13/12/2024
ଚମ୍ପୁଆରେ ବଡ଼ ଧରଣର ଚୋରି ଘଟଣା: ଲୁଟିଲେ ୨୦ ଲକ୍ଷରୁ ଅଧିକ ମୋବାଇଲ ଓ ସରଂଜାମ
ଗତକାଲି ମଧ୍ୟରାତ୍ରିରେ ଚମ୍ପୁଆ ଥାନାରୁ କେବଳ ୨୦୦ ମିଟର ଦୂରରେ ଥିବା ରାଜ ଏଣ୍ଡ୍ ରାଜ ମୋବାଇଲ ଦୋକାନରେ ଅପରାଧୀ ମାନେ ଲୁଟ୍ ଘଟାଇଛନ୍ତି। ସଟର ତାଡି ଲୁଟେରା ମାନେ ପ୍ରାୟ ୨୦ ଲକ୍ଷରୁ ଅଧିକ ମୂଲ୍ୟର ସ୍ମାର୍ଟଫୋନ ଓ ସରଂଜାମ ଚୋରି କରିନେଇଛନ୍ତି।
ଦୋକାନ ମାଲିକ ଦିଲ୍ଲିପ କୁମାର ରାଜଙ୍କ ଅନୁସାରେ, ଗତକାଲି ରାତି ୯ଟାରେ ଦୋକାନ ବନ୍ଦ କରି ସେ ଘରକୁ ଯାଇଥିଲେ। ଆଜି ସକାଳେ ଦୋକାନ କର୍ମଚାରୀ ମାନେ ଆସି ଦେଖିଲେ ଯେ ସଟରର ତାଲା ଭଙ୍ଗା ହୋଇଛି। ସେମାନେ ଖବର ଦେବା ପରେ ମାଲିକ ଆସି ସଟର ଉଠାଇ ଦେଖିଲେ ଯେ ଦାମୀ ମୋବାଇଲ ଓ ଅନ୍ୟାନ୍ୟ ସରଞ୍ଜାମ ସବୁ ଚୋରି ହୋଇ ଯାଇଛି। ଲୁଟେରା ମାନେ ଦୋକାନରେ ଥିବା ସିସିଟିଭି ହାର୍ଡ ଡିସ୍କକୁ ମଧ୍ୟ ଚୋରି କରିନେଇଛନ୍ତି।
ଘଟଣାସ୍ଥଳରେ ଚମ୍ପୁଆ ଏସଡିପିଓ ବିଜୟ କୁମାର ମଲ୍ଲିକ, ବାରିଆ ଆଇଆଇସି ଦେବକୀ ନାଏକ, ସାଇଣ୍ଟିଫିକ ଟିମ ଓ ଅନ୍ୟାନ୍ୟ ପୋଲିସ ଅଧିକାରୀ ଯାଇ ତଦନ୍ତ ଆରମ୍ଭ କରିଛନ୍ତି। ପ୍ରାଥମିକ ତଦନ୍ତରୁ ଜଣାପଡିଛି ଯେ, ଏହା ସହିତ ଏକ ପେସାଦାର ଲୁଟେରା ଗ୍ୟାଙ୍ଗ ଜଡିତ ଅଛି। ବିଭିନ୍ନ ସିସିଟିଭି ଫୁଟେଜକୁ ପରିଖ୍ୟାନ କରି ତଦନ୍ତ ଚଳାଉଛନ୍ତି।
ଚମ୍ପୁଆ ମୁଖ୍ୟ ବଜାରରେ ଏଭଳି ବଡ଼ ଚୋରି ଘଟଣା ପ୍ରଥମ ଥର ଘଟିଥିବାରୁ ବ୍ୟବସାୟୀ ମାନଙ୍କ ମନରେ ଭୟ ଓ ଚିନ୍ତା ସୃଷ୍ଟି ହୋଇଛି।
ପୋଲିସ କେସ ରୁଜୁ କରି ଦୁର୍ବୃତ୍ତ ମାନଙ୍କୁ ଧରିବାକୁ ଜୋରଦାର ଚେଷ୍ଟା ଜାରି ରଖିଛନ୍ତି।
