Dheerendra Jain

19/12/2023

ನಾನು ಹಾಸ್ಪಿಟಲ್ ನಲ್ಲಿ ನೈಟ್ duty ಮಾಡುವಾಗ, ಒಬ್ಬಳು HCA ಬಳಿ ಮಾತನಾಡುತ್ತಿದ್ದೆ . ಮುಂಚೆ day Duty ಕೂಡ ಮಾಡುತ್ತಿದ್ದವಳು ಈಗ ಕೇವಲ ನೈಟ್ ಶಿಫ್ಟ್ ಮಾತ್ರಾ ಮಾಡ್ತಾ ಇದ್ದಾಳೆ, ಕಾರಣ ಕೇಳಿದಾಗ - ಮನೆಯಲ್ಲಿ ನಾನು, ಗಂಡ ಮತ್ತೆ ಒಂದು ಮುದ್ದಿನ ಸಾಕು ನಾಯಿ ಇರುವುದು. ಹಗಲಲ್ಲಿ ಗಂಡ ಕೆಲಸಕ್ಕೆ ಹೋದಾಗ ನಾಯಿಯನ್ನು ನೋಡಿಕೊಳ್ಳಲು ಯಾರೂ ಇಲ್ಲ,Day care Centre ತುಂಬಾ costly ಅಂದಳು.!!!..

ಎಂಥಾ...Day care Centre?? Yes Dogs Day care Centre.

"ನೋಡು ಮುಂಚೆ ನಾನು ಕೂಡ Day Duty ಮಾಡುತ್ತಿದ್ದೆ, ಆಗ ಕೆಲಸಕ್ಕೆ ಬರುವಾಗ ನಮ್ಮ ನಾಯಿಯನ್ನು Day Care Centre ಅಲ್ಲಿ ಬಿಟ್ಟು ಬರುತ್ತಿದ್ದೆ. ಬೆಳಿಗ್ಗೆ 7 ಗಂಟೆ ಯಿಂದ ಸಂಜೆವರೆಗೆ ಅವರು ನಾಯಿಯನ್ನು ನೋಡಿಕೊಳ್ಳುತ್ತಾರೆ. ದಿನಕ್ಕೆ 30 ಪೌಂಡ್ ಕೊಡಬೇಕು (ನಮ್ಮ ಸುಮಾರು 3,000 ರೂಪಾಯಿ),ಯಾಕೋ ಸ್ವಲ್ಪ expensive ಆಗ್ತಾ ಇತ್ತು,ಅದಕ್ಕೆ ಈಗ ನಾನು ನೈಟ್ ಶಿಫ್ಟ್ ಮಾತ್ರ ಮಾಡ್ತ ಇದ್ದೇನೆ" ಅಂದಳು .

ನಾನು ಕಣ್ಣು ಬಾಯಿ ಬಿಟ್ಟು ಅವಳು ಹೇಳಿದ್ದನ್ನು ಕೇಳ್ತಾ ಇರುವಾಗ ಅವಳು ಮುಂದುವರೆಸಿ ಅಷ್ಟೇ ಅಲ್ಲ ಇಲ್ಲಿ Dog Walkers ಅಂಥಾ ಇರ್ತಾರೆ.
For example: ವೃದ್ಧರು ನಾಯಿ ಸಾಕುತ್ತಾರೆ ಆದರೆ ಅದನ್ನು ಹೊರಗಡೆ ವಾಕಿಂಗ್ ಕರೆದುಕೊಂಡು ಹೋಗಲು ಅವರಿಗೆ ಶಕ್ತಿ ಇಲ್ಲ ,ಆಗ ಅವರು Dog Walkers ಸಹಾಯ ಪಡೆಯುತ್ತಾರೆ, ಅವರು ಗಂಟೆಗೆ 10 ರಿಂದ 15 ಪೌಂಡ್ ಚಾರ್ಜ್ ಮಾಡ್ತಾರೆ ಅಂದಳು.

ನನ್ನ ತಲೆಯಲ್ಲಿ criminal ಐಡಿಯಾಸ್ ಓಡುತ್ತಿರುವುದನ್ನು ಗಮನಿಸಿದ ಅವಳು "ನೀನು ನಾಳೆಯಿಂದ ಈ ಕೆಲಸ ಬಿಟ್ಟು, ಡಾಗ್ ವಾಕರ್ ಕೆಲಸ ಮಾಡಲು ಆಗುವುದಿಲ್ಲ, ಅದಕ್ಕೆ ಅದರದೇ ಆದ ತರಬೇತಿ ಬೇಕಾಗುತ್ತದೆ "ಅಂದು ಜೋರಾಗಿ ನಕ್ಕಳು.

ಅವಳು ಮುಂದುವರೆಸುತ್ತಾ , ಮತ್ತೆ ನೀನು ಕೆಲವು ಅಂಗಡಿ, ಪಬ್, ರೆಸ್ಟೋರೆಂಟ್ ಗಳಲ್ಲಿ board ಗಮನಿಸಿರಬಹುದು .
"Only Service or Assistance Dogs are allowed"-
ಅಂತಹ Assistance ನಾಯಿಗಳು, ವಿಶೇಷ ಚೇತನರಿಗೆ, ಕುರುಡರು, ದೈಹಿಕ ಅಥವಾ ಮಾನಸಿಕ ಸಮಸ್ಯೆಗಳನ್ನು ಹೊಂದಿರುವ ವ್ಯಕ್ತಿಗಳಿಗೆ ಸಹಾಯ , ಗೈಡ್ ಮಾಡಲು ವಿಶೇಷ ತರಬೇತಿ ಹೊಂದಿರುತ್ತದೆ ಅಂದಳು.

ನನಗೆ ನಮ್ಮ ಮನೆಯ ಶ್ವಾನ, ಮೋತಿ ನೆನಪಾದ. ಅವನ ಬಗ್ಗೆ ಈ ಮೊದಲೇ ಲೇಖನ ಬರೆದಿದ್ದೆ.(link is in comments box ). ತಿಂಗಳ ಹಿಂದೆ ಅಮ್ಮನಲ್ಲಿ ಮಾತನಾಡಿದಾಗ ಎರಡು ದಿನಗಳಿಂದ ಅವನು ಕಾಣಿಸುತ್ತಿಲ್ಲ,ಮನೆಗೆ ಬಂದಿಲ್ಲ ಅಂದರು.

ಆಮೇಲೆ ಅಣ್ಣನಲ್ಲಿ ವಿಚಾರಿಸಿದಾಗ "ನಾನು ಊರಲ್ಲಿ ಇರದ ದಿವಸ , ಅವನು ನಾಪತ್ತೆಯಾಗಿದ್ದಾನೆ, ಎಲ್ಲಿ ಹೋದನೋ, ಯಾವುದಾದರೂ ಕಾಡು ಪ್ರಾಣಿ ತಿಂದಿತೋ ಅಥವಾ ಅವನು ಕೆಲವರಿಗೆ ರಸ್ತೆಯಲ್ಲಿ ಹೋಗುವಾಗ ದಿನವೂ ಬೊಗಳಿ ಜೋರು ಮಾಡುತ್ತಿದ್ದ ಅಲ್ವಾ,so ಅವರೇನಾದರೂ ಮಾಡಿದರೋ!? ಗೊತ್ತಿಲ್ಲ ,ಸುಮ್ಮನೆ ಇತರರ ಮೇಲೆ ಅಪವಾದ ಮಾಡುವುದೂ ಸರಿ ಅಲ್ಲ " ಎಂದು ಬೇಸರ ವ್ಯಕ್ತಪಡಿಸಿದ. ನಾನು ಹೂಂ ಎಂದು ಸುಮ್ಮನಾದೆ. ಕಣ್ಣು ತೇವಗೊಂಡಿತ್ತು .🥹

Photo: ನಮ್ಮ ಮನೆಯ ಶ್ವಾನ ಮೋತಿ ❤️

#ಧೀರೇಂದ್ರ_ಜೈನ್ #ಧೀರಮಾತು
#ಧೀರೇಂದ್ರ_ಜೈನ್_ಮೂಡುಬಿದಿರೆ_ಇಂಗ್ಲಂಡ್

30/11/2023

ಈ ಪೋಸ್ಟ್ ಒಂದು 2-3 ದಿನಗಳಿಂದ ಬಹಳಷ್ಟು ಜನ share ಮಾಡುತ್ತಾ ಇದ್ದಾರೆ.
ಈ ಲೇಖನವನ್ನು ಸುಮಾರು ಸಲ ಓದಿದೆ, ಅದಕ್ಕೆ ಬಂದ ಪ್ರತಿಕ್ರಿಯೆ comment ಗಳನ್ನು ಓದಿದೆ. Confusion ಆಗ್ತಾ ಇದೆ.. ಲೇಖನದ ಮೂಲ ಲೇಖಕರ ಉದ್ದೇಶ, ಅದನ್ನು share ಮಾಡಿದವರ ಹಾಗು ಪ್ರತಿಕ್ರಿಯೆ ನೀಡಿದವರ ಉದ್ದೇಶ ಸ್ವಲ್ಪ match ಆಗುತ್ತಿಲ್ಲ ಅನಿಸುತ್ತಿದೆ.

ಆ ಲೇಖನದ ಕೊನೆಯಲ್ಲಿ ಬರೆದ ಸಾಲುಗಳು .

" ವಿದೇಶಗಳಲ್ಲಿ ಬದುಕು ಕಟ್ಟಿಕೊಳ್ಳುತ್ತಿರುವವರ ಬಗ್ಗೆ ತಿರಸ್ಕಾರ, ಬೇಸರ, ಈರ್ಷೆಯಾಗಲೀ ಇಲ್ಲಾ. ಆದರೆ ಅವರು ಬದುಕುವ ಬದುಕು ಮಾತ್ರವೇ ಬದುಕು, ಅವರ ದುಡಿಮೆ ಮಾತ್ರ ದುಡಿಮೆ ಅಂದುಕೊಳ್ಳುವ, ಕೆಲವು ತಂದೆತಾಯಿಯರಿಗೆ ಇದು ಅರ್ಪಣೆ ಅಷ್ಟೇ !" ಎಂದಿದೆ..

ಈಗ ದೂರದ ಇಂಗ್ಲಂಡ್ ನಲ್ಲಿ ಕುಳಿತು ಈ ಲೇಖನ ಮತ್ತು ಅದನ್ನು share ಮಾಡಿದವರಿಗೆ ಹಾಗೂ ಪ್ರತಿಕ್ರಿಯೆ ನೀಡಿದವರಲ್ಲಿ ನನ್ನ ಒಂದು ಸಣ್ಣ ಡೌಟ್.

ನಮ್ಮ ದೇಶ ಬಿಟ್ಟು ವಿದೇಶಕ್ಕೆ ಹೋಗಿ ದುಡಿದು, ಸಂಪಾದಿಸಿ, ಬದುಕು ಕಟ್ಟಿಕೊಳ್ಳುವುದು ತಪ್ಪಲ್ಲ ಆದರೆ ಹಾಗೆ ಹೋದವರ ಹೆತ್ತವರು ಊರಲ್ಲಿ ಇರುವವರನ್ನು ಹೀಯಾಳಿಸುವುದು ತಪ್ಪು ಎಂದೇ? ಅಥವಾ ಹುಟ್ಟಿದ ಊರನ್ನು ಬಿಟ್ಟು ವಿದೇಶಕ್ಕೆ ಹೋಗಿ ದುಡಿಯುವುದೇ ತಪ್ಪು ಎಂದೇ?..

ಒಂದು ಆರೋಗ್ಯಕರ ಚರ್ಚೆ ಆಗಲಿ ..
ಮತ್ತೆ ಪುರುಸೊತ್ತು ಆಗುವಾಗ ಒಂದು ಉದ್ದ ಲೇಖನ ನಾನು ಬರೆಯುತ್ತೇನೆ,ತೊಂದರೆ ಇಲ್ಲ.

ಮೂಲ ಲೇಖನದ ಲಿಂಕ್ ಕಾಮೆಂಟ್ ಬಾಕ್ಸ್ ನಲ್ಲಿದೆ.
ನಮಸ್ಕಾರ 🙏.
#ಧೀರೇಂದ್ರ_ಜೈನ್
#ಧೀರೇಂದ್ರ_ಜೈನ್_ಮೂಡುಬಿದಿರೆ_ಇಂಗ್ಲಂಡ್

25/11/2023

ಭಾವನೆಗಳಿಗೆ ಬೆಲೆ ಇಲ್ಲವೇ??..

ಇಂಗ್ಲೆಂಡ್ ನ ಚಳಿಗೆ ಕೆಮ್ಮು ಶೀತ, ಜ್ವರ ಬೇಗನೆ ಬಂದು ನಮ್ಮನ್ನು ಸುಸ್ತು ಆಗಿಸಿಬಿಡುತ್ತದೆ, ಹಾಗಾಗಿ Sick leave ಹಾಕಿ ಮನೆಯಲ್ಲಿ ಕುಳಿತುಕೊಂಡು ಈ ಚಳಿಗೆ ಬೆಚ್ಚನೆ ಕಾಫಿ ಹೀರುತ್ತಾ ಕುಳಿತಿದ್ದೇನೆ ..

ಎರಡು ಮೂರು ತಿಂಗಳ ಹಿಂದೆ ಒಬ್ಬ ಯುವಕ ಮರಣ ಹೊಂದಿದ್ದ . ಯಾರಾದರೂ ಸತ್ತಾಗ ವಾಟ್ಸಪ್ ನಲ್ಲಿ ಸ್ಟೇಟಸ್ನಲ್ಲಿ ಸತ್ತವರ ಫೋಟೋ ಹಾಕಿ ಹಾಕಿ ಓಂ ಶಾಂತಿ,RIP ಎಂದು ಬರೆಯುವುದು ಮಾಮೂಲು ಆಗಿ ಬಿಟ್ಟಿದೆ . ಒಬ್ಬ ಪರಿಚಯಸ್ತರು ಸತ್ತವನ ಫೋಟೋ ಹಾಕಿ ಮಿಸ್ ಯು BADLY ಎಂದು, ಮತ್ತೆ ಐದು ನಿಮಿಷದ ನಂತರ ಇನ್ನೊಂದು ವಾಟ್ಸಪ್ ಸ್ಟೇಟಸ್ Having fun at ಮಲ್ಪೆ ಬೀಚ್ ಎಂದು ಫೋಟೋ ಹಾಕುತ್ತಾರೆ, ಅರ್ಧ ಗಂಟೆಯ ನಂತರ ಇನ್ಯಾವುದೋ ಕಾಮಿಡಿ ವಿಡಿಯೋ ಅವರ ವಾಟ್ಸಪ್ ಸ್ಟೇಟಸ್ ನಲ್ಲಿರುತ್ತದೆ, ಹಾಗಾದರೆ ಓಂ ಶಾಂತಿ ಎಂದು ಹಾಕಿದ ವಾಟ್ಸಪ್ ಸ್ಟೇಟಸ್ ನ ಉದ್ದೇಶ ಏನು ?. ಸತ್ತವನಿಗೆ ಸಂತಾಪ ಸೂಚಕವಾಗಿ ಹಾಕಿದ ವಾಟ್ಸಪ್ ಸ್ಟೇಟಸ್ ಕೇವಲ ತೋರಿಕೆಗೆ ಮಾತ್ರವೇ .. ಭಾವನೆಗಳಿಗೆ ಬೆಲೆ ಇಲ್ಲವೇ .

ಗುರುಗಳಾದ ಅರವಿಂದ ಚೊಕ್ಕಾಡಿಯವರು ಆತ್ಮೀಯರಾದ ಶೇಖರ್ ಅಜೆಕಾರು ಅವರು ನಮ್ಮನ್ನು ಅಗಲಿದಾಗ ತಮ್ಮ Facebook ನಲ್ಲಿ ವ್ಯಕ್ತಿಯ ಬಗ್ಗೆ ಸದ್ಭಾವನೆ ಇದ್ದರೆ ಅವರು ಬದುಕಿರುವಾಗಲೇ ಹೇಳಿಬಿಡಬೇಕು ." ನನ್ನ ಬಗ್ಗೆ ಇವರು ಒಳ್ಳೆಯ ಮಾತು ಹೇಳಿದ್ದಾರೆ "ಎಂದು ಮನಸ್ಸಿಗೆ ಸಂತೋಷವಾಗುತ್ತದೆ . ಗತಿಸಿ ಹೋದ ಮೇಲೆ ಹೊಗಳಿದರೆ ಏನು ಉಪಯೋಗ ಎನ್ನುವ ಅರ್ಥದಲ್ಲಿ ಬರೆದ ಸಾಲುಗಳು ನನಗೆ ಬಹಳ ಇಷ್ಟವಾಯಿತು.

ವೈಯಕ್ತಿಕ ಜೀವನದಲ್ಲಿ ನಮ್ಮ ಕುಟುಂಬದಲ್ಲಿಯೇ ಸಣ್ಣ ಸಣ್ಣ ಭಿನ್ನಾಭಿಪ್ರಾಯ ಮನಸ್ಥಾಪಗಳಿಂದ ಮಾತು ಬಿಟ್ಟವರು ಸತ್ತ ಮೇಲೆ ಗೊಳೋ ಎಂದು ಅಳುವವರನ್ನು ಕಂಡಿದ್ದೇವೆ ,ಸಾಮಾಜಿಕ ಜೀವನದಲ್ಲಿ ಜಾತಿ, ಧರ್ಮ, ರಾಜಕೀಯ ಸೈದ್ಧಂತಿಕ ಭಿನ್ನಾಭಿಪ್ರಾಯಗಳಿಂದ ಕಚ್ಚಾಡುತ್ತಿರುವವರು ಸತ್ತ ಮೇಲೆ ಅವರ ಫೋಟೋ ಹಾಕಿ, ಶ್ರದ್ಧಾಂಜಲಿ ಸಭೆ ನಡೆಸಿ,ಉದ್ದುದ್ದ ಲೇಖನಗಳನ್ನು ಬರೆದವರನ್ನು ಕಂಡಿದ್ದೇವೆ .

ಸ್ವಲ್ಪ ನಮ್ಮ ಅಹಂ ನ್ನು ಬದಿಗಿಟ್ಟು ಭಿನ್ನಾಭಿಪ್ರಾಯಗಳನ್ನು ಗೌರವಿಸಿ ಸ್ನೇಹದಿಂದ ವರ್ತಿಸಿದರೆ ಅವರು ಸತ್ತ ಮೇಲೆ ಆಗುವ ಪಶ್ಚಾತಾಪ ಕಡಿಮೆಯಾಗಬಹುದು ನನ್ನ ಭಾವನೆ. ಆದರೆ ಅದು ಸುಲಭ ಇಲ್ಲ ಏಕೆಂದರೆ ನಾವು ಮನುಷ್ಯ ಮಾತ್ರರು.!!..

ಇತರರು ನಾವು ಯೋಚಿಸಿದ ರೀತಿಯೇ ಯೋಚಿಸಬೇಕು ನಾವು ವರ್ತಿಸಿದ ರೀತಿ ಅವರು ವರ್ತಿಸಬೇಕು ಎಂದು ಬಯಸುತ್ತೇವೆ , ಆದರೆ ಇತರರು ವ್ಯತಿರಿಕ್ತವಾಗಿ ಯೋಚಿಸಿದಾಗ ವರ್ತಿಸಿದಾಗ ನಾವು ಯಾವ ರೀತಿ ಸ್ಪಂದಿಸುತ್ತೇವೆ ಅನ್ನುವುದು ನಮ್ಮ ಮೆಚುರಿಟಿಯನ್ನು ತೋರಿಸುತ್ತದೆ .ನಾವು ಒಂದು ರೀತಿಯಲ್ಲಿ ಯೋಚಿಸಿದರೆ ಇತರರು ಇನ್ನೊಂದು ರೀತಿಯಲ್ಲಿ ಯೋಚಿಸಿರುತ್ತಾರೆ ಎನ್ನುವ ಸತ್ಯ ನಮಗೆ ತಿಳಿಯದೆ ಹೋಗುತ್ತದೆ .

-------------------------------
ವಿದೇಶವಾಸಿಗಲಾದ ನಾನು ಮತ್ತು ನನ್ನ ಸ್ನೇಹಿತರ ಅನುಭವಗಳನ್ನು ನೀವು ಕೇಳಬೇಕು .

ಕುಟುಂಬದಲ್ಲಿಯೇ ಕೆಲವು ಹಿರಿಯರು ಅವನು ಫಾರಿನ್ ಗೆ ಹೋದ ಮೇಲೆ ನಮ್ಮನ್ನೆಲ್ಲ ಮರೆತೆ ಬಿಟ್ಟಿದ್ದಾನೆ, ಈಗ ದೊಡ್ಡ ಜನ ,ಒಂದು ಕಾಲ್ ಮಾಡ್ಲಿಲ್ಲ ಎಂದು ಗೊಣಗುತ್ತಾರೆ , ಆದರೆ ಅವರ ಮಕ್ಕಳು ಊರಲ್ಲಿ ಇಡೀ ದಿನ ಕೈಯಲ್ಲಿ ಮೊಬೈಲ್ ಹಿಡಿಯುತ್ತಾ Reels ಮಾಡುತ್ತಾ ಇರುವವರು ನಮ್ಮ ತಂದೆ ತಾಯಿಗಳಿಗೆ ಒಮ್ಮೆಯೂ ಕರೆ ಮಾಡಿರುವುದಿಲ್ಲ .

ನಾವು ಇಲ್ಲಿ ಮುಂಜಾನೆ ಎದ್ದು ಡ್ಯೂಟಿಗೆ ಹೊರಡುವಾಗ ಊರಲ್ಲಿ ಮಧ್ಯಾಹ್ನ ವಾಗಿರುತ್ತದೆ ನಾವು ಕೆಲಸ ಮುಗಿಸಿ ರಾತ್ರಿ ಮನೆಗೆ ಬರುವಾಗ ಊರಲ್ಲಿ ಮಧ್ಯರಾತ್ರಿ ಆಗಿರುತ್ತದೆ , ಕೆಲಸದ ಸಮಯ ಊಟ ಮಾಡಲು ಬಿಡುವು ಸಿಕ್ಕಾಗ ತಂದೆ, ತಾಯಿ ,ಅಣ್ಣ ,ತಮ್ಮ, ಅಕ್ಕ ,ತಂಗಿಗೆ ಕಾಲ್ ಮಾಡಿ ಮಾತಾಡುತ್ತೇವೆ ಹಾಗಾಗಿ ಎಲ್ಲರಿಗೂ ಕರೆ ಮಾಡಲು ಸಾಧ್ಯವಾಗುವುದಿಲ್ಲ ಎಂದು ವಿವರಿಸಿದರೂ ಅವರಿಗೆ ಅರ್ಥವಾಗುವುದಿಲ್ಲ.
ನಾನು ಭಾರತದ what's app ನಂಬರ್ ಅನ್ನೇ ಉಪಯೋಗಿಸುವುದು , ಮಾತಾಡಬೇಕು ಅನಿಸಿದಾಗ ನಿಮ್ಮ ಮಕ್ಕಳ ಬಳಿ ನನಗೆ what's app ಕಾಲ್ ಅಥವಾ ಮೆಸೇಜ್ ಮಾಡಲು ಹೇಳಿ ಅಂದರೆ,ಅಯ್ಯೋ ಅವರಿಗೆ ಹೇಳಿದ್ರೆ ಯಾವಾಗ ಮಾಡ್ತಾರೆ,ನಮ್ಮ ಮಾತು ಕೇಳ್ತಾರಾ ಅಂತಾರೆ 😂.

ಪಬ್ಲಿಕ್ ಲೈಫ್ ನಲ್ಲಿ ಬಹಳಷ್ಟು ತೊದಗಿಸಿಕೊಂಡ ನನ್ನಂಥವರಿಗೆ ಊರೆಲ್ಲಾ ಸ್ನೇಹಿತರು . ರಜಾ ದಿನಗಳಲ್ಲಿ ಅವರಿಗೆ ಕರೆ ಮಾಡಿದರೆ ಬಹಳ ಚೆನ್ನಾಗಿ ಮಾತನಾಡುವ ತುಂಬಾ ಸ್ನೇಹಿತರು ನನಗಿದ್ದಾರೆ ಎನ್ನುವುದು ನನ್ನ ಪುಣ್ಯ. ಬಹಳ ದಿನಗಳ ಕಾಲ ಮೆಸೇಜ್ ಕಾಲ್ ಮಾಡದಿದ್ದರೆ "ದಾನೆ ಸುದ್ದಿ ಇಜ್ಜಿ "ಎಂದು ಗದರಿಸುವ ಸ್ನೇಹಿತರನ್ನು ಪಡೆದ ನಾನೇ ಭಾಗ್ಯವಂತ .

ಇಂಥವರು ಒಂದು ಕಡೆಯಾದರೆ , ಇನ್ನೊಂದು ಕಡೆ ಅವನಿಗೆ ವಿದೇಶದಲ್ಲಿ ಬೋರ್ ಆಗ್ತಾ ಇದೆ ಸ್ನೇಹಿತರು ಯಾರು ಇಲ್ಲ ಅದಕ್ಕಾಗಿ ನಮಗೆ ಫೋನ್ ಮಾಡಿ ಮಾತಾಡುತ್ತಾನೆ , ವಿದೇಶದಲ್ಲಿ ಕುಳಿತು ವಿಡಿಯೋ ಕಾಲ್ ಮಾಡಿ ನಾನು ದೊಡ್ಡ ಜನ, ಏನೋ ಸಾಧಿಸಿ ಬಿಟ್ಟೆ ಎಂದು ತೋರಿಸಲು ,Show ಮಾಡಲು ಕಾಲ್ ಮಾಡುತ್ತಾನೆ ಇಂದು ಮೂಗು ಮುರಿಯುವವರೂ ಇದ್ದಾರೆ .

ಕೆಲವರು ಸುಮ್ಮನೆ ಕಾಲ್ ಮಾಡ್ತಾನೆ, ವಿಷಯ ಏನೂ ಇಲ್ಲ ಅನ್ನುತ್ತಾರೆ . ಮತ್ತೆ ಕೆಲವರು ಕೆಲಸ ಇದ್ದಾಗ ಮಾತ್ರ ನಮ್ಮ ನೆನಪಾಗುತ್ತದೆ, ಇಲ್ಲದಿದ್ದರೆ ಅವನ ಸುದ್ದಿ ಇಲ್ಲ ಅನ್ನುವವರು ಇದ್ದಾರೆ . ಈ ಜಗತ್ತೇ ಹೀಗೆ - ಕೆಲವೊಮ್ಮೆ ನಾವು ಏನು ಮಾಡಿದರೂ ತಪ್ಪು ,ಏನು ಮಾಡದಿದ್ದರೂ ತಪ್ಪು ಅನ್ನುತ್ತದೆ. ಹಾಗಾಗಿ ಅವರು ಏನನ್ನುತ್ತಾರೆ ಇವರು ಹೀಗೆನ್ನುತ್ತಾರೆ ಎಂದು ಜಾಸ್ತಿ ಯೋಚಿಸದೆ ಸುಮ್ಮನಿದ್ದರೆ ನಮಗೇ ನೆಮ್ಮದಿ.

ಇನ್ನೊಂದು ಸ್ವಾರಸ್ಯಕರ ವಿಷಯವೇನೆಂದರೆ ಊರಿಗೆ ಬಂದಾಗ ಸಂಬಂಧಿಕರಿಗೆ ಡ್ರೆಸ್,ಚಾಕಲೇಟ್ ,ಕೂಲಿಂಗ್ ಗ್ಲಾಸ್, ಟಾರ್ಚ್ ,ಸೆಂಟ್ ಬಾಟಲ್, ಬ್ಯಾಗ್..ಇತ್ಯಾದಿ ತರುವುದು ವಾಡಿಕೆ . ಕೆಲವರು ನಮ್ಮ ಮೇಲೆ ಪ್ರೀತಿಯಿಂದ ಏನನ್ನಾದರೂ ತಂದಿದ್ದಾನಲ್ಲ ಎಂದು ಸಂತೋಷ ಪಟ್ಟರೆ, ಇನ್ನುಳಿದವರು ಬರೀ ಚಾಕ್ಲೇಟ್ ತಂದಿದ್ದಾನೆ ಇದು ಇಲ್ಲಿ ಸಿಗೋದಿಲ್ವೇ!? ಅನ್ನುತ್ತಾರೆ, ಈ ಕೂಲಿಂಗ್ ಗ್ಲಾಸ್ ,ಸೆಂಟ್ ಬಾಟಲ್ ಇಲ್ಲಿಯೂ ಸಿಗುತ್ತದೆ ,ಇಲ್ಲಿ ಇನ್ನೂ ಚೆನ್ನಾಗಿ ಇರುವುದೂ ಸಿಗುತ್ತೆ ಎನ್ನುತ್ತಾರೆ .ಈ ಜಗತ್ತೇ ನಮ್ಮ ಅಂಗೈಯಲ್ಲಿ ಇರುವಾಗ ಯಾವ ವಸ್ತು ಬೇಕಾದರೂ ಎಲ್ಲಾ ದೇಶದಲ್ಲೂ ಸಿಗುತ್ತದೆ ಅನ್ನುವುದು ಇವರಿಗೆ ಅರ್ಥ ಮಾಡಿಸುವುದು ಹೇಗೆ .

ಅದರಲ್ಲೂ ಒಂದೇ ಒಂದು ಮೆಸೇಜ್ ಅಥವಾ ಕರೆ ಮಾಡಿ ಯೋಗಕ್ಷೇಮ ವಿಚಾರಿಸಿದ ಮಹನೀಯರು ಊರಿಗೆ ಬಂದಾಗ ನನಗೆ ಏನು ತಂದಿದ್ದಿ ಅಂದಾಗ "ಅಯ್ಯೋ ನಿನ್ನ ಕರ್ಮವೇ" ಎಂದು ಮನಸಿನ್ನಲ್ಲಿಯೇ ಅಂದುಕೊಳ್ಳುತ್ತೇವೆ .

ಜನರ ಅಭಿಪ್ರಾಯಗಳು ಭಾವನೆಗಳು ಕಾಲಕಾಲಕ್ಕೆ ರಾತ್ರಿ ಬೆಳಗಾಗುವುದರೊಳಗೆ ಬದಲಾಗುವುದನ್ನು ಕಂಡಿದ್ದೇವೆ.

ಒಬ್ಬ ಪ್ರಸಿದ್ಧ ಟಿವಿ ನಿರೂಪಕ ತಮ್ಮ ರಾಜಕೀಯ ನಾಯಕನ ಅವಹೇಳನ ಮಾಡುತ್ತಿದ್ದಾನೆ ಎಂದು ದ್ವೇಷಿಸುತ್ತಿದ್ದವರು ಯಾವುದೋ ಒಂದು ಕೇಸಿನಲ್ಲಿ ಅದೇ ನಿರೂಪಕ ನಮ್ಮವರ ಪರವಾಗಿದ್ದಾನೆ ಅಂದಾಗ ಹೀರೋ ಎಂದು ಹೊಗಳಿದ್ದನ್ನು ಕಂಡಿದ್ದೇವೆ.
ಅಂದು ಎಲ್ಲರಿಗೂ ಕಾಗೆ ಹಾರಿಸಿದವನು ಎಂದು ಟ್ರೋಲ್ ಮಾಡಿದವರೇ ಇಂದು ಬಿಗ್ ಬಾಸ್ ನಲ್ಲಿ ಅವನನ್ನು ಕಂಡು ಅಯ್ಯೋ ಪಾಪ ಅವನೇ ಗೆಲ್ಲಬೇಕು ಎನ್ನುತ್ತಿದ್ದಾರೆ. ಹಾಗಾಗಿ ನಮ್ಮ ಜೀವನದ ಸಂತೋಷ ಇತರರ ಅಭಿಪ್ರಾಯಗಳಿಗೆ ಅವಲಂಬಿತವಾಗಿರದೆ ಬದುಕಿದರೆ ಸ್ವರ್ಗ ಸುಖ ಏನಂತೀರಿ .

ಇನ್ನು ಕೆಲವರು ಮಾನಸಿಕವಾಗಿ ಎಷ್ಟು ದುರ್ಬಲ ಮನಸ್ಸಿನವರು ಎಂದರೆ ನನ್ನ ಬರ್ತಡೇ ,ನನ್ನ ವೆಡ್ಡಿಂಗ್ ಆನಿವರ್ಸರಿ ಗೆ ಅವನು ವಾಟ್ಸಪ್ ,ಫೇಸ್ಬುಕ್ ಸ್ಟೇಟಸ್ ಹಾಕಿ ವಿಶ್ ಮಾಡಲಿಲ್ಲ ಎಂದು ಬೇಸರ ಪಟ್ಟುಕೊಳ್ಳುತ್ತಾರೆ ಅಂದರೆ ನಮ್ಮ ಸಂತೋಷದ ಕೀಲಿ ಕೈಯನ್ನು ಬೇರೆಯವರ ಕೈಯಲ್ಲಿ ಕೊಟ್ಟು ಎಷ್ಟು ಗುಲಾಮರಾಗಿದ್ದೇವೆ ನಮ್ಮನ್ನು ನಾವೇ ಪ್ರಶ್ನಿಸಬೇಕಾಗಿದೆ .

ಕೊನೆಯದಾಗಿ ನಮ್ಮೆಲ್ಲರ ಅಭಿಪ್ರಾಯ ಭೇದಗಳು ಏನೇ ಇದ್ದರೂ ಅದನ್ನು ಗೌರವಿಸಿ ಸ್ನೇಹದಿಂದ ಬದುಕಬೇಕು.

ಜಗವೆನ್ನ ಮುದ್ದಿಸದದೇಕೆಂದು ಕೊರಗದಿರು |
ಮಗುವು ನೀಂ ಪೆತ್ತರ್ಗೆ, ಲೋಕಕೆ ಸ್ಪರ್ಧಿ ||
ಹೆಗಲಹೊರೆ ಹುಟ್ಟಿದರ್ಗೆಲ್ಲಮಿರುತಿರೆ, ನಿನ್ನ |
ರಗಳೆಗಾರಿಗೆ ಬಿಡುವೋ? – ಮಂಕುತಿಮ್ಮ...

ಅಂದ ಹಾಗೆ ನನ್ನ ಹೆಂಡತಿ " ನಿನ್ನೆ ಮಾಡಿ ತಿಂದು ಉಳಿದಿದ್ದ ಸ್ವಲ್ಪ ಪುಲಾವ್ ಫ್ರಿಡ್ಜ್ ನಲ್ಲಿ ಇಟ್ಟಿದ್ದೆ,ಈಗ ಸ್ವಲ್ಪ smell ಬರ್ತಾ ಇದೆ, ಹಾಳಾಗಿದೆ, ಬಿಸಾಡುತ್ತೇನೆ "ಅಂದಳು.

ಅರೇ ನಿನ್ನೆ ಎಷ್ಟು ಬಗೆಯ ತರಕಾರಿ, ಮಸಾಲೆ ಹಾಕಿ ಮಾಡಿದ ಆಹಾರ ಇಂದಿಗೆ expire ಆಗಿದೆ, ಎಸೆಯಲೇ ಬೇಕು, ಇಲ್ಲದಿದ್ದರೆ ನಮಗೇ ತೊಂದರೆ. ಅಂತೆಯೇ ಯಾವಾಗಲೋ ನಡೆದ ಜಗಳ, ಮನಸ್ತಾಪ, ಬೇಸರ ಅಂದಿಗೆ ಅಗತ್ಯ ಇತ್ತು, ಇಂದಿಗೆ? ಇನ್ನು ಕೂಡ ನಾವು ಇಟ್ಟುಕೊಂಡರೆ ನಮಗಲ್ಲವೆ ತೊಂದರೆ?...

ನಮಸ್ಕಾರ .

#ಧೀರಮಾತು
#ಧೀರೇಂದ್ರ_ಜೈನ್

.

11/11/2023

#ಸಹಾಯ_ವ್ಯವಹಾರ_ಆಗದಿರಲಿ
ಗೆಳೆಯ ನೊಬ್ಬನಿಗೆ ಕರೆ ಮಾಡಿ ಮಾತನಾಡಿ ಈಗಷ್ಟೆ ಪಾರ್ಕ್ ನ ಬೆಂಚಿನ ಮೇಲೆ ಕೂತಿದ್ದೇನೆ..

"ಯಾರನ್ನೂ ನಂಬಬಾರದು , ಆಗ ನಾನು ಬೇಕಿತ್ತು , ಇವರಿಗೆ ಈಗ ನನ್ನ ನೆನಪಿಲ್ಲ, ಈ ಸಂಘ ಸಂಸ್ಥೆ ಯಲ್ಲಿ ಎತ್ತರದ ಸ್ಥಾನ ಪಡೆಯಲು support ಆಗಿ ನಿಂತದ್ದು ನಾನು, ಈಗ ನನಗೆ ವಿರುಧ್ದ ನಿಂತಿದ್ದಾನೆ" ಎಂದು ತನ್ನಲ್ಲಿದ್ದ ಕೋಪ, ಬೇಸರ ಎಲ್ಲಾ ಭಾವನೆಗಳನ್ನು ನನ್ನಲ್ಲಿ ಹೇಳುತ್ತಿದ್ದರೆ, ನಾನು ಸುಮ್ಮನೆ ಅವನು ಹೇಳಿದ್ದಕ್ಕೆ ಕಿವಿ ಯಾಗಿ ಅವನ ಮನಸಲ್ಲಿರುವ ಎಲ್ಲವನ್ನೂ ಹೇಳಲು ಅವಕಾಶ ನೀಡಿದೆ ,ನನ್ನ ಉತ್ತರ ಅಥವಾ ಅಭಿಪ್ರಾಯ ಅವನು ಕೇಳದ ಕಾರಣ ನಾನು ಏನೂ ಅದರ ಬಗ್ಗೆ ಮಾತನಾಡಲಿಲ್ಲ.

ಅವನಿಗೂ ತನ್ನ ಭಾವನೆಗಳನ್ನು ಹೊರ ಹಾಕಬೇಕಿತ್ತು ಅಷ್ಟೇ, ಮತ್ತೆ ಬೇರೇನೋ ಮಾತನಾಡಿ call ಕಟ್ ಮಾಡಿದ..

ಈ ಸಂಘ ಸಂಸ್ಥೆಗಳಲ್ಲಿ ಬಹಳ ಸಮಯ ಕಂಪ್ಲೀಟ್ involve ಆಗಿದ್ದ ನಾನು ,ಈಗ- ನನ್ನಪ್ಪ ಯಾವಾಗಲೂ ತಮಾಷೆ ಗೆ ಹೇಳುತ್ತಿದ್ದ "ಆ ಸಂಘ ಈ ಸಂಘ ಮುಖ ಭಂಗ " ಮಾತಿನ ಮರ್ಮ ಬಹಳ ತಡವಾಗಿ ಅರ್ಥ ಆದರೂ, ಈಗಲೂ ವಾರ್ಷಿಕ ಶುಲ್ಕ ಮತ್ತು ಕೈಲಾದ ಮಟ್ಟಿಗೆ donation ನೀಡುವುದಕ್ಕೆ, ಮತ್ತು ಕೇಳಿದಾಗ ಮಾತ್ರ ಅಭಿಪ್ರಾಯ ತಿಳಿಸಲು ಸೀಮಿತವಾಗಿರಿಸಿದ್ದೇನೆ..

2003 ರಲ್ಲಿ Bsc Nursing ಗೆ ಆಳ್ವಾಸ್ ಕಾಲೇಜಿಗೆ ಸೇರಿದ ಸಮಯ. ನಮ್ಮ ಬ್ಯಾಚ್ ನಲ್ಲಿ ನಾನೊಬ್ಬನೇ ಮೂಡುಬಿದಿರೆಯ ಹುಡುಗ, ಇತರ 4 ಜನ ಕರ್ನಾಟಕದ ಬೇರೆ ಊರಿನವರು, ಉಳಿದ ಹುಡುಗರು ಕೇರಳದವರು.
ಅವರಿಗೆಲ್ಲ ಊರು ಹೊಸತು ಆದ ಕಾರಣ ನಾನೇ ಹೋಟೆಲ್, ಸೈಬರ್, ಟಾಕೀಸು ಇತರ ಸ್ಥಳಗಳು ಎಲ್ಲಿವೆ ಇತ್ಯಾದಿಗಳನ್ನು ತೋರಿಸುತ್ತಿದ್ದೆ, ಹೆಚ್ಚಿನ ಮಾಹಿತಿಗಳನ್ನು ನಾನು ಒದಗಿಸುತ್ತಿದ್ದೆ .ನಾನು ಅವರಿಗೆಲ್ಲ ಬಾರಿ ಸಹಾಯ ಮಾಡುತ್ತಿದ್ದೇನೆ ಎಂಬ ಹೆಮ್ಮೆ ಹಾಗೂ ಒಣ ಜಂಭ ನನ್ನಲ್ಲಿ. ಕ್ರಮೇಣ ಅವರಿಗೂ ಇಲ್ಲಿಯ ಬಗ್ಗೆ ತಿಳಿಯಿತು, ಇತರರು ಕೂಡ ಸ್ನೇಹಿತರಾದರು . ಸಹಜವಾಗಿಯೇ ಇತರರ ಬಳಿ ಕೂಡ ಮಾಹಿತಿ ಪಡೆದು ಸುತ್ತಾಡಲು ತೊಡಗಿದರು. ಮೊದಲೆಲ್ಲಾ ಎಲ್ಲಿಗೆ ಹೋಗಬೇಕಾದರೂ ನನ್ನನ್ನು ಕರೆಯುತ್ತಿದ್ದವರು ಈಗ ನನಗೆ ಹೇಳದೇ ಹೋಗುತ್ತಾರಲ್ಲ ಎಂದು ಬೇಸರ ಪಟ್ಟುಕೊಂಡೆ.

Course ಕಂಪ್ಲೀಟ್ ಆದ ಮೇಲೆ ಕೆಲಸಕ್ಕೆ ಸೇರಿದಾಗಲೂ ಬೇರೆ ಊರಿಂದ ಬಂದ staff ಗಳಿಗೆ ನನ್ನಲ್ಲಿ ಆದ ಮಾಹಿತಿ ಒದಗಿಸುವುದು, ಅವರಿಗೆ ಬಾಡಿಗೆ ಮನೆ ಹುಡುಕಲು ಸಹಾಯ ಇತ್ಯಾದಿ ಮಾಡುತ್ತಿದ್ದೆ. ಕೆಲವೇ ವರ್ಷಗಳಲ್ಲಿ ಅವರಿಗೂ ಇಲ್ಲಿ ಹೆಚ್ಚಿನ ಜನ ಪರಿಚಯ ಆದ ಮೇಲೆ ಸಹಜವಾಗಿಯೇ ನನ್ನಲ್ಲಿ ಸಹಾಯ ಕೇಳುತ್ತಿರಲಿಲ್ಲ, ಆದರೆ ನನಗೆ ತಿಳಿಸದೇ ಅವರು ತಿರುಗಾಡಲು ಹೋದರೆ,ಜಾಗ ಮನೆ ಖರೀದಿಸಿದರೆ, ಛೇ ಇವರಿಗೆ ಮೊದಲು ಬಂದಾಗ ನಾನು ಬೇಕಿತ್ತು, ಈಗ ನನ್ನನ್ನು ಮೈಂಡ್ ಮಾಡುತ್ತಿಲ್ಲ ಅನಿಸುತ್ತಿತ್ತು..

ನನ್ನ ಗೆಳೆಯರ ಗುಂಪಿನಲ್ಲಿ ಒಬ್ಬ ಒಳ್ಳೆಯ ತಬಲಾ ನುಡಿಸುವವನಿದ್ದ,ಅವನಿಗೆ ಯಾರೂ ಗುರುಗಳು ಇರಲಿಲ್ಲ ಅವನೇ ಸ್ವ ಆಸಕ್ತಿಯಿಂದ ಕಲಿತಿದ್ದ, ಊರಿನ ಒಬ್ಬ ದೊಡ್ಡ ವ್ಯಕ್ತಿ ಅವನಿಗೆ ಒಂದೆರಡು ಬಾರಿ ಅವಕಾಶ ನೀಡಿದರು, ಅವನ ಅಧ್ಭುತ ಪ್ರತಿಭೆಯನ್ನು ಮೆಚ್ಚಿ ಜನ ಇನ್ನಷ್ಟು ಅವಕಾಶ ನೀಡಿದರು. ಅವನು ಯಾವಾಗಲೂ ಅವನಿಗೆ ಮೊದಲು ಅವಕಾಶ ನೀಡಿದ ವ್ಯಕ್ತಿಗೆ ಅಪಾರ ಗೌರವ ನೀಡುತ್ತಿದ್ದ, ಆದರೆ ಆ ದೊಡ್ಡ ವ್ಯಕ್ತಿ ಇವನು ಬೆಳೆದದ್ದೇ ನನ್ನಿಂದ,ನಾನು ಅವಕಾಶ ನೀಡಿದ ಕಾರಣದಿಂದಲೇ ಈಗ ಪ್ರಸಿದ್ಧ ತಬಲಾ ವಾದಕ ಅಂದುಕೊಂಡು ಇವನನ್ನು ಕಂಟ್ರೋಲ್ ಮಾಡಲು ಆರಂಭಿಸಿದರು, ಇವನು ಅದಕ್ಕೆ ಬಗ್ಗದಾಗ ಅಪಪ್ರಚಾರ ಮಾಡಲು ಆರಂಭಿಸಿ , ಸಹಾಯ ಮಾಡಿದವರನ್ನು ಮರೆತು ಬಿಟ್ಟಿದ್ದಾನೆ ಎಂದು ಕೋಪ ಹಾಗು ಬೇಸರ ಪಟ್ಟುಕೊಂಡರು.

ಹೀಗೆ ಬಹಳಷ್ಟು ಅನುಭವದ ಉದಾಹರಣೆಗಳನ್ನು ಕೊಡಬಹುದು .ನನ್ನಿಂದ ಸಹಾಯ ಪಡೆದವರು ಈಗ ಯಾಕೆ ನನ್ನನ್ನು ಮರೆತಿದ್ದಾರೆ ಅನ್ನುವ ಭಾವನೆ ಹೆಚ್ಚಾಗಿ ನಮಗೆಲ್ಲರಿಗೂ ಬಂದಿರುತ್ತದೆ ಅದು ಸಹಜ ಕೂಡ..

ಇದರ ಬಗ್ಗೆ ಯೋಚಿಸಿ ಕೊನೆಗೆ ಈ ಅಭಿಪ್ರಾಯಕ್ಕೆ ಬಂದಿರುವೆ.

ಸಹಾಯ ಅಂದರೆ,ಕೇವಲ financial help ಅಲ್ಲ, ಯಾವುದೇ ವಿಷಯದ ಬಗ್ಗೆ ನಮಗೆ ಅರಿವಿಲ್ಲದಾಗ ನಾವು suggestions,ideas ಕೇಳುತ್ತೇವೆ, ಅದೂ ಸಹಾಯ ಆಗುತ್ತದೆ.
ಕೆಲವೊಂದು ಕೆಲಸ ಮಾಡಲು ನಮಗೆ ಗೊತ್ತಿಲ್ಲ ದಾಗ ಅವರು ಬಂದು ನಮಗೆ ಸಹಾಯ ಮಾಡುತ್ತಾರೆ, ಅವರ ಸಮಯ ನಮಗೆ ನೀಡುತ್ತಾರೆ ಅದೂ ಒಂದು ಸಹಾಯ, ಹೀಗೆ ಹಲವು ಬಗೆ ಗಳಲ್ಲಿ ನಾವು ಪ್ರತಿ ದಿನ ಒಂದಲ್ಲ ಒಂದು ರೀತಿಯಲ್ಲಿ ಇತರರಿಗೆ depend ಆಗಿ ಸಹಾಯ ಪಡೆಯುತ್ತೇವೆ.

ನಮ್ಮಿಂದ ಸಹಾಯ ಪಡೆದವರಲ್ಲಿ ಹೆಚ್ಚಿನವರು ನಮ್ಮನ್ನು ನೆನಪಿನಲ್ಲಿ ಇಟ್ಟು ಕೊಂಡಿರುತ್ತಾರೆ ಆದರೆ ಅದನ್ನು ಅವರು ಯಾವಾಗಲೂ ಹೇಳುತ್ತಿರಬೇಕು ಅನ್ನುವ ಅವಶ್ಯಕತೆ ಇಲ್ಲ ಮತ್ತು ಈಗಲೂ ಅವರು ನಮ್ಮಿಂದ ಸಹಾಯ ಅಥವಾ ನಮ್ಮಲ್ಲಿ ಹೇಳಿಯೇ ಕೆಲಸ ಮಾಡಬೇಕು ಎನ್ನುವ Rules ಇಲ್ಲ. ಆದರೆ ನಾವು ಮಾಡುವ ತಪ್ಪು ಏನೆಂದರೆ ಯಾವಾಗಲು, ಪ್ರತಿಯೊಂದು ಕಾರ್ಯದಲ್ಲೂ ಅವರು ನಮ್ಮ ಅಭಿಪ್ರಾಯ ಕೇಳಬೇಕು ಎಂದು ಬಯಸುವುದು ಮತ್ತು ನಮ್ಮ ಬಳಿ ಕೇಳದೆ ಇತರರ ಬಳಿ ಕೇಳಿದರೆ ಅವನಿಗೆ ಈಗ ನಾನು ಬೇಡ, ಅಹಂಕಾರ ಇತ್ಯಾದಿ ಎಂದು ಕೊರಗಿ ಅವನನ್ನು ದ್ವೇಷಿಸಲು ಆರಂಭಿಸುವುದು .

ಯಾವಾಗಲು ನಮ್ಮಿಂದಲೇ ಸಹಾಯ ಅಥವಾ ಅಭಿಪ್ರಾಯ ಕೇಳಿ ಯಾಕೆ ತೊಂದರೆ ಕೊಡುವುದು ಎಂದು ಅವರ ಯೋಚನೆಯೂ ಆಗಿರಬಹುದು.

ನಾವು ಸಹಾಯ ಮಾಡಿ ಅವರನ್ನು control ಮಾಡುತ್ತಿದ್ದೇವೆ ಎಂಬ ಭಾವನೆ ಬಂದರೆ ಅವರು ಮತ್ತೆ ನಮ್ಮಲ್ಲಿ ಸಹಾಯ ಕೇಳದೆ ಇರಬಹುದು.

ನಾನು ಇಲ್ಲಿ ಹೊಸದಾಗಿ ಕೆಲಸಕ್ಕೆ ಸೇರಿದಾಗ ಕೆಲಸ ಮಾಡುವಲ್ಲಿ ನನಗೆ ಒಬ್ಬರು ಬಹಳಷ್ಟು ಕಲಿಸಿ, ಹೇಗೆ ಏನು ಎಂಬುದಾಗಿ ಹೇಳಿಕೊಟ್ಟು ಸಹಾಯ ಮಾಡಿದರು, ಆದರೆ ಕ್ರಮೇಣ ಇವ ನನ್ನ ಅಡಿಯಾಳು ಇವನಿಗೆ ಎಲ್ಲಾ ಕಲಿಸಿ ಕೊಟ್ಟದ್ದೇ ನಾನು ಅನ್ನುವ ರೀತಿಯಲ್ಲಿ ನನ್ನನ್ನು ನಡೆಸಿಕೊಂಡು, ಇತರರ ಎದುರು ಅಪಹಾಸ್ಯ ಮಾಡಲು ಆರಂಭಿಸಿದಾಗ ನಾನು ನಿಧಾನವಾಗಿ ಅವರಿಂದ ದೂರವಾಗುತ್ತಾ ಬಂದೆ. ಮನಸಿನ್ನಲ್ಲಿ ನನಗೆ ಆರಂಭದಲ್ಲಿ ಕಲಿಸಿದ ಗುರು ಎಂಬ ಭಾವನೆ ಇದೆ ಆದರೆ ಈಗಿನ ವರ್ತನೆ ನನಗೆ accept ಮಾಡಲು ಆಗುತ್ತಿಲ್ಲ.. ಈಗ ಅವರು ಸಹಾಯ ಮಾಡಿದವರನ್ನು ಮರೆತಿದ್ದಾನೆ ಅಂದರೆ ಅದು ನನ್ನ ತಪ್ಪೇ!?..ಈ ತಪ್ಪನ್ನು ನಾವೂ ಅರಿವಿಲ್ಲಂದಂತೆ ಮಾಡುತ್ತಿರುತ್ತೇವೆ , ಒಮ್ಮೆ ಯೋಚಿಸಿ ನೋಡಿ...

ಎರಡನೆಯದಾಗಿ ನಮಗೆ ಅರಿವಿಲ್ಲದೆಯೇ, ನಾವು ಕೆಲವರಿಗೆ ಸಹಾಯ ಮಾಡುವುದು ಯಾಕೆಂದರೆ ಭವಿಷ್ಯದಲ್ಲಿ ನಮಗೂ ಅವರ ಸಹಾಯ ಬೇಕಾಗಬಹುದು ಎನ್ನುವ ಕಾರಣದಿಂದ ಅನ್ನುವುದು ಕಟು ಸತ್ಯ. ಅದನ್ನು ತಪ್ಪು ಎನ್ನಲಾಗದು ..ಆದರೆ ಭವಿಷ್ಯದಲ್ಲಿ ಅವರು ಸಹಾಯ ಮಾಡದೇ ಹೋದರೆ ಅಥವಾ ಮಾಡಲು ಅಸಮರ್ಥ ರಾದರೆ ನಾವು ಅವರನ್ನು ದೂಷಿಸುವುದು ತಪ್ಪಾಗುತ್ತದೆ. ಹಾಗೆ ಅಂದುಕೊಂಡರೆ ಅದು ವ್ಯಾಪಾರ ಅಲ್ಲದೆ ಮತ್ತೇನು?.

ಮೂರನೆಯದು ಅವರಿಂದ ನಮಗೆ ಯಾವುದೇ ಲಾಭ ಅಥವಾ ಪ್ರಯೋಜನ ಇಲ್ಲ,In return ನಾವೇನು ಅಪೇಕ್ಷೆ ಇಲ್ಲದೆ ಸಹಾಯ ಮಾಡುತ್ತಿರುತ್ತೇವೆ. ಅದು ಒಂದರ್ಥದಲ್ಲಿ ಸೇವೆ ಎಂದೆನಿಸುತ್ತದೆ..

ಮತ್ತೆ ಕೆಲವೊಮ್ಮೆ ಸಾಮಾಜಿಕವಾಗಿ ಮಾಡುವ ಸಹಾಯ, Donation ಇತ್ಯಾದಿ ನಿರ್ಮಲ ಮನಸ್ಸಿನಿಂದ ಕೂಡಿರುತ್ತದೆ ಮತ್ತು ಕೆಲವೊಮ್ಮೆ ನೋಡಿ ಸ್ವಾಮಿ ನಾನು ಕೇವಲ ದುಡ್ಡು ಮಾಡಿ ಕುಳಿತಿಲ್ಲ,ನಾನು ಕಂಜೂಸ್ ಅಲ್ಲ ನಮ್ಮೂರಿನ ಜಾತ್ರೆಗೆ, ದೇವಸ್ಥಾನಕ್ಕೆ,ಸಂಘ ಸಂಸ್ಥೆಗಳ ಕಾರ್ಯ ಕ್ರಮಕ್ಕೆ ನಾನೂ ಕೂಡ ಸಹಾಯ ಯಾ ದಾನ ಮಾಡಿದ್ದೇನೆ ಅನ್ನುವುದು ಇತರರಿಗೂ ತಿಳಿಯಬೇಕು ಅನ್ನುವ ಉದ್ದೇಶ ಇರುವದು ಸಹಜ ಮತ್ತು ಅನಿವಾರ್ಯ!!.

ಕೆಲವರು ನಾವು ಮಾಡಿದ ಸಹಾಯ ಮರೆತು ಬಿಡುವುದು ಇದೆ. ಕೆಲವರಿಗೆ ಬಹಳಷ್ಟು ಬಾರಿ ಸಹಾಯ ಮಾಡಿರುತ್ತೇವೆ ಆದರೆ ಒಮ್ಮೆ ಯಾವುದೋ ಕಾರಣದಿಂದ ಸಹಾಯ ಮಾಡಲು ಆಗದಿದ್ದರೆ ನಾವು ಇದುವರೆಗೆ ಮಾಡಿದ ಸಹಾಯವನ್ನು ಮರೆತುಬಿಡುತ್ತಾರೆ.

ಇನ್ನು ಕೆಲವರು legally ನಮಗೆ ಸಹಾಯ ಮಾಡಿ ಕೊನೆಗೆ in return illegal help ಕೇಳಿದಾಗ ನಾವು ನಿರಾಕರಿಸಿದರೆ ಅಲ್ಲಿಗೆ ಮುಗಿಯಿತು ನಮ್ಮನ್ನು ದ್ವೇಷಿಸಲು ಆರಂಭಿಸುತ್ತಾರೆ.

ಹೀಗೆ ಸಹಾಯದಲ್ಲಿ ಬಹಳಷ್ಟು ವಿಧ, ವಿಧಾನ ಗಳು ಇವೆ..

ನಿಮಗೆ ಇನ್ನು ವಿಚಿತ್ರ ರೀತಿಯ ಅನುಭವ ಆಗಿರಬಹುದು,ಅದನ್ನು ಕಾಮೆಂಟ್ ಮಾಡಿ ತಿಳಿಸಿ.

ಕೊನೆಯದಾಗಿ ಸಹಾಯ ಮಾಡಿ ,ಅದನ್ನು ಮರೆತು ಸುಮ್ಮನಿದ್ದರೆ ಮನಸ್ಸಿಗೆ ಬಹಳ ಹಿತ ಅನಿಸುತ್ತದೆ.

ಮಂಕು ತಿಮ್ಮನ ಕಗ್ಗ ದಂತೆ..
ಇಳೆಯಿಂದ ಮೊಳಕೆಯೊಗೆವಂದು ತಮಟೆಗಳಿಲ್ಲ ।
ಫಲ ಮಾಗುವಂದು ತುತ್ತೂರಿ ದನಿಯಿಲ್ಲ ॥
ಬೆಳಕೀವ ಸೂರ್ಯಚಂದ್ರರದೊಂದು ಸದ್ದಿಲ್ಲ ।
ಹೊಲಿ ನಿನ್ನ ತುಟಿಗಳನು - ಮಂಕುತಿಮ್ಮ.

ನಾವು ಮಾಡಿದ ಸಣ್ಣ ಸಹಾಯವನ್ನು ತಮಟೆ ಬಾರಿಸುತ್ತಾ ಬರುವ ಅಗತ್ಯ ಇಲ್ಲ... ಸಹಾಯ ವ್ಯವಹಾರ ಆಗದಿರಲಿ..

ಅಕ್ಕಿಯೊಳಗನ್ನವನು ಮೊದಲಾರು ಕಂಡವನು? ।
ಅಕ್ಕರದ ಬರಹಕ್ಕೆ ಮೊದಲಿಗನದಾರು? ॥
ಲೆಕ್ಕವಿರಿಸಿಲ್ಲ ಜಗ ತನ್ನಾದಿಬಂಧುಗಳ ।
ದಕ್ಕುವುದೆ ನಿನಗೆ ಜಸ? - ಮಂಕುತಿಮ್ಮ

ಇಂಥವರನ್ನೇ ನಮ್ಮವರು ನೆನಪಿನಲ್ಲಿ ಇಟ್ಟಿಲ್ಲ, ಇನ್ನು ನಾವು ನೀವು ಯಾವ ಲೆಕ್ಕ ಹೇಳಿ ?...

ನಮಸ್ಕಾರ 🙏
----------------
ಧೀರೇಂದ್ರ ಜೈನ್_ಮೂಡುಬಿದಿರೆ_ಇಂಗ್ಲೆಂಡ್
#ಧೀರ_ಮಾತು

08/08/2023

🦉 🦉 🦉..
ಗೂಬೆ ತರಹ ಕೂತಿದ್ದಿಯಲ್ಲ, ದೊಡ್ಡ ಗೂಬೆ ನೀನು ಅಂತ ನಾವು ಬಯ್ಯುತ್ತೇವೆ ಅಲ್ವಾ, ಇಲ್ಲಿ ನೋಡಿ ಗೂಬೆಯನ್ನೂ ಎಷ್ಟು ಪ್ರೀತಿಯಿಂದ ಸಾಕುತ್ತಾರೆ.
ಗೂಬೆ ಗಳು ಕೂಡ ಕ್ಯೂಟ್❤️ ಆಗಿರುತ್ತವೆ ಅಂತ ಮೊನ್ನೆ ಗೊತ್ತಾಯಿತು. ಇನ್ನು ಯಾರಾದ್ರೂ ಗೂಬೆ ಅಂದ್ರೆ ಬೇಸರ ಪಟ್ಟುಕೊಳ್ಳಬೇಡಿ.🤩🤩
ಕೈಯಲ್ಲಿ ಗೂಬೆಯನ್ನು ಹಿಡಿದು ಮಗನಿಗೂ ಅಪ್ಪನ ಹಾಗೆ ಬಹಳ ಧೈರ್ಯ ಅಂತ ಒಂದು ಫೋಟೋಗೆ ಫೋಸ್ ಕೊಟ್ಟು ನಿರೂಪಿಸಿ ಆಯಿತು 😜😂

#ಧೀಮನ್

🦉

31/03/2023

I've received 200 reactions to my posts in the past 30 days. Thanks for your support. 🙏🤗🎉

26/03/2023

⭕ಧೀರ ಮಾತು -9 ⭕

⭕ಸಮಯ ಬದಲಾವಣೆ:⭕

ಊರಿಗೆ ಬಂದಾಗ ಬಹಳಷ್ಟು ಜನ ಭಾರತ ಹಾಗೂ ಇಂಗ್ಲೆಂಡ್ ಗೆ ಎಷ್ಟು ಸಮಯ ವ್ಯತ್ಯಾಸ ಇದೆ ಎಂದು ಕೇಳುವಾಗ ನಾನು ಈಗ 5:30 ಗಂಟೆ, ಮುಂದಿನ ತಿಂಗಳಿನಿಂದ 4:30 ಗಂಟೆ ವ್ಯತ್ಯಾಸ ಅಂದಾಗ, ಹೆಚ್ಚಿನ ಎಲ್ಲರೂ ಎಂಥ ಮಾರಾಯ ಅಂದವರೇ... ಅದು ಹೇಗೆ ಸಮಯ ಬದಲಾಗುತ್ತದೆ ಎಂದು ಎಲ್ಲರ ಪ್ರಶ್ನೆ...!!??
ಹೌದು ಇಲ್ಲಿ ಸಮಯ ಸುಮಾರು ಆರು ತಿಂಗಳಿಗೊಮ್ಮೆ ಬದಲಾಗುತ್ತದೆ...ಬದಲಾಯಿಸಲಾಗುತ್ತದೆ .. ನನಗೂ ಇಂಗ್ಲೆಂಡ್ ಗೆ ಬರುವ ಮೊದಲು ಇದರ ಬಗ್ಗೆ ತಿಳಿದಿರಲಿಲ್ಲ.

ನಾನು ಈ ಲೇಖನ ಬರೆಯಲು ಆರಂಭಿಸಿದಾಗ (25 ಮಾರ್ಚ್ 2023) ಇಲ್ಲಿ ಮಧ್ಯಾಹ್ನ 1ಗಂಟೆ, ಭಾರತದಲ್ಲಿ ಈಗ ಸಂಜೆ 6:30.... 😇

ಇಂದು ರಾತ್ರಿ (26 ಮಾರ್ಚ್) 1 ಗಂಟೆಗೆ ಸಮಯವನ್ನು 1 ಗಂಟೆ ಮುಂದೂಡಲಾಗುತ್ತದೆ. ಅಂದರೆ ಮಧ್ಯರಾತ್ರಿ 12ಗಂಟೆ ಯ ನಂತರ ಒಂದು ಗಂಟೆ ಆಗುವ ಬದಲು 2 ಗಂಟೆ ಆಗುತ್ತದೆ.ಈ ವರ್ಷ October 29 ರಂದು ಮತ್ತೆ ಸಮಯವನ್ನ ಒಂದು ಗಂಟೆ ಹಿಂದೆ ಹಾಕುತ್ತಾರೆ.

ಎಲೆಕ್ಟ್ರಾನಿಕ್ ಅಥವಾ ಡಿಜಿಟಲ್ ಗಡಿಯಾರ, ಮೊಬೈಲ್ ಇತ್ಯಾದಿಗಳಲ್ಲಿ ಆಟೋಮ್ಯಾಟಿಕ್ ಆಗಿ ಸಮಯ ಬದಲಾಗುತ್ತದೆ, ಇತರ ಗಡಿಯಾರ ಗಳಲ್ಲಿ ಸಮಯವನ್ನು ನಾವೇ ಸರಿ ಮಾಡಬೇಕು.

ನಮಗೆಲ್ಲ ತಿಳಿದಂತೆ, ಇಲ್ಲಿ summer Season ನಲ್ಲಿ ಬೆಳಕು (Day light) ಜಾಸ್ತಿ, ನಾಳೆಯಿಂದ ಮುಂಜಾನೆ ಬೇಗ ಬೆಳಕಾಗಿ ರಾತ್ರಿ 8 ಗಂಟೆ ವರೆಗೆ Day light ಇದ್ದು, ಕ್ರಮೇಣ ಜಾಸ್ತಿಯಾಗುತ್ತಾ summer Season ನಲ್ಲಿ ರಾತ್ರಿ 10ಗಂಟೆಯ ವರೆಗೆ ಬೆಳಕಿರುತ್ತದೆ. ಮತ್ತೆ ಚಳಿಗಾಲದಲ್ಲಿ day light ಕಡಿಮೆ ಆಗುತ್ತಾ ಬಂದು ಸಂಜೆ 3 ಅಥವಾ 4 ಗಂಟೆಗೆ ಕತ್ತಲಾಗಿ ಬಿಡುತ್ತದೆ.. ಒಟ್ಟಾಗಿ ಸುಮಾರು 6ತಿಂಗಳು ಬೇಸಿಗೆ ಕಾಲದಲ್ಲಿ ಹಗಲು ಜಾಸ್ತಿ, 6 ತಿಂಗಳು ಚಳಿಗಾಲದಲ್ಲಿ ರಾತ್ರಿ ಅಥವಾ ಕತ್ತಲು ಜಾಸ್ತಿ.ಹಾಗಾಗಿ day light ನ ಸದುಪಯೋಗಕ್ಕಾಗಿ ಈ ರೀತಿಯ ವ್ಯವಸ್ಥೆಯನ್ನು ಮಾಡಲಾಗಿದೆ.

" Spring forward,fall back " In spring, the clocks go forward one hour and British Summer Time begins. In autumn (fall), the clocks go back as British Summer Time comes to an end and the UK reverts back to Greenwich Mean Time (GMT).

ವಸಂತಕಾಲದಲ್ಲಿ ಗಡಿಯಾರಗಳು ಒಂದು ಗಂಟೆ ಮುಂದಕ್ಕೆ ಹೋಗುತ್ತವೆ ಮತ್ತು ಬ್ರಿಟಿಷ್ ಬೇಸಿಗೆ ಸಮಯ ಪ್ರಾರಂಭವಾಗುತ್ತದೆ. ಶರತ್ಕಾಲದಲ್ಲಿ ಬ್ರಿಟಿಷ್ ಬೇಸಿಗೆ ಸಮಯವು ಅಂತ್ಯಗೊಳ್ಳುತ್ತಿದ್ದಂತೆ ಗಡಿಯಾರಗಳು ಹಿಂತಿರುಗುತ್ತವೆ ಮತ್ತು UK ಮತ್ತೆ ಗ್ರೀನ್ವಿಚ್ ಸಮಯಕ್ಕೆ (GMT) ಹಿಂತಿರುಗುತ್ತದೆ.

ಡೇಲೈಟ್ ಸೇವಿಂಗ್ ಟೈಮ್ (Day light Saving time)ಎಂದೂ ಕರೆಯಲ್ಪಡುವ ಬ್ರಿಟಿಷ್ ಬೇಸಿಗೆ ಸಮಯವು William Willet ಎಂಬ ವ್ಯಕ್ತಿಯ ಆಲೋಚನೆ . ಅವರು "The waste of day light" ಎಂದು ಬಹಳ ಆಂದೋಲನಗಳನ್ನು ನಡೆಸಿ ಸರಕಾರದ ಗಮನ ಸೆಳೆದರು.ಅಂತಿಮವಾಗಿ 17ನೇ ಮೇ 1916 ರಂದು UK ನಲ್ಲಿ ಬೇಸಿಗೆ ಕಾಲ ಕಾಯಿದೆಯನ್ನು ಅಂಗೀಕರಿಸಿದರು.

ದುಃಖಕರವೆಂದರೆ ವಿಲಿಯಂ ವಿಲೆಟ್ 1915 ರಲ್ಲಿ ಜ್ವರದಿಂದ ನಿಧನರಾದರು ಮತ್ತು ಅವರ ಹಗಲು ಉಳಿಸುವ ಕಲ್ಪನೆಗಳು ಕಾನೂನಾಗುವುದನ್ನು ನೋಡಲು ಅವರಿರಲಿಲ್ಲ 😞..ಪೆಟ್ಸ್ ವುಡ್ನಲ್ಲಿ ಅವರ ಸ್ಮರಣಾರ್ಥ ಸ್ಮಾರಕ ನಿರ್ಮಿಸಲಾಗಿದೆ.

ಇಂದಿನಿಂದ ಇಲ್ಲಿ ಹಗಲು ಹೆಚ್ಚು, ಚಳಿ ಕ್ರಮೇಣ ಕಡಿಮೆ ಆಗುತ್ತದೆ ಎನ್ನುವುದು ಸಂತೋಷ,ಈ ಬಾರಿ ಬೇಸಗೆಯಲ್ಲಿ ಆದಷ್ಟು ಹೊಸ ಹೊಸ ಜಾಗಗಳಿಗೆ ತೆರಳಬೇಕು, ಅಲ್ಲಿನ ಬಗ್ಗೆ ನಿಮ್ಮೊಂದಿಗೆ ಮಾಹಿತಿ ಹಂಚಿಕೊಳ್ಳಬೇಕು ..🥰🙏

ನೋಡೋಣ . 👍

ಧನ್ಯವಾದಗಳು. 🙏

ಧೀರೇಂದ್ರ ಜೈನ್.

#ಧೀರಮಾತು
.

15/03/2023

#ಧೀರಮಾತು - 8.

ಡ್ರೈವಿಂಗ್ ಲೈಸೆನ್ಸ್ 😇

ಒಂದು ಕೈ ಸ್ಟೇರಿಂಗ್ ಮೇಲೆ , ಒಂದು ಕೈ ಗೇರ್ ಮೇಲೆ ಇಟ್ಟು ನನ್ನ ಹಳೆಯ ford Icon ಕಾರ್ ನಲ್ಲಿ ಬೇಕಾಬಿಟ್ಟಿ ತಿರುಗಾಡುತ್ತಿದ್ದ ನಾನು, ಒಬ್ಬ ಉತ್ತಮ ಡ್ರೈವರ್ ಎಂಬ ನನ್ನ ಅಹಂನ್ನು ಒಂದೇ ಕ್ಷಣಕ್ಕೆ ಇಳಿಸದವರು England ನ ನನ್ನ ಡ್ರೈವಿಂಗ್ instructor Paul..🥺

ಹೌದು... ನಾವು England ನಲ್ಲಿ ಭಾರತದ driving licence ನಲ್ಲಿ ಒಂದು ವರ್ಷ ಕಾರ್ ಓಡಿಸಬಹುದು, ನಂತರ ಇಲ್ಲಿಯ ಡ್ರೈವಿಂಗ್ ಲೈಸೆನ್ಸ್ ಬೇಕು. ಇಲ್ಲಿಗೆ ಬಂದ ಒಂದು ವರ್ಷ ನಾನು ಕಾರು ಕೊಳ್ಳಲಿಲ್ಲ ಹಾಗಾಗಿ ಕಾರ್ ಓಡಿಸಿರಲಿಲ್ಲ.ಕೆಲವು ವೈಯಕ್ತಿಕ commitments ಮುಗಿದ ನಂತರ ನನಗೂ ಇಲ್ಲಿ ಕಾರ್ ಬೇಕು, ಡ್ರೈವಿಂಗ್ ಲೈಸೆನ್ಸ್ ಬೇಕು ಎಂದಾಯಿತು. ಹಲವು ಗೆಳೆಯರು ಇಲ್ಲಿ ಸುಲಭದಲ್ಲಿ ಲೈಸೆನ್ಸ್ ಸಿಗುವುದಿಲ್ಲ ಅಂದಿದ್ದರು.online ಮುಖಾಂತರ provisional ಲೈಸೆನ್ಸ್ ಗೆ ಅರ್ಜಿ ಹಾಕಿದೆ,practical ಟೆಸ್ಟ್ ನ ಮೊದಲು theory test , ಅದಕ್ಕೆ ತಯಾರಾಗಲು ಹಲವು app ಗಳು ಇವೆ,ನನ್ನ ಒಬ್ಬ ಗೆಳೆಯ theory test ಅಲ್ಲಿ ಫೇಲ್ ಆಗಿದ್ದ,theory test ಅಲ್ಲಿ ಫೇಲ್ ಆದರೆ ಮರ್ಯಾದಿ ಇಲ್ಲ ಅಂದುಕೊಂಡು, ಚೆನ್ನಾಗಿ ಓದಿ, ಪರೀಕ್ಷೆಯಲ್ಲಿ ಪುಣ್ಯಕ್ಕೆ Just pass ಆದೆ. 😇

ಮರುದಿನವೇ Practical Driving test ಗೆ online ಮುಖೇನ Book ಮಾಡಿದೆ,4 ತಿಂಗಳು ನಂತರದ date ಸಿಕ್ಕಿತು,ಪ್ರಾಕ್ಟಿಕಲ್ test ಗೆ ಡೇಟ್ ಸಿಗಲು ಹಲವು ತಿಂಗಳು ಕಾಯಬೇಕು, ಆದರೆ ದಿನವೂ website ನಲ್ಲಿ search ಮಾಡುತ್ತಾ, ಬೇರೆಯವರು ಟೆಸ್ಟ್ cancel ಮಾಡಿದಾಗ ಸಿಗುವ ದಿನಕ್ಕೆ ನಮ್ಮ ಪರೀಕ್ಷೆಯನ್ನು prepone ಮಾಡಬಹುದು. Practical Driving test ಗೆ ಮೊದಲು driving instructor ಹುಡುಕುವುದು, ನಮ್ಮ ಸಮಯಕ್ಕೆ ಹೊಂದುವಂತೆ ಕ್ಲಾಸ್ ಪಡೆಯುವುದು ದೊಡ್ಡ ಕೆಲಸ, ಆಗ ನನಗೆ ಸಿಕ್ಕಿದವರು ಪೌಲ್ .

Provisional ಲೈಸೆನ್ಸ್ ಇದ್ದರೆ, ನಮ್ಮ ಕಾರಿನಲ್ಲಿ certified instructor ನ ಮೂಲಕ ಡ್ರೈವಿಂಗ್ ಕಲಿಯಬಹುದು, ಅಥವಾ 3 ವರ್ಷ ಅಥವಾ ಅದಕ್ಕಿಂತ ಹೆಚ್ಚು ಕಾಲ ಇಲ್ಲಿಯ ಲೈಸೆನ್ಸ್ ಇರುವವರನ್ನು ಕೂರಿಸಿ ನಾವು ಕಾರ್ ಓಡಿಸಬಹುದು.

ನನ್ನಲ್ಲಿ ಕಾರ್ ಇರದ ಕಾರಣ,paul ನ ಕಾರಲ್ಲಿ driving ತರಬೇತಿ ಪಡೆದುಕೊಂಡೆ, ಡ್ರೈವಿಂಗ್ ಗೊತ್ತಿದ್ದರೂ ಇಲ್ಲಿಯ ರೂಲ್ಸ್ ಕಲಿಯಲು ತರಬೇತಿ ಅತೀ ಅಗತ್ಯ. ಮೊದಲ ದಿನವೇ,ನಾನು ಸ್ಟೇರಿಂಗ್ ಹಿಡಿಯುವ ರೀತಿ, ತಿರುಗಿಸುವ ಶೈಲಿಯನ್ನು ಸರಿಪಡಿಸಿ, ಇಲ್ಲಿಯ ರಸ್ತೆಯ ನಿಯಮಗಳನ್ನು ಕಲಿಸಿದರು, 2 session ತರಬೇತಿ ಸಾಕು ಎಂದು ಯೋಚಿಸಿದ್ದ ನಾನು ಇನ್ನೂ ಕಲಿಯಲು ಬೇಕಾದಷ್ಟಿದೆ ಎಂದು ಆ ದಿನವೇ ನನ್ನ ಅರಿವಿಗೆ ಬಂದು, ಒಟ್ಟು 6 Session ತರಬೇತಿ ಪಡೆದೆ. 2 ಗಂಟೆಯ ಒಂದು session ತರಬೇತಿಗೆ 70ಪೌಂಡ್ (ಸುಮಾರು 7,000 ರೂಪಾಯಿಗಳು). 😇

ಮುಖ್ಯವಾಗಿ, ಡ್ರೈವಿಂಗ್ ಟೆಸ್ಟ್ , ಸುಮಾರು 40 ನಿಮಿಷ ಇರುತ್ತದೆ, ಕಾರ್ ಓಡಿಸುವ ಮೊದಲು TELL ME ಪ್ರಶ್ನೆಗಳನ್ನು ಕೇಳುತ್ತಾರೆ, ಉದಾ: ಕಾರಿನ ಬ್ರೇಕ್ ಸರಿ ಇದೆ ಎಂದು ಹೇಗೆ ತಿಳಿಯುತ್ತದೆ .....ಇತ್ಯಾದಿ .ನಂತರ ಸ್ವಲ್ಪ ಹೊತ್ತು Navigation ಹಾಕಿ ಅಥವಾ Signboards ನೋಡಿ ನಿರ್ದಿಷ್ಟ ಸ್ಥಳಕ್ಕೆ ಹೋಗಲು ಹೇಳುತ್ತಾರೆ. ಇದಕ್ಕೆ independent Driving ಅನ್ನುತ್ತಾರೆ. ಇದಾದ ನಂತರ examiner ಹೇಳಿದಂತೆ Driving ಮಾಡಬೇಕು, ಆ ಸಮಯದಲ್ಲಿ SHOW ME ಪ್ರಶ್ನೆಗಳನ್ನು ಕೇಳುತ್ತಾರೆ, ಉದಾ:How will you wash and clean and windscreen.?...

ಇದರೊಂದಿಗೆ forward or reverse bay Parking , parallel parking , emergency stop , ರಸ್ತೆಯ ಬಲ ಅಥವಾ ಎಡ ಬದಿಯಲ್ಲಿ ನಿಲ್ಲಿಸು ಇತ್ಯಾದಿಗಳನ್ನು ಮಾಡಿಸುತ್ತಾರೆ. ಡ್ರೈವಿಂಗ್ test ಮುಗಿದ ತಕ್ಷಣವೇ ಪಾಸ್ ಅಥವಾ ಫೇಲ್ ಹೇಳುತ್ತಾರೆ.
ವಾಹನ ಚಲಾಯಿಸುವಾಗ ಪ್ರತಿ ಸಣ್ಣ ವಿಷಯವೂ ಕೂಡ ಬಹಳ ಮುಖ್ಯ. ನಿಂತ ಸ್ಥಳದಿಂದ ವಾಹನ ಚಲಾಯಿಸುವ ಮೊದಲು ಸುತ್ತಲೂ ಕಣ್ಣ್ ಹಾಯಿಸಿ safe ಆದರೆ ಮಾತ್ರ ಮುಂದಕ್ಕೆ ಚಲಿಸುವುದು, ಮಿರರ್ ಚೆಕ್ ಮಾಡಿ signal ಹಾಕುವುದು,ಪಾದಚಾರಿಗಳಿಗೆ ಗೌರವ ಕೊಡುವುದು, ಕನಿಷ್ಠ ಅಥವಾ ಗರಿಷ್ಠ ಸ್ಪೀಡ್ ಲಿಮಿಟ್ ಇದ್ದ ಜಾಗದಲ್ಲಿ ಅದಕ್ಕೆ ತಕ್ಕಂತೆ ವಾಹನ ಚಲಾಯಿಸುವುದು ಹೀಗೆ ಪಟ್ಟಿ ದೊಡ್ಡದಿದೆ.

ಪರೀಕ್ಷೆಯಲ್ಲಿ ಒಟ್ಟು 15 ಸಣ್ಣ ತಪ್ಪುಗಳನ್ನು (ಮೈನರ್ errors ) ಮಾಡಬಹುದು,ಒಂದು major ತಪ್ಪು ಮಾಡಿದರೂ ಫೇಲ್. ನಾವು ಮಾಡಿದ ಒಂದು minor mistake ಇತರ ವಾಹನ ಚಾಲಕರಿಗೆ ತೊಂದರೆ ಆದರೆ ಆ ಮೈನರ್ mistake ಅನ್ನು ಮೇಜರ್ mistake ಎಂದು ಪರಿಗಣಿಸಲಾಗುತ್ತದೆ.

ನಾವು Manual ಕಾರ್ ನಲ್ಲಿ ಟೆಸ್ಟ್ ನೀಡಿದರೆ, ನಾವು ಆಟೋಮ್ಯಾಟಿಕ್ ಕಾರ್ ಕೂಡ ಓಡಿಸಬಹುದು, ಆದರೆ ಆಟೋಮ್ಯಾಟಿಕ್ ಕಾರ್ ನಲ್ಲಿ ಟೆಸ್ಟ್ ನೀಡಿದರೆ manual ಕಾರ್ ಓಡಿಸಲು ಲೈಸೆನ್ಸ್ ಇಲ್ಲ. ಇದರೊಂದಿಗೆ ವಿಶೇಷವಾಗಿ ನಾವು ಓಡಿಸುವ ಕಾರಿಗೆ ಇನ್ಸೂರೆನ್ಸ್ ಕಡ್ಡಾಯ, ಒಂದು ವೇಳೆ ಬೇರೆಯವರ ಕಾರ್ ಓಡಿಸುವುದಾದರೆ ಕೂಡ ನಾವು ಅದಕ್ಕೂ ಇನ್ಸೂರೆನ್ಸ್ ಮಾಡಿಸಬೇಕು. ಉದಾ: ಒಂದು ಅರ್ಧ ದಿನದ ಮಟ್ಟಿಗೆ ನನ್ನ ಗೆಳೆಯನ ಕಾರ್ ಓಡಿಸಬೇಕಾದರೆ ನಾನು ಅರ್ಧ ದಿನಕ್ಕೆ ಇನ್ಸೂರೆನ್ಸ್ ಮಾಡಿಸಬೇಕು,ಗೆಳೆಯ ಬಿಡಿ ನನ್ನ ಹೆಂಡತಿ ನನ್ನ ಕಾರ್ ಓಡಿಸಬೇಕಾದರೆ ಅವಳು ಕೂಡಾ ಬೇರೆ insurance ಮಾಡಿಸುವುದು ಕಡ್ಡಾಯ.

ನನ್ನ ಪರೀಕ್ಷೆಯನ್ನು prepone ಮಾಡಿ December ಎರಡನೇ ವಾರ,ಬಹಳ ಧೈರ್ಯದಿಂದ ಟೆಸ್ಟ್ ಅಟೆಂಡ್ ಆದೆ, ಪಾಸ್ ಆಗಬಹುದು ಎಂಬ ಧೈರ್ಯ ದಿಂದ ಟೆಸ್ಟ್ ನ ಒಂದು ವಾರ ಮೊದಲೇ ಒಂದು ಸೆಕೆಂಡ್ ಹ್ಯಾಂಡ್ ಕಾರು ಖರೀದಿಸಿದೆ. ಆದರೆ ಮೊದಲ ಪ್ರಯತ್ನದಲ್ಲಿ ನಾನು ಫೇಲ್ ಆಗಿದ್ದೆ. Examiner ಹೇಳುವ ತನಕ ನಾನು ಯಾಕಾಗಿ ಫೇಲ್ ಆದೆ ಎಂದು ನನಗೆ ತಿಳಿದಿರಲಿಲ್ಲ, ಎಲ್ಲವೂ ಸರಿ ಆಗಿತ್ತು ಅಂದು ಕೊಂಡಿದ್ದೆ. ರಸ್ತೆಯಲ್ಲಿ ಸಾಗುವಾಗ ಸ್ವಲ್ಪ ಮುಂದಕ್ಕೆ ಎಡಕ್ಕೆ ತಿರುಗು ಎಂದು examiner ಹೇಳಿದರು, ನಾನು ಮಿರರ್ ಚೆಕ್ ಮಾಡಿ,ಸಿಗ್ನಲ್ ಕೊಟ್ಟು ಎಡಕ್ಕೆ ತಿರುಗಿಸಿ ಹೋಗಿದ್ದೆ, ಆದರೆ ಎಡಕ್ಕೆ ತಿರುಗುವಾಗ ಅಲ್ಲಿ ಒಂದು ಸ್ಲಿಪ್ ರೋಡ್ ಇತ್ತು, ನೀನು ಸ್ಲಿಪ್ ರೋಡ್ಗೆ 15ಮೀಟರ್ ಲೇಟ್ ಆಗಿ ಸೇರಿಕೊಂಡೆ ಹಾಗಾಗಿ ನಿನ್ನನ್ನು ಫೇಲ್ ಮಾಡುತ್ತಿದ್ದೇನೆ,ಐಯಾಮ್ sorry ಅಂದರು ನನ್ನ examiner. 😭.. ಅಯ್ಯೋ ದೇವರೇ ಇಷ್ಟು ಸಣ್ಣ ತಪ್ಪಿಗೆ ಫೇಲ್ ಮಾಡಿ ಬಿಟ್ರಲ್ಲ ಅಂದುಕೊಂಡರೂ,serious fault ಮಾಡಿಲ್ಲ ನಾನು ಎಂದು ಸಮಾಧಾನಿಸಿಕೊಂಡೆ. ನನ್ನ ಹಲವಾರು ಪರಿಚಿತರು ಹೀಗೆಯೇ ಸಣ್ಣ ಸಣ್ಣ ತಪ್ಪಿಗಾಗಿ 3-4 ಬಾರಿ ಫೇಲ್ ಆದವರು, ಮೊದಲ ಪ್ರಯತ್ನದಲ್ಲಿ ಪಾಸ್ ಆದವರು ಬಹಳ ವಿರಳ. Correcting simple mistakes makes us perfect,but perfection is not a simple thing...isn't it ?..

ಮತ್ತೂಮ್ಮೆ ಡ್ರೈವಿಂಗ್ ಟೆಸ್ಟ್ ಬುಕ್ ಮಾಡಿದೆ,5 ತಿಂಗಳು ಬಿಟ್ಟು, ಅಂದರೆ ಮೇ ತಿಂಗಳ ದಿನಾಂಕ ಸಿಕ್ಕಿತು, ದಿನವೂ website search ಮಾಡಿದರೆ,pre -pone ಮಾಡಿಕೊಳ್ಳಬಹುದು ಎಂಬ ಧೈರ್ಯ ಇತ್ತು.

Paul ನಿವೃತ್ತಿಯಾದ ಕಾರಣ, ನಾನು ಇನ್ನೊಬ್ಬ instructor ಅನ್ನು ಹುಡುಕಿ , ಡ್ರೈವಿಂಗ್ ಕ್ಲಾಸ್ ಬುಕ್ ಮಾಡಿಕೊಂಡೆ, ಈ ಬಾರಿ ನನ್ನ ಕಾರ್ ಇದ್ದ ಕಾರಣ, ನನ್ನ ಕಾರ್ ನಲ್ಲಿಯೇ ಕ್ಲಾಸ್ ತೆಗೆದುಕೊಂಡರು , ಹಾಗಾಗಿ 2 ಗಂಟೆಯ ಒಂದು session ಗೆ 50 ಪೌಂಡ್ ಫೀಸ್. ಅವರಲ್ಲಿ ಎರಡು session ತರಬೇತಿ ಪಡೆದೆ. ಜನವರಿ ಕೊನೆಯ ವಾರ ಊರಿಗೆ ಹೋಗುವವನಿದ್ದ ನಾನು ಅದರ ಮೊದಲು ಟೆಸ್ಟ್ ಪಾಸ್ ಆಗಬೇಕು ಎಂಬ ಹಠ ನನ್ನಲ್ಲಿ, ಹಾಗಾಗಿ ಪ್ರತೀ ದಿನ YouTube videos ನೋಡಿ ಸಾಕಷ್ಟು ತಯಾರಿ ನಡೆಸಿದೆ. ನನ್ನ ಪುಣ್ಯಕ್ಕೆ ಯಾರೋ ಟೆಸ್ಟ್ ಕ್ಯಾನ್ಸಲ್ ಮಾಡಿದ ಕಾರಣ, ಜನವರಿಗೆ ನನ್ನ ಟೆಸ್ಟ್ Prepone ಮಾಡಿಸಿಕೊಂಡೆ. ಈ ಬಾರಿ ನಾನು ಪಾಸ್ ಆಗಿದ್ದೆ 🥰. ಅಬ್ಬಾ ದೇವರೇ ಡ್ರೈವಿಂಗ್ ಲೈಸೆನ್ಸ್ ಪಡೆಯವುದು ಒಂದು ಮಹಾ ಸಾಧನೆ ಅನಿಸಿತು.

ಇಲ್ಲಿ ಪಬ್ಲಿಕ್ transport ಬಹಳ ದುಬಾರಿ, ನಮ್ಮ ಊರಿನ ಹಾಗೆ ಗಲ್ಲಿ ಗಲ್ಲಿಗೆ, ಕರೆದಾಗ ಬರುವ ಆಟೋ ಇಲ್ಲ, ಹಾಗಾಗಿ ಕಾರ್ ಬಹಳ ಅವಶ್ಯ, Car is not for luxury,it's a basic need here . 👍

ಪಾಸ್ ಆದ 5 ದಿನದಲ್ಲಿ ಊರಿಗೆ ಬಂದಿದ್ದೆ, ಈಗ ಮರಳಿ ಬಂದ ನಂತರ ಬಹಳ ಖುಷಿಯಿಂದ ಕಾರ್ ಓಡಿಸುತಿದ್ದೇನೆ. ಇಡೀ ಇಂಗ್ಲೆಂಡ್ ಸುತ್ತಬೇಕು, ಇಲ್ಲಿನ ವಿಶೇಷಗಳನ್ನು ನಿಮ್ಮೊಂದಿಗೆ ಹಂಚಿಕೊಳ್ಳಬೇಕು ಎಂಬ ಮನಸ್ಸಿದೆ.. ನೋಡೋಣ.. 🙏

ಧನ್ಯವಾದಗಳು. 🙏🙏🙏

ಧೀರೇದ್ರ ಜೈನ್.

10/03/2023

Snow ❄️ Fall .


VC: Harsh*tha Suvarna

10/03/2023

#ಧೀರಮಾತು - 7
Dheera Maathu 👍🙏

ಇಂಗ್ಲೆಂಡ್ ನಲ್ಲಿ ನಾನಿರುವ ಸ್ಥಳದಲ್ಲಿ ಮೊನ್ನೆ Snow fall ಆಗಿತ್ತು, ಮನೆಯ ಮೇಲೆ, ರಸ್ತೆ, ವಾಹನಗಳ ಮೇಲೆ ಎಲ್ಲಾ ದಟ್ಟವಾದ ಹಿಮ ಬಿದ್ದಿತ್ತು..
ನಿನ್ನೆ ಇಲ್ಲಿ ಜೋರು ಮಳೆ, ಮಳೆಗೆ ಡ್ರೈವಿಂಗ್ ಮಾಡುವುದು ಕಷ್ಟವಾಗಿತ್ತು...
ಇಂದು ಮುಂಜಾನೆ ಚಳಿ ಇದ್ದು, ಈಗ ಸೂರ್ಯ ಮೇಲೆ ಬಂದು ಬಿಸಿಲು.!!!...
ಇದು ಪ್ರಕೃತಿಯ ವೈಶಿಷ್ಟ, ವೈಜ್ಞಾನಿಕ ಕಾರಣಗಳು ಏನೇ ಇರಲಿ, ನಾನು ಬೇರೆ ರೀತಿಯಲ್ಲಿ ಯೋಚಿಸುತ್ತೇನೆ..
ಕಷ್ಟ-ಸುಖ, ನೋವು - ನಲಿವು, ಲಾಭ - ನಷ್ಟ ಯಾವುದೂ ಶಾಶ್ವತವಲ್ಲ.
ಈ ದಿನ ತೊಂದರೆ ಇದೆ ಎಂದು ಕೊರಗದೆ, ಶ್ರದ್ದೆಯಿಂದ ದುಡಿದರೆ ನಾಳೆ ಸುಖವಾಗಿ ಬಾಳಬಹುದು.
ಈ ದಿನ ಬೇಕಾದಷ್ಟು ಶ್ರೀಮಂತಿಕೆ ಇದೆ ಎಂದು ಅಹಂಕಾರದಿಂದ ವರ್ತಿಸಿದರೆ ನಾಳೆ ಬೀದಿಗೆ ಬರಬಹುದು.

ನಗುವೊಂದು ರಸಪಾಕ ಅಳುವೊಂದು ರಸಪಾಕ
ನಗುವಾತ್ಮ ಪರಿಮಳವ ಪಸರಿಸುವ ಕುಸುಮ |
ದುಗುಡವಾತ್ಮವ ಕಡೆದು ಸತ್ವವೆತ್ತುವಮಂತು
ಬಗೆದೆರಡನುಂ ಭುಜಿಸು ಮಂಕುತಿಮ್ಮ ||
ಎಂಬ ಮಂಕುತಿಮ್ಮನ ಕಗ್ಗ ದ ಸಾಲಿನಂತೆ ಜೀವನ ಎಂದರೆ ಕಷ್ಟ ಸುಖ ಗಳು ಇದ್ದದ್ದೇ, ಎರಡನ್ನೂ ಸಮಾನವಾಗಿ ಸ್ವೀಕರಿಸಿ, ಅನುಭವಿಸಿದರೆ ಬದುಕು ಸುಂದರ..
ಏನಂತೀರಿ?...
ಧನ್ಯವಾದಗಳೊಂದಿಗೆ.
ಧೀರೇದ್ರ ಜೈನ್.

#ಧೀರಮಾತು
#ಧೀರೇಂದ್ರಜೈನ್

09/03/2023

03/03/2023

#ಧೀರಮಾತು - 6

ಊರಿಗೆ ಬಂದಾಗ ಪ್ರೀತಿ ತೋರಿದವರು ಬಹಳಷ್ಟು ಮಂದಿ... ಆದರೆ ಇವನ ಪ್ರೀತಿಗೆ ಬೆಲೆ ಕಟ್ಟುವುದು ಹೇಗೆ?..

ಮೋತಿ ನಮ್ಮ ಮನೆಯ ಪ್ರೀತಿಯ ಶ್ವಾನ, ನಮ್ಮ ಮನೆಯ ಯಾವ bike, ಕಾರ್, ರಿಕ್ಷಾ ಹೋದರೂ ಬೊಗಳುತ್ತಾ ಜೋರು ಮಾಡುವವನು. ಮನೆಯವರು ಎಷ್ಟು ಬೈದರೂ ಸುಮ್ಮನಿರುತ್ತಾನೆ .

ನಾವು ಮೂರು ಸಹೋದರರು ಮನೆಗೆ ಬರುವಾಗ, ನಮ್ಮ ವಾಹನಗಳ ಶಬ್ದವನ್ನು ದೂರದಿಂದಲೇ ಗ್ರಹಿಸಿ, ಓಡಿ ಬಂದು ನಮ್ಮ ಹಿಂದೆ ಬರುವುದು , ತೋಟಕ್ಕೆ ಹೋಗುವಾಗ ನಮ್ಮ ಹಿಂದೆ ಬರುವುದು ಅವನಿಗೆ ಅಭ್ಯಾಸ.

ಸುಮಾರು ಒಂದು ವರ್ಷ ಮೂರು ತಿಂಗಳ ಬಳಿಕ ಇಂಗ್ಲೆಂಡ್ ನಿಂದ ಊರಿಗೆ ಬಂದು , ಮನೆಯ ಗೇಟ್ ತೆಗೆದು ಅಂಗಳಕ್ಕೆ ಕಾಲಿಟ್ಟ ಕೂಡಲೇ ಓಡಿ ಬಂದು,ನನ್ನ ಮೇಲೆ ಹಾರಿ ತನ್ನ ಕಾಲುಗಳನ್ನು ನನ್ನ ಎದೆಯ ಮೇಲಿಟ್ಟು, ವಿಚಿತ್ರ ಸ್ವರದೊಂದಿಗೆ ಬೊಗಳಿ,ನನ್ನ ಸುತ್ತ ಬಾಲ ಅಲ್ಲಾಡಿಸುತ್ತಾ ಅವನು ವರ್ತಿಸಿದ ರೀತಿ ನೋಡಿ ನನಗೇ ಆಶ್ಚರ್ಯ, ಅವನ ಪ್ರೀತಿಯನ್ನು ಹಾಗೂ ಅದನ್ನು ವ್ಯಕ್ತಪಡಿಸಿದ ರೀತಿ ಕಂಡು ಎಲ್ಲರೂ ಭಾವುಕರಾದೆವು.

ರಾತ್ರಿ ನನ್ನ ಹೆಂಡತಿ "ಮೋತಿ ನಿಮ್ಮನ್ನು ಮರೆತಿಲ್ಲ ಅಲ್ವಾ,ಅವನ ವರ್ತಿಸಿದ ರೀತಿ ಕಂಡು ನಾನು ಕಣ್ಣೀರಾಗಿ ಬಿಟ್ಟೆ". ಎಂದಳು.ನಾನು ಹೂಂ ಅಂದೆ ಅಷ್ಟೆ, ಕಣ್ಣು ತೇವಗೊಂಡಿತ್ತು.

ಇಂದಿನ ಸ್ನೇಹವನ್ನು ನಾಳೆಗೆ ಮರೆಯುವ ಮನುಷ್ಯರ ನಡುವೆ, ಇಂತಹ ಮೂಕ ಪ್ರಾಣಿಗಳು ಒಂದು ಹೊತ್ತು ಊಟ ಹಾಕಿದ ವ್ಯಕ್ತಿಯನ್ನು ಎಷ್ಟು ವರ್ಷವಾದರೂ ಮರೆಯುವುದಿಲ್ಲ.

ಮನುಷ್ಯ ಪ್ರಾಣಿ, ಇತರ ಪ್ರಾಣಿಗಳಿಂದ ಕಲಿಯುವುದು ಸಾಕಷ್ಟಿದೆ ಅಲ್ಲವೇ?...

ಧನ್ಯವಾದಗಳು.
ಧೀರೇಂದ್ರ ಜೈನ್

#ಧೀರ ಮಾತು

25/01/2023

ಧೀರ ಮಾತು - 5 ..
#ಧೀರಮಾತು
#ಅಪ್ಪ

ಅಪ್ಪನ ಬಗ್ಗೆ ಬರೆಯಬೇಕು ಎಂದು ಒಂದು ವರ್ಷದಿಂದ ಪ್ರಯತ್ನ ಪಟ್ಟರೂ ಬರೆಯಲು ಆಗಲಿಲ್ಲ, ಬರೆಯಲು ಆರಂಭಿಸಿದ ಕೂಡಲೆ ಕಣ್ಣೀರಾಗುತ್ತೇನೆ. ನನ್ನಿಂದ ಸಾಧ್ಯವಿಲ್ಲ ಎಂದು ಸುಮ್ಮನಾಗುತ್ತೇನೆ .ಅಪ್ಪನನ್ನು ಕಳೆದುಕೊಂಡು ಜನವರಿ 26 ಕ್ಕೆ 4 ವರ್ಷವಾಗುತ್ತದೆ. ಅವರನ್ನು ಅಷ್ಟು ಬೇಗ ಕಳೆದುಕೊಳ್ಳುತ್ತೇವೆ ಎಂದು ನಾವ್ಯಾರೂ ಅಂದುಕೊಂಡಿರಲಿಲ್ಲ ..

ಒಬ್ಬ ಚಾಲಕನಾಗಿ ಹಲವಾರು ಕಡೆ, ಲಾರಿ,ಬಸ್ , ಕಾರ್ taxi , school bus ಹೀಗೆ ಹಲವು ಬಗೆಯ ವಾಹನಗಳನ್ನು ಓಡಿಸಿ , ಬಹಳಷ್ಟು ವರ್ಷ ಮೂಡುಬಿದಿರೆಯಲ್ಲಿ ಬಾಡಿಗೆಗೆ ಕಾರ್ ಓಡಿಸುತ್ತಾ, ಹಲವು ಪ್ರತಿಷ್ಠಿತ ವ್ಯಕ್ತಿಗಳಿಗೆ ಚಾಲಕರಾಗಿ ದುಡಿದು " ಕಾರ್ ದ ರಘು ಅಣ್ಣ, ಬಲ್ಲಾಳರು ಎಂದು ಚಿರಪರಿಚಿತರಾದವರು". ಒಬ್ಬ ಪ್ರಾಮಾಣಿಕವಾಗಿ ದುಡಿದರೆ ಎಷ್ಟು ಗೌರವ ಪಡೆಯಬಹುದು ಎನ್ನುವದಕ್ಕೆ ಅಪ್ಪನೇ ಉದಾಹರಣೆ ಮತ್ತು ನನಗೆ ಸ್ಪೂರ್ತಿ. ಅವರು ಹೆಚ್ಚಾಗಿ ಚಾಲಕರಾಗಿ ಹೋಗುತಿದ್ದ ಹೆಚ್ಚಿನ ಜನ ಸಿಕ್ಕಾಗ " ರಘು ಅಣ್ಣ ನಮ್ಮ ಸ್ವಂತ ಅಣ್ಣ ಇದ್ದ ಹಾಗೆ" ಎಂದು ಹೇಳುತ್ತಿದ್ದಾಗ ಹೆಮ್ಮೆ ಅನಿಸುತಿತ್ತು.ಈಗಲೂ ಅವರನ್ನು ನೆನೆದು ಹೆಚ್ಚಿನವರು ಮಾತಾಡಿದಾಗ ಕಣ್ಣೀರು ಹಾಕುತ್ತಾರೆ. ನನ್ನ ಹೆಚ್ಚಿನ ಬಾಲ್ಯದ ಸ್ನೇಹಿತರಿಗೆ ಅವರೆಂದರೆ ತುಂಬಾ ಇಷ್ಟ.

ನಮ್ಮ ಕುಟುಂಬದ ಚಾಲಕನಾಗಿ ಅವರ ತ್ಯಾಗ ಬೆಲೆ ಕಟ್ಟಲಾಗದು, ಮೂರು ಜನ ಗಂಡು ಮಕ್ಕಳನ್ನು ಅವರ ಇಷ್ಟದಂತೆ ಬೆಳೆಯಲು ಬಿಟ್ಟು, ಚಿಕ್ಕಂದಿನಿಂದಲೂ ಯಾವ ಕಷ್ಟವೂ ಇಲ್ಲದಂತೆ, ಬೇಕಾದನ್ನು ತೆಗೆದು ಕೊಟ್ಟು, ಬೇಕಾದ ಕಡೆ ಕಾರಿನಲ್ಲಿ ತಿರುಗಿಸುತ್ತಾ,ಕಷ್ಟ ಗೊತ್ತಾಗದಂತೆ ಬೆಳೆಸಿದವರು. ಕೈ ತುಂಬಾ ಸಂಬಳ ದೊರೆತರೂ ತಿಂಗಳ ಕೊನೆಗೆ ಪರದಾಡುವ ನಾನು,ಅಪ್ಪ ಹೇಗೆ ನಿಭಾಯಿಸುತ್ತಿದ್ದರು ಎಂದು ಯೋಚಿಸುತ್ತೇನೆ. ಯಾವುದೇ ಸಾಲ ಬಾಕಿ ಇರಿಸದೆ, ಕಷ್ಟ ಕಾಲಕ್ಕೆ ಸ್ವಲ್ಪ ಫಿಕ್ಸೆಡ್ ಡಿಪಾಸಿಟ್ ಇಟ್ಟು ಇಹ ಲೋಕ ತ್ಯಜಿಸಿದ ಅವರ ಸರಳ ಬದುಕು ನಮಗೆ ಮಾದರಿ..

ಒಬ್ಬ principal ಗೆ ಡ್ರೈವರ್ ಆಗಿದ್ದಾಗ , ಅವರು ಇಂಗ್ಲಿಷ್ ಮಾತನಾಡುವುದನ್ನು ಕೇಳಿ ಕಲಿತು ಇಂಗ್ಲಿಷ್ ಭಾಷೆಯನ್ನು ಅಲ್ಪ grammar mistake ಇದ್ದರೂ ತಕ್ಕಮಟ್ಟಿಗೆ ಅರ್ಥ ಆಗುವ ರೀತಿಯಲ್ಲಿ ಮಾತನಾಡುತ್ತಿದ್ದರು , ಮುಂಬೈಯಲ್ಲಿ ಕೆಲವು ವರ್ಷ ಕೆಲಸ ಮಾಡಿದ್ದರಿಂದ ಹಿಂದಿ ಚೆನ್ನಾಗಿ ಮಾತನಾಡುತಿದ್ದರು, ಅದರೊಂದಿಗೆ GSB ಕೊಂಕಣಿ,chiristian ಕೊಂಕಣಿ,ಬ್ಯಾರಿ, ಮಲಯಾಲಂ ಇತ್ಯಾದಿ ಭಾಷೆ ಚೆನ್ನಾಗಿ ಬಲ್ಲವರಾಗಿದ್ದರು.

ಕೆಲವೊಮ್ಮೆ ಅವರ ಚಿಂತನೆಗಳು ನಮ್ಮನ್ನು ಪ್ರಶ್ನೆ ಮಾಡುವಂತಿತ್ತು, ದೇವರ ವಿಷಯದಲ್ಲಿ - ಒಂದು ಹೊಸದಾಗಿ ಕಟ್ಟಿಸಿದ ದೇವಸ್ಥಾನಕ್ಕೆ ಹೋದಾಗ , ಅಲ್ಲಿರುವ ಮಾಹಿತಿ ಓದಿ ಜೋರಾಗಿ ನಕ್ಕರು, ಅಪ್ಪಾ ಏನಾಯಿತು ಅಂದಾಗ, ನೋಡು ಅವನಿಗೆ ಕನಸಲ್ಲಿ ದೇವರು ಬಂದು ದೇವಸ್ಥಾನ ಕಟ್ಟಿಸು ಅಂದರಂತೆ, ಅದಕ್ಕೆ ಅವನು ಈ ದೇವಸ್ಥಾನ ಕಟ್ಟಿಸಿದನಂತೆ,ಹ ಹ ಹ .... ನನಗೆ ಅಂತಹ ಕನಸು ಬೀಳುವುದಿಲ್ಲ, ಯಾಕೆಂದರೆ ನನ್ನಲ್ಲಿ ಅಷ್ಟು ಹಣ ಇಲ್ಲ ಎಂದು ಜೋರಾಗಿ ನಕ್ಕರು. ಆಡಂಬರದ ಭಕ್ತಿಯನ್ನು, ಆ ಪೂಜೆ ಈ ಪೂಜೆ ಮಾಡುವುದನ್ನು ಅಷ್ಟಾಗಿ ಇಷ್ಟ ಪಡುತ್ತಿರಲಿಲ್ಲ. ಆದರೆ ಭಕ್ತಿಯಿಂದ ಮಾಡುವ ಅಮ್ಮನನ್ನು ಮಾಡಬೇಡ ಅನ್ನಲಿಲ್ಲ. ಇಷ್ಟೆಲ್ಲಾ ಹೇಳುತಿದ್ದ ಅಪ್ಪ ಸ್ನಾನ ಮಾಡಿ ಬಂದು ದೇವರಿಗೆ ದೀಪ ಹೊತ್ತಿಸಿ,ಸುಮಾರು ಹೊತ್ತು ಜಪ, ಧ್ಯಾನ,ಮಾಡುತಿದ್ದರು. ಅದನ್ನು ಪ್ರಶ್ನೆ ಮಾಡಿದರೆ, ನಾನು ದೇವರಿಲ್ಲ ಎಂದು ಯಾವಗ ಹೇಳಿದ್ದೇನೆ ? ಅನ್ನುತ್ತಿದ್ದರು.ಅವರು ಯಾಕೆ ಹಾಗೆ ಮಾಡುತ್ತಿದ್ದರು ಎಂದು ನನಗೆ ಈಗ ಎಲ್ಲವೂ ವ್ಯವಹಾರ ಆಗಿರುವ ಸಮಾಜವನ್ನು ನೋಡಿ ಅರ್ಥವಾಗುತ್ತಿದೆ..

ಡ್ರೈವಿಂಗ್ ಮಾಡುವಾಗ ಟ್ರಾಫಿಕ್ ರೂಲ್ಸ್ ಪಾಲಿಸುವ ಅವರ ಗುಣ ನಮಗೆಲ್ಲಾ ಮಾದರಿ, ಯಾರಾದ್ರೂ ರೂಲ್ಸ್ break ಮಾಡಿದರೆ ತುಂಬಾ ಸಿಟ್ಟಾಗುತಿದ್ದರು. ನಾವು driving ಮಾಡುವಾಗ ತಪ್ಪು ಮಾಡಿದರೆ ಅಲ್ಲಿಯೇ ಸರಿ ಪಡಿಸುತ್ತಿದ್ದರು, ಅವರು ನನಗೆ ಡ್ರೈವಿಂಗ್ ಕಲಿಸುವಾಗ ನಾನು ನಿಮ್ಮಲ್ಲಿ ಡ್ರೈವಿಂಗ್ ಕಲಿಯುವುದಿಲ್ಲ ಎಂದು ಜಗಳ ಮಾಡುತಿದ್ದೆ, ಅಷ್ಟು strict..

ಆಯುರ್ವೇದ ದ ಬಗ್ಗೆ ವಿಶೇಷ ಆಸಕ್ತಿ, ಮಾಡಿ ನೋಡು ಮದ್ದಿನ ಗುಣ, ಔಷಧೀಯ ಸಸ್ಯಗಳು ಇತ್ಯಾದಿ ಪುಸ್ತಕಗಳನ್ನು ಓದುತ್ತಿದ್ದರು ಹಾಗು ಅದರ ಬಗ್ಗೆ ತಿಳಿದವರ ಜೊತೆ ಚರ್ಚಿಸುತಿದ್ದರು.

ನಾವು ಮಕ್ಕಳು ದುಡಿಯಲು ಆರಂಭಿಸಿದ ಮೇಲೆ, ಕೆಲಸಕ್ಕೆ ಹೋಗಬೇಡಿ ಅಂದರೂ, ಆಗೊಮ್ಮೆ ಈಗೊಮ್ಮೆ ಡ್ರೈವರ್ ಆಗಿ ಹೋಗುತಿದ್ದರು.
ದಿನ ಪತ್ರಿಕೆ ಓದುವ ಹಾಗೂ ಟಿವಿ ಯಲ್ಲಿ News ನೋಡುವ ಹವ್ಯಾಸ ಇದ್ದ ಅವರು ಪ್ರತಿ ದಿನ ಅವರು ಓದಿದ ವಿಷಯದ ಬಗ್ಗೆ ನನ್ನಲ್ಲಿ ಹೇಳಬೇಕು, ಚರ್ಚಿಸಬೇಕು ಎಂದು ಕಾಯುತ್ತಿದ್ದರು. ರೋಟರಿ, ಜೇಸಿ, ಸಾಮಾಜಿಕ, ಕಾಲೇಜಿನ ಕಾರ್ಯಕ್ರಮಗಳಲ್ಲಿ busy ಆಗಿ ಬಿಡುತಿದ್ದ ನಾನು ಕೊನೆ ಕೊನೆಗೆ ಅವರಿಗೆ ಹೆಚ್ಚು ಸಮಯ ಕೊಡಲಿಲ್ಲ ಎಂದು ಅನಿಸುತ್ತದೆ, ಸುಮಾರು ವಿಷಯದ ಬಗ್ಗೆ ಮಾತನಾಡಬೇಕು ಎಂದು ಹಂಬಲಿಸುತಿದ್ದ ಅವರಿಗೆ ನಾನು ಸಿಗುತ್ತಿರಲಿಲ್ಲ, ಈ ಒಂದು ತಪ್ಪು ನನ್ನನ್ನು ಈಗಲೂ ಹಾಗು ಕೊನೆಯವರೆಗೂ ಕಾಡುತ್ತಿರುತ್ತದೆ.

ದಯವಿಟ್ಟು ಸಾಮಾಜಿಕ ಕೆಲಸಗಳಲ್ಲಿ ನಿರತರಾಗಿರುವ ಸ್ನೇಹಿತರೆ,ನಾನು ಮಾಡಿದ ತಪ್ಪು ನೀವು ಮಾಡಬೇಡಿ, ದಿನಕ್ಕೆ ಸ್ವಲ್ಪ ಸಮಯ ಮನೆಯಲ್ಲಿರುವ ಅಪ್ಪ ಅಮ್ಮನ ಜೊತೆ, ಹಿರಿಯರ ಜೊತೆ ಮಾತನಾಡಿ please.

ಕೆಲಸ ಮುಗಿಸಿ ಮನೆಗೆ ಬಂದು, ಮೊಬೈಲ್ ಬದಿಗಿಟ್ಟು ಒಂದು ಅರ್ಧ ಗಂಟೆ ಮಗನ ಮಾತಿಗೆ ಕಿವಿಯಾಗುತ್ತೇನೆ ,ಅವನ ಇಷ್ಟದ ಪುಣ್ಯಕೋಟಿಯ ಹಾಡಿಗೆ ದನವಾಗಿ ಅಥವಾ ಹುಲಿಯಾಗಿ ನಟಿಸುತ್ತೇನೆ. ಟಿವಿ ಯಲ್ಲಿ ಹುಲಿ dance beats ಹಾಕಿ ಅವನೊಂದಿಗೆ ಕುಣಿಯುತ್ತೇನೆ. ಮಗನಲ್ಲಿ ಅಪ್ಪನನ್ನು ಕಾಣುತ್ತೇನೆ.

ಅಪ್ಪನ ನೆನಪು ವಿಪರೀತ ಕಾಡಿದಾಗ, ಬೇಸರದಿಂದ ಕುಳಿತರೆ, "ನಿಮಗೆ ಇಷ್ಟು ವರ್ಷವಾದರೂ ಅಪ್ಪನ ಪ್ರೀತಿ ಸಿಕ್ಕಿದೆ, ಆದರೆ ನನಗೆ ಅಪ್ಪನ ಪ್ರೀತಿಯೇ ಸಿಕ್ಕಿಲ್ಲ "ಎಂದು ತಾನು 3 ತಿಂಗಳ ಮಗುವಾಗಿರುವಾಗ ಅಪ್ಪನನ್ನು ಕಳೆದು ಕೊಂಡ ಹೆಂಡತಿ ನನ್ನನ್ನು ಸಮಾಧಾನ ಮಾಡುತ್ತಾಳೆ.... ನಾನು ಮೌನಿಯಾಗುತ್ತೇನೆ ...
#ಧೀರೇಂದ್ರಜೈನ್
#ಧೀರಮಾತು.

09/01/2023

ಧೀರ ಮಾತು - 4...

#ಧೀರಮಾತು

...

ಎಲ್ಲವೂ ಎಲ್ಲರಿಗೂ ಅರ್ಥವಾಗಬೇಕೆಂದೇನಿಲ್ಲ....

"ಆ ಜನ ಹೇಗೆ ಎಂದೇ ಅರ್ಥವಾಗುವುದಿಲ್ಲ ಮಾರಾಯ..."

"ಅವನಿಗೆ ಎಷ್ಟು ಹೇಳಿದರೂ ಆರ್ಥವಾಗುವುದಿಲ್ಲ ಕರ್ಮ..."

ಈ ಮಾತುಗಳನ್ನು ನಾನು, ನೀವು ಹೆಚ್ಚಾಗಿ ಹೇಳುತ್ತಿರುತ್ತೇವೆ ಅಥವಾ ಕೇಳುತ್ತಿರುತ್ತೇವೆ...

ನನ್ನ ತರಬೇತಿ ಕಾರ್ಯಕ್ರಮಗಳಲ್ಲಿ ನಾನು ಹೆಚ್ಚಾಗಿ ಒಂದು ಮಾತನ್ನು ಹೇಳುತ್ತಿದ್ದೆ."100 ಪ್ರತಿಶತ ನಮ್ಮ ಹಾಗೆ ಯೋಚಿಸುವ ಹಾಗು ವರ್ತಿಸುವ ಇನ್ನೊಬ್ಬ ವ್ಯಕ್ತಿ ಈ ಜಗತ್ತಿನಲ್ಲಿ ಇಲ್ಲ "

ಪ್ರತಿಯೊಬ್ಬರೂ ಯೋಚಿಸುವ ಮತ್ತು ವರ್ತಿಸುವ ರೀತಿ ಬೇರೆ ಬೇರೆ. ಯಾವಾಗ ಭಿನ್ನಾಭಿಪ್ರಾಯ ಗಳನ್ನು ಅರ್ಥ ಮಾಡಿಕೊಂಡು ಗೌರವಿಸುತ್ತೇವೆಯೋ ಆಗ ಸಂಭಂದಗಳು ಚೆನ್ನಾಗಿರುತ್ತದೆ.

ಕೆಲವೊಮ್ಮೆ ನಮ್ಮ ತಪ್ಪು ಏನೂ ಇರದಿದ್ದರೂ ಕೂಡ, ಮುಂದಿರುವ ವ್ಯಕ್ತಿ ನಮ್ಮದೇ ತಪ್ಪು ಎಂದು ವಾದಿಸುತ್ತಾರೆ . ಅಂಥವರಿಗೆ ತಮ್ಮ ತಪ್ಪಿನ ಅರಿವಿರುತ್ತದೆ . ಆದರೆ ಅವರ ಅಹಂ ಅದನ್ನು ಒಪ್ಪಿಕೊಳ್ಳಲು ಬಿಡುವುದಿಲ್ಲ, ಅಂಥವರು ನಾವು ತಪ್ಪು ಮಾಡಿದ್ದೇವೆ ಎಂಬ ಭಾವನೆ ಬರುವಂತೆ ಮಾಡಿ, guilty feeling ಬರುವಂತೆ ಮಾಡುತ್ತಾರೆ.ಈ ಸಂಧರ್ಭದಲ್ಲಿ ನಾವು ಅವರ ತಪ್ಪನ್ನು ಅವರಿಗೆ ಅರ್ಥ ಮಾಡಿಸುವ ವ್ಯರ್ಥ ಪ್ರಯತ್ನವನ್ನು ಮಾಡಬಾರದು. ಸುಮ್ಮನೆ ಮನಸಿನಲ್ಲಿಯೇ ನಕ್ಕು ಅವರನ್ನು ಕ್ಷಮಿಸಿ, ಆ ವಿಷಯವನ್ನು ಮರೆತುಬಿಡಬೇಕು. ಹೀಗೆ ಮಾಡುವುದರಿಂದ ನಮ್ಮ ಮನಸ್ಸಿಗೆ ನೆಮ್ಮದಿ ಇರುತ್ತದೆ. ನಿದ್ದೆ ಮಾಡುತ್ತಿರುವವನನ್ನು ಎಬ್ಬಿಸಬಹುದು,ನಿದ್ರೆ ಮಾಡುವಂತೆ ನಟಿಸುವವರನ್ನು ಎಬ್ಬಿಸಲಾಗದು.

ಕೆಲವರು ಅಯ್ಯೋ ಇವನಿಗೆ ಎಷ್ಟು ವಿವರಿಸಿ ಹೇಳಿದರೂ ತಿಳಿಯುತ್ತಿಲ್ಲವಲ್ಲ ಎಂದು ಕೊರಗುತ್ತಾರೆ.ಆಗ ನನ್ನ ಗುರುಗಳು ಹೇಳಿದ ಮಾತು ನೆನಪಾಗುತ್ತದೆ -"ಬೇರೆಯವರಿಗೆ ಒಮ್ಮೆ ಹೇಳುವುದು ಮಾತ್ರ ನಿನ್ನ ಕೆಲಸ, ನಿನಗೆ ನೀನು ಮಾಡಿದ್ದು ಸರಿ ಎಂದಾದರೆ ಸಾಕು, ಅವರಿಗೆ ಅರ್ಥ ಮಾಡಿಸುವುದು ನಿನ್ನ ಕೆಲಸವಲ್ಲ, ಯಾಕೆಂದರೆ ಅವರು ನೀನು ಎಷ್ಟು ಹೇಳಿದರೂ ಅರ್ಥ ಮಾಡಿಕೊಳ್ಳುವ ಮನಸ್ಸು ಅವರಲ್ಲಿ ಇರುವುದಿಲ್ಲ".

ಎಲ್ಲರೂ ಹಾಗಿರುವುದಿಲ್ಲ, ಕೆಲವರಿಗೆ ಮನದಟ್ಟಾಗುವಂತೆ ಹೇಳಿದರೆ, ಅದನ್ನು ಒಪ್ಪಿಕೊಳ್ಳುವ ಮನಸ್ಸಿರುತ್ತದೆ. ಅಂಥವರಿಗೆ ಮಾತ್ರ ಅರ್ಥ ಮಾಡಿಸುವಂತೆ ಹೇಳಿದರೆ ಒಳ್ಳೆಯದು.

ಹೆಚ್ಚಾಗಿ, ಯಾವುದೇ ವಿಷಯ ಅಥವಾ ಸಂದರ್ಭ ಯಾ ಸನೀವೇಶಗಳನ್ನು ಅರ್ಥ ಮಾಡಿಕೊಳ್ಳುವ ರೀತಿ, ನಮ್ಮ Past Experience, ನಮ್ಮ ನಂಬಿಕೆ, ನಿಲುವು , ಸಿದ್ಧಾಂತ ಹಾಗೂ ಮುಖ್ಯವಾಗಿ ಎದುರಿಗಿರುವ ವ್ಯಕ್ತಿಯ ಮೇಲೆ ಅವಲಂಬಿತವಾಗಿರುತ್ತದೆ.

ನಾವು ಅತಿ ಗೌರವಿಸುವ ವ್ಯಕ್ತಿ ನಮಗೆ ಏನಾದರು ಟೀಕೆ ಅಥವಾ ಸಲಹೆ ನೀಡಿದರೆ "ಅವರು ನನ್ನ ಒಳಿತಿಗಾಗಿ ಹೇಳುತ್ತಿದ್ದಾರೆ" ಎಂದು ಅರ್ಥ ಮಾಡಿಕೊಂಡು ಅವರ ಮಾತನ್ನು ಒಪ್ಪಿಕೊಳ್ಳುತ್ತೇವೆ. ಅದೇ ಮಾತನ್ನು ನಮಗೆ ಇನ್ನೊಬ್ಬ ಅಂದರೆ "ಇವನ್ಯಾರು ನನಗೆ ಹೇಳಳು ಅಂದುಕೊಳ್ಳುತ್ತೇವೆ ". ಇದನ್ನೇ ಮತ್ತಿನ್ನಾರೋ ಹೇಳಿದರೆ ನನ್ನನ್ನು ಅಪಹಾಸ್ಯ ಮಾಡುವುದೆ ಇವನ ಕೆಲಸ ಅನ್ನುತ್ತೇವೆ, ಮತ್ತೋರ್ವ ಹೇಳಿದರೆ ನಮ್ಮ ಮೇಲೆ ಹೊಟ್ಟೆ ಕಿಚ್ಚಿನಿಂದ ಹೇಳಿದ ಎನ್ನುತ್ತೇವೆ. ಹೀಗೆ ಪ್ರತಿಯೊಂದು ವಿಷಯವೂ ಕೂಡ ನಾವು ಹೇಗೆ ಅರ್ಥ ಮಾಡಿಕೊಂಡು ಸ್ವೀಕರಿಸಿದ್ದೇವೆ ಅನ್ನುವುದರ ಮೇಲಿದೆ.

ಎಲ್ಲರಿಗೂ ಎಲ್ಲವೂ ಅರ್ಥವಾಗಬೇಕೆಂದೇನಿಲ್ಲ . ಎಲ್ಲರಿಗೂ ಅರ್ಥ ಮಾಡಿಸಿಕೊಳ್ಳುವುದು ಹಾಗೂ ಎಲ್ಲರನ್ನೂ ಅರ್ಥ ಮಾಡಿಕೊಳ್ಳುವುದು ನಮ್ಮ ಕೆಲಸವಲ್ಲ. ನಮ್ಮವರು ಹೇಗಿದ್ದಾರೋ ಹಾಗೆಯೇ ಸುಮ್ಮನೆ ಸ್ವೀಕರಿಸುವುದು ಒಳ್ಳೆಯದು. "Accept the person as he is " ..

ಅದಕ್ಕಿಂತಲೂ ಹೆಚ್ಚಾಗಿ "ನಮಗೆ ನಾವು ಅರ್ಥವಾಗಬೇಕು - ಆಗ ಬೇರೆಯವರನ್ನು ಅರ್ಥ ಮಾಡಿಕೊಳ್ಳುವುದು ಸುಲಭ". ಉದಾಹಣೆಗೆ - ನನಗೆ ಯಾವಾಗ ಬೇಸರವಾಗುತ್ತದೆ ಎಂದು ಅರಿತಿದ್ದರೆ ಅವನಿಗೆ ಏಕೆ ಬೇಸರವಾಯಿತು ಎಂದು ಅರ್ಥವಾಗುತ್ತದೆ .

You've got to be okay on your own before you can be okay with somebody else!!!.. 👍😇.

ವಿಶೇಷ ಸೂಚನೆ 😂: ಇದು ಸುಮ್ಮನೆ ಕುಳಿತುಕೊಂಡಿರುವಾಗ ಗೀಚಿದ್ದು,. ಇದು ತೀರ ನನ್ನ ವೈಯಕ್ತಿಕ ಅಭಿಪ್ರಾಯ.
ಅಭಿಪ್ರಾಯ ಭೇದಗಳಿದ್ದರೆ ಗೌರವಿಸುತ್ತೇನೆ😀.. ಚರ್ಚೆ ಇಲ್ಲ 🙏

ಧನ್ಯವಾದಗಳೊಂದಿಗೆ ,

ಧೀರೇಂದ್ರ ಜೈನ್ .
#ಧೀರಮಾತು.