03/03/2021
السلام عليكم ورحمة الله وبركاته ...
اليوم جايب لكم شرح مفصل وشامل حول منظومة FTTX 😍🔥
🔴 شنو ال FTTX
هو مختصر لجمله
fiber to the و ابدال حرف اكس تنضاف ( H او P او B او N او D) Fiber to the home و Fiber to building و Fiber to premises و الخ لان كل مكان راح يوصله فايبر يأخذ اسم فبالعموم نكتب FTTX
🔴 شنو الفرق بين GPON و EPON
كلمه PON معناها ربط منطقه كبيرة ارخص واجود من ربطها بأجهزة أخرى (مثلا الوايرليس) لتوفير المنطقة بخدمات مثل الانترنت والتي في والتلفون والخ (يعني اني نقل لل DATA ) والمقصود بال PON أيضا ان هذا الربط راح يمر عبر سبلترات وكابلات أخرى يعني طريقه الربط مو 1:1 ولا P2P وانما 1:M يعني P2MP مما تقلل التكلفة ( لعدم استخدام الريبيترات ) كذلك تغطيه مساحه عالية ( 20 كيلو متر ).
🔶️ GPON
هو نظام يستخدم طريقه WDM لعمليه ارسال واستلام البيانات (الداون لود والأب لود) عبر كيبل واحد (شعرة واحدة) باستخدام تقنيه ال TDMA ويستخدم عادة للاماكن ذات المساحات الكبيرة، وكل شعرة من الجي بون تكدر تتعامل من 1 الى 128 يوزر والسبب بهذا هو امكانيه دفع البينات بسرع توصل الى 2.5 كيكا داون لود و1.25 كيكا اب لود, وطبعا بما ان كل شعره تتحمل 128 معناها أجهزة التقسيم مثل (السبلترات) والكابلات المستخدمة راح اتصير أكثر وأكثر وبنفس الوقت الجي بون يكدر يتعامل مع أكثر من خدمة ويحقنها بنفس الشعيرة (مثلا خدمات انترنت لأكثر من شركه او اضافه تلفون او تلفزيون والخ) وهذا يتم كله باستخدام البرمجة الخاصة بي وفتح VLANS واضافه ملفات هوست باستخدام ال CLI وبي أيضا برامج لإدارة المشتركين والتعامل معهم. وهذا بي أنواع اجهزة مثلا (nokia alcatel وHuawei وZTE والخ).
🔶️ EPON
هو نظام يستخدم طريقه WDM لعمليه ارسال واستلام البيانات (الداون لود والأب لود) عبر كيبل واحد (شعرة واحدة) باستخدام تقنيه ال TDMA ويستخدم عادة للاماكن ذات المساحات اقل من الجي بون وبنفس التقنية وكل شعرة من أي بون تكدر تتعامل من 1 الى 64 وتوصل سرعه البيانات الى1.25 كيكا داون لود و 750 ميكا اب لود, وطبعا بما ان كل شعره تتحمل64 معناها أجهزة التقسيم مثل (السبلترات) والكابلات المستخدمة راح اتصير اقل بهوايه من الجي بون, والاي بون بنفس الوقت يكدر يتعامل مع أكثر من خدمة ويحقنها بنفس الشعيرة (مثلا خدمات انترنت لأكثر من شركه او اضافه تلفون او تلفزيون والخ) وهذا يتم كله باستخدام البرمجة الخاصة بي وفتح VLANS واضافه ملفات هوست باستخدام ال CLI وبي أيضا برامج لإدارة المشتركين والتعامل معهم, وطبعا هم اكو نوعيات ذات المستويات العالية مثلا (Huawei و Sopoto وFOT و CDATA).
🔴 هسه راح نجي عل السبلتر وانواعه وشلون التقسيم.
ماهو الsplitter:
وهو اداة صغيرة تقوم بعمل multiplexr و demultiplexr للاشارة , بمعنى آخر في حالة الdemultipexr تاخذ الاشارة من كابل واحد ثم توزعها على مجموعة كابلات الالياف الضوئية عددها يكون (16 او 32 او 64 او 128)و العكس في حال multiplexr بحيث ياخذ الاشارة من مجموعة الكابلات يجمعها و يخرجها على كابل واحد.
من مميزات الsplitter انه لا يحتاج كهرباء و لا صيانة.
اكو نوعيتين للسبلتر وهي:
🔶️ PLC – Planar Lightwave Circuit وهو تقسيم الشعرة الوحدة الى (2 او 4 او 8 او 16 او 32 او 64) شعره يعني طاقه الضوء تقسم بالتساوي على كل شعره, ويتعامل مع أكثر من طيف موجي للضوء بالإضافة الى الشكل الصغير والتعامل مع كل بورت بثباتيه واستقراريه عالية مع التقسم الصحيح لمقدار الاطياف على كل بورت وهذا النوع هو الأكثر استخداما وشيوعا.
🔶️ FBT – Fused Biconical Splitter هذا النوع ارخص من PLC حيث الصناعة مالته سهله جدا, ولا يقيد بتقسيم الشعرة الى حسب المطلوب ولكن بي عيوب هواية مثلا اذكر منها لا يستطيع التعامل الا مع جزء قليل من أطياف الضوء ولا يقسم الطيف بنفس المقدار لكل بورت ولهذا يسبب مشاكل اثناء العمل وكذلك يسبب مشكال اثناء وجود درجات حرارة عالية مما يسبب مشاكل LOSS بالضوء.
🔴 ونجي هسه على الكابلات:
الكابلات أنواع واشكال وحسب الاستخدام منها (الشعرة وحدة او أكثر) ومنها الي بيها حماية عادية او قوية او كلش قوية ومنها ما يستخدم حسب الشغل (مثلا هوائي او دفن بالتراب داخل الديوره لاين) والقوية جدا عادة تستخدم ( تحت الأرض (دفن) ) لصعوبة حملها على تيل الكهرباء ووزنها الثقيل يسبب بقطعها او سقوطها من (الشيالات الي على تيل الكهرباء) فينصح باستخدام الكابلات العادية او المحمي الطبيعي وذلك لسهوله وسرعه الصيانة في حالات القطع واللحيم او الاستبدال.
وطبعا معظم مشاكل الكيبلات الضوئيه هي التفييش والفيش والسبلرات والكسرات كلها تسبب نوووويز بالشغل، يعني مثلا التفييش بالفاست كوكتر مو مثل التفييش المصنعي وكذلك أنواع الفيش ولحيمها وطرق ربطها، وطبعا كل الفيش واللحيم والسبلترات الها أنواع باللحيم وهي APC وUPC وPC واكيد أحسنهم الي APC ومع احترامي اكو هواي شركات ومكاتب تغش بهذا الشي وتكذب وتكوول هاي الأجهزة كلها APC بس مع الأسف عند الفحص يطلع الحجي غير حجي ويطلع اللوز عالي وكلها على حساب المنظومة وجودتها بالشغل. يعني مثلا لازم نعرف شوكت نستخدم التفييش المصنعي ووين وكذلك اللحيم شوكت ووين وكذلك الفاست كونكتر شوكت ووين يعني مو بكيفي اشتغل. ارجع واكول كلشي يبين بالشغل والعيوب كلها تطلع لان من يطلع يفحص يحس روحه لو رابط UTP أحسن مما رابط فايبر.
🔴 هسه نجي على طرق التقسيم:
سواء كان عندي gpon او epon فالتقسيم هو واحد، يعني نستخدم مضافات عدد 2 مثلا إذا جان عندي epon وأريد اربط اول شعره (يعني اول 64 يوزر) معناها راح احسب عدد السبلترات وتجي من 8*8 او 16*4 او 2*32 وهكذا
بالنسبة للجي بون لو 64*2 او32*4 او 16*8 وهكذا وطبعا اكو تقاسيم أخرى حسب استخدام المنطقة وحسب خارطتها وحسب بعد اليوزريه عن كل سبلتر وحسب طول الكابلات وحسب ابعاد تيوله الكهرباء.
يعني بالمختصر الي يدور راحة الزبون واستقراريه الشغل وراحة باله هم فلازم يدرس الموضوع زين (خارطة وورقه وقلم ومشي ودراسة الموقع).
💠 ملاحظة أخيرة شباب... يحبذ الانتباه من الأجهزة المستخدمة او الأجهزة الي متعرف مصدرها و الي لا الها تحديث ولا سبوررت ويحلفووون انه بيها مع العلم يطلع كله كذب لان مع الأسف هواية ناس بلا مصلحه وكلشي متعرف وتسوق لهل الأمور ومن تحجي وياها تلكاها على أساس كلشي تفتهم مع العلم الغاية فقط يبيعلك وبس. واعتذر لان طولت وحجيت هوايه بس جنت حاب أشارك واعلم غيري وإذا عدكم استفسار أكثر او اتريديون معلومات أكثر فاني بالخدمة
💠 بعض المصطلحات العامة:
- PON - passive optic network
- GPON - Gigabit Passive Optical Network
- GEPON - Gigabit Ethernet Passive Optical Network
- EPON - Ethernet Passive Optical Network
- OLT - Optical Line Terminal
- FTTH - Fiber To The Home
🔸️ - ONU - Optical Network Unit
البعض يسمه ont و البعض الاخر يسميه onu
تسميه ont طبقا ل ITU-T term
تسمية onu طبقا ل IEEE term
التسميتين لهما نفس المعنى
ولكن ال ont يستخدم عندما يكون مكان الجهاز عند المشترك .
مختصر ont هو optical network terminal
بينما مختصر onu هو optical network unit .
ولأننا في وضعنا الحالي سنضع الجهاز في بيت او مكان اليوزر وجب اطلاق مصطلح ont على جميع الاجهزة المستخدمة لكي يفهم الشخص الاخر انك ستضع هذا الجهاز في مكان المشترك.