کەناڵێک شایستە بە خێزانی کورد
09/04/2024
بەردەوام بوون
ئەوە جەژن هات و ڕەمەزان کۆتایی هات و دەرگاکانی دۆزەخ کرانەوە و شەیتانەکان بەڕەڵا کران….
خوای پەروەردگار بە پێغەمبەر ﷺ ئەفەرموێ: { وَاعْبُدْ رَبَّكَ حَتَّىٰ يَأْتِيَكَ الْيَقِينُ } . الحجر: ٩٩
یەقین لێرە یانی مردن پێغەمبەریش ﷺ فەرمانەکەی خودای جێبەجێ کرد تاوەکو یەقینی بۆ هات و گەڕایەوە لای پەروەردگاری ….
پێغەمبەر ﷺ ئەفەرموێ: “ ئەگەر یەکێ لەئێوە مرد کردەوەکانی ئەپچڕێ “ .
کەواتە پشوودان لە عیبادەت و خواپەرستی نیە و ئەبێ بەردەوام بی تاوەکو مردن .
💌لە ڕۆژوو گرتن:
- شەش ڕۆژ لەمانگی شەوال بگری - شەشەڵان - وەک ئەوە وایە هەموو ساڵەکە بەڕۆژوو بی .
- سێ ڕۆژ لە مانگێ بگری وەک ئەوە وایە هەموو ساڵەکە بەڕۆژووبی ، چونکە چاکە یەک بە دەیە .
- ڕۆژووی ڕۆژی عەرەفە - نۆمینەی حاجیان - بگری ئەبێتە کەفارەتی تاوانە بچوکەکانی دوو ساڵ .
- ڕۆژووی ڕۆژی عاشورا - ١٠ ی موحەڕەم - بگری ئەبێتە کەفارەتی تاوانە بچوکەکانی ساڵێکی پێش خۆی .
- یەک ڕۆژ بەتەنیا بگری خودا ٧٠ ساڵ ڕووخسارت لە ئاگر دوورەخاتەوە .
💌قورئان خوێندن
- پێغەمبەر ﷺ ئەفەرموێ: “ باشترینتان ئەوانەن قورئان فێردەبن و خەڵکیش فێردەکەن “ .
- پێغەمبەر ﷺ ئەفەرموێ: “ هیچ دەستەیەک کۆنابنەوە لە ماڵێک لە ماڵەکانی خودا ، قورئانەکەی بخوێنن و لەنێوان خۆیاندا دەوری بکەنەوە ، ئیللا ئارامی دادەبەزێتە سەریان و ، ڕەحمەت دایان دەپۆشێ و ، فریشتەکان دەوریان لێدەدەن و ، خودا لای فریشتە نزیکەکانی باسیان دەکات “ .
💌زیکر کردن :
خوای پەروەردگار بەو گەورەیی و بێ منەتیەی خۆی ئەفەرموێ: { فَاذْكُرُونِي أَذْكُرْكُمْ }. البقرة: ١٥٢
یادم بکەن یادتان دەکەم
باسم بکەن باستان دەکەم
چ مژدەیەک لەوە گەورەترە…!
💌شەونوێژ :
پێغەمبەر ﷺ ئەفەرموێ: “ باشترین نوێژ لەدوای نوێژە فەرزەکان شەونوێژە “ .
💌بەخشین :
خوای پەروەردگار ئەفەرموێ : { وَأَنفِقُوا مِن مَّا رَزَقْنَاكُم مِّن قَبْلِ أَن يَأْتِيَ أَحَدَكُمُ الْمَوْتُ فَيَقُولَ رَبِّ لَوْلَا أَخَّرْتَنِي إِلَىٰ أَجَلٍ قَرِيبٍ فَأَصَّدَّقَ وَأَكُن مِّنَ الصَّالِحِينَ }. المنافقون: ١٠
خۆزگە خواستن لە سەرەمەرگ و گەڕانەوە و داوای مۆڵەت کردن تەنیا بۆ یەک شت ، ئەویش بەخشین…
دەبێ بەخشین چەند گەورەبێ وا مرۆڤ لەسەرە مەرگ داوای مۆڵەتی بۆ دەکات….!؟
