Platform ASSAM

18/04/2024

📌মন্ত্রী জয়ন্ত মল্ল বৰুৱাৰ ঘোষণা//
📌বৰপেটা সমষ্টিত পাঁচ লাখ ভোটত জয়ী হ'ব ভূমিপুত্র ফণীভূষণ চৌধুৰী
-----------------------------------
🖋️প্লেটফৰ্ম অসম বাৰ্তা
বৰপেটা, ১৮ এপ্রিলঃ ৰাজ্যৰ শাসকীয় বিজেপি মিত্র জোঁটৰ প্রার্থী, অগপ নেতা ফণীভূষণ চৌধুৰীয়ে আজি ৩নং বৰপেটা লোক সভা সমষ্টিৰ বাবে নিজৰ মনোনয়ন পত্ৰখন দাখিল কৰে। মনোনয়ন পত্র দাখিলৰ পূর্বে বৰপেটা জিলা ক্রীড়া সন্থাৰ খেল পথাৰত মিত্রজোটৰ নেতা-কর্মী তথা দলীয় সমর্থক- অন্যান্য ৰাইজৰ উপস্থিতিত এখন চমূ সভা অনুষ্ঠিত হয়। সভাখনত অংশগ্রহণ কৰি অসম গণ পৰিষদৰ সভাপতি অতুল বৰাই প্রদান কৰা ভাষণত বৰপেটা লোক সভা সমষ্টিত অগপই ভবাতকৈ অধিক ভোট পাব বুলি উল্লেখ কৰি তেখেতৰ জয় এশ শতাংশই নিশ্চিত বুলি ঘোষণা কৰে। তেওঁ কয়- ফণীভূষণ চৌধুৰী ডাঙৰীয়াই বঙাইগাঁৱৰ হকে অত বছৰে যিধৰণে মাত মাতি আহিছে বৰপেটা লোকসভা সমষ্টিৰ বাবেও মাত মাতিব। মনোনয়ন পত্ৰ প্ৰদানৰ পূৰ্ব সাংবাদিকেৰে হোৱা বার্তালাপত প্রার্থী ফণী ভূষণ চৌধুৰীয়ে মনোনয়ন পত্র দাখিলৰ আগমূহুৰ্ত্তত ৰাইজৰ স্বতঃস্ফূৰ্ত মমৰ,আস্থা, বিশ্বাস দেখি আপ্লুত হোৱা বুলি উল্লেখ কৰি আশা কৰাতকৈ লাভ কৰাতকৈ অধিক জনসমর্থনে উৎফল্লিত বৰা বুলি প্রতিক্রিয়া প্রকাশ কৰে। বিজেপি নেতা তথা মন্ত্রী জয়ন্ত মল্ল বৰুৱাই কয়- বৰপেটা বাসী ৰাইজে এতিয়া অনুভব কৰিছে যে, আমাৰ নিজৰ মানুহ জনক আমি এইবেলি সাংসদ কৰিম। বৰপেটাত খিলঞ্জীয়া মানুহৰ প্রতিনিধি হিচাপে মিত্র জোট সমর্থিত অগপ প্রার্থী ফণীভূষণ চৌধুৰী বিপুল ভোটত জয়লাভ কৰিব। মানুহৰ আজিৰ এই উৎসাহে প্রমাণ কৰিছে যে, মোডী ডাঙৰীয়াৰ প্রতি অসমৰ মানুহৰ মৰম বা মুখ্যমন্ত্রী ড° হিমন্ত বিশ্ব শর্মাৰ প্রতি বৰপেটাবাসীৰ বা অসমবাসীৰ মৰম। তেওঁ আটাইলৈ ধন্যবাদ জনাই সকলোৱে মিলি মিত্রজোঁটৰ প্রার্থী ফণীভূষণ চৌধুৰীক অতি কমেও পাঁচ লাখ ভোটৰ ব্যৱধানত বিজয়ী কৰাবলৈ সক্ষম হ'ম বুলিও তেওঁ তাৎপর্যপূর্ণ মন্তব্য কৰে। সাংবাদিকৰ আন এক প্রশ্নৰ উত্তৰত তেওঁ কয়- খিলঞ্জীয়া মানুহৰ সাম্রাজ্য বৃদ্ধি হৈছে তাতকৈ আনন্দৰ কথা আৰু কি হ'ব পাৰে। আমাৰেই কমতাপুৰ, আমাৰেই খিলঞ্জীয়া মানুহৰ অসম, চাওলু চুকাফাৰ অসম, শংকৰদেৱ- মাধবদেৱৰ অসম কোনে নিবিচাৰে। আমি বিচাৰো, আমি আনন্দ লাভ কৰিছো, যে, আমাৰ ভূমিপুত্র ফণীভূষণ চৌধুৰীয়ে এইবাৰ বৰপেটাক প্রতিনিধিত্ব কৰিব। প্রতিগৰাকী ভূমি পুত্রই তাক লৈ গৌৰৱ অনুভৱ কৰে। তেওঁ আৰু কয় ১৪খন আসনৰ আমি চৈধ্যখনেই পাম, চিন্তা কৰিবলগীয়া নাই। এইক্ষেত্রত মোডী ডাঙৰীয়াৰ সভাখনৰ উপস্থিতিয়ে সমগ্র অসমলৈ বার্তা বহন কৰিছে। পিছত সভাথলীৰ পৰা বিভিন্ন শ্লোগানেৰে এটি বিশাল মিচিল স্থানীয় বি বি পথেকে আগুৱাই গৈ বৰপেটা জিলা আয়ূক্তৰ কার্যালয়ৰ সমীপত উপস্থিত হয়। তাৰ পৰাই এটি প্রতিনিধ দল আগবাঢ়ি যায় আৰু প্ৰার্থী ফণীভূষণ চৌধুৰীয়ে নিজৰ মনোনয়ন পত্রখন অগপ সভাপতি অতুল বৰা, মন্ত্রী জয়ন্ত মল্ল বৰুৱা, অগপ নেতা বীৰেন্দ্র প্রসাদ বৈশ্য আৰু ইউ পি পি এলৰ বিধায়ক জলেন দৈমাৰীৰ লগত একেলগে জিলা আয়ুক্ত তথা জিলা নিৰ্বাচন বিষয়া আয়ূষ গৰ্গৰ হাতত অর্পন কৰে।

18/04/2024

17/04/2024

📌বৰপেটাত কংগ্ৰেছ নেতা দীপ বায়নৰ মনোনয়ন পত্র দাখিল
📌কোনো শক্তিয়ে আমাক ৰুধিৱ নোৱাৰেঃ জাকিৰ হুছেইন শিকদাৰ
=====================
🖋️প্লেটফৰ্ম অসম বাৰ্তা
বৰপেটা, ১৭এপ্রিলঃ ৩নং বৰপেটা সংসদীয় আসনখনৰ নিৰ্বাচনী খুঁজত অৱতীৰ্ণ হ'বলৈ কংগ্রেছ প্রার্থী দীপ বায়নে আজি মনোনয়ন পত্র দাখিল কৰে। আজি পুৱাৰ ভাগত বৰপেটা বিদ্যাপীঠ খেলপথাৰত দলটোৰ উদ্যোগত এখন অনুষ্টুপীয়া সভা অনুষ্ঠিত হয় আৰু এই সভাখনত সংসদীয় সমষ্টিটোৰ বিভিন্ন ঠাইৰ পৰা কেবা হেজাৰ সমৰ্থক উপস্থিত হৈ উদুলি-মুদুলি পৰিৱেশ সৃষ্টি কৰে। সভাত দলটোৰ কেন্দ্ৰীয় নেতা ভূপেন্দ্র সিং, প্রদেশ কংগ্ৰেছৰ সভাপতি ভূপেন বৰা, কাৰ্যকৰী সভাপতি জাকিৰ হুছেইন শিকদাৰ, প্ৰদ্যুৎ বৰদলৈ, আব্দুল খালেকৰ লগতে বহু সংখ্যক নেতাই অংশগ্রহণ কৰে। সভাত কেবাগৰাকী নেতাই বিজেপিয়ে দেশত জনবিৰোধী শাসন চলোৱা বুলি মত প্রকাশ কৰি সোচ্চাৰ হৈ পৰে। সভাত সমষ্টিটোৰ দলীয় প্রার্থী দীপ বায়নে ৰাইজৰ মৰম-চেনেহ আৰু আশীৰ্বাদত নিজৰ বিজয় নিশ্চিত বুলি উল্লেখ কৰে। অপশক্তি উৎখাত কৰিবলৈ ৰাইজৰ মৰম যথেষ্ট বুলিও কৰি এই খুঁজখন সংবিধান ৰক্ষাৰ যুঁজ বুলি কয়। বিধায়ক জাকিৰ হুছেইনে সংবাদ মাধ্যমৰ আগত প্রকাশ কৰে-প্ৰথম ৰাউণ্ডতে ইমান মানুহ দেখিছে এতিয়ালৈ আমি খেল খেলিবলৈ বাকী আছে। বি জে পি, এ জি পি হিমন্ত বিশ্ব শৰ্মা, নৰেন্দ্ৰ মোডী, অমিত শ্বাহ, অতুল বৰা, কেশৱ মহন্ত কোনেও এইবাৰ বৰপেটাক উদ্ধাৰ কৰিব নোৱাৰে, বৰপেটা কংগ্ৰেছৰ আছিল, কংগ্ৰেছৰ থাকিব। আমাক বৰপেটাত ৰুধিব নোৱাৰে। পিছত সভাথলীৰ পৰা বিভিন্ন সাংস্কৃতিক দলৰ নৃত্য- বাদ্য আৰু গীতৰ ধ্বনিৰ মাজতে বিভিন্ন ভৰৰ লোকর অংশগ্রহণেৰে এটি বিশাল সমদল বৰপেটা বি বি পথেৰে এটি বিশাল সমদল উলিয়াই বৰপেটা জিলা আয়ুক্তৰ কাৰ্যালয়ত উপস্থিত হয়। বিধায়ক জাকিৰ হুছেইন শিকদাৰ তথা আন নেতাৰ উপস্থিতিত দীপ বায়নে জিলা আযুক্ত তথা জিলা নির্বাচন বিষয়া আয়ুষ গৰ্গৰ হাতত নিজৰ মনোনয়ন পত্র দাখিল কৰে।

17/04/2024

📌বৰপেটালৈ সু খবৰ
***************** 📌ৰাষ্ট্ৰীয় যুৱ মহোৎসৱত উজলিল জ্যোতিৰ্গময় ভূঞা
==================== ✍️দ্বিজেন্দ্ৰ নাথ দাস ◆বৰপেটালৈ সু খবৰ কঢ়িয়াইছে বৰপেটাৰ সন্তান জ্যোতিৰ্গময় ভূঞাই। বৰপেটা চহৰৰ গায়নহাটী নিৱাসী প্ৰাণজিৎ ভূঞা তথা মনিষা ভূঞাৰ সু-সন্তান জ্যোতিৰ্গময়ে অলপতে অনুষ্ঠিত হোৱা ৩৭ সংখ্যক আন্তঃ বিশ্ববিদ্যালয় ৰাষ্ট্ৰীয় যুৱ মহোৎসৱত গুৱাহাটী বিশ্ববিদ্যালয়ক প্ৰতিনিধিত্ব কৰি Classical Instrument percussion ( Solo category) ঘাতবাদ্য আৰু Folk Orchestra প্ৰতিযোগিতাত ৰপৰ পদক অৰ্জন কৰি সুনাম সৃষ্টি কৰিবলৈ সক্ষম হয়। ভূঞাৰ এনে সুনামে বৃহত্তৰ বৰপেটা অঞ্চলৰ ৰাইজক উৎফুল্লিত কৰা পৰিলক্ষিত হৈছে। বৰপেটাৰ মাধৱ চৌধুৰী মহাবিদ্যালয়ৰ অৰ্থনীতি বিভাগৰ স্নাতক পাঠ্যক্ৰমৰ চতুৰ্থ ষান্মাসিক( 4th Semister)'ৰ অধ্যয়নৰত জ্যোতিৰ্গময় ভূঞাই গন্ধীয়া বংশৰ উদ্যোগত গায়নহাটী,হাটীয়াৰঘৰত হোৱা খোল বাদ্যৰ কৰ্মশালাত অংশগ্ৰহণ কৰি নিজৰ প্ৰতিভাৰ প্ৰতিফলন ঘটায় । তেওঁ জনোৱা মতে নিজৰ খোল বাদ্যৰ গুৰু হৈছে হেমেন চন্দ্ৰ সূত্ৰধাৰ, বিপুল ওজা আৰু ৰণজিৎ বায়ন । তেওঁলোকৰ তত্বাৱধানতে খোল বাদ্যৰ বিদ্যা আহৰণ কৰে। পৰৱৰ্তী সময়ত 'গুৰু শিষ্য পৰম্পৰা প্ৰকল্প'ৰ অধীনত সংগীত নাটক অকাডেমী বঁটা প্ৰাপক জগন্নাথ বায়ন তথা ওষ্টাদ বিছমিল্লাখা যুৱ বঁটা প্ৰাপক মনোজ কুমাৰ দাসৰ তত্বাবধানত শিক্ষা গ্ৰহণ কৰা জ্যোতিৰ্গময় ভূঞাই বিভিন্ন সাংস্কৃতিক অনুষ্ঠানত নিজৰ প্ৰতিভা প্ৰদৰ্শন কৰি ৰাইজৰ পৰা ইতিমধ্যে যথেষ্ট প্ৰশংসা বুটলিবলৈ সক্ষম হৈছে।

17/04/2024

📌মহাপুৰুষ শ্রীমন্ত শংকৰদেৱ আৰু ছান্দ খাঁৰ গুৰু-শিষ্য সম্পৰ্কৰ অপব্যাখ্যা //
📌প্রদেশ কংগ্ৰেছৰ সভাপতি ভূপেন বৰাক ক্ষমাখোজাৰ দাবী অসম জাতীয় মহাসভাৰ//
---------------------------------
🖋️প্লেটফৰ্ম অসম বাৰ্তা
বৰপেটা,১৭এপ্রিলঃ সাংসদ গৌৰৱ গগৈয়ে শুদ্ধ আৰু পৰিপক্কভাবে নামাজ আদায় কৰা বিষয়ক কেন্দ্ৰ কৰি ৰাজ্যজুৰি সৰৱ ৰাজনৈতিক চর্চা চলি থকা পৰিলক্ষিত হৈছে। তেনে সময়তে প্রদেশ কংগ্ৰেছৰ সভাপতি ভূপেন বৰাই উদ্দেশ্য প্রণোদিতভাবে মহাপুৰুষ শ্রীমন্ত শংকৰদেৱ গুৰুজনা আৰু তেৰাৰ শিষ্য ছান্দ খাঁৰ প্ৰসঙ্গ ৰাজনৈতিক পাকচক্ৰলৈ টানি আনি মহাপুৰুষীয়া আচাৰ-বিচাৰ, বিশ্বাস-পৰম্পৰা আৰু ঈশ্বৰ ভক্তিৰ আধ্যাত্মিক চেতনাক কুঠাৰাঘাত কৰা কাৰ্যত ৰাজ্যখনৰ সত্ৰীয়া সমাজৰ মাজত অসন্তুষ্টি সৃষ্টি কৰা পৰিলক্ষিত হৈছে। বিষয়টো সম্পর্কত অসম জাতীয় মহাসভাই ভূপেন বৰাৰ এনে অদ্ভুত আচৰণ জাতীয় জীৱনৰ বাবে বিপদজনক বুলিও মত প্রকাশ কৰিছে। জগতগুৰু শ্রীমন্ত শংকৰদেৱৰ ভাৰত বৰিষ নৱজাগৰণৰ অভিকেন্দ্ৰ ব্ৰহ্মাণ্ড কল্যাণৰ দৰ্শনৰ পৃষ্ঠভূমি আৰু ছান্দ খাঁই গুৰুজনাৰ ধৰ্মত শৰণ-দীক্ষা আৰু শিষ্যত্ব গ্ৰহণৰ পূণ্যধাম পাটবাউসীৰ গৰিমা বিনষ্ট কৰি ভূপেন বৰাই ইতিহাস বিকৃত কৰা ষড়যন্ত্ৰৰ পৰা বিৰত থকাৰ লগতে অপৰাধ বিনাশন ক্ষমা খোজৰ আহ্বান জনাইছে সংগঠনটোৱে। সুন্দৰীদিয়া সত্ৰৰ সত্ৰাধিকাৰ তথা অসম জাতীয় মহাসভাৰ ভাৰপ্ৰাপ্ত সভাপতি নির্মল অধিকাৰী আৰু প্রধান সম্পাদক তথা মণিকাঞ্চন জ্ঞানজ্যোতি গবেষণা কেন্দ্ৰৰ সচিব হৰেকৃষ্ণ তালুকদাৰে উল্লেখ কৰিছে- মহাপুৰুষ শ্রীমন্ত শংকদেৱ গুৰুজনাৰ সৈতে ছান্দ খাঁৰ গুৰু-শিষ্যৰ সম্পৰ্কক বিকৃত কৰাৰ লগতে সনাতনী বৈষ্ণৱ ভকতৰ শৰণ আচৰণক অবজ্ঞা কৰি ভূপেন বৰাই ছান্দ খাঁক ইছলামিক পৰিচয়েৰে পুনৰাবৃত্তি কৰাৰ পৰিকল্পিত ষড়যন্ত্রত লিপ্ত হৈছে। এয়া গুৰুজনাৰ ভাৰত বৰিষ নৱজাগৰণ দৰ্শনক অপমান কৰাৰ স্পষ্ট ইংগিত। এই ক্ষেত্ৰত ভূপেন বৰাক অতিশীঘ্ৰে স্থিতি স্পষ্ট কৰাৰ আহ্বান অন্যথা ধর্মীয় অনুভূতিক আঘাত হনাৰ অভিযোগত গোচৰ ৰঁজু কৰিবলৈ সাজু হৈছে অসম জাতীয় মহাসভা। ইফালে, মহাসভাই এই সম্পৰ্কীয় প্ৰবাদ আছে বুলি উল্লেখ কৰি কৈছে-মহাপুৰুষ শ্ৰীমন্ত শঙ্কৰদেৱ গুৰুজনাই পাটবাউসী থানত নিবাসৰ সময়চোৱাত এদিনাখন গুৰুজনাই গা-পা ধুই উঠি এটা জুপুৰিৰ ভিতৰত গৈ বস্ত্ৰ ভাগ সলাই আছিল। ছান্দ খাঁইৰ মনত সন্দেহ ওপজাত জুপুৰিটোৰ বেৰৰ ফাকেৰে জুমি চাই গুৰুজনাক চতুৰ্ভুজ ধাৰণ কৰা বিৰল দৃশ্য দেখি বিস্মিত হয় আৰু অপৰাধ গ্লানিত ভূগিব ধৰিলে। হেন সময়তে গুৰুজনাৰ বাবে পাত কাপোৰৰ চোলা এটি ছান্দ খাঁক চিলাব দিয়াত পৰম সন্তোষেৰে চোলাটো চিলাই কৰি উঠি গুৰুজনাক দিব আহি ছান্দ খাঁই চাৰি হাতযুক্ত চোলা কিয় চিলোৱা হ'ল বুলি প্ৰশ্নৰ সন্মুখীন হোৱাত ছান্দ খাঁই লুকাই জুমি চোৱা কথা বাবে অনুনয় সুৰত ক্ষমা খুজি মাৰ্জনা বিচাৰে। গুৰুজনাই দুখন হাত কাটি পেলাই পুনৰ চোলাটো নতুনকৈ চিলাব দি খান্দ খাঁক আথে-বেথে বিদায় দিলে।গুৰুজনাৰ মহানুভবতাই ছান্দ খাঁক বাৰুকৈয়ে আকৃষ্ট কৰিলে।পুনৰ ছান্দ খাঁই গুৰুজনাৰ পাটৰ চোলাটো নিখুত ভাবে চিলাই কৰি গুৰুজনাক দিব আহে আৰু সান্দ খা‍ঁই গুৰুজনাৰ শিষ্যত্ব গ্ৰহণত আগ্ৰহ প্ৰকাশ কৰে। গুৰুজনাই পৰম সন্তোষ প্ৰকাশ কৰি শিস্যত্ব গ্ৰহণৰ আগনিশা উপবাসে থকাৰ দিহা দি শৰণ-দীক্ষা গ্ৰহণৰ নীতি নিয়মৰ কথা দোহাৰে। গুৰুজনাৰ উপদেশ অনুসৰি ছান্দ খাঁই শুভ দিন এটিত গুৰুজনাৰ নাম ধৰ্মত শৰণ-দীক্ষা গ্ৰহণ কৰি ইছলামিক পৰিবৰ্তে ভকত-বান্ধৱৰ পৰিচয় লাভ কৰে। শ্রীমন্ত শংকৰদেৱ গুৰুজনাই প্ৰৱৰ্তন কৰা একশৰণ নাম ধৰ্মৰ ভকতৰ বিচাৰ-বিধি শৰণ-দীক্ষা গ্ৰহণৰ গৰিমাক ভু-লুণ্ঠিত কৰাৰ লগতে ছান্দ খাঁক ভকত বৈষ্ণৱ হিচাপে আকোৱালি লোৱা ইতিহাসক বিকৃত কৰা ভূপেন বৰাক চৰিত পুথি সমূহ অধ্যয়নৰ বাবেও জাতীয় মহাসভাই আহ্বান জনাইছে। গৌৰৱ গগৈয়ে ঈদৰ নামাজত বহা আৰু শংকৰদেৱৰ ওচৰত ছান্দ খাঁ বহা সামঞ্জস্য ক'ত বিচাৰি পালে বুলি প্রশ্ন কৰি অনাগত সময়তো যদি নিজৰ নিকৃষ্ট ৰাজনৈতিক লাভৰ স্বাৰ্থত ভূপেন বৰাই ইতিহাস বিকৃত কৰাৰ অপচেষ্টা নকৰিবলৈও সতৰ্ক কৰি দিছে। ইয়াৰ অন্যথা মহামান্য আদালতৰ জবাব দিহি হ'ব লাগিব বুলিও অসম জাতীয় মহাসভাই সকিয়াই দিছে।

16/04/2024

//নিৰ্দলীয় প্ৰাৰ্থী ডুলু আহমেদৰ মনোনয়ন পত্ৰ দাখিল
//এনাৰ্জি ড্ৰিংক লৈ প্ৰচাৰ চলাই আছে ফণীভূষণ চৌধুৰীয়েঃ ডুলু আহমেদ
**************************
🖋️প্লেটফৰ্ম অসম বাৰ্তা
বৰপেটা, ১৬ এপ্রিলঃ বৰপেটা লোকসভা সমষ্টিৰ বিজেপি মিত্ৰজোঁটৰ প্ৰাৰ্থী ফণীভূষণ চৌধুৰীয়ে এনার্জি ড্রিংক পান কৰি নির্বাচনী প্রচাৰ চলাই আছে। তেওঁ যাব নোখোজে। নির্বাচনলৈ মাজতে ২০দিন বাকী আছে এনেদৰে তেওঁ কিমান দিন ঘূৰিব। ৩নং বৰপেটা সংসদীয় সমষ্টিৰ নিৰ্দলীয় প্রার্থী হিচাপে মনোনয়ন পত্র দাখিলৰ বাবে বৰপেটাত উপস্থিত হৈ আজি সংবাদ মাধ্যমৰ আগত এইদৰে মন্তব্য কৰে নিৰ্দলীয় প্রার্থী ডুলু আহমেদে। সমাগত নির্বাচনত তেওঁ কমেও একলাখ ভোটৰ ব্যৱধানত জয়ী হ'ব বুলি দাবী কৰি আহমেদে কয় নির্বাচনী যুঁজত চি পি আই (এম) আৰু কংগ্ৰেছৰ প্ৰাৰ্থী দুগৰাকী তৃতীয় আৰু চতুর্থ স্থানতহে থাকিব। তেওঁ আৰু কয়- বৰপেটা লোকসভা সমিষ্টিৰ ৰাইজে পৰিবৰ্তন বিচাৰিছে। সমষ্টিটোত বিভিন্ন সমস্যা আছে যদিও ৰাইজে সংসদত মাত মতা মানুহ দেখা নাপালে। ৰাইজৰ অনুভৱ ফণীভূষণ চৌধুৰী জয়ী হ'লে সংসদত পিছৰ বেঞ্চত বহি শুই থাকিব, ডুলু আহমেদ জয়ী হ'লে সম্মুখৰ আসনত বহি মাত মাতিব। ৰাইজে পৰিবৰ্তন বিচাৰিছে। উল্লেখ্য, নির্দলীয় প্রার্থী ডুলু আহমেদে আজি এটি বাইক ৰেলী কৰি আহি বৰপেটাত উপস্থিত হয় আৰু জিলা নির্বাচনী বিষয়াৰ কাৰ্যালয়ত উপস্থিত হৈ নিজৰ মনোনয়ন পত্র দাখিল কৰে। এইবেলিৰ বৰপেটা সংসদীয় সমষ্টিৰ বাবে মনোনয়ন পত্র দাখিল কৰা প্রথম গৰাকী প্রার্থী হিচাপে পৰিগণিত হ'ল ডুলু আহমেদ। তৃতীয় পর্যায়ৰ নিৰ্বাচন অনুষ্ঠিত হ'বলগীয়া সমষ্টিটোৰ নিৰ্বাচনৰ বাবে ইতিমধ্যে বিভিন্ন ৰাজনৈতিক দল সমূহে প্ৰচাৰ অভিযান তীব্ৰ কৰি তুলিছে।

15/04/2024

📌বৰপেটাত তিনিদিনীয়াকৈ ৰঙালী বিহু সন্মিলনৰ আয়োজন*
***********************
🖋️ প্লেটফৰ্ম অসম বাৰ্তা
বৰপেটা ১৫ এপ্ৰিলঃ বিগত কেইবছৰৰ দৰে এইবাৰো সদৌ বৰপেটা ৰঙালী বিহু উদযাপন সমিতিয়ে ২০ এপ্ৰিলৰ পৰা তিনিদিনীয়াকৈ আয়োজন কৰিছে ৰঙালী বহু সন্মিলনৰ ৷ সভাপতি ডাঃ তাৰা প্ৰসাদ দাস,কাৰ্যকৰী সভাপতি গুণীন্দ্ৰ নাথ দাস আৰু মুখ্য সম্পাদক দেৱাদীব দাসৰ নেতৃত্বত গঠিত সদৌ বৰপেটা ৰঙালী বিহু উদযাপন সমিতিয়ে বৰপেটা পৌৰসভাৰ খেল পথাৰত আয়োজন কৰা ৰঙালী বিহু সন্মিলনৰ কাৰ্যসূচী সমূহৰ ভিতৰত আছে ২০ এপ্ৰিলৰ পুৱা ৯ বজাত পৰিবেশ নিকাকৰণ ৷ ১০ বজাত গছপুলি ৰোপন, ১১ বজাত চিত্ৰাংকণ প্ৰতিযোগিতা, ১২ বজাত ভেশচন প্ৰতিযোগিতা ৷ তেনেদৰে ২১ এপ্ৰিলৰ পুৱা ৯ বজাত বিহুৰ পতাকা উত্তোলন ৷ বিহুৰ পতাকা উত্তোলন কৰিব ৰঙালী বিহু উদযাপন সমিতিৰ সভাপতি ডাঃ তাৰা প্ৰসাদ দাসে ৷ ৯- ৩০ বজাত শ্বহীদ তৰ্পণ কৰিব কাৰ্যকৰী সভাপতি গুণীন্দ্ৰ নাথ দাসে ৷ ১০ বজাত স্মৃতি তৰ্পণ কৰিব মুখ্য সম্পাদক দেৱাদীব দাসে ৷ বিয়লি ৩ বজাত মৌ কুঁৱৰী প্ৰতিযোগিতা মুকলি কৰিব বৰপেটা পৌৰসভাৰ সভাপতি চবিলাল দাসে ৷ সন্ধিয়া ৬ বজাত সম্বৰ্ধনা অনুষ্ঠান ৷ সম্বৰ্ধনা জ্ঞাপন কৰিব সত্ৰীয়া শিল্পী অচ্যুৎ ওজা আৰু বিশিষ্ট গীতিকাৰ সুশীল দাসক ৷ সন্ধিয়া ৬-৩০ বজাত বঁটা বিতৰণী অনুষ্ঠান উদ্বোধন কৰিব বিহু উদযাপন সমিতিৰ উপদেষ্টা অনিল কুমাৰ দাসে ৷তাৰ পিছত সাংস্কৃতিক অনুষ্ঠান মুকলি কৰিব ফখৰুদ্দিন আলী আহমেদ মেডিকেল কলেজ আৰু হাস্পাতাল বৰপেটাৰ অধীক্ষক ডাঃ পাৰ্থপ্ৰতিম বৰুৱাই ৷ সাংস্কৃতিক অনুষ্ঠানত স্থানীয় শিল্পীৰ লগতে মন্মিতা ভৰদ্বাজে অংশ গ্ৰহণ কৰিব ৷
২২ এপ্ৰিলৰ দিনা সন্ধিয়া ৬ বজাত সাংস্কৃতিক সন্ধিয়াৰ বন্তি প্ৰজ্বলন কৰিব সদৌ অসম উকীল সন্থাৰ সম্পাদক দীপক কুমাৰ দাসে আৰু সাংস্কৃতিক সন্ধিয়া উদ্বোধন কৰিব অসম সৌৰভ বঁটা প্ৰাপক, বিশিষ্ট চলচিত্ৰ আৰু ভ্ৰাম্যমান থিয়েটাৰৰ প্ৰযোজক কৃষ্ণ ৰয়ে ৷ ৬- ৩০ বজাত স্মৃতিগ্ৰন্থ বিহুৱান উন্মোচন কৰিব ভট্টদেৱ বিশ্ব-বিদ্যালয় বজালীৰ অসমীয়া বিভাগৰ মূৰব্বী অধ্যাপিকা ডঃ বিনীতা বৰা দেৱচৌধুৰীয়ে ৷ এই অনুষ্ঠানতে চলচিত্ৰ প্ৰযোজক ,বিশিষ্ট সমাজ সেৱক কুশান চৌধুৰী আৰু গুৱাহাটীৰ পৰিবহন বিষয়া হিমাংশু কুমাৰ দাসে বিশিষ্ট অতিথি হিচাপে উপস্থিত থাকিব ৷ সামৰণিৰ দিনা সাংস্কৃতিক সন্ধিয়াত আন্তঃ ৰাষ্ট্ৰীয় খ্যাতি সম্পন্ন কণ্ঠশিল্পী অংগৰাগ মহন্ত, ৰাষ্ট্ৰীয় খ্যাতি সম্পন্ন নৃত্য শিল্পী মেঘৰঞ্জনী মেধি আৰু শ্ৰীভূমি অসম সাংস্কৃতিক গোষ্ঠীয়ে অংশ গ্ৰহণ কৰিব বুলি সাধাৰণ সম্পাদক সঞ্জীৱ ওজা আৰু সত্যেন্দ্ৰ নাথ দাসে জনাইছে ৷

13/04/2024

📌বৰপেটাত অষ্টম সংখ্যক গৰু বিহু উদযাপন
***************************************
🖋️প্লেটফৰ্ম অসম বাৰ্তা
🔹বৰপেটা দঙৰকুছি মাধৱ নগৰৰ গঙ্গা পূজা স্নান ঘাটত আজি গৰু বিহু ঊদযাপন কৰা হয়। হিন্দু জাগৰণ অসমৰ বৰপেটা জিলাৰ উদ্যোগত আৰু মাধৱ নগৰৰ স্থানীয় ৰাইজৰ সহযোগত অষ্টম বৰ্ষ আজিৰ গৰু বিহুৰ কাৰ্যসূচীত গৰুৰ গাত মাহ হালধি সানি নৈত গা-ধুওঁৱাৰ উপৰি দীঘলতী,মাখিয়তীৰে গাত স্পৰ্শ কৰি গৰুৰ মঙ্গল আৰু শ্ৰীবৃদ্ধি কামনা কৰা হয়। পিছত আমন্ত্ৰিত কেবাগৰাকী ব্যক্তিয়ে ন-পঘাৰে গৰুক বন্ধাৰ পিছত, লাউ-বেঙেনাৰ মালা পিন্ধায় আৰু ফোট পিন্ধাই গো-মাতাক সেৱা জনায়। গৰু বিহু উদযাপন থলীত আয়োজক সকলে আমন্ত্ৰিত কেবাগৰাকী ব্যক্তিক ফুলাম গমোচাৰে ৰঙালী বিহুৰ সম্ভাষণ যাচে। হিন্দু জাগৰণ অসমৰ বৰপেটা জিলা সমিতিৰ ৰূপ দাসে আঁত ধৰা অনুষ্ঠানত বৰপেটা সাহিত্য সভাৰ প্ৰাক্তন সভাপতি ড°বাবুল চন্দ্ৰ দাসে ভাষণ প্ৰদান কৰি বিভিন্ন দিশৰ পৰা গৰু বিহুৰ তাৎপৰ্য ব্যাখ্যা কৰে। অনুষ্ঠানত আন বক্তা সকলেও নিজ নিজ অনুভৱ দাঙি ধৰে।

13/04/2024

ৰঙালী বিহুৰ ওলগ।

11/04/2024

📎বৰপেটাত ঈদ-উল-ফিটৰ'ৰ সমুহীয়াভাৱে নামাজ ===================== 🖋️দ্বিজেন্দ্ৰ নাথ দাস ××××××××××××××●ইছলাম ধৰ্মাৱলম্বী ৰাইজৰ পৱিত্ৰ ৰমজান মাহ পালনৰ পিছত আজি বিশ্ব ব্যাপি ঈদ-উল-ফিটৰ পালন কৰা হয়। বৰপেটাতো ইছলাম ধৰ্মাৱলম্বী ৰাইজে 'ঈদ-উল-ফিটৰ' উপলক্ষে সমূহীয়া নামাজ অনুষ্ঠিত হয় । বৰপেটা চহৰৰ 'খাদেমুল ইছলাম সমাজ'ৰ উদ্যোগত ইয়াৰ মুছলীমপট্টীস্থ 'ঈদগাহ ময়দান'ত অনুষ্ঠিত সমূহীয়া নামাজত কেইবা হেজাৰ ইছলাম ধৰ্মাৱলম্বী লোকে অংশগ্ৰহণ কৰে । লক্ষনীয়ভাৱে, সমুহীয়া নামাজ সফল আৰু শান্তিপূৰ্ণ ভাৱে সম্পন্ন হয় । ০০০ ৰাতিপুৱা ৯ বজাত ফৰকাল বতৰত অনুষ্ঠিত ঈদ-উল-ফিটৰৰ নামাজত ইমামতি কৰে আলহাজ হাফিজ ক্কাৰী ওৱাজকাৰুণীয়ে । নামাজৰ মূল লক্ষ্য হৈছে বিশ্ব শান্তি আৰু ভাতৃত্ববোধৰ বাণী বিলোৱা । নামাজৰ শেষত বিশ্ব শান্তি তথা ভাতৃত্ব বোধৰ এনাজৰী ডাল কটকটীয়া কৰাৰ বাবে মহান সৃষ্টিকৰ্তা ওচৰত নামাজত অংশগ্ৰহণকাৰী ৰাইজে দোৱা কৰে। ইফালে, পৱিত্ৰ ঈদ-উল-ফিটৰ উপলক্ষে মুছলীমপট্টীৰ ঈদগাহ ময়দানস্থলীলৈ সোমোৱা পথটো ইতিপূৰ্বে সজাই-পৰাই আকৰ্ষণীয় কৰি তোলা হয়।

10/04/2024

📌পুলিন দাস ১৪- অনুৰ্ধ্ব ক্ৰিকেটত চেম্পিয়ন গুৱাহাটী || 📌বৰপেটাৰ গৰ্ভ ছিংভীলৈ শ্ৰেষ্ঠ বলাৰৰ সন্মান ====================== 🖋️দ্বিজেন্দ্ৰ নাথ দাস
************** ▪️অসম ক্ৰিকেট সংস্হাৰ অন্তৰ্গত 'এচিএ ক্ৰিকেট একাডেমী'ৰ উদ্যোগত ক্ৰীড়া জগতৰ কিংবদন্তি পুৰুষ পুলিন দাসৰ সোঁৱৰণত চলি থকা আন্তঃ জিলা ১৪ বছৰ অনুৰ্ধ্ব ক্ৰিকেট প্ৰতিযোগিতাত গুৱাহাটী দলে চেম্পিয়নৰ খিতাপ হাছিল কৰিবলৈ সক্ষম হৈছে । ** গুৱাহাটীৰ জজ ফিল্ডত আজি অনুষ্ঠিত ফাইনেল মেচ খনত দলটোৱে লক্ষীমপুৰক ৩ উইকেটত পৰাস্ত কৰে । টছত জিকি লক্ষীমপুৰে প্ৰথমে বেট ধৰি নিৰ্ধাৰিত ৩০ অভাৰত ৬ উইকেটৰ বিনিময়ত ১৩৫ ৰান সংগ্ৰহ কৰে । দলটোৰ সৰ্বাধিক ৰাণ আগবঢ়ায় ৰাকেশ সোণোৱালে, তেওঁ অপৰাজিত থাকি ৩৮ ৰানৰ ইনিংছ সজা‌য় । বিপৰীতে গুৱাহাটীৰ বলাৰ অশ্বিন সিঙে ৩ টা উইকেট দখল কৰে ।
** ইয়াৰ প্ৰত্যুত্তৰত গুৱাহাটী দলে ১৩৬ ৰানৰ বিজয় লক্ষ্য সন্মুখত লৈ বেট ধৰি ২৮ অভাৰত ৭ উইকেট হেৰুৱাই ১৩৯ ৰান কৰে । দলটোৰ হৈ সৰ্বাধিক ৪৭ ৰানৰ স্ক'ৰ আগবঢ়ায় পাৰ্থ প্ৰতীম কাশ্যপে । বিপৰীতে লক্ষীমপুৰৰ বলাৰ পৱন তিৱাৰীয়ে ১৭ ৰানত ২ টা উইকেট দখল কৰে । # # # বৰপেটাৰ গৰ্ভ ছিংভীলৈ শ্ৰেষ্ঠ বলাৰৰ সন্মান অৰ্জন **** উল্লেখযোগ্য যে প্ৰতিযোগিতাত অৱতীৰ্ণ হোৱা বৰপেটা দলে ফাইনেল ৰাউণ্ডৰ প্ৰথম খন লীগ মেচত ভাগ লৈ গুৱাহাটীৰ বিপক্ষে পৰাস্ত হয় যদিও দ্বিতীয় খন মেচত মৰিগাঁওক সহজে পৰাস্ত কৰিছিল । কিন্তু দুখন মেচত গুৱাহাটীৰ দলটোৱে গ্ৰুপৰ শীৰ্ষত থাকি ছেমি ফাইনেলত পদাৰ্পন কৰিছিল । লক্ষনীয়ভাৱে বলিং লাইনত বৰপেটাৰ বলাৰ গৰ্ভ ছিংভীয়ে প্ৰতিযোগিতা খনত ৫ খন মেচ খেলি ১৮ টা উইকেট দখল কৰি সৰ্বাধিক বলাৰ হিচাপে পৰিচিত হৈ শ্ৰেষ্ঠ বলাৰ হিচাপে সন্মান লাভ কৰে । গৰ্ভ ছিংভীৰ এনে সফলতাৰ বাবে বৰপেটা জিলা ক্ৰীড়া সংস্হাৰ সম্পাদক সনাতন দাস, ক্ৰিকেট সম্পাদক দীপক কুমাৰ দাস, প্ৰশিক্ষক মনোজ কুমাৰ বায়ন সমন্বিতে বৰপেটা ক্ৰিকেটৰ লগত জড়িত সকলে ক্ৰিকেটাৰ গৰাকীক অভিনন্দন জনায় ।

08/04/2024

📌বাৰাপেটাত বিহুনাচৰ প্ৰশিক্ষণ আৰম্ভ
----------------------------------------
🖋️প্লেটফৰ্ম অসম বাৰ্তা
▪️সুপ্ত প্ৰতিভাসমূহ বিকাশৰ লগতে প্ৰকৃত বিহুনাচৰ প্ৰশিক্ষণ দিয়াৰ উদ্দেশ্যে আগত ৰাখি বাক্সাৰ মধ্য বাৰাপেটা ক্লাৱ এণ্ড লাইব্ৰেৰীৰ উদ্যোগত আজিৰে পৰা পাঁচদিনীয়া কাৰ্যসূচীৰে অনুষ্ঠিত হৈছে বিহুনাচ কৰ্মশালা ৷ বাৰাপেটা হাইস্কুল খেলপথাৰত অনুষ্ঠিত কৰ্মশালাটিত প্ৰায় ডেৰশগৰাকী নাচনীয়ে অংশগ্ৰহণ কৰিছে ৷

07/04/2024

📌নতুন সাহিত্য পৰিষদ বৰনগৰ শাখাৰ মুখপত্ৰ ঋত্বিক ৰ চতুৰ্থ সংখ্যা উন্মোচন
*************************
🖋️প্ৰবীণ কুমাৰ ৰায়
▪️সৃষ্টিত পোৱা যায় অনাবিল সুখানুভুতি। এক সু-চিন্তকৰ সমাবেশ। প্ৰগতিশীল সাহিত্য আন্দোলনৰ গতি ত্বৰান্বিত কৰাৰ মাজেৰে এচাম নতুন সু-চিন্তক লেখকক উৎসাহিত কৰা আৰু ৰুচিসন্মত সাহিত্য সৃষ্টিৰ এখন জীপাল ক্ষেত্ৰত আমাৰ ঐকান্তিক তথা ক্ষুদ্ৰ প্ৰয়াস।
নতুন সাহিত্য পৰিষদ বৰনগৰ শাখাৰ মুখপত্ৰ #ঋত্বিক ৰ চতুৰ্থ সংখ্যটি অলপতে উন্মোচন কৰা হয়। শাখাৰ সভাপতি বীৰেন দাসৰ সভাপতিত্বত অনুষ্ঠিত অৰ্ধ শতাধিক কবি, গল্পকাৰ, নিৱন্ধকাৰ তথা সাহিত্যিকৰ উপস্থিতিত উন্মোচন কৰে বৰনগৰ মহাবিদ্যালয়ৰ অসমীয়া বিভাগৰ সহযোগী অধ্যাপক ডঃ যাদবেন্দ্ৰ বৰাই। সভাত অসমৰ বিশিষ্ট কাৰ্টুনিষ্ট নিতুপৰ্ণ ৰাজবংশী, মানসী গোস্বামী আদি কৰি মুখ্য অতিথি সকলো উপস্থিত থাকে। #ঋত্বিক ৰ সম্পাদনা প্ৰবীন কুমাৰ ৰয় অৰ্থাৎ আমি নিজে যদিও সম্পাদনা সমিতিৰ সদস্য সকল বিশেষকৈ বিশিষ্ট গল্পকাৰ অজয় কুমাৰ ৰায় আৰু ৰূপম দাসে বিশেষভাৱে সহায় কৰে।

06/04/2024

📌মজিবুৰ ৰহমানলৈ "বৰপেটা বঁটা"
-----------------------------------
🖋️প্লেটফৰ্ম অসম বাৰ্তা
বৰপেটা,৭ এপ্ৰিলঃ বিগত কেইবছৰ সমুহৰ দৰে এইবেলিও অহা ১ ব'হাগ (১৪ এপ্ৰিল'২৪) দেওবাৰে বৰপেটা পৌৰসভাৰ খেলপথাৰত বৰপেটা আঞ্চলিক ছাত্ৰ সন্থাৰ উদ্যোগত দিনযোৰা কাৰ্যসূচীৰে অসমীয়া জাতিৰ স্বাভিমান,বাপতি সাহোন ৰঙালী বিহু উদযাপনৰ আয়োজন কৰা হৈছে। উক্ত দিনা বিহু বাকৰিত অসমৰ সমাজ জীৱনত নিৰবে, নিতালে সেৱা আগবঢ়োৱা প্ৰচাৰ বিমুখ বিশেষকৈ সাহিত্য, বিজ্ঞান, সংস্কৃতি, ক্ৰীড়া,সংবাদ জগতলৈ অনবদ্য অৱদান আগবঢ়োৱা একো একোজন বিশেষ ব্যক্তিক "বৰপেটা বঁটা" আগবঢ়াই অহা হৈছে।এইবেলি উক্ত বটাটি আগবঢ়োৱা হ'ব অসমৰ সংবাদ জগতৰ এক চিনাকি নাম, বিশিষ্ট মানৱ দৰদী, সমাজ সংস্কাৰক , নলবাৰীৰ মজিবুৰ ৰহমানক। সন্ধিয়া ৬ বজাত আয়োজন কৰা বৰপেটা বঁটা প্ৰদান অনুষ্ঠানত বৰপেটা জিলা আয়ুক্ত আয়ুষ গৰ্গ ডাঙৰীয়াৰ উপস্থিতিত বৰপেটা আঞ্চলিক ছাত্ৰ সন্থাৰ হৈ বঁটা প্ৰদান কৰিব মহাপুৰুষ মাধৱদেৱৰ দ্বাৰা স্থাপিত ঐতিহ্য মণ্ডিত সুন্দৰীদিয়া সত্ৰৰ সত্ৰাধিকাৰ শ্ৰীযুত নিৰ্মল অধিকাৰীয়ে।
ইয়াৰোপৰি ৰঙালী বিহু বাকৰিত ৰাতিপুৱা পতাকা উত্তোলন, শ্বহীদ তৰ্পণ, জ্যেষ্ঠ জনলৈ শ্ৰদ্ধা জ্ঞাপন, বহাগৰ দুপৰীয়া কবিতাৰ আলাপ আদি অনুষ্ঠানৰ লগতে অসমৰ আগশাৰীৰ বিহু দ'ল মঙ্গলদৈ সাংস্কৃতিক বিহু দ'ল,কৃষ্টি সংস্কৃতি বিকাশ পৰিষদৰ বিহু দ'ল, অভয়াপুৰী আৰু বৰপেটা সংস্কৃতি বিকাশ বিহু দলৰ বিহু নৃত্যৰ উপৰিও অসমৰ জনপ্ৰিয় কণ্ঠশিল্পী বিপিন চাওদাংৰ গীতৰ শৰাই আৰু স্থানীয় শিল্পীৰ অনুষ্ঠান পৰিবেশন কৰা হ'ব। উক্ত দিনৰ ৰঙালী বিহু লৈ অসমবাসী ৰাইজক আমন্ত্ৰণ জনাইছে ৰঙালী বিহু উদযাপন সমিতিৰ সভাপতি কৃষ্ণকান্ত দাস, কাৰ্যকৰী সভাপতি অবিনাশ কুমাৰ আৰু সম্পাদকদ্বয় ৰাহুল সুত্ৰধাৰ, বিদ্যুৎ দাসে। উল্লেখ্য যে, ৰঙালী বিহুৰ লগত সংগতি ৰাখি ৰঙিয়াল নামেৰে এখনি স্মৃতি গ্ৰন্থ নঞ্জু দত্তৰ সম্পাদনাত প্ৰকাশ হ'ব। ৰাইজৰ সহায় সহযোগ আন্তৰিকতাৰে কামনা কৰিছে বৰপেটা আঞ্চলিক ছাত্ৰ সন্থাই।

06/04/2024

📌বাৰাপেটাৰ তিনিদিনীয়া বিহু কৰ্মশালাৰ সামৰণি
************************
🖋️প্লেটফৰ্ম অসম বাৰ্তা
◆ বাক্সাৰ দক্ষিণ বাৰাপেটাত ৰঙালী বিহুক আদৰাৰ বাবে আয়োজিত তিনিদিনীয়া ৰঙালী বিহু কৰ্মশালাৰ সামৰণি পৰিছে ৷ কৰ্মশালাত অঞ্চলটোৰ ডেৰশতাধিক নাচনী আৰু ঢুলীয়াই অংশগ্ৰহণ কৰে। প্ৰশিক্ষণৰ অন্তত অংশগ্ৰহণকাৰী সকলক একোখনকৈ মানপত্ৰ প্ৰদান কৰা হয় ৷ সামৰণি অনুষ্ঠানত কেবাগৰাকী অতিথি আৰু বিশিষ্ট ব্যক্তি উপস্থিত থাকে। কৰ্মশালা খন ৩এপ্ৰিলৰ পৰা ৫এপ্ৰিললৈ অনুষ্ঠিত হৈছিল।

05/04/2024

📌বিজেপিৰ বিৰুদ্ধে নিৰ্বাচনী আচৰণ বিধি ভংগৰ অভিযোগ
▪️চিপিআই(এম)ৰ অভিযোগ দাখিল
*************************
🖋️প্লেটফৰ্ম অসম বাৰ্তা
▪️সমাগত লোকসভা নিৰ্বাচনৰ জাননী প্ৰকাশ আৰু নিৰ্বাচনী আচৰণ বিধি বলৱৎ হৈ থকাৰ মাজতে শাসকীয় বিজেপি দলে চৰকাৰী নীতি-নিয়ম ভংগ আৰু নিৰ্বাচনী আচৰণ বিধি উলংঘন কৰি ভোটাৰ ৰাইজক প্ৰলোভিত কৰাৰ অভিযোগ তুলি চিপিআই(এম)ৰ অসম ৰাজ্যিক কমিটিয়ে অসমৰ মুখ্য নিৰ্বাচনী বিষয়ালৈ পত্ৰ প্ৰেৰণ কৰিছে। ৪ এপ্ৰিলত চিপিআই(এম)ৰ ৰাজ্যিক সম্পাদক সুপ্ৰকাশ তালুকদাৰে স্বাক্ষৰ আৰু প্ৰেৰণ কৰা অভিযোগ-পত্ৰত বিজেপিৰ বিৰুদ্ধে সুনিৰ্দিষ্ট অভিযোগ উত্থাপন কৰি কোৱা হয়, ৰাজ্যৰ শাসক বিজেপি দলে নিৰ্বাচনী আচৰণ বিধি প্ৰযোজ্য হৈ থকাৰ সময়তে ৰাজ্যত আৰ্থ-সামাজিক সমীক্ষা চলোৱাৰ নামত ভোটাৰ ৰাইজৰ মাজত ব্যাপক হাৰত এখন প্ৰপত্ৰ বিতৰণ কৰিছে। প্ৰপত্ৰখন পূৰণ কৰিলেই ৰেচন কাৰ্ড থকা প্ৰতিটো পৰিয়ালক পৰ্যায়ক্ৰমে ৰাজ্য চৰকাৰৰ অৰুণোদয় আঁচনিৰ অন্তৰ্ভুক্ত কৰাৰ প্ৰতিশ্ৰুতি দিয়া হৈছে। লগতে প্ৰপত্ৰত উল্লেখ কৰা হৈছে যে "এয়া 'ডাবল ইঞ্জিন চৰকাৰৰ গেৰান্টি"। আনকি প্ৰপত্ৰখনত প্ৰধানমন্ত্ৰী নৰেন্দ্ৰ মোদী আৰু মুখ্যমন্ত্ৰী হিমন্ত বিশ্ব শৰ্মাৰ ফটোও প্ৰদৰ্শন কৰা হৈছে। শাসক বিজেপি দলে চৰকাৰী ক্ষমতাৰ অপব্যৱহাৰ আৰু নিৰ্বাচনী আচৰণ বিধি ভংগ কৰি ভোটাৰ সকলক প্ৰলোভিত কৰাৰ এয়া নিকৃষ্ট কৌশল বুলি চিপিআই(এম)ৰ অসম ৰাজ্যিক কমিটিয়ে মুখ্য নিৰ্বাচনী বিষয়াৰ ওচৰত অভিযোগ দাখিল কৰিছে। লগতে বিজেপি দলৰ এই প্ৰলোভনৰ ৰাজনীতিৰ বিৰুদ্ধে কঠোৰ অৱস্থান গ্ৰহণ তথা আগন্তুক নিৰ্বাচনটোত সকলো দলৰ প্ৰচাৰৰ বাবে সমতল ক্ষেত্ৰ প্ৰস্তুত কৰি সুস্থ আৰু নিকা নিৰ্বাচন নিশ্চিত কৰিবলৈ নিৰ্বাচন আয়োগৰ প্ৰতি আহ্বান জনোৱা হৈছে।

03/04/2024

📌গুৰুতৰ ভাবে অসুস্থ ছাত্ৰনেতা মুকুল দাস
📌উন্নত চিকিৎসাৰ বাবে মুখ্যমন্ত্ৰীলৈ আহ্বান
–-------------------------------
🖋️প্লেটফৰ্ম অসম বাৰ্তা
বৰপেটা,৩এপ্ৰিলঃ অসম আন্দোলনৰ আপোচ বিহীন ছাত্ৰনেতা, জাতীয়তাবাদ আৰু আঞ্চলিকতাবাদৰ সংগ্ৰামী, বৰপেটা পৌৰসভাৰ প্ৰাক্তন সভাপতি মুকুল দাস সম্প্ৰতি কেবাটাও ৰোগত আক্ৰান্ত হৈ গুৱাহাটীৰ এপলো হস্পিটালত চিকিৎসাধীন হৈ আছে। তেওঁৰ আশুআৰোগ্য কামনাৰে বৰপেটা জিলাৰ বিভিন্ন ঠাইত বিভিন্ন কাৰ্যসূচী ইতিমধ্যে ৰূপায়ন কৰা হৈছে। আৰ্থিক ভাৱে দূৰ্বল মুকুল দাসৰ ব্যয়বহুল চিকিৎসা ব্যক্তিগত খণ্ডৰ নাৰ্চিংহোমত কৰাতো অসম্ভৱ হৈ পৰিছে।প্ৰয়াত ভৃগু কুমাৰ ফুকন, প্ৰফুল্ল কুমাৰ মহন্তৰ সৈতে একেলগে আন্দোলন কৰা মুকুল দাসে কৃষ্ণকান্ত সন্দিকৈ ৰাজ্যিক মুক্ত বিশ্ববিদ্যালয়ৰ উপাচাৰ্য হিতেশ ডেকা অবিভক্ত কামৰূপ জিলা ছাত্ৰ সন্থাৰ সভাপতি হৈ থাকোঁতে সাধাৰণ সম্পাদকৰ গুৰু দায়িত্ব পালন কৰিছিল। অতুল বৰা,কেশৱ মহন্ত ডাঙৰীয়াই আছুৰ সভাপতি, সাধাৰণ সম্পাদক হিচাপে কাৰ্যনিৰ্বাহ কৰা সময়ত বৰপেটা জিলা ছাত্ৰ সন্থাৰ সাধাৰণ সম্পাদক হিচাপে কাৰ্যনিৰ্বাহ কৰিছিল। পৰবৰ্তী সময়ত আঞ্চলিকতাবাদৰ বিশ্বাসী মুকুল দাসে অসম গণ পৰিষদত যোগদান কৰি বৰপেটা পৌৰসভাৰ সভাপতি হিচাপে কাৰ্যনিৰ্বাহ কৰিছিল। এইজনা আপোচ বিহীন সংগ্ৰামী এতিয়া অকলে নাৰ্চিংহোমত পৰি আছে যদিও একালৰ মহাপ্ৰতাপী দূৰ্দান্ত ছাত্ৰনেতা গৰাকীৰ কাষত কোনো মন্ত্ৰী,বিধায়ক উপস্থিত নোহোৱাতো পৰিমাপৰ বিষয় বুলি আক্ষেপ প্ৰকাশ কৰি খিলঞ্জীয়া সুৰক্ষা বাহিনী, অসমৰ মুখ্য সংগঠক গোবিন্দ গায়ন, মুখ্য আহ্বায়ক কৃষ্ণকান্ত দাস আৰু খিলঞ্জীয়া সুৰক্ষা বাহিনী বৰপেটা জিলা সমিতিৰ সচিব প্ৰধান সত্যেন্দ্ৰনাথ দাসে মুকুল দাসৰ উন্নত চিকিৎসা চৰকাৰী খৰছত প্ৰদান কৰিবলৈ মুখ্যমন্ত্ৰীলৈ এক বিবৃতি যোগে বিনম্ৰতাৰে আহ্বান জনায়। ইপিনে প্ৰাক্তন ছাত্ৰ নেতা তথা সদৌ অসম ছাত্ৰ সন্থাৰ প্ৰাক্তন উপ সভাপতি প্ৰদীপ দাস,অসম সেনাৰ প্ৰাক্তন উপ মুখ্য আহ্বায়ক হেমন্ত কুমাৰ দেউৰী,আছুৰ প্ৰাক্তন সতীৰ্থ সন্মিলন, বৰপেটা জিলা সমিতিৰ সভাপতি তথা খিলঞ্জীয়া সুৰক্ষা বাহিনী, অসমৰ আইন উপদেষ্টা দীপক কুমাৰ দাস , জেষ্ঠ প্ৰাক্তন আছুনেতা ধ্বজেন দাসে মুকুল দাসৰ চিকিৎসা সন্দৰ্ভত যাৱতীয় কাম-কাজৰ নিৰীক্ষণ কৰি আছে।

28/03/2024

🖋️সঞ্জীৱ দেউৰীৰ বিশেষ কলম
==================

📌মেট্ৰিকৰ পাচত কি?
********************

◆ হাইস্কুল শিক্ষান্ত পৰীক্ষা (মেট্ৰিক) আৰু উচ্চতৰ মাধ্যমিক চূড়ান্ত পৰীক্ষা (HS) শেষ হ'ল। কিছুদিন পিছত ফলাফল ওলাব। এইখিনি সময়ত আটায়ে মুখা-মুখি হোৱা আটাইতকৈ গুৰুত্বপূৰ্ণ প্ৰশ্নটো হ'ল মেট্ৰিকৰ পাচত কি? কলা নে বিজ্ঞান নে বাণিজ্য নে অইন কিবা (Diploma Courses)? কিছুমানে সিদ্ধান্ত আগতেই লৈ থয়, কিছুমানে ফলাফল ওলোৱা লৈ অপেক্ষা কৰে। স্কুলৰ পৰীক্ষাত পোৱা নম্বৰ কেইটাই এই সিদ্ধান্ত লোৱাৰ বাবে যথেষ্ট নহয়। বহু অভিভাবকে স্কুলৰ পৰীক্ষাত ৮০-৯০ শতাংশ নম্বৰ পালেই শিক্ষাৰ্থী গৰাকী বিজ্ঞান পঢ়াৰ বাবে উপযুক্ত বুলি ধৰি লয়। কিন্তু সেই নম্বৰ কেইটা যে কিছু অনুশীলন কৰিলেই লাভ কৰিব পাৰি সেয়া অনুধাবন কৰিব নোৱাৰে। তাতোকৈও বেয়া কথা এটা হ’ল ভাষা-সাহিত্য বা সমাজ বিজ্ঞানৰ বিষয়বোৰৰ প্ৰতি শিক্ষাৰ্থীৰ মনত এক ঋণাত্মক ধাৰণা সৃষ্টি কৰিবলৈ তেওঁলোকে যত্ন কৰে। কোমল মনৰ শিক্ষাৰ্থীৰ মনত যিহেতু glamorous বস্তুৰ প্ৰতি আকৰ্ষণ বেছি, সিহতৰ মনতো কলাৰ বিষয়বোৰৰ প্ৰতি এক অস্বাভাবিক বিৰাগৰ সৃষ্টি হয়।
অইন এটা প্ৰচলিত মাপকাঠি এনেকুৱা যে মেট্ৰিকত ৬০ শতাংশ বা তাতকৈ বেছি নম্বৰ পোৱাসকলে বিজ্ঞান পঢ়ে। আজিকালিৰ হিচাপত ৬০ শতাংশ একো নম্বৰ নহয়। সেইকেইটা নম্বৰ অতি সাধাৰণ মেৰিটৰ শিক্ষাৰ্থীয়েও লাভ কৰা দেখা যায়। গতিকে মেট্ৰিকৰ মাৰ্কচিটখনেই এই সিদ্ধান্ত লোৱাৰ বাবে একমাত্ৰ ভিত্তি হ'ব নোৱাৰে।
আন কিছুমান আছে যি অইনক দেখি সিদ্ধান্ত লয়। অমূকে বিজ্ঞান পঢ়িব গতিকে মইও বিজ্ঞান পৰিম। gang ভাঙিবতো নোৱাৰি।
তাতোকৈও এটা মাৰাত্মক শেহতীয়া ট্ৰেণ্ড হৈছে গুৱাহাটীৰ এটা কোচিং প্ৰতিষ্ঠানত বহু ধন ভাঙি নামভৰ্তি কৰা। কাৰোবাৰ লক্ষ্য NEET, কাৰোবাৰ লক্ষ্য JEE- MAINS পৰীক্ষাত অৱতীৰ্ণ হোৱা। একো বেয়া কথা নহয় ডাক্তৰ- ইঞ্জিনিয়াৰ হোৱাৰ সপোন দেখাটো। কিন্তু এনে পদক্ষেপ লোৱাৰ আগতে নিজকে এবাৰ নিৰ্মোহ ভাবে বিশ্লেষণ কৰি চোৱা উচিত। তুমি আচলতে বিজ্ঞানৰ ছাত্ৰ হয়নে? গণিত সমাধান কৰি ভাল পোৱানে? পদাৰ্থ বিজ্ঞানৰ সমস্যাবোৰে তোমাক সচাকৈ আকৰ্ষিত কৰে নে? জীৱবিজ্ঞানৰ বিষয়বস্তুবোৰ তুমি সচাকৈয়ে ভাল পোৱা নে? নে কেৱল ডাক্টৰ হোৱাৰ সপোনটোকহে ভাল পোৱা? টিউচনৰ চাৰে সমাধান কৰি দিয়া প্ৰশ্নবোৰ কেবাবাৰো অনুশীলন কৰি মেট্ৰিকৰ নম্বৰকেইটা গোটাইছা নেকি? নিজকে এই প্ৰশ্নকেইটা বৰ নিষ্ঠুৰভাবে কৰা। কোনে জানে কিজানি তুমি ভাষা-সাহিত্যৰহে ছাত্ৰ বা সমাজ বিজ্ঞানৰ। কেৱল অমূকে গুৱাহাটীৰ কোচিং চেন্টাৰ এটাত নাম ভৰ্তি কৰিছে বাবে তুমিও যাব লাগিব বুলি কথা নাই। নিজকে এনেকুৱা চাপ (peer pressure) ৰ পৰা মুক্ত কৰি লোৱা। সকলো স্বচ্ছ দেখিবা। এনে বিশ্লেষণৰ অন্তত যদি তুমি নিজকে বিজ্ঞানৰ ছাত্ৰ বুলি বিবেচনা কৰা তেন্তে আগবাঢ়ি যোৱা তোমাৰ সপোনৰ পিছে পিছে।
অভিভাবকসকলেও নিজকে সামাজিক চাপ (societal pressure) ৰ পৰা মুক্ত কৰি ল’ব লাগিব। চোধুৰীৰ লৰাক বা হুছেইনৰ ছোৱালীক পঠাইছে বুলিয়ে আপুনিও তাকেই কৰিব লাগিব বুলি কথা নাই। প্ৰতিযোগিতাত নানামিব। এনেধৰণৰ তীব্ৰ প্ৰতিযোগিতামূলক পৰীক্ষাত অৱতীৰ্ণ হ’বলৈ যি ধৰণৰ potential থকা দৰকাৰ সেয়া আপোনাৰ ল'ৰাৰ/ছোৱালীৰ আছে নে নাই বিশ্লেষণ কৰক। পাৰিলে সিহঁতৰ শিক্ষকৰ পৰা পৰামৰ্শ লওঁক। যদি আছে, আগবঢ়াই দিয়ক। ডাক্টৰ-ইঞ্জিনিয়াৰ হোৱাটো একো বেয়া কথা নহয়। কিন্তু যদি তেনে potential নাই, তেন্তে কথাবোৰ পুনৰ বিবেচনা কৰক। বহুতে আকৌ এনেকৈও কব খুজে যে ঘৰত থাকিলে কথা একদম নুশুনে, মুখে মুখে তৰ্ক কৰে, নপঢ়ে, বেছিভাগ সময় মোবাইলতে থাকে, গতিকে গুৱাহাটীৰ কোচিং চেণ্টাৰ এটাত নাম লগাই দিয়াই উত্তম পথ। আপুনি ভবাৰ দৰে কথাবোৰ নঘটিবও পাৰে। কোচিং চেণ্টাৰৰ চাৰসকলৰ উচ্চপৰ্যায়ৰ শ্ৰেণীবোৰ (যিবিলাক NEET বা JEE-MAINSৰ standard ত প্ৰস্তুত কৰা হয়) যদি শিক্ষাৰ্থীৰ মূৰৰ উপৰেদি যায়, তেতিয়া কথাবোৰ বেছি বেয়াৰ ফালেহে ঢাল খাব পাৰে।
এনে সিদ্ধান্ত লোৱাৰ সময়ত আচলতে শিক্ষাৰ্থীয়ে আটাইতকৈ বেছি গুৰুত্ব দিব লাগে নিজক। নিজৰ সপোন (career goal), নিজৰ দক্ষতা ইত্যাদি বিশ্লেষণ কৰি চাব লাগে। ভাষা-সাহিত্য ভাল লাগে নে গণিত- বিজ্ঞান ভাল লাগে নে সমাজ বিজ্ঞান? এনে বহু ছাত্ৰ-ছাত্ৰী পাইছো যিসকলে আচলতে ভাষা/সাহিত্য বা সমাজ বিজ্ঞানৰ বিষয়সমূহ অধ্যয়ন কৰিলে হয়তো বহুত ভাল কৰিলে হেতেন কিন্তু বিজ্ঞান পঢ়ি যথেষ্ট চাপত থাকে আৰু হতাশাত ভোগে। অৱশ্যে এটা কথা ঠিক যে HS ত বিজ্ঞান শাখাত পঢ়িলেও পিচলৈ humanity বা social science ৰ বিষয় লৈ পঢ়িব পাৰি কিন্ত কলাৰ পৰা আহি বিজ্ঞানৰ বিষয়সমূহ পঢ়া সম্ভব নহয়। কিছুসংখ্যকে আকৌ ক'ব খোজে যে HS পৰ্যায়লৈ বিজ্ঞান শাখাত পঢ়িলে ভৱিষ্যতে বহুত সুবিধা হয়। তাৰ পিছত যিকোনো বিষয় লৈ পঢ়িব পৰা যায়।
মূল কথা হ’ল সিদ্ধান্ত নিজৰ হ’ব লাগিব। সিদ্ধান্তত উপনীত হোৱাত অভিভাবকৰ ভূমিকা নিশ্চয় থাকিব ।অভিভাবকৰ অহেতুক ইচ্ছাৰ প্ৰভাব , সহপাঠীৰ ঋণাত্মক চাপ (peer pressure) ৰ পৰা মুক্ত হ’ব পাৰিব লাগিব। কিছুমান বিষয় বা career ৰ লগত জড়িত হৈ থকা glamour ক অৱজ্ঞা কৰিব পাৰিব লাগিব। নিজৰ সপোন (career goal) ত উপনীত হোৱাৰ বাবে ভালপোৱা বিষয় বাচি লৈ আগবাঢ়ি যাব লাগিব।
শেষত দুটা কথা কওঁ। বিজ্ঞান পঢ়িবলৈ সিদ্ধান্ত লোৱা সকলে online coaching আৰু offline tuition ৰ ভিতৰত যি কোনো এটা বাচি ল’ব লাগিব। দুয়োটা একেলগে সম্ভব নহয়।এই ক্ষেত্ৰটো সিদ্ধান্ত নিজৰ।
কলা শাখাত নামভৰ্তি কৰিব বিচৰা সকলে বিষয় বাচনিত সাবধান হওঁক। কেৱল কেইটামান নম্বৰ বেছি পোৱাৰ আশাত ভূগোল, বুৰঞ্জী, অৰ্থনীতি আৰু ৰাজনীতি বিজ্ঞানৰ দৰে বিষয় বাদ দি বেলেগ বিষয় নল’ব। এই বিষয়কেইটা ভৱিষ্যতে প্ৰতিযোগিতামূলক পৰীক্ষাৰ বাবে বহুত সহায়ক হয়।
শেষত এটাই কথা –‘There is no alternative to hard work’.

26/03/2024

শুভেচ্ছা বাৰ্তা

23/03/2024

📌কাইলৈৰ পৰা তিনিদিনীয়া কাৰ্যসূচীৰে ঐতিহ্যমণ্ডিত বৰপেটা সত্ৰত দৌল যাত্রা মহোৎসৱ▪️
-------------------–---------------------
🖋️প্লেটফৰ্ম অসম বাৰ্তা
বৰপেটা, ২৩মার্চঃ ভিন্নৰঙী আলোক সজ্জাৰ অপৰূপ সৌন্দর্যত উজলি উঠিছে ঐতিহ্যমণ্ডিত বৰপেটা সত্ৰৰ চৌপাশ। গোন্ধযাত্রা বা বন্ধুৎসৱৰ মাজেৰেই কাইলৈৰ পৰা বৰপেটা সত্ৰত আৰম্ভ হ'ব বৰপেটা বাসীৰ অতি আদৰৰ এইবেলিৰ তিনিদিনীয়া দৌল যাত্ৰা মহোৎসৱ। চহৰখনৰ বিভিন্ন ঠাইত কিশোৰ-কিশোৰী, ডেকা-গাভৰুৰ কণ্ঠত পুৱাৰ পৰা দুপৰ নিশালৈ নিগৰা হোলীগীতৰ মূৰ্চনাত কৃষ্ণ ভক্তি ৰসত উথলি উঠিছে বৰপেটা চহৰৰ চৌপাশ। একেদৰে বৰপেটা সত্র চৌহদলৈ স্বতঃস্ফূর্তভাবেই ডেকা-গাভৰুৰ পৰা বয়োজ্যেষ্ঠ জন দলে দলে সমবেত হৈ ঢালিছে ভক্তিপূর্ণ হোলীগীতৰ অমিয়া ৰস। ৰাজ্যৰ কেবাটাও বৈদ্যুতিন সংবাদ মাধ্যমেও সম্প্ৰচাৰ কৰিছে হোলী গীত কেন্দ্রিক বিশেষ অনুষ্ঠান। দৌল মহোৎসব কেন্দ্রিক এই সামগ্রিক পৰিৱেশ ৰাজ্যৰ বিভিন্ন প্ৰান্তৰ পৰা অহা যাত্ৰীসকলৰ বাবে হৈ পৰিছে বিশেষ আকর্ষণীয়। ইয়াৰ উপৰিও চহৰখনৰ বিভিন্ন স্থানত অনুষ্ঠিত হৈ থকা কেবাখনো হোলীগীত প্রতিযোগিতাই দৌল উৎসৱৰ মাদকতা বৃদ্ধি কৰিছে।
দৌল মহোৎসৱৰ উপলক্ষে চূণ-তেল-ৰঙ সানি সজাই পৰাই তোলা হৈছে বৰপেটা সত্র চৌহদ। ১৫০৫ শকত মহাপুৰুষ মাধৱদেৱে প্রতিষ্ঠা কৰা বৰপেটা সত্ৰৰ দালান (সম্মুখৰ মুখ্য প্রবেশ দ্বাৰ) খন আলোক সজ্জাৰে শোভিত কৰি তোলা হৈছে। একেদৰে চহৰখনৰ আমবাৰী হাটী, দক্ষিণহাটী আৰু নবীন চন্দ্ৰ বৰদলৈ পাৰ্কৰ কাষত তিনিখন সু-উচ্চ বৈদ্যুতিক তোৰণৰ ব্যৱস্থা কৰা হৈছে। আনহাতে, বিভিন্ন অনুষ্ঠান-প্রতিষ্ঠানে পথ সমূহত নিজাববীয়াকৈ ডাঙৰ ডাঙৰ আদৰণি তোৰণৰ ব্যবস্থা কৰিছে।
দৌল মহোৎসৱৰ প্ৰথম দিনা কাইলৈ বহৃৎসৱ অর্থাৎ গোন্ধ যাত্রা। বিয়লি সত্ৰৰ নিত্য-নৈমিত্তিক প্রসঙ্গৰ পিছত দৌল-গোবিন্দক সত্ৰৰ মণিকূট গৃহ (ভাজঘৰ) ৰ পৰা গায়ন-বায়ন আৰু ঢুলীয়াৰে পূব পিনৰ দুৱাৰেৰে উলিয়াই আনি মঠৰ চোতালত ৰখা হ'ব। পিছত কলীয়া ঠাকুৰ গোসাইক (শ্রীকৃষ্ণ) ঘাই দুৱাৰেদি উলিয়াই আনি দুয়ো দুয়ো গোসাইক মঠৰ চোতালত এখন বৰ শৰাইত ৰখা হ'ব। সন্ধিয়া গায়ন-বায়ন সহ দুয়ো গোসাইক টুপৰ চোতাললৈ আনি প্রজ্বলিত মেজিৰ চৌপাশে সাত পাক ঘুৰোৱা হ'ব। সেই সময়তে সত্ৰৰ কাৰ্যালয়ৰ সন্মুখৰ চোতালত স্থানীয় আতচবাজী কলা-কুশলীৰ দ্বাৰা নির্মিত থলুৱা আতচবাজী প্রদর্শন কৰা হ'ব। আকাশলৈ বুলি উৰিব বৰপেটাৰ বিখ্যাত 'ফানুচ'। গোসাইক মেজিৰ চৌপাশে সাত পাক ঘুৰোৱাৰ পিছত প্রথমে যোগমোহন গৃহ আৰু পিছত গোসাইদ্বয়ক দৌল গৃহত আৰোহণ কৰোৱা হ'ব। ২৪ মার্চত ভৰদৌল আৰু ২৬ মার্চ মঙ্গলবাৰে সুৱেৰী বা ফাকুৱা উৎসৱ অনুষ্ঠিত হ'ব। দৌল মহোৎসৱক কেন্দ্ৰ কৰি বৰপেটা সত্ৰৰ আশে-পাশে স্থাপন কৰা হৈছে বহু সংখ্যক বাণিজ্যিক বিপনী। এই বিপনী সমূহত বৰপেটাৰ বিভিন্ন থলুৱা মিঠাই, বিখ্যাত 'ৰঙা ডিমা', 'আলু ভাজা' আৰু ভিন্ন খাদ্য সামগ্রীৰ উপৰি বস্তু, গহনা, বস্তু বিপনী, কাই-পিতলৰ সামগ্রী, বেলুন-পুতলা, ৰঙ-বিবর্তী ফাকু গুড়ি, ফিচকাৰী আদি বিক্ৰীৰ বাবে সজাই-পৰাই তোলা হৈছে। বৰপেটা সত্ৰৰ উপৰি গুৰুজনাৰ দ্বাৰা প্ৰতিষ্ঠিত পাটবাউসী থান(সত্ৰ), মহাপুৰুষ শ্ৰী শ্ৰী মাধৱদেৱে প্ৰতিষ্ঠা কৰা গণককুছি
আৰু সুন্দৰীদিয়া সত্রতো যথা ৰীতি দৌল উৎসৱ উদযাপন কৰা হ'ব।