12/05/2024
DT EXCLUSIVE INTERVIEW
Pu T. Romeo Hmar Inpawlpuina
Hmar hnam hai hmakhuo chungchanga Delhi Thurawn le Pu T. Romeo Hmar inpawltlangna (11 Thlavul, 2024 - Pathienni)
DT: Delhi Thurawn
RH: Romeo Hmar
DT: A hmasatakin Pu Romeo Hmar, Vice-President, Hmar Inpui GHQ nilai mek, Delhi Thurawn le inpawltlangna nei dingin i hun tepter tak karah hunawl i mi siempek leiin kan lawmtak zet che. Anleh, interview zuk ṭanna dingin i chungchang tawifel deuin le khawtlanga i lo inhmang dan hai mi hril pek thei i ti?
RH: Keikhawma ka lawm ie. Ka hming chu hrila um ta ang khan, Romeo Hmar ani a. Ka nu hming chu B.K. Rose a nih. 21-03-1973 in Thanlon ah ka pieng le mur niin pawl riet chen kha St Xavier’s School, Thanlon-ah ka kai a, pawl kuo le pawl sawm Bethany Christian High School, (Tuiṭhaphai) ah, pawl sawmpakhat le pawl sawmpahni Johnstone Higher Secondary School, (Imphal) anthawk le, Sri. Venkateswara College, Delhi University ah English honours subject a la in ka lo graduate.
Khawtlang a hin ka lo inhmang nasa ve khawpel a, Manipur Tribals Forum Delhi (MTFD) a Founding Convenor ti dam, HSA’a Advisor le DHWA ah Valupa dam lo ni in, Vice Chairman sin chen khawm ka lo chel hlak. Chun, ITLF ah Chairman khawm ka lo ni hlak nghe nghe bawka, tuhin Zo United ah Hmar Inpui GHQ term 2023-25 sunga Vice President ka nina zarin Executive Committee member ka ni sa nghal bawk. A hma khan Hmar Inpui (GHQ) Joint Secretary/Metro Policitan Cities Incharge sin ka lo chel ta bawk. Hienghai khela hin Delhi ka um sungin Organisation dang dang North East India level huop a hai khawm nina tamtak khawm ka chel hlak a uma chu a pawimaw bik dinga inlang tiin hi’n hang hril el ka tih.
DT: Lawm a um khawpel. Tulai Manipur buoina le inzawm thila hin hang lut nghal inla. ‘Political Solution’ a dingin SoO groups hi hrillang nasatak niin, a sulsuoktu tak khawm an ni el thei a. Hmar Inpui level anthawk hin SoO hai leh iengang am ana ei ngirsan ana?
RH: SoO groups KNO/UPF umbrella hnuoiah, Kuki, Zomi le Hmar a chawipawl hai an um a, Entity pathum ṭhangkhawma Political Solution hnawt ani tlat leiin ei ngirsan chu Kuki-Zomi-Hmar hminga “Union Territory (with Legislature)” hi a nih. Helpawl chungchang lo ei hril ani khawma Manipur a tlangmi hai chu, minus Naga in, Kuki, Zomi, Hmar ei ni tho tho society level a khawm. Ei thil ngen Union Territory dam hi ei lo nawr hlawtling thei ani chun “a pawimaw tak chu eini Hmar tieng anthawk hin thuneina insem (power sharing) indik, inang dawng dingin ei inmawr hne hle ngaiin ka hriet. Chu ding chun ei thilthaw makmaw chu eini tieng innthawka mi ai-aw theitu ding zawngdawk le tatngei hi a nih.
DT: Anleh Pu, “Kuki-Zo chungchanga hin hnam popo inlungruoln azara ‘Kuki-Zo’ hi pawm a nih” ti ani a, ei Inpui hin ‘Kuki-Zo’ hi a pawm chie ani am?
RH: Hihi thil “Kuki-Zo” pawmthu vel hi kei ka hun hmaa thiltlung a lo ni a, tuta mithi vui ding hunlai khan meeting nei niin Hmar Inpui GHQ President (In-charge) ka nina angin, kei ka mimal le Inpui ngirsan chu “Kuki-Zomi-Hmar” a nih ti ei hril a, hitaka Kuki-Zomi-Hmar anthawk hin inphat nawng kan tih ei ti sa bawk. Sienkhawm, hnam Inpui pawl 12 laia 11 in “Kuki-Zo” thaw dinga mithi vui ‘appeal’ insiem ani si chun a hel zawngin ṭhang nawng kan tih ti khan ei fe pui ti thu chau anih. “Kuki-Zo” chungchang thu hi “mithi vui hnunga hril nawn niraw seh” ti ani a, kha huna khan Hmar in appeal letter suoi a kei naw lei a buoi na umthei ding veng na leh HMAR chun unity a ngir pui tlat ti hi hnam tinin hre raw hai se um anta, buoina hran hran a suok thei ding ani lei khan khanga lungril lien insuo a “appeal” dinga sui ei kei ringawt ana. Hmar Inpui press release hai khawm en unla, Kuki-Zo ei pawm naw chu hmu el in tih. Ieng le khaw leh, ei ngirsan “Kuki-Zomi-Hmar” hi a bo chuong nawh, ei compromise nawh.
DT: A umzie tak nia inlang chu eini Hmar hnamhai hi pawl pakhat chauin ei insuikhawma, a ṭhat hle lai zingin ei unau Kuki le Zomi hai chu anni sunga hnam umhai khan Inpui hran seng nei nawkin ei renga Kuki-Zomi-Hmar hnamhaiin common platform indin ani phat eini Hmar nauhai hin lobbying power ei nei bek nawh ni hin anlang a. Ei rawl a hrat theina dingin tlawma inthleng met khawm hi a ṭha el naw mani?
RH: Aw, ani ngei. Hi hi ei in-awkna lai tak ana, iengkim hi fixed ani nawh a, a ṭul ani chun possibilities chi hran hran khawm explore thei anih. Amiruokchu, keiin ka ngai pawimaw lem chu pakhat chau ni inlang khawm, “Key player/Decision maker” ni tum lem ding hi anih khawlai a khawm. Ei tam am, ei tlawm am, deciding factor ei ni hin chu ei thu an awi nawk a ngai tho hlak tawk naw hin hun tamlem a hin anlang hlak a.
DT: Annawleh, entirna dingin Hmar ṭawng, Hmar common language ei ti khawsak ṭawng chau ni lo, ṭawng chi hran hran a pahnam/hnam bika nei ei na - ṭhiek, Biete, Hrangkhawl, Leiri, Sakachep, Chorei, Chiru, Faihriem, Zote, Darlong, Ranglong, Lamkang, etc ti hai. Puon chungchang a khawm hin Hmar hnam pumhuopa hnampuon ei nei lai zingin a pahnam/hnam ang zawnga puon nei khawm tamtak ei um a, hnam dan le dun, Kut/Ruoi, nunphung le zierang ti hai chen khawm a hran hran nei ei ni tawl a. Hieng thil hai popo hi Hmar inawpdan in a keng naw leia nina insukbing a Hmar anthawk peng suok nek chun Hmar umbrella hnuoiah muong le zalen taka leng thei ani na dingin Hmar Inpui hin hieng neka inclusive dan ding dam hi lampui alo biechieng ta hlak am? Annawleh Assembly a pass in “hieng pahnam hai, ṭawng hai, puon hai, lam hai, etc hai” hi Hmar Inpuiin Hmar-a a pawm anih ti dam lo insuo sien la, iem ngaidan I nei a?
RH: Lo ngaituo ta hlak ngei e. Anachu hieng hai hi Inpui a affiliated member Literature society hai mawphurna ana ṭawng le literature chungchangah. Puon chungchang a hin humhalna sin thawtu ding hai chu Art and Culture hai annih. Affiliated member tin hin an Department thaw ding sin hi zawng seng hai sien, Hmar Inpui hi a khaikhawmtu ani leiin regular deuin an hmalakna update/report hai hi hung pe hlak hai sien la chu hi nek hin ei hrat zuol ding. ṭawng chungchang dam hi Literature society in MIL amanih ei lekhabu a hai pahnam ṭawng hai hi hmang in pawm sien, Literature society hi Hmar Inpui organ tho ani leiin Literature society ti ti chu Hmar Inpui pawm ve ani el. Hmar Inpui Region bik khawma a buoipui theia hieng pahnam ṭawng ti hai vel hi, entirnan, ṭhiek ṭawng chu Assam Hills Region in a bawzui thei.
DT: Zuk hril mei mei inla, “Kuki hnam hai inrel dan hi restructure ni raw se, Kuki Inpi hi Naga hai anga complete representation umna dingin federal structure hi hmang ta lem ni raw se” tiin proposal siem ani a. Hi proposal a hin eini Hmar hnam hai, Lusei, Ralte, Maring, Gangte, Zomi tribes le a dang dang hai, Manipur ST list a Naga nilo phawt hai hi Kuki Inpi thlazar sunga mi huomlut antum vawnga. Chulai zingin Kuki ṭawng hmang bik hai lai Doungel Inpi, Khongsai Inpi, Haokip People’s Council, Chonghang Union, Hangmi Union, etc hai lo um tawl ta reng hai hi Kuki Inpi restructure ani vei vei chun recognised ST hai le ngirhmun inang, chan inang annei hmel a. Kuki Inpi khawl cheltu chu anni tho ding hi an ni hmel a. Khingtieng hang thlirin ei unau Zomi hai khawmin hi formula hi Zomi Council ah an hmangmek bawk a –PTC, VPC, STC, UZO, GTC, K*M, MTC, STU le TTO, hnam pakuo insuikhawma Zomi Council hi indin anih a. Hieng lei taka nomenclature a an insal thei ana. I hril ta ang khan entity pathum ei na, Hmar le Kuki le Zomi, chun, thlirdan chun nomenclature ni dinga ei unauhaiin an criteria hmanghai tak hi eini Hmar hnam hai khawma ei khawtlang inawp dan le pawl indin hai hi tlawma thlengin ei ni thei ve nghalin anlang a. Annaw chun Kuki in amanih, Kuki-Zo in amanih, nina ei pawm nuom loin ami dawl tum pei ding ana, mani le mani identity assert naw chun. Hi ang deu hin Hmar khawm hi eini sunga hnam/pahnam um ang zawngin in restructure dan a um ding am?
RH: Tutaka ei Hmar Inpui structure um dan tak chu ei ram delna bik hai hi Regiona inṭhe ei na – Tuiṭhaphai, Hmarbiel, Vangai, Jiribam, Imphal, Barak Valley, Assam Hills, Mizoram le Meghalaya. Chun, Metro city/khawpui hai hi Welfare tia pawl indin a ni bawk a – Delhi, Guwahati, Shillong, Kolkata, Mumbai, Chennai, Bangalore, Tripura, etc. Hi Region le Welfare hai popo hi Hmar Inpui units diktak an na, hnam level a khawlai khawm Hmar hai represent thei tu. Hieng khel a hin Hmar Inpui a hin affiliated organisations pariet an um sa bawka, chuong hai chu – Hmar Student’s Association, Hmar Youth Association, Hmar Women’s Association, Hmar Literature Society, Hmar National Union, Hmar Artists Association, Hmar Arts and Culture Society le Hmar Christians Leader Forum, an GHQ hai seng. Hieng organisation pariet hai hi anni sungah Branch, Unit, Joint Headquarters, Region ti damin an inṭhe nawk a. Tu hrie a ding hin chu eini Hmar organisation reng reng hin hieng federal structure (as ṭhiek, Darngawn, Zote, Faihriem, Biete, Hrangkhawl, Chiru, Leiri, Darlong, Changsan, Aimol, etc under Hmar) hi ala fepui ngai nawh a, idea chu ṭha tak a nih. Anachu Hmar ang zawng tawpa ei fe khawma a sunga defined structure, components le proper channel a um ve vawng leiin chuonga ei duoi na bek bek a um nawh a, in thil hung suggest chu Inpui level le Hmar mipui khawma lo ngaituo ve chi chu a nih.
DT: Tuta Hmar nomenclature issue hi la zuk chei met inla. Hnamdang chun an nomenclature ah hnam pasari am pakuo am sawmhni pahni am sawmruk pathum am, anhril chat chat thei a. Hmar Inpui danbu ah Hmar anga a tiem chu Manmasi thla/Hmarhai ti ringawt a ni a, a zuk specify kher nawh a Hmar sunga hnam/pahnam umzat. Hi hi sukfel vat chi ani naw ding maw? Hmuntin ramtin a hin eini Hmar hnamhai hin identity crisis ei nei hin an langa. Tulaia Hmar khawvela hnam lekhabu sut thar tak nia hriet HSA Delhi JHQ lo buotsai Unquiet State a lem hin chu Hmar hnam hi 59 zet suisuok a ni a, hi kher ani naw khawma hiengang hnam lekhabu pakhat tak ziek hi ei Inpuiin hrietpuina annawleh namdetna dam mi thawpek thei a ti’m?
RH: Hihi thu hi chu Inpuiah “Kan hmalaknaa hi zat pahnamhai hai hi hmusuok ani a, pawmpuina in mi siem pek thei di’m?” ti ang lekha in hung pek lut thei a, proper channel hung hraw in. Inpuiin a ṭul angin hma lo la el a tih.
DT: Tu el a hril ang khan Manipur hi Hmarhai tamna tak ei ti leiin Hmar Inpui region hi (Imphal ṭhangsa in) panga a um hrima, Mizoram khawm saw Hmar mi tamtak an um ruol ruolin region pakhat chauva a operate sawh a neka nasa nawk zuol a hma ei lak theina dingin, Hmar Inpuiin grassroot level pe*******on anei theine dingin pakhat neka tam dam a Hmar Inpui region hi Mizoramah umsien a ṭha hmel am?
RH: Hihi thu hi region haiin an cover hne le hnenaw thu ani a. Entirna’n Imphal region hi a ramri chu Imphal anthawk Mao, Moreh anthawk Tamenglong hai ana, lien a lien el a nih. Imphal region hai hin Assembly a khawm Imphal ah kan um ta si nawh, in mi suk bo ding am ani ti agenda an hung thelut a. Imphal a umtanaw inla khawm, Moreh, Vanchengphai le a dang dang a hin Hmar nau a um an la tam leiin, tiin ei suktawp pek naw a nih. Chuleichun, Hmar Inpui Mizoramregion khawm hi mamaw le ṭulna izir peia ṭhe nawi thei chu a nih.
DT: K*mkhat lai khan YouTube tienga Hmar Inpui ṭhuoitu hai dam interview an lo neina-ah, Manipur a Hmar population hi singruk chunga Inpuiin a record kha k*m sawl bawr vel liem ta ding ana. K*m sawm dan peia India Intiempui um hlak hi Coronavirus le Inkharkhipna leiin 2021 census hlak hi lak ala ninaw zing bawk a. Tuhrie hin iengza vel am ei population hi ning a ti aw? Tuta Manipur bik le a renga belkhawmin.
RH: Estimate chu awl taka pek thei anih a, Manipur ah Hmarnau a nuoitel ei um chu a chieng hle. Amiruokchu, a zat chie hriet dingin data hi ei zuk kawl el nawh. Inpui ah hienghin ei suggest a Inpui Registration Funddawl dan ding “Intinah Rs. 100, lukipa Rs. 10”. Hmar nauhai iengzat chie am ei umzat hriettheina dinga hi hi suggestion pek ana. Sienkhawm buoiin a hung nang ta leiin iengkhawm ei sunzawm theinaw hrie. Hmar hi iengzat am ei um chie a tihi a hriet harsa deu el a nih, Hmar hming ni lo, hnamdang hming put khawm hi tamtak ei um lei hin. Awlsam taka thawdan khawm a um a, chu chu mani hming khel ah “HMAR” bel hi anih, ei hming ah HMAR bel vawng inla chu Hmarnau iengzat chie am ei um ti hi hriet awlsam ngawt atih. Chu chu Hmar mipui kuoma kan fui nuom pakhat chu a ni, in hming khelah Hmar zieksa seng ro. Chun, sawrkar census data hai hi ringtlak ani nawh. Iem a san? ei ti chun, census lak ding phat Meitei sawrkarin BLO hai kuomah hieng number zat chen census file ah in thunlut thei, a neka tam mihriem in fe na khuo ah an um chun file kha inkhup/khar ro tiin thu a pek sa vawng ana. Hi lei hin Manipur sawrkarin eini tribal hai laia census a conduct hi a fair nawh a, kim khawm a kim ngai naw bawk a nih. Tribal hai hin census le inzawm hin discrimination nasatak ei tuok a nih. Hill area ah true/reality census counting hi thaw ala ni ngai ṭhak nawh, anthaw sun chu a hmalaia Senapati tienga abnormal population growth ti hiel kukha indiktaka Mao le Poumai hnam haiin census laktuhai kha an village volunteer haiin anzui sa vawnga, mi tukhawm ziek lut ṭhel an um naw na dingin. Eini Hmar area tieng hienga thawpui hi ei umnaw lei hin ei population hi census a hin a tlawm bek bek el a nih, Manipur a ringawt khawm nuoi hni phak vang el naw mani reality census hang nei thei ve inla chu. Hmar mipui lai Census le Vote chungchang Awareness/Sensitazation program hai hi hmang pui ding a ni, vote nei lo a sangtel ei um anih Manipur a ringawt khawm hin. Census le Vote basis hin sawrkar hin iengkim hi a siem hlak si a, Delimitation nisien, Subdivision/District thar siem ti hai dam hi. Tripura ah iengzat am ei um, Meghalaya ah iengzam ti hai dam hi Hmar Inpui fund kha hang implement inla chu Chieng deuin hril thei ni nghal a tih. Mizoram a lem chu Hmar population hi 54% zet annawm tiin Mizoram mi pawimaw hai kuom a khawm ei lo hril ta hlak hrim anih, amiruokchu mani ṭawng le culture ngaihlu hi ei tlawm taluo lei hin movement ei nei hai hi duthusam angin a hrat phak ngai nawh.
DT: Hmar Inpui le Hmar mipui hi kar a um nasa khawpel a, Inpui hmalakna ṭhenkhathai dam, thupuong ti vel, hnam hmakhuo ngaituo a inhriettirna siem hai dam hi mipuiin an hriet phak bek bek naw niin an lang a. Hihi kar um hi iengtin takin am suk bo thei ning a ta?
RH: Inpui hmalakna hrie nuom hai chun Inpui Executive hai direct in indawnna hai siem thei ani zing anih. Letterhead a hai contact details, phone number le a dang dang hai a um vawng leiin. Ieng amanih hrilfiena an mamaw ani khawma lo pe dingin kan inpei zing.
DT: Hmun hran hrana Hmar pi-pu sulhnung tamtak hai, Lalruong a sulhnung, Sikpui Lung hai, Sura sulhnung hai le a dang dang humhalna/suklarna ding hin Hmar Inpui in iengtinam hma a lak pei a?
RH: Hieng ang hi chu sulhnu umna Region hai pei hmalaknaa innghat a nih. Entirna in Lungthuliena Lungthu pathumhai a chung inkhumna khu a region hai hmalakna anih. Chuongang char chun, Champhai le a sevel le Mizoram pumpui a Hmar pi-puhai sulhnung humhimtu ding chu Hmar Inpui, Mizoram Region hai an nih. HI GHQ ṭhangpuina an ṭul chun ṭhangpui dingin ei inpei zing anih. Regionhai mawphurna angdeua ei sie a nih.
DT: Ani leh Pu, Assam hnuoia Hmarram hi hang en inla, NC Hills District bifurcation chungchanga hin eini Hmarhai khawm District iemaniah majority ei ni theina ani ve leiin ei bifurcation hi ei hmaṭhatna ding ni thei a ti? Chu el khelah ADC ei hmu sa thei lem chun double benefit ei hmu thei lem el naw di’m anih?
RH: Bifurcation hin Hmar demand kha a sukbuoi di’m, hi chungchang a hin chu vawikhat consultation la um thei sienla ṭha’ng a tih. IPF, ISF, IWF, HPC(D), HI AHR, HSA, HYA, HWA le HPU ṭhangsa in ei tadingin iem a ṭhatak ti la ngaituo ṭha’ng a tih. Consultation pangngai mei mei niloin, thiltum le rasuok nei ngei dinga chipchier taka hriltlangna ei la nei a ṭul. Asanchu, ringlo ang zawng tak khawma Assam rama Hmar Autonomous District Council (Core+Satellite area) ei ngen dam hi district bifurcation dam hin effect alo nei pal el rawi mawh ti dam hi ngun taka la ngaituo khawm a ngai, Hmar ST(Plains) recognition demand hai chen khawm iengtin tin amanih a affect el thei leiin.
DT: Ani le, Jiribam chungchanga hin hril thei ei nei am bau khat bau hni bek?
RH: Jiribam hi a hmun le hlutzie en chun Moreh dawttu ang hiel a nih. Hnam dang danghai tadinga hmun hlu a ni, commercial hub ani ve a, chakhai lakna dinga hmun pawimaw tak a nih. Jiribam a hin Hmar ei uma, Kuki leh, Zomi, Meitei, Mussalman, Khasi le Rongmei chen ei um a, strategic point hlutak a nih. Eini Hmar nauhai tading lem chun Vangai kaina, Hmarbiel fe tlangna tak ani leiin hmun hlutakel ani a, chuongang bawk chun hnamdang danghai tading khawma strategic point a ni ve a nih. Jiribam khu tu ta khawm ani bik nawh, amiruokchu ngaituo um tak el anih, asanchu area wise angin tribal land khu 70% vel ana, population ang ruok chun chu tribal hai hi minority ei ni nawk. Ei tribal land hai hi gradually in an mi lak pek pei bawk. Eini Hmarhai chu minority laia majority ei nih. Chun, nakie tieng Sugnu Agreement/Moreh Agreement hai hmatuok ang hin Jiribam a khun tuok ve pal ei tih inlau a um.
DT: Indigenous Tribes Advocacy Committee (ITAC) – Pherzawl & Jiribam districts chungchang hi imi hrilzau pek dim, iengti chie a Hmar Inpui le inlaichinna nei am ana, iem a pieng nasan tak?
RH: ITAC a formation le intention hi ṭha tak el a nih. An thiltum a ṭha hle; tuta ei Movement a hin Pherzawl le Jiribam District hai hi unrepresented angin a um lei a ITAC hi hung pieng anih, mipui rawl kheksuok pui tu ding. ITLF in Churachandpura enkai a, COTU in Kangpokpi, HTC in Tengnoupal/ Moreh- Pherzawl le Jiribam a hin a umnaw ti leia ITAC hi a hung suok a nia, a District venghimna sin a thaw hi a ṭha a nih. ITAC a hin Hmar Inpui Region hai chau ṭhang loin unau Kuki le Zomi tieng khawm an hung ṭhang ve lei hin mipuiin lungruol taka an pawmtlang Kuki-Zomi-Hmar hi an fe pui bawk a ni, hmundang a hai chu Kuki/Kuki-Zo ringawtin an fepui a Hmar ri a um phak ta nawh. Amiruokchu ITAC hin chu entity pathum – Hmar, le Kuki le Zomi a fe pui vawng leiin ei rengin ITAC hin ami huom kim vawng.
DT: Tulai ei movement le inzawm hin, UT hi lo hei hmu ta inla Tuiṭhaphai Hmarnauhai hin hmaṭhatna ieng chie am ei chang phak ring a um a? Pherzawl chun chanṭha a changsa ti kha chu a chiengsa ana, Jiribam hi hril a harsa met bawk. Tuiṭhaphai chungchang tak hi mipuiin an hrietnuom khawpel a, iengtinam hi issue hi mi address pek thei ita?
RH: Chuonghai hma chun ka mimal ngaidan hei hril ka tih – ei kohran headquarter hai hi Tuiṭhaphai maksanin Hmarbielah insawn vawng thei hai sien ka nuom- Senvon dam Lunthulien dam, Parbung dam Pherzawl, Patpiuihmun, Rovakawt, Sihpuikawn, Khangbor ti dam le ei hmar khuo dang dang rem chang anti na hmun, HMAR KHUO NGEI a hai ei kohran head quarter hai sawn ngei nisien. Hi hi ka ngaidan a nih. Tuiṭhaphaiah ei kohran headquarters hai ei sie a, building ropui tak tak ei bawl a. Geographic location infuk deu khawm hi a um hlaka, Tuithaphaia ei inbuor ringawt hin chu mi hai hnawtphak nawh a nih. Chu nek chun Tuiṭhaphai khawm ei ram ani lai zingin ei hmunpui ani thei nawh. Hmarbiel ah kirin insuk burip ei tiu, Hmarbiel anthawk Tuiṭhaphai hi hang enkawl lem ei tiu, Tuiṭhaphai chu Hmarram exclave angin a um thei. Hei buoi tak tak inla Hmarbiel chu Mizoram le inhnai ei nia, a khawpui ding tak chu Hmarbiel ani ding a nih. A mipuiin an rausan, in mumal hmu ding a um taluo, khu’ng hai khu zu hluobit lem ei tiu. Tuiṭhaphaia hin chu mi buoina kara um ei na, hi lai ei hmunpui popo a um hichu thil remchang lo anih. Hmarram popo hang thlir chun Tuiṭhaphai hichu thlierkar anih a, hilai anthawka rorel hichu thil awl ai ani nawh. Ka organisation ṭhangna lai popo ah Hmar Inpui hi ka lungril hluo rawn taktu a nih. Pherzawl Hmar district ei ti ei ti a chu a ramah ei um tak tak si naw chun hmangai thei tak tak dan a um nawh.
Lungngai bek bek na ding a um nawh, UT chungchang a hin Tuiṭhaphai Hmarnau hai khawma chan chu chang ve ngei tih. Amiruokchu, mani ṭawng ngeia district nei thei Hmar hnamhai hi, Pherzawl district ah ei hmunpui hai popo um thei lem inla chu kha besan khan Tuiṭhaphaia ei chan chang ding khawm alo tam lem el thei a. Hmar Inpui le ei chawipawl hai khawma tuta Manipur la ni mek anthawk eini Kuki-Zomi-Hmar haiin Union with Legislature ei hmu phat Hmarnau delna ram popo, Pherzawl, Tuiṭhaphai, Jiribam le a dang dang hai hi Hmarram bikin siem tum dingin hma la ngei atih, khawlai hmun khawm maksan bik nawng atih.
DT: A tawpna taka dingin Hmar Political roadmap/vision ei lo hril zawk a khan ei hmakhuo hih State-wise anga ei hung thlir a ngai tah a, ei priority nia inlang chu present administration hai besan a Hmar hminga autonomy iemani bek nawrdawk kha ana. Chu khel a chun Hmar Inpui hin a neka inril lem Hmar Political roadmap iem a nei a?
RH: Vawizan a ei hang hohlim hai popo hi Hmar political roadmap ti thei vawng ana. Hi lo khawm issue chi hran hran ala um sa a. Hmar political roadmap ding chu Hmar Inpui GHQ hin initiation hung thaw vat atih. Hmarin ei ram del chin, tuta Manipur, Mizoram, Tripura, Assam, Meghalaya, Nagaland le adang Hmarnau chengna hai hi inpawlkhawmna um sien, geographically chun integrated ei ni sa reng anih. Anachu socially, culturally, emotionally in ei la luongkhawm thei nawh a, under one administration a khawm ei la um naw bawk leiin, hiengang fe hi nuom a um ngawt el. Hmar meiser pakhat Inpuiin siemdawk thei sien- State ramri khelin collective standpoint nei thei inla. India ramri sunga um ei nina zarin Constitution sunga umhai bek provisions, articles, amendments hai hmangin ei insuikhawm theina dingin Hmar Inpui hin hma la thei sien nuom a um takzet. Hi taka hin State sunga ei issue hai, tekhina in tuta Manipura ei buina hai chen khawm ngaituo khawm thei inla.
DT: Lawm a um khawpel Pu Romeo Hmar leh Delhi Thurawn in inpawltlangna ei zuk nei thei hi. Thu iemani dam incha nuom dam imi am aw?
RH: Kei khawm ka lawm taluo a hienga Delhi Thurawn tieng anthawk ei Hmar issue le inzawma meeting in mi hung nei pui dam hi. Idea le ngaidan chi hran hran dam ei hei in exchange a. Ei rengin, inrawnkhawmna ei nei hi, tiemtu hai, Hmar mipuihai, ei hlawkpui ngei ka beisei. Thucha ti lem ah, Delhi Thurawn hi Delhi Hmar khawtlang laia chanchinbu pawimaw tak ana, hlawtlingna ei dawng hai, siet ei tuok hai chen ei hriet pha na hlak ana. Chuleichun, Sunday zata issue hai hi compile in k*m khat sung pei ami Booklet angin siem unla chu a ṭha hle naw dim a nih, hun dang peia khawm rawn thei a ni pein a dingin. Delhi ah ka hung nawk phat le khawm inrawntuo dingin in inhman phawt chun keikhawmin inrawntuo zing ei tiu.
DT: Kei ni khawm kan lawm ie.
