A•ronggani Kobor

30/01/2024

Website-ni thumbnail picture-rang.

22/07/2023

ACHIK aro gipin organisation-rang chrik a•boke jegalsoani gimin Ampareen Lyngdoh katangpila

Tura, Sonibar, 22,: A•dokni Health Minister Ampareen Lyngdoh, July 19 tarik Butbar attamo Resubepara-ona re•bae, July 20 tarik Bristibar salo Mendipathar Multi Purpose Cooperative Hall-o a•jani health Official-rang aro game cha•giparang baksa agan golpogrike matchotani ja•man, attamo Tura-ona re•bae July 21 tariko sana banani bidingo Tura-ni medical health official-rang baksa agan golpogrikaniko dakna miksonge re•baenba, Jengjal Sub Divisional Hospital-o napake health official-rang baksa agan golpogrikenba, Jengjal-onin Shillong-chi katangpilaha.
Uni, Shillong-chi katangpilani a•selara, ACHIK aro gipin NGO-rang July 11 tarikoni okgimu chake, Winter Capital-na dabiani bidingo, ia chonbegipa Meghalaya a•doko ge•gni capital-rangko songna dabianiara kraani ong•ja aro ong•na amgijani ong•a, ine A•chikrangko onchepa gnang Social Media-rango ku•watatani gimin, ACHIK aro gipin Organisation-rang uni Tura-ona re•baengako knasoe, bike rally ka•e, flag gisim, ba•ra gisimrangko ra•bite, chola gisimrangko ganne, chrik a•boke, Ampareen Lyngdoh go back, go back ine jegalsoani gimin, kenjagoke Tura-ona sokbagija Jengjal-oni katangpilna nangaha.
Ua (Ampareen) Chief Minister’s Safe Motherhood Scheme-ni kamrangko nipiltaina, bi•sa atchiani aro ma•giparangni obostarang baditana tang•doa aro tang•onani rate-ko nipilangani ong•achim. Indiba ua an•tangni chanchigija skatang ku•watani a•sel Tura-o kamrangko matchotangna man•jaha.
Ua, Garo Hills-ona National Health Mission-ni Director Ram Kumar S aro a•dokni Health and Family Welfare Department-ni Commissioner Secretary Joram Beda baksa re•bae, Tura Circuit House-o waltue, Sukrobar pringo, West, South West aro South Garo Hills a•jao sana banani bidingo tom•e nipilaniko dakna gita miksongachim.
Indiba an•tangni chanchia gita ong•gija, Resubelpara-oni re•bae, rama tong•saoni Bristibar attamon Shillong-chi re•angpilna na

20/07/2023

Cabinet Minister Ampareen Lyngdoh-ni agangipa katta, Tura-o Winter Capital-na dabie jingjengataniara kraani ong•ja ine aganani gimin, NGO-rang Ampareen Lyngdoh-ni Garo Hills-ona re•baako Tura-o jinma jegalsoa.

20/07/2023

NGO-rang Tura-o Ampareen Lyngdoh-ni Garo Hills-ona re•baako jinma jegalsoa

Tura, Bristibar July 20, 2023: ACHIK Organisation, GSMC, UGPF, TGCSU aro gipin NGO-rang bakrime, Reservation Backlog Post-rangko nipiltaie, A•chikrangko gapatchina aro Tura-o Second Winter Capital-ko songe on•china dabie, re•anggipa July 11 tarikoni okgimu chake jingjengata Bristibar salo sal 10 gapaha.
ACHIK organisation aro gipin NGO-rang skangni pagitchamrang Meghalaya a•dokko man•chengani somoion Shillong-o Summer Capital aro Tura-o Winter Capital-ko donna gita jatgittamni dilgiparang apsan ku•monge songgigrikaha. Indiba uamangni chasongo chu•sokate donangna man•jaha.
Gitcham dilgiparangni ku•rachake donanggimin Winter Capital-ko chu•sokatchina dabie, ACHIK Organisation aro gipin NGO-rang, Okgimu chake jingjengataniara, Meghalaya a•dokko man•chengoni da•o bilsi 51 ong•piloba a•dokni dilgiparang Tura-o Winter Capital-ko songe on•kujaenga aro bilsi 51-na gimagimin A•chikrangni mipalko man•pile on•na gita A•chik MLA-rang gisiko nangjaenga ine NGO-rang matnangataha.
Tura-o Winter Capital-ko songe on•china dabianiara kakketan ong•a aro man•naba krachongmota. Ia winter capital-ko songe on•anichi A•chik jat aro a•songo bang•a namgnirangko man•gen, ia miksonganio ACHIK Organisation aro gipin NGO-rang apsan ku•monge, A•chik jatni namgnina okgimu chake dabiengon, a•dokni Skotong Minister Conrad K.Sangma da•alonaba maming aganchakaniko on•kuja. Indita salna okgimu chake, manderang maiba a•sel ong•na nangode, sawa daitoko ra•gen, sorkari ra•na nanggen, ine ACHIK Organisation-na chakpagipa NGO-rang sorkario sing•doangatskaha.
ACHIK organisation aro gipin NGO-rangni okgimu chake jingjengataniara an•tangtangni namgnina ong•ja, indiba A•chik jatni namgninasa ong•a.
"Uni gimin na•a A•chik ong•ode, A•chikni an•chian ine chanchiode, A•chik jatni nangnikaniko ta•rake chu•sokatna nanga" ine ACHIK Organisation, Skotong Minister-na ku•rangko on•ataha.
Indake ong•engon, a•dokni cabinet minister Ampareen Lyngdoh, Tura-o Winter Capital-ko songe on•china dabianiara kraani ong•ja, ine Monggolbar salo jegalataha. Uni indakgipa kattana, ACHIK Organisation aro gipin NGO-rang suk ong•gijaniko aganchakatskaha.
"Ua saksa dilgipa ong•e, a•dokni itihas-ko name ma•sikujakon. Ua gitcham dilgiparangko mande ra•gija, uamangni ku•rachake donanggiminko jegalanira, an•tangni chanchisokgijako paraka. Ua gitcham dilgiparangko ba pagitchamrangko mande ra•na nanga aro indakgipa kattarangko aganne, A•chikrangko gisik saatna aro ding•doatna nangja. Ua saksa cabinet minister ong•e, a•dokni manderangna nama kattarangkosa agan ku•pattina nanga" ine ACHIK Organisation-ni dilgipa suk ong•gijaniko parakataha.
Ka•dongani grigipa Ampareen Lyngdoh-ni kattana Garo Hills-ni NGO-rang, A•chik ma•giparang, uni Garo Hills-ona re•baako kobor man•soe, namnikgijaniko aro duk ong•aniko mesokna July 20 tariko flag gisim, ba•ra gisimrangko ra•bite motor bike-rango jinma re•jome jegalsoan baksa, A•chik ma•giparang attamo Tura Circuit House, rama jangchio dongsoe jinma jegalsotokaha.

19/07/2023

Damal A•sim Dipogre songni mobile tower kamchipa

Tura, Butbar July 19, 2023:West Garo Hills a•jani Dadenggre Sub Division-ni ning•o donggipa Damal A•sim Dipogre songni mobile tower kamchipaha ine songni manderang koborna u•iataha.
Manderangni u•iatani gitade, ua mobile tower-ko nirok simsakgija galchipe don•ani a•sel generator nosto ong•e wa•al ong•katenba mobile tower-ko wa•al kamaha.
Ua a•sel Butbar salni 2:30 bajimango ong•aha ineba u•iataha.
Ia mobile tower-ko chalaigipa company ta•rake taripilchina, songni manderang didiataha. Maina jolni manderang mobile tower kamchipahani gimin mobile networkna neng•nikani ong•gen. Uni gimin manderangni namgnina ta•rake taripilchina songni manderang mol•molataha.

19/07/2023

GSMC Garo Hills gimikon Ampareen Lyngdoh-ni re•baako jegalsogen

Tura, Butbar July 19, 2023:Garoland State Movement Committee (GSMC) Central Executive Committee (CEC) Tura, Law aro Health Minister Dr Ampareen Lyngdoh-ni chanchigija, Tura-ko Winter Capital songe on•china ACHIK Organisation, GSMC aro gipin NGO-rang dabie, salang walang okgimu chake jingjengataniko dakanina Garo Hills-o Winter Capital-ko dabianiara kraani ong•ja ine agananiko GSMC raken jegalataha.
Indake uni (Ampareen) Garo Hills-ona July 20 tariko Resubelpara, 21 tariko Tura aro 22 tariko Baghmara re•bamitting somoio jegalsoaniko dakenba namnikgijaniko mesokna, Garo Hills gimikon ba•ra gisim, flag gisim, badge gisim, chola gisimko ganne jegalsoaniko dakanggen ine GSMC parakataha.
Uni gimin, Garo Hills-o songdongenggipa sakanti A•chikrang, Ampareen Lyngdoh-ko jegalsoanio bak ra•pachina GSMC mol•molataha.
"Ua saksa dilgipa ong•e, Meghalaya a•dokni History-ko ma•sikuja, skangni pagitchamrang Meghalaya a•dokko man•chengani skanggipa Assembly Session-on, jatgittamni dilgiparang apsan ku•monge, Shillong-ko Summer Capital, Tura-ko Winter Capital songna tik ka•e songgigrikaha. Ua history-ko, Ampareen Lyngdoh poraie nikkujani a•selsa, Tura-o Winter Capital-na dabianiko jegalataha. Ua dilgipa ong•e, gitcham dilgiparangni ku•rachake donanggiminko name rakkina nanga aro gitcham dilgiparangko mande ra•na krachongmota. Uni chanchigija agangipa kattara gisik griani aro chanchina changgijani kam ong•a. Ua dilgipa ong•e, an•tangni agangimin kattako ra•pilna nanga" ine GSMC parakataha.
Lyngdoh-ni agangipa kattarangara A•chik jatni ra•chakna man•gijagipa ong•a.Meghalaya-ni sak 60 MLA-rang, jadok Garo Hills-o donge nikosa Garo Hills-ni obostako nikgen aro manderangni neng•skimaniko ma•sigen. Skangonin, Khasi Hills aro Garo Hills-o apsan development-rangko on•na man•na gita, gitcham dilgiparang Tura-ko Winter Capital dakna ku•rachake donangaha.
Uni gimin GSMC-CEC HQ, Tura Garo Hills gimikni GSMC Zonal-rang, Unit-rang aro Sub Unit-rangko didiatan baksa pilak A•chik NGO-rang, Nokma Soldar-rang, Senior Citizen-rang aro songni nokni manderang apsan ku•monge, namnikgijaniko mesokna Garo Hills gimikon, ba•ra gisim, flag gisim, badge gisim, chola gisimrangko ganne, ramdilo ba sorok rikamrango jinma dongsoe jegalsoaniko dakgen ine GSMC, CEC HQ Tura parakataha.

19/07/2023

Cabinet Minister Ampareen Lyngdoh-ni Tura-o Winter Capital-ko dabianiara kraja ine ku•watgipa kattako East Garo District Youth Congress aro GSU Balat Unit jegalata.

19/07/2023

Cabinet Minister Ampareen Lyngdoh-ni ku•watatgipa kattana Okgimu chake jingjengatenggipa dolrang suk ong•ja aro duk man•a, bia saksa dilgipa ong•e Meghalaya-ni history-ko ma•sikujakon, skango gitcham dilgiparang maiko ku•rachake donangachim, ukosa chinga dabienga Winter Capital-ko ra•sekenga ong•ja ine ACHIK organization-ni dilgipa aganchakatskaha.

18/07/2023

HNYC aro KHNAM dilgiparangni agangipa kattako ra•chakna man•jawa:GSMC

Tura, Monggolbar 18 July, 2023:ACHIK Organization aro Garo Hills-ni dingtang dingtang NGO-rang A•chikrangni gimagimin mipal ba backlog-ko gapate on•china aro Tura-ko Second Winter Capital songchina dabie okgimu chake jingjengatengon, HNYC-ni President Sadon Blah aro KHNAM-ni Working President Thomas Passah-ni jegalatgipa kattarangko A•chik jat ra•chakna man•jawa aro maming dakeba A•chik jatni dabianiko dontongjawa ine GSMC HQ-ni Organising Secretary Jason Tekrang M.Sangma parakataha.
Jason Terang Sangma-ni parakatani gitade, wa•alo to ruate ching•chaatjachina HNYC aro KHNAM-ni dilgiparangko mikkrakataha.
"Chinga maming saloba Khasi jatni dabianiko wa•al ching•chaate kajia a•botja. Chingna on•gimin bak rengsiko on•china, gitcham dilgiparangni songgigrikgimin gita Tura-ko winter capital songe on•chinasa chinga dabienga. HNYC aro KHNAM jattangna chanchie A•chik jatko on•chepna man•jawa" GSMC dilgipa parakataha.

17/07/2023

Bernard Marak-ba winter capital-ko dabianina chakpaa

Tura, Sombar July 17, 2023:Bilsianti manirongbaenga gita July 16 tarik Robibar salo Labour Corps Day-ko gisik ra·ani salo Tura-ni MDC Bernard N Marak, Tura-ko Winter Capital songchina dabianio namnikpaaniko parakatenba, Tura-ko Winter Capital songchina dabianiara kakketan ong·a ine aganangaha.
Tom•tomanina ba “PeacePact”-ko ma•mong sorakri baksa soi ka·grikna skangan Winter Capital-na dabiani skanggipa list-o gnangchim, jekon bilsi 12 skang ma·mong sorkario dabiaha. A·dokna dakgrikmitting somoio bilsi 50 skang Garo Hills-ni manderangna Winter Capital-ko on·na ku·chakahachim, indiba gitcham dilgiparang ia dabianiko chu·sokatgija donaha, indiba ‘Peace Pact’-ko soi ka·miting somoio ia mamla changni chang nakatataiaha.
Indiba a·doko dingtang dingtang neng·nikarang sokani a·sel uarangko namatna re·mikkanganio gital dabianirangko chu·sokatna kam ka·anio Winter Capital-na ja·ku de·ani ja·manchakskaha ine Bernard aganaha.
Bernard Marak-ni agana gitade, tripartite agreement-ko dakaniara ka·dongsoa ba chanchisoa gita ong·jaha. Rama jal•langko taridapani aro bang·a namroro silroroani kamrang gimikan tripartite agreement-ni gimin ong·aha.
A·dok sorkarisa iarang gimikni bimingko ra·skaha, indiba je dilgiparangan agreement-o soi ka·ahachim, uamangko gisik ra·jaha.
Civil Society dolrangni Tura-ko Winter Capital songchina dabianira krachongmota, je dabianikon Skotong Minister a·bachengatna ba ja·ku de·na nangchongmota. A·chikrangni a·dokko man·na dakgrikaniko BJP, ma•sichaka aro mande ra·a. Jedakode mikkangchi nambatgipa salrangko man·na niksamsoa gnang janggitangko on·kangaha. Bi·sarangni namgipa janggi tanganina aro a·dok chigako, jatni dakbewalrangko, ku·sik aganarangko ripingna kam ka·aha. Iarang gimikan BJP-ni election manifesto-o mini Secretariat-ni giminba janpapaha aro iako chu·sokatna jotton ka·enga ineba Bernard Marak aganaha.

17/07/2023

Okgimu chake bilgrigiparangko Dakopgre Health Centre-ni doctor re•bae sanna bannaniko on•ea..

16/07/2023

16/07/2023

Reservation backlog aro Second Winter Capital-ko dabie okgimu chaka sal 6 gapa, sakgni dilgiparang bilgrie nom•boka

Tura, Robibar July 16, 2023:A•chik Conscious Holistically Integrated Krima (ACHIK), GSMC, UGPF A•chikrangni gimagimin mipalko ba Reservation Backlog postrango A•chikrangko gapatchina aro Tura-ko Second Winter Capital songchina dabie re•angipa July 11 tarikoni a•bachenge sima ari dongija ba Indefinite Hunger Strike ba Okgimu Chakani Robibar salo chu•gimik sal 6 gapaha, indiba a•dokni Skotong Minister Conrad Sangma, District Administration aro Sorkari Medical Department da•alona kingkingba knachakgija namrenge, Okgimu Chake jingjengataniko dal•e aro gamchate ra•jani a•sel, GSMC-ni Co-Chairman Balkarin Ch.Marak, gitcham MCS Officer Laben Ch.Marak namen bilgriako man•ne nom•bokahani gimin, Robibar salo Dakopgre Health Centre-ni Doctor-ko okamate sana bananiko a•bachengataha.
Indita salna okgimu chake jingjengataniko dakengoba, a•dokni dilgiparang, Garo Hills-ni sak 24 MLA-rang, sak 29 MDC-rang A•chik jatni nangchongmotgipa kamna gisiko nanggijaniko mesokaniara jattangko onchepe ra•ani ong•a aro uamango A•chik jatni an•chi dongja ine jingengatenggipa dolrang parakataha.
Indake ong•genchimoba, backlog postrango A•chikrangko gapatjakujana kingking aro Second Winter Capital-ko Tura-o songe on•kuja dipetna janggitangko dontonggija okgimu chake jingjengatangkugen ine parakataha.
Indake jatni namgnina okgimu chake jingjengatengon, toromni dilgipa Rev. Ingsting C.Marak Robibar salo okgimu chakenggipa manderangko gronge, gilja ka•dile, uamangni dabianirang chu•sokgipa ong•china Isol-o bi•chakangaha. Unbaksana, ua Tura songjinmao songdongenggipa sakanti manderang, ma•a paarang, chadamberang, A•chik Officer-rang, District Administration, Medical Department, toromni dilgiparang, MDC, MLA-rang aro gipin A•chik NGO-ni dilgiparang re•bae, uamangko grongenba chakpaaniko on•nepachina aro sorkari uamangni dabianiko A•chik jatni namgnina ta•rake songgigrikaniko dakepachina gitaba ua didiataha.

16/07/2023

ACA environment-ko name ripingna Dura Kantragre songo bolrangko ge•anga

Tura, Robibar July 16, 2023:A•gitok Chra Association (ACA), July 15 tarik Sonibar salo samtangtango ong•telaigiparang aro buring bolgrimrangko mikkangchi name ripingangna miksonge, Tura-oni kilomiter 14 mang chel•ao donggipa Dura Kantragre songo bang•a bol chararangko ge•angaha.
Dura Kantragre songara Tura-ni sepang jolo damsa komila bang•ani gimin aro rona rotogipa Tourist biapna mingsinga aro ua songara A•gitok Maharini A•king ong•achim. Uni gimin A•gitok Chra Association dingtangmancha A•gitok Maharini A•kingko name ripingangna Dura Kantragre songo bolrangko ge•angaha.
A•gitok Chra Association-ni miksongara, A•gitok Maharini A•kingo gimaangenggipa bol-wa•arang, buring bolgrimrangko name rakkina, a•ba o•e cha•anirangko komiatna, samtangtango ong•telaigipa bakrangko nambate ripingangna miksonganio bang•a bolrangko ge•aha.
Ia program-ko ong•atani salo A•gitok Chra Association-ni dilgiparang Association-ni President Roger Benny A.Sangma-ni dilachi MDC Cotton Growers-ni Chairman aro A•gitok Chra Association-ni Finance Secretary Aldo A Sangma, Vice President Learmilford A. Sangma, Secretary Jondibar A. Sangma, Treasurer Nandey A Sangma, Urban Bank-ni CEO Waldy A Sangma, Adviser Captain Pablo A Sangma, Public Relation Secretary Tengsrang A Sangma (Achura), gitcham MLA aro Meghalaya State Council on Climate Change and Sustainable Development-ni Chairman Ma Ferlin CA Sangma aro gipin Executive Membor-rang dongpae bolrangko ge•angtokaha.
Unbaksana songni Nokma aro songni manderangba dongpae mikkangchi songko nokko rongtale rakkiangna aro ecosystem-ko gimaatgija ripingna ku•mikchete, bigha 38 mang ripingenggipa buring bolgrimrang ba forest reserve-ko nosto ka•gija mikkangchi name ripingangna jinmani mikkango ku•rachakaha.
Indake A•gitok Chra Association-ni dilgiparang pang 500 dingtang dingtang rokkomni bol chararangko Dura Kantragre songni ripingenggipa buring reserve-o aro songni wilwilao ge•angaha ine A•gitok Chra Association-ni Secretary Shoson A.Sangma u•iataha.

16/07/2023

Forwarded:

16/07/2023

A•ronggani Kobor:
Tura, Robibar July 16, 2023: A•chikrangni gimagimin mipalko ba Reservation Backlog-ko gapatchina aro Tura-ko Second Winter Capital songe on•china dabie, ACHIK Organization, GSMC aro gipin dolrang re•angipa July 11 tarikoni a•bachenge Okgimu Chaka ba Hunger Strike ka•ani da•al Robibar salo sal 6 gapaha, indiba a•dokni Skotong Minister Conrad Sangma, District Administration aro Sorkari Medical Department da•alona kingkingba dal•e ra•ja aro knachakgija namrenge, Okgimu Chake sichina simsak nirokjahani, a•sel GSMC-ni Co-Chairman Balkarin Ch.Marak, gitcham MCS Officer Laben Ch.Marak aro gipin dilgiparang namen bilgriako name nom•bokahani gimin, da•al Robibar salo Dakopgre Health Centre-ni Doctor-ko okamate sana bananiko a•bachengataha.
Uni gisepon, toromni dilgipa Bro. Rev. Ingsting C.Marak Robibar salo okgimu chakenggipa manderangko gronge, Isolo bi•chakangaha. Uandake, ua Tura songjinmao songdongenggipa ma•a paarang, chadamberang, sakanti A•chikrang, dal•dalgipa Officer-rang, District Administration, Medical Department, toromni dilgiparang, MDC aro MLA-rang re•bae, uamangko gronge agan ku•pattianiko on•nepachina aro sorkari uamangni dabianiko A•chik jatni namgnina songgigrikaniko dakepachina gitaba mol•molataha.

14/07/2023

Matma 50-ko gipinchi palsrukatna salangenggipa bol 3 garirangko pulis rim•a

Tura, Sukrobar July 14, 2023:Phulbari pulisrang matma mang 50-ko gipin a•songchi palsrukatna salangenggipa bolgittam bolero camper garirangko July 14 tariko rim•aha ine kobor man•aha.
Pulisrang Phulbari AMPT sorok sepang jolrango re•roroe sandirikitmitting somoio matma mang 50-ko salangenggipa bolgittam garirangko rim•aha. Ua garirango niam gri matmarangko Patharkata-oni Hallidayganj-ona ra•ange Bangladesh a•songchi badingsrukatna gita salangengachim.
Uandake, bang•a matburingrangko ua rama gita pangnan badingsrukatna salangenga ine ma•sina gita man•aha.
Koborni gitade, Phulbari pulisrang matmarangko badingsrukatna salangenggipa bolero camper bolgittam garirangko ra•sekaha aro ua garirangko salgipa driver-rangkoba cattle voucher-rang baksa rim•aha ine u•iataha.
Indake matmarangko badingsrukatenggipa manderangni ki•sango sawarang jak donga, uarangko rim•na gita pulisrang sandianiko dakenga ineba u•iataha.

14/07/2023

Tura Super Marketko taridapchina TMC dilgiparang dabia

Tura, Sukrobar July 14, 2023:Tura Super Market-o paikanani pipe-rang brete namgijagipa bibarang manderangna chaktogijani ong•enga aro Super Market-ni ka·magipa gadango chirang sikkonge dongengani a·sel manderang re·ruraanirango namen neng·nikaniko man·engani gimin Tura Super Market-ko ta·rake taridapchina Trinamool Congress (TMC)-ni dilgipa dabiangaha.
Tura Super Market-ni obostako niatgenchimode, namen ra·chakna man·gijani ong·a aro ua obostako namatna gita bil gnanggipa manderang maming ja·kuko de·jani gimin namen dukni ong·a. Pipe-rang brete nalarango jabolrang changketani a·sel chirang aro jabolrang ramarangona jokange re·ruraenggipa manderangna namen chaktogijani ong·enga.
Bil gnanggipa Official-rang Super Market-ko nirok simsakjani a·sel Tura Super Market-o dokkan dakgipa manderang bilongen neng·nikanirangko chagrongenga ine TMC dilgipa Richard M Marak parakataha.
Richard Marak-ni parakatani gitade, TMB-ni officer-rang Super Market-ona re·angrongachim, indiba marketo ong·enggipa obostarangko nirokna gisiko nanga ine matnangataha.
Indake ong•engon,TMB-ni CEO, contractor-kosa matnangataha, indiba gipinko matnangaigija, super market-o ong·enggipa obostarangko namatna gita ja·kuko de·na nanga. Tura Super Market-ko gipin a·songrango donggipa market gita ong·atgen ine Skotong Minister Conrad Sangma ku·rachakahachim, indiba da·onan ku·rachakatangko chu·sokatkuja. Tura super market-ko re·anggipa bilsini Krismasna skangan taridapgen ine ku·rachakahachim ineba TMC dilgipa parakataha.
Tura Super Market-ko rikgipa Contractor-ni kosako ja·kuko de·ama de·ja da·onan maming u·iatani dongkuja, Tura Super Market-ni mikkim rasongko ra·bapilna ta·rake ja·kurangko de·china Richard Marak TMB-ni Officer-rangko didiataha.

14/07/2023

Tura Kongbe A•dingo bilsi 28-ni chadambe saksa an•tangko kae sia

Tura, Sukrobar July 14, 2023:Tura Kongbe A•ding gittimni bilsi 28 ong·gipa chadambe saksa, an·tangko kae siaha. Uni sigimin manggisiko Bristibar pringo gittimni manderang nikaha.
Bilsi 28 ong·gipa Senches D Sangma, ua apsan gittimonin ong·achim, koborni gitade ua re·anggipa July 7 tarikon nokoni gimahachim.
Indiba nokni manderang uani bidingo ‘missing report’-ko on·jaha, indake ong•genchimoba ja·mano nokdangni manderang, gittimo donggipa manderangni dakchakachi uni manggisiko uamangni nok sambao donggipa buringonikon man·aha.
Ua chadambe, batanggimin somoionin adita gisikni gita chaktogijaniko man·na nanga, indiba maini gimin gisiko dongsiksakenggen darangba ma•sijaha aro ua an•tangko so·ote sigen ine chanchitokjachim.
Uni gisiko maiba chanchisokgijagipa obostarang ong•na nanga aro darangba uko ka•dimeatna man•jaha, uni a•selsa ua an•tangko so•ote siaha.

14/07/2023

GSU Education Minister-ko gronge Rongrenggre Govt. Higher Secondary Skulo nanganirangko dabianga

Williamnagar, Sukrobar July 14, 2023: Garo Students Union (GSU) Eastern Zone-ni dilgiparang, a·dokni Education Minister Pa Rakkam A Sangma-ko Bristibar salo gronge, East Garo Hills a·jani Rongrenggre Govt Higher Secondary Skulni dingtang dingtang nanganirangko niatpachina dabie segipa lekkako on·angaha.
GSU-ni Education Minister-na seatgipa chittio janapatani gitade, ia skulo batanggimin bilsi bongana kingking full fledged Principal-ko man·kujani a·sel chatro chatrirangsan ong·aigija, skulo skigiparang aro kamrangko ka·giparang neng·nikaniko chagrongna nangenga ine GSU-EZ parakatenba, ia skulna ta·rake full fledged Principal-ko watatchina mol•molangaha.
Ia skulni pilak class-rangon chatro chatrirang bang·dugaani a·sel class-rangko name ra•na man·jaenga, skigiparangko class-o chatro chatrirang dongani kri on·skachina gitaba GSU-EZ, a·dok sorkariko didiangaha.
Ia skulo library, science laboratory, namgipa paikanarang, ringani chirang aro common room-rang dongjani a·sel chatro chatrirang neng·nikanirangko man•tokenga, ineba GSU parakataha.
Da•ororoni chasongo skulni chatro chatrirangba a·gilsakni gipin biaprango gitan gital chasongni kolrang baksa skie ra·pana man·na gita pilak classroom-rangon nangani kri computer aro internet-rangko donchina gitaba GSU didiataha.

14/07/2023

Reservation backlog aro second winter capital-na dabie okgimu chaka salbri gapahaoba, sorkarioni maming aganchakani dongkuja.

Tura, Sukrobar July 14, 2023: Garoland State Movement Committee (GSMC), ACHIK Organization-ni a•bachengatgipa, 'Indefinite Hunger Strike' ba 'Sima Ari Dongija Okgimu Chakanio' chu•gimik gisik ka•tong gimikchi aro kamchi dondikgija chakpaniko on•angpagen ine GSMC-HQ-ni Co-Chairman Balkarin Ch.Marak parakataha.
ACHIK Organisation-ni dabie okgimu chakani miksongara, skanggipa Meghalaya State Job Reservation Policy-ko ra•gatchengaoni a•dokni dingtang dingtang sorkari department-rango A•chikrangni man•na nangenggipa gitcham bak rengsirang ba backlog vacant postrango A•chikrangko gapatchina aro gnigipa, Meghalaya a•dokni gitcham dilgiparangni songgigrikanggipa, Garo Hills-ko ba Tura-ko a•dokni gnigipa Skotong ba Second Winter Capital-ko songe on•china dondikgija sal, wal okgimu chake dabiani da•al July 14 tariko salbri gapaha, indiba sorkarini Skotong dilgipa maming aganchakaniko on•kuja.
Je kamrangkon A•chikrang man•na kraachim, ua Backlog postrango A•chikrangko gapatna nangchongmota aro A•chikrangni man•gnina dabianiko ta•rake knachakna nanga. Unbaksana, Tura Winter Capital-ko jedakeba songe on•chongmotna nanga ine ACHIK Organisation baksa GSMC apsan chanchirime, A•chik jatni namgnina dabianiko, sorkari chu•sokatja dipet, dabianiko dontongjawa aro sia, sijana kingking okgimu chake dabianggen ine Balkarin Marak parakataha.
Ia minggni dabianiranga, bilsi 50 batangpiloba A•chikrangni man•kugijagipa sorkarini kamrango gapatchina, GSMC a•dok sorkariko didiataha. Ian man•na nangchongmotgipa dabianirang ong•a, uni gimin, batanggimin bilsirangni gitcham kamrangko A•chikrang man•na krachongmota, uarangko ta•rake on•na nanga ine GSMC-ba ACHIK organisation-na chu•gimik chakpae dabiangaha.

14/07/2023

South West Garo Hills-o gital Organization dolko bikota

Ampati, Sukrobar July 14,2023:South West Garo Hills a•jani Skotong song Ampati-o Civil Society A•chik Welfare Organisation (CSAWO) gital dolko bikotaha ine koborna u•iataha.
Ia gitalgipa Organization-ko re•anggipa July 8 tariko tom•e chanchirimaniko dakenba, songsalni namgnina, songo noko janggi tangenggipa manderangni neng•nikan salrango apsan ku•monge kamrangko ka•angna, a•dok sorkarini nikchanggalenggipa kamrangko ba development-rangko mesoke ku•rang on•na aro ja•ku de•na mingsonge bikotaha ine CSAWO-ni President Tryans Ch.Marak u•iataha.
CSAWO-ni gital dilgiparanga Tryans Ch.Marak President, Baity A.Sangma Vice President, Sengba R.Marak General Secretary, Donchang Ch.Sangma Assistant General Secretary, Dosam Sangma Chief Organising Secretary, Cheang M.Marak Forestry Environment Secretary aro gipin sak 6 Executive Member-rangko seokaha.
Ia seokako man•gipa CSAWO-ni dilgiparang mikkangchi jat aro a•songni namgnina aro silroro namroroanina apsan ku•monge kamrangko ka•anggen ine parakataha.

12/07/2023

A•chik jatni namgnina re•mikange, ACHIK Organisation aro gipin NGO-rang bakrime, Reservation Backlog Policy aro Second Winter Capital-na kingkot dabie sima ari dongija Okgimu chakanio A•chik jat sakantian ku•monge jingjengatanio bakrimpachina Ma Bernita R.Marak mol•molataha.

11/07/2023

DLSA Mega Camp cm Awareness program-ko Gambegre-o ong•atang

Tura, Monggolbar July 11, 2023: District Legal Service Authority (DLSA), Legal Aid Defense Counsel System (LADCS)-ni gita Mega Camp cm Awareness program on NALSA Scheme-rang aro Government Welfare Scheme-rangko Gambegre block-ni ning•o donggipa Somonpara St. Francis De Sales Secondary Skulo July-ni 15 tarik Sonibar pringni 10 bajio ong•atgen ine West Garo Hills a•jani District Legal Services Authority (DLSA) u•iataha.
Uni gimin, bang•a dingtang dingtang line department-rang jekai Health, Social Welfare, Agriculture, Horticulture, Fishery aro gipin department-rang bakko ra•na gita man•gen aro uamang Scheme-rangni bidingo Megha Camp cm Awareness Program-o talataniko dakna gita man•gen ineba u•iataha.
Indake ong•engon, Health department free check up ka•aniko dakna aro an•chirangko porikka ra•e nina gita man•gen.
Uni gimin Gambegre C&RD Block-ni wilwilao donggipa manderang kosako janapatgipa program-ona re•bae bakko ra•epachina sakantikon mol•molataha.

11/07/2023

ACHIK Roster Reservation-ko ra•gate backlog policy-ko nipiltichina dabie okgimu chake jingjengata

Tura, Monggolbar July 11, 2023:A•chik Conscious Holistically Integrated Krima (ACHIK) HQ, Tura aro gipin dingtang dingtang NGO-rang baksa apsan bakrime, Roster Reservation-ko ra•gate Backlog Policy-ko nipiltaichina aro Tura-o Winter Capital-ko songe on•china dabie, sima ari dongija, July 11 tarik Monggolbar saloni Okgimu chake jingjengataniko Tura Dakopgre-o donggipa Mini Secretariat Office mikkango a•bachengataha.
Indake skanggipa salo okgimu chake jingjengatanio A•chik jat aro a•songni namgnina aro man•gnina gisiko dingchike, bang•a NGO-rang aro songni nokni manderang bakko ra•angtokaha.
ACHIK, Meghalaya a•dokko man•chengaoni A•chikrangna chamgimin, je sorkarini kamrangan backlog ong•e dongengachim, uarangko sulsul nipiltaie, A•chikrangni man•gni bak rengsiko tikatchina dabienba okgimu chake jingjengataniko Monggolbar saldipet a•bachengataha.
Jena kingking ia dabianiko knachakja, sima ari gri jingjengatanggen ine parakataha.

11/07/2023

NGCO mirongni dam tang•doaniko jegalata

Williamnagar, Monggolbar July 11, 2023: Garo Hills-o mirongni dam nangana bate tang•doprete palanina suk ong•gijaniko parakatenba, mirongko dam rake palchina sorkari ge•etama, ma dokkan dakgiparangsa skatang dam rake palenga ine Niksamso Garo Community Organization (NGCO) sing•doataha.
Ma Garo Hills-ni manderang neng•nikaniko man•china dokkan dakgiparangsa mirongni damko tang•doata ma an•tangtangni namnika gita mirongni damko tang•doate palna man•aia neba sing•doangkuaha.
Indakgipa obostarangko sorkari nirok simsakatjani a•sel, pring attamna hajira ka•e cha•enggipa manderangna namen neng•nikani ong•enga. Uni gimin kangal cholgri manderangni neng•nikaniko ma•sichakna nanga. Mirongni dam rakode, kangal cholgri manderangna neng•nikani ong•genma, ong•jawa, chanchigija an•tangtangni lapna mirongni dam tang•doprete palaniko NGCO raken jegalataha.
Mirongni damrangko tang•doatanichi salanti hajira ka•e janggi tangenggipa manderangna neng•nikaniko ra•baenga ineba NGCO janapataha.
Indakgipa obostako district administration aro Food and Civil Supply Department, ta•raken sing•sandianiko dakna nanga aro raken ja•ku de•na namga. Maini a•sel mirongni damrang rakengachim, songdonggipa manderangna talatna nanga ine NGCO dabiangaha.

11/07/2023

A•gitok baksa Daring mahari foot ball kal•suaanio A•gitok mahari amata

Tura, Monggolar July 11, 2023:Inter Locality Mahari Football Tournament, 2023-o bakko ra•gipa team-rangoni A•gitok Mahari, Monggolbar salo Daring Mahari baksa Chadmary field-o kal•susaangaha.
Ia kal•susaano dolgni maharirang k**i ong•bee kal•susaangaha. Indake Monggolbar salni kal•susaanio A•gitok Mahari half time ong•na skangan Daring mahari-ko goal 3 chipaha aro second half-o goal 2-ko chipdape, Daring Mahari-ko goal 5-0-chi amataha.
Indake kal•susaanio ama cha•genchimoba mahari dolgnian darangba gisik sagrikgija, kal•a matchotani ja•mano saksa sakgipinko salam ka•grike k**i ong•tokaha.
Ia Inter Locality Mahari Foot-ball kal•susaaniko ong•atani miksongara, rasong dakna ong•ja, indiba mahari dolsa dolgipin baksa ma•sigrikna aro ku•mong nangrimgrikna gitasa ia kal•saaniko ong•atenga ine District Sports Officer (DSO) Saljagring M.Marak parakataha.