Platform ASSAM (2025)

16/07/2025

📌বৰপেটাত বি এল অ' আৰু বি এল অ' চুপাৰভাইচৰৰ সকলৰ প্ৰশিক্ষণ শিবিৰ সম্পন্ন
------------------------------------–------
▪️ভোটাৰ তালিকা সংশোধন অভিযান, ২০২৫-ৰ প্ৰসঙ্গত আজি বৰপেটা জিলাৰ সকলো বিধানসভা সমষ্টিত বি এল অ' আৰু বি এল অ' চুপাৰভাইচৰ সকলৰ বাবে এক বিশেষ প্ৰশিক্ষণ শিবিৰ অনুষ্ঠিত হয়। এই শিবিৰত মুঠ ১০৯৪ গৰাকী বি এল অ' আৰু ১০৩ গৰাকী বি এল অ' চুপাৰভাইচৰ-এ অংশগ্ৰহণ কৰে।
প্ৰশিক্ষণ শিবিৰত ভোটাৰ তালিকা সংশোধনৰ সকলো দিশ, BLO App-ৰ সঠিক ব্যৱহাৰ, গ্ৰহণযোগ্য আৰু অগ্ৰহণযোগ্য নথিপত্ৰ চিনাক্তকৰণ, ই-EPIC, ডুপ্লিকেট নাম হ্ৰাস, আৰু বুথ পৰ্যায়ত তথ্য সংগ্ৰহ আদিৰ বিষয়ে বিস্তৃতভাৱে আলোচনা কৰা হয়। শিবিৰসমূহত ADC (Education)অতিৰিক্ত জিলা আয়ুক্ত(শিক্ষা)মৌচুমী চেতিয়াৰ উপৰি নিৰ্বাচন কাৰ্যালয়ৰ বিষয়া-ববীয়াই অংশগ্ৰহণ কৰে। অতিৰিক্ত জিলা আয়ুক্ত(শিক্ষা) মৌচুমী চেতিয়াই কয় যে, ভোটাৰ তালিকা অধিক নিখুঁত, নিৰ্ভুল আৰু সকলো যোগ্য নাগৰিকক অন্তর্ভুক্ত কৰাৰ লক্ষ্যৰে এই প্ৰশিক্ষণসমূহ আয়োজন কৰা হৈছে। বিশেষকৈ নতুন বি এল অ' সকলক সঠিক দিশ-নিৰ্দেশনা প্ৰদান কৰি এই শিবিৰসমূহে তেওঁলোকক কাৰ্যক্ষম আৰু দায়িত্বশীল হিচাপে গঢ়ি তোলাৰ উদ্দেশ্যে গ্ৰহণ কৰা হৈছে বুলি তেওঁ আশা প্ৰকাশ কৰে।

15/07/2025

📌বৰপেটাত গ্ৰীষ্মকালীন বেডমিণ্টন শিবিৰ ২০২৫
--------------–-----------------------------
▪️বৰপেটা জিলা বেডমিণ্টন এচোচিয়েশ্যনৰ উদ্যোগত কাইলৈৰ পৰা ২২ জুলাইলৈ গান্ধীনগৰ ইনড’ৰ ফেচিলিটিত বেডমিণ্টনৰ এটি গ্ৰীষ্মকালীন শিবিৰ ২০২৫ অনুষ্ঠিত হ'ব। বিয়লি তিনি বজাত অনুষ্ঠিত হ'বলগীয়া গ্ৰীষ্মকালীন শিবিৰটিৰ জৰিয়তে সমগ্ৰ জিলাখনৰ উদীয়মান বেডমিণ্টন প্ৰতিভাক প্ৰশিক্ষণ প্ৰদানৰ লগতে অনুপ্ৰাণিত কৰাৰ প্ৰয়াস কৰা হৈছে বুলি জিলা বেডমিণ্টন সন্থা বৰপেটাৰ সভাপতি অনিল কুমাৰ দাস আৰু সাধাৰণ সম্পাদক হিল্লোল জ্যোতি তালুকদাৰে জনাইছে। এই শিৱিৰত ৯ ৰ পৰা ১৯ বছৰৰ ভিতৰৰ বয়সৰ ল'ৰা ছোৱালীয়ে ভাগ ল'ব পাৰিব । শিৱিৰত অংশগ্ৰহণ কৰিবলৈ ইচ্ছুক খেলুৱৈ সকলে ৮৪৭৪০৭৭৭৯২ আৰু ৮১৩৩৯৯০০৩৮ এই ফোন নম্বৰৰ যি কোনো এটা নম্বৰত আয়োজক সকলৰ স'তে যোগাযোগ কৰিব পাৰিব।

10/07/2025

📌বৰপেটা জিলাত “ডায়েৰিয়া নিৰ্মূল” অভিযান আৰম্ভ
--–------------------------------------------
▪️জিলা স্বাস্থ্য সমিতি, বৰপেটাৰ উদ্যোগত অতিৰিক্ত জিলা উপায়ুক্ত (স্বাস্থ্য) গীতাশ্ৰী লাচিতৰ উপস্থিতিত আজি জিলা পৰ্যায়ৰ উদ্বোধনী অনুষ্ঠানৰ জৰিয়তে ডায়েৰিয়া নিৰ্মূল অভিযান ২০২৫ শীৰ্ষক এক অভিযান আনুষ্ঠানিকভাৱে আৰম্ভ কৰা হয়। উল্লেখ্য, আগষ্ট মাহ পৰ্যন্ত চলিবলগীয়া এই অভিযানৰ লক্ষ্য হৈছে কেন্দ্ৰীভূত হস্তক্ষেপ আৰু সমুদাযয়িক সজাগতাৰ জৰিয়তে ডায়েৰিয়াৰ ফলত হোৱা শিশুৰ মৃত্যু সংখ্যা শূণ্য কৰি তোলা।
আজি এই অভিযান মুকলি কৰি প্ৰদান কৰা ভাষণত অতিৰিক্ত জিলা উপায়ুক্ত লাচিতে কয় যে এই অভিযানে ১ ৰ পৰা ৫ বছৰ বয়সৰ শিশু থকা পৰিয়ালসমূহক লক্ষ্য কৰি হ’ব। এই অভিযানৰ অধীনতে আশা কৰ্মী (স্বীকৃতিপ্ৰাপ্ত সামাজিক স্বাস্থ্য কৰ্মী)সকলে ঘৰে ঘৰে গৈ অ’ আৰ এছ পেকেট বিতৰণ কৰিব, ইয়াৰ সঠিক প্ৰস্তুতি প্ৰদৰ্শন কৰিব, আৰু পৰিষ্কাৰ-পৰিচ্ছন্নতা আৰু ডায়েৰিয়া প্ৰতিৰোধৰ ক্ষেত্ৰত সজাগতা সৃষ্টি কৰিব।
এই অভিযানৰ প্ৰধান শ্লোগান হিচাপে ৰখা হৈছে - “ডায়েৰিয়া কি ৰোকথাম, ছাফাই ঔৰ অ’আৰএছ সে ৰাখে আপনা ধ্যান”
(ডায়েৰিয়া প্ৰতিৰোধ কৰক – পৰিষ্কাৰ-পৰিচ্ছন্নতা আৰু অ’ আৰ এছৰ সৈতে যত্ন লওক)। এই পদক্ষেপে আন্তঃবিভাগীয় সহযোগিতাৰ ওপৰত গুৰুত্ব আৰোপ কৰিছে। শিক্ষা বিভাগে ছাত্ৰ-ছাত্ৰীৰ মাজত পৰিষ্কাৰ-পৰিচ্ছন্নতাৰ প্ৰসাৰৰ বাবে বিদ্যালয়ত হাত ধোৱাৰ বিভিন্ন পদ্ধতি প্ৰদৰ্শনৰ ব্যৱস্থা কৰিব। জনস্বাস্থ্য অভিযান্ত্ৰিক বিভাগে উচ্চ হাৰৰ বিপদজনক এলেকাবোৰত পানীৰ গুণাগুণ পৰীক্ষা কৰিব। ইয়াৰ উপৰিও আশাকৰ্মীৰ সৈতে কাম কৰি অংগনবাড়ী কৰ্মীসকলে (AWW) সকলো অংগনবাড়ী কেন্দ্ৰতে অৰেল ৰিহাইড্ৰেচন থেৰাপী (ORT) কৰ্ণাৰ স্থাপন কৰিব। উদ্বোধনী অনুষ্ঠানত বৰপেটাৰ স্বাস্থ্য সেৱাৰ যুটীয়া সঞ্চালক; জিলা প্ৰতিষেধক বিষয়া; বিদ্যালয়সমূহৰ উপ পৰিদৰ্শক; আৰু বিভিন্ন বিভাগৰ প্ৰতিনিধি উপস্থিত থাকে। স্মৰ্তব্য যে সৰু ল’ৰা-ছোৱালীৰ মৃত্যুৰ প্ৰধান কাৰণ হৈ থকা ডায়েৰিয়াৰ দৰে প্ৰতিৰোধযোগ্য ৰোগৰ ফলত শিশুৰ মৃত্যুৰ হাৰ হ্ৰাস কৰাৰ বাবে ৰাষ্ট্ৰীয় স্বাস্থ্য অভিযানৰ অধীনত চলি থকা এয়া এক বিস্তাৰিত প্ৰচেষ্টাৰ অংশ।

09/07/2025

📌বৰপেটা জিলা আদালতত ব্যাপক মধ্যস্থতা অভিযান আৰম্ভ
--------------------------------------------

▪️ভাৰতৰ উচ্চতম ন্যায়ালয়, ৰাষ্ট্ৰীয় আইন সেৱা প্ৰাধিকৰণ (নতুন দিল্লী), আৰু অসম ৰাজ্যিক আইন সেৱা প্ৰাধিকৰণ (গুৱাহাটী)ৰ নিৰ্দেশনা অনুসৰি জিলা আইন সেৱা প্ৰাধিকৰণ (ডি এল এছ এ), বৰপেটাৰ উদ্যোগত এক বিস্তাৰিত মধ্যস্থতা অভিযান আৰম্ভ কৰা হৈছে। এই পদক্ষেপৰ লক্ষ্য হৈছে বিকল্প বিবাদ নিষ্পত্তিৰ ব্যৱস্থাৰ জৰিয়তে বৰপেটাৰ জিলা আদালতত বিভিন্ন বিচাৰাধীন গোচৰসমূহ সমাধান কৰা।
"দেশ কে লিয়ে মধ্যস্থতা" শীৰ্ষক দেশজোৰা অভিযানৰ অংশ হিচাপে ২০২৫ চনৰ জুলাই মাহৰ পৰা ২০২৫ চনৰ ছেপ্টেম্বৰ মাহৰ ভিতৰত আদালতে পঞ্জীয়ন কৰা বিভিন্ন বিবাদ সংক্ৰান্তীয় ক্ষেত্ৰত মধ্যস্থতাৰ প্ৰচেষ্টা হাতত লোৱা হ'ব। বৰপেটা জিলা আৰু সত্ৰ ন্যায়াধীশৰ নতুন আদালত চৌহদত মধ্যস্থতাকাৰী কাৰ্য্যবিধিৰ কেন্দ্ৰীয় স্থান হিচাপে কাম কৰা হব।
এই অভিযানৰ সফলতা নিশ্চিত কৰাৰ বাবে আৰু জনসাধাৰণৰ সক্ৰিয় অংশগ্ৰহণক উৎসাহিত কৰিবলৈ জিলা আইন সেৱা প্ৰাধিকৰণে সমগ্ৰ বৰপেটা জিলাতে ব্যাপক প্ৰচাৰ আৰু জনসচেতনতা ব্যৱস্থাৰ বাবে অনুৰোধ জনাইছে। এই পদক্ষেপ সন্দৰ্ভত তথ্য প্ৰচাৰ, প্ৰবন্ধ প্ৰকাশ, আৰু প্ৰয়োজনীয় ঘোষণা কৰাৰ দায়িত্ব বৰপেটাৰ জিলা তথ্য আৰু জনসংযোগ কাৰ্যালয়ক অৰ্পণ কৰা হৈছে।
এই অভিযানে পৰম্পৰাগত বিচাৰ প্ৰক্ৰিয়াৰ বাহিৰত বিবাদসমূহ সৌহাৰ্দ্যপূৰ্ণভাৱে সমাধানত গুৰুত্ব আৰোপ কৰিছে, যাৰ ফলত গোচৰৰ বাকী থকা অৱস্থা হ্ৰাস পায় আৰু সকলোৰে বাবে সময়মতে ন্যায়ৰ সুবিধা লাভৰ দিশটো প্ৰসাৰিত হয়।
এই অভিযান সফল কৰি তোলাত সংশ্লিষ্ট সকলোৰে সহায়-সহযোগিতা কামনা কৰা হৈছে।

07/07/2025

📌বৰপেটাত বিহু কৰ্মশালাৰ সামৰণি অনুষ্ঠান
--------------------------------------------
▪️ ক'লা কৃষ্টি বিকাশ পৰিষদৰ উদ্যোগত আৰু খিলঞ্জীয়া সুৰক্ষা বাহিনী, অসমৰ বৰপেটা নগৰ সমিতিৰ সহযোগত বৰপেটাস্থ তুতিৰাম হাইস্কুলত যোৱা ১ জুলাইৰ পৰা ৭ জুলাইলৈ সাতদিনীয়াকৈ আয়োজন কৰা বিহু কৰ্মশালাৰ আজি সামৰণি অনুষ্ঠানটো আটকধুনীয়াকৈ অনুষ্ঠিত কৰা হয়। আবেলি ৩-৩০ বজাত অসম কবি সন্মিলনৰ সভাপতি দীনেশ চন্দ্ৰ দাস দেৱে বন্তি প্ৰজ্বলন কৰি শুভাৰম্ভ কৰা সামৰণি অনুষ্ঠানটোত মুখ্য অতিথি দীনেশ চন্দ্ৰ দাস দেৱে অসমীয়া জাতিৰ আয়ুস ৰেখা বিহুক মহিমামণ্ডিত কৰি ৰখাৰ ক্ষেত্ৰত সকলোৰে সহায় -সহযোগ আন্তৰিকতাৰে কামনা কৰে। আনগৰাকী বক্তা খিলঞ্জীয়া সুৰক্ষা বাহিনী, অসমৰ অধ্যক্ষ গোবিন্দ গায়নে কয় - বিহু হ'ল অসমৰ খিলঞ্জীয়া জনগোষ্ঠীৰ লোক সংস্কৃতিৰ মূল শিপা।বিহুক বিভিন্ন জনগোষ্ঠীৰ লোকসকলে বিভিন্ন নামাকৰণেৰে পালন কৰে। ক'লা কৃষ্টি বিকাশ পৰিষদৰ অধ্যক্ষ সুনীল দাসৰ দৰে দক্ষ প্ৰশিক্ষকৰ প্ৰশিক্ষণৰ জৰিয়তে নামনি অসমতো বিহু নৃত্য,গীতে জনপ্ৰিয়তা পাব‌ই বুলি আশা ব্যক্ত কৰে লগতে ক'লা কৃষ্টি বিকাশ পৰিষদৰ প্ৰতিটো পদক্ষেপত খিলঞ্জীয়া সুৰক্ষা বাহিনী, অসমে সহায় -সহযোগ আগবঢ়াই যাব বুলি প্ৰতিশ্ৰুতি প্ৰদান কৰে।আন এজন বক্তা কেওটকুছি ৰঙালী বিহু উদযাপন সমিতিৰ সম্পাদক তথা প্ৰাক্তন ছাত্ৰ নেতা ধনজিৎ দাসেও প্ৰশিক্ষাৰ্থী সকলক অভিনন্দন জনায়।সভাত অভিভাৱক চিত্তৰঞ্জন চৌধুৰী,ৰাতুল দাস আৰু খিলঞ্জীয়া সুৰক্ষা বাহিনী, অসমৰ বৰপেটা জিলা সমিতিৰ অধ্যক্ষ সত্যেন্দ্ৰনাথ দাস আৰু সচিব প্ৰধান লুইত প্ৰবাল দাসৰ লগতে বৰপেটা নগৰ সমিতিৰ উপাধ্যক্ষ পুৰুষোত্তম দাস উপস্থিত আছিল।

07/07/2025

📌বালিৰ অবৈধ সৰবৰাহ আৰু ব্যৱসায় বন্ধৰ দাবী বৰপেটা আছুৰ
----------------------------–---------------

▪️বৰপেটা জিলাত চলি থকা বালিৰ অবৈধ সৰবৰাহ আৰু ব্যৱসায় সন্দৰ্ভত কেইটামান গুৰুত্বপূৰ্ণ বিষয় সম্বলিত এখন স্মাৰক পত্ৰ আজি বৰপেটা আঞ্চলিক ছাত্ৰ সন্থাই বৰপেটাৰ জিলা আয়ুক্তৰ জৰিয়তে ৰাজ্যৰ বন মন্ত্ৰীলৈ বুলি প্ৰেৰণ কৰি বিষয় সন্দৰ্ভত বিহিত ব্যৱস্থা গ্রহণৰ দাবী জনাইছে। সন্থাই পত্ৰখনত উল্লেখ কৰিছে- "আমাৰ চৰজমিন অনুসন্ধানত এইটো স্পষ্টভাৱে প্রমাণিত হৈছে যে বৰপেটা জিলাত ডাম্পাৰ, ট্ৰেক্টৰসমূহে চৰকাৰী নীতি-নিয়মক ভৰিৰে মোহাৰি অবৈধভাৱে বালি সৰবৰাহ কৰি আহিছে। একাংশ ডাম্পাৰ, ট্ৰেক্টৰে চালানবিহীনভাৱে বালি সৰবৰাহ কৰাৰ তথ্য আমাৰ অনুসন্ধানত পোহৰলৈ আহিছে। আনহাতে অধিকাংশ ডাম্পাৰ, ট্ৰেক্টৰে অতিৰিক্ত বোজা (Overloading) কঢ়িয়াই বালি সৰবৰাহ কৰি থকাটোও আমাৰ অনুসন্ধানত ধৰা পৰিছে। এখন ডাম্পাৰে ২০ ছেঃমি পর্যন্ত অতিৰিক্ত বোজ (Overloading) কঢ়িওৱাৰ তথ্য-প্রমাণ পোৱা গৈছে। উপৰোক্ত তথ্যসমূহৰ দ্বাৰা বৰপেটা জিলাত বালিৰ অবৈধ সৰবৰাহ আৰু ব্যৱসায় অব্যাহত থকাটো স্পষ্টভারে প্রমাণিত হৈছে। প্রশ্ন হয়-বন বিভাগ আৰু পৰিবহণ বিভাগৰ দৰে দুটাকৈ বিয়াগোম বিভাগ থকাৰ পাছত কিদৰে জিলাখনত বালিৰ অবৈধ সৰবৰাহ আৰু ব্যৱসায় বর্তি থাকিব পাৰিছে? বালিৰ অবৈধ সৰবৰাহ আৰু ব্যৱসায়ৰ বিষয়ে বাৰম্বাৰ অৱগত কৰাৰ পাছতো স্থানীয় বন বিভাগ আৰু পৰিবহণ বিভাগে বিহিত ব্যৱস্থা গ্রহণ কৰিবলৈ আগবাঢ়ি নহাটোৱে গভীৰ ৰহস্যৰ সৃষ্টি কৰিছে। স্থানীয় বন বিভাগ আৰু পৰিবহণ বিভাগৰ লগত থকা গোপন বুজাবুজিৰ বাবেই জিলাখনত বালিৰ অবৈধ সৰবৰাহ আৰু ব্যৱসায় নির্বিবাদে চলি থাকিব পাৰিছে বুলি সন্দেহ কৰিবলৈ আমি বাধ্য হৈছো। সেয়েহে জিলাখনত বালিৰ অবৈধ সৰবৰাহ আৰু ব্যৱসায় বন্ধ কৰাৰ স্বাৰ্থত স্থানীয় বন বিভাগ আৰু পৰিবহণ বিভাগক সক্রিয়কৰণৰ ব্যৱস্থা কৰাৰ লগতে বালিৰ অবৈধ সৰবাৰহ আৰু ব্যৱসায়ৰ সৈতে জড়িত বন বিভাগ আৰু পৰিবহণ বিভাগৰ বিষয়া-কৰ্মচাৰীসকলৰ বিৰুদ্ধে বিহিত ব্যৱস্থা গ্রহণ কৰিবলৈ আপোনাৰ ওচৰত এই স্মাৰক-পত্ৰৰ জৰিয়তে দাবী উত্থাপন কৰিলো। অনথ্যা আমি ৰাইজৰ সহযোগত আন্দোলনৰ কাৰ্যসূচী গ্ৰহণ কৰিবলৈ বাধ্য হ'ম।" বৰপেটা আঞ্চলিক ছাত্র সন্থাৰ সভাপতি ধ্রুৱজিৎ দেউৰী আৰু সাধাৰণ সম্পাদক কৃষ্ণ শংকৰ পাঠক স্বাক্ষৰিত স্মাৰক পত্ৰখনৰ প্ৰতিলিপি ৰাজ্যৰ মুখ্যমন্ত্ৰী আৰু পৰিবহন মন্ত্ৰীলৈকেও প্ৰেৰণ কৰা হৈছে।

07/07/2025

📌বৰপেটাত বিশ্ব জুনচেছ দিবস পালন
--------------------–---------------------
▪️বৰপেটা আইন মহাবিদ্যালয় প্ৰেক্ষাগৃহত ৬জুলাইত বিশ্ব জুনচেছ দিবস উপলক্ষ্যে এখন সজাগতা সভা পশুধন হিতৈষী বটা প্ৰাপক গুণধৰ দাসৰ সভাপতিত্বত অনুষ্ঠিত হয়। সজাগতা সভা খন উদ্বোধন কৰে বৰপেটা জিলা পশুপালন আৰ পশু চিকিৎসা বিষয়া ডাঃ প্ৰবীণ দাসে । প্ৰতি বছৰে বৰপটা পশু চিকিৎসা ক্ষেত্ৰ সহায়ক সস্থাই দিৱসটি সজাগতাৰ দিন হিচাপে পালন কৰি অহাটো সঁচাকৈ প্ৰসংসনীয় বুলি কয়। বৰপেটা স্বাস্থ্য বিভাগৰ এচ ডি এম ডাঃ ভাস্কৰাচাৰ্য্য বেজে বাহক জনিত ৰোগৰ পৰা মানুহ কিদৰে সুৰক্ষিত হৈ থাকিব পাৰি এই বিষয়ে ভাষণ আগবঢ়াই। লগতে তেওঁ জাপানীজ এনকেফেলাইটিছ ৰোগৰ ভয়াবহতা সম্পর্কে বক্তব্য আগবঢ়াই। বিশিষ্ট পশু-চিকিৎসক ডাঃ ৰফিকুল ইছলাম আহমেদে জুনচেছ ৰোগৰ বিষয়ে বিস্তাৰিত ভাবে কয়। বিশেষকৈ জুনচেছ ৰ অন্তর্ভুক্ত বিপদজনক জলাতংক, কভিড-১৯, ব্ৰুচেলা, বাৰ্ড ফ্লু এনথ্ৰাক্সৰোগৰ ওপৰিও কিছু বিপদজনক ৰোগৰ বিষয়ে দৃশ্য-শ্ৰাব্যৰ মাধ্যম যোগে সভাত উপস্থাপন কৰে। সমল ব্যক্তি ডাঃ হীৰেন ডেকাই ভাষণত বৰপেটা পশু-চিকিৎসা ক্ষেত্ৰ সহায়ক সন্হাই মানুহ আৰু জীৱ জন্তৰ মাজত সংক্ৰমন হৈ থকা ৰোগৰ বিষয়ে ৰাইজৰ মাজত সজাগতা মূলক কাৰ্য্য সূচী গ্ৰহণ কৰা বাবে প্ৰশংসা কৰে। সভাত কেবাজনো বক্তাই বহুতো বিপদজনক ৰোগৰ সৈতে জৰিত ক্ষেত্ৰ সহায়ক সকলক বিপদসংকুল ভাট্টা প্ৰদান কৰিবলৈ চৰকাৰৰ ওচৰত দাবী জনায়।

03/07/2025

📌বৰপেটাত চৰকাৰী আঁচনিৰ পৰ্যালোচনা জিলা অভিভাৱক মন্ত্ৰী চন্দ্ৰমোহন পাটোৱাৰীৰ
-----------–---------------------------------

▪️অৰুণোদয় ৩.০ আৰু অন্যান্য মুখ্য কল্যাণমূলক আঁচনিৰ কাৰ্যব্যৱস্থা পৰ্যালোচনাৰ উদ্দেশ্যে বৰপেটাত আজি এখন জিলা পৰ্য্যায়ৰ বৈঠক অনুষ্ঠিত হয়। বৈঠকখনৰ অধ্যক্ষতা কৰে জিলাখনৰ অভিভাৱকৰ দায়িত্ববাহী মন্ত্ৰী চন্দ্ৰমোহন পাটোৱাৰীয়ে। বৈঠকত বিধায়ক, তেওঁলোকৰ প্ৰতিনিধি, জিলা আয়ুক্ত, জিলা পৰিষদৰ মুখ্য কাৰ্যবাহী বিষয়া, জিলা উন্নয়ন আয়ুক্ত (ডিডিচি), সহকাৰী আয়ুক্ত, বিডিঅ’ তথা বিভিন্ন বিভাগৰ বিষয়া আৰু ৰাজনৈতিক দলসমূহৰ প্ৰতিনিধিয়ে অংশগ্ৰহণ কৰে। মন্ত্ৰী পাটোৱাৰীয়ে সকলোবোৰ আঁচনিৰ সুফল উপভোক্তাসকললৈ সময়মতে আৰু সুচাৰুৰূপে প্ৰেৰণৰ ওপৰত গুৰুত্ব আৰোপ কৰে। তেওঁ মুখ্যমন্ত্ৰী মহিলা উদ্যোগিতা অভিযান আৰু আত্মনিৰ্ভৰ অসম অভিযান (CMAAA) আঁচনিৰ অগ্ৰগতিৰ ক্ষেত্ৰতো সবিশেষ আলোচনা কৰে আৰু এই আঁচনিৰ ব্যাপকতা বৃদ্ধিৰ লগতে সঠিক সমন্বয়ৰ প্ৰয়োজনীয়তা ব্যক্ত কৰে। মন্ত্ৰীগৰাকীয়ে সকলো বিধানসভা সমষ্টিৰ পৰা সমসংখ্যক উপভোক্তা নিৰ্বাচনৰ ওপৰতো গুৰুত্ব আৰোপ কৰে, যাতে আঁচনিসমূহৰ ন্যায়সংগত আবণ্টন নিশ্চিত হয়।

02/07/2025

📌বৰপেটাত ৪৩ সংখ্যক বৰপেটা জিলা দিৱস উদযাপন
----–--------------------------------–-------
🖋️প্লেটফৰ্ম বাৰ্তা
▪️চাওঁতে চাওঁতে জিলা ঘোঘিত হোৱাৰ বৰ্ষৰ পৰা আহি বৰপেটা জিলাই ৪৩ টা বছৰত ভৰি দিলে। সময় বাগৰিল যদিও উন্নয়নৰ দিশত ৰাজ্যৰ আন জিলাৰ তুলনাত বৰপেটা জিলাৰ ছবিখন এতিয়াও পুতৌলগা হৈয়ে ৰ'ল। এয়া ৰাজনৈতিক বঞ্চনা, ৰাজনেতাৰ সদিচ্ছাৰ অভাৱ নতুবা স্থানীয় নেতৃত্বৰ শাসকীয় মন্ত্ৰী তথা চৰকাৰৰ দৃষ্টিগোচৰত ব্যৰ্থতা যি বুলিয়েই কোৱা নহওঁক কিয় উন্নয়নৰ পশ্চাদমুখী ছবিখন স্পষ্ট। ইয়াৰ মাজতে ১ জুলাইত স্থানীয় জিলা পুথিভঁৰাল প্ৰেক্ষাগৃহত ৪৩ সংখ্যক বৰপেটা জিলা দিৱস উদযাপন কৰা হয় । এই উপলক্ষে ৰাতিপুৱাৰ ভাগত আৰম্ভণীৰ কাৰ্যসূচী অনুসৰি বৃক্ষ ৰোপণ আৰু জিলাৰ প্ৰতিষ্ঠাপক গৰাকীক শ্ৰদ্ধাঞ্জলি জ্ঞাপন কৰা হয়। আনহাতে বিয়লি ৪ বজাত অনুষ্ঠিত হয় আলোচনা চক্ৰ । স্থানীয় ৰাইজ তথা বিশিষ্ট ব্যক্তিৰ উপস্থিতিত অনুষ্ঠিত আলোচনা চক্ৰত বিশিষ্ট সাংবাদিক,সাহিত্যিক অক্ষয় কুমাৰ মিশ্ৰই অংশগ্ৰহণ কৰি নিজৰ ভাষণত বৰপেটা জিলাৰ বিভিন্ন বিষয়ৰ ওপৰত সাৰুৱা বক্তব্য দাঙি ধৰে । ভাষণ প্ৰসংগত তেওঁ বৰপেটা জিলা উন্নয়নৰ বাবে তেওঁ কেইবাটাও সু- পৰামৰ্শ আগবঢ়ায় । জিলা আয়ুক্ত ৰোহন কুমাৰ ঝা, প্ৰাক্তন বিধায়কদ্বয় ডাঃ তাৰা প্ৰসাদ দাস, গুণীন্দ্ৰ নাথ দাস, শিল্পী নকুল দাস, নাট্যকাৰ পৰিচালক চিন্ময় দাস, দবা প্ৰশিক্ষক চন্দন কুমাৰ দাস, শিল্পী কৌশিক দাস, চিত্ৰ শিল্পী নিৰ্জুৰাজ দাস, সংগীত শিল্পী তথা সুৰকাৰ হেমেন দাস, অমেন কুমাৰ বায়ন প্ৰমুখ্যে বিশিষ্ট ব্যক্তিৰে পৰিপূৰ্ণ সমাবেশত প্ৰাক্তন শিক্ষা পৰিদৰ্শক মনোৰঞ্জন কাকতি ৰচিত আৰু হেমেন দাস সুৰাৰোপিত সমবেত সংগীত পৰিবেশন, কলাংগন পৰিবেশ্য কলা প্ৰতিষ্ঠানৰ প্ৰশিক্ষাৰ্থী সকলৰ দ্বাৰা দৃষ্টি নন্দন নৃত্য আদিৰে বৰপেটা জিলা দিৱস উদযাপন কাৰ্যসূচীৰে পৰিবেশ জীপাল কৰি তোলে। অন্তিম কাৰ্যসূচী হিচাপে অসম নাট্য সন্মিলন, দক্ষিণ বৰপেটা শাখাৰ উদ্যোগত যুৱ অভিনেতা,পৰিচালক,নাট্যকাৰ সত্যেন দাসৰ দ্বাৰা ৰচিত আৰু পৰিচালিত চুটি নাট "সত্বা" মঞ্চস্থ কৰে,যিখন নাটে উপস্থিত দৰ্শকক গভীৰ ভাবে সাঁচ বহুৱাবলৈ সক্ষম হয় । ইফালে, জিলা আয়ুক্ত ৰোহন কুমাৰ ঝাই কাৰ্য বিধিৰ তদাৰক কৰি জিলা খনৰ অগ্ৰগতি আৰু সমন্বয়ত অৰিহণা যোগাবলৈ সমুহ বাসিন্দা সকলক আহ্বান জনায় । উক্ত অনুষ্ঠানতে বিভিন্ন ক্ষেত্ৰত বলিষ্ঠ ভুমিকা পালন কৰা কেইবাজনো ব্যক্তিক আয়োজকৰ ফালৰ পৰা সম্বৰ্ধনাও জনোৱা হয় । জিলা দিৱস উদযাপন উপলক্ষে জিলা আয়ুক্ত কাৰ্যালয়কে ধৰি ভালেমান চৰকাৰী কাৰ্যালয় আলোকিত কৰাৰ লগতে স্থানীয় বাসগৃহত বন্তি প্ৰজ্বলনো কৰা হয়।

02/07/2025

📌 সাংবাদিকক ভয় ভাবুকি দিয়া সন্দৰ্ভত 'অসম প্ৰদেশ সাংবাদিক সন্থা'ৰ প্ৰতিক্ৰিয়া
--–---------–------------------------------
▪️গীৰ গাইৰ প্ৰসঙ্গক কেন্দ্ৰ কৰি ৰাজ্য চৰকাৰৰ কেবিনেট মন্ত্ৰী জয়ন্ত মল্ল বৰুৱাই এক সংবাদমেলত বিষয়টোৰ ওপৰত মন্তব্য দিবলৈ গৈ সাংবাদিকৰ প্ৰতি কৰা অশালীন মন্তব্যক কেন্দ্ৰ কৰি সমগ্ৰ ৰাজ্যখনত সৃষ্টি হোৱা প্ৰতিক্ৰিয়া এতিয়াও অব্যাহত আছে। এনে সময়তে 'প্ৰতিদিন টাইম'ৰ মুখ্য সম্পাদক নিতুমণি শইকীয়াক একংশ ব্যক্তিয়ে ব্যক্তিয়ে ভাবুকি প্ৰদান কৰি সংবাদ-মাধ্যমৰ কন্ঠৰোধ কৰিবলৈ চেষ্টা চলোৱা কাৰ্যক অসম প্ৰদেশ সাংবাদিক সন্থা(আপজু)ই গভীৰ উদ্বেগ প্ৰকাশ কৰিছে। উল্লেখ্য, কিছুদিন পূৰ্বে কেবিনেট মন্ত্ৰী জয়ন্ত মল্ল বৰুৱাই এখন সংবাদমেলত সাংবাদিকক ''তলৰ শ্ৰেণীৰ মানুহ' বুলি তুচ্ছ-তাচ্ছিল্য তথা অপমানসূচক মন্তব্য কৰি বিতৰ্কৰ আবৰ্তত সোমাই পৰাৰ পিছত শেহতীয়াকৈ একাংশ লোকে বিশিষ্ট সাংবাদিক নিতুমণি শইকীয়াক লক্ষ্য কৰি বিভিন্ন ভয়-ভাবুকি দিয়া কাৰ্যক গৰিহণা দি প্ৰতিক্ৰিয়া প্ৰকাশ কৰিছে অসম প্ৰদেশ সাংবাদিক সন্থা(আপজু)ই। আপজুৰ সভাপতি অৰূপ ৰঞ্জন বৰ্মন আৰু সাধাৰণ সম্পাদক আব্দুল চোবাহান আলীয়ে আজি এক প্ৰেছ বিজ্ঞপ্তিযোগে কয় যে, সাংবাদিক তথা সংবাদ মাধ্যমক ভয়-ভাবুকি দি কেলেংকাৰী ঢাকিব নোৱাৰি। এনেদৰে বাৰে বাৰে ৰাজনৈতিকভাৱে মদতপুষ্ট চক্ৰই সাংবাদিক তথা সংবাদ- মাধ্যমক কৰা অপমান কোনোপধ্যে আমি মানি ল'ব নোৱাৰো। ৰজাঘৰীয়া নতুবা দুৰ্নীতিগ্ৰস্ত ৰাজনীতিক চক্ৰৰ কথাত সংবাদ মাধ্যমে কেতিয়াও উঠা-বহা নকৰে বুলিও আপজুই বিবৃতিটোত স্পষ্ট কৰি দিয়ে। লগতে ভবিষ্যতে এনে ধৰণৰ কাৰ্যপন্থাৰ পৰা বিৰত থাকিবলৈ সেইসকলক আমি অসম প্ৰদেশ সাংবাদিক সন্থাই সকীয়াই দিয়া হ'ল।

01/07/2025

📌এনাজৰী বৰপেটাৰ বক্তৃতা অনুষ্ঠান
---------------------–-------------------
▪️বৰপেটাৰ শংকৰদেৱ শিশু-বিদ্যা নিকেতন আৰু এনাজৰী বৰপেটা (বৰপেটা এনাজৰী ছ'চাইটি)ৰ যৌথ উদ্যোগত ১ জুলাইত বিদ্যালয়খনৰ সভাকক্ষত এখনি বিশেষ বক্তৃতা অনুষ্ঠানৰ আয়োজন কৰা হয়। মূলতঃ শিক্ষাৰ্থীসকলৰ সৰ্বাংগীন উৎকৰ্ষ সাধনৰ লক্ষ্যৰে আয়োজিত এই বক্তৃতা অনুষ্ঠানটিত সমল ব্যক্তি হিচাপে উপস্থিত থাকে ভাৰতীয় বায়ু সেনাৰ উইং কমাণ্ডাৰ প্ৰাঞ্জল ডেকাই। শংকৰদেৱ শিশু-বিদ্যা নিকেতনৰ সভাপতি ডিম্বেশ্বৰ মেধিয়ে সভাপতিত্ব কৰা সভাখনৰ আৰম্ভণিতে বন্তি প্ৰজ্বলন কৰে এনাজৰী বৰপেটাৰ সভাপতি নয়নজ্যোতি দাসে। এনাজৰীৰ সদস্য দীপাংকৰ দাসে চমুকৈ অনুষ্ঠানটোৰ বিষয়ে আলোকপাত কৰাৰ লগতে সমল ব্যক্তি প্ৰাঞ্জল ডেকাৰ বিষয়ে এক চমু পৰিচয় দাঙি ধৰে। নিকেতন আৰু এনাজৰীৰ তৰফৰ পৰা সমল ব্যক্তি ডেকাক ফুলাম গামোচা আৰু কিতাপৰ টোপোলাৰে আদৰণি জনোৱা হয় । ভাৰতীয় বায়ু সেনাত দুটা দশকজোৰা সেৱা আগবঢ়োৱাৰ লগতে জাৰ্মানীৰ দৰে দেশত এই বিষয়ক বিশেষ প্ৰশিক্ষণপ্ৰাপ্ত সেনা বিষয়া, বৰপেটাৰ সুসন্তান তথা ছাত্ৰাৱস্থাৰ পৰাই মেধাৱী প্ৰাঞ্জল ডেকাই শিক্ষাৰ্থীসকলক উদ্দেশ্যি চিত্তাকৰ্ষক আৰু অনুপ্ৰেৰণাদায়ক বক্তৃতা প্ৰদানৰ লগতে ভাৰতীয় বায়ু সেনাত ভৰ্তি হ'বলৈ প্ৰয়োজনীয় অৰ্হতা, দক্ষতা আদিৰ কথাও মনোগ্ৰাহীকৈ ব্যক্ত কৰে। উল্লেখ্য যে বৰপেটাৰ সামাজিক, সাংস্কৃতিক অনুষ্ঠান এনাজৰী বৰপেটাই বিগত বৰ্ষসমূহতো শিক্ষাৰ্থীৰ উৎকৰ্ষ সাধনৰ বাবে কেইবাটাও ব্যতিক্ৰমী কাৰ্যসূচী সফলতাৰে আয়োজন কৰি সচেতন মহলৰ দৃষ্টি আকৰ্ষণ কৰিবলৈ সক্ষম হৈছে।

26/06/2025

📌ইতিহাস ৰচনাঃ

👉 আন্তঃৰাষ্ট্ৰীয় মহাকাশ কেন্দ্ৰত প্ৰৱেশ কৰা প্ৰথম ভাৰতীয় মহাকাশচাৰী হিচাপে পৰিগণিত হ'ল শুভাংশু শুক্লা।
✔️স্পেচএক্স ড্ৰেগন মহাকাশযানত ডকিং কৰাৰ কিছু সময়ৰ পিছতে আন্তঃৰাষ্ট্ৰীয় মহাকাশ কেন্দ্ৰৰ হাৰমনি মডিউলৰ ভিতৰত একত্ৰিত হয় এক্সিয়াম মিছন ৪ৰ দল। বাওঁফালৰ পৰা, মিছন বিশেষজ্ঞ স্লাৱোছ উজনানস্কি-উইছনিউস্কি, কমাণ্ডাৰ পেগি হুইটছন, পাইলট শুভানছু শুক্লা, আৰু মিছন বিশেষজ্ঞ টিবৰ কাপু।

---–---–------
সৌজন্যঃ নাছা

Platform ASSAM

16/07/2025

15/07/2025

10/07/2025

09/07/2025

07/07/2025

07/07/2025

07/07/2025

03/07/2025

02/07/2025

02/07/2025

01/07/2025

26/06/2025

Address

Telephone

Website

Alerts

Contact The Business

Shortcuts

Share