Skipsbækur ehf

09/01/2024

Gleðilegt nýtt ár!

26. ágúst 1986 birtist þessi frétt í Bæjarins Besta um nýja véladagbók. Höfundur hennar og útgefandi var þá 43 ára gamall yfirvélstjóri á Guðbjarti ÍS 16.

Nýprentuð Véladagbók 2024 ætti að detta í hús von bráðar. Síðasta haust kom Skipsdagbók úr prentun, og er hún aftur orðin harðspjalda.

23/12/2023

Skipsbækur óska viðskiptavinum sínum gleðilegra jóla
og farsældar á komandi ári.

Við þökkum kærlega fyrir viðskiptin á árinu sem eru að líða.

30/08/2023

Minnum á netfangið [email protected] fyrir pantanir á Véladagbókum, Skipsdagbókum og Leiðarbókum. Skipsdagbækurnar fást núna harðspjalda. Svo er síminn alltaf opinn 4563697 eða 8963697

18/01/2023

Árið 1986 kom Véladagbókin fyrst út, síðan hefur hún komið út árlega. Bókin hefur tekið talsverðum breytingum á þessum árum, bæði hefur verið leitast við að gera betur og þróun vélbúnaðar hefur einnig leitt til breytinga. Þetta einfalda form í bókinni hefur líkað mjög vel og hefur þessi bók ráðandi markaðsstöðu í dag.
Árið 1995 var gefin út Leiðar- skipsdagbók, sem notuð er af skipstjórnarmönnum í brú. Í þessari bók voru tvær bækur sameinaðar, skipsdagbók og leiðarbók, þetta verk var unnið eftir ábendingum frá mörgum skipstjórum. Þessi leiðarbók er einkum ætluð fyrir alþjóðlegt umhverfi, en það er hægt að nota hana bæði sem leiðarbók og venjulega skipsdagbók. Árið 2000 kom einnig út skipsdagbók, sem er einfaldari í sniðum og ætluð til notkunar á miðum í kringum landið. Haustið 2000 kom einnig út bátadagbók, hún er ætluð fyrir veiðar og vélbúnað á bátum undir 24 metrum og er hún ekki bundin reglugerð. Í bókinni er einfalt form til að skrá niður viðhald og hirðingu vélar og vélbúnaðar en hún nýtist einnig sem siglingabók ef skipið er undir 12 rúmlestum að stærð. Þessar bækur eru seldar í verslunum allt í kringum landið, ýmist skipaverslunum eða bókabúðum.
Hægt er að panta bækur með því að senda tölvupóst á netfangið [email protected] eða í síma 896 3697

10/11/2022

Hér fyrir neðan er fróðleikur sem pabbi, Guðmundur Einarsson tók saman á sínum tíma. Þetta var sett á síðu Skipsbóka á sínum tíma. Sem er hefur ekkert verið uppfærð. En það er gaman að fletta í gegnum textann sem fylgir henni http://notendur.snerpa.is/gudmund . En í minningunni finnst mér eins og þessi texti hafi verið partur af verkefni hjá pabba í Kennaraháskólanum. Að miðla efni ef ég man rétt. En mögulega er það vitleysa í mér.

Fróðleikur Örverur í brennsluolíu
Örverur hafa verið þekktar í næstum eitt hundrað ár. Þær eru til sem geta lifað og fjölgað sér í olíu. Reynslan hefur sýnt að bakteríur geta eyðilagt framleiðslu sem kemur frá jarðolíu, þar á meðal brennsluolíu.
Það var fyrst í byrjun sjöunda áratugarins sem athygli var vakin á því að örverur væru í brennsluolíu og gætu valdið alvarlegu tjóni og vandamálum. Frá lokum níunda áratugarins hefur orðið áberandi aukning á tilfellum þar sem örverur í olíu hefa valdið alvarlegum keyrsluvandamálum.
Þetta hefur einkum komið fram í díselolíu (DO) og þyngri díselolíu (MDO).

Það er álitið að þetta tengist breytingum á efnasamsetningu olíunnar.
Það er mögulegt að orsökin stafi af breytingum á blöndunar - og framleiðsluferlinu hjá olíuhreinsunarstöðvunum.
Annar möguleiki er að eitthvað sem er sett saman við olíuna hafi þau áhrif að það örvi örverurnar til að fjölga sér. Niðurstaðan er að brennsluolía í dag er ágæt fæða fyrir sumar bakteríur.

Hvernig er hægt að finna bakteríur
Brennsluolía er sennilega með bakteriur ef eftirfarandi einkenni koma í ljós.
a) Grátt slím í botni eða hliðum olíutanka eða í síum.
b) Óvanaleg stingandi lykt, líkist lykt af hlandi, fúleggjum eða brennisteini.
c) Útfellingar eða tæring í tönkum, rörum eða í díselkerfinu.
d) Stífla í síum, rörum eða lokum.
e) Vandamál er að halda álagi á vél.
f) Útfellingar í túrbínu, sem að lokum gera hana óvirka.

24/08/2022

Fróðleikur
Þörfin
Mjög gagnlegt er að heimildir séu til um viðhald og viðburði frá degi til dags. Til dæmis þegar austri er dælt úr einhverju rými, síðan kemur næsti vélstjóri á vakt og ætlar að dæla úr einhverju öðru rými. Ef dæling tekst ekki er oftast rusl undir keilu lokans þar sem dælt var síðast. Vélstjórinn athugar í véladagbókinni hvar síðast var dælt og gengur beint til verks.
Ef einhvað er smurt skal það skráð. Þá er vitað að því er lokið og einnig kemur það í veg fyrir að það sé gert tví- eða þrívegis.
Nauðsynlegt er að hafa viðhald skráð. Þá er vitað hvað var gert og hvenær.
Það gefur þá vísbendingar um hvenær þörf er á að gera það aftur.
Þar sem er tölvuskráning eða viðhaldsvaki, er nægilegt að skrá tilvísun í dagbókina, tölvan og bókin vinna þá saman.

09/08/2022

Meiri fróðleikur og frá Guðmundi Einarssyni vélstjóra, kennara og bókaútgefanda.

Inngangur
Skráning atburða hefur um aldir verið tómstundagaman margra. Dæmi um slíkt eru annálar og dagbækur einstaklinga um búskap, veðurfar og atburði liðinna alda. Þessir menn skráðu atburði af fúsum og frjálsum vilja, sér og öðrum til ánægju og fróðleiks.
Á vélstjórum hvílir sú lagaskylda að færa löggilda véladagbók. Bókin er vitnisburður um það sem gerðist eða gerðist ekki.
Hún á að segja frá atburðum sem snerta vélar og vélbúnað skipsins og annað sem vélalið skipsins ber ábyrgð á.
Bókin er vitni vélstjórans um hvaða atburður átti sér stað, hvernig brugðist var við og hverjar afleiðingarnar urðu.
Bókin vinnur með þeim sem ábyrgðina ber, ef vel og vandlega er fært í hana

07/08/2022

Reglugerðir
Reglur um skipsbækur Í reglum um skipsbækur nr. 138 frá 1986 og nr. 183 frá 1987 er skýrt kveðið á, um borð í hvaða skipum eigi að færa leiðar- eða dagbók og eins hver þeirra séu undanþegin því. Lög þau og reglur sem hér hafa verið nefnd er að finna í Sjómannaalmanakinu.

Í 1. gr. reglna um skipsbækur segir: "Öll skip skulu halda leiðarbók, nema fiskiskip og skip sem vinna að sérstökum og staðbundnum verkefnum, svo sem sanddæluskip og dýpkunarskip. Þau skip, sem eigi er skylt að halda leiðarbók samkvæmt framansögðu, skulu halda dagbók, séu þau tólf rúmlestir og stærri. Öll skip, sem eru 24 metrar að lengd eða lengri, skulu auk þess halda Véladagbók."
Í 2. gr. reglna um skipsbækur segir: "Gerð skipsbóka skal viðurkennd af Siglingastofnun Íslands, sem fylgist með því að skipsbækur séu fáanlegar."

Í 3. gr. reglnanna segir : "Siglingastofnun Íslands getur heimilað að auk færslu í tilteknar bækur með venjulegum hætti sé notast við sjálfrita." Tölvuskráning aflesturs hinna ýmsu tækja hefur færst í vöxt í nágrannalöndunum. Skipstjóri ber ábyrgð á að bækur séu færðar eins og reglur mæla fyrir um, auk þess sem hann ber ábyrgð á þeim sem skrá þær.

Í 4. gr. reglnanna segir: "Skipstjóri hefur yfirumsjón með færslu skipsbóka og ábyrgist þær, en viðkomandi yfirmenn annast færslu, og ábyrgjast, að rétt sé skráð." Ekki má eyða á neinn hátt því sem skráð hefur verið.

Í 5. gr. reglnanna segir: "Skrá skal allt í skipsbækur eftir réttri tímaröð. Færslur í skipsbækur skulu vera glöggar og skipulegar. Ekki má skafa það af sem skrifað var, draga yfir það eða gera með öðru móti ólæsilegt."

03/08/2022

Skipsbækur ehf á Facebook!
Skipsbækur ehf var stofnað árið 1986 af þeim hjónunum Guðmundi Einarssyni og konu hans Ólöfu Borghildi Veturliðadóttur. Fyrsta Véladagbókin kom þá út. Á eftir þeim komu Skipsdagbók og Leiðarbók. Einnig komu út allnokkrar kennslubækur í vélstjórnargreinum, kælitækni, rafmagnsfræði og fleiri greinum sem eru gefnar út af IÐNÚ í dag.

Ólöf féll frá 5. apríl síðast liðinn 74 að aldri. Guðmundur féll svo frá eftir stutt veikindi þann 10. júlí. Hann hefði orðið áttræður á næsta ári.
Við systkinin tökum við keflinu og höldum áfram útgáfu þeirra titla sem Skipsbækur gefa út. Komið er upp nýtt netfang sem best er að nota til að panta bækur [email protected]. Gamla númerið 8963697 er enn í fullu gildi líka.

02/08/2022