Garo News Today

20/12/2025

SHILLONG: A·doko bobil dake chakatgipa Hynniewtrep National Liberation Council (HNLC)-ni, Bristibaro East Jaintia Hills-ni Shymplong-o donggipa Dhar Company-ko chadrapani ja·mano, Chief Minister Conrad K Sangma Sukrobar salo aganaha je a·doko champengako man·gipa bobil dolna sorkari mamingdake bame on·jawa aro uamangko ja·kol sananio nikchangani dongjawa.
Tangka dabiako on·jani gimin Deputy Chief Minister Sniawbhalang Dhar-ni gam-jinko bobil dol, IED-chi chadrapaha aro chadrapani a·selko HNLC a·kangaha.
A·doko ong·gija dake chadrapgipa dolni kosako sorkari nie dongjawa aro dosi dakgiparangni kosako jak de·na gita police-o, chu·onga gitan sakkirang donga ine Chief Minister aganaha.
Champengako man·gipa bobil dolni dabianiko on·a jechakani gimin Deputy Chief Minister Sniawbhalang Dhar-ni gam-jinko chadrapaha ine HNLC-ni general secretary Sainkupar Nongtraw-ni a·kangataha.
Police-ni koboro gita, HNLC bobil dolna kam ka·chakgipa sakgni manderangko rim·aha, jemangan IED gopretatanio jakdangdikahachim.

19/12/2025

19/12/2025

SHILLONG: Jong-ada ka·sagrikani, meli-nangrimgrikanio pangchake Garo Hills Autonomous District Council Council-o gipin jatrangko puona on·enga aro bak ra·rongbaenga ine Garo Hills-oni Cabinet Minister aro a·gipi politician Timothy D Shira aganaha.
A·bachengaonin gipin jatrang GHADC-o puonenga aro bak ra·rongbaenga, mejal-minio atchigipa manderangde uamangni atchina skang ong·gipa itihasko ma·sijawa ine a·gipi politician aganaha.
A·chikrang aro gipin jatrang dolgnianua sal somairango jatni jakgitelanina apsan dakgrikaha aro jong-ada ka·sagrike meli-nangrime namen janggi tangbrinbaenga, Shira skangni sal-somairangko gisik ra·atpilataha.
“Jensalo GHADC-ko songaha an·chingni A·chik dilgiparang jakgitelanina gipin jatrang baksa dakgrikaha uni gimin GHADC-ni kamrango gipin jatrangko bak ra·na on·a aro on·angkuna nanga,” ua aganaha.
Songpanggipa jat manderangnasan miksongaigipa GHADC-o da·roro chasongni manderang gipin jatrangko GHADC-ni kamrango bak ra·na on·a sikgijako janape, mitam bang·pagijagipa Muslim aro Nepali dilgiparangko GHADC-o MDC-rangna biming mingako Shira gisik ra·ataniko on·e aganaha.
Maibakai Shira da·oni obostako niate janape gipin jatrang puona bil-rengsi dongjanaba donga maina GHADC-ara a·bri jat manderangnasan miksongaigipa ong·a ine Shira agandapaha.

18/12/2025

SHILLONG: National People’s Party (NPP)-ni dilanichi a·dok sorkari aro Garo Hills Autonomous District Council (GHADC)-oba bang·en namroro silroroaniko ra·bana man·aha ine Mongolbar salo, a·dokni Cabinet Minister aro NPP-ni MLA Timothy D Shira a·kangatenba, re·baenggipa 2026 bilsio ong·atna sienggipa GHADC election-ko NPP chegopaigen ine an·tangni ka·dongchakenganiko parakataha.
Shira-ni aganani gitade, a·dok sorkari aro GHADC-ko chalaienggipa NPP, batanggimin somoirango GHADC-ni dingtang dingtang neng·nikanirangko namatna man·ahani gimin ia chang GHADC election-oba NPP chu·sokgipa ong·taigen ine ua ka·dongenga.
GHADC-o kam ka·enggipa manderang, ja 42-mang ong·pile dormaharangko man·jae neng·nikanirangko man·engmiting somoio NPP-chi dilenggipa sorkarisa, dakchakaniko on·e kam ka·enggipa manderangni neng·nikanirangko namatna man·aha ineba Shira a·kangataha.
“A·dokni Chief Minister, an·tangni u·i-ma·sianichi aro dilna changanichi, GHADC-o kam ka·enggiparangna changsanon ja 12-ni dormaharangko on·na man·aha. Re·baenggipa jarangoba GHADC-o kam ka·giparangna ua jaantian dormaharangko on·na ku·rachakaha,” ine NPP Minister aganaha.
Opposition dolrangni matnanganirangko jegalatengon, matnanganide politics-ni bakan ong·aia aro pangnan sorkariko chalaienggipa party-ni kamko jegalna jotton ka·rongaia ine Shira aganaha. Indake ong·genchimoba, NPP-chi dilenggipa sorkarini on·gilanirangko aro kamrangko manderang namen ma·sia ine Shira aganaha.
“Nama kamko chu·sokatoba matnanganide dongaia. Ian opposition dolrangni kam ong·a indiba manderangde, sorkarini kamrangko nikenga,” ine ua aganaha.
GHADC election-na skang an·tangni ka·dongchakenganiko parakatengon, NPP-na ua maming ra·bianirangko niksamsoa dongja aro GHADC-o Executive Council-ko rikpiltaina ka·dongenga ine NPP-ni dilgipa aro Resubelpara-ni MLA parakataha.

16/12/2025

Attami koborrang

16/12/2025

16/12/2025

SHILLONG: Re·baenggipa 2026 bilsio ong·atna sienggipa Garo Hills Autonomous District Council (GHADC) election-ni ja·man Bharatiya Janata Party (BJP), gital Executive Committee (EC)-ko rikna man·genchimode, council-o ong·gija dakgipa pilak kamrangkon sandirokna a·bachengatgen ine Sombar salo, BJP-ni dilgipa AL Hek parakataha.
GHADC-o tangka paisa jakkalsretaniko matnanganina Tura-ni biap dambongaoniko Enforcement Directorate (ED)-ni gita sandirokangani ja·man iako, BJP-ni dilgipa AL Hek aganaha.
Koborko on·ani gitade, 2015-2016 bilsirango Tribal Area-rango namroro silroroaniko ra·bana gita ma·mong sorkarini GHADC-na chamatgipa gong crore 28.66 tangkarangoni gong crore 1-kode Asanang constituency-na chamatahachim. Ia tangkarangoni baditaba lak tangkarangko jakkalsreta ine matnangako man·ani ja·man ED-ni official-rang, matnanga man·gipa manderang, chong·motan Boston Ch Marak, Ismail Marak, Kubon Sangma aro Nikseng Sangma-ni nokrangoniko am·sandiangaha.
ED-ni official-rang sandirokaniko dakon, Asanang constituency-ni gitcham MDC Ismail Marak-ni ge·etaniko man·e, ia tangkarangoni gong lak 19.8-ni cheque-ko Kubon Sangma-na aro gong lak 25.5-ni cheque-rangko Nikseng Sangma-na on·aha aro ja·mano Kubon Sangma, an·tangna watatgipa chu·gimik tangkarangko okenba, Ismail Marak-na on·aha aro Nikseng Sangma-ba chu·gimik tangkarangko, Ismail Marak-ni jikgipa Pratibha Marak-ni bank account-ona watatskaaha ine ma·sina man·aha.
Indake ong·engon, GHADC-ni pilak dam 29 constituency-rangon BJP, candidate-rangko susaatgen aro ia election-na BJP, kamrangko a·bachengataha ineba Hek parakataha.
Batanggimin chang GHADC election-ona bate ia chang BJP, nambate dakna man·gen aro bang·bate seat-rangko chena man·gen ineba Hek, an·tangni ka·dongchakenganiko parakataha.

11/12/2025

Tangka jakkalsretaniko ED-ni sandirokenggipani bidingo CM ku·watna jechaka

U'IATTIMGIPAONI
Date:December 11, 2025

(GHADC)-ni namroro silroroanina chamatgipa tangka paisarangko adita sak manderangni jakkalsretaniko Enforcement Directorate (ED)-ni gita sandirokengon, iani bidingo a·dokni Chief Minister Conrad K Sangma, mamingkoba ku·watna gita jechakaha.
ED-ara jakgitele sandirokna man·gipa bimangsa ong·ani gimin ia kamo sorkari, jak on·paani ba ku·rang on·paani katta dongja aro da·o dipet iani bidingo darangba mamingkoba aganna gita man·kujawa ine Chief Minister parakataha.
GHADC-ni ning·o tangka paisarangko jakkalsreta ine matnanganirangna aganchakaniko on·angengon, iani bidingo da·o ED-ni official-rang sandirokengkuani gimin ua aro sorkariba iani bidingo mamingkoba aganna man·kujawa ine Sangma aganaha.
Ia case-ko a·dok sorkaride sandirokenga ong·ja aro iako a·dok sorkaride sandirokna man·jawa ine janapatengon, ia kamko ED, a·paloni maming jak on·paani grian sandirokangaigen ine Chief Minister parakataha.
Garo Hills Autonomous District Council (GHADC)-ni tangka paisarangko jakkalsretani bidingo Enforcement Directorate Shillong sub-zone-ni official-rang, adita salrangna skangsan, Tura-ni biap dambongaoniko sandirokna a·bachengahachim.
Koborko on·ani gitade, 2015-2016 bilsirango Tribal Area-rango namroro silroroaniko ra·bana gita ma·mong sorkarini GHADC-na chamatgipa gong crore 28.66 tangkarangoni gong crore 1-kode Asanang constituency-na chamatahachim. Ia tangkarangoni baditaba lak tangkarangko jakkalsreta ine matnangako man·ani ja·man ED-ni official-rang, matnanga man·gipa manderang, chong·motan Boston Ch Marak, Ismail Marak, Kubon Sangma aro Nikseng Sangma-ni nokrangoniko am·sandiangaha.
ED-ni official-rang sandirokaniko dakon, Asanang constituency-ni gitcham MDC Ismail Marak-ni ge·etaniko man·e, ia tangkarangoni gong lak 19.8-ni cheque-ko Kubon Sangma-na aro gong lak 25.5-ni cheque-rangko Nikseng Sangma-na on·aha aro ja·mano Kubon Sangma, an·tangna watatgipa chu·gimik tangkarangko okenba, Ismail Marak-na on·aha aro Nikseng Sangma-ba chu·gimik tangkarangko, Ismail Marak-ni jikgipa Pratibha Marak-ni bank account-ona watatskaaha ine ma·sina man·aha.
Iani bidingo ED-ni official-rang, matnanga man·gipa manderangko sing·sandiangkugen aro dingtang dingtang sakkirango sandiangkugen ine u·iataha

09/12/2025

B Marak Tribal onggipana candidate-rangko seokjawa

09/12/2025

GHADC election-na BJP-ni tikitko Tribal-rangnasan on·aigen: Bernard

SHILLONG: Re·baenggipa 2026 bilsini a·bachengachibara ong·atna sienggipa Garo Hills Autonomous District Council (GHADC) election-na Bharatiya Janata Party (BJP)-ni tikitko skatang on·jawa indiba Scheduled Tribe (ST) candidate-rangnasan on·aigen ine BJP-ni state vice president aro Tura-ni MDC Bernard N Marak parakataha.
Marak-ni parakatani gitade, GHADC election-ko re·baenggipa bilsini April jao ong·atnaba gnang ine ka·dongsoenga aro ia election-na BJP-ni membor-rang, Krismas-ni ja·man bilakbate kamrangko ka·na a·bachenggnok.
Kamrangkode a·bachengengaha aro constituency damprakon party-ko bilakatna gita BJP-ni membor-rang, kamrangko ka·engaha ineba ua aganaha.
BJP-ni miksongani aro niamrangko ma·sigijagipa manderangnade party-ni tikitrangko on·jawa ineba Marak parakataha.
BJP-ni tikitko ST candidate-rangnasan on·na gita party-ni dilgiparang tik ka·angaha ine janapatengon, ian Tribal dilgiparangko, songadam nokadamrango daito ra·china aro namroro silroroaniko ra·bana kam ka·china miksonge dakani ong·enga ine Tura MDC parakataha.
Da·o dipet party tikitna candidate-rangoniko dorgastorangko ra·kujaenga ineba ua aganaha.
Marak-ni parakatani gitade, GHADC election-na party-ni gisepo chanchirimanirangko dakengkua aro candidate-rangko seokani kamrangba, re·baenggipa antirangonisa a·bachengnaba gnang.
GHADC election-na BJP-ni candidate-rangko parakatna skang, namgipa candidate-rangko basechengna gita dilgiparang nangnikenga ineba BJP-ni state vice president parakataha.
GHADC election-na ST candidate-rangkosan seokna tik ka·aniko adita salrangna skangsan BJP-ni mitam dilgiparang jegaltokahachim ine nikna man·a.