Media Office of Lahur Talabany

29/12/2024

لاهور شێخ جەنگی بە بۆنەی هاتنی ساڵی نوێ، پەیامێکی پیرۆزبایی لە نێچیرڤان بارزانی سەرۆکی هەرێمی کوردستانەوە پێگەیشت، ئەمە دەقەکەیەتی:

29/12/2024

لاهور شێخ جەنگی بە بۆنەی هاتنی ساڵی نوێ، پەیامێکی پیرۆزبایی لە محەمەد حاجی مەحمود، سەرۆکی پارتی سۆسیال دیموکراتی کوردستان پێگەیشت.ئەمە دەقەکەیەتی:

25/12/2024

پەیامی لاهور شێخ جەنگی بۆ جه‌ژنى له‌دايكبوونى حه‌زره‌تى عيساى مه‌سيح.

"جه‌ژنى له‌دايكبوونى حه‌زره‌تى عيساى مه‌سيح (سڵاوى خواى لێ بێت)، له‌ هه‌موو خوشک و برايانى مه‌سيحى له‌ كوردستان، عێراق و ته‌واوى جيهان پيرۆز بێت، هيوادارم جه‌ژنی کریسمس بەشادی و کامەرانی بەسەر ببەن."

20/12/2024

لاهور شێخ جەنگی پرسەنامەیەکی ئاراستەی بنەماڵەی کۆچکردوو بەهرۆز قەشانی کردووە ئەمە دەقەکەیەتی:

بە ناوى پەروەردگاری بەخشندە و میهرەبان

بەڕێزان بنەماڵەو خانەوادەی بەهرۆز قەشانی:

بە داخ و پەژارەیەکی زۆرەوە هەواڵی ماڵئاوایی کەسایەتی دیاری سلێمانی و کوردستان ( بەهرۆز محەمەدساڵح قەشانی) پارێزگاری پێشوتری پارێزگای سلێمانی-مان بیست، کە خەمبار و نیگەرانی کردم، بۆ ئەو کۆستە هاوبەشیى خەم و پەژارەتان دەکەم و پرسە و ماتەمینى قووڵیى خۆم ئاڕاستەى یەک بە یەکى خانەوادە و بنەماڵە بەڕێزەکەتان دەکەم.
کاکە بەهرۆز کەسایەتیەکی نیشتیمانپەروەر و پارێزگارێکی دڵسۆز و خزمەتگوزاربوو.
لە پەروەردگارى مەزن داواکارین گیانى کاکە بەهرۆز بە بەهەشت شاد بکات، دڵنەوایی و سوکناییش بە ئێوە و هەموو لایەک ببەخشێت .

انا لله وانا الیە راجعون

لاهور شێخ جەنگی

10/12/2024

پەیامی لاهور شێخ جەنگی بۆ مەترسییەکانی
سەر رۆژئاوا.

07/12/2024

لە پەراوێزی دیداری مەنامە لەبەحرەین،
لاهور شێخ جەنگی لەگەڵ هامیش فالکۆنەر جێگری وەزیری دەرەوەی پەرلەمانی بریتانیا بۆ ڕۆژهەڵاتی ناوەڕاست و ئەفغانستان و پاکستان کۆبۆوە.

تەوەری سەرەکی گفتۆگۆکانی نێوانیان پەرەسەندنە ئەمنیەکانی رۆژهەڵاتی ناوەراست بوو، بەتایبەتی دۆخی سوریای نوێ و ئەو گۆڕانکاری و گریمانانەی دوای شەڕی غەززە و لوبنان هاوتونەتە سەر شانۆی سیاسیی ناوچەکە.

هەر لەو دیدارەدا باس لە دۆخی سیاسیی عێراق کرا، هەڵوەستەیان کرد سەبارەت بە چەند تەوەرێکی گرنگ،
لە سەروی هەمویانەوە دۆخی ئەمنی و دۆسێی دارایی و ئابوری عیراق تاوتوێکرا، هەروەها باس لە بایەخ و گرنگی هەڵبژاردنی ساڵی داهاتوی ئەنجومەنی نوێنەرانی عێراق کرا.

پەیوەست بە دۆخی سیاسیی هەرێمی کوردستان باسیان لە کێشە دارایی و ئابورییەکان کرد ، هەڵبژاردنەکانی پەرلەمانی کوردستان و قۆناغی دوای هەڵبژاردنەکان و ئەو ئاڵنگارییانەی لەبەردەم پێکێهێنانی کابینەی نوێی حکومەتن تەوەرێکی تری قسە و گفتوگۆکانی نێوانیان بوو.

07/12/2024

بەرپرسیارێتی پارتی دیموکراتی کوردستان وەک هێزێک کە هاوسنوری رۆژئاوایە گەورەیە و ئەرکی گرنگیان لە ئەستۆدایە، دەبێ رۆحی نەتەوەیی و نیشتیمانی زاڵ بکەن بەسەر حزبایەتیی بەرتەسکدا. دواکەوتن و ئیهمالی نواندن لەم تيگەیشتنە و سوربونی دەسەڵاتدارانی هەرێم لە هەردوو زۆنی زەرد و سەوز لەو پاشاگەردانی و تاڵانی و خۆخۆرییەی ساڵانێکی زۆرە دەستیانداوەتێ، خیانەتە و تاوانێکی گەورە و کوشندەیە لە کورد و دۆزە ڕەواکەی، لە کوردستان و خەڵکە بەشمەینەتەکەی.

لاهور شێخ جەنگی

07/12/2024

دەسەڵاتدارانی نا بەرپرسی هەرێم هەست بە هیچ بەرپرسیاريتییەکی نەتەوەیی و نیشتیمانی و ئەخلاقی ناکەن بەرامبەر دۆخەکە و بچوکترین جوڵەی سیاسیی، دبلۆماسییان نییە بەرامبەر خوشک و براکانمان لە رۆژئاوا لە کاتێکدا پێویست بوو ئێستا ئامادەی هەموو ئەگەر و گریمانەیەک بن بە پشتیوانی سەربازیشەوە.

لاهور شێخ جەنگی

07/12/2024

پەیامێکی گرنگی لاهور شێخ جەنگی لە دیالۆگی مەنامەی بەحرەین، لەبارەی دۆخی سوریا و رۆژئاوای کوردستان

بەناوی خوای بەخشندەی میهرەبان.

وەک هەموو لایەک ئاگادارن، لە چوارچیوەی پەرەسەندنە خێراکانی دۆخی سیاسیی رۆژهەڵاتی ناوەراستدا، قۆناغێکی سەربازی و سیاسیی نوێ لە سوریا بووە بە ئەمری واقع و گریمانەی گۆڕانکاری ریشەیی لە شام بە تایبەتی رژێمە سیاسییەکەی بەشار ئەسەد لە هەموو کات نزیکترە.

دۆخی دەوڵەتی سوریا لە چەند ئاستێکی جیاواز و کاریگەردا پەیوەستە بە ئێمەوە وەک نەتەوەی کورد و خەڵکی کوردستان. سوریا لە ڕوی جوگرافییەوە وڵاتێکی گرنگی ناوچەکەیە و ئەمن و ئاسایشی ئەو وڵاتە بەتوندی بە ستراوەتەوە بە وڵاتانی دراوسێیەوە بەتایبەتی عێراق. بە هۆی ئەوەی وڵاتێکە سنوری لەگەڵ عێراق هەیە و مێژووی سیاسیی کۆن و نوێ ئەو وڵاتە جۆرێک لە نزیکی و لێکچونی لەگەڵ رژێمە سیاسییەکانی عێراق هەبووە، جگە لەوەی سوریا هاوشێوەی عێراق بەشێکە لەو میحوەربەندییە هەرێمایەتییەی ناوچەی رۆژهەڵاتی ناوەراستی دابەش کردوە بۆ دوو ئاراستەی نفوزی سیاسیی و سەربازی لە نێوان ئێران و ئیسرائیل لە لایەک و لە نێوان زلهێزانی دنیاش لە لایەکی ترەوە.

لە هەموو ئەوانەی سەرەوە گرنگتر بۆ ئێمە وەک نەتەوەی کورد، ئەزمونە درەوشاوە و ئیلهام بەخشەکەی براکانمانە لە رۆژئاوای نیشتیمان کە ئێستا بە هۆی دۆخی سوریاوە کەوتونەتە بەردەم ئاڵنگاری نوێ و پشتیوانیکرد و ئاگاداربوون لێیان لە هەموو ئاستەکاندا بە تایبەتی سیاسیی و سەربازی وەک بەشێک لە خەباتی نەتەوەیی پێکەوە گرێدراوی ئێمە ئێجگار گرنگ و ستراتیژییە و دەبێ بە رۆحێکی نەتەوەیی و نیشتیمانی بەرزەوە هەموو هەوڵێکمان بۆ ئەوە بێت ئەزمونی کورد لە رۆژئاوا بپارێزرێ و بەرەوپێش بچێ و پاشەکشە نەکات. زۆر گرنگە ئەو شەرعیەتەی بە خوێن و فرمێسک و قوربانیدان دەستکەوتوە و کانتۆنەکانی لێهاتونەتە بوون و دەستورێکی نیشتیمانی پڕ شکۆیان بۆ خۆیان و گەلانی ناوچەکە نوسیوەتەوە، لەهەر گۆڕانکارییەکی رژێمی سیاسیی سوریادا پارێزگاری لێبکرێ زیاتر بەرەوپێشەوە ببرێت.

لێرەدا دەمەوێت ئاماژە بە خاڵێکی جەوهەری گرنگ و ستراتیژی بکەم ، جیاوازییەکی زۆر گەورە هەیە لە نێوان «پشتیوانی و هاوسۆزی» لەگەڵ «دەست تێوەردانی نەرێنی»، دەبێ بەو ڕادەیەی پشتیوان و هاوکار و هاوسۆزی براکانمانین لە سوریا، بە هەمان رادەش خۆمان بپارێزین لە دەست تێوەردان و بارگاویکردنی ئەزمونی رۆژئاوا بە هیچ جۆرە ئەجندایەکی سیاسیی و ئایدۆلۆژی، لەو روەوە گرنگە پارتی کرێکارانی کوردستان ئەو راستییە بزانێت کە وەرگرتنی شەرعیەت بۆ دۆزی کورد لە رۆژئاوا و ئایندەی سوریا دا پێویستی بە سیاسەتێکی واقعیانە هەیە و دەبێ تێگەیشتنی قوڵیان لەوروەوە هەبێت و جیاوازییەکانیان لەگەڵ لایەنەکانی دیکە نەبێتە کێشە بۆ کۆی ئەزمونی رۆژئاوا.

کاتیەتی کورد بەگشتی و بە تایبەتی لە ئێستای سوریادا واقعیانە مامەڵە بکات و بزانێت وەرگرتنی مافە نەتەوەیی و سیاسییەکانی لە سوریای نوێ دا پێویستی بە دوو بنەمای سەرەکی هەیە، «سیاسەتی واقع بینانە» و «وەرگرتنی شەرعیەتی ناوخۆیی و هەرێمایەتی و نێودەوڵەتی»، دەبینین و دەبیستین کەسێکی وەک ئەبو محەمەد جۆلانی بە پاشخانێکی تاریکەوە لەناو رێکخراوە تیرۆرستییەکانی ئەلقاعیدە و جەبهەی نوصرەوە هاتوە لە دەستەی ئازادکردنی شام بە ناوێکی نوێ و زمان و نەفەسێکی جیاواز لە رابردوو بۆ کەناڵی سی ئێن ئێن ی ئەمریکی دەدوێت و باسی دەوڵەتی دامەزراوە دەکات و دەستبەرداری گوتارە توند و رادیکاڵەکەی بووە ، ئەوەش بێگمان تەنها لە پێناوی وەرگرتنی جۆرێک لە شەرعییەتی ناوخۆیی، هەرێمایەتی و نیودەوڵەتی، لەو سۆنگەیەوە پێویستە کوردیش بە بەرگێکی نەتەوەیی، نیشتیمانیی و فکرێکی نوێی گەورەتر لە ئایدۆلۆژیا و بەرزتر لە حزب، (هەرحزبێک ) لە مەیدانی گۆڕانکارییەکانی سوریادا بێت و ئەو دەرفەتە مێژوییە لە سوریا بقۆزێتەوە و لەدەستی نەدات چونکە مێژوو هەمیشە شانس و دەرفەتی زێرینی ئاوا دەگمەنی تێدا ناخولقێت.

بە داخەوە لە کاتێکدا ئێمە وەک نەتەوە لە رۆژهەڵاتی ناوەراستدا کەوتوینەتە بەردەم بەرپرسیاریەتێکی مێژوویی بۆ ئاگادار بوون لە وێنە گەورەکەی خۆمان لە رۆژئاوای نیشتیمان لە وەها دۆخێکدا دەسەڵاتدارانی نا بەرپرسی هەرێم هەست بە هیچ بەرپرسیاريتییەکی نەتەوەیی و نیشتیمانی و ئەخلاقی ناکەن بەرامبەر دۆخەکە و بچوکترین جوڵەی سیاسیی، دبلۆماسییان نییە بەرامبەر خوشک و براکانمان لە رۆژئاوا لە کاتێکدا پێویست بوو ئێستا ئامادەی هەموو ئەگەر و گریمانەیەک بن بە پشتیوانی سەربازیشەوە، چونکە وەک وتم لە بارودۆخێکی نێودەوڵەتی گەرمدا وەک ئەوەی ئێستا لە سوریا دەگوزەرێت وێنە گەورەکەی کورد وەک نەتەوەیەکی بێ کیان لە هەموو کات رونتر دەکەوێتە بەرچاوی دنیا، بە پێچەوانەوە دەسەڵاتدارانی هەرێمی کوردستان نەک ئەوە ناکەن بەڵکو لەناوخۆی هەرێمدا هێشتا نغرۆ و مەستی گەندەڵی و بردنی داهاتی ناوخۆ و قاچاغچێتی نەوتن، مووچەی خەڵکیان خستۆتە ناو زەلکاوی پۆخڵەواتی پارە پەرەستییەوە و هەست بە هەستیاری دۆخی ناوچەکە ناکەن و چاویان جگە لە بەرژەوەندی تەسکی حزبی و کەسی هیچیتر نابینێت.
لە کاتێکدا پێویست بوو لە ئێستادا نەک بۆ ناوخۆی هەرێم بەڵکو بەرووی گۆرانکارییە هەرێمایەتییەکانیشدا ئامادەییان هەبێت و بەرچاوڕوویان رون بێت، لە وەها دۆخێکدا لە هەموو کات زیاتر خەریکی ململانیی حزبی بچوکن کە ئامانجەکەشیان تەنها پارە و پۆستە و هیچی تر.

ئەم دێرانەی سەرەوە بانگهێشت و هۆشداری پێشوەختەن بۆ هەموو لایەک کە ئەرکی هەمومان بەرامبەر دۆخی سوریا و گۆڕانکارییەکانی گرنگ و گەورەن و دەبێ لێی تێبگەین. لەوچوارچيوەیەدا بەرپرسیارێتی پارتی دیموکراتی کوردستان وەک هێزێک کە هاوسنوری رۆژئاوایە گەورەیە و ئەرکی گرنگیان لە ئەستۆدایە، دەبێ رۆحی نەتەوەیی و نیشتیمانی زاڵ بکەن بەسەر حزبایەتیی بەرتەسکدا. دواکەوتن و ئیهمالی نواندن لەم تيگەیشتنە و سوربونی دەسەڵاتدارانی هەرێم لە هەردوو زۆنی زەرد و سەوز لەو پاشاگەردانی و تاڵانی و خۆخۆرییەی ساڵانێکی زۆرە دەستیانداوەتێ، خیانەتە و تاوانێکی گەورە و کوشندەیە لە کورد و دۆزە ڕەواکەی، لە کوردستان و خەڵکە بەشمەینەتەکەی.

پێویست بوو گۆڕانکارییەکانی رۆژهەڵاتی ناوەڕاست و گەڕانەوەی ترامپ بۆ سەرۆکایەتی ئەمریکا وامان لێبکات خۆمان ئامادە بکەین بۆ ئەوەی دۆزی کورد بە فروانترین ئاست بخەینەوە سەر شانۆی سیاسیی جیهان، لە وەها دۆخێکدا دەسەڵاتدارانی هەرێم لەسەر پارە و پۆست خەریکی هەلا هەلاکردنی هەموو جۆرە ئینتیما و سۆزێکی نەتەوەین و باکیان بە هیچ شتێک نییە.

خوای گەورە خەڵکی هەرێمی کوردستان و عێراق، خوشک و براکانمان لە رۆژئاوا و هاوڵاتیانی سوریا و ناوچەکە لە هەموو پێشهاتێکی خراپ و نەخوازراو بپارێزێ.

لاهور شێخ جەنگی
بیستەمین دیالۆگی مەنامە / بەحرەین.
٧ ی دێسەمبەری ٢٠٢٤

07/12/2024

گرنگە پارتی کرێکارانی کوردستان ئەو راستییە بزانێت کە وەرگرتنی شەرعیەت بۆ دۆزی کورد لە رۆژئاوا و ئایندەی سوریا دا پێویستی بە سیاسەتێکی واقعیانە هەیە و دەبێ تێگەیشتنی قوڵیان لەوروەوە هەبێت و جیاوازییەکانیان لەگەڵ لایەنەکانی دیکە نەبێتە کێشە بۆ کۆی ئەزمونی رۆژئاوا.

لاهور شێخ جەنگی

05/12/2024

ئەمڕۆ لە بەغدای پایتەخت، لاهور شێخ جەنگی سەردانی دەوڵەتمەدار نوری مالکی سەرۆک وەزیرانی پێشوتری عێراق و سەرۆکی هاوپەیمانی دەوڵەتی یاسای کرد.

لەو سەردانەدا چەند تەوەرێکی گرنگیان تاوتوێ کرد، لە سەروی هەمویانەوە پرسی کێشەی مووچەخۆرانی هەرێم و دواکەوتنی مووچەکانیان، هەردولا جەختیان کردەوە کە نابێت قوتی خەڵک بە هۆکاری گەندەڵی و یاسا شکێنی کێشەی بۆ دروست بکرێت و ئەو کێشەیەی زیاتر لە دە ساڵە بەرۆکی خەڵکی کوردستانی گرتوە دەبێ بە ریشەیی چارەسەر بکرێ، ئەوەش بە شەفافیەت و یاساسەروەری دەکرێت.

دۆخی ئەمنی عێراق و ناوچەکە و ئەو پەرەسەندنانەی هاتونەتە ئاراوە لە ئاستی هەرێمایەتی تەوەرێکی تری گفتوگۆکانی نێوان لاهور شێخ جەنگی و نوری مالکی بوو.

هەروەها باسیان لە هەڵبژاردنەکانی ساڵی ئایندەی ئەنجومەنی نوێنەرانی عێراق کرد و هەردولا کۆک بون لەسەر هەماهەنگی و لێکتێگەیشتنی زیاتر لە نێوانیاندا.

05/12/2024

بە ناوى پەروەردگاری بەخشندە و میهرەبان
بەڕێزان بنەماڵەو خانەوادەی مامۆستا مەلا محەمەد ئەمین شەڵماشی

بە داخ و پەژارەیەکی زۆرەوە هەواڵی ماڵئاوایی کەسایەتی دیار و نوسەر و ڕوناکبیر و زانای ئایینیی کوردستان مامۆستا مەلا محەمەد حەمەئەمین مستەفا ناسراو بە (مامۆستا مەلا محەمەد شەڵماشی)مان بیست ، کە خەمبار و نیگەرانی کردم، بۆ ئەو کۆستە هاوبەشى خەم و پەژارەتان دەکەم و پرسە و ماتەمینى قووڵیى خۆم ئاڕاستەى یەک بە یەکى خانەوادە و بنەماڵە بەڕێزەکەتان و سەرجەم مامۆستایانی ئاینی کوردستان دەکەم.
مامۆستا مەلا محەمەد ئەمین شەڵماشی کەسایەتیەکی ئایینی دیاری کوردستان و نیشتیمانپەروەر بوو، لە بواری زانست و نوسین و وەرگێڕان و فەرهەنگیشدا خزمەتێکی زۆری پێشکەش کردوە، هەمیشە هەوڵی تەبایی و پێکەوەژیانی دەدا، لەهەموو دیدار و پەیوەندییەکانماندا لەگەڵ مامۆستا مەلا محەمەد ئامۆژگاریی و وانە جوانەکانی لەسەر ئەو بنەمایە بووە کە هەمیشە نزیکبین لە خەڵک و خۆمان بە خزمەتکاری گەلەکەمان بزانین، بەداخەوە ئەمرۆ بۆ دواجار بەجێی هێشتین و گەڕایەوە لای پەروەردگار.
لە پەروەردگارى مەزن داواکارین گیانى مامۆستا مەلا محەمەد شەڵماشی بە بەهەشت شاد بکات، دڵنەوایی و سوکناییش بە خێزان و خانەوادە و خزم و دۆستانی و سەرجەم مامۆستایانی ئایینی ببەخشێت.
انا لله وانا الیە راجعون
لاهور شێخ جەنگی

14/11/2024

لاهور شێخ جەنگی بەم جۆرە پیرۆزبایی لە یادی ٢٤٠ ساڵەی بونیادنانی شاری سلێمانی دەکات.

پیرۆزبێت یادی ٢٤٠ ساڵەی بونیادنانی شاری سلێمانی.

12/11/2024

ئەمرۆ لاهور شێخ جەنگی، لە شاری سلێمانی پێشوازیکرد لە رادو بوتوم بەرپرسی نوێی نوسینگەی پەیوەندییەکانی یەکێتیی ئەورووپا لە هەرێمی کوردستان و وەفدی یاوەری کە پێکهاتبوو لە دەیڤید هیلی جێگری بالیۆزی یەکێتی ئەوروپا لە عێراق و لێنارت دێریدەر، بەرپرسی بەشی هاوکاری.

لە دیدارەکەدا لاهور شێخ جەنگی پیرۆزبایی لێکردن بەبۆنەی دەستبەکاربوونی لەو ئەرکە نوێیەدا و هیوای سەرکەوتن و بەردەوامی بۆ خواست. دواتر بیروڕایان ئاڵوگۆڕکرد دەربارەی ئەنجامەکانی هەڵبژاردنی ٢٠ ی ئۆکتۆبەر، بەتایبەت ئەو ساختەکارییە گەورەیە و ئەو دیزاینە پێشوەختە هەرێمایەتییەی بۆ هەردوو حزبی دەسەڵات و هەندێک لایەنی تر ئامادەکرابوو بۆ لەکەدارکردنی پرۆسەی سیاسی و دیموکراسی و ناوبانگی هەرێمی کوردستان.

هەروەها ئاماژەیان بە نیگەرانی و هەڵوەستەی زۆرینەی لایەنە سیاسیەکانی دەرەوەی دەسەڵاتکرد بەرامبەر بەو ساختەکارییانەی ئەنجامدراوە، هەر لەو سۆنگەیەشەوە باسیان لە هەوڵ و هەنگاوەکانکرد بۆ داکۆکیکردن و پارێزگاریکردن لە ئیرادەی دەنگدەرانی هەرێمی کوردستان.

جەختیانکردەوە کە سەنگ و دەنگ و پشتیوانی جەماوەری بەرەی گەل زۆر فراوانترە لەو ئەنجامانەی لەم هەڵبژاردنە دیزاینکراوەدا دیاریکراوە.
هەروەها دوپاتیشیانکردەوە کە بەرەی گەل بەردەوام دەبێت لەو بەرنامە فراوانەی کە هەیەتی بۆ خزمەتکردنی خەڵک و بەهێزکردنی بنەماکانی دیموکراسی و پاراستنی مافەکانی خەڵکی کوردستان و گەڕانەوەی شەرعیەت بۆ دامەزراوەکانی هەرێم.

06/11/2024

ئەمڕۆ لاهور شێخ جەنگی، لە یاریگای یانەی نەورۆز بەشداریکرد لە کەمپەینی هاوکاریکردنی کاکە بارین.

لاهور شێخ جەنگی ڕایگەیاند؛ دڵخۆشبووم بە بینینی پەرۆشی خەڵکی کوردستان و هاندەران بۆ بەشداریکردن لە کەمپەینەکە، سوپاس بۆ وەرزشدۆستان لە هەموو کوردستان، ئەمڕۆ ئێوە یەکڕیزیتان پیشانداین ئەوەی کە سیاسییەکان تێکیدەدەن ئێوە چارەسەریدەکەن،

هەروەها رایگەیاند؛ بەهیوام کاکە بارین تەندروست بێت و بەتەندروستییەکی باشەوە بەردەوام لە یاریگا ئامادەبێت.

06/11/2024

لاهور شێخ جەنگی پیرۆزبایی خۆی ئاراستەی دۆناڵد ترەمپ، سەرۆکی هەڵبژێردراوی ئەمریکا دەکەت.

"پیرۆزبایی خۆم ئاراستەی دۆناڵد ترەمپ، سەرۆکی هەڵبژێردراوی ئەمریکا دەکەم بەبۆنەی سەرکەوتنی لە هەڵبژاردنەکاندا و بوونی بە ٤٧ـهەمین سەرۆکی ویلایەتە یەکگرتووەکانی ئەمریکا. هیوادارم پێکەوە کارکردنى هاوبەش لەگەڵ هەرێمی کوردستان بپارێزێت و کاربکات بۆ پشتیوانیکردن لە ئارامی و ئاسایش و بەردەوامی بدات بە چالاکی و ئامانجە هاوبەشەکانمان."

04/11/2024

ئەمڕۆ لە بارەگای تایبەتی خۆی لە شاری هەولێر، لاهور شێخ جەنگی بە ئامادەبونی دکتۆر سۆران جەمال تاهیر و شادمان مەلا حەسەن ، پێشوازیکرد لە مامۆستا عەلی باپیر سەرۆکی کۆمەڵی دادگەری و وەفدی یاوەری.

لە دیدارێکی دۆستانەدا، بیروڕا ئاڵوگۆڕکرا سەبارەت بە ئەنجامەکانی هەڵبژاردنی ٢٠ ی ئۆکتۆبەر و ئەو ساختەکارییە بەرفراوانەی ئەنجامدراوە و تەئکید لە هەماهەنگی نێوان کۆمەڵی دادگەری و بەرەی گەل کرایەوە.

هەردولا هاوڕابوون لەسەر ئەوەی کە پێویستە تانەی لایەنە سیاسییە بەشداربوەکانی ئەم هەڵبژاردنە لەبەرچاو بگیرێ، جەختیشیان کردەوە لەسەر ئەو ڕاستییەی کە تێپەڕبوونی هەڵبژاردنەکانی ٢٠ ی ئۆکتۆبەر بەو هەموو ساختەکارییەوە پرسیاری جدی لەسەر کۆمسیۆنی هەڵبژاردنەکان و شەرعییەت و مەشروعییەتی پرۆسەی سیاسی دروست دەکات و متمانەی خەڵک بە دامەزراوە نیشتیمانییەکان هێندەی تر لاواز دەکات.

کۆمەڵی دادگەری و بەرەی گەل، جارێکی تر ئەو راستییەیان دوپاتکردەوە کە ئەو ساختەکاریی و دیزاینەی بۆ هەڵبژاردنەکانی ٢٠ ی ئۆکتۆبەر کراوە گوزارشتە لە شکستی حوکمڕانیی و ترسی حزبەکانی دەسەڵات لە سەنگی راستەقینەی خۆیان هەربۆیە لە هەموو هەڵبژاردنێکدا و هەرجارە و بە مۆدێل و رێکارێک پەنا بۆ ساختەکردنی ئیرادەی هاوڵاتیانی هەرێمی کوردستان دەبەن.