08/01/2022
ਕਰੋਨਾ ਪਿਛਲੇ ਸਾਲ ਵਾਂਗ ਹੀ ਸੰਗਾਊ ਤੇ ਚਾਨਣ ਤੋਂ ਡਰਦਾ ਹੈ। ਇਹ ਪਹਿਲਾਂ ਵੀ ਗ਼ੈਰ ਰਾਜਨੀਤਕ ਸੀ ਤੇ ਅੱਜ ਵੀ। ਇਹਨੂੰ ਸਿਆਸੀ ਰੈਲੀਆਂ ਤੋਂ ਪਹਿਲਾਂ ਵੀ ਨਫ਼ਰਤ ਸੀ ਤੇ ਅੱਜ ਵੀ। ਪਹਿਲਾਂ ਵੀ ਇਹ ਸਕੂਲਾਂ, ਕਾਲਜਾਂ ਤੇ ਯੂਨੀਵਰਸਿਟੀਆਂ ’ਤੇ ਅੱਖ ਰੱਖਦਾ ਸੀ ਤੇ ਅੱਜ ਵੀ। ਇਹ ਠੇਕਿਆਂ ਵਾਲਿਆਂ ਦਾ ਪਹਿਲਾਂ ਵੀ ਯਾਰ ਸੀ ਤੇ ਅੱਜ ਵੀ ਹੈ।
ਰੈਲੀ ’ਚ ਭਾਵੇਂ ਪੰਜਾਹ ਹਜ਼ਾਰ ਲੋਕ ਆਉਣ, ਇਹ ਦਿਆਲੂ ਸੁਭਾਅ ਦਾ ਹੋਣ ਕਰਕੇ ਕੁੱਝ ਨਹੀਂ ਆਖਦਾ। ਹਾਂ, ਸਕੂਲ ’ਚ ਦੋ ਸੌ ਬੱਚਾ ਹੋਵੇ ਤਾਂ ਚਿੰਬੜ ਜਾਂਦਾ। ਇਹ ਹਾਲੇ ਨਾਬਾਲਗ ਹੈ, ਇਹਦੀ ਵੋਟ ਨਹੀਂ ਬਣੀ। ਜੇ ਬਣੀ ਹੁੰਦੀ ਤਾਂ ਹੀ ਰੈਲੀਆਂ ’ਚ ਜਾਂਦਾ। ਇਹ ਪੱਛਮੀ ਬੰਗਾਲ ਦੀਆਂ ਰੈਲੀਆਂ ਮੌਕੇ ਕੁੱਝ ਨਹੀਂ ਸੀ ਕਹਿੰਦਾ, ਐਤਕੀਂ ਪੰਜਾਬ ’ਚ ਵੀ ਕੁੱਝ ਨਹੀਂ ਕਹੇਗਾ। ਇਹ ਸਾਡੇ ਲੀਡਰਾਂ ਦਾ ਰਿਸ਼ਤੇਦਾਰ ਹੈ। ਆਪਣਿਆਂ ਦਾ ਖੂਬ ਖਿਆਲ ਰੱਖਦਾ ਹੈ।
ਕਰੋਨਾ ਨਾਂ ਬਦਲ ਕੇ ਆਉਂਦਾ ਹੈ, ਪਰ ਆਦਤਾਂ ਨਹੀਂ ਬਦਲਦਾ। ਇਹਦੇ ’ਚ ਇੱਕ ਖੂਬੀ ਵੀ ਹੈ, ਸਟੈਂਡ ਨਹੀਂ ਬਦਲਦਾ। ਜਿੱਥੇ ਹੈ, ਉਥੇ ਹੈ। ਜਿੱਥੇ ਨਹੀਂ ਹੈ, ਉਥੇ ਬਿਲਕੁਲ ਨਹੀਂ।
- ਸਵਰਨ ਸਿੰਘ ਟਹਿਣਾ
Media/news company
