01/01/2025
حچينا هواي عن قطاع الاتصالات، وسمعنا آراء مختلفة من الناس. أكو ناس يحسون إن الوضع بيه تحسّن ملحوظ بس يتمنون الأفضل، وأكو ناس بعدهم مو راضين أبد عن الخدمات، ويشوفون إن الاتصالات بالعراق تحتاج شغل أكثر حتى توصل للمستوى المطلوب.
وكانت ارائهم بشركات الاتصال الي يمنا، بعضهم يحچون إن الخدمة تحسنت بالفترة الأخيرة من ناحية العروض والسرعة، بس بالمقابل البعض ينتقد ضعف الشبكات بـ"مناطق معينة" وگالوا إنه هالشي يحتاج معالجة حقيقية.
أكو اقتراحات إنه إذا صارت منافسة أكبر بين شركات الاتصال، ممكن تشوف الخدمة تتحسن والأسعار تصير أنسب للمستخدمين. الناس متفائلة بدخول الرخصة الرابعة للعراق، لأنهم يشوفون إنه بمجرد دخولها راح تصير الشركات تتنافس أكثر، وكل وحدة تحاول تقدم أفضل ما عندها حتى تجذب المشتركين.
وانت شنو رأيك, هل شفت تحسن بخدمات الاتصالات خلال الفترة الماضية؟ وكيف كان انعكاسها عليك سواء من خلال العمل او استخدام الانترنت بشكل عام؟
