31/12/2020
Before the year ends Vaikom Madhu trying to finish reading Byline..... Second pic... Madhu flanked by two renowned sports journalists... Cris Thomas and KNR Nampboodiry, editor of Janmabhoomi.. they have contributed to Byline... story on VKB and Victor George respectively
Adding also a write up...joint contribution of Cris & KNR... enjoy reading... enjoy 2021... happy New year...
മധുസാർ ഹാപ്പിയാണ്
ഒരു സത്യം പറയട്ടേ? വൈക്കം മധു സാറിനെ കണ്ടാൽ ഒരു പോലീസ് ഓഫീസറുടെ ലുക്കുണ്ട്. കട്ടി മീശയും താഴ്ന്നിറങ്ങിയ കൃതാവും എടുത്തുപിടിച്ചുള്ള നിൽപ്പും ചേരും . തലയ്ക്കു പിന്നിൽ ആടിക്കളിക്കുന്ന നീളൻ മുടിക്ക് ഇക്കാര്യത്തിൽ പ്രത്യേകിച്ച് റോളൊന്നുമില്ല. അച്ചടക്കമുള്ള ഒരു രോമംപോലും ഇതിൽ ഒരു കൂട്ടത്തിലുമില്ലെന്നത് വേറെകാര്യം. ആകപ്പാടെ ഗൗരവത്തിൽ കുളിപ്പിച്ചെടുത്ത ഒരു ചന്തം. കാച്ചാംകുറിച്ചി കേശവൻ നെറ്റിപ്പട്ടം കെട്ടാതെ നിൽക്കുന്നത് പോലെ.
നല്ല തെളിനീര് കിട്ടണമെങ്കിൽ പാറ തുരന്നു അടിയിലെ വിടവുകളിലേയ്ക്ക് ചെല്ലണമെന്നാണ് പറഞ്ഞു കേട്ടിട്ടുള്ളത്. കാഴ്ച്ചയിലെ ഗൗരവക്കാരനായ മധു സാറിന്റെ മനസിലെ തെളിമ കാണാൻ അത്രയൊന്നും ബുദ്ധിമുട്ടില്ല. ഒരുമിച്ചിരുന്ന് അൽപനേരം സംസാരിച്ചാൽ മതി. ആദ്യം കാണുന്നവർക്ക്പോലും പെട്ടെന്ന് തന്നെ ലൈൻ ത്രൂ ആകും.
അതിനൊരുങ്ങിയാണ് ക്രിസ് തോമസും ഞാനും എത്തിയത്.
കോട്ടയം ചാലുകുന്നിലെ ബേക്കർ മോഡൽ വീടിന്റെ സ്വീകരണമുറി സജീവമായി.
വയസ്സ് ഏറിയാലും പ്രായം കൂടാത്ത ചിലരുണ്ടല്ലോ. അക്കൂട്ടത്തിലാണ് മധുസാർ. ഏതു പ്രായക്കാരോടൊപ്പവും കൂടും.
മനോരമ വിട്ടിട്ട് പതിറ്റാണ്ടു കഴിഞ്ഞെങ്കിലൂം എഴുത്തിന്റെ അസ്ക്യത കൈവിട്ടിട്ടില്ല. ഏതാനും ഓൺലൈൻ മാധ്യമങ്ങളിലൂം പുസ്തകരചനയിലും സജീവം. പൂർണ വിരാമമിടാത്ത ആ എഴുത്തിന്റെ യാത്ര ഇപ്പോൾ പൂർണ്ണവിരാമം അടക്കമുള്ള ഭാഷാ ചിഹ്നങ്ങളെക്കുറിച്ചുള്ള പുസ്തകരചനയിലാണ്. മൗനത്തിന്റെ അർദ്ധം തേടിയുള്ള യാത്രപോലെ ദുഷ്കരമായിരിക്കുമല്ലോ ചിഹ്നങ്ങളുടെ അർഥതലങ്ങളിലേക്കുള്ള യാത്രയും . മധുസാർ അങ്ങനെയൊരു പാത തെരഞ്ഞെടുത്തതിൽ അദ്ഭുതമൊന്നുമില്ല. എന്നും വ്യത്യസ്ത പാതതേടുന്നയാളാണല്ലോ. ബേക്കർ വീടുകൾ കോട്ടയത്ത് കാര്യമായി കടന്നു വരുന്നതിനു മുൻപാണ് സാർ അത്തരമൊരു പരീക്ഷണത്തിന് തുനിഞ്ഞത്. അതും സ്വന്തം മേല്നോട്ടത്തിൽത്തന്നെ. ചെത്തിത്തേയ്ക്കാതെ ചുടുകട്ടകൊണ്ടു പണിത മതിലും വീടും സുഖകരം.
കർക്കടക മാസത്തിലെ രാമായണ പരമ്പരയിൽ, രാമന്റെ വനയാത്രയെ രക്തരഹിത കൊട്ടാര വിപ്ലവമായി സാർ ചിത്രീകരിച്ചത് കുറെ പ്രതിഷേധങ്ങൾക്കു വഴിവച്ചിരുന്നു. പക്ഷെ ചിന്തകളിലെ ആ വ്യത്യസ്ഥത അംഗീകരിക്കപ്പെടണമല്ലോ. റിട്ടയർമെന്റിനോട് അടുത്തപ്രായത്തിലും, ജൂനിയറായ ചിന്ന പയ്യന്മാരുടെ കമ്പനിയിൽപോലും സജീവമാകാനും അവർക്കൊപ്പം യാത്ര പോവാനും സാറിനു കഴിഞ്ഞതും ഈ വ്യത്യസ്ത കാഴ്ചപ്പാടുകൊണ്ടു തന്നെയാണ്. ഭാഷാപരമായ തെറ്റുകളോടും ശൈലീഭംഗങ്ങളോടും അസഹനീയതയോടെ പ്രതികരിക്കുന്ന മധുസാർ പുസ്തകത്തിന് തെരഞ്ഞെടുത്ത വിഷയം ഏതായാലും നന്നായി. അന്നദാന പ്രഭുവിന്റെ നാടായ വൈക്കം വിട്ട് , അക്ഷര നഗരമായ കോട്ടയത്തേയ്ക്കു സ്വയം പറിച്ച് നടാനിടയായത് ഈ അക്ഷര പ്രേമം മലയാളഭാഷ തിരിച്ചറിഞ്ഞതുകൊണ്ടു തന്നെയാവാം .
എഴുത്തിനൊപ്പം യാത്രകളും ഇഷ്ടപ്പെടുന്ന സാർ ഇന്ത്യ മുഴുവൻതന്നെ കറങ്ങിക്കഴിഞ്ഞു. യൂറോപ്പിലേക്ക് രണ്ടു ട്രിപ്പ് കഴിഞ്ഞു. ഇളയമകൻ ഗോപി ദുബായ് എമിറേറ്റ്സ് എയർലൈൻസിൽ ഉദ്യോഗസ്ഥനായതിനാൽ ആ കെയറോഫിലായിരുന്നു
രണ്ടാം യാത്ര. മൂത്തമകൻ ദിലീപ് സോണിയിൽ ഉദ്യോഗസ്ഥൻ. സർക്കാർ സർവീസിൽ നിന്നു പിരിഞ്ഞ ഭാര്യ .
മൊത്തത്തിൽ ഹാപ്പിയാണ് മധു സാർ . ഇനി യാത്രകൾ തുടരാം ; രചനകളിലൂടെയും രാജ്യങ്ങളിലൂടെയും .
*********
ശേഷ വിശേഷം:( ക്രിസ് തോമസ് വഹ )
മധുസാറിന്റെ പല അധിക പ്രസംഗങ്ങളിൽ എനിക്ക് ഏറ്റവും ഇഷ്ടം ആ ആലപ്പുഴ യാത്രയാണ്. ഷർട്ടിടാതെ, തോളിൽ ഒരു തോർത്തുമിട്ട് കോട്ടയത്തു നിന്നു ആലപ്പുഴ വരെ നടത്തിയ ബോട്ടുയാത്ര. കല്യാണ വീട്ടിൽ വന്നു കയറിയ മകനെ കണ്ടു മധുസാറിന്റെ അമ്മ തലയിൽ കൈവച്ചു പോയത്രെ. കൊമ്പൻ മീശയ്ക്കു താഴെ മധുസാറിന്റെ ചിരിയോർത്തു ഞങ്ങൾ ഏറെ ചിരിച്ചിട്ടുണ്ട്.
വൈക്കം വഴിയുള്ള യാത്രക്കിടയിലാവണം കണ്ട ഒരു കടയുടെ പേര് - 'ഞെട്ടിക്കൽസ്'. മിക്കവാറും മധു സാറാവണം തലതൊട്ടപ്പൻ.
https://olivepublications.in/product/byline/