ᱟᱭᱳ ᱟᱲᱟᱝ - Ayo Arang

28/01/2024

ᱢᱟᱹᱱᱤᱡ ᱢᱤᱱᱟ ᱵᱟᱥᱠᱮ (Mrs. Meena Baskey, Bhubaneswar, Odisha) ᱛᱤᱠᱤᱱᱟᱜ ᱛᱤᱛᱮ ᱜᱟᱞᱟᱝ ᱜᱟᱵᱟᱱ ᱚᱱᱚᱬᱦᱮ *ᱥᱟᱹᱜᱟᱹᱭ*, ᱫᱮᱞᱟ ᱵᱚᱱ ᱯᱟᱲᱦᱟᱣ ᱥᱟᱸᱜᱮᱭᱟ ᱟᱨ ᱞᱟᱛᱟᱨ ᱨᱮᱱᱟᱜ Link ᱡᱚᱴᱮᱫ ᱠᱟᱛᱮ Website ᱦᱚᱸ ᱦᱤᱨᱤ ᱛᱟᱵᱚ ᱯᱮ ᱾

*'ᱥᱟᱹᱜᱟᱹᱭ'*
DECEMBER 26, 2023
BY ᱢᱟᱹᱱᱤᱡ ᱢᱤᱱᱟ ᱵᱟᱥᱠᱮ
1 MIN READ

ᱫᱷᱟᱹᱨᱛᱤ ᱨᱮ ᱡᱟᱱᱟᱢ ᱳᱯᱮᱞᱚᱜ ᱥᱟᱶᱛᱮ
ᱥᱟᱹᱜᱟᱹᱭ ᱢᱟᱭᱟ ᱱᱟᱺᱬᱤᱛᱮ ᱛᱚᱞ ᱪᱷᱟᱸᱫᱟ ᱦᱟ
ᱡᱤᱣᱤ ᱵᱟᱹᱛᱤ ᱤᱬᱤᱡ ᱞᱮᱱᱠᱷᱟᱱ ᱟᱨᱦᱚᱸ
ᱥᱟᱱᱟᱢ ᱥᱟᱹᱜᱟᱹᱭ ᱛᱚᱯᱟᱜ ᱴᱩᱸᱜᱟᱹᱣ ᱠᱮᱪᱮᱫᱚᱜᱼᱟ ᱾

ᱱᱚᱶᱟ ᱡᱤᱭᱚᱱ ᱛᱟᱲᱟᱢ ᱦᱚᱨ ᱰᱟᱦᱟᱨ ᱨᱮ
ᱟᱹᱰᱤ ᱞᱮᱠᱟᱱ ᱥᱟᱹᱜᱟᱹᱭ ᱥᱟᱶ ᱡᱚᱜᱼᱯᱚᱲᱟᱣᱼᱟ
ᱚᱠᱟ ᱥᱤᱵᱤᱞ ᱚᱠᱟ ᱠᱟᱥᱟ ᱚᱠᱟ ᱫᱚ ᱦᱮᱞᱣᱮᱫᱼᱟ
ᱵᱟᱭ ᱢᱤᱫ ᱥᱚᱢᱟᱱ ᱟᱯᱟᱱ ᱟᱹᱯᱤᱱ ᱜᱮᱭᱟ ᱾

ᱜᱚᱨᱚᱡᱽ ᱫᱩᱞᱟᱹᱲ ᱨᱮᱱᱟᱜ ᱫᱟᱜ ᱟᱨ ᱠᱷᱚᱛ
ᱥᱟᱹᱜᱟᱹᱭ ᱫᱟᱨᱮ ᱨᱮ ᱡᱟᱜᱟᱣ ᱦᱩᱭᱩᱜᱼᱟ
ᱛᱚᱵᱮ ᱮᱱᱟᱝ ᱜᱮ ᱫᱟᱨᱮ ᱞᱮᱜᱮᱡᱚᱜ ᱞᱮᱠᱟ
ᱥᱟᱹᱜᱟᱹᱭ ᱦᱚᱸ ᱥᱩᱞᱩᱠ ᱥᱩᱯᱩᱞᱩᱠ ᱛᱟᱦᱮᱸᱱᱟ ᱾

ᱡᱚᱠᱷᱚᱱ ᱦᱤᱸᱥᱟᱹ ᱥᱩᱭᱟᱹ ᱮᱫᱽᱨᱮ ᱟᱹᱲᱤᱥ
ᱵᱟᱹᱲᱤᱡ ᱵᱟᱝ ᱴᱷᱤᱠ ᱩᱭᱦᱟᱹᱨ ᱵᱷᱟᱵᱽᱱᱟ
ᱥᱚᱲᱚ ᱵᱚᱞᱚ ᱛᱩᱠᱟᱹ ᱵᱟᱥᱟᱜ-ᱟ ᱢᱚᱱᱮ ᱨᱮ
ᱛᱚᱠᱷᱚᱱ ᱜᱮ ᱠᱩᱥᱤ ᱨᱟᱹᱥᱠᱟᱹᱨᱮ ᱵᱤᱥ ᱞᱮᱣᱦᱟᱜᱼᱟ ᱾

ᱠᱟᱛᱷᱟ ᱨᱟᱯᱟᱪᱟᱜ ᱠᱷᱟᱹᱯᱟᱹᱨᱤᱭᱟᱹᱣ ᱡᱷᱚᱜ
ᱯᱟᱲᱟᱜ ᱢᱚᱪᱟ ᱠᱷᱚᱱ ᱨᱚᱲ ᱚᱰᱚᱠᱚᱜ ᱟᱹᱛᱷᱟᱹᱣᱲᱤᱭᱟᱜ
ᱴᱷᱩᱼᱚᱴᱮᱡ ᱯᱷᱟᱹᱱᱴᱤᱞᱼᱯᱟᱹᱥᱤᱨ ᱜᱩᱢ ᱛᱩᱫᱚᱜᱼᱟ
ᱥᱟᱹᱜᱟᱹᱭ ᱠᱚᱭ ᱯᱟᱲᱟᱜ ᱠᱮᱪᱟᱜ ᱦᱟᱹᱴᱤᱧ ᱠᱟᱜᱼᱟ ᱾

ᱧᱮᱯᱮᱞ ᱨᱚᱯᱚᱲ ᱟᱨ ᱵᱟᱝ ᱥᱟᱜᱼᱱᱟ ᱦᱟ
ᱩᱯᱩᱥᱟᱹᱫ ᱛᱮ ᱡᱤᱭᱚᱱ ᱰᱟᱦᱟᱨ ᱢᱩᱪᱟᱹᱫᱚᱜᱼᱟ
ᱥᱟᱹᱜᱟᱹᱭ ᱯᱷᱤᱫᱽᱞᱤ ᱢᱚᱥᱨᱟ ᱠᱟᱛᱮ ᱛᱚᱯᱟᱜᱚᱜ
ᱥᱚᱝᱥᱟᱨ ᱠᱷᱚᱱ ᱦᱚᱸ ᱵᱤᱫᱟᱹᱭ ᱤᱫᱤ ᱦᱩᱭᱩᱜᱼᱟ ᱾

ᱜᱩᱱᱤ ᱵᱷᱟᱹᱵᱤᱛ ᱨᱮᱱᱟᱜ ᱠᱟᱛᱷᱟ ᱫᱚ ᱚᱱᱟᱜᱮ
ᱚᱠᱟ ᱦᱩᱱᱟᱹᱝ ᱨᱟᱢᱟᱛᱮ ᱛᱚᱯᱟᱜ ᱜᱟᱱ ᱠᱚᱜᱼᱟ
ᱪᱮᱫᱟᱜ ᱚᱱᱟ ᱵᱷᱤᱱᱴᱤ ᱵᱩᱰᱤᱭᱟ ᱛᱮᱢ ᱢᱟᱜᱟ
ᱚᱱᱟ ᱥᱟᱰᱮ ᱛᱮᱜᱮ ᱢᱚᱱᱮ ᱡᱤᱣᱤ ᱡᱚᱠᱷᱚᱢᱚᱜᱼᱟ ᱾

ᱪᱮᱫᱟᱜ ᱥᱮ ᱨᱟᱢᱟ ᱛᱮ ᱠᱮᱪᱟᱜ ᱠᱚᱜ ᱠᱷᱟᱱ
ᱥᱟᱢᱟᱜ ᱥᱟᱰᱮ ᱞᱮᱠᱟ ᱨᱚᱲ ᱵᱟᱝ ᱛᱟᱨᱠᱚᱜᱼᱟ
ᱚᱠᱚᱭ ᱦᱚᱸ ᱦᱟᱹᱥᱩ ᱠᱚᱥᱴᱚ ᱵᱟᱠᱚ ᱵᱩᱡᱷᱟᱹᱣᱼᱟ
ᱥᱩᱞᱩᱠ ᱥᱟᱹᱜᱟᱹᱭ ᱨᱚᱜᱚᱲ ᱛᱩᱞᱤ ᱛᱟᱦᱮᱸ ᱠᱚᱜᱼᱟ ᱾

ᱱᱤᱡᱚᱨ ᱜᱚᱨᱚᱵᱽ ᱫᱷᱚᱢᱚᱠ ᱠᱷᱟᱹᱛᱤᱨ ᱜᱮ ᱦᱚᱲ
ᱚᱠᱚᱭᱟᱜ ᱥᱟᱢᱟᱝ ᱨᱮ ᱛᱤᱨᱩᱵ ᱵᱟᱝ ᱥᱟᱱᱟᱭᱟ
ᱤᱸᱜᱩᱫᱚᱜ ᱠᱷᱟᱱ ᱵᱟᱺᱨᱰᱩ ᱪᱚᱴᱛᱮ ᱯᱟᱨᱚᱢᱚᱜᱼᱟ
ᱫᱟᱨᱮ ᱰᱟᱹᱨ ᱞᱮᱠᱟ ᱥᱟᱹᱜᱟᱹᱭ ᱱᱟᱯᱟᱭ ᱜᱮ ᱛᱟᱦᱮᱸᱱᱟ ᱾
***

ᱚᱱᱚᱞ ᱚᱱᱚᱬᱦᱮ ᱥᱟᱹᱜᱟᱹᱭ December 26, 2023by ᱢᱟᱹᱱᱤᱡ ᱢᱤᱱᱟ ᱵᱟᱥᱠᱮ1 min read ᱫᱷᱟᱹᱨᱛᱤ ᱨᱮ ᱡᱟᱱᱟᱢ ᱳᱯᱮᱞᱚᱜ ᱥᱟᱶᱛᱮ ᱥᱟᱹᱜᱟᱹᱭ ᱢᱟᱭᱟ ᱱᱟᱺᱬᱤᱛᱮ ᱛᱚᱞ ᱪᱷᱟᱸᱫᱟ .....

22/01/2024

ᱢᱟᱹᱱᱤᱡ ᱥᱚᱞᱢᱟ ᱦᱟᱸᱥᱫᱟ (Mrs. Salma Hansda, Bilashpur, Chhatishgargh) ᱟᱜ ᱢᱤᱫ ᱥᱚᱨᱮᱥ ᱠᱟᱹᱦᱱᱤ *'ᱴᱟᱠᱟ ᱟᱨᱡᱟᱣ ᱫᱟᱨᱮ'* , ᱫᱮᱞᱟ ᱥᱟᱱᱟᱢ ᱠᱚᱛᱮ ᱵᱚ ᱯᱟᱲᱦᱟᱣ ᱥᱟᱸᱜᱮᱭᱟ ᱾


DECEMBER 26, 2023
BY ᱢᱟᱹᱱᱤᱡ ᱥᱚᱞᱢᱟ ᱦᱟᱸᱥᱫᱟ
1 COMMENT

ᱯᱮ ᱵᱚᱭᱦᱟ ᱠᱚ ᱛᱟᱦᱮᱸ ᱠᱟᱱᱟ, ᱩᱱᱠᱩ ᱛᱟᱦᱮᱱ ᱞᱟᱹᱜᱤᱱ ᱚᱲᱟᱜ ᱦᱚᱸ ᱵᱟᱝ ᱛᱟᱦᱮᱸ ᱠᱟᱱᱟ ᱾ ᱢᱤᱫ ᱫᱤᱱ ᱫᱚ ᱡᱚᱛᱚ ᱵᱚᱭᱦᱟ ᱚᱲᱟᱜ ᱵᱮᱱᱟᱣ ᱞᱟᱹᱜᱤᱱ ᱡᱟᱜᱟ ᱯᱟᱱᱛᱮ ᱠᱚ ᱚᱰᱚᱠ ᱮᱱᱟ ᱾ ᱥᱤᱛᱩᱝ ᱫᱤᱱ ᱛᱟᱦᱮᱸ ᱠᱟᱱᱟ, ᱟᱦᱟᱞ ᱟᱦᱟᱞ ᱥᱤᱛᱩᱝ ᱨᱮ ᱵᱟᱹᱫᱽ ᱟᱲᱮ ᱛᱮ ᱛᱟᱲᱟᱢ ᱛᱟᱲᱟᱢ ᱛᱮ ᱢᱤᱫ ᱰᱟᱹᱦᱤ ᱠᱚ ᱧᱟᱢ ᱠᱮᱫᱼᱟ ᱾ ᱚᱱᱟ ᱰᱟᱹᱦᱤ ᱨᱮ ᱩᱞ ᱫᱟᱨᱮ ᱛᱟᱦᱮᱸ ᱠᱟᱱᱟ, ᱚᱱᱟ ᱫᱟᱨᱮ ᱵᱩᱴᱟᱹ ᱨᱮᱭᱟᱜ ᱜᱚᱢᱦᱮᱲ ᱩᱢᱩᱞ ᱨᱮᱠᱚ ᱫᱩᱲᱩᱵ ᱡᱤᱨᱟᱹᱣ ᱮᱱᱟ ᱾

ᱩᱞ ᱫᱟᱨᱮ ᱠᱷᱚᱱ ᱩᱞ ᱵᱤᱞᱤ ᱛᱤᱭᱩᱜ ᱠᱟᱛᱮᱱ ᱦᱮᱲᱮᱢ ᱦᱮᱲᱮᱢ ᱩᱞ ᱵᱤᱞᱤ ᱠᱚ ᱡᱚᱢ ᱠᱮᱫᱼᱟ ᱾ ᱢᱟᱨᱟᱝ ᱵᱚᱭᱦᱟᱭ ᱢᱮᱱ ᱠᱮᱫᱼᱟ, ᱤᱧ ᱫᱚ ᱱᱚᱶᱟ ᱡᱟᱜᱟᱹᱧ ᱠᱩᱥᱤᱭᱟᱫᱼᱟ, ᱪᱮᱫᱟᱜ ᱥᱮ ᱱᱚᱸᱰᱮ ᱩᱞ ᱫᱟᱨᱮ ᱢᱮᱱᱟᱜᱼᱟ ᱟᱨ ᱩᱞ ᱫᱟᱨᱮ ᱫᱚ ᱟᱹᱰᱤ ᱱᱟᱯᱟᱭᱟ ᱾ ᱡᱮᱢᱚᱱ ᱵᱮᱨᱮᱞ ᱩᱞ ᱨᱮᱭᱟᱜ ᱟᱪᱟᱨ ᱦᱚᱸ ᱵᱮᱱᱟᱣᱜᱼᱟ, ᱨᱤᱫ ᱜᱩᱸᱰᱟᱹ ᱠᱟᱛᱮ ᱪᱟᱹᱴᱱᱤ ᱦᱚᱸ ᱵᱮᱱᱟᱣᱜᱼᱟ ᱟᱨ ᱵᱮᱨᱮᱞ ᱩᱞ ᱨᱚᱦᱚᱲ ᱠᱟᱛᱮ ᱛᱟᱭᱚᱢ ᱛᱮ ᱩᱛᱩ ᱢᱟᱦᱨᱚᱜᱽ ᱚᱠᱛᱚ ᱩᱛᱩ ᱠᱟᱛᱮ ᱠᱤ ᱵᱟᱝ ᱡᱟᱦᱟᱱᱟᱜ ᱩᱛᱩ ᱠᱚ ᱪᱚᱴᱠᱟᱨᱚᱜ ᱞᱟᱹᱜᱤᱱ ᱢᱮᱥᱟ ᱜᱟᱱᱚᱜᱼᱟ ᱾ ᱟᱨ ᱵᱤᱞᱤ ᱠᱟᱛᱮ ᱦᱚᱸ ᱡᱚᱢ ᱜᱟᱱᱚᱜᱼᱟ ᱾ ᱢᱟᱨᱟᱝ ᱵᱚᱭᱦᱟ ᱫᱚ ᱟᱹᱰᱤ ᱨᱟᱹᱥᱠᱟᱹᱭ ᱵᱩᱡᱷᱟᱹᱣ ᱠᱮᱫᱼᱟ ᱟᱫᱚ ᱚᱸᱰᱮ ᱜᱮ ᱚᱲᱟᱜ ᱵᱮᱱᱟᱣ ᱠᱟᱛᱮ ᱛᱟᱦᱮᱸ ᱮᱱᱟᱭ ᱾

ᱵᱟᱨ ᱵᱚᱭᱦᱟ ᱫᱚ ᱛᱟᱲᱟᱢ ᱛᱟᱲᱟᱢ ᱛᱮ ᱢᱟᱲᱟᱝ ᱥᱮᱫ ᱠᱤᱱ ᱞᱟᱦᱟ ᱤᱫᱤ ᱭᱮᱱᱟ ᱾ ᱟᱫᱚ ᱦᱚᱨ ᱨᱮ ᱠᱟᱭᱨᱟ ᱫᱟᱨᱮ ᱠᱤᱱ ᱧᱟᱢ ᱠᱮᱫᱼᱟ, ᱩᱱ ᱚᱠᱛᱚ ᱜᱚᱴᱟ ᱥᱮᱨᱢᱟᱭ ᱨᱤᱢᱤᱞ ᱮᱥᱮᱫ ᱠᱮᱫᱼᱟ ᱟᱨ ᱡᱷᱤᱯᱤᱨ ᱡᱷᱤᱯᱤᱨ ᱫᱟᱜ ᱡᱟᱹᱲᱤᱭ ᱮᱦᱚᱵ ᱠᱮᱫᱼᱟ ᱾ ᱠᱷᱟᱱ ᱜᱮ ᱵᱟᱱᱟᱨ ᱵᱚᱭᱦᱟ ᱚᱱᱟ ᱠᱟᱭᱨᱟ ᱥᱟᱠᱟᱢ ᱜᱮᱫ ᱟᱹᱜᱩ ᱠᱟᱛᱮ ᱚᱱᱟ ᱥᱟᱠᱟᱢ ᱛᱮᱠᱤᱱ ᱩᱢᱩᱞᱮᱱᱟ ᱟᱨ ᱫᱟᱜ ᱡᱟᱹᱲᱤ ᱠᱷᱚᱱ ᱠᱤᱱ ᱵᱟᱧᱪᱟᱣ ᱮᱱᱟ, ᱤᱱᱟᱹᱜ ᱛᱮᱜᱮ ᱫᱟᱜ ᱡᱟᱹᱲᱤ ᱦᱚᱸ ᱪᱟᱵᱟᱭᱮᱱᱟ ᱾ ᱤᱱᱟᱹ ᱛᱟᱭᱚᱢ ᱛᱟᱞᱟ ᱵᱚᱭᱦᱟ ᱫᱚ ᱫᱟᱠᱟ ᱨᱮᱸᱜᱮᱡ ᱠᱮᱫᱮᱭᱟ, ᱦᱩᱰᱤᱧ ᱵᱚᱭᱦᱟ ᱦᱚᱸᱭ ᱢᱮᱱ ᱠᱮᱫᱼᱟ ᱤᱧ ᱦᱚᱸ ᱟᱹᱰᱤ ᱡᱩᱨ ᱫᱟᱠᱟ ᱨᱮᱸᱜᱮᱡ ᱤᱧ ᱠᱟᱱᱟ, ᱠᱷᱟᱱ ᱜᱮ ᱵᱟᱱᱟᱨ ᱵᱚᱭᱦᱟ ᱠᱟᱭᱨᱟ ᱥᱟᱠᱟᱢ ᱜᱮᱫ ᱠᱮᱪᱟᱜ ᱠᱟᱛᱮ ᱠᱤᱱ ᱟᱹᱜᱩ ᱠᱮᱫᱼᱟ ᱾ ᱚᱱᱟ ᱥᱟᱠᱟᱢ ᱨᱮ ᱫᱟᱠᱟ ᱦᱟᱹᱴᱤᱧ ᱠᱟᱛᱮ ᱠᱤᱱ ᱡᱚᱢ ᱠᱮᱫᱼᱟ, ᱚᱱᱟ ᱛᱟᱭᱚᱢ ᱠᱟᱭᱨᱟ ᱵᱤᱞᱤ ᱦᱚᱸ ᱜᱚᱫ ᱠᱟᱛᱮ ᱠᱤᱱ ᱡᱚᱢ ᱠᱮᱫᱼᱟ ᱾ ᱛᱟᱞᱟ ᱵᱚᱭᱦᱟᱭ ᱢᱮᱱ ᱠᱮᱫᱼᱟ ᱤᱧ ᱫᱚ ᱱᱚᱸᱰᱮ ᱜᱮ ᱚᱲᱟᱜ ᱤᱧ ᱵᱮᱱᱟᱣᱟ ᱾ ᱠᱟᱭᱨᱟ ᱫᱟᱨᱮ ᱫᱚ ᱟᱹᱰᱤ ᱱᱟᱯᱟᱭᱟ, ᱠᱟᱭᱨᱟ ᱵᱤᱞᱤ ᱠᱟᱛᱮ ᱡᱚᱢ ᱜᱟᱱᱚᱜᱼᱟ ᱵᱮᱨᱮᱞ ᱠᱟᱭᱨᱟ ᱥᱟᱶᱛᱮ ᱵᱟᱦᱟ ᱟᱨ ᱢᱟᱡᱽ ᱩᱛᱩ ᱦᱚᱸ ᱜᱟᱱᱚᱜᱼᱟ, ᱟᱨ ᱟᱹᱠᱷᱨᱤᱧ ᱠᱟᱛᱮ ᱴᱟᱠᱟ ᱯᱩᱭᱥᱟᱹ ᱦᱚᱸ ᱟᱨᱡᱟᱣ ᱜᱟᱱᱚᱜᱼᱟ ᱾ ᱠᱟᱭᱨᱟ ᱥᱟᱠᱟᱢ ᱦᱚᱸ ᱟᱹᱰᱤ ᱞᱮᱠᱟᱱ ᱠᱟᱹᱢᱤ ᱨᱮ ᱞᱟᱜᱟᱛᱚᱜᱼᱟ ᱾ ᱚᱱᱟᱛᱮ ᱛᱟᱞᱟ ᱵᱚᱭᱦᱟ ᱦᱚᱸ ᱨᱟᱹᱥᱠᱟᱹ ᱛᱮ ᱚᱸᱰᱮ ᱜᱮ ᱚᱲᱟᱜ ᱮ ᱵᱮᱱᱟᱣ ᱠᱮᱫᱼᱟ ᱾

ᱦᱩᱰᱤᱧ ᱵᱚᱭᱦᱟ ᱫᱚ ᱛᱟᱲᱟᱢ ᱛᱟᱲᱟᱢ ᱛᱮ ᱟᱨ ᱦᱚᱸ ᱢᱟᱲᱟᱝ ᱥᱮᱫ ᱮ ᱞᱟᱦᱟ ᱤᱫᱤᱭᱮᱱᱟ, ᱦᱚᱨ ᱨᱮ ᱢᱤᱫ ᱱᱟᱹᱨᱭᱟᱹᱞ ᱫᱟᱨᱮ ᱧᱟᱢ ᱠᱮᱫᱼᱟᱭ ᱫᱟᱨᱮ ᱫᱚ ᱱᱟᱱᱦᱟ ᱜᱮᱭᱟ ᱟᱨ ᱟᱹᱰᱤ ᱩᱥᱩᱞ ᱫᱟᱨᱮ ᱟᱠᱟᱱᱟ ᱟᱫᱚᱭ ᱢᱮᱱ ᱠᱮᱫᱼᱟ ᱟᱹᱰᱤ ᱡᱩᱨ ᱫᱟᱜ ᱛᱮᱛᱟᱝ ᱤᱧ ᱠᱟᱱᱟ, ᱩᱱ ᱚᱠᱛᱚ ᱢᱤᱫᱴᱟᱹᱝ ᱱᱟᱹᱨᱭᱟᱹᱞ ᱵᱷᱩᱰ ᱢᱮᱱᱛᱮ ᱧᱩᱨᱮᱱᱟ, ᱟᱫᱚ ᱡᱷᱚᱞᱟ ᱠᱷᱚᱱ ᱪᱷᱩᱨᱤ ᱚᱰᱚᱠ ᱠᱮᱫᱼᱟᱭ ᱟᱨ ᱱᱟᱹᱨᱭᱟᱹᱞ ᱩᱨ ᱥᱟᱯᱷᱟ ᱠᱟᱛᱮᱭ ᱵᱷᱩᱜᱟᱹᱜ ᱠᱮᱫᱼᱟ ᱟᱨ ᱨᱮᱭᱟᱲ ᱨᱮᱭᱟᱲ ᱦᱮᱲᱮᱢ ᱫᱟᱜ ᱮ ᱧᱩ ᱠᱮᱫ ᱠᱷᱟᱱ ᱦᱚᱲᱢᱚ ᱡᱤᱣᱤ ᱠᱚ ᱟᱹᱫᱤ ᱡᱤᱭᱟᱹᱲ ᱮ ᱵᱩᱡᱷᱟᱹᱣ ᱠᱮᱫᱼᱟ ᱟᱨ ᱫᱟᱨᱮ ᱩᱢᱩᱞ ᱨᱮ ᱫᱩᱲᱩᱵ ᱡᱤᱨᱟᱹᱣᱮᱱᱟᱭ ᱾ ᱟᱨ ᱮ ᱩᱭᱦᱟᱹᱨᱮᱫᱼᱟ ᱼ ᱩᱞ ᱫᱟᱨᱮ ᱟᱹᱰᱤ ᱱᱟᱯᱟᱭᱟ, ᱩᱞ ᱡᱚ ᱦᱚᱸ ᱟᱹᱰᱤ ᱱᱟᱯᱟᱭᱟ ᱾ ᱠᱟᱭᱨᱟ ᱫᱟᱨᱮ ᱦᱚᱸ ᱟᱹᱰᱤ ᱞᱟᱹᱠᱛᱤ ᱟᱱᱟᱜ ᱫᱟᱨᱮ ᱠᱟᱱᱟ ᱟᱨ ᱠᱟᱭᱨᱟ ᱡᱚ ᱨᱮᱱᱟᱜ ᱜᱩᱱ ᱦᱚᱸ ᱟᱹᱰᱤ ᱱᱟᱯᱟᱭᱟ ᱾ ᱱᱤᱢ ᱫᱟᱨᱮ ᱦᱚᱸ ᱟᱹᱰᱤ ᱱᱟᱯᱟᱭᱟ ᱫᱟᱹᱛᱟᱹᱱᱤ ᱦᱚᱸ ᱜᱟᱱᱚᱜᱼᱟ, ᱵᱟᱞᱮ ᱱᱤᱢ ᱥᱟᱠᱟᱢ ᱟᱨ ᱵᱟᱦᱟ ᱡᱚᱢ ᱞᱮᱠᱷᱟᱱ ᱦᱚᱲᱢᱚ ᱨᱮ ᱟᱡᱟᱨ ᱵᱮᱢᱟᱨ ᱵᱟᱝ ᱦᱩᱭᱩᱜᱼᱟ ᱚᱱᱟ ᱥᱟᱶᱛᱮ ᱱᱤᱢ ᱡᱚ ᱛᱮᱦᱚᱸ ᱥᱩᱱᱩᱢ ᱵᱮᱱᱟᱣᱜᱼᱟ ᱟᱨ ᱴᱟᱠᱟ ᱯᱩᱭᱥᱟᱹ ᱦᱚᱸᱧ ᱟᱨᱡᱟᱣ ᱫᱟᱲᱮᱭᱟᱜᱼᱟ ᱾ ᱟᱨ ᱡᱩᱫᱤ ᱤᱧ ᱴᱷᱮᱱ ᱨᱚᱵᱚᱲ ᱫᱟᱨᱮ ᱛᱟᱦᱮᱸ ᱠᱚᱜ ᱠᱷᱟᱱ ᱟᱹᱰᱤ ᱜᱟᱱ ᱨᱚᱵᱚᱲ ᱡᱤᱱᱤᱥ ᱵᱮᱱᱟᱣ ᱠᱟᱛᱮ ᱴᱟᱠᱟᱧ ᱟᱨᱡᱟᱣ ᱠᱮᱭᱟ ᱦᱩᱱᱟᱹᱝ ᱾ ᱟᱨ ᱦᱚᱸ ᱟᱹᱰᱤ ᱜᱟᱱ ᱱᱟᱯᱟᱭ ᱱᱟᱯᱟᱭ ᱫᱟᱨᱮ ᱢᱮᱱᱟᱜᱼᱟ, ᱱᱟᱹᱨᱭᱟᱹᱞ ᱫᱟᱨᱮ ᱨᱮᱱᱟᱝ ᱠᱟᱛᱷᱟ ᱜᱮ ᱢᱟᱥᱮ ᱩᱭᱦᱟᱹᱨ ᱢᱮ, ᱱᱟᱹᱨᱭᱟᱹᱞ ᱪᱮᱛᱟᱱ ᱨᱮ ᱡᱟᱦᱟᱸ ᱩᱵ ᱛᱟᱦᱮᱸᱱᱟ ᱚᱱᱟ ᱩᱨ ᱚᱪᱚᱜ ᱠᱟᱛᱮᱱ ᱟᱹᱰᱤ ᱜᱟᱱ ᱡᱤᱱᱤᱥ ᱵᱮᱱᱟᱣᱜᱼᱟ ᱡᱮᱢᱚᱱ ᱵᱟᱵᱮᱨ, ᱫᱚᱜᱽᱦᱟ, ᱵᱟᱨᱟᱦᱤ, ᱯᱟᱹᱴᱭᱟᱹ ᱮᱢᱟᱱ ᱵᱮᱱᱟᱣ ᱠᱟᱛᱮ ᱱᱚᱶᱟ ᱛᱮᱦᱚᱸ ᱴᱟᱠᱟ ᱯᱩᱭᱥᱟᱹᱧ ᱟᱨᱡᱟᱣ ᱫᱟᱲᱮᱭᱟᱜᱼᱟ ᱾ ᱱᱟᱹᱨᱭᱟᱹᱞ ᱫᱟᱜ ᱧᱩ ᱠᱟᱛᱮ ᱟᱨ ᱱᱟᱹᱨᱭᱟᱹᱞ ᱡᱚᱢ ᱠᱟᱛᱮ ᱨᱮᱸᱜᱮᱡ ᱛᱮᱛᱟᱝ ᱤᱧ ᱢᱟᱨᱛᱚᱠ ᱫᱟᱲᱮᱭᱟᱜᱼᱟ ᱱᱚᱶᱟ ᱠᱚ ᱥᱟᱶᱛᱮ ᱱᱟᱹᱨᱭᱟᱹᱞ ᱥᱩᱱᱩᱢ ᱠᱚ ᱞᱮᱱ ᱚᱰᱚᱠ ᱠᱟᱛᱮᱧ ᱟᱹᱠᱷᱨᱤᱧᱟ ᱾ ᱱᱚᱣᱟ ᱠᱚ ᱟᱹᱠᱷᱨᱤᱧ ᱠᱟᱛᱮ ᱟᱹᱰᱤ ᱜᱟᱱ ᱴᱟᱠᱟ ᱠᱟᱹᱣᱰᱤ ᱠᱩᱧ ᱟᱨᱡᱟᱣ ᱠᱮᱭᱟ ᱾ ᱱᱚᱶᱟ ᱠᱟᱛᱷᱟ ᱩᱭᱦᱟᱹᱨ ᱠᱟᱛᱮ ᱦᱩᱰᱤᱧ ᱵᱚᱭᱦᱟ ᱫᱚ ᱱᱚᱸᱰᱮ ᱜᱮ ᱚᱲᱟᱜ ᱮ ᱵᱮᱱᱟᱣ ᱠᱮᱫᱼᱟ ᱟᱨ ᱟᱹᱰᱤ ᱨᱟᱹᱥᱠᱟᱹ ᱨᱮ ᱛᱟᱦᱮᱸ ᱮᱱᱟᱭ ᱾

ᱱᱚᱶᱟ ᱠᱟᱹᱦᱱᱤ ᱛᱮ ᱱᱚᱶᱟ ᱥᱮᱪᱮᱫ ᱧᱟᱢᱚᱜ ᱠᱟᱱᱟ ᱡᱮ ᱨᱮᱸᱜᱮᱡ ᱛᱮᱛᱟᱝ ᱫᱚ ᱵᱟᱝ ᱦᱟᱨᱠᱮᱛᱼᱟ, ᱡᱩᱫᱤ ᱢᱚᱱᱮ ᱠᱮᱴᱮᱡ ᱠᱟᱛᱮ ᱟᱹᱥᱩᱞᱚᱜ ᱞᱟᱹᱜᱤᱱ ᱱᱟᱯᱟᱭ ᱦᱚᱨ ᱰᱟᱦᱟᱨ ᱮᱢ ᱯᱟᱱᱛᱮ ᱧᱟᱢ ᱞᱮᱠᱷᱟᱱ ᱱᱚᱶᱟ ᱡᱤᱭᱚᱱ ᱫᱚ ᱟᱹᱰᱤ ᱨᱟᱹᱥᱠᱟᱹ ᱟᱨ ᱢᱚᱡᱽ ᱛᱮᱜᱮ ᱠᱷᱟᱸᱰᱟᱣᱜᱼᱟ ᱾

***

ᱚᱱᱚᱞ ᱠᱟᱹᱦᱱᱤ ᱴᱟᱠᱟ ᱟᱨᱡᱟᱣ ᱫᱟᱨᱮ December 26, 2023by ᱢᱟᱹᱱᱤᱡ ᱥᱚᱞᱢᱟ ᱦᱟᱸᱥᱫᱟ1 Comment ᱯᱮ ᱵᱚᱭᱦᱟ ᱠᱚ ᱛᱟᱦᱮᱸ ᱠᱟᱱᱟ, ᱩᱱᱠᱩ ᱛᱟᱦᱮᱱ ᱞᱟᱹᱜᱤᱱ ᱚᱲᱟᱜ ᱦᱚᱸ ᱵᱟᱝ .....

20/01/2024

ᱫᱟᱹᱭ ᱢᱟᱹᱱᱤᱡ ᱠᱟᱹᱯᱩᱨᱢᱩᱱᱤ ᱴᱩᱰᱩ (Mrs. Kapurmuni Tudu, West Bengal) ᱟᱡᱟᱜ ᱞᱤᱴᱷᱩᱨ ᱟᱲᱟᱝ ᱛᱮ ᱢᱤᱫ ᱥᱚᱦᱨᱟᱭ ᱥᱮᱨᱮᱧ ᱫᱮᱞᱟ ᱵᱚ ᱟᱸᱡᱚᱢ ᱥᱟᱸᱜᱮᱭᱟ ᱾

Santali Traditional Song | Sohrai Serenj | ᱥᱚᱦᱨᱭ ᱥᱮᱨᱮᱧ | Kapurmuni Tudu | AyoArang Official | ...

17/01/2024

ᱢᱟᱹᱭ ᱥᱚᱧᱡᱤᱛᱟ ᱢᱩᱨᱢᱩ (Miss Sanjita Murmu, Jharkhand) ᱟᱜ ᱜᱟᱞᱟᱝ ᱜᱟᱵᱟᱱ ᱢᱤᱫ ᱥᱚᱨᱮᱥ ᱠᱟᱹᱦᱱᱤ, *ᱢᱟᱭᱱᱚ-ᱢᱤᱨᱩ*, ᱯᱟᱲᱦᱟᱣ ᱥᱟᱸᱜᱮ ᱢᱟᱵᱚ ᱟᱨ link click ᱠᱟᱛᱮ Website ᱦᱚᱸᱵᱚ ᱦᱤᱨᱤ ᱢᱟ ᱾


DECEMBER 26, 2023
BY ᱥᱚᱧᱡᱤᱛᱟ ᱢᱩᱨᱢᱩ
1 MIN READ

ᱢᱤᱫ ᱟ.ᱛᱩ ᱨᱮ ᱵᱟᱨᱭᱟ ᱠᱩᱲᱤ ᱜᱤᱫᱽᱨᱟᱹ ᱢᱤᱫ ᱛᱮᱠᱤᱱ ᱦᱟᱨᱟ ᱞᱮᱱᱟ ᱾ ᱧᱩᱛᱩᱢ ᱛᱟ.ᱠᱤᱱ ᱫᱚ ᱢᱟᱭᱱᱚ ᱟᱨ ᱢᱤᱨᱩ ᱾ ᱨᱚᱲ ᱦᱚᱸ ᱢᱤᱨᱩ ᱟᱲᱟᱝ, ᱚᱱᱠᱟ ᱜᱮ ᱵᱚᱸᱜᱟ ᱢᱚᱦᱚᱨ ᱢᱩᱴᱷᱟ.ᱱ ᱦᱚᱸ ᱛᱟ.ᱠᱤᱱ ᱾ ᱡᱮᱢᱚᱱ ᱥᱚᱨᱚᱜᱽ ᱯᱩᱨᱤ ᱠᱷᱚᱱ ᱠᱤᱱ ᱳᱯᱳᱞ ᱟᱠᱟᱱᱟ ᱱᱚᱶᱟ ᱫᱷᱟ.ᱨᱛᱤ ᱯᱩᱨᱤ ᱨᱮ ᱾ ᱢᱟᱭᱱᱚ ᱟᱨ ᱢᱤᱨᱩ ᱫᱚ ᱟ.ᱛᱩ ᱜᱟᱛᱮ ᱡᱚᱴᱟᱣ ᱠᱟᱱ ᱨᱮᱦᱚᱸ ᱠᱤᱱ ᱢᱤᱫ ᱰᱚᱸᱰᱮᱠ ᱦᱚᱸ ᱵᱟᱹᱠᱤᱱ ᱪᱷᱟᱯᱟᱰᱟᱣᱜ-ᱟ ᱾

ᱢᱤᱨᱩ ᱨᱤᱱ ᱫᱚ ᱡᱟᱱᱟᱢ ᱟᱭᱳ ᱵᱟᱵᱟ ᱢᱟᱭᱟᱢ ᱦᱟ.ᱴᱤᱧ ᱵᱚᱭᱦᱟ ᱢᱤᱥᱤ ᱡᱚᱛᱚ ᱜᱮ ᱢᱮᱱᱟᱜ ᱠᱚᱣᱟ ᱾ ᱟᱨ ᱢᱟᱭᱱᱚ ᱨᱤᱱ ᱫᱚ ᱪᱤᱞᱤ ᱜᱮ ᱵᱟ.ᱱᱩᱜ ᱠᱚ ᱛᱟᱭᱟ ᱡᱚᱛᱚ ᱛᱮᱭ ᱴᱩᱣᱟ.ᱨ ᱜᱮᱭᱟ ᱾ ᱚᱱᱟᱛᱮ ᱟ.ᱰᱤ ᱮᱠᱞᱟ ᱜᱮᱭ ᱟᱴᱠᱟᱨ ᱛᱟᱸᱦᱮᱫ ᱾ ᱢᱟᱭᱱᱚ ᱫᱚ ᱢᱤᱫ ᱫᱤᱱ ᱥᱮᱛᱟᱜ ᱵᱮᱨᱮᱫ ᱠᱟᱛᱮ ᱠᱩᱰᱟ.ᱢ ᱯᱤᱸᱰᱟ. ᱨᱮ ᱫᱩᱲᱩᱵ ᱠᱟᱛᱮᱭ ᱨᱟᱜ ᱡᱚᱝ ᱠᱟᱱ ᱛᱟᱸᱦᱮᱱ ᱾ ᱟᱨ ᱢᱚᱱᱮ ᱛᱮᱭ ᱢᱮᱱ ᱡᱚᱝ ᱠᱟᱱᱟ ᱪᱟᱸᱫᱚ ᱚᱠᱟ ᱡᱚᱱᱚᱢ ᱨᱮ ᱱᱚᱝᱠᱟ.ᱧ ᱯᱟᱯ ᱞᱮᱫ ᱛᱮ ᱱᱚᱶᱟ ᱢᱟ.ᱱᱢᱤ ᱡᱚᱱᱚᱢ ᱮᱢ ᱮᱢᱟᱫ ᱫᱤᱧᱟ ᱟᱨ ᱚᱱᱟ ᱠᱩᱲᱟ.ᱭ ᱮᱢ ᱥᱚᱝ ᱟ.ᱧ ᱠᱟᱱᱟ ᱾ ᱢᱚᱭᱱᱚ ᱟ.ᱰᱤᱭ ᱩᱭᱦᱟ.ᱨ ᱡᱚᱝ ᱠᱟᱱ ᱛᱟᱸᱦᱮᱱ, ᱤᱱᱟ. ᱚᱠᱛᱚ ᱜᱮ ᱢᱤᱨᱩᱭ ᱥᱮᱴᱮᱨ ᱮᱱᱟ ᱟᱨ ᱠᱩᱞᱤ ᱜᱚᱫ ᱠᱮᱫᱮᱭᱟᱭ, ᱮᱱᱟ ᱡᱤᱨᱟ. ᱰᱟ.ᱨ ᱥᱮᱛᱟᱜ ᱨᱮ ᱪᱮᱫ ᱫᱚ ᱚᱱᱠᱟᱢ ᱩᱭᱦᱟ.ᱨ ᱡᱚᱝ ᱠᱟᱱᱟ? ᱢᱮᱫ ᱨᱮ ᱪᱮᱫ ᱠᱷᱟ.ᱛᱤᱨ ᱢᱮᱫ ᱫᱟᱜ ! ᱨᱚᱲ ᱦᱚᱸ ᱚᱱᱠᱟ ᱥᱤᱵᱤᱞ ᱜᱮ ᱵᱟᱢ ᱨᱚᱲ ᱮᱫ ᱫᱚ?

ᱩᱱ ᱨᱮ ᱢᱟᱭᱱᱚᱭ ᱢᱮᱱ ᱠᱮᱫ-ᱟ, ᱟᱢ ᱫᱚᱱᱟ ᱡᱤᱨᱟ. ᱰᱟ.ᱨ ᱟᱭᱳ ᱵᱟᱵᱟ ᱵᱚᱠᱚ ᱵᱚᱭᱦᱟ ᱢᱮᱱᱟᱜ ᱠᱚ ᱛᱟᱢ ᱛᱮ ᱪᱟᱸᱫᱚ ᱤᱯᱤᱞ ᱞᱮᱠᱟ ᱠᱚ ᱥᱮᱯᱮᱧ ᱟᱠᱟᱫ ᱢᱮᱭᱟ ᱾ ᱤᱧ ᱫᱚᱱᱟ ᱡᱤᱨᱟ. ᱰᱟ.ᱨ ᱥᱤᱧ ᱥᱤᱛᱩᱝ ᱫᱟᱨᱮ ᱵᱩᱴᱟ. ᱨᱮ ᱢᱮᱫ ᱫᱟᱜ ᱤᱧ ᱡᱚᱨᱚᱭᱮᱫᱟ ᱾ ᱤᱧ ᱨᱤᱱ ᱪᱤᱞᱤ ᱜᱮ ᱵᱟ.ᱱᱩᱜ ᱠᱚᱛᱤᱧ ᱫᱚ! ᱟᱫᱚ ᱢᱤᱨᱩᱭ ᱢᱮᱱ ᱠᱮᱫ-ᱟ ᱚᱱᱠᱟᱱ ᱠᱟᱛᱷᱟ ᱫᱚᱱᱟ ᱡᱤᱨᱟ. ᱰᱟ.ᱨ ᱟᱞᱚᱢ ᱢᱮᱱᱟ! ᱤᱧ ᱨᱤᱱ ᱟᱭᱳ ᱵᱟᱵᱟ ᱢᱮᱱᱟᱜ ᱠᱚ ᱠᱷᱟᱱ ᱟᱢ ᱨᱤᱱ ᱦᱚᱸ ᱢᱮᱱᱟᱜ ᱠᱚ ᱜᱮᱭᱟ ᱾
ᱢᱟᱭᱱᱚᱭ ᱢᱮᱱ ᱠᱮᱫᱟ ᱟᱭᱳ ᱟᱜ ᱥᱟᱨᱟ ᱪᱮᱛᱟᱱ ᱨᱮ ᱫᱷᱩᱵᱤ ᱜᱷᱟᱸᱥ ᱚᱢᱚᱱ ᱮᱱᱟ, ᱵᱟᱵᱟ ᱟᱜ ᱥᱟᱨᱟ ᱨᱮ ᱠᱟᱨᱟᱢ ᱫᱟᱨᱮᱭᱮᱱᱟ ᱾ ᱟᱢ ᱜᱮ ᱞᱟᱹᱭ ᱢᱮᱥᱮ ᱡᱤᱨᱟ.ᱰᱟ.ᱨ! ᱱᱤᱛ ᱫᱚ ᱤᱧ ᱪᱮᱫ ᱤᱧ ᱪᱮᱠᱟ.ᱭᱟ?

ᱩᱱ ᱨᱮ ᱢᱤᱨᱩᱭ ᱢᱮᱱ ᱠᱮᱫ-ᱟ, ᱟᱭᱳ ᱥᱟᱨᱟ ᱪᱮᱛᱟᱱ ᱫᱷᱩᱵᱤ ᱜᱷᱟᱸᱥ ᱫᱚ ᱜᱚᱭᱟ ᱭᱟᱞᱟᱝ ᱜᱚᱝᱜᱟᱭᱟᱞᱟᱝ ᱾ ᱟᱨ ᱵᱟᱵᱟ ᱪᱮᱛᱟᱱ ᱠᱟᱨᱟᱢ ᱫᱟᱨᱮ ᱫᱚᱞᱟᱝ ᱡᱚᱛᱚᱱ ᱦᱟᱨᱟᱭᱟ ᱾

***

ᱚᱱᱚᱞ ᱠᱟᱹᱦᱱᱤ ᱢᱟᱭᱱᱚ-ᱢᱤᱨᱩ December 26, 2023by ᱥᱚᱧᱡᱤᱛᱟ ᱢᱩᱨᱢᱩ1 min read ᱢᱤᱫ ᱟ.ᱛᱩ ᱨᱮ ᱵᱟᱨᱭᱟ ᱠᱩᱲᱤ ᱜᱤᱫᱽᱨᱟᱹ ᱢᱤᱫ ᱛᱮᱠᱤᱱ ᱦᱟᱨᱟ ᱞᱮᱱᱟ ᱾ ᱧᱩᱛᱩᱢ ᱛᱟ.ᱠᱤᱱ ᱫ...

13/01/2024

ᱫᱟᱹᱭ ᱢᱟᱹᱱᱤᱡ ᱨᱟᱹᱭᱢᱚᱛᱤ ᱦᱮᱸᱵᱽᱨᱚᱢ (Mrs. Raimati Hembram, Jamsedpur, Jharkhand) ᱟᱜ ᱛᱤᱛᱮ ᱜᱟᱞᱟᱝ ᱜᱟᱵᱟᱱ ᱢᱤᱫ ᱥᱚᱨᱮᱥ ᱚᱱᱚᱬᱦᱮ *'ᱰᱷᱤᱝᱠᱤ'*, ᱫᱮᱞᱟ ᱵᱚᱱ ᱯᱟᱲᱦᱟᱣ ᱥᱟᱸᱜᱮᱭᱟ ᱾ link ᱨᱮ click ᱠᱟᱛᱮ Website ᱦᱚᱸ ᱦᱤᱨᱤ ᱛᱟᱵᱚ ᱯᱮ ᱾

*ᱰᱷᱤᱝᱠᱤ*
DECEMBER 26, 2023
BY ᱢᱟᱹᱱᱤᱡ ᱨᱟᱹᱭᱢᱚᱛᱤ ᱦᱮᱸᱵᱽᱨᱚᱢ

ᱫᱷᱟᱯᱟᱲ ᱥᱟᱰᱮ ᱮᱱᱟ
ᱦᱩᱰᱩᱝᱻᱦᱩᱰᱩᱝ ᱚᱛ ᱰᱷᱤᱝᱠᱤ
ᱰᱩᱞᱩᱝᱻᱰᱩᱞᱩᱝ
ᱫᱮᱞᱟ ᱢᱟᱹᱭ ᱪᱟᱞᱟᱜ ᱟᱵᱚᱱ ᱪᱟᱣᱞᱮ ᱦᱩᱲᱩᱝ ᱿

ᱛᱟᱨᱠᱚᱜ ᱠᱟᱱᱟ ᱜᱚᱴᱟ ᱫᱷᱟᱹᱨᱛᱤ ᱚᱛ,
ᱨᱟᱹᱥᱠᱟᱹ ᱜᱮ ᱯᱟᱨᱟᱵᱽ ᱥᱮᱴᱮᱨᱚᱜ ᱠᱟᱱᱟ,
ᱢᱚᱱᱻᱢᱚᱱᱮ ᱨᱚᱢᱚᱡᱽ ᱜᱮ ᱵᱩᱡᱷᱟᱹᱣᱜ ᱠᱟᱱᱟ ᱾

ᱫᱩᱞᱠᱟᱹᱣ ᱥᱟᱰᱮ ᱮᱱᱟ
ᱦᱩᱰᱩᱝᱻᱦᱩᱰᱩᱝ ᱚᱛ ᱰᱷᱤᱝᱠᱤ
ᱰᱩᱞᱩᱝᱻᱰᱩᱞᱩᱝ
ᱫᱮᱞᱟ ᱫᱟᱹᱭ ᱪᱟᱞᱟᱜ ᱟᱵᱚᱱ ᱪᱟᱣᱞᱮ ᱦᱩᱲᱩᱝ ᱿

ᱞᱮᱵᱮᱫ ᱟᱛᱮ ᱞᱟᱲᱟᱣ ᱢᱮ
ᱰᱷᱤᱝᱠᱤ ᱪᱩᱯᱤ,
ᱵᱚᱦᱚᱜ ᱨᱮᱫᱚ ᱨᱮᱵᱮᱫ ᱟᱠᱟᱫ
ᱢᱮᱲᱦᱮᱫ ᱴᱩᱯᱤ ᱾

ᱞᱟᱲᱟᱣ ᱥᱟᱰᱮ ᱮᱱᱟ
ᱦᱩᱰᱩᱝᱻᱦᱩᱰᱩᱝ ᱚᱛ ᱰᱷᱤᱝᱠᱤ
ᱰᱩᱞᱩᱝᱻᱰᱩᱞᱩᱝ
ᱫᱮᱞᱟ ᱜᱟᱛᱮ ᱯᱷᱩᱞ ᱪᱟᱞᱟᱜ ᱟᱵᱚᱱ ᱪᱟᱣᱞᱮ ᱦᱩᱲᱩᱝ ᱿

ᱥᱤᱲᱚᱻᱥᱚᱲᱚ ᱡᱚᱨᱚ ᱮᱱᱟ
ᱩᱫᱽᱜᱟᱹᱨ ᱫᱟᱜ ᱢᱚᱞᱚᱝ ᱠᱷᱚᱱ,
ᱛᱚᱵᱮ ᱮᱱᱟᱝ ᱵᱮᱱᱟᱣ ᱮᱱᱟ
ᱦᱚᱞᱚᱝ ᱪᱟᱣᱞᱮ ᱠᱷᱚᱱ ᱾

ᱯᱤᱴᱷᱟᱹᱭ ᱟᱵᱚᱱ, ᱞᱮᱴᱚᱭ ᱟᱵᱚᱱ,
ᱵᱟᱯᱷᱟᱣ ᱟᱵᱚᱱ ᱰᱩᱸᱵᱩᱜ ᱯᱤᱴᱷᱟᱹ,
ᱪᱷᱚᱨ ᱟᱵᱚᱱ ᱪᱷᱚᱨ ᱯᱤᱴᱷᱟᱹ,
ᱥᱚᱻᱥᱤᱵᱤᱞ ᱛᱮ ᱩᱞᱤᱫᱟᱜ ᱠᱚ ᱡᱚᱨᱚᱜ,
ᱡᱚᱢ ᱞᱟᱹᱜᱤᱫ ᱟᱵᱚ ᱡᱚᱛᱚ ᱜᱮ ᱵᱚᱱ ᱦᱚᱨᱚᱻᱵᱚᱨᱚᱜ ᱾

ᱛᱟᱨᱠᱚᱜ ᱥᱟᱰᱮ ᱮᱱᱟ
ᱦᱩᱰᱩᱝᱻᱦᱩᱰᱩᱝ ᱚᱛ ᱰᱷᱤᱝᱠᱤ
ᱰᱩᱞᱩᱝᱻᱰᱩᱞᱩᱝ
ᱫᱮᱞᱟ ᱦᱤᱞᱤ ᱵᱟᱹᱦᱩ ᱪᱟᱞᱟᱜ ᱟᱵᱚᱱ ᱪᱟᱣᱞᱮ ᱦᱩᱲᱩᱝ ᱿

***

ᱚᱱᱚᱞ ᱚᱱᱚᱬᱦᱮ ᱰᱷᱤᱝᱠᱤ December 26, 2023by ᱢᱟᱹᱱᱤᱡ ᱨᱟᱹᱭᱢᱚᱛᱤ ᱦᱮᱸᱵᱽᱨᱚᱢ ᱫᱷᱟᱯᱟᱲ ᱥᱟᱰᱮ ᱮᱱᱟ ᱦᱩᱰᱩᱝᱻᱦᱩᱰᱩᱝ ᱚᱛ ᱰᱷᱤᱝᱠᱤ ᱰᱩᱞᱩᱝᱻᱰᱩᱞᱩᱝ ᱫᱮᱞᱟ ᱢᱟᱹ.....

10/01/2024

ᱫᱟᱹᱭ Dr. Parvati Soren (Jamsedpur, Jharkhand) ᱛᱤᱠᱤᱱᱟᱜ ᱢᱤᱫ Medical Topic ᱪᱮᱛᱟᱱ ᱨᱮ ᱚᱞ ᱟᱠᱟᱱ ᱦᱟᱢᱟᱞ ᱦᱚᱲᱢᱚ ᱠᱮᱪᱮᱫᱚᱜ - Abortion (Miscarriage), ᱫᱮᱞᱟ ᱱᱚᱶᱟ ᱵᱚ ᱯᱟᱲᱦᱟᱣ ᱥᱟᱸᱜᱮᱭᱟ ᱟᱨ ᱵᱚ ᱵᱟᱰᱟᱭ ᱡᱚᱝ-ᱟ ᱥᱟᱹᱨᱤ ᱠᱟᱛᱷᱟ ᱾

ᱟᱭᱢᱟ ᱥᱟᱨᱦᱟᱣ ᱟᱨ ᱡᱚᱦᱟᱨ ᱫᱟᱹᱭ 🙏🙏 ᱾

Uncategorized ᱚᱱᱚᱞ ᱯᱚᱱᱚᱰ ᱦᱟᱢᱟᱞ ᱦᱚᱲᱢᱳ ᱠᱮᱪᱮᱫᱚᱜ Abortion (Miscarriage) December 29, 2023by ᱰᱨᱹ ᱯᱟᱨᱵᱚᱛᱤ ᱥᱚᱨᱮᱱ1 min readAdd Comment ᱦᱚᱲᱢᱚ ᱦᱟᱢᱟᱞᱮᱱ ᱐ᱟᱭᱚᱢ ᱮ᱐ᱚᱦᱚᱵ ᱥᱩᱨ ᱫᱤ.....

04/01/2024

In the 14th edition of Ayo Arang E-Magazine of Santali Women Writers' Organisation, there are 25 women writer have contributed articles. Their names has been given below.

ᱥᱟᱱᱛᱟᱲᱤ ᱠᱩᱲᱤ ᱚᱱᱚᱞᱤᱭᱟᱹ ᱜᱷᱟᱨᱚᱸᱡᱽ ᱨᱮᱱᱟᱜ ᱤ-ᱯᱟᱛᱷᱟᱢ 'ᱟᱭᱳ ᱟᱲᱟᱝ' ᱨᱮᱱᱟᱜ ᱑᱔-ᱟᱱᱟᱜ ᱥᱟᱯᱲᱟᱣ ᱨᱮ ᱚᱱᱚᱞ ᱠᱚ ᱮᱢ ᱟᱠᱟᱫ ᱒᱕ ᱠᱩᱲᱤ ᱦᱚᱯᱚᱱ ᱚᱱᱚᱞᱤᱭᱟ. ᱠᱚᱣᱟᱜ ᱧᱩᱛᱩᱢ ᱞᱟᱛᱟᱨ ᱨᱮ ᱮᱢ ᱮᱱᱟ ᱺ-

1ᱹ Dr. Parvati Soren - Jharkhand
2. Mrs. Jhano Murmu - Odisha
3. Mrs. Arsu Hansdah - Odisha
4. Mrs. Meena Baskey - Odisha
5. Mrs. Swati Hansdah - Odisha
6. Mrs. Samala Hembram - West Bengal
7. Mrs. Raimati Hembram - Jharkhand
8. Miss Saro Hansdah - Odisha
9. Mrs. Salge Hansdah - Jharkhand
10. Miss Sikha Hembram - West Bengal
11. Mrs. Kabita Hembram - West Bengal
12. Mrs. Hiramani Soren - Odisha
13. Mrs. Salma Hansda - Odisha
14. Miss Jirihiri Baskey - West Bengal
15. Miss Salma Murmu - Jharkhand
16. Mrs. Singo Beshra - Odisha
17. Mrs. Suchitra Hansda - West Bengal
18. Mrs. Sangita Hansda - Jharkhand
19. Miss Sanjita Murmu - Jharkhand
20. Mrs. Malati Hembram - West Bengal
21. Mrs. Kapurmoni Tudu - West Bengal
22. Mrs. Saleema Marandi - Odisha
23. Miss Saraswati Tudu - Jharkhand
24. Miss Sandhya Mandi - West Bengal
25. Mrs. Maina Tudu - Odisha

ᱥᱟᱱᱟᱢ ᱚᱱᱚᱞᱤᱭᱟᱹ ᱠᱚᱜᱮ ᱟᱭᱢᱟ ᱟᱭᱢᱟ ᱥᱟᱨᱦᱟᱣ ᱟᱨ ᱡᱚᱦᱟᱨ ᱾

03/01/2024

Santali Poetry | ᱥᱮᱱᱚᱜ ᱥᱮᱨᱢᱟ |

31/12/2023

The 14th Edition of Santali Women Writers' Organisation's E-Magazine "Ayo Arang" has been released today to all Santali Literature lovers.

ᱥᱟᱱᱟᱢ ᱠᱚᱜᱮ ᱡᱚᱦᱟᱨ,

ᱥᱟᱱᱛᱟᱲᱤ ᱠᱩᱲᱤ ᱚᱱᱚᱞᱤᱭᱟᱹ ᱜᱷᱟᱨᱚᱸᱡᱽ ᱨᱮᱱᱟᱜ ᱤ-ᱯᱟᱛᱷᱟᱢ , ᱨᱮᱱᱟᱜ ᱑᱔-ᱟᱱᱟᱜ ᱥᱟᱯᱲᱟᱣ ᱛᱮᱦᱮᱧ ᱡᱮᱜᱮᱛ ᱡᱟᱠᱟᱛ ᱨᱤᱱ ᱥᱟᱱᱛᱟᱲᱤ ᱯᱟᱹᱨᱥᱤ ᱥᱟᱶᱦᱮᱫ ᱫᱩᱞᱟᱹᱲᱤᱭᱟᱹ ᱠᱚ ᱴᱷᱮᱱ ᱞᱮ ᱩᱪᱷᱟᱹᱱ ᱥᱚᱫᱚᱨ ᱠᱮᱫ-ᱟ ᱾

ᱱᱚᱶᱟ ᱦᱟᱹᱴᱤᱧ ᱨᱮ, ᱥᱤᱧᱚᱛ ᱡᱟᱠᱟᱛ ᱨᱤᱱ ᱒᱕ ᱚᱱᱚᱞᱤᱭᱟᱹ ᱠᱩᱲᱤ ᱠᱚᱣᱟᱜ ᱒᱕ ᱜᱚᱴᱟᱝ ᱚᱱᱚᱞ/ᱚᱱᱚᱬᱦᱮ/ᱠᱟᱹᱦᱱᱤ ᱥᱟᱯᱲᱟᱣ ᱟᱠᱟᱱᱟ ᱾ ᱞᱟᱛᱟᱨ ᱨᱮᱱᱟᱜ link ᱥᱟᱶ ᱥᱟᱹᱜᱟᱹᱭ ᱡᱚᱲᱟᱣ ᱠᱟᱛᱮ ᱯᱟᱲᱦᱟᱣ ᱛᱟᱵᱚᱱ ᱯᱮ ᱟᱨ ᱫᱤᱥ ᱦᱩᱫᱤᱥ ᱮᱢ ᱛᱟᱵᱚᱱ ᱯᱮ ᱾ ᱡᱟᱦᱟᱸᱭ ᱠᱩᱲᱤ ᱦᱚᱯᱚᱱ ᱠᱚ ᱟᱞᱮ ᱥᱟᱶᱛᱮ ᱥᱟᱹᱜᱟᱹᱭ ᱡᱚᱲᱟᱣ ᱥᱟᱱᱟ ᱯᱮ ᱠᱷᱟᱱ ᱥᱟᱱᱟᱢ ᱠᱚᱜᱮ ᱥᱟᱹᱜᱩᱱ ᱫᱟᱨᱟᱢ ᱾

Editor - Mrs. Maina Tudu - 079013 50792
Co-editors - Mrs. Chhaya Mandi - 08777765526
- Mrs. Chinmayee Marandi

ᱡᱚᱦᱟᱨ
ᱟᱞᱮ ᱜᱮ
ᱥᱟᱱᱛᱟᱲᱤ ᱠᱩᱲᱤ ᱚᱱᱚᱞᱤᱭᱟᱹ ᱜᱷᱟᱨᱚᱸᱡᱽ, ᱟᱭᱳ ᱟᱲᱟᱝ ...

Johar to all,

We are presenting to you the 14th Edition of Santali Women Writers' Organisation's E-Magazine "Ayo Arang" to all our Santali Literature lovers.

This edition is groomed with 25 articles written by 25 women writer from all over the Country.
Please click the link below and check out our website and give a read to these amazing articles.

If you(female candidates only) want to contribute and be a part of next edition of AYO ARANG E-Magazine, kindly contact us as your little contributions will help our E-Magazine grow bigger and better. Also any feedbacks and suggestions regarding our website is much appreciated.

Thanks & Regards
Santali Women writers' Organisation,
"AYO ARANG".

Home ᱥᱟᱯᱲᱮᱛ ᱟᱲᱟᱝ ᱩᱛᱱᱟᱹᱣ ᱢᱟᱭᱱᱚ ᱴᱩᱰᱩ • September 30, 2023 ᱩᱛᱱᱟᱹᱣ ᱫᱚ ᱪᱮᱫ? ᱟᱨ ᱪᱮᱫ ᱞᱮᱠᱟ ᱦᱩᱭᱩᱜ-ᱟ ᱩᱛᱱᱟᱹᱣ? ᱜᱷᱟᱹᱨᱚᱸᱡᱽ ᱨᱮᱭᱟᱜ ᱩᱛᱱᱟᱹᱣ, ᱟᱹᱛᱩ ᱨᱮ.....

28/12/2023

ᱫᱟᱹᱭ ᱢᱟᱹᱱᱤᱡ ᱠᱟᱹᱯᱩᱨᱢᱩᱱᱤ ᱴᱩᱰᱩ (Mrs. Kapurmoni Tudu, Howrah, West Bengal) ᱟᱜ ᱢᱤᱫ ᱥᱚᱨᱮᱥ ᱚᱱᱚᱬᱦᱮ, ᱥᱟᱱᱟᱢ ᱠᱚ ᱛᱮᱵᱚ ᱯᱟᱲᱦᱟᱣ ᱥᱟᱸᱜᱮᱭᱟ ᱾

ᱫᱟᱜ ᱵᱚᱸᱜᱟ
OCTOBER 2, 2023
BY ᱠᱟᱹᱯᱩᱨᱢᱚᱱᱤ ᱴᱩᱰᱩ
1 MIN READ

ᱟᱥᱟᱲ ᱵᱚᱸᱜᱟ ᱥᱟᱱ ᱵᱚᱸᱜᱟ
ᱡᱤᱵᱤᱨ ᱡᱤᱵᱤᱨ ᱫᱟᱜ ᱵᱚᱸᱜᱟ,
ᱡᱤᱵᱤᱨ ᱡᱤᱵᱤᱨ ᱫᱟᱜ ᱵᱚᱸᱜᱟ –
ᱤᱛᱟᱹ ᱚᱢᱚᱱ ᱵᱚᱸᱜᱟ
ᱫᱟᱜ ᱵᱚᱸᱜᱟ ᱦᱤᱡᱩᱜ ᱟᱭ –
ᱡᱷᱚᱢᱚᱨ ᱡᱷᱚᱢᱚᱨ ᱡᱷᱚᱢ ᱡᱷᱚᱢ,
ᱦᱩᱰᱩᱨ ᱵᱤᱡᱽᱞᱤ ᱦᱮᱸᱫᱮ ᱨᱤᱢᱤᱞ ᱾

ᱥᱮᱨᱢᱟ ᱛᱟᱞᱟ ᱠᱷᱚᱱ
ᱮᱱᱮᱡ ᱟᱭ ᱡᱷᱚᱢ ᱡᱷᱚᱢ –
ᱧᱩᱛᱟᱹᱛ ᱠᱟᱛᱮ ᱫᱷᱟᱹᱨᱛᱤ,
ᱩᱢᱟᱭ ᱟᱹᱨᱩᱵᱟᱭ –
ᱨᱤᱞᱟᱹ ᱢᱟᱞᱟᱭᱟᱭ ᱫᱷᱟᱹᱨᱛᱤ
ᱪᱮᱦᱮᱞ ᱪᱮᱯᱮᱞ ᱜᱚᱴᱟ –
ᱵᱟᱸᱫᱽ ᱯᱩᱠᱷᱨᱤ ᱱᱟᱹᱭ ᱜᱟᱰᱟ
ᱦᱟᱹᱨᱭᱟᱹᱲ ᱫᱷᱟᱹᱨᱛᱤ ᱜᱚᱴᱟ –
ᱧᱮᱞᱚᱜ ᱞᱟᱸᱫᱟᱭ ᱞᱮᱠᱟ ᱾

ᱮᱱᱮᱡ ᱟᱭ ᱫᱟᱜ ᱵᱚᱸᱜᱟ –
ᱜᱷᱟᱱᱮ ᱥᱮᱛᱳᱝ ᱜᱷᱟᱱᱮ ᱫᱟᱜᱟ,
ᱞᱚᱥᱚᱫᱟᱭ ᱨᱚᱦᱚᱲᱟᱭ –
ᱥᱤᱨᱤᱡᱚᱱ ᱤᱛᱟᱹ ᱚᱢᱚᱱᱟᱭ
ᱥᱮᱛᱟᱜ ᱛᱚᱨᱟ ᱪᱟᱹᱥᱤ ᱵᱟᱹᱥᱤ –
ᱪᱟᱞᱟᱜ ᱟᱠᱚ ᱵᱟᱹᱫᱽ ᱠᱟᱹᱢᱤ ,
ᱨᱟᱹᱥᱠᱟᱹ ᱛᱮᱠᱳ ᱠᱟᱹᱢᱤ –
ᱟᱛᱳ ᱪᱟᱹᱥᱤ-ᱵᱟᱹᱥᱤ ᱾

ᱥᱤᱭᱩᱜ ᱦᱚᱲ ᱵᱷᱳᱨ ᱠᱷᱚᱱᱟᱜ
ᱥᱤ ᱟᱠᱚ ᱞᱚᱥᱚᱫᱟᱠᱚ ᱦᱟᱥᱟ,
ᱦᱩᱨ ᱦᱩᱨ ᱴᱟᱴᱟ ᱦᱤᱰᱟᱹ –
ᱟᱸᱡᱚᱢᱚᱜ-ᱟ ᱜᱚᱴᱟ ᱾
ᱵᱟᱹᱫᱽ ᱵᱟᱹᱭᱦᱟᱹᱲ ᱨᱮ ᱦᱳᱲᱳ ᱜᱟᱹᱪᱷᱤ –
ᱦᱟᱹᱨᱭᱟᱹᱲ ᱠᱟᱜ-ᱟᱭ ᱢᱚᱧᱪᱚ ᱯᱩᱨᱤ,
ᱦᱚᱭ ᱛᱮ ᱮᱱᱮᱡ ᱫᱚᱞᱚᱵ ᱫᱚᱞᱚᱵ,
ᱧᱮᱞᱚᱜ ᱟᱹᱰᱤ ᱪᱚᱨᱚᱠ ᱾

ᱦᱚᱨ ᱰᱟᱦᱟᱨ ᱜᱳᱴᱟ
ᱞᱚᱥᱚᱫ ᱛᱮ ᱠᱷᱟᱫᱽ ᱵᱟᱫᱽ,
ᱠᱟᱹᱢᱤ ᱦᱚᱲ ᱠᱚ ᱠᱟᱹᱢᱤ ᱡᱚᱝ-ᱟ –
ᱨᱟᱹᱥᱠᱟᱹ ᱛᱮ ᱨᱟᱴ ᱯᱟᱴ
ᱢᱚᱱᱮᱭᱟ ᱠᱚ ᱥᱟᱶᱟᱭᱟᱭ ᱟᱫ ᱦᱤᱡᱩᱜ-ᱟ –
ᱦᱳᱲᱳ ᱡᱟᱹᱱᱤᱡ ᱦᱳᱭᱳᱜ ᱜᱮᱭᱟ
ᱨᱮᱸᱜᱮᱡ ᱟᱫ ᱥᱟᱦᱟᱜ-ᱟ –
ᱚᱲᱟᱜ ᱠᱷᱟᱹᱨᱟᱹᱭ ᱯᱮᱨᱮᱡᱚᱜ-ᱟ ᱾

ᱡᱷᱚᱢᱚᱨ ᱡᱷᱚᱢᱚᱨ ᱫᱟᱜ ᱛᱮ –
ᱨᱟᱹᱥᱠᱟᱹ ᱛᱮ ᱵᱩᱞ ᱠᱚ ᱟᱠᱚ ᱨᱚᱴᱮ,
ᱥᱤᱨᱡᱚᱱ ᱥᱮᱨᱮᱧ ᱠᱚ ᱥᱮᱨᱮᱧᱟ –
ᱥᱟᱨ ᱠᱚᱜ – ᱥᱟᱹᱜᱩᱱ ᱠᱚᱜ -ᱥᱟᱶᱟᱭ ᱠᱚᱜ
ᱦᱟᱹᱠᱳ ᱠᱟᱴᱠᱚᱢ ᱨᱚᱠᱚᱡ ᱜᱚᱸᱜᱷᱟ –
ᱥᱤᱨᱡᱚᱱ ᱨᱮᱠᱚ ᱢᱟᱛᱟᱣ ᱠᱚᱜ-ᱟ
ᱩᱯᱟᱹᱞ ᱯᱚᱨᱟᱭᱱᱤ ᱵᱟᱦᱟ ᱠᱚᱜ-ᱟ –
ᱫᱷᱟᱹᱨᱛᱤ ᱵᱷᱚᱨᱚᱢ ᱠᱚᱜ-ᱟ ᱾

ᱫᱟᱜ ᱵᱚᱸᱜᱟ ᱥᱤᱨᱡᱚᱱᱟᱭ ᱫᱷᱟᱥᱩᱲᱟᱭ –
ᱢᱟᱹᱭᱞᱟᱹ ᱠᱚ ᱵᱳᱦᱮᱞ ᱜᱤᱰᱤᱭᱟᱭ,
ᱞᱚᱞᱚ ᱫᱷᱟᱹᱨᱛᱤ ᱨᱮᱭᱟᱲᱟᱭ –
ᱫᱷᱟᱹᱨᱛᱤ ᱜᱳᱴᱟ ᱨᱤᱞᱟᱹᱢᱟᱞᱟᱭᱟᱭ
ᱫᱟᱨᱮ ᱱᱟᱲᱤ ᱦᱟᱹᱨᱭᱟᱹᱲ ᱠᱚᱜ-ᱟ –
ᱡᱤᱵᱽ-ᱡᱤᱭᱟᱹᱞᱤ ᱠᱚ ᱨᱟᱹᱥᱠᱟᱹᱭᱟ
ᱱᱤᱡᱷᱩᱢ ᱚᱱᱚᱞᱤᱭᱟᱹ ᱠᱚᱣᱟᱜ –
ᱥᱤᱨᱡᱚᱱ ᱫᱟᱲᱮ ᱵᱳᱨᱠᱮᱛᱟ ᱾

***

ᱚᱱᱚᱞ ᱚᱱᱚᱬᱦᱮ ᱫᱟᱜ ᱵᱚᱸᱜᱟ October 2, 2023by ᱠᱟᱹᱯᱩᱨᱢᱚᱱᱤ ᱴᱩᱰᱩ1 min read ᱟᱥᱟᱲ ᱵᱚᱸᱜᱟ ᱥᱟᱱ ᱵᱚᱸᱜᱟ ᱡᱤᱵᱤᱨ ᱡᱤᱵᱤᱨ ᱫᱟᱜ ᱵᱚᱸᱜᱟ, ᱡᱤᱵᱤᱨ ᱡᱤᱵᱤᱨ ᱫᱟᱜ ᱵᱚᱸᱜ.....

26/12/2023

ᱫᱟᱹᱭ ᱢᱟᱹᱱᱤᱡ ᱢᱤᱱᱟ ᱵᱟᱥᱠᱮ (Mrs. Meena Baskey, Bhubaneswar, Odisha) ᱟᱜ ᱢᱤᱫ ᱱᱟᱯᱟᱭ ᱠᱟᱹᱦᱱᱤ, ᱥᱟᱱᱟᱢ ᱠᱚᱛᱮ ᱵᱚ ᱯᱟᱲᱦᱟᱣ ᱥᱟᱸᱜᱮ ᱢᱟ ᱾

*ᱠᱟᱹᱭ ᱠᱩᱲᱟᱹᱭ*

SEPTEMBER 28, 2023
BY ᱢᱟᱹᱱᱤᱡ ᱢᱤᱱᱟ ᱵᱟᱥᱠᱮ

ᱢᱟᱹᱱᱢᱤ ᱡᱤᱵᱚᱱᱨᱮ ᱡᱟᱦᱟᱸ ᱞᱮᱠᱟᱭ ᱠᱟᱹᱢᱤᱭᱟ ᱟᱡᱟᱜ ᱠᱚᱨᱢᱚ ᱡᱟᱹᱱᱤᱡ ᱜᱮ ᱠᱩᱲᱟᱹᱭ ᱦᱚᱸᱭ ᱧᱟᱢᱟ ᱾ ᱠᱷᱮᱛᱨᱮ ᱢᱤᱫ ᱪᱩᱯᱩᱫ ᱦᱩᱲᱩᱢ ᱮᱨ ᱞᱮᱠᱷᱟᱱ ᱢᱤᱫ ᱫᱤᱱ ᱢᱤᱫ
ᱠᱷᱟᱺᱪᱤᱢ ᱤᱨ ᱧᱟᱢ ᱨᱩᱣᱟᱹᱲᱟ ᱨᱟᱹᱥᱠᱟᱹ ᱜᱮ ᱾ ᱴᱷᱤᱠ ᱚᱱᱠᱟ ᱜᱮ ᱡᱩᱫᱤ ᱮᱛᱠᱟ ᱫᱟᱨᱮᱢ ᱨᱚᱦᱚᱭᱟ ᱮᱱᱠᱷᱟᱱ ᱡᱟᱦᱟᱸ ᱦᱤᱞᱚᱜ ᱚᱱᱟ ᱮᱛᱠᱟ ᱥᱩᱸᱜᱟᱹ ᱯᱟᱹᱴᱤ ᱵᱟᱵᱟᱛ ᱦᱟᱹᱥᱩ ᱛᱮ ᱠᱚᱥᱴᱚ ᱚᱪᱚᱜ ᱜᱮᱭᱟᱢ ᱾ ᱚᱱᱟ ᱪᱮᱠᱟ ᱵᱮᱥ ᱠᱟᱹᱢᱤ ᱞᱮᱠᱷᱟᱱ ᱫᱟᱨᱟᱭ ᱠᱟᱱ ᱫᱤᱱᱨᱮ ᱱᱟᱯᱟᱭ ᱠᱩᱲᱟᱹᱭ ᱟᱨ ᱵᱟᱹᱲᱤᱡ ᱠᱟᱹᱢᱤ ᱨᱮᱱᱟᱜ ᱫᱚ ᱠᱟᱹᱭ ᱠᱩᱲᱟᱹᱭ ᱟᱛᱟᱝ ᱞᱟᱹᱜᱤᱫ ᱚᱠᱛᱚ ᱵᱚᱜᱼᱲᱦᱮ ᱭᱟᱭ ᱾

ᱠᱟᱹᱢᱤ ᱟᱨ ᱵᱟᱝ ᱠᱚᱨᱢᱚ ᱢᱮᱱᱞᱮᱠᱷᱟᱱ ᱠᱷᱟᱹᱞᱤ ᱮᱠᱷᱮᱱ ᱛᱤᱛᱮ ᱥᱩᱢᱩᱝ ᱠᱟᱹᱢᱤ ᱫᱚ ᱵᱟᱝ ᱵᱩᱜᱼᱡᱷᱟᱹᱣᱼᱟ ᱾ ᱚᱱᱟ ᱥᱟᱞᱟᱜ ᱛᱮ ᱡᱚᱯᱚᱲᱟᱣ ᱠᱚᱜᱼᱟ ᱢᱟᱹᱱᱢᱤ ᱢᱚᱱᱮ ᱨᱮᱱᱟᱜ ᱟᱪᱟᱨ ᱵᱤᱪᱟᱹᱨ ᱩᱭᱦᱟᱹᱨ ᱵᱷᱟᱵᱽᱱᱟ ᱮᱢᱟᱱ ᱾ ᱡᱟᱦᱟᱸᱭ ᱦᱚᱲᱟᱜ ᱦᱩᱫᱤᱥ ᱱᱟᱯᱟᱭᱟ ᱩᱱᱤᱭᱟᱜ ᱫᱚ ᱠᱟᱹᱢᱤ ᱯᱟᱹᱭᱴᱟᱹᱲᱤ ᱠᱚᱦᱚᱸ ᱵᱮᱥ ᱜᱮᱛᱟᱭ ᱾ ᱩᱱᱤ ᱫᱚ ᱟᱹᱰᱤ ᱥᱚᱨᱚᱲ ᱱᱤᱨᱚᱲ ᱡᱤᱵᱚᱱᱮ ᱠᱷᱟᱸᱰᱟᱣᱼᱟ ᱾ ᱟᱡᱟᱜ ᱢᱚᱱᱮ ᱫᱚ ᱡᱷᱟᱨᱱᱟ ᱫᱟᱜ ᱞᱮᱠᱟ ᱨᱤᱲᱤᱢ ᱨᱤᱲᱤᱢ ᱯᱷᱟᱹᱨᱤᱭᱟᱹ ᱜᱮ ᱛᱟᱦᱮᱸᱱᱟ ᱾ ᱚᱸᱰᱮ ᱟᱹᱲᱤᱥ, ᱩᱥᱟᱹᱫ, ᱱᱮᱭᱟᱣ ᱠᱷᱟᱹᱯᱟᱹᱨᱤᱭᱟᱹᱣ ᱨᱮᱱᱟᱜ ᱞᱚᱥᱚᱫ ᱵᱟᱭ ᱰᱮᱨᱟ ᱵᱟᱥᱟ ᱛᱟᱹᱯᱩᱜ ᱛᱟᱦᱮᱸ ᱫᱟᱲᱮᱭᱟᱜᱼᱟ ᱾ ᱮᱲᱮ ᱮᱨᱮᱲ ᱠᱷᱚᱱᱟᱜ ᱦᱚᱸ ᱛᱟᱦᱮᱸᱱᱟᱭ ᱟᱡ ᱫᱚ ᱥᱟᱭ ᱠᱚᱥ ᱥᱟᱺᱜᱤᱧᱨᱮ ᱾ ᱨᱮᱸᱜᱮᱡ ᱛᱮᱛᱟᱝ ᱛᱮ ᱵᱤᱪᱠᱚᱢ ᱢᱤᱫ ᱥᱟᱸᱡᱽ ᱜᱟᱱᱮ ᱛᱟᱦᱮᱸ ᱫᱟᱲᱮᱭᱟᱜᱼᱟ ᱮᱱᱦᱚᱸ ᱵᱟᱭ ᱠᱚᱠᱚᱭᱟ ᱪᱮ ᱚᱠᱚᱭ ᱴᱷᱮᱱ ᱦᱚᱸ ᱵᱟᱭ ᱟᱨᱫᱟᱥ ᱵᱟᱲᱟᱭᱟ ᱾ ᱡᱟᱦᱟᱸ ᱛᱤᱱᱟᱜ ᱛᱟᱭ ᱟᱨᱡᱟᱣ ᱥᱮ ᱠᱩᱲᱟᱹᱣ ᱢᱮᱱᱟᱜᱼᱟ ᱤᱱᱟᱹᱜ ᱨᱮᱜᱮ ᱪᱚᱲᱟᱣᱜ ᱞᱟᱹᱜᱤᱫ ᱨᱤᱠᱟᱹᱭᱟᱭ ᱟᱨ ᱡᱤᱵᱚᱱᱨᱮ ᱵᱷᱟᱹᱵᱤ ᱟᱠᱟᱫ ᱩᱭᱦᱟᱹᱨ ᱟᱠᱟᱫ ᱠᱩᱠᱢᱩ ᱯᱩᱨᱩᱱ ᱵᱟᱠᱷᱨᱟ ᱟᱡᱟᱜ ᱠᱚᱨᱢᱚᱨᱮ ᱠᱩᱨᱩᱢᱩᱴᱩ ᱪᱷᱩᱴᱟᱹᱣ ᱠᱚᱜᱼᱟᱭ ᱾ ᱦᱚᱨᱛᱮ ᱡᱟᱸᱜᱮ, ᱡᱟᱹᱱᱩᱢ ᱡᱷᱟᱹᱱᱴᱤᱨᱮ ᱛᱚᱦᱚᱫ ᱛᱟᱹᱠᱤᱡ ᱵᱟᱡᱟᱣᱜ ᱨᱮᱦᱚᱸᱭ ᱵᱟᱭ ᱛᱤᱸᱜᱩᱱᱟ ᱾ ᱦᱚᱭ ᱵᱟᱺᱨᱰᱩ ᱫᱟᱨᱟᱭ ᱨᱮᱦᱚᱸ ᱵᱟᱭ ᱴᱷᱟᱠᱮᱫᱚᱜᱼᱟ ᱾ ᱞᱟᱲᱟᱣ ᱠᱚᱜᱼᱟᱭ ᱵᱷᱤᱸᱫᱟᱹᱲᱚᱜ ᱨᱮᱦᱚᱸᱭ ᱵᱮᱨᱮᱫ ᱨᱩᱣᱟᱹᱲ ᱠᱟᱛᱮ ᱾ ᱢᱤᱫ ᱫᱤᱱ ᱵᱟᱝ ᱢᱤᱫ ᱫᱤᱱ ᱡᱚᱥ ᱴᱷᱟᱶᱨᱮ ᱥᱮᱴᱮᱨᱚᱜᱼᱟᱭ ᱟᱨ ᱡᱟᱦᱟᱸ ᱛᱟᱭ ᱦᱚᱠ ᱚᱱᱟ ᱠᱩᱲᱟᱹᱭ ᱦᱚᱸᱭᱟᱛᱟᱝ ᱧᱟᱢᱟ ᱾ ᱩᱱᱨᱮ ᱟᱡᱟᱜ ᱠᱟᱹᱢᱤᱨᱮ ᱪᱟᱸᱫᱚ ᱵᱚᱸᱜᱟ ᱦᱟᱜ ᱛᱷᱩᱢ ᱜᱮ ᱧᱮᱞ ᱧᱟᱢᱚᱜᱼᱟ ᱾

ᱠᱟᱹᱭ ᱢᱚᱱᱼᱟᱱ ᱦᱚᱲᱟᱜ ᱵᱮᱵᱷᱟᱨ ᱫᱚ ᱪᱮᱛᱟᱱᱨᱮ ᱟᱹᱰᱤ ᱱᱟᱯᱟᱭ ᱟᱹᱰᱤ ᱥᱚᱨᱮᱥ ᱾ ᱤᱠᱷᱟᱹᱱ ᱢᱚᱱ ᱵᱷᱤᱛᱟᱹᱨ ᱨᱮᱫᱚ ᱛᱟᱭ ᱯᱮᱨᱮᱡ ᱠᱚᱜᱼᱟ ᱵᱟᱨᱚᱵᱚᱨᱚᱱ ᱯᱷᱟᱸᱫᱽ
ᱯᱷᱤᱠᱤᱨ, ᱮᱲᱮ ᱮᱨᱮᱲ ᱠᱟᱛᱷᱟ ᱾ ᱚᱠᱟ ᱞᱮᱠᱟᱛᱮ ᱦᱚᱲᱮ ᱦᱚᱭᱨᱟᱬᱮᱭᱟ ᱾ ᱚᱠᱟᱨᱮ ᱟᱨ ᱛᱤᱱᱨᱮ ᱡᱟᱹᱱᱩᱢᱮ ᱚᱰᱟᱣ ᱞᱮᱠᱷᱟᱱ ᱦᱚᱲᱮ ᱡᱚᱠᱷᱚᱢ ᱚᱪᱚ ᱫᱟᱲᱮ ᱟᱭᱟ ᱮᱢᱟᱱ ᱛᱮᱢᱟᱱ ᱦᱤᱸᱥᱟᱹ ᱥᱩᱭᱟᱹ ᱵᱟᱹᱲᱤᱡ ᱠᱟᱛᱷᱟ ᱵᱷᱟᱹᱵᱤ ᱵᱷᱟᱹᱵᱤᱛᱮ ᱟᱦᱟᱨ ᱯᱩᱠᱷᱨᱤ ᱨᱮᱱᱟᱜ ᱥᱮᱭᱟᱞᱚᱢ ᱥᱮᱭᱟ ᱫᱟᱜ ᱞᱮᱠᱟ ᱢᱚᱱᱮ ᱛᱟᱭ ᱵᱚᱠᱚᱞ ᱵᱚᱰᱮ ᱪᱟᱵᱟᱜᱼᱟ ᱾
ᱱᱤᱡᱚᱨᱟᱜ ᱥᱩᱠ ᱥᱩᱵᱤᱫᱷᱟ ᱟᱨ ᱠᱩᱥᱤ ᱞᱟᱹᱜᱤᱫ ᱮᱴᱟᱜ ᱦᱚᱲ ᱫᱚ ᱪᱮᱫ? ᱢᱟᱭᱟᱢ ᱥᱟᱹᱜᱟᱹᱭ ᱦᱚᱲ ᱠᱟᱱ ᱨᱮᱦᱚᱸᱭ ᱚᱥᱩᱵᱤᱫᱷᱟᱹᱨᱮ ᱰᱷᱟᱠᱟ ᱠᱷᱟᱸᱡᱚ ᱠᱟᱭ ᱞᱟᱹᱜᱤᱫ ᱵᱟᱭ
ᱯᱟᱹᱪᱷᱟᱹᱠᱚᱜᱼᱟ ᱾ ᱟᱨ ᱩᱱᱤᱭᱟᱜ ᱫᱩᱠ ᱠᱚᱥᱴᱚ ᱧᱮᱞ ᱠᱟᱛᱮ ᱟᱡ ᱮ ᱧᱟᱢᱟ ᱟᱹᱰᱤ ᱟᱸᱴ ᱨᱟᱹᱥᱠᱟᱹ ᱾ ᱦᱟᱨᱠᱮᱛ ᱰᱚᱰᱷᱨᱮ ᱦᱚᱬᱡᱮᱫ ᱟᱠᱟᱫᱮ ᱦᱚᱲ ᱪᱮᱛᱟᱱᱨᱮ ᱟᱨᱦᱚᱸ ᱢᱮᱫ ᱟᱦᱟ ᱜᱚᱥᱚᱢᱚᱥᱚ ᱠᱟᱛᱮ ᱦᱟᱭ ᱪᱚᱜ ᱥᱟᱶᱛᱮ ᱥᱚᱦᱟᱜᱽ ᱫᱩᱞᱟᱹᱲ ᱦᱚᱸᱭ ᱩᱢᱟᱹᱬ ᱟᱭᱟ ᱾ ᱦᱚᱲ ᱥᱟᱢᱟᱝ ᱨᱮ ᱟᱹᱰᱤ ᱢᱟᱨᱟᱝ ᱥᱟᱹᱫᱷᱩ ᱧᱮᱞ ᱚᱪᱚᱜ ᱞᱟᱹᱜᱤᱫ ᱾ ᱤᱠᱷᱟᱹᱱ ᱡᱟᱦᱟᱸ ᱛᱤᱱᱟᱹᱜ ᱛᱟᱭ ᱞᱟᱸᱫᱟ ᱨᱮᱱᱟᱜ ᱠᱟᱛᱷᱟ ᱞᱟᱸᱫᱟ ᱵᱷᱟᱜᱟᱣ ᱠᱚᱜᱼᱟᱭ ᱪᱮ ᱟᱹᱣᱨᱤ ᱠᱷᱟᱱ ᱜᱮ ᱟᱡᱟᱜ ᱠᱟᱹᱨᱤᱜᱚᱞ ᱨᱮᱱᱟᱜ ᱦᱮᱸᱫᱮ ᱨᱤᱢᱤᱞ ᱥᱟᱦᱟ ᱟᱛᱚᱢᱚᱜᱼᱟ ᱾ ᱟᱨ ᱨᱤᱢᱤᱞ ᱫᱟᱱᱟᱝ ᱠᱷᱚᱱ ᱡᱤᱲᱤᱫ ᱡᱤᱲᱤᱫ ᱪᱟᱸᱫᱚᱭ ᱧᱮᱞ ᱧᱟᱢᱚᱜ ᱞᱮᱠᱟ ᱚᱥᱚᱞ ᱪᱮᱦᱨᱟ ᱟᱨᱵᱟᱝ ᱠᱟᱹᱭ ᱛᱟᱭ ᱫᱩᱱᱤᱭᱟᱹ ᱥᱟᱢᱟᱝᱨᱮ ᱥᱚᱫᱚᱨᱚᱜᱼᱟ ᱾

ᱥᱟᱱᱟᱢ ᱦᱚᱲ ᱜᱮ ᱟᱯᱟᱱ ᱟᱹᱯᱤᱱ ᱠᱩᱥᱤᱭᱟᱜ ᱞᱮᱠᱟᱱᱟᱜ ᱜᱮᱵᱚᱱ ᱠᱟᱹᱢᱤᱭᱟ ᱾ ᱚᱠᱟ ᱠᱟᱹᱢᱤ ᱦᱚᱸ ᱵᱟᱭ ᱦᱩᱰᱤᱧ ᱢᱟᱨᱟᱝᱼᱟ ᱾ ᱡᱟᱦᱟᱸ ᱠᱟᱹᱢᱤ ᱱᱤᱡᱚᱨᱟᱜ ᱥᱟᱶᱛᱮ ᱥᱩᱨ
ᱥᱩᱯᱩᱨ ᱦᱚᱲ ᱠᱚᱣᱟᱜ ᱵᱷᱟᱹᱞᱟᱹᱭ ᱦᱩᱭᱩᱜᱼᱟ, ᱚᱱᱟᱜᱮ ᱵᱮᱥ ᱟᱨᱵᱟᱝ ᱱᱟᱯᱟᱭ ᱠᱟᱹᱢᱤ ᱫᱚᱵᱚ ᱢᱮᱛᱟᱜᱟᱜᱼᱟ ᱾ ᱵᱟᱝ ᱵᱟᱰᱟᱭ ᱟᱨ ᱵᱟᱰᱟᱭ ᱛᱩᱞᱩᱡ ᱠᱟᱹᱭ ᱨᱮᱫᱚ ᱟᱠᱟᱥ
ᱯᱟᱛᱟᱞ ᱯᱷᱚᱨᱚᱠ ᱢᱮᱱᱟᱜᱼᱟ ᱾ ᱡᱟᱦᱟᱸ ᱞᱮᱠᱟ ᱠᱟᱹᱡ ᱞᱮᱴᱠᱟ ᱵᱟᱭ ᱵᱟᱰᱟᱭ ᱠᱟᱜ ᱵᱷᱩᱨ ᱥᱮᱸᱜᱮᱞ ᱛᱮᱫᱚ ᱞᱚᱞᱚᱣᱟ ᱢᱮᱱᱛᱮ ᱩᱱ ᱫᱷᱟᱹᱵᱤᱡ ᱫᱚ ᱡᱟᱦᱟᱸ ᱛᱤᱱᱟᱹᱜ ᱮᱢ ᱢᱟᱱᱟ ᱵᱟᱨᱚᱱᱮ ᱨᱮᱦᱚᱸ ᱥᱟᱥᱟᱵ ᱞᱟᱹᱜᱤᱫᱚᱜᱼᱟᱭ ᱾ ᱤᱠᱷᱟᱹᱱ ᱢᱤᱫ ᱫᱷᱟᱣ ᱞᱚ ᱪᱷᱩᱸᱡ ᱞᱮᱱᱠᱷᱟᱱᱮ ᱟᱨ ᱛᱤᱥ ᱦᱚᱸ ᱵᱟᱭ ᱥᱟᱥᱟᱵᱼᱟ ᱾ ᱴᱷᱤᱠ ᱚᱱᱠᱟ ᱜᱮ ᱡᱚᱠᱷᱚᱱ
ᱵᱟᱰᱟᱭᱚᱜᱼᱟ ᱱᱚᱣᱟ ᱫᱚ ᱵᱟᱹᱲᱤᱡ ᱠᱟᱹᱢᱤ ᱠᱟᱱᱟ ᱮᱱᱠᱷᱟᱱ ᱥᱚᱱᱛᱚᱨ ᱥᱟᱦᱟᱜ ᱞᱟᱹᱠᱛᱤᱭᱟ ᱾ ᱢᱟᱹᱱᱢᱤᱭᱟᱜ ᱛᱤᱛᱮ ᱵᱷᱩᱞ ᱟᱨᱵᱟᱝ ᱠᱟᱹᱭ ᱥᱚᱵᱽ ᱥᱚᱢᱚᱭ ᱦᱩᱭ
ᱫᱟᱲᱮᱭᱟᱜᱼᱟ ᱾ ᱱᱚᱣᱟ ᱫᱚ ᱠᱚᱱᱚ ᱱᱟᱶᱟ ᱠᱟᱛᱷᱟ ᱫᱚ ᱵᱟᱝ ᱠᱟᱱᱟ ᱾ ᱢᱟᱨᱟᱝ ᱠᱟᱛᱷᱟ ᱫᱚ ᱱᱚᱶᱟᱜᱮ ᱵᱷᱩᱞ ᱥᱩᱫᱷᱨᱟᱹᱣ ᱫᱟᱲᱮᱭᱟᱜ ᱠᱷᱟᱱᱮᱢ ᱡᱤᱵᱚᱱᱨᱮ ᱞᱟᱦᱟ ᱥᱮᱫ ᱮᱢ ᱛᱟᱲᱟᱢ ᱫᱟᱲᱮᱭᱟᱜᱼᱟ ᱾ ᱤᱠᱷᱟᱹᱱ ᱵᱟᱰᱟᱭ ᱛᱩᱞᱩᱡ ᱠᱟᱹᱭ ᱠᱷᱟᱱᱮᱢ ᱪᱟᱸᱫᱚ ᱵᱚᱸᱜᱟ ᱦᱚᱸ ᱵᱟᱭ ᱤᱜᱼᱠᱟᱹ ᱦᱟ ᱾

ᱢᱟᱹᱱᱢᱤ ᱡᱩᱫᱤ ᱜᱚᱨᱚᱵᱽ ᱫᱷᱚᱢᱚᱠ ᱠᱷᱟᱹᱛᱤᱨ ᱵᱟᱹᱲᱤᱡ ᱠᱟᱹᱢᱤᱨᱮ ᱞᱟᱜᱟᱣ ᱠᱚᱜᱼᱟᱭ ᱟᱨ ᱚᱱᱟᱛᱮ ᱦᱚᱲ ᱠᱚᱥᱴᱚ ᱠᱚ ᱧᱟᱢᱟ ᱾ ᱮᱱᱠᱷᱟᱱ ᱚᱠᱛᱚ ᱟᱹᱪᱩᱨᱚᱜ ᱥᱟᱶᱛᱮ ᱚᱱᱟ ᱠᱟᱹᱭ ᱨᱮᱱᱟᱜ ᱠᱩᱲᱟᱹᱭ ᱫᱚ ᱱᱚᱣᱟ ᱡᱤᱣᱤᱫ ᱡᱤᱵᱚᱱ ᱨᱮᱜᱮ ᱵᱷᱚᱜᱟᱣ ᱛᱮ ᱯᱟᱲᱟᱣ ᱟᱭᱟ ᱾ ᱡᱟᱦᱟᱸ ᱨᱩᱯ ᱨᱚᱝ ᱞᱟᱹᱜᱤᱫ ᱢᱚᱱᱮᱨᱮ ᱩᱱᱟᱹᱜ ᱜᱚᱨᱚᱵᱽ ᱡᱟᱦᱟᱸ ᱫᱷᱚᱱ ᱥᱚᱢᱯᱚᱛᱤ ᱫᱟᱲᱮᱛᱮ ᱢᱚᱱᱮᱨᱮ ᱩᱱᱟᱹᱜ ᱫᱷᱚᱢᱚᱠ ᱢᱮᱱᱟᱜᱼᱟ ᱾ ᱚᱱᱟ ᱫᱚ ᱚᱠᱛᱚ ᱵᱚᱫᱚᱞᱚᱜ ᱥᱟᱶᱛᱮ ᱟᱹᱨᱩᱯᱷᱮᱨᱟᱣᱼᱟ ᱾ ᱴᱷᱤᱠ ᱡᱚ ᱵᱟᱦᱟᱛᱮ ᱥᱟᱡᱟᱣ ᱟᱠᱟᱱ ᱫᱟᱨᱮ ᱢᱤᱫ ᱫᱤᱱ ᱞᱟᱰᱮᱭᱟ ᱴᱷᱩᱰᱜᱩ ᱨᱩᱵ ᱚᱵᱚᱨᱚᱜ ᱞᱮᱠᱟ ᱦᱚᱲ ᱦᱚᱸ ᱟᱫᱷᱚᱲ ᱞᱟᱦᱟᱡᱩᱨᱤ ᱞᱮᱱᱠᱷᱟᱱᱮᱢ ᱞᱟᱹᱴᱤᱡᱚᱜ ᱪᱚᱝᱼᱮᱢ ᱞᱤᱣᱤᱫᱚᱜ, ᱨᱚᱠᱲᱮᱜ ᱪᱚᱝᱼᱮᱢ ᱪᱚᱠᱲᱮᱜ ᱾ ᱫᱷᱚᱱ ᱥᱚᱢᱯᱚᱛᱤ ᱠᱚᱦᱚᱸ ᱯᱷᱟᱹᱠᱬᱟᱹᱜ ᱤᱞ ᱟᱱᱟ ᱾ ᱛᱟᱠ ᱜᱮ ᱠᱷᱟᱹᱞᱤ ᱠᱷᱚᱡᱟᱨ ᱯᱟᱱᱛᱮ ᱵᱟᱲᱟᱭᱟᱭ ᱾ ᱢᱤᱫ ᱫᱷᱟᱣ ᱩᱰᱟᱹᱣ ᱮᱦᱚᱵ ᱞᱮᱱᱠᱷᱟᱱ ᱛᱤᱱᱨᱮ ᱚᱴᱟᱝ ᱪᱟᱵᱟᱜᱼᱟ ᱛᱷᱤᱛ ᱦᱚᱸ ᱵᱟᱝ ᱛᱷᱤᱛᱚᱜᱼᱟ ᱾ ᱟᱨᱜᱮ ᱚᱱᱠᱟᱱ ᱫᱤᱱ ᱦᱚᱸ ᱦᱤᱡᱩᱜᱼᱟ ᱡᱤᱵᱚᱱᱨᱮ ᱡᱟᱦᱟᱸ ᱛᱤᱥ ᱦᱚᱨᱚᱜ ᱞᱩᱜᱽᱲᱤ ᱞᱟᱯᱚ ᱥᱟᱸᱵᱷᱲᱟᱣ ᱞᱟᱹᱜᱤᱫ ᱦᱚᱲᱢᱚᱨᱮ ᱫᱟᱲᱮ ᱦᱚᱸ ᱵᱟᱝ ᱛᱟᱦᱮᱸᱱᱟ ᱾ ᱩᱱ ᱡᱷᱚᱜ ᱫᱚ ᱚᱠᱚᱭ ᱦᱚᱸ ᱵᱟᱠᱚ ᱢᱮᱛᱟᱢᱟ ᱩᱱᱟᱹᱜ ᱮᱢ ᱪᱚᱨᱚᱠᱟ ᱩᱱᱟᱹᱜ ᱮᱢ ᱠᱤᱥᱟᱹᱬᱟ ᱪᱮ ᱩᱱᱟᱹᱜ ᱮᱢ ᱫᱟᱲᱮᱭᱟ ᱢᱮᱱᱛᱮ ᱾ ᱩᱱᱡᱷᱚᱜ ᱫᱚ ᱢᱤᱫ ᱫᱤᱱ ᱚᱠᱚᱭ ᱜᱮ ᱫᱷᱚᱢᱠᱟᱣ ᱵᱚᱛᱚᱨ ᱚᱪᱚ ᱠᱟᱛᱮ ᱵᱚᱲᱦᱮᱢ ᱫᱟᱵᱚᱱ ᱛᱤᱨᱩᱵ ᱠᱟᱭᱟ ᱩᱱᱤ ᱜᱮ ᱵᱮᱥ ᱚᱠᱚᱡᱼᱮ ᱦᱟᱞᱟ ᱨᱩᱣᱟᱹᱲ ᱢᱮᱭᱟ ᱾

ᱟᱹᱰᱤ ᱦᱚᱲ ᱜᱮᱵᱚ ᱟᱸᱡᱚᱢ ᱵᱟᱲᱟ ᱟᱠᱟᱫᱟ ᱜᱚᱲᱚᱢ ᱟᱭᱳ ᱜᱚᱲᱚᱢ ᱵᱟᱵᱟ ᱠᱚᱴᱷᱮᱱ ᱠᱷᱚᱱ ᱢᱮᱢᱮᱱ ᱟᱠᱚ ᱥᱤᱠᱷᱟᱹᱣ ᱪᱮᱪᱮᱫ ᱟᱠᱚ ᱥᱮᱛᱟ ᱯᱩᱥᱤ ᱚᱵᱚᱞᱟ ᱨᱮᱦᱚᱸ ᱪᱮ ᱦᱚᱲ ᱠᱟᱱᱮ ᱵᱤᱱ ᱜᱩᱱᱦᱟᱹ ᱛᱮᱫᱚ ᱟᱞᱚᱯᱮ ᱫᱟᱹᱨᱩᱲ ᱠᱷᱟᱵᱚᱲ ᱫᱟᱞᱛᱚᱞ ᱠᱚᱣᱟ ᱵᱟᱝᱠᱷᱟᱱ ᱧᱩᱠᱩᱨ ᱧᱩᱜᱼᱧᱩᱨᱟ ᱾ ᱡᱟᱦᱟᱸ ᱛᱤᱥ ᱟᱯᱮᱭᱟᱜ ᱦᱚᱸ ᱛᱤ ᱡᱟᱸᱜᱟ ᱛᱷᱟᱨᱛᱷᱟᱨᱟᱣᱼᱟ ᱾ ᱟᱨᱦᱚᱸ ᱜᱮ ᱵᱟᱝ ᱟᱸᱡᱚᱢ ᱫᱟᱲᱮᱭᱟᱜ, ᱵᱟᱝ ᱧᱮᱧᱮᱞ ᱧᱟᱢ ᱫᱟᱲᱮᱭᱟᱜ, ᱵᱟᱝ ᱨᱚᱲ ᱫᱟᱲᱮᱭᱟᱜ ᱟᱨ ᱵᱮᱥ ᱚᱠᱚᱡ ᱵᱟᱝ ᱛᱟᱲᱟᱢ ᱫᱟᱲᱮᱭᱟᱜ ᱦᱚᱲ ᱠᱚᱦᱚᱸ ᱠᱟᱞᱟ, ᱠᱟᱬᱟ, ᱠᱚᱸᱫᱟ ᱪᱮ ᱪᱷᱚᱴᱟ ᱵᱟᱠᱚ ᱢᱮᱛᱟ ᱠᱚᱣᱟ ᱢᱮᱱᱛᱮ ᱾ ᱥᱤᱫᱷᱟᱹ ᱥᱤᱫᱷᱟᱹ ᱠᱟᱛᱷᱟ ᱛᱮᱫᱚ ᱱᱚᱣᱟ ᱠᱚᱨᱮᱱᱟᱜ ᱢᱮᱱᱮᱛ ᱫᱚ ᱦᱩᱭᱩᱜ ᱠᱟᱱᱟ ᱚᱠᱚᱭ ᱦᱚᱸ ᱠᱟᱹᱢᱤ ᱠᱟᱛᱮ ᱪᱮ ᱨᱚᱲ ᱛᱮᱨᱮᱦᱚᱸ ᱠᱚᱥᱴᱚ ᱚᱪᱚᱭᱮ ᱫᱚ ᱢᱤᱫ ᱠᱟᱹᱭ ᱨᱮᱜᱮ ᱞᱮᱠᱷᱟᱜᱼᱟ ᱾

ᱢᱟᱹᱱᱢᱤ ᱟᱡᱟᱜ ᱱᱟᱯᱟᱭ ᱠᱟᱹᱢᱤ ᱠᱟᱛᱮᱜᱮ ᱡᱤᱵᱚᱱᱨᱮ ᱧᱩᱛᱩᱢ ᱛᱟᱭ ᱢᱟᱨᱥᱟᱞᱟᱭ ᱟᱨ ᱩᱥᱩᱞᱟᱭ ᱾ ᱥᱟᱶᱛᱮ ᱥᱟᱶᱛᱟᱨᱮ ᱢᱤᱫ ᱥᱚᱨᱮᱥ ᱩᱯᱩᱨᱩᱢ ᱦᱚᱸᱭ ᱵᱮᱱᱟᱣ ᱫᱟᱲᱮᱭᱟᱜᱼᱟ ᱾ ᱚᱱᱟᱛᱮ ᱵᱷᱟᱹᱜᱤᱭᱟᱜ ᱜᱮ ᱠᱟᱹᱢᱤ ᱨᱮᱱᱟᱜ ᱞᱟᱹᱠᱛᱤ ᱟᱨᱵᱟᱝ ᱫᱚᱨᱠᱟᱨ ᱢᱮᱱᱟᱜᱼᱟ ᱾ ᱵᱷᱟᱹᱜᱤ ᱠᱟᱹᱢᱤ ᱨᱮᱜᱮ ᱢᱤᱫ ᱦᱚᱲ ᱡᱤᱵᱚᱱᱨᱮ ᱥᱩᱠ ᱟᱨ ᱥᱟᱱᱛᱤ ᱦᱚᱸᱭ ᱧᱟᱢᱟ ᱾ ᱚᱱᱟᱛᱮ ᱵᱟᱹᱲᱤᱡ ᱠᱟᱹᱢᱤ ᱠᱷᱚᱱ ᱫᱚ ᱥᱟᱦᱟᱨᱮ ᱛᱟᱦᱮᱸᱱ ᱞᱟᱹᱠᱛᱤᱭᱟ ᱾ ᱵᱟᱹᱲᱤᱡ ᱠᱟᱹᱢᱤ ᱞᱮᱠᱷᱟᱱ ᱫᱚ ᱠᱟᱹᱭ ᱠᱩᱲᱟᱹᱭ ᱧᱟᱢᱚᱜᱼᱟ ᱡᱤᱵᱚᱱᱨᱮ ᱠᱷᱟᱹᱞᱤ ᱪᱤᱱᱛᱟᱹ ᱟᱨ ᱠᱚᱥᱴᱚ ᱜᱮ ᱥᱟᱦᱟᱨ ᱵᱟᱹᱰᱩᱜᱼᱟ ᱾

***

ᱚᱱᱚᱞ ᱠᱟᱹᱦᱱᱤ ᱠᱟᱹᱭ ᱠᱩᱲᱟᱹᱭ September 28, 2023by ᱢᱟᱹᱱᱤᱡ ᱢᱤᱱᱟ ᱵᱟᱥᱠᱮ ᱢᱟᱹᱱᱢᱤ ᱡᱤᱵᱚᱱᱨᱮ ᱡᱟᱦᱟᱸ ᱞᱮᱠᱟᱭ ᱠᱟᱹᱢᱤᱭᱟ ᱟᱡᱟᱜ ᱠᱚᱨᱢᱚ ᱡᱟᱹᱱᱤᱡ ᱜᱮ ᱠᱩᱲᱟᱹ.....

25/12/2023

14th Edition of "Ayo Arang" E- Magazine of Santali Women Writers' Organisation will be Coming soon.

22/12/2023

ᱢᱟᱹᱭ ᱨᱟᱝᱠᱤᱱᱤ ᱦᱟᱸᱥᱫᱟ (Miss Rankini Hansda, West Bengal) ᱟᱡᱟᱜ ᱢᱤᱫ ᱱᱟᱯᱟᱭ ᱠᱟᱹᱦᱱᱤ *ᱮᱨᱟᱢ* , ᱯᱟᱲᱦᱟᱣ ᱥᱟᱸᱜᱮ ᱢᱟᱵᱚ ᱾ ᱞᱟᱛᱟᱨ ᱨᱮᱱᱟᱜ link ᱡᱚᱴᱮᱫ ᱠᱟᱛᱮ Website ᱦᱚᱸ ᱦᱤᱨᱤ ᱛᱟᱵᱚ ᱯᱮ 🙏🙏 ᱾

*'ᱮᱨᱟᱢ'*
SEPTEMBER 27, 2023
BY ᱨᱟᱝᱠᱤᱱᱤ ᱦᱟᱸᱥᱫᱟ

ᱡᱷᱮᱸᱴ ᱵᱚᱸᱜᱟ ᱦᱩᱲᱩ ᱛᱚᱞᱟᱭ ᱫᱤᱱ ᱾ ᱡᱚᱛᱚ ᱦᱚᱲ ᱜᱮ ᱠᱷᱮᱛ ᱠᱚᱠᱚ ᱥᱤᱭᱮᱫ ᱛᱟᱠᱚᱣᱟ ᱾ ᱚᱱᱟᱛᱮ ᱪᱟᱨᱮᱪᱜᱚᱲᱟ ᱨᱮᱱ ᱨᱟᱢ ᱧᱩᱛᱩᱢᱟᱱ ᱢᱤᱫ ᱪᱟᱹᱥᱤ ᱦᱚᱲ ᱫᱚ ᱥᱮᱛᱟᱜ ᱥᱮᱛᱟᱜ ᱜᱮ ᱱᱟᱦᱮᱞ ᱰᱟᱝᱨᱤ ᱠᱚ ᱤᱫᱤ ᱠᱟᱛᱮᱫ ᱟᱠᱳ ᱵᱟᱹᱫᱽ ᱛᱮ ᱥᱤᱭᱚᱜ ᱮ ᱤᱫᱤ ᱟᱠᱟᱫᱟ ᱾ ᱟᱡ ᱵᱟᱹᱦᱩ ᱥᱟᱨᱚ ᱫᱚ ᱚᱲᱟᱜ ᱨᱮ ᱥᱮᱛᱟᱜ ᱠᱟᱹᱢᱤ ᱠᱚ ᱠᱟᱹᱢᱤ ᱵᱟᱲᱟ ᱠᱟᱛᱮᱫ ᱫᱟᱠᱟ ᱫᱟᱜ ᱢᱟᱺᱰᱤ ᱠᱚᱭ ᱤᱥᱤᱱᱟ ᱟᱨ ᱠᱷᱮᱛ ᱛᱮᱭ ᱤᱫᱤᱭᱟᱭᱟ ᱾

ᱱᱟᱦᱮᱞ ᱥᱤ ᱥᱤ ᱛᱮ ᱟᱹᱰᱤ ᱜᱮ ᱵᱟᱹᱥᱭᱟᱹᱢ ᱜᱚᱫ ᱟᱠᱟᱱᱟ ᱟᱨ ᱥᱤᱛᱩᱝ ᱦᱚᱸ ᱟᱹᱰᱤ ᱡᱳᱨ ᱥᱤᱛᱩᱝ ᱟᱠᱟᱱᱟ ᱾ ᱥᱤ ᱥᱤ ᱛᱮ ᱟᱹᱰᱤ ᱜᱮ ᱨᱮᱸᱜᱮᱡ ᱟᱠᱟᱫᱮᱭᱟ ᱟᱨ ᱫᱟᱜ ᱦᱚᱸ ᱟᱹᱰᱤ ᱡᱳᱨ ᱛᱮᱛᱟᱝ ᱟᱠᱟᱫᱮᱭᱟ ᱾ ᱟᱡ ᱥᱩᱨ ᱥᱩᱯᱩᱨ ᱡᱟᱦᱟᱸᱭ ᱠᱚ ᱱᱟᱦᱮᱞ ᱠᱚ ᱥᱤᱭᱮᱫ ᱛᱟᱸᱦᱮ ᱠᱟᱱᱟ ᱩᱱᱠᱩ ᱫᱚ ᱫᱟᱠᱟ ᱫᱟᱜ ᱢᱟᱺᱰᱤ ᱠᱚᱠᱚ ᱟᱹᱜᱩᱣᱟᱫ ᱠᱚᱛᱮ ᱠᱚ ᱡᱚᱢᱮᱫᱟ ᱾ ᱢᱮᱱᱠᱷᱟᱱ ᱥᱟᱨᱚ ᱫᱚ ᱱᱤᱛ ᱦᱚᱸ ᱵᱟᱭ ᱦᱮᱡ ᱞᱮᱱᱟ ᱾ ᱨᱟᱢ ᱫᱚ ᱱᱟᱦᱮᱞ ᱮ ᱥᱤᱭᱮᱫᱟ ᱟᱨ ᱮ ᱠᱚᱭᱚᱜ ᱮᱫᱟ ᱮᱨᱟᱛ ᱛᱮᱫ ᱟᱜ ᱦᱤᱡᱩᱜ ᱦᱚᱨ ᱥᱮᱫ ᱜᱮ ᱾ ᱢᱤᱫ ᱜᱷᱟᱹᱲᱤᱡ ᱛᱟᱭᱚᱢ ᱥᱟᱨᱚ ᱫᱚ ᱤᱛᱟᱹ ᱦᱩᱲᱩ ᱴᱷᱮᱠᱟ ᱨᱮ ᱫᱤᱯᱤᱞ ᱠᱟᱛᱮᱫ ᱟᱨ ᱵᱟᱹᱴᱤ ᱨᱮ ᱫᱟᱜ ᱢᱟᱺᱰᱤ ᱥᱮᱯᱮᱧ ᱠᱟᱛᱮᱫ ᱟᱲᱮ ᱟᱲᱮ ᱛᱮ ᱞᱮᱜᱮᱢ ᱞᱮᱜᱮᱢ ᱮ ᱛᱟᱲᱟᱢ ᱟᱠᱟᱫᱟ ᱾

ᱨᱟᱢ ᱫᱚ ᱟᱡ ᱵᱟᱹᱦᱩ ᱥᱟᱺᱜᱤᱧ ᱨᱮᱜᱮᱭ ᱧᱮᱞ ᱧᱟᱢ ᱟᱠᱟᱫᱮᱭᱟ ᱾ ᱟᱫᱚ ᱥᱟᱺᱜᱤᱧ ᱠᱷᱚᱱ ᱜᱮᱭ ᱢᱮᱛᱟᱭ ᱠᱟᱱᱟ ᱪᱮᱫ ᱮᱢ ᱪᱮᱠᱟᱭᱮᱫ ᱛᱟᱸᱦᱮ ᱠᱟᱱᱟ ᱱᱤᱛ ᱟᱹᱱᱤᱡ ᱮᱢ ᱦᱤᱡᱩᱜ ᱠᱟᱱᱟ? ᱤᱧ ᱛᱤᱱᱟᱹᱜ ᱨᱮᱸᱜᱮᱡ ᱟᱠᱟᱫᱤᱧᱟ, ᱨᱮᱸᱜᱮᱡ ᱛᱮᱧ ᱠᱷᱮᱭᱟᱢ ᱩᱛᱟᱹᱨᱮᱱᱟ ᱮᱱᱛᱮ ᱨᱮᱦᱚᱸ ᱵᱟᱢ ᱦᱤᱡᱩᱜ ᱠᱟᱱᱟ ᱾ ᱟᱡ ᱡᱟᱶᱟᱭ ᱥᱟᱺᱜᱤᱧ ᱠᱷᱚᱱ ᱪᱮᱫ ᱮ ᱢᱮᱛᱟᱫᱮᱭᱟ ᱥᱟᱨᱚ ᱫᱚ ᱩᱱᱟᱹᱜ ᱵᱷᱟᱜᱮ ᱞᱮᱠᱟ ᱫᱚ ᱵᱟᱭ ᱟᱸᱡᱚᱢ ᱞᱮᱫᱟ ᱾ ᱟᱫᱚ ᱡᱳᱨ ᱛᱮᱭ ᱢᱮᱱ ᱜᱚᱫ ᱠᱮᱫᱟ – ᱪᱮᱫ…… ᱮᱨᱟᱢ…ᱹᱹ? ᱨᱟᱢ ᱫᱚ ᱟᱡ ᱵᱟᱹᱦᱩ ᱟᱜ ᱢᱚᱪᱟ ᱨᱮ ᱟᱭᱟᱜ ᱧᱩᱛᱩᱢ ᱟᱸᱡᱚᱢ ᱠᱟᱛᱮᱫ ᱨᱟᱹᱜᱤ ᱡᱟᱞᱟ ᱱᱟᱦᱮᱞ ᱥᱤ ᱵᱟᱹᱜᱤ ᱠᱟᱛᱮᱫ ᱰᱟᱝᱨᱤ ᱟᱹᱪᱩᱨ ᱞᱟᱹᱜᱤᱫ ᱡᱟᱦᱟ ᱴᱷᱮᱸᱜᱟᱭ ᱥᱟᱵ ᱟᱠᱟᱫ ᱛᱟᱸᱦᱮ ᱠᱟᱱᱟ ᱚᱱᱟ ᱥᱟᱵ
ᱠᱟᱛᱮᱫ ᱜᱮ ᱟᱡ ᱵᱟᱹᱦᱩ ᱥᱮᱱᱮ ᱪᱟᱞᱟᱜ ᱠᱟᱱᱟ ᱟᱨ ᱮ ᱢᱮᱱ ᱤᱫᱤᱭᱮᱫᱟ ᱵᱟᱢ ᱦᱮᱡ ᱦᱚᱫ ᱫᱟᱲᱮᱭᱟᱜ ᱠᱟᱱᱟ? ᱮᱱᱟᱝ ᱠᱷᱚᱱ ᱛᱤᱱᱟᱹᱜ ᱨᱮᱸᱜᱮᱡ ᱟᱠᱟᱫᱤᱧᱟ ᱾ ᱥᱟᱨᱚ ᱫᱚ ᱟᱨ ᱦᱚᱸ ᱡᱳᱨ ᱟᱲᱟᱝ ᱛᱮᱭ ᱢᱮᱱ ᱠᱮᱫᱟ – ᱪᱮᱫ…… ᱮᱨᱟᱢ…ᱹᱹ? ᱨᱟᱢ ᱩᱱ ᱫᱚ ᱫᱟᱹᱲ ᱟᱛᱮᱫ ᱜᱮ ᱟᱡ ᱵᱟᱹᱦᱩ ᱥᱮᱱᱮ ᱧᱤᱨ ᱦᱤᱡᱩᱜ ᱠᱟᱱᱟ ᱾ ᱥᱟᱨᱚ ᱫᱚ ᱟᱡ ᱡᱟᱶᱟᱭ ᱟᱜ ᱛᱤ ᱨᱮ ᱴᱷᱮᱸᱜᱟ ᱧᱮᱞ ᱛᱮ ᱵᱚᱛᱚᱨ ᱛᱮ ᱤᱛᱟᱹ ᱦᱩᱲᱩ ᱴᱷᱮᱠᱟ, ᱫᱟᱠᱟ ᱫᱟᱜ ᱢᱟᱺᱰᱤ ᱵᱟᱹᱴᱤ ᱥᱟᱱᱟᱢ ᱜᱤᱰᱤ ᱠᱟᱛᱮᱫ ᱮ ᱧᱤᱨ ᱫᱟᱹᱲ ᱠᱮᱫᱟ ᱾

ᱨᱟᱢ ᱫᱚ ᱟᱹᱰᱤ ᱡᱳᱨ ᱫᱟᱜ ᱛᱮᱛᱟᱝ ᱟᱨ ᱨᱮᱸᱜᱮᱡ ᱞᱮᱫᱮ ᱛᱮ ᱟᱡ ᱵᱟᱹᱦᱩ ᱵᱟᱹᱴᱤ ᱠᱚ ᱜᱤᱰᱤ ᱠᱟᱛᱮᱫ ᱫᱟᱹᱲ ᱮ ᱧᱮᱞ ᱠᱮᱫᱮ ᱛᱮ ᱢᱚᱱᱮ ᱞᱮᱫᱟᱭ ᱡᱟᱦᱟ ᱞᱮᱠᱟ ᱠᱟᱛᱮᱫ ᱜᱮ ᱚᱱᱟ ᱵᱟᱹᱴᱤ ᱴᱷᱮᱱᱮ ᱥᱮᱴᱮᱨᱚᱜᱼᱟ ᱟᱨ ᱦᱤᱨᱤᱡ ᱯᱟᱹᱥᱤᱨ ᱡᱟᱦᱟ ᱜᱮᱭ ᱧᱟᱢ ᱠᱟᱹᱴᱤᱡ ᱨᱮᱦᱚᱸ ᱧᱩ ᱠᱟᱛᱮᱫ ᱡᱤᱣᱤᱭ ᱢᱟᱨᱛᱚᱠ ᱛᱟᱭᱟ ᱾ ᱢᱮᱱᱠᱷᱟᱱ ᱥᱤᱛᱩᱝ ᱛᱮ, ᱨᱮᱸᱜᱮᱡ ᱛᱮ, ᱛᱷᱟᱠᱟᱣ ᱛᱮ ᱦᱚᱲᱢᱚ ᱨᱮ ᱫᱟᱲᱮ ᱠᱚᱦᱚᱸ ᱪᱟᱵᱟ ᱞᱮᱱ ᱛᱟᱭᱟ ᱾ ᱟᱡ ᱵᱟᱹᱦᱩ ᱡᱟᱦᱟᱸ ᱨᱮ ᱫᱟᱜ ᱢᱟᱺᱰᱤ ᱵᱟᱹᱴᱤ ᱠᱚ ᱜᱤᱰᱤ ᱠᱟᱛᱮᱫ ᱮ ᱫᱟᱹᱲ ᱟᱠᱟᱫᱟ ᱚᱱᱟ ᱥᱩᱨ ᱪᱟᱞᱟᱜ ᱪᱟᱞᱟᱜ ᱛᱮᱜᱮᱭ ᱥᱚᱸᱵᱚᱫ ᱵᱷᱤᱸᱫᱟᱹᱲ ᱮᱱᱟ ᱾ ᱟᱹᱛᱩ ᱟᱠᱟᱱ ᱫᱟᱜ ᱢᱟᱺᱰᱤ ᱡᱮᱸᱵᱮᱫ ᱨᱮᱱᱟᱜ ᱫᱚᱭ ᱨᱤᱠᱟᱹ ᱞᱮᱫ ᱜᱮᱭᱟ ᱢᱮᱱᱠᱷᱟᱱ ᱚᱱᱟ ᱨᱮᱱᱟᱜ ᱫᱟᱲᱮ ᱦᱚᱸ ᱵᱟᱝ ᱦᱳᱭ ᱞᱮᱱ ᱛᱟᱭᱟ ᱾ ᱚᱸᱰᱮ ᱜᱮ ᱪᱷᱟᱴᱯᱟᱴᱟᱣ ᱠᱟᱛᱮᱫ ᱮ ᱫᱟᱜ ᱫᱚᱲᱚᱢ ᱩᱛᱟᱹᱨᱮᱱᱟ ᱾

***

ᱚᱱᱚᱞ ᱠᱟᱹᱦᱱᱤ ᱮᱨᱟᱢ September 27, 2023by ᱨᱟᱝᱠᱤᱱᱤ ᱦᱟᱸᱥᱫᱟ ᱡᱷᱮᱸᱴ ᱵᱚᱸᱜᱟ ᱦᱩᱲᱩ ᱛᱚᱞᱟᱭ ᱫᱤᱱ ᱾ ᱡᱚᱛᱚ ᱦᱚᱲ ᱜᱮ ᱠᱷᱮᱛ ᱠᱚᱠᱚ ᱥᱤᱭᱮᱫ ᱛᱟᱠᱚᱣᱟ ᱾ ᱚᱱᱟᱛᱮ ᱪᱟ....

21/12/2023

Books Written by Mrs. Chhaya Mandi | ᱚᱱᱚᱬᱦᱮ ᱯᱩᱛᱷᱤ ᱠᱚ | Ayo Arang Official | Chhaya Mandi | ...

20/12/2023

ᱫᱟᱹᱭ ᱢᱟᱹᱢᱤᱡ ᱥᱚᱢᱵᱟᱹᱨᱤ ᱵᱟᱥᱠᱮ (Mrs. Sombari Baskey, Visakhapatnam) ᱟᱜ ᱢᱤᱫ ᱥᱮᱪᱮᱫ ᱠᱟᱹᱦᱱᱤ *'ᱥᱮᱪᱮᱫ ᱵᱟᱝ ᱛᱮ'*, ᱫᱮᱞᱟ ᱵᱚ ᱯᱟᱲᱦᱟᱣ ᱥᱟᱸᱜᱮᱭᱟ ᱾🙏🙏

*ᱥᱮᱪᱮᱫ ᱵᱟᱝ ᱛᱮ*
SEPTEMBER 28, 2023
BY ᱢᱟᱹᱱᱤᱡ ᱥᱚᱢᱵᱟᱹᱨᱤ ᱵᱟᱥᱠᱮ
1 MIN READ

ᱵᱟᱹᱨᱩᱰᱤ ᱟᱹᱛᱩ ᱨᱮ ᱵᱟᱨ ᱵᱚᱭᱦᱟ ᱠᱤᱱ ᱛᱟᱦᱮᱸ ᱠᱟᱱᱟ ᱾ ᱵᱩᱫᱷᱤᱭᱟᱹ ᱟᱨ ᱢᱤᱴᱷᱩ ᱾ ᱟᱡ ᱵᱟᱵᱟ ᱵᱚᱸᱜᱟ ᱛᱟᱞᱟ ᱛᱟᱭᱚᱢ ᱜᱮ ᱠᱤᱱ ᱵᱷᱮᱜᱟᱨ ᱟᱠᱟᱱᱟ ᱾ ᱵᱩᱫᱷᱤᱭᱟᱹ ᱫᱚ ᱟᱡᱟᱜ ᱥᱚᱝᱥᱟᱨ ᱥᱟᱢᱴᱟᱣ ᱞᱟᱹᱜᱤᱫ ᱜᱟᱛᱮᱭ ᱧᱟᱢ ᱟᱠᱟᱣᱱᱟ ᱾ ᱢᱮᱱᱮᱛ ᱫᱚᱭ ᱵᱟᱯᱞᱟ ᱟᱠᱟᱱᱟ ᱾ ᱦᱟᱥᱟ ᱡᱟᱭᱜᱟ ᱫᱚ ᱠᱚᱢ ᱜᱮ ᱛᱟᱹᱠᱤᱱᱟ ᱾ ᱵᱟᱨᱭᱟ ᱜᱮ ᱴᱚᱯᱨᱟᱜ ᱢᱮᱱᱟᱜ-ᱟ ᱟᱨ ᱵᱷᱮᱜᱟᱨᱮᱱ ᱠᱷᱟᱱ ᱠᱤᱱ ᱟᱨ ᱦᱚᱸ ᱜᱮ ᱠᱚᱢ ᱮᱱᱟ ᱾ ᱟᱹᱠᱤᱱᱟᱜ ᱪᱟᱥ ᱠᱟᱹᱢᱤ ᱦᱩᱭ ᱯᱩᱨᱟᱹᱣ ᱠᱟᱛᱮ ᱟᱹᱛᱩ ᱚᱲᱟᱜ ᱨᱮ ᱠᱤᱱ ᱱᱟᱞᱦᱟ ᱵᱟᱲᱟᱭᱟ ᱾ ᱫᱤᱱ ᱫᱚ ᱱᱟᱯᱟᱭ ᱜᱮ ᱯᱟᱨᱚᱢ ᱪᱟᱞᱟᱜ ᱠᱟᱱᱟ ᱾ ᱟᱹᱰᱤ ᱠᱷᱟᱹᱴᱟᱹᱲᱤ ᱦᱚᱲ ᱠᱤᱱ ᱛᱟᱦᱮᱸ ᱠᱟᱱᱟ ᱾ ᱮᱱ ᱦᱚᱸ ᱟᱹᱛᱩ ᱚᱲᱟᱜ ᱨᱮ ᱫᱤᱱᱟᱹᱢ ᱫᱤᱱ ᱠᱟᱹᱢᱤ ᱵᱟᱭ ᱧᱟᱢᱚᱜ ᱛᱮ ᱢᱤᱴᱷᱩ ᱫᱚ ᱵᱟᱦᱨᱮ ᱫᱤᱥᱚᱢ ᱠᱟᱹᱢᱤᱭ ᱪᱟᱞᱟᱣ ᱮᱱᱟ ᱾ ᱜᱟᱛᱮ ᱥᱟᱶ ᱜᱩᱡᱽᱨᱟᱛ ᱵᱟᱡᱟᱨ ᱱᱟᱞᱦᱟ ᱛᱮᱭ ᱪᱟᱞᱟᱣ ᱮᱱᱟ ᱾

ᱵᱩᱫᱷᱤᱭᱟᱹ ᱫᱚ ᱟᱹᱛᱩ ᱚᱲᱟᱜ ᱨᱮᱜᱮᱭ ᱱᱟᱞᱦᱟ ᱵᱟᱲᱟᱭᱟ ᱟᱨ ᱵᱩᱫᱽᱱᱤ ᱫᱚ ᱥᱤᱢ ᱟᱨ ᱢᱮᱨᱚᱢ ᱠᱚᱭ ᱟᱹᱥᱩᱞ ᱟᱠᱟᱣᱟᱱᱟ ᱾ ᱚᱲᱟᱜ ᱠᱟᱹᱢᱤ ᱛᱟᱭ ᱟᱨ ᱩᱱᱠᱩ ᱯᱩᱱᱭᱟᱹ ᱢᱮᱨᱚᱢ ᱜᱮ ᱟᱹᱛᱤᱧ ᱮ ᱤᱫᱤ ᱠᱚᱣᱟ ᱾ ᱫᱤᱱ ᱫᱚ ᱡᱚᱛᱚ ᱦᱚᱲᱟᱜ ᱱᱟᱯᱟᱭ ᱛᱮ ᱪᱟᱞᱟᱜ ᱠᱟᱱᱟ ᱾ ᱢᱤᱴᱷᱩ ᱦᱚᱸ ᱱᱟᱞᱦᱟ ᱟᱨ ᱜᱟᱛᱮ ᱠᱚ ᱥᱟᱶ ᱨᱮ ᱱᱟᱯᱟᱭ ᱜᱮ ᱢᱮᱱᱟᱭᱟ ᱾ ᱛᱩᱨᱩᱭ ᱵᱚᱸᱜᱟ ᱱᱚᱝᱠᱟ ᱛᱮ ᱦᱩᱭ ᱯᱟᱨᱚᱢ ᱮᱱᱟ, ᱵᱩᱫᱷᱤᱭᱟᱹ ᱛᱤᱠᱤᱱ ᱦᱚᱸ ᱦᱳᱲᱳ ᱠᱚ ᱤᱨ ᱥᱟᱢᱴᱟᱣ ᱠᱟᱛᱮᱫ ᱚᱲᱟᱜ ᱛᱮ ᱠᱤᱱ ᱟᱹᱜᱩ ᱟᱠᱟᱫ-ᱟ ᱾ ᱥᱟᱠᱨᱟᱛ ᱯᱟᱨᱟᱵᱽ ᱥᱮᱴᱮᱨᱚᱜ ᱠᱟᱱᱟ ᱾ ᱦᱳᱲᱳ ᱠᱚ ᱫᱟᱞ ᱥᱟᱢᱴᱟᱣ ᱠᱟᱛᱮ ᱠᱤᱱ ᱵᱟᱭ ᱟᱠᱟᱫ-ᱟ ᱾ ᱠᱷᱚᱲ ᱫᱚ ᱠᱤᱱ ᱯᱟᱲᱚᱭ ᱟᱠᱟᱫ-ᱟ ᱾ ᱚᱲᱟᱜ ᱥᱩᱨ ᱵᱟᱲᱜᱮ ᱠᱚᱬ ᱨᱮ ᱾

ᱵᱩᱫᱽᱱᱤ ᱟᱜ ᱠᱟᱹᱢᱤ ᱟᱹᱰᱤ ᱰᱷᱮᱨ ᱟᱠᱟᱱᱟ ᱾ ᱚᱲᱟᱜ ᱫᱩᱣᱟᱹᱨ ᱥᱟᱯᱷᱟ ᱟᱨ ᱱᱚᱛᱮ ᱢᱮᱨᱚᱢ ᱛᱟᱭ ᱾ ᱥᱟᱠᱨᱟᱛ ᱵᱟᱠᱷᱨᱟ ᱦᱟᱺᱰᱤ ᱫᱚᱭ ᱦᱟᱹᱨ ᱟᱠᱟᱫ ᱜᱮᱭᱟ ᱾ ᱢᱤᱴᱷᱩ ᱦᱚᱸ ᱜᱩᱡᱽᱨᱟᱛ ᱠᱷᱚᱱ ᱱᱟᱞᱦᱟ ᱠᱟᱛᱮ ᱵᱟᱹᱶᱰᱤ ᱥᱟᱠᱨᱟᱛ ᱦᱤᱞᱚᱜ ᱜᱮᱭ ᱥᱮᱴᱮᱨ ᱟᱠᱟᱱᱟ ᱾ ᱟᱡ ᱦᱤᱞᱤ ᱞᱟᱹᱜᱤᱫ ᱥᱟᱹᱲᱤ ᱟᱨ ᱫᱟᱫᱟ ᱵᱩᱫᱷᱤᱭᱟᱹ ᱞᱟᱹᱜᱤᱫ ᱠᱟᱪᱟ ᱫᱷᱩᱛᱤ ᱾ ᱵᱟᱹᱶᱰᱤ ᱦᱤᱞᱚᱜ ᱫᱚ ᱡᱤᱞ ᱯᱤᱴᱷᱟᱹ ᱟᱨ ᱛᱩᱭᱩ ᱨᱟᱜ ᱦᱟᱺᱰᱤ ᱠᱚ ᱧᱩ ᱡᱚᱢ ᱠᱮᱫ-ᱟ ᱾ ᱟᱨ ᱦᱟᱹᱠᱩ ᱩᱛᱩ ᱥᱟᱶ ᱫᱟᱠᱟ ᱠᱚ ᱡᱚᱢ ᱠᱮᱫ-ᱟ ᱾ ᱟᱠᱚ ᱧᱩᱛᱩᱢ ᱛᱮ ᱥᱟᱠᱨᱟᱛ ᱵᱩᱰᱷᱤ ᱯᱟᱛᱲᱟ ᱨᱮ ᱫᱟᱠᱟ ᱟᱨ ᱯᱷᱩᱲᱩᱜ ᱨᱮ ᱦᱟᱹᱠᱩ ᱩᱛᱩ ᱨᱟᱪᱟ ᱨᱮᱠᱚ ᱫᱚᱦᱚ ᱠᱟᱫ-ᱟ ᱾ ᱞᱟᱡ ᱨᱮ ᱡᱟᱸᱜᱟ ᱨᱮ ᱥᱩᱱᱩᱢ ᱠᱚ ᱚᱡᱚᱜ ᱟᱱᱟ ᱵᱟᱝ ᱢᱟ ᱠᱚ ᱚᱡᱚᱜᱽ ᱜᱮᱭᱟ ᱾ ᱵᱮᱥ ᱛᱮ ᱦᱚᱡᱚᱢᱚᱜ ᱢᱟ ᱾

ᱫᱚᱥᱟᱨ ᱦᱤᱞᱚᱜ ᱥᱤᱧ ᱥᱟᱠᱨᱟᱛ ᱦᱤᱞᱚᱜ ᱫᱚ ᱥᱤᱢ ᱠᱟᱞᱚᱴ ᱥᱟᱠᱨᱟᱛ ᱵᱩᱰᱷᱤ ᱠᱚ ᱛᱷᱟᱯᱟ ᱟᱫᱮᱭᱟ ᱾ ᱜᱩᱲ ᱛᱟᱵᱮᱱ, ᱜᱩᱲ ᱯᱤᱴᱷᱟᱹ, ᱟᱨ ᱛᱤᱞᱢᱤᱧ ᱠᱷᱟᱹᱡᱟᱹᱲᱤ ᱱᱚᱶᱟ ᱠᱚ ᱵᱚᱸᱜᱟ ᱠᱮᱫ-ᱟ ᱾ ᱩᱢ ᱠᱟᱛᱮ ᱱᱟᱶᱟ ᱞᱩᱜᱽᱲᱤ ᱠᱚ ᱦᱚᱨᱚᱜ ᱮᱱᱟ ᱾ ᱵᱩᱫᱽᱱᱤ ᱫᱚ ᱞᱮᱴᱚ, ᱯᱤᱴᱷᱟ, ᱟᱨ ᱫᱟᱠᱟ, ᱩᱛᱩ ᱠᱮᱫ ᱟᱭ ᱾ ᱱᱚᱛᱮ ᱵᱩᱫᱷᱤᱭᱟᱹ ᱫᱚ ᱱᱟᱶᱟ ᱠᱟᱪᱟ ᱫᱷᱩᱛᱤ ᱠᱟᱛᱮ ᱦᱟᱯᱲᱟᱢ ᱠᱚ ᱦᱟᱺᱰᱤᱭ ᱪᱮᱰᱚᱨ ᱟᱫ ᱠᱚᱣᱟ ᱾ ᱟᱨ ᱟᱠᱚ ᱦᱚᱸᱠᱚ ᱡᱚᱢ ᱧᱩ ᱠᱮᱫ-ᱟ ᱾ ᱛᱟᱨᱟᱥᱤᱧ ᱵᱮᱲᱟ ᱫᱚ ᱵᱮᱡᱷᱟ ᱠᱚ ᱛᱩᱧ ᱠᱮᱫ-ᱟ ᱾ ᱡᱤᱛᱠᱟᱹᱨᱤᱭᱟᱹ ᱫᱚ ᱢᱟᱹᱡᱷᱤ ᱪᱷᱟᱴᱠᱟ ᱨᱮ ᱱᱟᱭᱠᱮ ᱟᱭᱳ ᱡᱟᱸᱜᱟ ᱫᱟᱜ ᱠᱟᱛᱮ ᱧᱩ ᱡᱚᱢ ᱟᱨ ᱮᱱᱮᱡ ᱠᱚ ᱡᱚᱛᱚᱣᱟᱜ ᱜᱮ ᱦᱩᱭ ᱥᱟᱹᱛ ᱮᱱᱟ ᱾

ᱜᱟᱛᱮ ᱜᱟᱯᱟᱛᱮ ᱴᱚᱞᱟ ᱨᱮᱠᱚ ᱧᱩ ᱵᱟᱲᱟ ᱟᱱᱟ ᱾ ᱟᱨ ᱟᱯᱟᱱ ᱟᱹᱯᱤᱱ ᱚᱲᱟᱜ ᱠᱚ ᱪᱟᱞᱟᱣ ᱮᱱᱟ ᱾ ᱢᱤᱴᱷᱩ ᱟᱨ ᱵᱩᱫᱷᱤᱭᱟᱹ ᱦᱚᱸ ᱚᱲᱟᱜ ᱢᱮᱞᱟ ᱨᱮ ᱟᱨ ᱠᱟᱹᱡ ᱠᱤᱱ ᱧᱩ ᱡᱚᱝ ᱠᱟᱱᱟ ᱾ ᱟᱨ ᱠᱤᱱ ᱠᱟᱛᱷᱟᱜ ᱠᱟᱱᱟ ᱥᱩᱠ ᱫᱩᱠ ᱾ ᱠᱟᱛᱷᱟ ᱠᱟᱛᱷᱟ ᱛᱮ ᱧᱩ ᱦᱚᱸ ᱵᱟᱹᱲᱛᱤ ᱮᱱᱟ ᱟᱨ ᱠᱟᱛᱷᱟ ᱦᱚᱸ ᱵᱟᱹᱲᱛᱤ ᱤᱫᱤ ᱮᱱᱟ ᱾ ᱠᱟᱛᱷᱟ ᱨᱟᱯᱟᱪᱟᱜ ᱛᱮ ᱱᱮᱭᱟᱣ ᱠᱤᱱ ᱮᱦᱚᱵ ᱠᱮᱫ-ᱟ ᱾ ᱩᱱ ᱢᱟ ᱟᱹᱰᱤ ᱠᱤᱱ ᱫᱟᱲᱮ ᱮᱱ ᱾ ᱵᱩᱫᱽᱱᱤᱭᱟᱜ ᱪᱮᱫ ᱠᱟᱛᱷᱟ ᱜᱮ ᱵᱟᱹᱠᱤᱱ ᱟᱸᱡᱚᱢᱟ ᱾ ᱧᱩ ᱥᱟᱨᱮᱡ ᱯᱩᱸᱜᱤ ᱫᱚ ᱨᱟᱹᱜᱤ ᱛᱮ ᱞᱮᱵᱽᱫᱟ ᱠᱟᱫ ᱟᱭ ᱢᱤᱴᱷᱩ ᱫᱚ ᱾ ᱟᱨ ᱱᱚᱛᱮ ᱡᱩᱨᱥᱩᱨ ᱠᱤᱱ ᱱᱮᱭᱟᱣᱜ ᱠᱟᱱᱟ ᱾

ᱯᱩᱸᱜᱤ ᱥᱮᱸᱜᱮᱞ ᱛᱮ ᱵᱩᱥᱩᱵ ᱜᱟᱫᱟ ᱨᱮ ᱥᱮᱸᱜᱮᱞ ᱫᱷᱚᱨᱟᱣ ᱮᱱᱟ ᱾ ᱴᱚᱞᱟ ᱨᱤᱱ ᱦᱚᱲ ᱠᱚ ᱦᱮᱡ ᱵᱟᱲᱟᱜ ᱛᱮᱜᱮ ᱞᱚ ᱛᱚᱨᱚᱡ ᱮᱱᱟ ᱵᱩᱥᱩᱵ ᱜᱟᱫᱟ ᱾ ᱵᱩᱫᱷᱤᱭᱟᱹ ᱫᱚ ᱢᱤᱴᱷᱩ ᱠᱚ ᱥᱟᱵ ᱤᱫᱤ ᱮᱭᱟ ᱯᱩᱞᱤᱥ ᱴᱷᱮᱱ ᱮ ᱱᱟᱹᱞᱤᱥ ᱠᱮᱫ-ᱟ ᱾ ᱯᱩᱞᱤᱥ ᱠᱤᱱ ᱦᱮᱡ ᱮᱱᱟ ᱾ ᱯᱩᱞᱤᱥ ᱫᱚ ᱠᱤᱱ ᱢᱮᱱ ᱠᱮᱫ-ᱟ, ᱡᱩᱨᱤᱢᱟᱱᱟ ᱴᱟᱠᱟ ᱢᱟᱬᱟᱝ ᱮᱢᱚᱜ ᱵᱤᱱ ᱾ ᱜᱮᱞ ᱜᱮᱥᱟᱭ ᱾ ᱵᱟᱝᱠᱷᱟᱱ ᱵᱟᱱᱟ ᱵᱚᱲᱤᱧ ᱛᱚᱞ ᱤᱫᱤ ᱵᱤᱱᱟ ᱾ ᱡᱤᱦᱚᱞ ᱵᱚᱛᱚᱨ ᱛᱮ ᱜᱩᱡᱽᱨᱟᱛ ᱨᱮᱱᱟᱜ ᱠᱟᱢᱟᱣ ᱴᱟᱠᱟ ᱟᱨ ᱢᱮᱨᱚᱢ ᱟᱹᱠᱷᱨᱤᱧ ᱴᱟᱠᱟ ᱠᱤᱱ ᱫᱚᱦᱚ ᱡᱟᱣᱨᱟ ᱞᱮᱫ ᱡᱷᱚᱛᱚ ᱴᱟᱠᱟ ᱠᱤᱱ ᱮᱢᱟ ᱟᱫ ᱠᱤᱱᱟ ᱾ ᱟᱨ ᱯᱩᱞᱤᱥ ᱠᱤᱱ ᱢᱮᱱ ᱠᱮᱫ-ᱟ, ᱦᱚᱭ ᱱᱤᱛᱚᱜ ᱫᱚ ᱠᱮᱥ ᱞᱤᱧ ᱦᱟᱹᱞᱠᱟᱹ ᱧᱚᱜᱟ ᱾ ᱚᱱᱠᱟ ᱢᱮᱱ ᱠᱟᱛᱮ ᱯᱩᱞᱤᱥ ᱦᱚᱸ ᱠᱤᱱ ᱪᱟᱞᱟᱣ ᱮᱱᱟ ᱾

ᱱᱚᱶᱟ ᱠᱟᱹᱦᱱᱤ ᱨᱮᱱᱟᱜ ᱥᱟᱨ ᱫᱚ ᱱᱚᱶᱟ ᱜᱮ, ᱵᱚᱭᱦᱟ ᱵᱷᱤᱛᱨᱤ ᱨᱮ ᱯᱚᱴᱟᱣ ᱵᱟᱝ ᱛᱟᱦᱮᱸᱱ ᱠᱷᱟᱱ ᱮᱴᱟᱜ ᱦᱚᱲ ᱜᱮ ᱯᱷᱟᱭᱫᱟ ᱮᱱᱟᱭ ᱾ ᱟᱨ ᱱᱩᱠᱤᱱ ᱵᱟᱱᱟᱨ ᱵᱚᱭᱦᱟ ᱫᱚ ᱠᱤᱱ ᱦᱟᱹᱱ ᱮᱱᱟ ᱾

***

ᱚᱱᱚᱞ ᱠᱟᱹᱦᱱᱤ ᱥᱮᱪᱮᱫ ᱵᱟᱝ ᱛᱮ September 28, 2023by ᱢᱟᱹᱱᱤᱡ ᱥᱚᱢᱵᱟᱹᱨᱤ ᱵᱟᱥᱠᱮ1 min read ᱵᱟᱹᱨᱩᱰᱤ ᱟᱹᱛᱩ ᱨᱮ ᱵᱟᱨ ᱵᱚᱭᱦᱟ ᱠᱤᱱ ᱛᱟᱦᱮᱸ ᱠᱟᱱᱟ ᱾ ᱵᱩᱫᱷᱤᱭᱟᱹ ᱟᱨ ....

13/12/2023

ᱢᱟᱹᱱᱤᱡ ᱥᱚᱞᱢᱟ ᱦᱟᱸᱥᱫᱟ (Mrs. Salma Hansda, Bilashpur, Chhatishgarh) ᱟᱜ ᱢᱤᱫ ᱥᱚᱨᱮᱥ ᱚᱱᱚᱬᱦᱮ *"ᱵᱟᱵᱟ ᱩᱭᱦᱟᱹᱨ ᱛᱮ"* ᱫᱮᱞᱟ ᱵᱚ ᱯᱟᱲᱦᱟᱣ ᱥᱟᱸᱜᱮᱭᱟ ᱾

*ᱵᱟᱵᱟ ᱩᱭᱦᱟᱹᱨ ᱛᱮ*
SEPTEMBER 28, 2023
BY ᱢᱟᱹᱱᱤᱡ ᱥᱚᱞᱢᱟ ᱦᱟᱸᱥᱫᱟ

ᱢᱮᱞᱟ ᱚᱲᱟᱜ ᱤᱧ ᱵᱚᱞᱚ ᱜᱚᱫᱚᱜ
ᱠᱷᱟᱹᱞᱤ ᱯᱟᱨᱠᱚᱢ ᱵᱤᱞ ᱟᱠᱟᱱ ᱧᱮᱞ ᱧᱟᱢᱚᱜ ᱾

ᱢᱮᱫ ᱮ ᱠᱚᱭᱚᱜᱽ ᱜᱚᱴᱟ ᱯᱟᱲᱟ ᱦᱟᱱᱛᱮ ᱱᱷᱟᱛᱮ,
ᱟᱨᱤᱧ ᱠᱚᱭᱚᱜᱽ ᱵᱤᱞ ᱟᱠᱟᱱ ᱯᱟᱨᱠᱚᱢ ᱛᱤᱸᱜᱩ ᱠᱟᱛᱮ ᱾

ᱵᱩᱡᱷᱟᱹᱣᱟᱹᱧ ᱱᱚᱝᱠᱟ ᱚᱸᱰᱮᱢ ᱫᱩᱲᱩᱵ ᱟᱠᱟᱱ,
ᱟᱨᱤᱧ ᱵᱩᱡᱷᱟᱹᱣ ᱟᱢᱮᱢ ᱦᱚᱦᱚ ᱟᱹᱧ ᱠᱟᱱ ᱾

ᱧᱮᱞᱛᱮ ᱠᱷᱟᱹᱞᱤ ᱯᱟᱨᱠᱚᱢ ᱟᱢᱤᱧ ᱩᱭᱦᱟᱹᱨ ᱢᱮ ᱵᱟᱵᱟ,
ᱦᱤᱰᱤᱨ ᱢᱮᱫ ᱫᱟᱜ ᱡᱚᱨᱚᱜ ᱟᱢ ᱩᱭᱦᱟᱹᱨ ᱛᱮ ᱵᱟᱵᱟ ᱾

ᱜᱚᱴᱟ ᱯᱟᱲᱟ ᱧᱩᱛᱟᱹᱛ ᱜᱮ ᱧᱮᱞᱚᱜ,
ᱚᱱᱛᱚᱨ ᱡᱤᱣᱤ ᱨᱮ ᱫᱩᱠ ᱢᱮᱱᱟᱜ ᱾

ᱢᱮᱫ ᱮ ᱯᱟᱱᱛᱮ ᱮᱫ ᱢᱮ ᱟᱢ,
ᱵᱟᱢ ᱦᱤᱡᱩᱜ ᱛᱤᱥ ᱨᱮᱦᱚᱸ ᱟᱢ ᱾

ᱛᱤᱸᱜᱩ ᱠᱟᱹᱛᱤᱧ ᱩᱭᱦᱟᱹᱨ ᱡᱚᱝ ᱠᱟᱱ,
ᱟᱢ ᱦᱚᱸ ᱵᱟᱢ ᱦᱚᱦᱚ ᱟᱹᱧ ᱠᱟᱱ ᱾

ᱧᱮᱞᱛᱮ ᱠᱷᱟᱹᱞᱤ ᱯᱟᱨᱠᱚᱢ ᱟᱢᱤᱧ ᱩᱭᱦᱟᱹᱨ ᱢᱮ ᱵᱟᱵᱟ,
ᱦᱤᱰᱤᱨ ᱢᱮᱫ ᱫᱟᱜ ᱡᱚᱨᱚᱜ ᱟᱢ ᱩᱭᱦᱟᱹᱨ ᱛᱮ ᱵᱟᱵᱟ ᱾

ᱚᱲᱟᱜ ᱠᱷᱟᱹᱞᱤ ᱵᱩᱡᱷᱟᱹᱣᱜ ᱠᱟᱱᱟ,
ᱜᱷᱟᱨᱚᱸᱡᱽ ᱦᱚᱸ ᱨᱟᱹᱯᱩᱫ ᱮᱱᱟ ᱾

ᱪᱷᱤᱱ ᱪᱷᱟᱹᱛᱩᱨ ᱮᱱᱟ ᱡᱚᱛᱚ ᱨᱟᱹᱥᱠᱟᱹ,
ᱵᱚᱛᱚᱨ ᱜᱮ ᱱᱤᱛᱚᱜ ᱵᱩᱡᱷᱟᱹᱣᱜᱼᱟ ᱾

ᱵᱟᱢ ᱦᱚᱦᱚ ᱟᱹᱧ ᱫᱩᱞᱟᱹᱲ ᱟᱲᱟᱝ ᱛᱮ,
ᱵᱟᱢ ᱮᱜᱮᱨᱤᱧ ᱨᱟᱹᱜᱤ ᱟᱲᱟᱝ ᱛᱮ ᱾

ᱧᱮᱞᱛᱮ ᱠᱷᱟᱹᱞᱤ ᱯᱟᱨᱠᱚᱢ ᱟᱢᱤᱧ ᱩᱭᱦᱟᱹᱨ ᱢᱮ ᱵᱟᱵᱟ,
ᱦᱤᱰᱤᱨ ᱢᱮᱫ ᱫᱟᱜ ᱡᱚᱨᱚᱜ ᱟᱢ ᱩᱭᱦᱟᱹᱨ ᱛᱮ ᱵᱟᱵᱟ ᱾

ᱠᱷᱟᱹᱞᱤ ᱦᱚᱨᱟᱥᱤ ᱧᱮᱞᱛᱮ ᱟᱭᱳᱣᱟᱜ,
ᱢᱮᱫ ᱠᱷᱚᱱ ᱦᱤᱰᱤᱨ ᱢᱮᱫ ᱫᱟᱜ ᱡᱚᱨᱚᱜ ᱾

ᱡᱤᱭᱚᱱ ᱨᱮ ᱮᱠᱞᱟᱢ ᱵᱟᱹᱜᱤ ᱟᱫᱮ ᱟᱭᱳ,
ᱵᱟᱠᱚ ᱜᱟᱯᱟᱱ ᱦᱚᱱ ᱠᱤᱢᱤᱱ ᱚᱠᱚᱭ ᱦᱤᱨᱞᱟᱹ ᱨᱮ ᱱᱤᱛᱚᱜ ᱟᱭᱳ ᱾

ᱡᱤᱣᱤ ᱡᱩᱨᱤ ᱥᱟᱶᱛᱮ ᱛᱟᱦᱮᱸ ᱮᱢᱟᱫ ᱫᱮᱢ ᱠᱟᱛᱷᱟ,
ᱦᱮᱡ ᱠᱟᱛᱮ ᱪᱮᱫᱟᱜ ᱵᱟᱢ ᱯᱩᱨᱟᱹᱣᱮᱫ ᱚᱱᱟ ᱠᱟᱛᱷᱟ ᱾

ᱧᱮᱞᱛᱮ ᱠᱷᱟᱹᱞᱤ ᱯᱟᱨᱠᱚᱢ ᱟᱢᱤᱧ ᱩᱭᱦᱟᱹᱨ ᱢᱮ ᱵᱟᱵᱟ,
ᱦᱤᱰᱤᱨ ᱢᱮᱫ ᱫᱟᱜ ᱡᱚᱨᱚᱜ ᱟᱢ ᱩᱭᱦᱟᱹᱨ ᱛᱮ ᱵᱟᱵᱟ ᱾

ᱦᱩᱰᱤᱧ ᱵᱩᱦᱤᱱ ᱫᱚᱦᱚᱭᱟᱭ ᱠᱩᱠᱞᱤ ᱦᱮᱢᱟᱞ ᱵᱩᱨᱩ ᱞᱮᱠᱟ,
ᱚᱱᱛᱚᱨ ᱢᱚᱱᱮ ᱨᱮ ᱩᱭᱦᱟᱹᱨ ᱜᱩᱨᱞᱟᱹᱣᱜ ᱦᱚᱭ ᱵᱟᱹᱨᱰᱩ ᱞᱮᱠᱟ ᱾

ᱛᱟᱦᱮᱸᱱᱟᱹᱧ ᱥᱟᱺᱜᱤᱧ ᱫᱤᱥᱚᱢ ᱟᱸᱡᱚᱢ ᱠᱟᱛᱮ ᱠᱷᱚᱵᱚᱨ ᱟᱢᱟᱜ,
ᱟᱹᱴᱩ ᱯᱟᱹᱴᱩᱧ ᱥᱮᱴᱮᱨᱮᱱ ᱵᱟᱹᱧ ᱧᱮᱞᱟᱱ ᱢᱩᱪᱟᱹᱫ ᱢᱩᱴᱷᱟᱹᱱ ᱟᱢᱟᱜ ᱾

ᱧᱮᱞᱛᱮ ᱠᱷᱟᱹᱞᱤ ᱯᱟᱨᱠᱚᱢ ᱟᱢᱤᱧ ᱩᱭᱦᱟᱹᱨ ᱢᱮ ᱵᱟᱵᱟ,
ᱦᱤᱰᱤᱨ ᱢᱮᱫ ᱫᱟᱜ ᱡᱚᱨᱚᱜ ᱟᱢ ᱩᱭᱦᱟᱹᱨ ᱛᱮ ᱵᱟᱵᱟ ᱾

ᱧᱮᱞᱼᱧᱮᱞ ᱛᱮ ᱯᱩᱨᱟᱹᱣ ᱮᱱᱟ ᱜᱮᱞ ᱵᱚᱪᱷᱚᱨ,
ᱤᱫᱤ ᱠᱟᱹᱛᱤᱧ ᱥᱮᱴᱮᱨᱚᱜ ᱡᱟᱶᱟᱭ ᱜᱤᱫᱟᱹᱨ ᱾

ᱨᱟᱜᱟᱭ ᱤᱧᱟᱜ ᱱᱤᱛ ᱦᱚᱸ ᱡᱤᱣᱤ ᱚᱱᱛᱚᱨ,
ᱟᱲᱟᱝ ᱟᱢᱟᱜ ᱟᱸᱡᱚᱢ ᱥᱟᱱᱟᱭ ᱱᱚᱣᱟ ᱞᱩᱛᱩᱨ ᱾

ᱜᱷᱟᱱᱤᱧ ᱠᱚᱭᱚᱜᱽ ᱵᱟᱲᱜᱮ ᱫᱩᱣᱟᱹᱨ,
ᱜᱷᱟᱱᱤᱧ ᱠᱚᱭᱚᱜᱽ ᱠᱩᱞᱦᱤ ᱫᱩᱣᱟᱹᱨ ᱾

ᱧᱮᱞᱛᱮ ᱠᱷᱟᱹᱞᱤ ᱯᱟᱨᱠᱚᱢ ᱟᱢᱤᱧ ᱩᱭᱦᱟᱹᱨ ᱢᱮ ᱵᱟᱵᱟ,
ᱦᱤᱰᱤᱨ ᱢᱮᱫ ᱫᱟᱜ ᱡᱚᱨᱚᱜ ᱟᱢ ᱩᱭᱦᱟᱹᱨ ᱛᱮ ᱵᱟᱵᱟ ᱾

ᱧᱩᱛᱩᱢᱺ ᱼ ᱥᱚᱞᱢᱟ ᱦᱟᱸᱥᱫᱟ
ᱴᱷᱟᱶᱺ ᱼ ᱵᱤᱞᱟᱥᱯᱩᱨ (ᱪᱷᱚᱛᱛᱤᱥᱜᱚᱲ)

ᱚᱱᱚᱞ ᱚᱱᱚᱬᱦᱮ ᱵᱟᱵᱟ ᱩᱭᱦᱟᱹᱨ ᱛᱮ September 28, 2023by ᱢᱟᱹᱱᱤᱡ ᱥᱚᱞᱢᱟ ᱦᱟᱸᱥᱫᱟ ᱢᱮᱞᱟ ᱚᱲᱟᱜ ᱤᱧ ᱵᱚᱞᱚ ᱜᱚᱫᱚᱜ ᱠᱷᱟᱹᱞᱤ ᱯᱟᱨᱠᱚᱢ ᱵᱤᱞ ᱟᱠᱟᱱ ᱧᱮᱞ ᱧᱟᱢᱚᱜ ᱾ ....

10/12/2023

https://youtu.be/pur_xJKl2co

ᱟᱭᱢᱟ ᱟᱭᱢᱟ ᱥᱟᱨᱦᱟᱣ ᱫᱟᱹᱭ ᱢᱟᱹᱱᱤᱡ ᱢᱟᱹᱱᱤ ᱥᱚᱨᱮᱱ, ᱢᱟᱹᱱᱤᱡ ᱨᱤᱱᱟᱹ ᱦᱟᱸᱥᱫᱟ ᱟᱨ ᱥᱟᱱᱟᱢ ᱥᱟᱶᱛᱮᱱ ᱠᱚᱜᱮ ᱾ Bidu Chandan Ol Itun Asra, Kadma, Jamsedpur, Jharkhand.

ᱱᱚᱶᱟ ᱥᱮᱨᱮᱧ ᱥᱟᱱᱟᱢ ᱠᱚᱛᱮ ᱜᱮᱵᱚ ᱧᱮᱞ ᱥᱟᱸᱜᱮ ᱟᱸᱡᱚᱢ ᱥᱟᱸᱜᱮ ᱢᱟ ᱾

Santali Traditional Song | D**g Serenj | ᱫᱚᱝ ᱥᱮᱨᱮᱧ | AyoArang | Santali Video | Mani Soren | ...

06/12/2023

https://youtu.be/i3c13tVicdY

Ayo Arang Official Yutube Channel ᱨᱮ ᱤᱧᱟᱜ ᱢᱤᱫ ᱦᱩᱰᱤᱧ ᱠᱟᱹᱦᱱᱤ, ᱧᱮᱞ ᱥᱟᱸᱜᱮ, ᱟᱸᱡᱚᱢ ᱥᱟᱸᱜᱮ ᱢᱟᱵᱚ 😍🙏

Santali Short Story | Aruyanj Chando Likhon | ᱦᱩᱰᱤᱧ ᱠᱟᱹᱦᱱᱤ | Video | Maina Tudu #...

28/11/2023

ᱫᱟᱹᱭ ᱢᱟᱹᱱᱤᱡ ᱥᱚᱨᱳᱡᱤᱱᱤ ᱵᱮᱥᱨᱟ (Mrs. Sarojini Beshra, Delhi) ᱟᱜ ᱢᱤᱫ ᱥᱚᱨᱮᱥ ᱚᱱᱚᱬᱦᱮ *"ᱚᱞ ᱵᱚ ᱪᱮᱫᱟ"*, ᱫᱮᱞᱟ ᱥᱟᱱᱟᱢ ᱠᱚᱛᱮ ᱵᱚ ᱯᱟᱲᱦᱟᱣ ᱥᱟᱸᱜᱮᱭᱟ ᱾ Link ᱡᱚᱴᱮᱫ ᱠᱟᱛᱮ ᱦᱚᱸ Website Page ᱵᱚ ᱦᱤᱨᱤ ᱢᱟ ᱾

*ᱚᱞ ᱵᱚ ᱪᱮᱫᱟ*
SEPTEMBER 28, 2023
BY ᱥᱚᱨᱳᱡᱤᱱᱤ ᱵᱮᱥᱨᱟ

ᱢᱮᱱᱟᱭ ᱟᱵᱚᱭᱤᱡ ᱡᱟᱦᱮᱨᱼᱟᱭᱳ
ᱟᱵᱚᱭ ᱟᱹᱥᱩᱞ ᱦᱟᱨᱟ ᱭᱮᱫ ᱵᱚᱱ
ᱢᱟᱨᱟᱝᱼᱵᱳᱨᱳ ᱢᱮᱱᱟᱭ ᱛᱟᱵᱚ
ᱟᱵᱚ ᱛᱟᱲᱟᱢ ᱦᱚᱨᱮ ᱩᱫᱩᱜ ᱟᱵᱚᱱ ᱾

ᱛᱤᱨᱞᱟᱹ ᱵᱚᱭᱦᱟ ᱡᱟᱦᱟᱸ ᱜᱮ ᱢᱮᱱᱟᱜ ᱵᱚᱱ
ᱡᱚᱛᱚ ᱢᱤᱫ ᱢᱚᱱᱛᱮ ᱛᱟᱦᱮᱸ ᱱᱟᱵᱚ
ᱦᱤᱥᱟᱹ, ᱦᱤᱯᱤᱥᱟᱹ, ᱴᱷᱮᱞᱟᱣ ᱴᱷᱮᱯᱮᱞᱟᱣ
ᱵᱟᱝ ᱵᱚᱱ ᱛᱟᱦᱮᱱ ᱟᱵᱚ ᱾

ᱵᱟᱵᱚ ᱵᱚᱛᱚᱨ ᱟᱠᱚ ᱯᱟᱹᱯᱤ ᱵᱟᱹᱭᱨᱤ ᱠᱚ
ᱥᱟᱢᱟᱝ ᱨᱮ ᱡᱩᱢᱤᱫᱽ ᱛᱤᱸᱜᱩᱱ ᱵᱚ ᱢᱟᱬᱟᱝ
ᱵᱟᱵᱚ ᱞᱤᱵᱽᱲᱩᱡ ᱥᱟᱥᱮᱛ ᱦᱚᱪᱚᱜ
ᱫᱮᱡᱚᱜ ᱦᱩᱭ ᱟᱵᱚᱱ ᱡᱟᱦᱟᱸ ᱛᱤᱱᱟᱹᱜ ᱫᱟᱬᱟᱝ ᱾

ᱮᱴᱟᱜ ᱥᱟᱶᱛᱟ ᱠᱷᱚᱱ ᱦᱚᱲ ᱠᱚ ᱦᱤᱡᱩᱜ
ᱡᱟᱹᱛᱤᱼᱫᱷᱚᱨᱢᱚ ᱪᱷᱤᱛᱤᱵᱤᱛᱤ ᱞᱟᱹᱜᱤᱫ
ᱡᱟᱹᱯᱤᱫ ᱠᱷᱚᱱᱟᱜ ᱵᱮᱨᱮᱫ ᱵᱚ ᱞᱟᱜᱮ
ᱞᱟᱹᱰᱷᱟᱹᱭ ᱵᱚ ᱫᱩᱜ ᱫᱚᱦᱚᱭ ᱞᱟᱹᱜᱤᱫ ᱾

ᱵᱟᱝ ᱞᱟᱹᱠᱛᱤ ᱚᱵᱮᱲᱟ ᱨᱮ ᱟᱵᱚ
ᱚᱲᱟᱜ ᱨᱮ ᱦᱟᱺᱰᱤ ᱯᱟᱹᱨᱣᱟᱹ ᱵᱟᱵᱚᱱ ᱫᱚᱦᱚᱭ
ᱜᱷᱟᱨᱚᱸᱡᱽ ᱯᱤᱪᱷᱤ ᱢᱤᱼᱢᱤᱫ ᱴᱟᱝ
ᱡᱤᱣᱤᱫᱽ ᱵᱚ ᱚᱞ ᱫᱟᱨᱮ ᱫᱚᱞᱚᱭᱼᱫᱚᱞᱚᱭ ᱾

ᱠᱷᱟᱹᱞᱤᱼᱠᱷᱟᱹᱞᱤ ᱛᱮ ᱫᱟᱬᱟ ᱡᱚᱝ ᱚᱠᱛᱚ ᱵᱚᱨᱵᱟᱫᱽ
ᱦᱟᱴ, ᱯᱟᱛᱟ ᱵᱟᱵᱚᱱ ᱥᱮᱱᱚᱜ
ᱦᱚᱨᱼᱵᱤᱨ ᱨᱮ ᱦᱟᱺᱰᱤ ᱯᱟᱹᱣᱨᱟᱹ ᱵᱟᱵᱚᱱ ᱟᱹᱠᱷᱨᱤᱧ
ᱦᱚᱲᱢᱚ ᱰᱷᱤᱞᱟᱹᱣ ᱧᱩᱛᱮ ᱵᱟᱵᱚᱱ ᱵᱩᱞᱩᱜ ᱾

ᱚᱲᱟᱜᱼᱫᱩᱣᱟᱹᱨ ᱥᱟᱢᱴᱟᱣ ᱥᱟᱶᱛᱮ
ᱟᱵᱚ ᱟᱲᱟᱜ ᱦᱚᱲ ᱚᱞ ᱦᱚᱸᱵᱚ ᱪᱮᱫᱚᱜ
ᱡᱟᱛᱨᱟ, ᱯᱟᱛᱟ, ᱮᱱᱮᱡ ᱥᱮᱨᱮᱧ ᱵᱟᱹᱜᱤ
ᱫᱮᱞᱟ ᱚᱞ ᱢᱟᱬᱟᱝ ᱵᱚ ᱪᱮᱫᱚᱜ ᱾

ᱟᱵᱚ ᱚᱞ ᱛᱮᱵᱚ ᱚᱞᱚᱜ ᱜᱮᱭᱟ
ᱟᱵᱚᱣᱟᱜ ᱨᱚᱲ ᱵᱚ ᱥᱮᱬᱟᱭ
ᱟᱭᱳ ᱟᱲᱟᱝ ᱜᱷᱟᱨᱚᱸᱡᱽ ᱩᱢᱩᱞ ᱨᱮ
ᱥᱟᱶᱦᱮᱫ ᱫᱮᱵᱚᱱ ᱪᱚᱨᱪᱟᱭ ᱾

ᱫᱮᱞᱟ ᱫᱮᱞᱟ ᱫᱮᱞᱟ ᱛᱤᱨᱞᱟᱹ ᱵᱚᱭᱦᱟ ᱠᱚ
ᱥᱩᱞᱩᱠ ᱛᱮ ᱢᱩᱞᱩᱠ ᱵᱚᱱ ᱫᱚᱦᱚᱭᱟ
ᱚᱞᱪᱤᱠᱤ ᱵᱟᱧᱪᱟᱣ ᱞᱟᱹᱜᱤᱫ
ᱞᱟᱹᱠᱛᱤ ᱠᱷᱟᱱ, ᱡᱤᱣᱤ ᱦᱚᱵᱚᱱ ᱟᱞᱟᱭᱟ ᱾

***

ᱚᱱᱚᱞ ᱚᱱᱚᱬᱦᱮ ᱚᱞ ᱵᱚ ᱪᱮᱫᱟ September 28, 2023by ᱥᱚᱨᱳᱡᱤᱱᱤ ᱵᱮᱥᱨᱟ ᱢᱮᱱᱟᱭ ᱟᱵᱚᱭᱤᱡ ᱡᱟᱦᱮᱨᱼᱟᱭᱳ ᱟᱵᱚᱭ ᱟᱹᱥᱩᱞ ᱦᱟᱨᱟ ᱭᱮᱫ ᱵᱚᱱ ᱢᱟᱨᱟᱝᱼᱵᱳᱨᱳ ᱢᱮᱱᱟᱭ ᱛᱟ....

24/11/2023

All are Welcome

17/11/2023

ᱢᱟᱹᱭ ᱥᱚᱠᱩᱱᱛᱚᱞᱟ ᱢᱟᱱᱰᱤ (Miss Shakuntala Mandi, Jhargram, West Bengal) ᱟᱜ ᱢᱤᱫ ᱥᱚᱨᱮᱥ ᱚᱱᱚᱬᱦᱮ, *"ᱯᱟᱴᱟᱵᱤᱸᱫᱷᱟᱹ ᱯᱟᱛᱟ"* , ᱫᱮᱞᱟ ᱵᱚ ᱯᱟᱲᱦᱟᱣ ᱥᱟᱸᱜᱮᱭᱟ ᱾

*ᱯᱟᱴᱟᱵᱤᱸᱫᱷᱟᱹ ᱯᱟᱛᱟ*
SEPTEMBER 27, 2023
BY ᱥᱚᱠᱩᱱᱛᱚᱞᱟ ᱢᱟᱱᱰᱤ

ᱯᱟᱴᱟᱵᱤᱸᱫᱷᱟᱹ ᱯᱟᱛᱟ ᱢᱟ,
ᱥᱮᱴᱮᱨ ᱜᱟᱯᱟ,
ᱪᱤᱠᱟᱹ ᱛᱮᱧ ᱪᱟᱞᱟᱜ ᱮᱹᱭᱳ,
ᱵᱟᱹᱱᱩᱜ ᱛᱤᱧᱟ ᱯᱩᱭᱥᱟᱹ​ ᱾

ᱵᱟᱝ ᱫᱩᱧ ᱪᱟᱞᱟᱜ ᱵᱟᱥ ᱜᱟᱰᱤ ᱛᱮ,
ᱵᱟᱝ ᱫᱩᱧ ᱪᱟᱞᱟᱜ ᱢᱚᱴᱚᱨ ᱜᱟᱰᱤ ᱛᱮ,
ᱵᱟᱝ ᱫᱚ ᱪᱟᱞᱟᱜ ᱦᱩᱭᱩᱜ ᱛᱤᱧ
ᱫᱷᱟᱠᱟᱲᱼᱫᱷᱩᱠᱩᱲ ᱰᱟᱹᱝᱨᱤ ᱜᱟᱰᱤ ᱛᱮ ᱾

ᱛᱟᱺᱜᱤ ᱨᱮ ᱪᱚ ᱢᱮᱱᱟᱹᱧ,
ᱟᱸᱜᱟ ᱢᱟᱨᱥᱟᱞᱚᱜ ᱫᱷᱟᱹᱵᱤᱡ,
ᱵᱮᱲᱟ ᱨᱟᱠᱟᱵᱚᱜ ᱠᱷᱚᱱ ᱤᱧ ᱛᱮᱭᱟᱨᱚᱜ,
ᱪᱷᱚᱞᱟ ᱛᱮᱠᱮ ᱠᱷᱟᱹᱡᱟᱹᱲᱤ ᱜᱷᱮᱸᱴ ᱤᱫᱤ ᱞᱟᱹᱜᱤᱫ ᱾

ᱛᱷᱟᱯᱚᱱ ᱟᱠᱟᱱ ᱵᱚᱸᱜᱟ
ᱫᱚᱞᱟᱱ ᱫᱟᱨᱮ ᱵᱩᱴᱟᱹ ᱨᱮ,
ᱡᱚ, ᱵᱟᱦᱟ, ᱫᱷᱩᱯ ᱛᱮᱧ ᱱᱮᱦᱚᱨ ᱜᱚᱫᱚᱜᱼᱟ
ᱵᱚᱸᱜᱟ ᱵᱳᱨᱳ ᱛᱷᱟᱱ ᱨᱮ ᱾

ᱜᱩᱦᱲᱟᱹ ᱜᱩᱵᱟᱹᱝ ᱴᱟᱢᱟᱠ,
ᱛᱩᱢᱫᱟᱜ ᱥᱟᱰᱮ ᱠᱟᱱ,
ᱥᱟᱭᱼᱥᱟᱭ ᱦᱚᱲ ᱠᱚ ᱮᱱᱮᱡᱼᱥᱮᱨᱮᱧ​ ᱛᱮ
ᱨᱮᱞᱟᱣ ᱤᱫᱤᱜ ᱠᱟᱱ ᱾

ᱮᱱᱮᱡ ᱤᱧ ᱥᱟᱵᱚᱜᱼᱟ
ᱡᱷᱚᱛᱚ ᱠᱷᱚᱱ ᱢᱟᱲᱟᱝ ᱨᱮ,
ᱥᱮᱨᱮᱧ​ ᱤᱧ ᱛᱮᱞᱟᱭᱟ
ᱨᱮᱸᱜᱮᱡ ᱛᱮᱛᱟᱝ ᱫᱮᱭᱟ ᱠᱟᱛᱮ ᱾

ᱦᱟᱛᱟᱣ ᱥᱟᱱᱟᱹᱧ ᱯᱟᱭᱡᱷᱚᱢ
ᱥᱟᱶᱛᱮ ᱡᱷᱤᱞᱤᱠ ᱞᱤᱯᱤᱨ ᱯᱟᱜᱽᱨᱟ,
ᱡᱤᱲᱤᱫᱼᱡᱟᱲᱟᱝ ᱯᱟᱹᱧᱪᱤ ᱯᱟᱦᱟᱲᱼᱥᱟᱲᱤ
ᱛᱮᱜᱮ ᱦᱚᱲᱢᱚᱧ ᱥᱳᱵᱷᱟᱭ ᱛᱤᱧᱟ ᱾

ᱱᱟᱱᱟ ᱦᱩᱱᱟᱹᱨ ᱪᱩᱲᱤ ᱥᱟᱶᱛᱮ
ᱢᱟᱞᱟ ᱢᱩᱫᱟᱹᱢ ᱤᱧ ᱦᱟᱛᱟᱣ,
ᱯᱚᱛᱚᱵ ᱫᱚᱠᱟᱱ ᱵᱚᱞᱚ ᱥᱟᱶᱛᱮ,
ᱯᱚᱛᱚᱵ ᱤᱧ ᱵᱟᱪᱷᱟᱣ ᱾

ᱦᱮᱲᱮᱢ ᱞᱟᱹᱰᱩ ᱧᱮᱞ ᱠᱟᱛᱮ
ᱩᱞᱤ ᱫᱟᱜ ᱢᱟ ᱵᱷᱟᱨᱟᱲᱚᱜ,
ᱯᱳᱠᱳᱲᱤ ᱟᱨ ᱵᱟᱨᱚᱵᱷᱟᱡᱟ ᱞᱟᱹᱜᱤᱫ ᱛᱮ
ᱤᱧ ᱢᱟᱹᱧ ᱟᱹᱴᱩᱯᱟᱹᱴᱩ ᱜᱚᱫᱚᱜ ᱾

ᱞᱤᱥᱚᱭᱼᱞᱚᱥᱚᱭ ᱵᱟᱸᱫᱮ ᱠᱟᱛᱮ
ᱯᱟᱛᱟ ᱴᱟᱺᱰᱤᱧ ᱫᱟᱬᱟᱱᱟ,
ᱟᱨ ᱦᱚᱸ ᱵᱟᱫᱟᱢ ᱠᱚᱴᱚᱜᱼᱠᱚᱴᱚᱜ ᱛᱮ
ᱢᱤᱫ ᱧᱤᱫᱟᱹ ᱜᱟᱭᱟᱱ ᱤᱧ ᱧᱮᱞᱟ ᱾

ᱨᱟᱹᱥᱠᱟᱹ ᱢᱚᱱᱮᱧ ᱫᱟᱬᱟᱱᱟ
ᱦᱮᱢᱟᱞ ᱪᱟᱛᱚᱢ ᱩᱢᱩᱞ ᱨᱮ,
ᱟᱨ ᱦᱚᱸ ᱢᱟᱥᱮᱧ ᱩᱭᱦᱟᱹᱨᱟ,
ᱯᱟᱞᱮᱱ ᱤᱧ ᱟᱫᱚᱜ ᱱᱩᱱᱟᱹᱜ ᱦᱚᱲ ᱜᱟᱫᱮᱞ ᱨᱮ ᱾

ᱯᱟᱴᱟᱵᱤᱸᱫᱷᱟᱹ ᱯᱟᱛᱟ ᱢᱟ
ᱥᱮᱴᱮᱨ ᱜᱟᱯᱟ,
ᱪᱤᱠᱟᱹ ᱛᱮᱧ ᱪᱟᱞᱟᱜ ᱮᱹᱭᱳ,
ᱵᱟᱹᱱᱩᱜ ᱛᱤᱧᱟ ᱯᱩᱭᱥᱟᱹ​ ᱿

***

ᱚᱱᱚᱞ ᱚᱱᱚᱬᱦᱮ ᱯᱟᱴᱟᱵᱤᱸᱫᱷᱟᱹ ᱯᱟᱛᱟ September 27, 2023by ᱥᱚᱠᱩᱱᱛᱚᱞᱟ ᱢᱟᱱᱰᱤ ᱯᱟᱴᱟᱵᱤᱸᱫᱷᱟᱹ ᱯᱟᱛᱟ ᱢᱟ, ᱥᱮᱴᱮᱨ ᱜᱟᱯᱟ, ᱪᱤᱠᱟᱹ ᱛᱮᱧ ᱪᱟᱞᱟᱜ ᱮᱹᱭᱳ, ᱵᱟᱹᱱᱩ...