တရာယ်များအတွက် ကျနော်တို့တွေ
ကြိုတင်ပြင်ဆင်ထားဖို့က အလွန်အရေးကြီးပါတယ်။

(၁) အန္တရာယ်ပြမြေပုံကို ကြည့်ရှုစစ်ဆေးခြင်း
ငလျင်လှုပ်ခြင်း သို့မဟုတ် ရေလွှမ်းမိုးခြင်းကဲ့သို့သော သဘာဝဘေးအန္တရာယ်များ ဖြစ်ပေါ်လာသည့်အခါတွင် မည်သည့်နေရာတွေက အန္တရာယ်ပိုရှိနိုင်သည်ကို သိရှိရန် ကိုယ်နေထိုင်သည့် ဧရိယာ သို့မဟုတ် ကိုယ်သွားရောက်လည်ပတ်သည့် ဧရိယာအတွက် အန္တရာယ်ပြမြေပုံကို ကြည့်ရှုစစ်ဆေးထားဖို့ လိုပါတယ်။

(၂) အရေးပေါ်ပစ္စည်းများပြင်ဆင်ပါ
အရေးပေါ်အစားအစာ၊ သောက်ရေ၊ ဓာတ်မီး၊ ရေဒီယို၊ ရှေးဦးသူနာပြုပစ္စည်းကိရိယာများ စသည်တို့ကို ကြိုတင်ပြင်ဆင်ထားပါ။

(၃) အရေးပေါ်ထွက်ပြေးရန်လမ်းကြောင်းကို
စစ်ဆေးခြင်း
ကိုယ်နေထိုင်သည့် အဆောက်အအုံ သို့မဟုတ် တည်းခိုမည့်နေရာရဲ့ အရေးပေါ်ထွက်ပေါက်၊ ထွက်ပြေးရန်လမ်းကြောင်းကို ကြိုတင်ကြည့်ထားပြီး၊ ကိုယ့်မိသားစုနှင့် သူငယ်ချင်းများကို မျှဝေပေးပါ။

(၄) သဘာဝဘေးအန္တရာယ် ကြိုတင်ကာကွယ်ရေးလေ့ကျင့်ခန်းများတွင်ပါဝင်လေ့ကျင့်ခြင်း
ကိုယ်နေထိုင်ရာရပ်ကွက်၊　မြို့နယ်(ဒေသန္တရ)က　ဦးစီးပြုလုပ်ကျင်းပတဲ့　ဘေးအန္တရာယ်ကြိုတင်
ကာကွယ်ရေးလေ့ကျင့်မှုများတွင်ပါဝင် လုပ်ဆောင်
ပါ။ အမှန်တကယ် သဘာဝဘေးအန္တရာယ်ဖြစ်သည့်　အခါ ဘေးကင်းစွာရင်ဆိုင်နိုင်ဖို့ ဘာလုပ်ရမည်ကို　ကြိုတင်လေ့လာထားခြင်းက အသက်တမျှ အရေးကြီးသောကြောင့် သဘာဝဘေးအန္တရာယ်ကြိုတင်ကာကွယ်ရေးအဖွဲ့အစည်းနှင့်ပူးပေါင်းကာ ဒေသခံပြည်သူများနှင့်အတူ　သဘာဝဘေးအန္တရာယ်ကြိုတင်ကာကွယ်ရေးလုပ်ငန်းများတွင်　ပါဝင်ဆောင်ရွက်ခြင်းသည် အမှန်တကယ် ထိရောက်မှုရှိတဲ့　လုပ်ဆောင်ချက်ဖြစ်ပါတယ်။

(၅) အချက်အလက်များ စုဆောင်းခြင်း
အဆက်မပြတ် ပြောင်းလဲနေသော သဘာဝဘေးအန္တရာယ်ဆိုင်ရာ အချက်အလက်များကို ဂျပန်ဘာသာဖြင့် အစိုးရဌာနများအပါအဝင်　ပုဂ္ဂလိက သတင်းဌာနများမှ　ဂျပန်ဘာသာဖြင့်　ကြေငြာလေ့ရှိတာကြောင့်　အရေးကြီးသတင်းအချက်အလက်များကို မျက်ခြေမပြတ် စုဆောင်းရယူခြင်းကို　မဖြစ်မနေလုပ်ဆောင်ထားရမည့် ကိစ္စဖြစ်ပါတယ်။
တီဗီ၊ ရေဒီယို၊ အင်တာနက် စသည်ဖြင့် နောက်ဆုံးပေါ် သဘာဝဘေးအန္တရာယ်ဆိုင်ရာ အချက်အလက်များကို အဆက်သွယ်မပြတ်စေရန်　ပြုလုပ်ထားပါ။ ခိုင်မာစိတ်ချရသော　သဘာဝဘေးအန္တရာယ်ဆိုင်ရာ သတင်းရင်းမြစ်များဖြစ်သည့်　NHK World Channel သည် သဘာ၀ဘေးအန္တရာယ်တခုဖြစ်ပွားသည့်အခါ ဂျပန်သတင်းများကို အင်္ဂလိပ်ဘာသာဖြင့် ထုတ်လွှင့်ပေးပါတယ်။
ထို့အပြင် သက်ဆိုင်ရာ ဒေသန္တရ ဝဘ်ဆိုဒ်များ၊ ပြည်တွင်းဝဘ်ဆိုဒ်များမှ သဘာဝဘေးအန္တရာယ်များနှင့် ဘေးလွတ်ရာရွှေ့ပြောင်းရေး နေရာများအကြောင်းကို ဖြန့်‌ဝေပေးပါတယ်။ သဘာဝဘေးအန္တရာယ်များအကြောင်းကို လျင်မြန်စွာ ဖော်ပြပေးသည့်စမတ်ဖုန်းအက်ပ်(App)များလည်း ရှိပါတယ်။

(၆) အရေးပေါ်အခြေအနေဖြစ်ပေါ်လာပါက　တည်တည်ငြိမ်ငြိမ်နေပါ
အထိတ်တလန့်မဖြစ်ရန်၊ တည်ငြိမ်အောင်နေပြီး ကိုယ့်ရဲ့အန္တရာယ်ကင်းရေး၊　လုံခြုံရေးကို သေချာဂရုစိုက်ဖို့　လိုပါတယ်။ တရားဝင် သက်ဆိုင်ရာအဖဲွ့အစည်းများရဲ့ ညွှန်ကြားချက်များကို လိုက်နာပါ။
ဘေးလွတ်ရာ ရွှေ့ပြောင်းရန် အမိန့်ထုတ်ပြန်ပါက ဘေးကင်းသော နေရာသို့ အလျင်အမြန် ချက်ချင်း ရွှေ့ပြောင်းဖို့လိုပါတယ်။
တစ်ယောက်နဲ့တစ်ယောက် အပြန်အလှန်　ကြိုးစားကူညီပေးပြီး၊ ကိုယ့်ပတ်ဝန်းကျင်ရှိသူများနဲ့ အတူပူးပေါင်းကာ အခက်အခဲတွေကို ကျော်လွှားနိုင်ဖို့အတွက်　ပြင်ဆင်ပါ။

(၇) ကိုယ်ရေးကိုယ်တာအချက်အလက်များကို သတိပြု ကာကွယ်ရန်
SNS လို　လူမှုကွန်ရက်တွင် ကိုယ့်တည်နေရာအချက်အလက်ကို ထုတ်ဖော်ခြင်းမှ ရှောင်ကြဉ်ပါ။
သတင်းမှားများ ဖြန့်ဝေခြင်း၊ မခိုင်လုံသော သတင်း　သို့မဟုတ် ကောလာဟလများကို မဖြန့်ဝေမိစေရန်လည်း သတိထားပါ။

အာလုံး အဆင်ပြေ လွတ်မြောက်နိုင်ကြပါစေ:)

zin myo @ eric

2024/8/9(Fri)

03/08/2024

Thoughts and Reflections 1

27/07/2024

The Japan Life and Work Chronicles Part 3

zin myo @ eric

2024-7-28(Sun)

21/07/2024

တခါကသတင်းစာကျောင်းသားဘဝ(၃)

ကျနော်က ကိုယ့်ကိုယ်ကို သနားတတ်ပြီး၊ ညှာတာ တတ်တဲ့အထဲ ပါတယ်လို့ ပြောရမယ်။ ကြံဖန်အကောင်းဖက်ကနေ လှည့်တွေးမယ်ဆိုရင် ကိုယ့်ကိုယ်ကို သိပ်ဂရုစိုက်တာပေါ့လေ။ ဘဝမှာ ကိုယ့်ကိုယ်ကို အသနားဆုံးဖြစ်ခဲ့တဲ့ အချိန်ကို ပြောပါဆိုရင် တာဝန်တခုအနေနဲ့ နေ့စဥ်မနက်ညနေတွေမှာ ဘောလုံး ကန်ခဲ့တဲ့အချိန်နဲ့ ဂျပန်သတင်းစာ ပို့ခဲ့တဲ့ အချိန်တွေပါပဲ။

ဘာဖြစ်လို့လည်းဆိုတော့ မြန်မာပြည်မှာ တိုင်းနဲ့ပြည်နယ်၊ ကလပ်အသင်းတွေမှာ ဘောလုံးကန်ခဲ့စဥ်က နေပူကျဲတောက်အောက်မှာ ပြေးလွှားကစားရတာကြောင့် လဲပြိုကျမတက် ပင်ပန်းခဲ့ရသလို ဂျပန်မှာ သတင်းစာပို့ရတာ ဆိုတာက အများသူငှာ အိပ်မောကျချိန်ဖြစ်တဲ့ မနက် နှစ်နာရီ၊ သုံးနာရီကနေ ပြေးလွှားပြီး လိုက်ဝေရတာဖြစ်တာကြောင့် အစပိုင်းမှာဆိုရင် ခြေသလုံးကြွက်သားပါ တက်ချင်သလ်ို ဖြစ်ခဲ့ရပါတယ်။

တခါတခါ ဆောင်းတွင်းထဲ မိုးပါးလေးများကျတဲ့အချိန်ဆိုရင် ဆိုင်ကယ်စီးရင်း မျက်နှာကို အပ်နဲ့ အထိုးခံရသလို စပ်ဖျဥ်းဖျဥ်း ခံစားရတာမျိုးပါ။ မနက်သတင်းစာပို့ပြီးတဲ့နောက် ၉ နာရီ တက်ရတဲ့ ကျောင်းချိန်အမှီ ပြေး။ ပြန်ရောက်တဲ့အခါ နေလည်စာ အပြေလွှားစားပြီး ညနေသတင်းစာဝေဖို့အတွက် ပြင်ဆင်ရပါတယ်။

ည ၆ နာရီကျော်လောက်ထိ ဝေပြီးတဲ့အခါ ကျန်တာက ကိုယ်ပိုင်ချိန်ဖြစ်တာကြောင့် စာကြည့်ရင် ကြည့်။ မကြည့်ရင် ဖုန်းသုံးရင် သုံးကြပါတယ်။ ဒါပေမဲ့ နောက်တနေ့ မနက်၂ နာရီ မထိုးခင်လောက်ထနိုင်အောင် ၉ နာရီမှာ နောက်ဆုံးထားပြီး အိပ်ရပါတယ်။

ဒီလိုတွေ နေ့စဥ်နဲ့အမျှ ရုန်းကန်နေရပေမယ့်လည်း တလမှာ ပုံမှန် ပိတ်ရက် လေးရက်လောက်ရတာကြောင့် ရတဲ့ပိတ်ရက်ကတော့ ဖလန်းဖလန်းထတဲ့ ရက်တွေပါပဲ။ ဂျပန်ရောက်စမှာ အပေါင်းအသင်း အသိုင်းအဝိုင်း သိပ်မရှိပေမယ့် နောက်ပိုင်းတဖြည်းဖြည်း အတူရောက်လာတဲ့ သူငယ်ချင်းတွေမှ တဆင့်
သော်လည်းကောင်း Facebook မှ သော်လည်းကောင်း သက်ဆိုင်ရာ အသင်းအဖွဲ့တွေက ပြုလုပ်ကျင်းပကြတဲ့ ပွဲတွေ တက်ဖြစ်ပါတယ်။

အဲဒီအချိန်တုန်းက များသောအားဖြင့် ကျနော် အသွားများဆုံး ပွဲတွေဟာ MASBO ( Myanmar Active Student and Businesspeople Organization -Japan) က ဦးစီးဦးဆောင် လုပ်တဲ့ ပွဲတွေပါ။
တနှစ်ပတ်လုံးမှာ အနည်းဆုံး ခြောက်ပွဲလောက်ရှိတဲ့အထဲမှာ Speech Contest လို ဂျပန်လို ဟောပြောပြိုင်ပွဲမျိုးတွေ၊ လက်ရှိကောလိပ်တွေ တက္ကသိုလ်တွေမှာ တက်ရောက်နေကြသူတွေက ဂျပန်စာသင်တန်းကျောင်းတက်နေသူတွေကို ကျောင်းပြီးတဲ့အခါ ကောင်းမွန်မှန်ကန်သောရွေးချယ်မှုများ ပြုလုပ်နိုင်ဖို့အတွက် ဆွေးနွေးအကြံပေးတဲ့ပွဲ 進学相談会 လို ပွဲတွေဟာ အတက်နိုင်ဆုံး မဖြစ်မနေတက်ရောက်သင့်တဲ့ ပွဲတွေပါ။

နောက်ပြီး ဝါဆိုပွဲလို ကုသိုလ်လည်းရ သူငယ်ချင်း အပေါင်းအသင်းလည်း များလာနိုင်စေမယ့် ပွဲမျိုးလည်း ရှိတာကြောင့် လက်မလွှတ်တမ်း လာရောက်ဆင်နွှဲသင့်ပါတယ်။ ဆရာကြီးဂိုဏ်းချုပ် တယောက်ရဲ့ စကားအရဆိုရင် တချို့ တချို့တွေလည်း ဒီလိုပွဲတွေမှာ ဘုရားလည်းဖူး လိပ်ဥလည်း တူးသွားနိုင်ကြတာ မနည်းမနောရှိပါသတဲ့။ ကျနော်တို့လို FA ကျိမ်စာသင့်နေတဲ့သူတချို့က လွဲရင်ပေါ့လေ။

အခု MASBO အကြောင်းပြီးတော့၊ MYSA (Myanmar Youth and Student Association) ဆိုတဲ့အဖွဲ့နဲ့ ကျနော်ရဲ့ ပတ်သက်ပုံလေး ပြောပါရစေ။ ကျနော်တို့ ညီအစ်ကိုတွေက ဘောလုံးကစားတာ အတော်ဝါသနာပါကြပါတယ်။ အခွင့်အခါ ကြုံကြိုက်လာတဲ့အခါမှာ ဂျပန်မှာ ကျင်းပတဲ့ ဘောလုံးပြိုင်ပွဲဝင်ရောက်ဆင်နွှဲချင်တာကြောင့် MYSA အသင်းကိုယ်စားပြုအနေနဲ့ အရှေ့တောင်အာရှကျောင်းသားများ ဘောလုံးပြိုင်ပွဲကို မြန်မာကိုယ်စားပြုအနေနဲ့ ဝင်ရောက်ယှဥ်ပြိုင်ခဲ့ကြပါတယ်။ အဲ့ဒီ အားကစားပြိုင်ပွဲအပြင် Saitama University က ဦးစီးကျင်းပတဲ့ ဘောလုံးပြိုင်ပွဲကိုလည်း ဝင်ကန်ခဲ့ဖူးပါတယ်။

MYSA အသင်းအနေနဲ့လည်း တခြားစိတ်ဝင်စားဖွယ် ပျော်ရွှင်ဖွယ်ကောင်းတဲ့ ပွဲတွေလည်း မကြာခဏ ကျင်းပလေ့ရှိတာကြောင့် အချိန်ရလို့ အခွင့်အခါသင့်တဲ့အခါ သွားရောက်သင့်ပါတယ်။

ကျနော် ဖူဂျီတောင်ထိပ်အထိကို နှစ်ခေါက်တိတိရောက်ဖူးပါတယ်။ အဲဒီနေရာကို ကျနော် တယောက်တည်းဆို ဘယ်တော့မှ သွားဖြစ်မှာလည်း မဟုတ်သလို တောင်ထိပ်အထိလည်း တက်ဖြစ်မှာလည်း မဟုတ်ပါဘူး။ MTC ( Myanmar Tozan Club) လို့ခေါ်တဲ့ မြန်မာတောင်တက်အသင်းကြောင့်သာ တောင်ထိပ်အထိ ရောက်ဖြစ်ခဲ့တာပါ။

လူတယောက်ရဲ့ စိတ်ဓာတ်ကို သိချင်ရင် ခရီးအတူသွားကြည့်ပါဆိုရင် တောင်သာအတူတက်ကြည့် လိုက်ပါ။ စိတ်ဓာတ်တင်မက မသိချင်တာတွေပါ အကုန်သိလာရမှာ မလွဲပါဘူး။

လူဆိုတာမျိုးက လူမှုရေးသားကောင်လို့ ပြောကြပါတယ် မဟုတ်လား။ ကျနော် ရောက်စ တနှစ် နှစ်နှစ်အတွင်းမှာ ပိတ်ရက်ဆိုရင် တိုကျိုမှာ မြန်မာနိုင်ငံသားတွေ ကျင်းပကြတဲ့ ပွဲတွေ ရှိရင် သင်္ကြန်ပွဲကလွဲပြီး၊ ပွဲတိုင်းနီးနီးလောက် ရောက်ဖြစ်ခဲ့ပါတယ်။

မြန်မာနိုင်ငံရေး တက်ကြွသူတွေရဲ့ ပွဲတွေ အကုန် သွားဖြစ်ခဲ့ပါတယ်။ ဂျပန်ကျွန်းဆွေး ဂုရုကြီးတယောက်ကဆိုရင် ကျနော့်ကို နေရာ တကာမြင်ရဖန်များတာကြောင့်ထင်ပါတယ်၊ သူတို့ခေတ်တုန်းက ဒီလို အပေါင်းအသင်းများဖို့ အဖွဲ့အစည်းတွေမှာ ထဲထဲဝင်ဝင်မြင်ရဖို့ မလွယ်ကြောင်း ရေးထားတာကို မျက်နှာစာမျက်နှာမှာ သူအတွေ့အကြုံနဲ့ယှဥ်ပြီး ရေးထားတာကို ဖတ်ခဲ့ရပါတယ်။ တချို့တွေဆီက တဆင့်စကားအရဆိုရင် ဒီကောင် နိုင်ငံရေးတက်ကြွသူတွေနဲ့ ပေါင်းပြီး ဒုက္ခသည် ခံလိုက်ပြီးလားဆိုပြီးတောင် အထင်ခံခဲ့ရပါတယ်။

တခေါက် MASBO က ကျင်းပတဲ့ ဝါဆိုသင်္ကန်းကပ်ပွဲကနေအပြန် တကဒနိုဘာဘာဆိုတဲ့ မြန်မာတွေ အနေများတဲ့ရပ်ကွက်မှာ မဘသ ကို မထောက်ခံတဲ့ အကြောင်း လက်မှတ်သွားထိုးမိလို့ ကိုယ်ရွှေကိုယ်မျိုးတွေရဲ့ကျေးဇူးကြောင့် ရခိုင်စစ်စစ်ကနေ ရိုလိမ်ဂျာဘဝကို လက်မှတ်ထိုးနေတဲ့ဓာတ်ပုံတွေနဲ့တကွ အတိုက်ခိုက် ခံလာရတာကြောင့် ပါလေရာငပိချက်ဖြစ်နေတဲ့ ကိုယ့်အခြေနေကို သေချာသတိထား သုံးသပ်ဖို့ ဖြစ်လာခဲ့ပါတယ်။

အဲဒီအချိန်ကတည်းက စလို့ နောက်ပိုင်း ကိုယ်နဲ့ ရေရှည်အဆင်ပြေမယ်ထင်တဲ့ အပေါင်းအသင်း အဖွဲ့အစည်းတွေနဲ့ပဲ သွားလာဆက်ဆံခဲ့ပါတော့တယ်။
တခါတလေမှာ ကိုယ်ဘက်က ဘာအကျိုးအမြတ်တစိတလေမှ မမျှော်လင့်ဘဲ အလုပ်လုပ်ပေးခဲ့ရသည့် တိုင်အောင် တဖက်က သူ့ကိုယ်ကျိုးစီးပွားအတွက် ဘယ်သူ့မျက်နှာကိုမှ မထောက်ထားဘဲ ကိုယ့်ကိုထိုးကျွေးလိုက်တာကိုလည်း ခံခဲ့ရဖူးတာကြောင့် အခုနောက်ပိုင်းမှာတော့ ကိုယ်တကယ် နောက်ကျောလုံတဲ့သူတွေနဲ့ပဲ ပေါင်းသင်းပါတယ်။

မိတ်ဆွေတထောင်ရှိပေမယ့် ရန်သူတယောက်ရှိတာ မကောင်းဘူးထင်တာကြောင့် ဘယ်သူ့ကိုမှ မထိခိုက်စေတဲ့ (Do no harm) မူနဲ့ ပဲ နေပါတယ်။ ဘဝမှာ ခက်ခဲတဲ့အချိန်တွေကို အတူတူဖြတ်သန်းဖူးထားရင်လူတွေရဲ့သံယောဇဥ်က ပိုမ်ိုခိုင်မာလာတတ်တယ် မဟုတ်လား။

ခုချိန်ထိတော့ ဒါမျိုးဖြတ်သန်းဖူးတာတွေဟာ ကိုယ်နဲ့ ကိုယ်စိတ်ပဲ ရှိသေးတာကြောင့် ကိုယ့်ရဲ့ကိုယ် ကိုယ့်ရဲ့စိတ်ကိုပဲ အကြောတည့်အောင် အကျင့်ကောင်းအောင် ကြိုစားနေဆဲပါ။

ဒီနေ့ကတော့ ဒီလောက်ပါပဲ။
အားလုံးအဆင်ပြေ လွတ်မြောက်နိုင်ကြပါစေ:)

zin myo @ eric
2024/7/21(Sun)

19/07/2024

The Japan Life and Work Chronicles Part 2
zin myo @ eric 2024-7-19(Fri)

15/07/2024

The Japan Life and Work Chronicles Part 1

zin myo @ eric

2024-7-15(Mon)

14/07/2024

တခါကသတင်းစာကျောင်းသားဘဝ(၂)

ကျနော်တို့ မြန်မာတွေဟာ အင်မတန်မျိုးချစ်စိတ်
ပြင်းထန်ကြတဲ့ သူတွေပါ။ အထူးသဖြင့် ကျနော်တို့လို ယောကျာ်းလေးတွေပေါ့ဗျာ။

၁၉၄၀ကျော်လောက်တုန်းက ကျနော်တို့နိုင်ငံကို ဂျပန်က အနိုင်ကျင့်အုပ်ချုပ်ခဲ့ဖူးတော့ ဂျပန်ကိုသွားမယ့် သူတွေထဲမှ တချို့ဟာ တကယ့်ကို သီဟတင်စိုးတို့ နေထူးနိုင်တို့လို ပြင်းပြင်းထန်ထန် တော်လှန်ချင်
စိတ်ရှိနေကြတာပါဘဲ။

သူတို့ ပြောနေကြ လက်သုံးစကားတခုရှိတယ်။ ငါတို့ ဟိုရောက်ရင် လက်စားချေကိုချေရမယ်ဆိုတာချည်းပါပဲ။ ဘာကိုလက်စားချေချင်တာလည်းဆိုတာကိုတော့ ဖတ်ရင်းနဲ့ သိလာပါလိမ့်မယ်။

ကျနော်တို့ ဂျပန်ကိုသွားတာ သတင်းစာပို့ရင်း ကျောင်းတတ်ဖို့ဆိုတော့ အလုပ်က တွဲပါပြီးသား။ ဟိုရောက်ရင် သတင်းစာပို့တဲ့အလုပ်မှာ အဆင်ပြေရင် ကျန်တာအိုကေလေ။ ကိုယ့်ဘက်က လုံလောက်တဲ့ ကြိုးစားအားထုတ်မှုပဲ လိုတာမဟုတ်လား။

သတင်းစာတိုက်တွေဟာ ရပ်ကွက်တိုင်း လိုလိုမှာ ရှိပါတယ်။ လူဦးရေ ထူထပ်တဲ့ နေရာတွေမှာဆိုရင် နှစ်တိုက် သုံးတိုက်ရှိပါတယ်။ ဒါပေမဲ့သတင်းစာတိုက်နာမည်တွေကတော့ မတူပါဘူး။ သက်ဆိုင်ရာ သတင်းစာတိုက်တွေက ထုတ်တဲ့သတင်းစာကို အဓိကဖြန့်ဝေပြီး၊ ဝယ်ယူဖတ်ရှုသူရဲ့ အမှာစာပေါ်မူတည်ပြီး အခြားတိုက်ထုတ်တွေကိုပါ လိုက်ပို့ဖြန့်ဝေလေ့ရှိပါတယ်။

ကျနော်တို့ သတင်းစာကျောင်းသားတွေဟာ တခြားအပြင်မှာ အချိန်ပိုင်းလုပ်တဲ့ ကျောင်းသားတွေနှင့်ယှဥ်ရင် မနက်စောစောထရတဲ့အတွက် အိပ်ရေးပျက်တာကလွဲရင် ကျန်တာတွေက အတော်အဆင်ပြေကြပါတယ်။ ဆိုလိုတာက ကျောင်းလခကို သတင်းစာတိုက်က အပြီး သွင်းပေးထားသလို လစဥ် လုပ်ခလစာအနေနဲ့လည်း ယန်း ၁၀ သောင်းဝန်းကျင်လောက်ရပါတယ်။ အဲဒီမှာ ကိုယ်က မသောက်မစားဘဲ လိမ်မာတဲ့သူဆို အဲဒီခေတ်ငွေဈေးနဲ့ တလကို ၅ သိန်းကနေ ၈ သိန်းကြားလောက် အိမ်ကိုငွေပြန်ပို့နိုင်ပါတယ်။

အပြင်ကျောင်းသားတွေလို တပတ် အလုပ်ချိန် ၂၈ နာရီကျော်မှာကိုလည်း စိုးရိမ်ဖို့ မလိုပါဘူး။ ဒီအပြင် တလကို ပုံမှန်ပိတ်ရက် ၄ ရက်ခန့်လည်း ရပါတယ်။ ဂျပန်စာကျောင်းပြီးလို့ ဆန်းမွန်းလို့ခေါ်တဲ့ အသက်မွေးဝမ်းကျောင်း တက်ချင်ရင် သို့မဟုတ် တက္ကသိုလ်ကောင်းကောင်း ဝင်ချင်ရင်တော့ ကိုယ့်ဘက်က ပုံမှန်ထက်ပိုတဲ့ကြိုးစားအားထုတ်မှုနဲ့ ဇွဲရှိဖို့တော့ လိုပါတယ်။

ဒီသတင်းစာကျောင်းသားတွေဟာ အလုပ်နဲ့ကျောင်း အချိန်စီမံခန့်ခွဲမှု၊ အလုပ်ချိန် ပင်ပန်းမှု အခက်အခဲတွေ တချို့ရှိကောင်းရှိပါတယ်။ ဒါပေမဲ့ ကျောင်းလခ ပေးဖို့၊ ဗီဇာသက်တမ်းသွားတိုးရင် ရမှရပါ့မလားဆိုတဲ့ အာရုံနောက်စရာတွေ မရှိတာကြောင့် လစာထုတ်ပြီးလို့ နောက်တနေ့မနက် အလုပ်ပိတ်ကြပြီဆိုရင် တကဒနိုဘဘ ခေါ်တဲ့ မြန်မာတွေအနေများတဲ့ ရပ်ကွက်မှာ စုကြလေ့ရှိပါတယ်။

ဒီလိုစုမိကြတဲ့ သူတွေထဲမှာ အစပိုင်းမှာ ပြောခဲ့တဲ့ သီဟတင်စိုးသားတွေ နေထူးနိုင်လက်သစ်တွေ ပါလာပါတယ်။ သူတို့က ပုံမှန်ချိန်ဆို လေနဲ့ပဲ တော်လှန်ရေးလုပ်လေ့ရှိပေမယ့် အရည်လေးနည်းနည်းဝင်လာပြီဆိုရင် ကိုယ်ထိလက်ရောက် လက်စားချေကို ချေရမယ်ဆိုတဲ့ ဇာတိသွေးတွေ ပြလာကြပါတယ်။

အဲဒီတော်လှန်ရေးဆရာကြီးများရဲ့ ကောင်းမှုကြောင့် ကျနော်တို့တတွေ ရွှေမြန်မာတွေနေတဲ့ ဘာဘာ ကနေ တိုကျိုမြို့ရဲ့ ခဘုခိချောလို့ခေါ်တဲ့ ညငှက် လေးများပျော်ပါးရာ အနက်ရောင်နယ်မြေကို ချီတက်ခဲ့ကြပါတယ်။

လစာလေးလည်းထုတ်ထားကြတာ မကြာသေးဘူးဆိုတော့ ဟိုရောက်ရင် ကလပ်သွားမယ်၊ မာဆတ်ဝင်မယ်၊ ဂျပန်မကိုပဲ အုပ်မယ်ဆိုတဲ့ကောင်တွေက များပါတယ်။ လူကလည်းစုစုပေါင်း ခုနှစ်ယောက် ရှစ်ယောက်လောက်ရှိတာမို့ လူအုပ်စုအရှိန်ကြောင့် အဲဒီလိုနေရာက်ို မကြောက်မရွံ့လက်တည့်သွားစမ်းချင်ကြတာလည်း ပါပါတယ်။

များသောအားဖြင့် ကျနော်တို့လို ဂျပန်ကို ရောက်ခါစ နှစ်လ သုံးလလောက်ပဲရှိသေးတဲ့သူတွေဟာ ဂျပန်စကားကို လည်လည်ဝယ်ဝယ် မပြောနိုင်သလို လုံးစေ့ပတ်စေ့လည်း နားမလည်ကြပါဘူး။ အဲဒီအခါကြတော့ အဖွဲ့ထဲက ဂျပန်ရောက်ဖူးပြီး အတွေ့အကြုံရှိတဲ့သူကိုပဲ ခေါင်းတည်ရပါတယ်။တကယ်တမ်း အကုန်လုံးပေါင်းရင်တောင် အဲဒီချိန်မှာ ဂျပန်စာ N3 level မရှိပါဘူး။

တကယ့်ကို မျက်ကန်း တစ္ဆေမကြောက်ဆိုသလိုပေါ့။ ဟိုရောက်တော့ တောသားမြို့ရောက်ဆိုသလ်ို မျက်လုံးတွေက ကျီးကန်းတောင်းမှောက်ပဲ။ တကောင်မှ ရုပ်လည်းမပေါက်သလို အိန္ဒြေလည်းမရကြဘူး။ ပြောမယ့်သာ ပြောရတာ အဲဒီထဲမှာ ကိုယ်လည်းတယောက် အပါအဝင်။

အဲဒီမှာ ဟိုလျှောက်ကြည့် ဒီပတ်ကြည့်နဲ့ တချို့လည်း ကလပ်လိုလို ဘာလိုလိုနေရာမှာဝင်နေခဲ့တယ်။ ကျန်နေတဲ့အထဲမှာ ကျနော်အပါဝင် အဖွဲ့ကို ဦးဆောင်နေတဲ့ အညာရိန်း(မူးလာရင် သူ့ကိုယ်သူ ကိုရီးယားရိန်းနဲ့ ချွတ်စွတ်တူတယ်ချည်း ပြောတာနဲ့ပဲ အညာသားရိန်းလို့ ခေါ်ကြတာကနေ အညာရိန်းဖြစ်လာပါတယ်) နဲ့ လက်မရွံ့ဂျပန်တော်လှန်ရေး သမားနှစ်ယောက် ပါနေပါတယ်။

အဲဒါနဲ့ ကျနော်တို့လျှောက်လာတဲ့ လမ်းမကြီးတွေကနေ လမ်းကြိုလမ်းကြားတွေကိုပတ်ကြည့်တဲ့အခါ တိုက်ပုလေးရှေ့က အလင်းရောင်ခပ်မှိန်မှိန်အောက်မှာ ဂငယ်မ သုံးယောက်လောက်ထိုင်နေပြီး၊ အဲဒီအနီးနားမှာပဲ တက်တူးလက်နှစ်ဖက် အပြည့်နဲ့ ဂျပန်လိုလို တရုတ်လိုလိုကောင်တကောင်က မတ်တပ်ရပ်နေပါတယ်။

အချိန်လည်း လင့်နေပြီမို့ ပါလာတဲ့တော်လှန်ရေးသမားတွေလည်း လက်စားချေလိုစိတ် အတော်ပြင်းပြနေတယ် ထင်ပါတယ်။ ဦးဆောင်သူ အညာရိန်းကို မရမက အတင်းသွားပြောခိုင်းပါတယ်။ အဲဒီမှာ စျေးစကားပြောကြတော့ တနာရီကို ယန်းတစ်သောင်းခွဲဆိုတော့ ပါလာတဲ့ ငတိတွေက လက်စားသာ ချေချင်တာ ဒင်းတို့က တသောင်းခွဲများတယ် ဘာညာဖြစ်တာကြောင့် နောက်ဆုံးလေးဆယ့်ငါးမိနစ်ကို ယန်းတစ်သောင်းနဲ့တည့်သွားကြတယ်။

အဲဒါနဲ့ သူတို့ မျက်စိကျတဲ့ ဂငယ်မကိုယ်စီကို ခေါ်ပြီး အနီးနားက တည်းခိုခန်းကို ထွက်သွားကြတော့ ကျနော်နဲ့ ခေါင်းဆောင်ကြီးအညာသားရိန်းတို့က ကော်ဖီဘူးလေး ကိုယ်စီကိုင်ပြီး မလှမ်းမကမ်းနားကနေ ရပ်စောင့်နေခဲ့ကြပါတယ်။ ကျနော်တို့ ကော်ဖီတစ်ဘူးမှ မကုန်သေးဘူး စောစောက မျောက်အုန်းသီးရသလ်ိုမျက်နှာနဲ့ သွားကြတဲ့နှစ်ကောင် သံပရာသီးစားပြီး ဖြစ်နေတဲ့မျောက်မျက်နှာနဲ့ ပြန်လာနေကြတာကိုတွေ့တယ်။

အနားလည်းရောက်တော့ တော်လှန်ရေအောင်မြင်လား အလုပ်ဖြစ်ခဲ့လားပေါ့။ အလုပ်ဖြစ်ဖို့နေနေသာ ပါလာတာ ချွတ်မပေးခဲ့ရတာ ကံကောင်းတဲ့။ ဘယ်လိုဖြစ်လို့လည်း ရှင်းပြပါဦးလို့ မေးတော့။ ကျနော်တို့ ခေါ်တဲ့ ဂငယ်မတွေက တည်းခိုခန်းကို ဦးဆောင်ခေါ်သွားတယ်ဗျာ။ ဟိုရောက်တော့ ကောင်တာမှာ ဟဲရဒိုင်းတဲ့။ ကျနော်တို့လည်း နားမလည်လို့ထပ်မေးတယ်။ ဟဲရနော့အိုခနဲ ဆ်ိုတော့ ဟ... ကိုယ်ကျိုးနည်းပြီပေါ့။ ဟဲရ ဆိုတာ အခန်း အိုခနဲဆိုတာ ငွေဆိုတော့ ငါတို့တော့ ငွေထပ်ပေးရတော့မယ်ပေါ့လေ။

အဲဒါနဲ့ အိခုရဒက်စ်က လို့ မြန်မာလို ဘယ်လောက်ကျလဲလို့မေးလိုက်တဲ့အခါ ဟိတိုရိ အိချိမန်းဂေါ်ဆန်း မြန်မာလို တယောက် ယန်းတစ်သောင်းခွဲကျတယ်ဆ်ိုတော့ ငါတို့ ဂျင်းမိပြီဆိုပြီး တယောက်မျက်နှာတယောက်ကြည့်ရင်း ငိုရမလို ရယ်ရမလိုဖြစ်နေချိန်မှာ ဘေးမှာ ပါလာတဲ့ ဂငယ်မတွေက ပိုက်ဆံမပါရင် ချက်ချင်းဂျောင်းတော့ဆိုတဲ့ အချိုးနဲ့ ကြည့်နေကြပါတယ်။ အဲဒါလိုအခြေအနေကြောင့်ပဲ ကျနော်တို့ရဲ့တော်လှန်ရေးသမားကြီးတွေဟာ လက်စားချေဖို့သွားတာကို အားမတန် မာန်လျှော့ပြီး ခုလိုပြန်လာခဲ့ရတာလို့ ရှင်းပြတယ်။

ဇာတ်လမ်းက ဒီမှာတင်ပြီးပြီလားဆိုတော့ မဟုတ်သေးဘူး။ ကျနော်တို့ ခေါင်းဆောင်ကြီး အညာချမ်းက သူ့လူတွေကို ဒီလို ဂျင်းအတောင့်လိုက်ထည့် လိုက်ရကောင်းပါ့မလားဆိုပြီး၊ ဟို တာတူးနဲ့ ဂျပန်တရုတ်ကောင်ဆီ သွားပြီး သွားချဲပါလေရော။ ဂျင်းအထည့်ခံရတဲ့ကောင်တွေလည်း ပိုက်ဆံပြန်ရလိုရငြား အနောက်ကနေ ကုတ်ချောင်းကုတ်ချောင်းနဲ့ ပါလာပါတယ်။

နောက်ပြီး အကယ်၍ ကျနော်တို့ပိုက်ဆံပြန်ရခဲ့ရင် ဂျပန်ကေတီဗီမှာ ဧည့်ခံပါမယ် ဘီယာအဝတိုက်ပါမယ် ဘာမယ်တွေလျှောက်ပြောနေသေးတယ်။ အနားရောက်တော့ အညာရိန်းက သူ့ရဲ့ဂျပန်စာအန်သရီး မီးကျီုးမောင်းပျက်ဖြင့် ပိုက်ဆံကို ပြန်တောင်းပေးရှာပါတယ်။ ဟိုက မင်းတို့ သဘောတူကျေနပ်လို့ ပေးထားတဲ့ငွေကို ငါက ဘာလို့ ပြန်ပေးရမှာလည်းလို့ ပြန်ပြောတယ်။ အဲဒါနဲ့ အညာရိမ်းကလည်း ခေသူမှမဟုတ်တာငါတို့က ကျောင်းသားတွေ မကျေနပ်ဘူး ရဲတိုင်မယ် ဘာညာဖြဲပါလေရော။

ဟိုငတိက အများကြီးပြန်မပြောဘူး။ လိုရင်းကို မင်းတို့ကျောင်းသားဆိုရင် ဘာလို့ဒီလိုနေရာကို လာတာလဲတဲ့။ နောက်ပြီး ငါ မင်းတို့ကို နောက်တခါတွေ့ရင် ဓါးနဲ့ ခုတ်မယ်လို့ဟောက်လိုက်တာနဲ့ စုမိမ့ဆန်(ဂျပန်လိုတောင်းပန်ခြင်း)တွေ အပ်ကြောင်းထပ်အောင်ပြောပြီး အမြန်လစ်ထွက်လာခဲ့ရတယ်။

နောက်တနေ့ ကြတော့ ဆရာကြီးအညာရိန်းတယောက် သူ့တဘော်ကျဲ့နှစ်ယောက်ကောင်းမှုကြောင့် တလလောက် အဲဒီဘက်ကို မလှည့်ရဲတော့ဘူး။ ခုချိန် ပြန်ပြောပြရင်သာ ပေါ့ပေါ့ပါးပါး ဖြစ်နေတာ ဆိုပေမဲ့ တကယ် ကြုံတွေ့ ခဲ့ရချိန်တုန်းက ပြဿနာဖြစ်ပြီး ပြန်ပို့ခံရမလား၊ သတင်းစာတိုက်ကိုပဲ အတိုင်ခံရမလား အမျိုးမျိုးတွေးပြီး အတော်စိတ်ဆင်းရဲခဲ့ရဖူးတယ်။

ဂျင်း အထည့် ခံခဲ့ရတဲ့ကာယကံရှင်တွေဆ်ိုရင်တော့ ပြောမနေနဲ့တော့။ သူတို့က မွေးပါလည်းဆုံး သားလည်းဆုံးကိုး။ ဒီလိုနဲ့ အားလုံး တလလောက်ကို တော်တော်နဲ့ ပြန်မဆုံဖြစ်ကြဘူး။ ဒါပေမဲ့လည်း အများစုက ခွေးမြီးကောက် ကျည်တောက်စွပ်တွေ ဖြစ်တာကြောင့် ဖြစ်ပြီးခဲ့တာတွေ မေ့မေ့ပျောက်ပျောက်ဖြစ်သွားတဲ့နောက် ပုံမှန်တိုင်း ပြန်ပြီးသောက်စား ပျော်ပါးနေကြပါတယ်။ တခုပဲရှိတယ်။ စောစောက ဂျင်းကို ရှယ်အထည့်ခံရနိုင်တဲ့ ခဘုခိချောလို နေရာမျိုးကိုတော့ မူးပြီးယောင်လို့တောင် ဘယ်သူမှ မျက်စိမလှည့်ကြတော့တာပါပဲ။ လက်စားချေမယ့်ဆိုတဲ့ တော်လှန်ရေးသမားကြီးတွေရဲ့ ကြွေးကြော်သံတွေလည်း အဲဒီအချိန်ကတည်းက တဆက်တည်း ဆိတ်သုန်းပျောက်ကွယ်သွားပါတော့တယ်။

ဒီနေ့ကတော့ ဒီလောက်ပါပဲ။
အားလုံးအဆင်ပြေ လွတ်မြောက်နိုင်ကြပါစေ:)

zin myo @ eric
2024/7/14(Sun)

05/07/2024

JLPT ဂျပန်စာစာမေးပွဲအတွက်
ပြင်ဆင်သင့်သောအရာများ

စာမေးပွဲမေးခွန်းဟောင်းများကို ဖြေဆိုကြည့်ခြင်း

ယခင်စာမေးပွဲမေးခွန်းများကို ဖြေကြည့်ခြင်းဖြင့် စာမေးပွဲပုံစံနှင့် မေးခွန်းများ၏ အခက်အခဲအဆင့်ကို နားလည်ရုံတင်မက၊ အထူးသဖြင့် စာမေးပွဲတိုင်းတွင် မေးခွန်းဟောင်းများသည် ပြန်ပါလေ့ရှိသည်။ ထို့အပြင် မေးခွန်းဟောင်းများကို လေ့ကျင့်ထားခြင်းအားဖြင့် အချိန်ခွဲဝေမှုနှင့် ခက်ခဲသောမေးခွန်းများကို အကျွမ်းတဝင်ရှိစေပါသည်။ ဒီအချက်တွေကို မှတ်သားထားပြီး ထိထိရောက်ရောက် ပြင်ဆင်ပါ။

သဒ္ဒါနှင့် ဝေါဟာရကို ပြန်လည်မှတ်မိအောင်လုပ်ခြင်း

JLPT ၏သော့ချက်မှာ သဒ္ဒါနှင့် စကားလုံးများကို နားလည်ခြင်းဖြစ်တာကြောင့် သဒ္ဒါနှင့် ဝေါဟာရများကို မှတ်မိနားလည်ခြင်းသည် JLPT စာမေးပွဲတွင် အလွန်အရေးကြီးပါသည်။ အခြေခံကျသော သဒ္ဒါများ၊ ဘုံအသုံးအနှုန်းများနှင့်သက်ဆိုင်ရာ အဆင့်အလိုက် ဝေါဟာရများကို မှတ်မိထားပါက သေချာပေါက်အမှတ်များ ပြေးမလွတ်ပေ။

နားထောင်ခြင်းအလေ့အကျင့်

စာမေးပွဲတွင် နားထောင်မှုကို စစ်ဆေးသည့်အပိုင်းလည်း ပါဝင်သောကြောင့် နေ့စဉ်စကားဝိုင်းများနှင့် နားထောင်ခြင်းမေးခွန်းများကို အသုံးပြု၍ လေ့ကျင့်ခြင်းသည်လည်း မဖြေခင်အချိန်အထိ လုပ်သင့်သောအရာဖြစ်သည်။

ဖတ်ရှုနားလည်နိုင်စွမ်းကို ထက်မြက်အောင်လုပ်ခြင်း

နီးကပ်လာသော စာမေးပွဲဖြေဆိုချိန်ကာလတွင် လုပ်ရမည့်အရာ မဟုတ်သော်လည်း၊ အားလပ်သောအချိန်များတွင် ဂျပန်စာဆောင်းပါးများနှင့် ဝတ္ထုတိုများဖတ်ခြင်းသည်လည်း ကောင်းမွန်သော အလေ့အကျင့်ကောင်း တခုဖြစ်သည်။ နားလည်နိုင်စွမ်းကို တိုးတက်စေရန် ဆောင်းပါးများနှင့် ပုံပြင်၊ ဝတ္ထု၊ ဇာတ်လမ်းတိုများကို ဖတ်ပါ။ စာသားပါ အကြောင်းအရာနှင့် အသေးစိတ်အချက်အလက်များကို နားလည်သဘောပေါက်အောင် ကြိုစားပါ။ စာမေးပွဲ၌ စာပိုဒ်ကို ဖတ်ရသော အပိုင်းတွင် အကြောင်းအရာနှင့် အဓိကဆိုလိုရင်း အချက်အလက်များကို ဆုပ်ကိုင်နိုင်စွမ်းရှိရန် အလွန်အရေးကြီးသည်။

အာရုံစူးစိုက်ထားပါ

စာမေးပွဲဖြေဆိုမည့်ရက်အထိ နေ့စဉ်နေ့တိုင်း ပုံမှန်လေ့လာသွားနိုင်ဖို့ အရေးကြီးသည်။ အာရုံစူးစိုက်မှု လျော့မသွားစေဖို့အတွက် တကယ့် စာမေးပွဲဖြေဆိုနေရသကဲ့သို့ လေ့ကျင့်ပါ။ ပွဲမဝင်ခင် အပြင်မှကျင့် ဆိုသလို ကိုယ်ဘာသာ အိမ်တွင် အစမ်းစာမေးပွဲများကိုဖြေဆိုလေ့ကျင့်ထားခြင်းအားဖြင့် အမှန်တကယ်စာမေးပွဲနှင့် ပိုမိုရင်းနှီးမှုကို ရရှိနိုင်ပါသည်။

တနေ့တာ အစီအစဉ်

စီစဉ်ရေးဆွဲထားသော တနေ့တာအတွက် ပလန်များအတိုင်း လေ့လာရန် ကျန်ရှိနေသည့်အချိန်ကို အသုံးပြုပါ။ အချိန်ကို အပိုင်းများခွဲ၍ အကြောင်းအရာတခုချင်းစီကို အာရုံစိုက်ခြင်းသည် ပိုမိုထိရောက်မှုရှိသည်။ လုံလောက်သော အနားယူမှုနှင့် အလွန်အကျွံမဟုတ်ဘဲ စနစ်ကျသော လေ့လာမှုသည် စာမေးပွဲမစမီ အာရုံစူးစိုက်ထားနိုင်မှုကို ထိန်းသိမ်းရန် အားပေးသည်။ ဒီလိုပြင်ဆင်မှုတွေကြောင့် JLPT ဂျပန်စာ စာမေးပွဲကို ယုံကြည်မှုအပြည့်နဲ့ ရင်ဆိုင်နိုင်မည်ဟု ယုံကြည်ပါသည်။

အားလုံး အဆင်ပြေ လွတ်မြောက်နိုင်ကြပါစေ။
zin myo @ eric

2024/7/5(Fri)

30/06/2024

တခါကသတင်းစာကျောင်းသားဘဝ(၁)

ကျနော်ဂျပန်ကိုစရောက်တော့ တက်ခဲ့ရတဲ့ကျောင်းနာမည်က အဲရိတိုလို့ခေါ်တယ်။ အင်္ဂလိပ်လိုဆိုရင်တော့ Elite Japanese Language School ပေါ့။
အိလိုက်ကို မြန်မာလိုဘာသာပြန်ကြားဖူးတာ ရေပေါ်ဆီတဲ့။ တကယ်ရေပေါ်ဆီတွေ တက်တဲ့ ကျောင်း ဟုတ် မဟုတ်တော့ မသိဘူး။ ကျောင်းရဲ့ တည်နေရာကတော့ တကယ့် အချက်အချာနေရာဗျ။

ကျောင်းကို မျက်နှာမူပြီး ဘယ်ညာလမ်းအတိုင်း ခွဲလိုက်ရင် လမ်းရဲ့ ညာဘက်ပိုင်းက ခဘုခိချောလို့ ခေါ်တဲ့နေရာကို ရောက်တယ်။ တိုကျိုမြို့မှာ ညလုံးပေါက်ကဲနိုင်ပြီး မကောင်းတာ ဘာမဆိုအကုန်လုပ်လို့ရတဲ့ နေရာ။ နောက်ပိုင်း အကြောင်းသင့်လို့ရှိရင် အဲဒီကိုသွားပြီးဂျပန်မ အုပ်ဖူးချင်လို့ သွားတဲ့ကောင်တွေကို ဂျပန်ထီးကပြန်ဘုလိုက်တဲ့အကြောင်း သက်သက်ရေးဦးမယ်။

ဘယ်ဘက်လမ်းကနေ တည့်တည့်ထွက်လိုက်ရင် လမ်းဆုံးရဲ့ ဘယ်ဘက်ခြမ်းမှာတင် ရှင်းအိုခုဘို လို့ခေါ်တဲ့ ဘူတာရှိတယ်။ အဲဒီဘူတာတဝိုက်ကနေစပြီး အဲဒီနေရာကို ကိုရီးယားတောင်းလို့လည်း လူသိများကြတယ်။ ကိုရီးယားအစားအစာ၊ အဝတ်အစား အသုံးအဆောင် စတဲ့ ဘာမှမဆိုရတယ်။ နောက်ဆုံး ကိုရီးယားမှာ နာမည်ကြီးဘွိုင်းဘန့်တွေ ဖြစ်လာမယ့် တက်သစ်စချာတိတ်လေးတွေကိုလည်း ဘူတာနားက ဆေးလိပ်သောက်ဖို့ ထားထားတဲ့ နားနေနေရာမှာ တွေ့နိုင်သေးတယ်။

တခါ ကျောင်းအခန်းတူ တရုတ်မတယောက်ဆီက ပြန်ကြားခဲ့ဖူးတာ အခုချိန်ထိ နာမည်ကြီးပြီး၊ လူကြိုက်များနေဆဲဖြစ်တဲ့ ကိုရီးယားဘင့်ဘန့်ဆိုတဲ့အဖွဲ့တောင် ဒီနေရာကို အခုလက်ရှိအဖွဲ့လိုက် မတ်တပ်ရပ်ပြီး လက်ပြ၊ ပြုံးပြ၊ ကပြ၊ ဆိုပြနေကြတဲ့သူတွေလို
လာလုပ်ဖူးတယ်လို့ပြောတယ်။ ဟုတ်ချင်လည်း ဟုတ်မှာပေါ့လေ။ သူများနိုင်ငံမှာ လမ်းဘေး ဒီလို လုပ်တာ ရှက်စရာမှမဟုတ်တာ။

နောက်ပြီး အဲဒီ မိန်းမချော ချောကြတဲ့ ကောင်လေးတွေက အမြဲတမ်းတနေရာထဲမှာပဲ ရပ်နေကြပုံ မရပါဘူး။ ဘာဖြစ်လို့လည်းဆိုတော့ ကျနော်ကျောင်းဆင်းတိုင်း တခါမဟုတ် တခါတွေ့ရတာက သူတို့ အနောက်မှာ တန်းစီလိုက်နေကြတဲ့ မိန်းကလေးတွေနှင့် ဖလမ်းဖလမ်းထ တလမ်းဝင် တလမ်းထွက် လုပ်နေကြတာပါပဲ။

တခါတလေ အချိန်ရလို့ အဲဒီလိုမျိုးမြင်မိရင် တအံ့တသြရပ်ကြည့်နေမိတယ်။ ဟိုကောင်တွေကိုတော့ မဟုတ်ပါဘူး။ အနောက်ကနေ လင်မုဆိုးသားကောင်ရလာလို့ ပီတိဖြစ်နေတဲ့ ငတိမ ငယ်ငယ်ချောချောလေးတွေကိုပါ။ သူတို့တွေ အများစုက ရှိလှ ၁၇၊ ၁၈ လေးတွေဆိုတော့ သစ်ရွက်မြင် ရယ်ချင် လေတိုက်ရင် ပြုံးချင်ကြတဲ့ အရွယ်လေးတွေမဟုတ်လား။

တခါများ ဟိုမိန်းမချော ချောတဲ့ကောင်တွေက သူတို့ရဲ့ စန်ပယ်(Sample)စီဒီလေးတွေရောင်းတဲ့အခါ ဆယ်လ်ဖီဓာတ်ပုံ အတူတွဲရိုက်လို့ရတယ်ထင်ပါရဲ့။ ငတိမလေး တွေဖြစ်နေပုံက အခွေလည်းဝယ်ပြီးပြီ၊ ဓာတ်ပုံလည်း ရိုက်ပြီးတာတောင် အဲဒီနားတဝိုက်မှာ ထောင်ကျပြီးကွဲသွားတဲ့ယောကျာ်းကို မခွဲနိုင်မခွာနိုင်ဖြစ်နေကြတာ မြင်လို့တောင် မကောင်းဘူး။

ဒီလိုတွေပြောလို့ ဒီစာရေးနေတဲ့ ဘဲကြီး အငုံ့စိတ် သိပ်များတယ် မနာလို တိုရှည်ဖြစ်တယ်ဆိုပြီး အမျိုးသမီးထုရဲ့ မေတ္တာပို့ခြင်း ခံရနိုင်ပေမယ့် မတတ်နိုင်ဘူးလေ။

ကိုယ်ထင်တာ မြင်တာ ပြောတာပဲ။ ယောကျာ်းလေးတွေသာ အဲဒီလိုလုပ်ကြည့်ပါလား။ အဘထတွေ၊ နှာဘူးတွေ၊ ရှူဘူးတွေ၊ အရှက်မရှိ သရက်စိတွေဖြစ်ကုန်မှာလေ။

မယုံရင် အသိတယောက်ယောက်ကို ဆေးသွားထိုးကြည့်၊ လက်ရှိ အတွဲရှိနေသူတောင် နေချင်းညချင်း FA ဘဝ ပြောင်းသွားနိုင်တယ်။ သူတို့လေးတွေကသာ သူတို့ခရက်ချ်ကို ချစ်ရတာ ကြွေရတာ လျော်ရတာတွေသာ တရားတာ မဟုတ်လား။

တကယ်တမ်းဖြစ်သင့်တာက သူတို့တွေ ဘစိုင်းကို သဲသဲလှုပ်ကြွေတာကို ကိုယ်တွေ နားလည်ပေးနိုင်ပေမယ့် ကိုယ်တွေက သဥ္ဇာလေးပုံကို အသဲလေးပေးတာကိုလည်း သူတို့တွေ သည်းခံပေးသင့်တာပေါ့။ ဒါမှ တရားမယ်လေ။ နို့မို့ဆိုရင် ဘယ်လိုမှ မုဒိသာ ပွားနိုင်စရာမှ မဟုတ်တာ😅

အားလုံးအဆင်ပြေ လွတ်မြောက်နိုင်ကြပါစေ:)

zin myo @ eric
2024/6/30(Sun)

23/06/2024

ကျနော်မှန်တယ်လ်ို့ ယုံကြည်ထားတဲ့ ကိစ္စတခုကို ပြောပြမယ်။ ပြောပြတာကို ဘယ်သူ့မှ မယုံလည်း ကိစ္စတော့ မရှိပါဘူး။ အနည်းဆုံး ကျနော့်တယောက်စာအတွက်တော့ မှန်နေသေးတယ် မဟုတ်လား။

လူဆိုတာ ယောင်ယောင်ကန်းကန်းနဲ့ သူများယောင်လို့ လိုက်ယောင်နေကြတဲ့သူတွေထဲမှာမှ ကိုယ်ယုံကြည်ရာ ကိုယ်လုပ်နေကြတဲ့အထဲပါနေသေးရင် မဆ်ိုးဘူး ဆိုရမယ်။ ဟိုမြောက်မြန်မာ စခဘောမဘက်မှ ချားဘရီးတွေက သူတို့ရဲ့ ဂယောင်ချောက်ချားလုပ်ရပ်တွေ အပြောအဆ်ိုတွေကို ကိုယ်ယုံကြည်ရာဆိုတဲ့ တံဆိပ်ကပ်ရင်တော့ "သဗ္ဗေသတ္တာ ကမ္မသကာ" ပေါ့ဗျာ။

ဆ်ိုလိုချင်တာက ဒီလူ့မိစ္ဆာကောင်တွေ ဒီသူတောင်းစားတွေ သက်ဆိုးဆက်ရှည်နေဦးမယ်ဆိုရင် ကိုယ်ပိုက်ဆံရှိတာကို လူမသိစေချင်တဲ့ အင်္ကျီစွပ်ကျယ်၊ ဆင်ကြယ်ဖိနပ်နဲ့ သူဌေးလူစဥ်မမှီကောင်တွေ၊ တဖက်ကလည်းသူဌေးမှန်း သိရအောင် ပိုက်ဆံအိတ်ဖောင်းဖောင်းကြီး ချိုင်းကြားညှပ် တန်ဖိုးကြီးဖုန်းခါးကြားထိုးထားတဲ့ ဘဲတွေ အလျှို အလျှို ပေါ်လာဦးမယ်။

နိုင်ငံခြားပြန်တွေဆို ဘယ်နိုင်ငံမှာ ဘာပဲလုပ်ခဲ့လုပ်ခဲ့ဘာနဲ့ပဲပြန်လာပြန်လာ အထင်ကြီး အားကျတဲ့အကြည့်တွေ မျက်လုံးတွေ ပိုများသထက် များလာဦးမယ်။

တဖက်ကလည်း ပြည်တွင်းကသူတွေရဲ့ အခြေအနေအရပ်ရပ်ကိုကြည့်ပြီး ပြည်ပကပြန်လာရုံနဲ့ ခေါင်းတလုံးပိုထွက်နေတဲ့ ဂျိုသားအထှာတွေ လုပ်ကြဦးမယ်။

နိုင်ငံတကာမှာ လူတန်းစား အယုတ်အလတ်မရွေး မုန့်ပဲ
သရေစာသဖွယ် လွယ်လင့်တကူစားနေနိုင်သော ဟန်ဘာဂါတွေ၊ ကြက်ကြော်တွေရောင်းတဲ့ဆိုင်တွေကို အထက်တန်းစား စားသောက်ဆိုင်သဖွယ် ရှိုးနဲ့မိုးနဲ့ တကူးတက သွားရဦးမယ့်အဖြစ်က်ို ပြန်ရောက်ရဦးမယ်။

အမျိုးဘာသာ သာသနာ ကာကွယ်စောင့်ရှောက်ရေးဆိုတဲ့ ခေါင်းစဥ်အောက်မှာ ဘုရားတောင် ပုံမှန် မရှိခိုးတဲ့ကောင်တွေရဲ့ စွတ်စွဲမှုနဲ့ ကိုယ့်မှာ ဘာသာရေးကို ဖျက်စီးစော်ကားသူ အဖြစ်တွေ ရောက်ရဦးမယ်။

ဒီကြားထဲ ဖက်ဒရယ်ပြည်ထောင်စု အကောင်အထည်ပေါ်လာဖို့ မပြောနဲ့ အရင်ကတည်းက ဦးနှောက်အဆေးခံထားရသော အသုံးနှုန်းတခုဖြစ်တဲ့ တိုင်းရင်းသား စည်းလုံးညီညွတ်ရေးကို ထထအော်နေကြသည့်တိုင် လုပ်ရပ်ကို အသားထား ထစ်ခနဲဆို တမျိုးစကားလုံးနဲ့ ကိုင်တုတ်တတ်တဲ့ အပိတ်တွေ၊ မပွင့်တပွင့်တွေ ပိုပိုများလာလိမ့်ဦးမယ်။

မြန်မာနိုင်ငံ မြေပုံပျက်မယ်၊ ပြည်ထောင်စုပြိုကွဲမယ်၊ ဘာဖြစ်မယ်၊ ညာဖြစ်မယ် စတာတွေ ဘာမှ စဥ်းစားမနေတော့ဘူး။ ကိုယ်လည်း အဲဒီလောက်ထိ လိုက်လုပ်နေဖို့ ဥာဏ်မမှီဘူး။ ဒီမအလသောက်ရူးထတဲ့ လုပ်ရပ်ကြောင့် ဒီဟာတွေ အကုန်လုံးလည်း ရေစုန်မျှောသွားပြီးသား။

ဘယ်လိုပဲဖြစ်ဖြစ် အာဏာရှင်အလိုမရှိတဲ့ လူထုကြောင့် ဒီတော်လှန်ရေးက အနှေးနဲ့ အမြန် အောင်ကိုအောင်မှာ။ အောင်တဲ့အခါလည်း တထောင့်တနေရာက ကိုယ်တတ်နိုင်သလောက် လုပ်နေပြီး၊ ကိုယ့်လိပ်ပြာ ကိုယ်လုံချင်တယ်။ တော်လှန်ရေးအောင်မြင်ပြီးနောက်ပိုင်း လူတိုင်း လူတိုင်း တရားဥပဒေအောက်မှာ တန်းတူညီမျှ လူအခွင့်
အရေးနှင့်အညီ ရှင်သန်နေထိုင်သွားနိုင်ဖို့ပါပဲ။

အားလုံးအဆင်ပြေ လွတ်မြောက်နိုင်ကြပါစေ:)

zin myo @ eric
2024/6/23(Sun)