Champua News

21/12/2023

ଇସ୍ପାତ ନଗରୀ ରାଉରକେଲାରେ ବୋଲ ମାନୁନି ହଇଜା । ମୃତ୍ୟୁସଂଖ୍ୟା ଛୁଇଁଲାଣି ୧୩ । ଆକ୍ରାନ୍ତ ହେଲେଣି ୧୪ ଶହରୁ ଅଧିକ । ଗୁରୁତର କଥା ହେଉଛି, ଝାଡ଼ାବାନ୍ତି ଏବେ ସ୍ମାର୍ଟସିଟିର ସବୁ ୱାର୍ଡକୁ ବ୍ୟାପିଗଲାଣି । ସ୍ଥିତି ଏତେ ଗମ୍ଭୀର ହେଲାଣି ଯେ ମୁଖ୍ୟମନ୍ତ୍ରୀ ଗତକାଲି ସମୀକ୍ଷା କରିବା ପରେ ଆଜି ସ୍ୱାସ୍ଥ୍ୟ ସଚିବ ରାଉରକେଲା ଯାଇ ସ୍ଥିତି ଅନୁଧ୍ୟାନ କରିଛନ୍ତି । ମହାନଗରର ସମସ୍ତ PHCକୁ ବି ୨୪ ଘଣ୍ଟା ଖୋଲା ରଖି ରୋଗୀଙ୍କ ଚିକିତ୍ସା ପାଇଁ ନିର୍ଦ୍ଦେଶ ଦେଇଛନ୍ତି ।

ଏପଟେ ସରକାର କହୁଛନ୍ତି, ରାଉରକେଲା ଝାଡ଼ାବାନ୍ତିରେ କେବଳ ୬ ଜଣଙ୍କ ମୃତ୍ୟୁ ହୋଇଛି । କିନ୍ତୁ ରାଉରକେଲାରେ ଝାଡ଼ାବାନ୍ତି ଓ ହଇଜାରେ ୧୩ ଜଣଙ୍କ ମୃତ୍ୟୁ ହୋଇଥିବା ଅଭିଯୋଗ ହେଲାଣି । ଆଉ ଏ ସଂଖ୍ୟା ବଢ଼ି ଚାଲିଛି ।
ରାଉରକେଲାରେ ହଇଜା ସ୍ଥିତି ଏତେ ବିଗିଡ଼ିଗଲାଣି ଯେ ଗତକାଲି ଖୋଦ୍ ମୁଖ୍ୟମନ୍ତ୍ରୀ ସ୍ଥିତି ସମୀକ୍ଷା କରିଥିଲେ । ଆଉ ଆଜି ସ୍ୱାସ୍ଥ୍ୟ ସଚିବଙ୍କ ନେତୃତ୍ୱରେ ଏକ ଅଧିକାରୀସ୍ତରୀୟ ଟିମ୍ ରାଉରକେଲାରେ ପହଞ୍ଚି ସ୍ଥିତି ଅନୁଧ୍ୟାନ କରିଛନ୍ତି । ସରକାରଙ୍କ ଏଭଳି ତତ୍ପରତାକୁ ନେଇ ଏବେ ନାନା ପ୍ରଶ୍ନ ଉଙ୍କି ମାରିଲାଣି । କେଉଁଠୁ, କାହିଁକି ଓ କେମିତି ବ୍ୟାପିଲା ହଇଜା ? ଭିବ୍ରିଓ କଲେରା ବ୍ୟାକ୍ଟେରିଆ ଯୋଗୁ ସ୍ମାର୍ଟସିଟି ରାଉରକେଲାକୁ କବଳିତ କରିଥିବା ଏ ହଇଜା ରାଜ୍ୟର ଅନ୍ୟ ଅଞ୍ଚଳକୁ ମାଡ଼ିଯାଇନି ତ ?

ସ୍ୱାସ୍ଥ୍ୟ ସଚିବ କହିଛନ୍ତି, ରାଉରକେଲାରେ ଏବେ ଝାଡ଼ାବାନ୍ତି ନିୟନ୍ତ୍ରଣରେ ରହିଛି । ପାଣି ବିଶୋଧନ କରାଯାଇଥିବାରୁ ଯେଉଁ ନୂଆ ମାମଲା ଆସୁଛି, ସେମାନେ ଗୁରୁତର ହେଉନାହାନ୍ତି । ଝାଡ଼ାବାନ୍ତି ବ୍ୟାପିବା ପଛରେ କାରଣ କ’ଣ ତାହା ଜାଣିବାକୁ ସୁନ୍ଦରଗଡ଼ ସରକାରୀ ମେଡିକାଲ କଲେଜରୁ ଏକ ଟିମ୍ ରାଉରକେଲାରେ ପହଞ୍ଚିଥିବା ବେଳେ ଖୁବ୍‌ଶୀଘ୍ର କଟକ ବଡ଼ ମେଡିକାଲ ଓ RMRCର ଏକ ଟିମ୍ ମଧ୍ୟ ରାଉରକେଲାରେ ପହଞ୍ଚିବ ବୋଲି କହିଛନ୍ତି ସ୍ୱାସ୍ଥ୍ୟ ସଚିବ ।
ରାଉରକେଲାରେ ବ୍ୟାପୁଥିବା ଝାଡ଼ାବାନ୍ତିରେ ରୋକ୍ ଲଗାଇବାକୁ କେନ୍ଦ୍ର ସରକାରଙ୍କ ହସ୍ତକ୍ଷେପ ଲୋଡ଼ି କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀଙ୍କୁ ଚିଠି ଲେଖିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ତେବେ କିଭଳି ଶୀଘ୍ର ଏ ସ୍ଥିତିରେ ସୁଧାର ଅଣାଯିବ, ତାହା ଏବେ ସରାକାରଙ୍କ ପାଇଁ ବଡ଼ ଆହ୍ୱାନ ହୋଇଛି ।

20/12/2023

ଅଯାଚିତ କଲ୍ ପାଇଁ କଡ଼ା ନିୟମ

କେନ୍ଦ୍ର ସରକାରଙ୍କ ପକ୍ଷରୁ ଲୋକସଭାରେ ଏକ ନୂତନ ଟେଲିକମ୍ ବିଲ୍ ଆଗତ କରାଯାଇଛି। ଏହ ବିଲ୍‌ରେ ରହିଥିବା ନିୟମ ମୋବାଇଲ୍ ବ୍ୟବହାରକାରୀଙ୍କୁ ବହୁତ ଆଶ୍ବସ୍ତି ପ୍ରଦାନ କରିବ । ଏହି ବିଲରେ ସରକାର ଅନେକ ସଂସ୍କାର ପଦକ୍ଷେପ ଗ୍ରହଣ କରିଛନ୍ତି। ନୂଆ ନିୟମାନୁଯାୟୀ, ଯଦି କେହି ବିନା କାରଣରେ କଲ୍ କରି ଆପଣଙ୍କୁ ହଇରାଣ କରନ୍ତି, ତା'ହେଲେ ତାଙ୍କ ଉପରେ ୫୦ ହଜାରରୁ ୨ ଲକ୍ଷ ଟଙ୍କା ପର୍ଯ୍ୟନ୍ତ ଜୋରିମାନା ଲଗାଯାଇପାରିବ। ବିଲ୍‌ରେ ଅଯାଚିତ କଲ୍ ସମସ୍ୟାର ସମାଧାନ ପାଇଁ ବିବାଦ ସମାଧାନ ବ୍ୟବସ୍ଥା ରଖାଯାଇଛି। ନୂତନ ବିଲ୍ ଅଯାଚିତ କଲ୍ ବନ୍ଦ କରିବାରେ ସାହାଯ୍ୟ କରିବ । ଏହି ବ୍ୟବସ୍ଥା ଅନ୍ତର୍ଗତ ଅଯାଚିତ କଲ ଉପରେ ୫୦ ହଜାର ଟଙ୍କାର ଜରିମାନା ସହ କଲରଙ୍କ ଉପରେ ନିଷେଧାଦେଶ ଲାଗୁ କରାଯିବ। ଗ୍ରାହକଙ୍କ ବିନା ଅନୁମତିରେ କରାଯାଇଥ‌ିବା ପ୍ରୋମୋଶନାଲ କଲ୍ ଉପରେ ୫୦ ହଜାରରୁ ୨ ଲକ୍ଷ ଟଙ୍କା ପର୍ଯ୍ୟନ୍ତ ଜୋରିମାନା ଲାଗିପାରିବ | କେବଳ ଏତିକି ନୁହେଁ ବେଆଇନ ଭାବେ ଫୋନ୍ ଟ୍ୟାଫି କରିଲେ ୩ ବର୍ଷ ପର୍ଯ୍ୟନ୍ତ ଜେଲ ଦଣ୍ଡ କିମ୍ବା ୨ କୋଟି ଟଙ୍କା ଜୋରିମାନା ନଚେତ ଉଭୟ ଦଣ୍ଡ ଭୋଗିବାକୁ ପଡ଼ିବ ।
ଗତ କିଛି ବର୍ଷ ହେବ ଗ୍ରାହକମାନଙ୍କ ପାଖକୁ ଆସୁଥ‌ିବା ଅଯାଚିତ କଲ ସଂଖ୍ୟାରେ ବୃଦ୍ଧି ଘଟିଛି। ପ୍ରମୋଶନାଲ ଏବଂ ବ୍ୟାଙ୍କ କଲ୍ ସଂଖ୍ୟାରେ ଅଧ୍ବକ ବୃଦ୍ଧି ଘଟିଛି। ଅନେକ ସମୟରେ ଫୋନ ‘ଡୁ ନଟ୍ ଡିଷ୍ଟର୍ବ' ମୋଡ଼ରେ ଥାଇ ମଧ୍ୟ ସିଷ୍ଟମ ଆକ୍ଟିଭେଟ ହେବା କାରଣରୁ ଅଦରକାରୀ କଲ ଆସିବା ଦ୍ବାରା ଗ୍ରାହକଙ୍କୁ ଅସୁବିଧାର ସମ୍ମୁଖୀନ ହେବାକୁ ପଡ଼ିଥାଏ। ତେଣୁ କୌଣସି ପ୍ରକାର ଅପବ୍ୟବହାରକୁ ରୋକିବା ଟେଲିକମ ବିଲର ମୂଳ ଉଦ୍ଦେଶ୍ୟ ବୋଲି ଟେଲିକମ୍ ମନ୍ତ୍ରୀ ଅଶ୍ବିନୀ ବୈଷ୍ଣବ କହିଛନ୍ତି।
ବିଲ ଯଦି ଆଇନରେ ପ୍ରଣୟନ ହୁଏ ତେବେ ଏହାର ସବୁଠାରୁ ବେଶି ଲାଭ ଗ୍ରାହକଙ୍କୁ ମିଳିବ। ଟେଲିକମ ବିଲ ୨୦୨୩ରେ ୨ଟି ପ୍ରମୁଖ ବ୍ୟବସ୍ଥା କରାଯାଇଛି । ନୂତନ ଟେଲିକମ୍ ବିଲ୍ ବିଲ ଉପସ୍ଥାପନ କରିବା ସମୟରେ ଟେଲିକମ୍ ମନ୍ତ୍ରୀ କହିଥିଲେ, ‘ଏହାର ଉଦ୍ଦେଶ୍ୟ କେବଳ ଗ୍ରାହକଙ୍କୁ ଉତ୍ତମ ସେବା ଯୋଗାଇବା ନୁହେଁ ବରଂ ଏହି କ୍ଷେତ୍ରରେ ଲାଇସେନ୍ସ ରାଜକୁ ସମ୍ପୂର୍ଣ୍ଣ ଭାବେ ସମାପ୍ତ କରିବା ସହ ଗ୍ରାହକଙ୍କୁ ଅଯାଚିତ କଲରୁ ରକ୍ଷା କରିବା। ନୂତନ ବିଲରେ ଅନେକ ସଂଶୋଧନ କରାଯାଇଛି। ଏଥ‌ିରେ ସରକାର ଟେଲିକମ କମ୍ପାନୀଗୁଡିକୁ ଆଶ୍ବସ୍ତି ପ୍ରଦାନ କରିଛନ୍ତି ଏବଂ ଜରିମାନା ପରିମାଣକୁ ୫୦ କୋଟିରୁ ୫ କୋଟି ଟଙ୍କାକୁ ହ୍ରାସ କରିଛନ୍ତି। ଏହାବ୍ୟତୀତ ଗ୍ରାହକଙ୍କ ବିରୋଧରେ ନିୟମ ଉଲଂଘନ ପାଇଁ ଜରିମାନା ବୃଦ୍ଧି କରାଯାଇଛି। ଏହାସହିତ ଓଟିଟି ପାଇଁ ନିୟମ ସ୍ଥିର କରାଯାଇଛି ।

02/12/2023

ଉଚ୍ଚ ମାଧ୍ୟମିକ ଶିକ୍ଷା ପରିଷଦ(ସିଏଚ୍‌ଏସ୍‌ଇ) ଦ୍ୱାରା ପରିଚାଳିତ ଯୁକ୍ତ୨ ପ୍ରାକ୍ଟିକାଲ ପରୀକ୍ଷା ଜାନୁୟାରୀ ୨ରୁ ଆରମ୍ଭ ହେବ। ଏହା ୧୨ ତାରିଖ ପର୍ଯ୍ୟନ୍ତ ଚାଲିବ। ଏ ନେଇ ପରିଷଦ ପକ୍ଷରୁ ଶୁକ୍ରବାର ବିଜ୍ଞପ୍ତି ପ୍ରକାଶ ପାଇଛି। ତେବେ ଥିଓରୀ ପରୀକ୍ଷା ଫେବୃୟାରୀ ୧୬ରୁ ଆରମ୍ଭ ହେବାର ସମ୍ଭାବନା ରହିଥିଲେ ମଧ୍ୟ ନିର୍ଦ୍ଦିଷ୍ଟ ତାରିଖ ପରବର୍ତ୍ତୀ ସମୟରେ ଘୋଷଣା କରାଯିବ ବୋଲି ଉକ୍ତ ବିଜ୍ଞପ୍ତିରେ ଉଲ୍ଲେଖ ରହିଛି।
ରାଜ୍ୟରେ ମୋଟ ୨,୦୬୫ଟି ଉଚ୍ଚ ମାଧ୍ୟମିକ ସ୍କୁଲ ମଧ୍ୟରୁ ୧,୫୬୦ଟି ଜେନେରାଲ କଲେଜ ଓ ଅବଶିଷ୍ଟ ଯୁକ୍ତ ୨ ସଂସ୍କୃତ କଲେଜ ରହିଛି। ପରୀକ୍ଷା ସରିବା ପରେ ମାର୍ଚ୍ଚ ଶେଷ ସପ୍ତାହ ସୁଦ୍ଧା ରେଜଲ୍ଟ ପ୍ରକାଶ କରିବାକୁ ପରିଷଦ ଲକ୍ଷ୍ୟ ରଖିଛି। ତେବେ ଯଦି ଆବଶ୍ୟକ ପଡ଼େ ସାଧାରଣ ନିର୍ବାଚନ ପ୍ରକ୍ରିୟା ଶେଷ ହେବା ପରେ ରେଜଲ୍ଟ ପ୍ରକାଶ କରାଯିବ। ମାତ୍ର ଆସନ୍ତା ସାଧାରଣ ନିର୍ବାଚନ ପ୍ରକ୍ରିୟାକୁ ନଜର ଦେଇ ଏପରି ଶୀଘ୍ର ପରୀକ୍ଷା କରାଯାଉଛି। ନିର୍ବାଚନ ଲାଗି ରାଜ୍ୟର ଅନେକ କଲେଜରେ ବ୍ୟବସ୍ଥା କରାଯିବା ସହ ଅନେକ ଅଧ୍ୟାପିକା, ଅଧ୍ୟାପକ ଏବଂ କର୍ମଚାରୀଙ୍କୁ ନିର୍ବାଚନ ଦାୟିତ୍ୱରେ ସାମିଲ କରାଯିବ। ତେଣୁ ନିର୍ବାଚନ ପୂର୍ବରୁ ଯୁକ୍ତ୨ ପରୀକ୍ଷା ଶେଷ କରିବା ସହ ରେଜଲ୍ଟ ପ୍ରକାଶ କରିବାକୁ ପରିଷଦ ଗୁରୁତ୍ୱ ଦେଉଥିବା ଜଣାପାଡ଼ିଛି।

02/12/2023

ଚତୁର୍ଥ ଟି -20 ମ୍ୟାଚରେ ଭାରତ ଅଷ୍ଟ୍ରେଲିଆକୁ ୨୦ ରନରେ ପରାସ୍ତ କରିଛି। ଏହି ବିଜୟ ସହିତ ଟିମ୍ ଇଣ୍ଡିଆ ଏହି ସିରିଜରେ ୩-୧ ଅଗ୍ରଣୀ ହାସଲ କରିଛି । ଏହି ମ୍ୟାଚ୍ ଜିତିବା ପାଇଁ ଭାରତୀୟ ଦଳ ଅଷ୍ଟ୍ରେଲିଆ ପାଇଁ ୧୭୫ ରନ୍ ଲକ୍ଷ୍ୟ ରଖିଥିଲା। ଏହାର ଜବାବରେ ଅଷ୍ଟ୍ରେଲିଆ ଦଳ ୨୦ ଓଭରରେ ମାତ୍ର ୧୫୪ ରନ୍ ସ୍କୋର କରିଛି । ଏହି ମ୍ୟାଚରେ ଅକ୍ଷର ପଟେଲ ତାଙ୍କ ନାମରେ ସର୍ବାଧିକ ୩ ୱିକେଟ୍ ହାତେଇଛନ୍ତି।

ରାୟପୁରର ସହିଦ ବୀର ନାରାୟଣ ସିଂ ଅନ୍ତର୍ଜାତୀୟ ଷ୍ଟାଡିୟମଠାରେ ଖେଳାଯାଉଥିବା ୪ର୍ଥ ଟି-୨୦ରେ ଅଷ୍ଟ୍ରେଲିଆ ଆଗରେ ୧୭୫ ରନର ବିଜୟ ଲକ୍ଷ୍ୟ ରଖିଥିଲା ଟିମ୍ ଇଣ୍ଡିଆ ।ପ୍ରଥମେ ବ୍ୟାଟିଂ କରି ନିର୍ଦ୍ଧାରିତ ୨୦ ଓଭରରେ ୯ ୱିକେଟ୍‌ରେ ଭାରତ ୧୭୪ ରନ୍‌ କରିଥିଲା । ଦଳ ପକ୍ଷରୁ ରିଙ୍କୁ ସିଂହ ସର୍ବାଧିକ ୪୬ ଏବଂ ଡେବ୍ୟୁଟାଣ୍ଟ ଜିତେଶ ଶର୍ମା ୩୫ ରନ୍‌ କରିଥିଲେ । ଜବାବରେ ଅଷ୍ଟ୍ରେଲିଆ ବ୍ଯାଟସ୍ ମ୍ୟାନ୍‌ ପ୍ରଥମରୁ ଧୂଆଁଧାର ବ୍ୟାଟିଂ କରିଥିଲେ । ହେଲେ ଟିମ୍‌ ଇଣ୍ଡିଆର ୨ ସ୍ପିନର ରବି ବିଷ୍ନୋଇ ଏବଂ ଅକ୍ଷର ପଟେଲ ଦଳକୁ ମ୍ୟାଚ୍‌ଆଡକୁ କମବ୍ୟାକ୍‌ କରାଇଥିଲେ। ଅକ୍ଷର ପଟେଲ ୪ ଓଭରରେ ୧୬ ରନ୍‌ ଦେଇ ୩ଟି ୱିକେଟ୍‌ ନେଇଥିବାବେଳେ ବିଷ୍ନୋଇ ୪ ଓଭରରେ ୧୭ ରନ୍‌ ଦେଇ ଗୋଟିଏ ୱିକେଟ୍‌ ନେଇଥିଲେ ।

30/11/2023

ଚମ୍ପୁଆ ଉପଖଣ୍ଡସ୍ତରୀୟ କୃଷି ଯନ୍ତ୍ରପାତି ମେଳା

କୃଷି ଜିଲ୍ଲା ଚମ୍ପୁଆ ଆନୁକୂଲ୍ୟରେ ଚମ୍ପୁଆ ପଞ୍ଚାୟତ ସମିତି ପରିସରରେ ଉପଖଣ୍ଡସ୍ତରୀୟ କୃଷି ଯନ୍ତ୍ରପାତି ମେଳା ଅନୁଷ୍ଠିତ ହୋଇଯାଇଛି। ୩ ଦିନ ଧରି ଅନୁଷ୍ଠିତ ଏହି ମେଳାକୁ ଚମ୍ପୁଆ ବିଧାୟିକା ମିନାକ୍ଷୀ ମହାନ୍ତ ଆନୁଷ୍ଠାନିକ ଭାବେ ଉଦ୍‌ଘାଟନ କରିଥିଲେ। କୃଷି ଓ କୃଷକର ଉନ୍ନତି ଲକ୍ଷ୍ୟରେ ଅନୁଷ୍ଠିତ ଏହି କୃଷି ଯନ୍ତ୍ରପାତି ମେଳାରେ ଅନ୍ୟତମ ଅତିଥ୍ୟ ଭାବେ ସଦର ବିଧାୟକ ମୋହନ ଚରଣ ମାଝୀ, ପାଟଣା ବିଧାୟକ ଜଗନ୍ନାଥ ନାଏକ ପ୍ରମୁଖ ଯୋଗ ଦେଇଥିଲେ। ଅନ୍ୟ ମାନଙ୍କ ମଧ୍ୟରେ ଜିଲ୍ଲା ବିଜେଡି ମହିଳା ସଭାପତି ରମଣୀ ନାଏକ, କେନ୍ଦୁଝର ଜିଲ୍ଲା କୃଷି ଅଧିକାରୀ ମିହିର
କୁମାର ସାହୁ, ସହକାରୀ ଯନ୍ତ୍ରୀ ଜଗତବନ୍ଧୁ ପଟ୍ଟନାୟକ, ଚମ୍ପୁଆ କୃଷି ଜିଲ୍ଲା ଅଧିକାରୀ ସତ୍ୟବାନ ସୋରେନ, ଚମ୍ପୁଆ ବ୍ଲକ କୃଷି ଅଧିକାରୀ ନୀଳ ମାଧବ ଦାସ, ପ୍ରିୟଙ୍କା ମିଶ୍ର, ଝୁମ୍ପୁରା ବ୍ଲକ କୃଷି ଅଧିକାରୀ ସୁମନ୍ତ ମହାନ୍ତ, ଯୋଡା କୃଷି ଅଧିକାରୀ ସଂଯୁକ୍ତା ମୁଣ୍ଡା ପ୍ରମୁଖ, ଚମ୍ପୁଆ ବ୍ଲକ ଉନ୍ନୟନ ଅଧିକାରୀ ରାଜା ବୀରବିକ୍ରମ ବଳ ପ୍ରମୁଖ ଯୋଗ ଦେଇଥିଲେ। କୃଷି କ୍ଷେତ୍ରରେ ବୈପ୍ଳବିକ ପରିବର୍ତ୍ତନ ପାଇଁ ରାଜ୍ୟ ସରକାରଙ୍କ ପକ୍ଷରୁ ବିଭିନ୍ନ ଯୋଜନା ମାନ କରାଯାଇଛି।ଚାଷୀମାନଙ୍କୁ ଜଳ ଯୋଗାଣ, ଅଧିକ ଅମଳ କ୍ଷମ, ବିହନ ଯୋଗାଣ, ରୋଗ ପୋକ ନିୟନ୍ତ୍ରଣ ନିମନ୍ତେ ବିଭିନ୍ନ ପଦକ୍ଷେପ ମାନ ଗ୍ରହଣ କରାଯାଇଛି। ମାତ୍ର କୃଷକ ପାରମ୍ପାରିକ ପଦ୍ଧତିରେ କରୁଥିବା ଚାଷ ଯୋଗୁଁ ସମୟ ଅପଚୟ ହେବା ସହିତ ଉତ୍ପାଦନ ବୃଦ୍ଧି ହେଉ ନଥିଲା। କିନ୍ତୁ ସରକାର ବିଭିନ୍ନ ଉନ୍ନତ ଧରଣର ଆଧୁନିକ ଯନ୍ତ୍ରପାତି ବ୍ୟବହାର କରି ଉତ୍ପାଦନ ବୃଦ୍ଧି କରିବାକୁ କୃଷି ଯନ୍ତ୍ରପାତି ମେଳା ମାଧ୍ୟମରେ କୃଷକଙ୍କୁ ସଚେତନ କରିଥିଲେ। ଏଥିପାଇଁ ରାଜ୍ୟ ସରକାର ବିଭିନ୍ନ କୃଷି ଉପକରଣ ଉପରେ ରିହାତିର ସୁବିଧା ଦେବା ସହ ଗ୍ରାମାଞ୍ଚଳର ସ୍ବୟଂସହାୟକ ଗୋଷ୍ଠୀ ମାନଙ୍କୁ ସ୍ଵଳ୍ପ ମୂଲ୍ୟରେ କୃଷି ଯନ୍ତ୍ରପାତି ଯୋଗାଇବାର ବ୍ୟବସ୍ଥା କରିଥିଲେ। ଏହି ଉପଖଣ୍ଡ ସ୍ତରୀୟ ମେଳାରେ ବହୁ ସଂଖ୍ୟାରେ କୃଷି ଯନ୍ତ୍ରପାରି ବିଶେଷଜ୍ଞ ଉପସ୍ଥିତ ରହି ମେଳା ବୁଲିବାକୁ ଆସୁଥ‌ିବା କୃଷକ ମାନଙ୍କୁ ଯନ୍ତ୍ରପାତି ଗୁଡିକର ପରିଚାଳନା ଓ ଉପକାରିତା ବିଷୟରେ ବୁଝାଇଥିଲେ ଓ ଆବଶ୍ୟକ ସ୍ଥଳେ ଡେମୋ କରି ଦେଖାଇଥିଲେ । ଏଥ‌ିରେ ୪୭ ଗୋଟି କୃଷି ଯନ୍ତ୍ରପାତି ଷ୍ଟଲ ସ୍ଥାନ ପାଇଥିଲା। ୨୫୦ରୁ ଊର୍ଦ୍ଧ୍ଵ କୃଷକ ଏହି ମେଳାରେ ଯୋଗ ଦେଇଥ‌ିବା ବେଳେ ସେମାନଙ୍କୁ ରିହାତି ମାଧ୍ୟମରେ ଯନ୍ତ୍ରପାତି କ୍ରୟ କରିବାର ସୁବିଧା ମଧ୍ୟ କରାଯାଇଥିଲା। ଏହି ମେଳାରେ ଗ୍ରାମ୍ୟ କୃଷି ଅଧିକାରୀ, କୃଷକ ସାଥୀ, ସ୍ଵୟଂ ସହାୟକ ଗୋଷ୍ଠୀ ସଦସ୍ୟ ମାନେ ଉପସ୍ଥିତ ଥିଲେ। ଏହି ମେଳାରେ ବିଭାଗ ତରଫରୁ ମାଣ୍ଡିଆରୁ ପ୍ରସ୍ତୁତ ବିଭିନ୍ନ ସୁସ୍ୱାଦୁ ଖାଦ୍ୟ ବଣ୍ଟନ କରାଯାଇଥିଲା ।

27/11/2023

ସୂଚନା ଓ ପ୍ରଯୁକ୍ତି ବିଦ୍ୟାର ବ୍ୟବହାର କରି ପ୍ରତିଦିନ ନୂଆ ନୂଆ ଜିନିଷ ଉଦ୍ଭାବନ ହେଉଛି। ଏହି ନୂତନ ଜ୍ଞାନ କୌଶଳକୁ ବ୍ୟବହାର ମଣିଷ ଗୋଟିଏ ପରେ ଗୋଟିଏ ସଫଳତା ହାସଲ କରୁଛି। ଏଭଳି ଏକ ନୂତନ ଟେକ୍ନୋଲୋଜି ବାହାର କରିବାରେ ସକ୍ଷମ ହୋଇଛନ୍ତି +୨ରେ ପାଠ ପଢ଼ୁଥିବା ଛାତ୍ର ଜ୍ଞାନରଞ୍ଜନ ମିଶ୍ର। ବର୍ତ୍ତମାନର ଇଣ୍ଟରନେଟ ଯୁଗରେ ୱାଇଫାଇର ବହୁଳ ବ୍ୟବହାର ଦେଖି ଏହାର ଏକ ବିକଳ୍ପ ବାହାର କରିଛନ୍ତି ଜ୍ଞାନରଞ୍ଜନ। ଗତ କୋଭିଡ ସମୟରେ ଏଭଳି କିଛି ଗବେଷଣା କରି ଲାଇଟ୍‌‌ରୁ କିଭଳି ମଣିଷ ଇଣ୍ଟରନେଟ ତିଆରି କରିପାରିବ, ତାକୁ ଉଦ୍ଭାବନ କରିବାରେ ସଫଳ ହୋଇଛନ୍ତି। ୱାଇଫାଇ ବ୍ୟବହାର କଲେ ବିକିରଣ (ରେଡିଏସନ)ର ବିପଦ ରହିଥିବାବେଳେ ଏହି ଲାଇଫାଇ ବ୍ୟବହାର କଲେ ମଣିଷ ପ୍ରତି କୌଣସି ବିପଦ ନାହିଁ ବୋଲି ଜ୍ଞାନରଞ୍ଜନ ଦାବି କରିଛନ୍ତି।

ଜ୍ଞାନରଞ୍ଜନଙ୍କ ଘର ଯାଜପୁର ଜିଲ୍ଲା ଦାନଗଦି ବ୍ଲକ ଅନ୍ତର୍ଗତ କବିତ୍ରାଶାସନ ଗ୍ରାମରେ। ବାପା କୃଷ୍ଣପ୍ରସାଦ ମିଶ୍ର ପ୍ରାଥମିକ ବିଦ୍ୟାଳୟର ଜଣେ ଶିକ୍ଷକ ଓ ମାଆ ଗୃହିଣୀ। ଜ୍ଞାନରଞ୍ଜନ ଏବେ ପାଣିକୋଇଲି ଜବାହର ନବୋଦୟ ବିଦ୍ୟାଳୟରେ ପାଠ ପଢ଼଼ୁଛନ୍ତି। ତାଙ୍କର ଏହି ଉଦ୍ଭାବନକୁ ନିକଟରେ ଆନ୍ତର୍ଜାତିକ ସ୍ତରରେ ସ୍ୱୀକୃତି ମିଳିଛି। ଗୋଆରେ ଚଳିତ ମାସ ୯ରୁ ୧୧ ତାରିଖ ପର୍ଯ୍ୟନ୍ତ ଆୟୋଜିତ ଇଣ୍ଡିଆ ଇଣ୍ଟରନ୍ୟାସନାଲ ଇନୋଭେସନ ଏଣ୍ଡ ଇନଭେନସନ ଏକ୍ସପୋ (ଆଇନେକ୍ସ)ରେ ଜ୍ଞାନରଞ୍ଜନ ଭାରତର ପ୍ରତିନିଧିତ୍ୱ କରି ୫ଟି ସ୍ୱର୍ଣ୍ଣପଦକ ହାସଲ କରିଛନ୍ତି। ଏହି ଆଇନେକ୍ସରେ ବିଶ୍ୱ ସ୍ତରରେ ବିଭିନ୍ନ ଦେଶର ଛାତ୍ରସମୂହଙ୍କ ଦ୍ୱାରା ଭିନ୍ନ ଭିନ୍ନ ପ୍ରକଳ୍ପ ପ୍ରଦର୍ଶିତ ହୋଇଥିବାବେଳେ ପ୍ରତିଯୋଗିତା ଓ ଗବେଷଣା ପାଇଁ ଭାରତର ପ୍ରତିନିଧିତ୍ୱ କରି ଜ୍ଞାନରଞ୍ଜନଙ୍କୁ ଏକାକୀ ମିଳିଛି ୫ଟି ସ୍ୱର୍ଣ୍ଣପଦକ।ଜ୍ଞାନରଞ୍ଜନଙ୍କ ଏଭଳି ସଫଳତାକୁ ନେଇ ସବୁ ଆଡୁ ଶୁଭେଚ୍ଛାର ସୁଅ ଛୁଟିବାରେ ଲାଗିଛି। ସେ ପିଲାଟି ବେଳୁ କିଛି ନୂଆ କରିବାର ଉଦ୍ୟମ ଜାରି ରଖିଥିଲେ। ଆଗକୁ ମଧ୍ୟ ଅନେକ ପ୍ରକଳ୍ପରେ କାମ କରୁଛନ୍ତି। ଏହି ଲାଇ-ଫାଇ ଟେକ୍ନୋଲୋଜିକୁ ଅଧିକ ବିକଶିତ କରି ସେ ସୌରଶକ୍ତିରୁ ଇଣ୍ଟରନେଟ ବ୍ୟବହାର ନେଇ ଗବେଷଣା କରୁଥିବା କହିଛନ୍ତି। ଜ୍ଞାନରଞ୍ଜନଙ୍କ ଏଭଳି ପ୍ରତିଭା ଦେଖି ନବୋଦୟ ବିଦ୍ୟାଳୟ ଓ ପରିବାର ପକ୍ଷରୁ ସମସ୍ତ ସହଯୋଗ କରାଯାଉଛି। ଯେଉଁଥିପାଇଁ ସେ ସ୍କୁଲ ସ୍ତରରୁ ଇନ୍ସପାୟାର ମାନକ ଆୱାର୍ଡ ପାଇବା ସହିତ ନ୍ୟାସନାଲ ସାଇନ୍ସ କଂଗ୍ରେସ ପାଇଁ ମନୋନୀତ ହୋଇଥିଲେ। ୨୦୨୨ରେ କ୍ଲଷ୍ଟର ସ୍ତରୀୟ ବିଜ୍ଞାନ ପ୍ରଦର୍ଶନୀରେ ପ୍ରଥମ ସ୍ଥାନ, ଭୋପାଳରେ ଆଞ୍ଚଳିକ ସ୍ତରରେ ଆୟୋଜିତ ପ୍ରଦର୍ଶନୀ ମେଳାରେ ପ୍ରଥମ ସ୍ଥାନ, ୨୦୨୨ରେ ରାଷ୍ଟ୍ରୀୟ ବାଲ ବୈଜ୍ଞାନିକ ପ୍ରଦର୍ଶନୀ ପାଇଁ ମନୋନୀତ ହୋଇଥିଲେ। ଚଳିତ ବର୍ଷ ମଧ୍ୟପ୍ରଦେଶର ଜ୍ଞାନ ଗଙ୍ଗା ବିଶ୍ୱବିଦ୍ୟାଳୟରେ ଆୟୋଜିତ ନ୍ୟାସନାଲ ଟେକ୍ନୋଲୋଜି ଉତ୍ସବରେ ପ୍ରଥମ ସ୍ଥାନ ହାସଲ କରିଥିଲେ। ସରକାରଙ୍କ ପକ୍ଷରୁ ସାହାଯ୍ୟ ଓ ସହଯୋଗ କରାଗଲେ ଅଧିକ ଗବେଷଣା କରିପାରିବେ ବୋଲି ସେ କହିଛନ୍ତି।

24/11/2023

ଶୌଚାଳୟ ନଥିବାରୁ ହୀନସ୍ତା ହେଉଛନ୍ତି ଯାତ୍ରୀ

ଚମ୍ପୁଆ ବ୍ଲକ ଅନ୍ତର୍ଗତ ରିମୁଳି ମୁଖ୍ୟ ବଜାରରେ କୌଣସି ଶୌଚାଳୟ ନଥ‌ିବାରୁ ଯାତ୍ରୀମାନେ ନାହିଁ ନଥ‌ିବା ଅସୁବିଧାର ସମ୍ମୁଖୀନ ହେଉଛନ୍ତି। ମୁଖ୍ୟ ରାସ୍ତା କଡରେ ଲାଗିଥିବା ବିଦ୍ୟାଳୟ ପାଚେରି ବର୍ତ୍ତମାନ କୃତ୍ରିମ ଶୌଚାଳୟ ପାଲଟିଛି। ମାତ୍ର ଯେନତେନ ପ୍ରକାରେ ପୁରୁଷ ଲୋକମାନେ ଶୌଚ କାମ ଶେଷ କରୁଥିବା ବେଳେ ମହିଳା ଯାତ୍ରୀଙ୍କର କଷ୍ଟ ବଢ଼ିବାରେ ଲାଗିଛି ।ସୂଚନା ଅନୁସାରେ ଚମ୍ପୁଆ ବ୍ଳକର ରିମୁଳି ଏକ ଜଙ୍କସନ ଭାବେ ପରିଚିତ। ଗମନା ଗମନ ସୁବିଧା ଦୃଷ୍ଟିରୁ ଏହା ଉପରେ ଗ୍ରାମାଞ୍ଚଳ ଠାରୁ ଆରମ୍ଭ କରି ସହରାଞ୍ଚଳର ଲୋକମାନେ ଏବଂ ଏପରିକି ପଡୋଶୀ ଝାରଖଣ୍ଡ, ମୟୂରଭଞ୍ଜ, ସୁନ୍ଦରଗଡ଼ ଆଦି ଅଞ୍ଚଳର ଯାତ୍ରୀମାନେ ନିର୍ଭର କରିଥାନ୍ତି। ବାଇପାସ ନିର୍ମାଣ ହୋଇଥିଲେ ମଧ୍ୟ ରିମୁଳି ବଜାର ଦେଇ ଶହ ଶହ ଯାତ୍ରୀବାହୀ ବସ ଓ କାର ଯାତାୟତ କରିଥାନ୍ତି। ମାତ୍ର ପରିତାପର ବିଷୟ ଉକ୍ତ ଅଞ୍ଚଳରେ କୌଣସି ଶୌଚାଳୟ ନଥ‌ିବା ବେଳେ ଏପରିକି ପରିସ୍ରାଗାର ମଧ୍ୟ ନଥିବା ବେଳେ ଯାତ୍ରୀମାନେ ନାହିଁ ନଥ‌ିବା ଅସୁବିଧାର ସମ୍ମୁଖୀନ ହେଉଛନ୍ତି । ହେଲେ ଏଥପ୍ରତି ପଞ୍ଚାୟତ ବିଭାଗ ବା ଚମ୍ପୁଆ ପ୍ରଶାସନର ଦୃଷ୍ଟି ପଡୁନାହିଁ। ଦୀର୍ଘ ଦିନରୁ ପରିସ୍ରାଗାର କିମ୍ବା ଶୌଚାଳୟ ନିର୍ମାଣ କରିବା ପାଇଁ ଦାବି ହୋଇ ଆସୁଥିଲେ ମଧ୍ୟ ବର୍ତ୍ତମାନ ସୁଧା କୌଣସି ସୁଫଳ ମିଳିପାରିନାହିଁ। ଅନ୍ୟ ପକ୍ଷ୍ଯରେ ଉପଖଣ୍ଡ ବେସରକାରୀ ବସ୍ ମାଲିକ ସଂଘର ବସ୍ ଗୁଡିକ ଏହି ରାସ୍ତା ଦେଇ ଦୈନନ୍ଦିନ ଯାତାୟାତ କରିବା ସହିତ ଯାତ୍ରୀ ପରିବହନ କରୁଥିଲେ ମଧ୍ୟ ଯାତ୍ରୀଙ୍କ ସୁବିଧା ନିମନ୍ତେ କୌଣସି ପଦକ୍ଷେପ ଗ୍ରହଣ କରାଯାଉନାହିଁ। ଚମ୍ପୁଆ ଉପଖଣ୍ଡ ବେସରକାରୀ ବସ୍ ମାଲିକ ସଂଘରେ ରିମୁଳି ଅଞ୍ଚଳର ବହୁ ମାଲିକ ସଦସ୍ୟ ରହିଥ‌ିବା ତଥା ପୂର୍ବରୁ ପଦ ପଦବୀରେ ରହିଆସୁଥିଲେ ମଧ୍ୟ ଯାତ୍ରୀଙ୍କ ଏହି ପ୍ରମୁଖ ଅସୁବିଧା ବିଷୟରେ କାହିଁକି ପଦକ୍ଷେପ ନେଉନାହାନ୍ତି ତାହା ଏବେ ପ୍ରଶ୍ନବାଚୀ ସୃଷ୍ଟି କରିଛି। ଏ ନେଇ ପଞ୍ଚାୟତ ନିର୍ବାହୀ ଅଧିକାରୀ ସଞ୍ଚୟ ମୋଦିଙ୍କୁ ଯୋଗାଯୋଗ କରିବାରୁ ସେ କହିଛନ୍ତି ଯେ ସ୍ଥାନ ଅଭାବ ଏବଂ ଜବରଦଖଲ ଶୌଚାଳୟ ନିର୍ମାଣ କରିବାରେ ବାଧା ସୃଷ୍ଟି କରୁଛି । ଫଳରେ ଶୌଚାଳୟ ନିର୍ମାଣ ହୋଇପାରୁ ନାହିଁ ବୋଲି ମତ ଦେଇଛନ୍ତି।

22/11/2023

21/11/2023

ଅଷ୍ଟ୍ରେଲିଆ କ୍ରିକେଟ ଦଳର ଅଲରାଉଣ୍ଡର ମିଚେଲ ମାର୍ଶ ଦିନିକିଆ କ୍ରିକେଟ ବିଶ୍ବକପ ଟ୍ରଫି ଉପରେ ଗୋଡ଼ ରଖିବାର ଏକ ଫଟୋ ସାମାଜିକ ଗଣମାଧ୍ୟମରେ ଭାଇରାଲ ହୋଇଛି । ଏକ ସୋଫାରେ ମିଚେଲ ବସିଥିବାବେଳେ ତାଙ୍କ ଆଗରେ ଏକ ଟେବୁଲ ଉପରେ ରଖାଯାଇଥ‌ିବା ବିଶ୍ବକପ ଟ୍ରଫି ଉପରେ ସେ ଗୋଡ଼ ରଖ୍ ଆରାମ କରୁଛନ୍ତି ଏହି ଫୋଟୋ କୁ ଅଷ୍ଟ୍ରେଲିଆ ର ଅଧିନାୟକ ପ୍ୟାଟ କମିନସ ନିଜେ ସୋସିଆଲ ମେଡିଆରେ ପୋଷ୍ଟ କରିଛନ୍ତି ।ଏହା କି ପ୍ରକାର ଖେଳୁଆଡ ମନୋବୃତି ? ବିଶ୍ୱକପ୍ ପାଇଁ କେତେ ଝାଳବୁହା ପରିଶ୍ରମ...୪ ବର୍ଷର ଫାଇଟ୍, ଶହ ଶହ ଦିନର ଅଭ୍ୟାସ । ହେଲେ ବିଶ୍ୱକପ୍ ଜିତିବା ପରେ..ଏଭଳି ଫୋଟୋ ନିଶ୍ଚିତ ଭାବରେ କଙ୍ଗାରୁ ଦଳର ଅହଂକାରିତା କୁ ଦର୍ଶାଉଛି।ଏଥିପାଇଁ ଆଇ ସି ସି କଣ ପଦକ୍ଷେପ ନେଉଛି ଏହା ଦେଖିବାକୁ ବାକି ରହିଛି ।ଏହି ଫଟୋ ସାମାଜିକ ଗଣମାଧ୍ୟମରେ ଆସିବା ପରେ ଏହାକୁ ନେଇ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି । ଅଷ୍ଟ୍ରେଲିଆ କ୍ରିକେଟର୍ ବୃହତ ଟ୍ରଫି ଜିତିପାରନ୍ତି କିନ୍ତୁ ଏହାକୁ ସମ୍ମାନ ଦେବା ଜାଣନ୍ତିନି ବୋଲି ସାମାଜିକ ଗଣମାଧ୍ୟମରେ ୟୁଜର ମାନେ କହିଛନ୍ତି ।

21/11/2023

ଯାତ୍ରୀଙ୍କୁ ହଇରାଣ କରୁଛନ୍ତି ଅଟୋ ମାଲିକ

ଚମ୍ପୁଆ ରେ ଦିନକୁ ଦିନ ଅଟୋ ମାଲିକଙ୍କ ମନମାନି ବଢ଼ିବାରେ ଲାଗିଛି। ସୀମିତ ଦୂରତାକୁ ମଧ୍ୟ ଆବଶ୍ୟକ ଠାରୁ ଅଧିକ ଅର୍ଥ ଦାବି କରାଯାଉଥ‌ିବା ବେଳେ ଯାତ୍ରୀମାନେ ବାଧ୍ୟ ହୋଇ ଅଧିକ ଅର୍ଥ ଦେଉଛନ୍ତି। ଏମାନଙ୍କ ପ୍ରତି କୌଣସି ଅଙ୍କୁଶ ନଥ‌ିବା ଫଳରେ ଯାତ୍ରୀଙ୍କ ମଧ୍ୟରେ ଅସନ୍ତୋଷ ବୃଦ୍ଧି ପାଇବାରେ ଲାଗିଛି। ବିଶେଷ ଭାବରେ ଝାରଖଣ୍ଡ ଅଞ୍ଚଳରୁ ଆସୁଥ‌ିବା ଅଟୋ ଗୁଡ଼ିକ ଏହାର ପ୍ରମୁଖ ଉଦାହରଣ ପାଲଟିଛନ୍ତି ।

ସୂଚନା ଅନୁସାରେ ଚମ୍ପୁଆ ଏକ ଉପାନ୍ତ ଅଞ୍ଚଳ ହୋଇଥିବା ବେଳେ ଝାରଖଣ୍ଡ ମାତ୍ର ୫୦୦ ମିଟର ଦୂରରେ ଅବସ୍ଥିତ । ଝାରଖଣ୍ଡର ଶେଷ ଅଞ୍ଚଳ ଭାବରେ ଜୟନ୍ତୀଗଡ଼ ବଜାର ରହିଥ‌ିବା ବେଳେ ଟାଟା, ରାଞ୍ଚି, ଚାଇଁବସା ଆଦି ଅଞ୍ଚଳରୁ ଲୋକମାନେ ବସ ଯୋଗେ ଉକ୍ତ ଜୟନ୍ତୀଗଡ଼ରେ ଓହ୍ଲେଇ ଓଡ଼ିଶା ଦେଇ ବିଭିନ୍ନ ସ୍ଥାନକୁ ଯାଉଛନ୍ତି। ମାତ୍ର ଜୟନ୍ତୀଗଡ଼ରୁ ଚମ୍ପୁଆ ୫୦୦ ମିଟର ଦୂରକୁ ଯାତ୍ରୀଙ୍କ ଠାରୁ ଅଟୋ ଭଡ଼ା ବାବଦକୁ ୨୦-୫୦ ଟଙ୍କା ଲେଖାଏଁ ଆଦାୟ କରାଯାଉଥ‌ିବା ବେଳେ ଚମ୍ପୁଆରୁ ଯାତ୍ରୀ ନେଇ ଜୟନ୍ତୀଗଡ଼ ଯାଉଥ‌ିବା ଅଟୋ ମାଲିକ ମାନେ ଯାତ୍ରୀ ପିଛା ୧୦-୨୦ ଟଙ୍କା ଲେଖାଏଁ ନେଉଛନ୍ତି। ଅନ୍ୟ ପକ୍ଷରେ ଜୟନ୍ତୀଗଡ଼ରୁ ଓଡ଼ିଶା ଭିତର ସ୍ଥାନକୁ ଯାଉଥିବା ରିଜର୍ଭ ଅଟୋ ଗୁଡ଼ିକ ମନ ଇଛା ଅର୍ଥ ଦାବି କରୁଥ‌ିବା ଜଣାଯାଇଛି। ଅଟୋ ରିର୍ଜଭ କରି ପାଞ୍ଚପୋଖରିଆ ଯିବେ ହେଲେ ଭଡା ୧୦୦-୨୦୦ ରାମଲା ଆସିଲେ ୧୦୦-୨୦୦ । ଅଳପ ଦୂରତା କୁ ଅଧିକ ଅର୍ଥ ଦାବି ଯାତାୟାତ କରୁଥିବା ଯାତ୍ରୀ ଙ୍କ ଅସନ୍ତୋଷ ର କାରଣ ପାଲଟିଛି ।ଚମ୍ପୁଆ ଅଟୋ ସଂଘ ପକ୍ଷରୁ ଏହାକୁ ବିରୋଧ କରାଯିବା ସହ ପଦକ୍ଷେପ ଗ୍ରହଣ କରାଯିବା ଏବଂ ଯାତ୍ରୀଙ୍କ ଆର୍ଥିକ ବୋଝକୁ ଲାଘବ କରିବା ପାଇଁ ଚମ୍ପୁଆ ଥାନା ଅଧିକାରୀ, ଏନ୍ଏସି ଚେୟାରମ୍ୟାନ ଗିରିଜା ଶଙ୍କର ସାହୁଙ୍କୁ ଅବଗତ କରାଯାଇଛି ବୋଲି ସଂଘ ସଭାପତି ବଶିଷ୍ଟ ପୃଷ୍ଟି ସୂଚନା ଦେଇଛନ୍ତି। ଏ ନେଇ ଚମ୍ପୁଆ ଏନ୍‌ଏସି ଅଧ୍ୟକ୍ଷ ଗିରିଜା ଶଙ୍କର ସାହୁଙ୍କୁ ପଚାରିବାରୁ ଏଥପ୍ରତି ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି।

19/11/2023

ପୋଡ଼ିଗଲା ବହୁ ବିଦ୍ୟୁତ୍ ଉପକରଣ
ଚମ୍ପୁଆ ବ୍ଲକ ଅନ୍ତର୍ଗତ ଜାମୁଦଲକ ଜଗନ୍ନାଥପୁର ଠାରେ ଦାୟିତ୍ୱହୀନ ବିଦ୍ୟୁତ ମରାମତି କାର୍ଯ୍ୟ ପାଇଁ ପ୍ରାୟ ୪୦ରୁ ଊର୍ଦ୍ଧ୍ବ ଘରେ ବିଦ୍ୟୁତ ଉପକରଣ ପୋଡ଼ିଯାଇଥିବା ଗ୍ରାମବାସୀ ଅଭିଯୋଗ କରିଛନ୍ତି। ଗ୍ରାମବାସୀଙ୍କ ଅଭିଯୋଗ ଅନୁଯାୟୀ ଗତ ୧୫ ତାରିଖରେ ଗାଁ ମୁଣ୍ଡରେ ଥ‌ିବା ଟ୍ରାନ୍ସଫର୍ମରଟିକୁ ବିଦ୍ୟୁତ୍ ଠିକାଦାର ମରାମତି କରିଥିଲେ। ଓଲଟ ପାଲଟ କାର୍ଯ୍ୟ କରିବା ସହିତ ତରବରିଆ ଭାବେ ବିଦ୍ୟୁତ ସଂଯୋଗ ଦେଇଥିଲେ। ଫଳରେ ଗ୍ରାମର ସମସ୍ତ ବିଦ୍ୟୁତ ଗ୍ରାହକଙ୍କର ୱାରିଂ, ସୁଇଚ ବୋର୍ଡ, ଟିଭି, ଗ୍ରାଇଣ୍ଡର, ମୋବାଇଲ ଆଦି ପୋଡ଼ି ନଷ୍ଟ ହୋଇଯାଇଥିଲା। ତେଣୁ ଏହାର ସୁବ୍ୟବସ୍ଥା ତୁରନ୍ତ କରିବାକୁ ଦାବି କରିବା ସହିତ ଏହା ଜିଲ୍ଲାପାଳଙ୍କ ନଜରକୁ ଅଣାଯିବ ଏବଂ ବିଦ୍ୟୁତ କାର୍ଯ୍ୟାଳୟ ଘେରାଯିବ ବୋଲି ଗ୍ରାମବାସୀ ଲିଖିତ ଦାବି କରିଛନ୍ତି। ଏ ନେଇ ବିଭାଗୀୟ ଅଧିକାରୀ ନାରାୟଣ ବେହେରାଙ୍କୁ ପଚାରିବାରୁ କହିଛନ୍ତି ଯେ ଅଭିଯୋଗ ମୁଁ ପାଇଛି। କର୍ମଚାରୀ ଙ୍କୁ ପଠାଯାଇ ପ୍ରକୃତ କାରଣ କ’ଣ ତାହା ତଦନ୍ତ କରାଯିବ। ମାତ୍ର ବିଦ୍ୟୁତ ଗ୍ରାହକମାନେ
ସେମାନ ଙ୍କ ଘରେ ଆର୍ଥିଙ୍ଗ କରିବା, ମେନ ସୁଇଚ ଲଗାଇବା ଓ ଏମସିଭି ସୁଇଚ ଲଗାଇ ଏହିଭଳି ଦୁର୍ଘଟଣାରୁ ରକ୍ଷା ପାଆନ୍ତୁ ବୋଲି
ସେ କହିଛନ୍ତି ।

18/11/2023

ଆରମ୍ଭ ହୋଇଗଲାଣି କାଉଣ୍ଟଡାଉନ,ହେବାକୁ ଯାଉଛି ସବୁଠୁ ବଡ ଲଢେଇ।କ୍ରିକେଟ୍‌ର ବିଶାଳ ମହାକୁମ୍ଭରେ ରବିବାର ପଡିବ ଯବନିକା । ତେବେ ଫାଇନାଲ ଫାଇଟ୍‌ରେ ଭାରତ ଏବଂ ଅଷ୍ଟ୍ରେଲିଆର ଚୂଡାନ୍ତ ଏକାଦଶ କିଭଳି ରହିବ? ହାଇଭୋଲଟେଜ୍ ମୁକାବିଲାରେ ସାମାନ୍ୟ ଭୁଲ କରିବା ଭାରି ପଡିପାରେ । ତେଣୁ ପ୍ଲେଇଂ ଇଲେଭେନ୍ ଚୟନ ଏକ ବଡ ଫ୍ୟାକ୍ଟର ହେବ ।। ଆଉ ମାତ୍ର କେଇ ଘଣ୍ଟା ପରେ ଟାଇଟଲ ଲଢେଇ ପାଇଁ ପଡିଆକୁ ଓହ୍ଲାଇବେ ଦୁଇ ମହାରଥୀ ଭାରତ ଏବଂ ଅଷ୍ଟ୍ରେଲିଆ।

ଭାରତର ସମ୍ଭାବ୍ୟ Playing 11: ରୋହିତ ଶର୍ମା (ଅଧିନାୟକ), ଶୁଭମନ ଗିଲ୍‌, ବିରାଟ କୋହଲି, ଶ୍ରେୟସ ଆୟର, ଲୋକେସ ରାହୁଲ, ସୂର୍ଯ୍ୟକୁମାର ଯାଦବ, ରବିନ୍ଦ୍ର ଜାଡେଜା, କୁଲଦୀପ ଯାଦବ, ଜସପ୍ରୀତ ବୁମରାହ, ମହମ୍ମଦ ଶାମି ଏବଂ ମହମ୍ମଦ ସିରାଜ I

କିଏ କହୁଛି ଭାରତ ଜିତିବ ତ ଆଉ କିଏ କହୁଛି ଅଷ୍ଟ୍ରେଲିଆ ବିଜୟ ଲାଭ କରିବ। ସବୁଠାରୁ ବଡ଼ କଥା ହେଲା ଯେ ୨୦୦୩ ମସିହା ମାର୍ଚ୍ଚ ମାସ ୨୩ ତାରିଖରେ ମଧ୍ୟ ଭାରତ ଓ ଅଷ୍ଟ୍ରେଲିଆ ମଧ୍ୟରେ ଫାଇନାଲ ମ୍ୟାଚ୍ ଅନୁଷ୍ଠିତ ହୋଇଥିଲା ହେଲେ ଭାରତ ଅଷ୍ଟ୍ରେଲିଆ ଠାରୁ ହାରି ଯାଇଥିଲା ।ଭାରତ ୨୦୦୩ ମସିହାର ପ୍ରତିଶୋଧ ଏହି ଫାଇନାଲ ମ୍ୟାଚରେ ନେଇ ପାରିବ ତ ?

ଭାରତ ଦଳର ଏହି ଫାଇନାଲ ମ୍ୟାଚରେ ବିଜୟର ସମ୍ଭାବନା କେତେ ? ଅଧିନାୟକ ରୋହିତ ଆଇପିଏଲରେ ବହୁତ ଥର ଫାଇନାଲ ଜିତାଇ ଥିବା ବେଳେ ଏବେ କିନ୍ତୁ ଭାରତକୁ ଜିତାଇ ପାରିବେ କି ନାହିଁ ତାହା ଦେଖିବାକୁ ବାକି ରହିଲା।

India vs Australia Lives Cricket Match 2023
🔴HEAD TO HEAD🔴►India 🆚 Australia
ICC MEN'S CRICKET WORLD CUP 2023🏏🏆
🗓 19 NOVEMBER 02:00 PM
🏟️ NARENDRA MODI STADIUM, AHMEDABAD
𝐂𝐖𝐂 𝟐𝟎𝟐𝟑🏏🏆




Everyone

18/11/2023

ପାଣି ପମ୍ପ୍ ଚୋରି; ୫ ଗିରଫ
ଚମ୍ପୁଆ ପୁଲିସ ଦ୍ବାରା ପାଣିମଟର ଚୋରି ଓ କିଣା ମାମଲାରେ ୫ ଜଣ ଗିରଫ ହୋଇଥ‌ିବା ଚମ୍ପୁଆ ପୁଲିସ ସୂଚନା ଦେଇଛନ୍ତି। ସୂଚନା ଅନୁସାରେ ଗତ ୨ ଦିନ ତଳେ ରାମଲା ଅଞ୍ଚଳରୁ ରାତି ଅଧରେ ଉଠା ଜଳସେଚନ ବିଭାଗ ଦ୍ବାରା ପ୍ରଦାନ କରାଯାଇଥିବା ସମରସିବୁଲ ପାଣି ମଟର ଚୋରି ହୋଇଥିବା ମାଲିକ ଶୁଶିଲ କୁମାର ଗିରି ଚମ୍ପୁଆ ଥାନାରେ ଅଭିଯୋଗ କରିଥିଲେ । ଏ ନେଇ ପୁଲିସ ପକ୍ଷରୁ କେସ ନମ୍ବର ୧୯୯/୨୩ ତନାଘନା ଆରମ୍ଭ କରାଯାଇଥିଲା। ଅଭିଯୋଗ ଅନୁସାରେ ୧୬ ତାରିଖ ସକାଳ ସମୟରେ ଶୁଶିଲ ଗିରି ପାଣି
ମଡ଼ାଇବାକୁ ଯାଇଥିବା ବେଳେ ୨ଟି ପାଣି ମଟର ନ ଥିବାର ଜାଣିବାକୁ ପାଇଥିଲେ। ପରେ ପୁଲିସ କୌଣସି ସୂତ୍ରରୁ ଖବର ପାଇ ଚମ୍ପୁଆ ଅଞ୍ଚଳର ରଘୁନାଥ ମହାକୁଡ, ଜଗ ମୁଣ୍ଡା, ମାଗୁରୁ ହେସା ଓ ବାଣେଶ୍ଵର ବେଣ୍ଟକାରକୁ ଗିରଫ କରିବା ପରେ ତାଙ୍କ ଠାରୁ ୨ଟି ସମରସିବୁଲ ମଟର ଜବତ କରିଥିଲେ । ପରେ ପଚରାଉଚୁରା କରିବାରୁ ଆଉ ଗୋଟାଏ ପମ୍ପ ଦୁର୍ଯ୍ୟୋଧନ ପ୍ରଧାନଙ୍କୁ ବିକ୍ରି କରିଥିବା ଜାଣିବାକୁ ପାଇଥିଲେ। ପୁଲିସ ଉକ୍ତ ବିକ୍ରି ମଟରକୁ କିଣିଥିବା ଦୁର୍ଯ୍ୟୋଧନ ପ୍ରଧାନକୁ ମଧ୍ୟ ଗିରଫ କରିଥିଲେ।

15/11/2023

ଶିଶୁ ଦିବସ ଉପଲକ୍ଷେ ଶିଶୁ ସୃଜନ ସଚେତନତା ଚିନ୍ତନ ଗୋଷ୍ଠୀ ତରଫରୁ ଚିତ୍ରାଙ୍କନ ପ୍ରତିଯୋଗିତା l

୧୪/୧୧/୨୦୨୩। ଚିଲ୍ଡରେନ୍ସ କର୍ନର ଶିଶୁ ସୃଜନ ସଚେତନତା ଚିନ୍ତନ ଗୋଷ୍ଠୀ ଆନୁକୁଲ୍ୟରେ ଶିଶୁ ଦିବସ ଉପଲକ୍ଷେ ସ୍ବତନ୍ତ୍ର ଚିତ୍ରାଙ୍କନ ପ୍ରତିଯୋଗିତା ଅନୁଷ୍ଠିତ ହୋଇଯାଇଛି l ପ୍ରତିଯୋଗିତାରେ ବିଭିନ୍ନ ବିଦ୍ୟାଳୟର ଛାତ୍ର ଛାତ୍ରୀ ଭାଗ ନେଇଥିବାର ଦେଖିବାକୁ ମିଳିଛିl ଉପକନିଷ୍ଠ ବିଭାଗ ରେ 15 ଜଣ, କନିଷ୍ଠ ବିଭାଗ ରେ 99 ଜଣ ଏବଂ ବରିଷ୍ଠ ବିଭାଗରେ 45 ଜଣ ଭାଗ ନେଇଥିଲେ। ସେମାନଙ୍କ ମଧ୍ୟରୁ ଉତ୍ତୀର୍ଣ୍ଣ ଛାତ୍ର ଛାତ୍ରୀ ହିସାବରେ ଉପକନିଷ୍ଠ ବିଭାଗରେ ବଂଶିତା ବେହେରା (ପ୍ରଥମ) , ଆଦ୍ୟାଶା ପନ୍ଵର (ଦ୍ୱିତୀୟ) ଲକ୍ଷ୍ମୀ ପ୍ରିୟା ନାୟକ( ତୃତୀୟ ) ସ୍ଥାନ ଅଧିକାର କରିଥିଲେ। କନିଷ୍ଠ ବର୍ଗ ରେ ପ୍ରିୟଙ୍କା ପ୍ରିୟଦର୍ଶିନୀ ମହାନ୍ତ ପ୍ରଥମ, ସୃଷ୍ଟି ସ୍ୱରୂପା ପ୍ରଧାନ ଓ ଗିରିଜା ଶଙ୍କର ବେହେରା ଯୁଗ୍ମ ବିଜେତା ଭାବେ ଦ୍ଵିତୀୟ ଏବଂ ସୁକୁମାରୀ ହାଇବ୍ରୁ ତୃତୀୟ ସ୍ଥାନରେ ରହିଥିଲେ। ବରିଷ୍ଠ ବର୍ଗ ରେ ଶିବାନୀ ପଶାୟତ ପ୍ରଥମ, ତବିବା ପରବିନ୍ ଦ୍ଵିତୀୟ ଏବଂ ଯୁଗ୍ମ ବିଜେତା ଭାବେ ଆଶୁତୋଷ ପ୍ରଧାନ ଓ ସୃଷ୍ଟିପଟ ପିଙ୍ଗୁଆ ତୃତୀୟ ସ୍ଥାନରେ ରହିଥିଲେ। ଏହା ସହ ୟଶବନ୍ତ ଦେହୁରୀ ଓ ନିକ୍ସିତା ମହାନ୍ତଙ୍କୁ ତାଙ୍କ ସୁନ୍ଦର ଚିତ୍ର କଳା ପାଇଁ ସାନ୍ତ୍ବନା ମୂଳକ ପୁରସ୍କାର ପ୍ରଦାନ କରାଯାଇଥିଲା lମୋ ବିଦ୍ୟାଳୟ, ସ୍ୱଚ୍ଛ ଭାରତ, G-20;ଉନ୍ନତ ବିଶ୍ଵ ପ୍ରତି ଏକ ଦୃଷ୍ଟି କୋଣ ଆଦି ବିଷୟ ଆଧାରିତ ଚିତ୍ରାଙ୍କନ ପ୍ରତିଯୋଗିତାରେ ପ୍ରମାଣ ପତ୍ର ଦେଇ ଅବସର ପ୍ରାପ୍ତ ଶିକ୍ଷକ ରାସେଶ୍ଵର ମହାନ୍ତ ପଣ୍ଡିତ ନେହେରୁଙ୍କ ସ୍ମୃତି ଚାରଣ କରିବା ସହ ଚିତ୍ରାଙ୍କନ ସୃଜନଶୀଳତାର ଉତ୍ତମ ମାର୍ଗ ବୋଲି ବକ୍ତବ୍ୟ ରଖିଥିଲେ । ଶିଶୁ ସୃଜନ ସଚେତନତା ଚିନ୍ତନ ଗୋଷ୍ଠୀର ରାଜକିଶୋର ଶତପଥୀଙ୍କ ତଦାରଖରେ ଏହି ଚିତ୍ରାଙ୍କନ ପ୍ରତିଯୋଗିତା କାର୍ଯ୍ୟକ୍ରମ ସୁରୁଖୁରୁରେ ସମାହିତ ହୋଇଥିଲା ଏବଂ ଏହା ସହ ସେ ଆଗାମୀ ବର୍ଷ କବିତା ଲିଖନ ଓ ଗଳ୍ପ ଲିଖନ ଭଳି ପ୍ରତିଯୋଗିତା ମଧ୍ୟ ଆୟୋଜନ କରାଯିବ ବୋଲି ନିଜର ବକ୍ତବ୍ୟ ରଖିଥିଲେ l ଏଥିରେ ଶିଶୁ ବିଦ୍ୟାମନ୍ଦିରର ସମସ୍ତ ଗୁରୁଜୀ ଗୁରୁମା ସହଯୋଗ କରି ଛାତ୍ରଛାତ୍ରୀ ମାନଙ୍କୁ ଉତ୍ସାହିତ କରିଥିଲେ।

08/11/2023

ଚମ୍ପୁଆ ଥାନା ଅଧୀନସ୍ତ ତଥା ରିମୁଳି ଫାଣ୍ଡି ଅନ୍ତର୍ଗତ ତଡୁଆବାହାଳରେ ଘଟିଥିବା ଅପହରଣ ମାମଲାରେ ଚମ୍ପୁଆ ପୁଲିସ ୪ଜଣକୁ ଗିରଫ କରିବାରେ ସଫଳ ହୋଇଛି। ଅଭିଯୁକ୍ତ ୪ ଜଣଙ୍କୁ କୋର୍ଟଚାଲାଣ କରିଥିବା ଆଇଆଇସି ତ୍ରିନାଥ ସେଠୀ ସୂଚନା ଦେଇଛନ୍ତି। ସୂଚନା ଅନୁସାରେ ଗତ ୫ ତାରିଖ ସକାଳ ୮ ସମୟରେ ତଡୁଆବାହାଳର ଗିରିଜା ଶଙ୍କର ମହାନ୍ତଙ୍କୁ ଟଙ୍କା ଲୋଭରେ ଦୁର୍ବୃତ୍ତମାନେ ଅପହରଣ କରି ନେଇଥିଲେ। ଫୋନ ମାଧ୍ୟମରେ ଘର ଲୋକଙ୍କୁ ଠାରୁ ଟଙ୍କା ମାଗିଥିଲେ। ଘର ଲୋକ ଫୋନ ପେ ମାଧ୍ୟମରେ ଟଙ୍କା ଦେଇଥିଲେ। ଏନେଇ ଚମ୍ପୁଆ ଥାନାରେ ଅଭିଯୋଗ ପରେ ଚମ୍ପୁଆ ଏସ୍‌ଡିପିଓ ବିଜୟ କୃଷ୍ଣ ମଲ୍ଲିକଙ୍କ ନିର୍ଦ୍ଦେଶକ୍ରମେ ୩ ଗୋଟି ସ୍କାର୍ଡ କେନ୍ଦୁଝର ଓ ମୟୂରଭଞ୍ଜର ବିଭିନ୍ନ ସ୍ଥାନରେ ଚଢ଼ଉ ଆରମ୍ଭ କରିଥିଲେ। ଶେଷରେ ଚମ୍ପୁଆ ଆଇଆଇସି ତ୍ରିନାଥ ସେଠୀଙ୍କ ନେତୃତ୍ବରେ ଘାଗରବେଡା ଅଞ୍ଚଳରୁ ଗୋଟିଏ ପରିତ୍ୟକ୍ତ ଘରୁ ଗିରିଜା ଶଙ୍କର ମହାନ୍ତଙ୍କୁ ଉଦ୍ଧାର କରିବା ସହିତ ଉକ୍ତ ୪ଜଣ ଅଭିଯୁକ୍ତଙ୍କୁ ଗିରଫ କରି ଆଜି କୋର୍ଟଚାଲାଣ କରାଯାଇଥ‌ିବା ଜଣାଯାଇଛି। ପୁଲିସ ସେମାନଙ୍କ ଠାରୁ ଏକ ବାଇକ ଓ ମାରଣାସ୍ତ୍ର ଜବତ କରିବା ସହ ୧ଲକ୍ଷ ୨୩ହଜାର ଟଙ୍କା ଜବତ କରିଛି। ଅଭିଯୁକ୍ତମାନେ ଝୁମ୍ପୁରା ଥାନା ଅଧୀନସ୍ଥ ଜାମୁଦାପାଳ ଅଞ୍ଚଳର ଅଶୋକ ମହାକୁଡ(୩୮), ଘାଗରବେଡା ଅଞ୍ଚଳର ମନୋରଞ୍ଜନ ମହାନ୍ତ (୩୦), ମନୋଜ କୁମାର ମହାନ୍ତ (୨୮), ଉଦୟନାଥ ମହାନ୍ତ (୨୯) ବୋଲି ଜଣାପଡ଼ିଛି। ଅପହରଣ ହୋଇଥିବା ଗିରିଜା ମହାନ୍ତଙ୍କ ଅବସ୍ଥା ଗୁରୁତର ହୋଇଥିବାରୁ ସେ ଅଧିକ ଚିକିତ୍ସା ପାଇଁ କଟକ ସ୍ଥାନାନ୍ତର ହୋଇଛନ୍ତି।

08/11/2023

'ଶିଶୁ ଦିବସ ଉପଲକ୍ଷେ ସ୍ୱତନ୍ତ୍ର ଚିତ୍ରାଙ୍କନ ପ୍ରତିଯୋଗିତା ଘୋଷଣା! ଶିଶୁ ପ୍ରତିଭାମାନଙ୍କୁ ସେମାନଙ୍କର ପ୍ରତିଭା ପ୍ରଦର୍ଶନ କରିବା ପାଇଁ ଏକ ପ୍ଲାଟଫର୍ମ ପ୍ରଦାନ କରିବାକୁ ଆମେ ଉତ୍ସାହିତ | ଏହି ପ୍ରତିଯୋଗିତା ପିଲାମାନଙ୍କୁ ପେନ୍ସିଲ୍, କ୍ରାୟନ୍, କିମ୍ବା ପେଣ୍ଟ ବ୍ୟବହାର କରି ସେମାନଙ୍କର ସୃଜନଶୀଳତା ପ୍ରକାଶ କରିବାର ସୁଯୋଗ ପ୍ରଦାନ କରେ | ଆମେ ସମସ୍ତ ବୟସର ପିଲାମାନଙ୍କୁ କାଗଜରେ ସେମାନଙ୍କର କଳ୍ପନାତ୍ମକ ସୃଷ୍ଟିଗୁଡ଼ିକୁ ଅଂଶୀଦାର କରିବାକୁ ସ୍ୱାଗତ କରୁ | ଆତ୍ମ-ଅଭିବ୍ୟକ୍ତିର ଏହି ଜୀବନ୍ତ ଯାତ୍ରାରେ ଆମ ସହିତ ଯୋଗ ଦିଅ | ତୁମର କଳା ସାମଗ୍ରୀ ଧର, ଏବଂ ତୁମର କଳ୍ପନାକୁ ଆଗକୁ ବଢିବାକୁ ସୁଯୋଗ ଦିଅ।

04/11/2023

ଚିକିତ୍ସାଳୟରେ ମାଦକ ଦ୍ରବ୍ୟ ନିଷିଦ୍ଧ

ଚମ୍ପୁଆ ଉପଖଣ୍ଡ ଚିକିତ୍ସାଳୟ ପରିସରରେ ଓ ବାହାରେ ମାଦକ ଦ୍ରବ୍ୟ ନିଷିଦ୍ଧ କରାଯାଇଥିବା ସୂଚନା ମିଳିଛି। ଚମ୍ପୁଆ ଉପଖଣ୍ଡ ସୁପରିଟେଣ୍ଡେଣ୍ଟ ଡଃ ଉମାକାନ୍ତ ସାହୁ ଏ ସମ୍ବନ୍ଧରେ ସୂଚନା ପ୍ରଦାନ କରିଛନ୍ତି । ଉପଖଣ୍ଡ ଚିକିତ୍ସାଳୟ ଭିତରେ ରୋଗୀ ସମ୍ପର୍କୀୟ ଅଥବା ରୋଗୀ ସହିତ ଜଡିତ ଥିବା ବ୍ୟକ୍ତି ବା କୌଣସି ବ୍ୟକ୍ତି ବିଶେଷଙ୍କ ନିକଟରେ ଗୁଟୁଖା ଯଥା ପାନମସଲା, ସଫଲ, କମଲାପସନ୍ଦ ଆଦି ମାଦକ ଦ୍ରବ୍ୟ ସେବନ କଲେ ବା ପାଖରେ ରଖିଲେ ଆଇନ ଅନୁଯାୟୀ ଦଣ୍ଡିତ ହେବେ । ଏକଶତ ଟଙ୍କା ଠାରୁ ପାଞ୍ଚଶତ ଟଙ୍କା ଯାଏଁ ଜୋରିମାନା କରାଯିବ । ଏଥି ନିମନ୍ତେ ସମୟ ସମୟରେ ସ୍କ୍ୱାର୍ଡ ସଜାଗ ରହି ଯାଞ୍ଚ କରାଯିବାକୁ ଯୋଜନା କରାଯାଉଛି। ତେଣୁ ସମସ୍ତ ରୋଗୀ ଓ ରୋଗୀ ସମ୍ପର୍କୀୟ ଡାକ୍ତରଖାନାକୁ ଆସିବା ସମୟରେ ଏଥପ୍ରତି ସଜାଗ ରହିବାକୁ ଅନୁରୋଧ କରାଯାଇଛି। ଏତଦ୍ ବ୍ୟତୀତ ଡାକ୍ତରଖାନା ପରିସର ବାହାରେ ସାମୟିକ ଭାବେ ତନଖି କରାଯାଇ ଜୋରିମାନା ଆଦାୟ କରାଯାଉଛି ।

02/11/2023

ଆଦର୍ଶ ବିଦ୍ୟାଳୟ ପ୍ରବେଶିକା ପରୀକ୍ଷା ପାଇଁ ପଞ୍ଜୀକରଣ ଆରମ୍ଭ

ଓଡ଼ିଶା ଆଦର୍ଶ ବିଦ୍ୟାଳୟ ଓ ଓଡ଼ିଶା ମାଇନିଂ ଆଦର୍ଶ ବିଦ୍ୟାଳୟ ପ୍ରବେଶିକା ପରୀକ୍ଷା ପାଇଁ ଅନ୍‌ଲାଇନ୍ ପଞ୍ଜୀକରଣ ପ୍ରକ୍ରିୟା ବୁଧବାରଠାରୁ ଆରମ୍ଭ ହୋଇଛି। ରାଜ୍ୟରେ ଥ‌ିବା ୩୧୪ଟି ଓଡ଼ିଶା ଆଦର୍ଶ ବିଦ୍ୟାଳୟ ଓ ୫ଟି ଓଡ଼ିଶା ମାଇନିଂ ଆଦର୍ଶ ବିଦ୍ୟାଳୟର ପ୍ରବେଶିକା ପରୀକ୍ଷା ଦେବା ପାଇଁ ଛାତ୍ରଛାତ୍ରୀମାନେ www.oav. edu.inରେ ନାମ ପଞ୍ଜୀକରଣ କରିପାରିବେ | ପଞ୍ଜୀକରଣର ଶେଷ ତାରିଖ ନଭେମ୍ବର ୨୦ ତାରିଖକୁ ଧାର୍ଯ୍ୟ ହୋଇଛି। ଏ ସଂପର୍କରେ ଆଜି ବିଦ୍ୟାଳୟ ଓ ଗଣଶିକ୍ଷା ବିଭାଗ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି। ଉପଲବ୍ଧ ଥ‌ିବା ସମସ୍ତ ସିଟ୍ ମଧ୍ୟରୁ ୫୦ପ୍ରତିଶତ ସିଟ୍ ଛାତ୍ରୀମାନଙ୍କ ପାଇଁ ସଂରକ୍ଷିତ ରହିଛି। ସୂଚନା ଅନୁଯାୟୀ, ରାଜ୍ୟରେ ୧୧୭ଟି ଆଦର୍ଶ ବିଦ୍ୟାଳୟରେ ଛାତ୍ରୀନିବାସ କାର୍ଯ୍ୟକ୍ଷମ ହେଉଛି।

27/10/2023

ଏ ବର୍ଷ କୁମାର ପୂର୍ଣ୍ଣିମା ଦିନ ପଡୁଛି ଚନ୍ଦ୍ର ଗ୍ରହଣ।ଏହା ହେଉଛି ରାହୁଗ୍ରସ୍ତ ଖଣ୍ଡଗ୍ରାସ ଚନ୍ଦ୍ର ଗ୍ରହଣ। ସୂଚନା ଅନୁସାରେ ଗ୍ରହଣ ସ୍ପର୍ଶ ସମୟ ରାତି ୧ ଟା ୪ ମିନିଟ୍ ୫୫ ସେକେଣ୍ଡ ଏବଂ ସର୍ବମୋକ୍ଷ ସମୟ ରାତି ୨ ଟା ୨୪ ମିନିଟ୍ ୨ ସେକେଣ୍ଡ। ଅର୍ଥାତ୍ ଗ୍ରହଣ ଅବଧି ହେଉଛି ୧ ଘଣ୍ଟା ୧୯ ମିନିଟ୍ ୭ ସେକେଣ୍ଡ।ତେବେ ଗ୍ରହଣ ର ୯ ଘଣ୍ଟା ପୂର୍ବରୁ ପାକ ତ୍ୟାଗ ବିଧି। ଅପରାହ୍ନ ୪ ଟା ୪ ମିନିଟ୍ ୫୫ ସେକେଣ୍ଡ ଠାରୁ ରାତି ୨ ଟା ୨୪ ମିନିଟ୍ ୨ ସେକେଣ୍ଡ ପର୍ଯ୍ୟନ୍ତ ପାକତ୍ୟାଗ, ଅନ୍ନ ଭୋଜନ ଓ ଦେବନୀତି ନିଷିଦ୍ଧ।
ଗ୍ରହଣ ଦର୍ଶନ ଶୁଭ : ମିଥୁନ, ବିଛା, ଧନୁ, ମକର ,କୁମ୍ଭ, ମୀନ
ଗ୍ରହଣ ଦର୍ଶନ ଅଶୁଭ: ମେଷ, ବୃଷ, କର୍କଟ, ସିଂହ, କନ୍ୟା

05/10/2023

ଗ୍ରାମସଭାକୁ ନିର୍ବାଚିତ ପ୍ରତିନିଧ‌ିଙ୍କ ପ୍ରତ୍ୟାଖ୍ୟାନ

୧୫ ଦଫା ଦାବି ନେଇ ରାଜ୍ୟ ସାରା ସରପଞ୍ଚମାନେ ଧାରଣାରେ ବସି ଥ‌ିବା ବେଳେ ଏହାର ପ୍ରଭାବ ପ୍ରତି ପଞ୍ଚାୟତରେ ଦେଖିବାକୁ ମିଳିଛି । ସରପଞ୍ଚମାନଙ୍କ ଦାବିକୁ ସମର୍ଥନ ଜଣାଇ ଆଜି ପ୍ରତି ପଞ୍ଚାୟତରେ ଗାନ୍ଧୀ ଜୟନ୍ତୀ ଅବସରରେ ହେବାକୁ ଥ‌ିବା ଗ୍ରାମସଭା ଗୁଡିକୁ ପଞ୍ଚାୟତ ନିର୍ବାଚିତ ପ୍ରତିନିଧି ମାନେ ପ୍ରତ୍ୟାଖ୍ୟାନ କରିଥିବା ବେଳେ ବହୁ ପଞ୍ଚାୟତରେ ଗ୍ରାମ ସଭା ହୋଇପାରି ନ ଥିଲା । ଗାନ୍ଧୀ ଜୟନ୍ତୀ ଠାରୁ ପଞ୍ଚାୟତ କାର୍ଯ୍ୟ ଖସଡା ପ୍ରସ୍ତୁତ ପାଇଁ ପ୍ରତିବର୍ଷ ଗ୍ରାମ ସଭାର ଆୟୋଜନ କରାଯାଇଥାଏ। ଚଳିତ ବର୍ଷ ସରପଞ୍ଚ ସଂଘ ୧୫ ଦଫା ଦାବି ନେଇ କାର୍ଯ୍ୟବନ୍ଦ ଆନ୍ଦୋଳନରେ ସାମିଲ ହେବା ଯୋଗୁଁ ଗତ ୨୨ ତାରିଖଠାରୁ ପଞ୍ଚାୟତ କାର୍ଯ୍ୟାଳୟକୁ ଆସୁ ନ ଥ‌ିବାରୁ ପଞ୍ଚାୟତ କାର୍ଯ୍ୟରେ ଭାଗ ନେଉ ନାହାନ୍ତି । ଏ ନେଇ ଚମ୍ପୁଆ ବ୍ଳକ ସରପଞ୍ଚ ସଂଘ ସଭାପତି ସନ୍ତୋଷ ନାଏକଙ୍କୁ ଯୋଗାଯୋଗ କରାଯିବାରୁ ସରପଞ୍ଚଙ୍କ ଦାବିକୁ ସମର୍ଥନ କରି ବ୍ଳକର ସମସ୍ତ ପଞ୍ଚାୟତର ନିର୍ବାଚିତ ପ୍ରତିନିଧି ଅସହଯୋଗ କରିଥିବା ସୂଚନା ଦେଇ ଥିଲେ ।

04/10/2023

କାଶିପୁର ଲକ୍ଷ୍ମୀମନ୍ଦିର ହୁଣ୍ଡି ତାଡି ଚୋରି

କେନ୍ଦୁଝର ସହର କାଶିପୁର ନିକଟ ଲକ୍ଷ୍ମୀମନ୍ଦିର ରୁ ସୋମବାର ରାତି ଦୁବୁର୍ତ୍ତ ମାନେ ହୁଣ୍ଡି ତାଡି ଟଙ୍କା ଓ ସୁନା ଚୋରି କରି ନେଇଛନ୍ତି।
ଦୁବୁର୍ତ୍ତ ମାନେ ମନ୍ଦିର ପରିସରରେ ଥିବା ହୁଣ୍ଡି ବାହାରକୁ ଘୋଷାରି ନେଇ ମନ୍ଦିର ତଳେ ପକାଇ ଏହାକୁ ଭାଙ୍ଗି ସେଥ‌ିରେ ଥ‌ିବା ଟଙ୍କା, ସୁନା ଅଳଙ୍କାର ଲୁଟ ନେଇଛନ୍ତି। ମନ୍ଦିର ପ୍ରତିଷ୍ଠା ହେବା ଦିନଠାରୁ ଦୀର୍ଘ ୧ ବର୍ଷରୁ ଅଧିକ ଏହି ହୁଣ୍ଡି ଖୋଲାଯାଇନଥିଲା। ଏଣୁ ଏଥିରେ କେତେ ଟଙ୍କା ଓ ସୁନା ଥିଲା ତାହା ଜଣାପଡ଼ିନାହିଁ । ଏ ନେଇ ଲକ୍ଷ୍ମୀପୂଜା କମିଟି,କାଶିପୁରର ସମ୍ପାଦକ କୁମର ସେନାପତି ଟାଉନ ଥାନାରେ ଅଭିଯୋଗ କଲା ପରେ ପୁଲିସ ଘଟଣାର ତଦନ୍ତ ଆରମ୍ଭ କରିଛି। ଏଠାରେ ସୂଚନାଯୋଗ୍ୟ ଯେ, ଗତ ମାସକ ମଧ୍ୟରେ କେନ୍ଦୁଝର ସହରରେ ୧୦ରୁ ଉର୍ଦ୍ଧ୍ବ ଦୋକାନ ଓ ଘର ଚୋରି ହୋଇଥିବାବେଳେ ଚୋର ଧରା ପଡୁନଥିବାରୁ ଲୋକଙ୍କ ମଧ୍ୟରେ ଭୟ ସୃଷ୍ଟି ହୋଇଛି । ପୂର୍ବରୁ ସହରର ମୁଖ୍ୟ ରାସ୍ତା କଡରେ ଥ‌ିବା ଦୁଇଟି ଦୋକାନରୁ ପାଖାପାଖି ୮୦ହଜାର ଟଙ୍କା ଚୋରୀ ହୋଇଥିଲେ ହେଁ ଚୋରଙ୍କ ପତ୍ତା ମିଳିନାହିଁ।

02/10/2023

ଚନ୍ଦ୍ରଶେଖର କଲେଜକୁ ଜମି ପଟ୍ଟା ପ୍ରଦାନ

ଚମ୍ପୁଆ ତହସିଲ ପ୍ରଶାସନ ପକ୍ଷରୁ ଚନ୍ଦ୍ରଶେଖର କଲେଜ ଚମ୍ପୁଆକୁ ଜମି ପଟ୍ଟା ହସ୍ତାନ୍ତର କରାଯାଇଛି । ଏହି ଖତିୟାନ ନିମନ୍ତେ କଲେଜ ପକ୍ଷରୁ ବହୁ ଦିନରୁ ଅନେକ ପଦକ୍ଷେପ ଗ୍ରହଣ କରାଯାଇ ଥିଲେ ମଧ୍ୟ ଅନୁମୋଦନ ମିଳି ପାରୁନ ଥିଲା । ଚମ୍ପୁଆ ଉପଜିଲ୍ଲାପାଳ ସୁକାନ୍ତ ମାଝିଙ୍କ କଲେଜ ପରିଦର୍ଶନ ସମୟରେ କଲେଜର ଜମି ପଟ୍ଟା ନ ଥିଲେ ଭିଭିଭୂମି ପ୍ରତିଷ୍ଠା ନିମନ୍ତେ ଜିଲା ଖଣିଜ ପାଣ୍ଠି ମିଳିପାରିବ ନାହିଁ ବୋଲି ପ୍ରକାଶ କରି ତାଙ୍କର ପ୍ରତ୍ୟକ୍ଷ ତତ୍ତ୍ଵାବଧାନରେ ଜିଲା ପ୍ରଶାସନକୁ ଅବଗତ କରାଇ ଥିଲେ । ଏହାପରେ ଏହି କାର୍ଯ୍ୟ ତ୍ବରାନ୍ବିତ ହୋଇ ଆଜି ତହସିଲଦାର ଡା ସାଇ ସସ୍ମିତା ହୋତା,ଅତିରିକ୍ତ ତହସିଲଦାର ରମେଶ ଚନ୍ଦ୍ର ନାଏକ ଖତିୟାନକୁ କଲେଜର ଅଧ୍ୟକ୍ଷ ରାଜେନ୍ଦ୍ର କରଙ୍କୁ ପ୍ରଦାନ କରିଛନ୍ତି। ଫଳରେ କଲେଜର ଭିତିଭୂମି ସମ୍ବଳିତ ନିର୍ମାଣ କାର୍ଯ୍ୟ ଅନୁମୋଦନ ମିଳିବାର ଆଶା ଉଜ୍ଜଳ ହୋଇଛି । ଏନେଇ କଲେଜର ସମସ୍ତ କର୍ମଚାରୀ ଛାତ୍ରଛାତ୍ରୀ ଓ ବୁଦ୍ଧିଜୀବୀ ମହଲରେ ଆନନ୍ଦର ଲହରୀ ଖେଳି ଯାଇଛି।

30/09/2023

କେନ୍ଦ୍ରୀୟ ବିଦ୍ୟାଳୟ ସ୍ଥାପନ ପାଇଁ ଜମି ହସ୍ତାନ୍ତର

ଅନେକ ଅନିଶ୍ଚିତତା ଦେଇ ଗତି କରୁଥ‌ିବା କେନ୍ଦୁଝର ଜିଲ୍ଲା ଚମ୍ପୁଆ ରାମଲା ସେକ୍ଟରରେ ପ୍ରସ୍ତାବିତ କେନ୍ଦ୍ରୀୟ ବିଦ୍ୟାଳୟ ସ୍ଥାପନ ପାଇଁ ଆଜି ସ୍ଥାନୀୟ ତହସିଲ ପ୍ରଶାସନ ପକ୍ଷରୁ କେଭି ସଂଗଠନକୁ ଜମି ହସ୍ତାନ୍ତର କରାଯାଇଛି। ଏହି ଅବସରରେ ସ୍ଥାନୀୟ ତହସିଲଦାର ଡ. ସାଇ ସସ୍ମିତା ହୋତା, ଅତିରିକ୍ତ ତହସିଲଦାର ରମେଶ ନାଏକ, ଆରଆଇ, ଫରେଷ୍ଟ ରେଞ୍ଜ ଅଧିକାରୀ ଅକ୍ଷୟ ଛତ୍ରିଆ ପ୍ରମୁଖ କେନ୍ଦ୍ରୀୟ ବିଦ୍ୟାଳୟ ସଂଗଠନର ପ୍ରତିନିଧୂ ତଥା କେନ୍ଦୁଝର କେଭିର ଅଧ୍ୟକ୍ଷ ସୁଶାନ୍ତ କୁମାର ସେଠୀଙ୍କୁ ଜମି ହସ୍ତାନ୍ତର ଦଲିଲ ପ୍ରଦାନ କରିଛନ୍ତି। ଆଞ୍ଚଳିକ କେନ୍ଦ୍ରୀୟ ବିଦ୍ୟାଳୟ ସଂଗଠନ ଭୁବନେଶ୍ବରର ଡେପୁଟି କମିଶନରଙ୍କ ନିର୍ଦ୍ଦେଶ କ୍ରମେ ଅଧ୍ୟକ୍ଷ ଶ୍ରୀ ସେଠୀ ଉକ୍ତ ଦଲିଲ ଗ୍ରହଣ କରି ଆଜି ଭୁବନେଶ୍ଵର ପ୍ରେରଣ କରିବେ ବୋଲି ପ୍ରକାଶ କରିଛନ୍ତି। ଏଠାରେ ସ୍ମରଣଯୋଗ୍ୟ କି ୨ ମାସ ପୂର୍ବରୁ କେଭି ସଂଗଠନ ଏବଂ ରାଜ୍ୟ ସରକାରଙ୍କ ନିର୍ଦ୍ଦେଶକ୍ରମେ କେନ୍ଦୁଝର କେଭିର ଅଧ୍ୟକ୍ଷ, ପ୍ରଶାସନିକ ଅଧିକାରୀ, ସ୍ଥାନୀୟ ଏମ୍ ଏଲଏ, ଏନ୍ ଏସି ଚେୟାରମେନ, ବିକାଶ ପରିଷଦର ସଦସ୍ୟଗଣ ଓ ଅନ୍ୟ ମାନ୍ୟଗଣ୍ୟ ବ୍ୟକ୍ତିଙ୍କ ଉପସ୍ଥିତିରେ ତହସିଲ ପକ୍ଷରୁ ଜମି ଚିହ୍ନଟ ଏବଂ ଖୁଣ୍ଟ ପୋତା ( ପିଲାର ପୋଣ୍ଟିଂ) କାର୍ଯ୍ୟ ସରିଥିଲା। ଏହା ପୂର୍ବରୁ କେନ୍ଦୁଝର ବନଖଣ୍ଡ ଅଧିକାରୀ ଜଙ୍ଗଲ ଜମିର ଡାଇଭରସନ କାର୍ଯ୍ୟ କରିବା ପରେ ଡିଏଲସିର ଅନୁମୋଦନ ଲାଭ କରି ସାରିଥିଲା। ଆଜି ଜମି ହସ୍ତାନ୍ତର ପ୍ରକ୍ରିୟା ଶେଷ ହେବାପରେ ସବୁ ଠିକ ଠାକ୍ ଥିଲେ। ଖୁବଶୀଘ୍ର ବିଜ୍ଞପ୍ତି ପ୍ରକାଶ ସହ ଆସନ୍ତା ମାସ କ୍ଲାସ୍ ଆରମ୍ଭ ନେଇ ଆଶା ଉଜ୍ଜୀବିତ ହୋଇଛି। ସେଥ‌ିପାଇଁ ଚମ୍ପୁଆ ଏନ୍ଏସି ଅଧ୍ୟକ୍ଷ ଗିରିଜା ଶଙ୍କର ସାହୁ, ବିକାଶ ପରିଷଦର ସଦସ୍ୟ ଗଣ ଏବଂ ବୁଦ୍ଧିଜୀବୀ ମାନେ ଜିଲ୍ଲା ଓ ସ୍ଥାନୀୟ ପ୍ରଶାସନକୁ ଧନ୍ୟବାଦ ଓ କୃତଜ୍ଞତା ଜ୍ଞାପନ କରିଛନ୍ତି।

29/09/2023

ଚମ୍ପୁଆ ବିଜ୍ଞାପିତ ଅଞ୍ଚଳ ପରିଷଦ ପକ୍ଷରୁ ତଥା ଗୃହ ଓ ନଗର ଉନ୍ନୟନ ବିଭାଗ ସହାୟତାରେ "ସ୍ୱଚ୍ଛତା ହିଁ ସେବା" କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ଚମ୍ପୁଆ ନଗରକୁ ସ୍ୱଚ୍ଛ ଓ ନିର୍ମଳ କରିବା ଲକ୍ଷ୍ୟନେଇ ଅନୁଷ୍ଠିତ ଏହି କାର୍ଯ୍ୟକ୍ରମ ପରିପ୍ରେକ୍ଷୀରେ ଚେୟାରମ୍ୟାନ ଗିରିଜା ଶଙ୍କର ସାହୁଙ୍କ ନେତୃତ୍ଵରେ ଏକ ପଦଯାତ୍ରା ବିଜ୍ଞାପିତ ଅଞ୍ଚଳ ପରିଷଦ କାର୍ଯ୍ୟାଳୟରୁ ବାହାରି ସହର ପରିକ୍ରମା କରିବା ସହିତ ସ୍ବଚ୍ଛତା ସମ୍ପର୍କିତ ସଚେତନତା ବାର୍ତ୍ତା ବାଣ୍ଟିଥିଲେ । ଏହି ପଦଯାତ୍ରାରେ ଏନ୍ଏସି ନିର୍ବାହୀ ଅଧିକାରୀ ସୁଜିତ କୁମାର ଚୌଧୁରୀ, ସମସ୍ତ କାଉନସିଲର, ସ୍ଵଚ୍ଛସାଥୀ ଏବଂ ସ୍ଵଚ୍ଛ କର୍ମୀଙ୍କ ସମେତ ଜଣସାଧାରଣ ଓ ବିଭିନ୍ନ ବିଦ୍ୟାଳୟର ଛାତ୍ରଛାତ୍ରୀ, ଶିକ୍ଷକ ଯୋଗଦେଇଥିଲେ। ପରେ କାର୍ଯ୍ୟାଳୟ ପରିସରରେ ନିର୍ବାଚିତ ପ୍ରତିନିଧି ମାନଙ୍କୁ ନେଇ ଏକ କର୍ମଶାଳା ଆୟୋଜିତ ହୋଇଥ‌ିବାବେଳେ ଏଥ‌ିରେ ମୁଖ୍ୟ ଅତିଥିଭାବେ ପିଡି ଡୁଡ଼ା ଘାସିରାମ ମୁର୍ମୁ ଯୋଗଦେଇ କର୍ମଚାରୀ ଓ ପ୍ରତିନିଧି ମାନଙ୍କୁ ସ୍ଵଚ୍ଛତା ଉପରେ ପ୍ରାଥମିକତା ଦେବା ପାଇଁ ପରାମର୍ଶ ଦେଇଥିଲେ। ଏହି କାର୍ଯ୍ୟକ୍ରମକୁ ସିଏମ୍ଏମ୍ ଅନନ୍ତ ଚରଣ ସାହୁ ପରିଚାଳନା କରିଥିବା ବେଳେ ସମସ୍ତ କର୍ମଚାରୀ ଏଥ‌ିରେ ସହଯୋଗ କରିଥିଲେ।

28/09/2023

ଜିଲ୍ଲା ରେଡକ୍ରସ୍ ଆନୁକୂଲ୍ୟରେ ସ୍ଥାନୀୟ ନଗରଭବନ ଠାରେ ପ୍ରସିଦ୍ଧ ମ୍ୟାଜିସିଆନ ଆର.କେ ହିରାଲାଲଙ୍କ ଯାଦୁଖେଳ ଆରମ୍ଭ ହୋଇଛି ।ଆଗାମୀ ୩୦ ତାରିଖ ପର୍ଯ୍ୟନ୍ତ ଚାଲିବାକୁ ଥ‌ିବା ଏହି ଯାଦୁଖେଳ, ଭିନ୍ନ ପ୍ରକାର ଆକର୍ଷଣୀୟ ଓ ଆଶ୍ଚର୍ଯ୍ୟଚକିତ ଖେଳ ଦେଖାଇ ଦର୍ଶକମାନଙ୍କ ଦୃଷ୍ଟି ଆକର୍ଷଣ କରୁଛି | ସ୍କୁଲ କଲେଜ ପିଲାମାନଙ୍କ ପାଇଁ ସ୍ବତନ୍ତ୍ର ସୋ ର ବ୍ୟବସ୍ଥା ମଧ୍ୟ ହୋଇଥିବା ଜଣାପଡିଛି । ପ୍ରସିଦ୍ଧ ମ୍ୟାଜିସିଆନ ରମେଶ ଚନ୍ଦ୍ର ନାଏକଙ୍କ ନିର୍ଦ୍ଦେଶନାରେ ଅଭିଜ୍ଞ ଓ ଜୁନିୟର କଳାକାରମାନଙ୍କ ସହଯୋଗରେ ଏହି ମ୍ୟାଜିକ ସୋ ଦର୍ଶକ ମାନଙ୍କ ମନ ମୋହୁଥିବା ଜାଣିବାକୁ ମିଳିଛି । ପ୍ରତି ଜିଲ୍ଲାରେ ରେଡକ୍ରସ୍ ବୃଦ୍ଧି ଲକ୍ଷରେ ପ୍ରଶାସନ ସହଯୋଗରେ ଏହି ମ୍ୟାଜିକ ସୋ ଆୟୋଜନ କରାଯାଉଛି ।ଅସହାୟ, ଅର୍କମଣ୍ୟ ଓ ଦୁରାରୋଗ୍ୟ ରୋଗୀମାନଙ୍କୁ ଆର୍ଥିକ ସହାୟତା ପ୍ରଦାନ କରୁଥିବା ରାଜ୍ୟର ଏକ ପ୍ରମୁଖ ଅନୁଷ୍ଠାନ ଭାବେ କାର୍ଯ୍ୟ କରି ଆସୁଛି ରେଡକ୍ରସ୍ ସଂସ୍ଥା ।

28/09/2023

ଚମ୍ପୁଆରେ ପ୍ରସ୍ତାବିତ କେନ୍ଦ୍ରୀୟ ବିଦ୍ୟାଳୟ ପାଇଁ ପ୍ରଶାସନିକ ଅବହେଳା ଓ ସ୍ଥାଣୁତା ଲାଗି ଚଳିତ ଶିକ୍ଷାବର୍ଷ ମଧ୍ଯ ଛାତ୍ରଛାତ୍ରୀ ନାମଲେଖାରୁ ବଞ୍ଚିତ ହୋଇଛନ୍ତି । ଯାହାଫଳରେ କୋମଳମତି ଛାତ୍ରଛାତ୍ରୀ ଉନ୍ନତ ଇଂରାଜୀ ଶିକ୍ଷା ବ୍ୟବସ୍ଥାରୁ ବଞ୍ଚିତ ହେବା ଅତି ଦୁର୍ଭାଗ୍ୟ ଜନକ ବିଷୟ I ଦୀର୍ଘ ଦିନରୁ ପ୍ରସ୍ତାବିତ ଥ‌ିବା ଉକ୍ତ ବିଦ୍ୟାଳୟ ପଦ୍ମ ଘୁଞ୍ଚିଘୁଞ୍ଚି ଯିବା ପରି ଚମ୍ପୁଆ ଅଞ୍ଚଳବାସୀଙ୍କ ପାଇଁ ଏକ କୁଠାରଘାତ ସୃଷ୍ଟି କରିଛି। ଚମ୍ପୁଆ କେନ୍ଦ୍ରୀୟ ବିଦ୍ୟାଳୟ ଲାଗି ୨୦୧୪ ମସିହାରୁ ପ୍ରସ୍ତାବ ରହିଥିଲେ ମଧ୍ୟ ୨୦୨୪ ହେବାକୁ ବସିଲାଣି ତାର ଆଜି ଯାଏଁ ପୂର୍ଣାଙ୍ଗ ରୂପ ନେଇ ପାରୁନାହିଁ । ସ୍ଥାନୀୟ ପ୍ରଶାସନ ପକ୍ଷରୁ ଆଜିଯାଏଁ ଜମି ଓ ଆବଶ୍ୟକ ଦସ୍ତାବିଜ ଅଭାବ କାରଣରୁ ଏଠାକାର ଛାତ୍ରଛାତ୍ରୀ ପାଠପଢି ପାରୁନାହାନ୍ତି | ଉକ୍ତ ବିଦ୍ୟାଳୟ ଖୋଲିବା ଲାଗି ଚମ୍ପୁଆ ବିକାଶ ପରିଷଦ, ଅଞ୍ଚଳବାସୀ, ରାଜନେତା, ବଣିକ ସଂଘ ଆଦି ବହୁ ସମୟରେ ଧର୍ମଘଟ, ଧାରଣ ଚମ୍ପୁଆ ବନ୍ଦ ପରି ନିଷ୍ପତି ନିଆଯାଇଥିଲା । ମାତ୍ର ପ୍ରଶାସନିକ ପ୍ରତିଶ୍ରୁତି ଆଜି ଯାଏଁ କାର୍ଯ୍ୟକାରି ନହେବାରୁ ଚଳିତ ଶିକ୍ଷାବର୍ଷ ମଧ୍ୟ ଛାତ୍ରଛାତ୍ରୀ ନାମ ଲେଖାଇପାରି ନାହାନ୍ତି । ସ୍ଥାନୀୟ ରାଜନେତା, ସ୍ଥାନୀୟ ଶିକ୍ଷା ତାଙ୍କର ପ୍ରାଥମିକତା ରହିଥିଲାବେଳେ ଏଥ‌ିପ୍ରତି ତାଙ୍କର ବିମୁଖତା ଚମ୍ପୁଆ ଅଞ୍ଚଳରେ ନାପସନ୍ଦ କରାଯାଇଛି । ଆଗାମୀ ଦିନରେ ଚମ୍ପୁଆବାସୀ କେନ୍ଦ୍ରୀୟ ବିଦ୍ୟାଳୟ ଲାଗି ଚକ ଅଖ ଜାମ କରିବାକୁ ନିଷ୍ପତ୍ତି ନେବେ ବୋଲି ଜଣାପଡିଛି।

27/09/2023

ଚଳିତ ସେପ୍ଟେମ୍ବର ୨୮ ତାରିଖ (ଗୁରୁବାର) ମହାପୁରୁଷ ମହମ୍ମଦଙ୍କ ଜନ୍ମଦିନକୁ ରାଜ୍ୟ ସରକାର ସରକାରୀ ଛୁଟି ଘୋଷଣା କରିଛନ୍ତି। ପୂର୍ବରୁ ରାଜ୍ୟ ସରକାରଙ୍କ ପକ୍ଷରୁ ସେପ୍ଟେମ୍ବର ୨୯ (ଶୁକ୍ରବାର) ଦିନଟିକୁ ମହାପୁରୁଷ ମହମ୍ମଦଙ୍କ ଜନ୍ମଦିନ ନିମନ୍ତେ ଛୁଟି ଘୋଷଣା କରାଯାଇଥିଲା | ମାତ୍ର ରାଜସ୍ୱ ଓ ବିପର୍ଯ୍ୟୟ ପରିଚାଳନା ବିଭାଗ ପକ୍ଷରୁ ପ୍ରକାଶିତ ପରିବର୍ତ୍ତିତ ବିଜ୍ଞପ୍ତି ଅନୁସାରେ ସେପ୍ଟେମ୍ବର ୨୯ ତାରିଖ ପରିବର୍ତ୍ତେ ୨୮ ତାରିଖ (ଗୁରୁବାର) ଦିନଟିକୁ ମହାପୁରୁଷ ମହମ୍ମଦଙ୍କ ଜନ୍ମଦିନ ନିମନ୍ତେ ଛୁଟି ଘୋଷଣା କରାଯାଇଛି। ଏହି ଘୋଷଣା ଅନୁଯାୟୀ ସେପ୍ଟେମ୍ବର ୨୮ ତାରିଖ ଦିନ ରାଜ୍ୟ ସରକାରଙ୍କ ସମସ୍ତ କାର୍ଯ୍ୟାଳୟ, ରାଜସ୍ୱ ଓ ମାଜିଷ୍ଟ୍ରିଆଲ ଅଦାଲତ ବନ୍ଦ ରହିବ ।

21/09/2023

ଚମ୍ପୁଆରେ ସିସିଟିଭି ଲଗାଇବାକୁ ଦାବି

ଚମ୍ପୁଆ ଏକ ସୀମାନ୍ତବର୍ତ୍ତୀ ଅଞ୍ଚଳ ହୋଇଥିବାରୁ ଏଠାରେ ଅପରାଧୀକ ତତ୍ତ୍ଵଗୁଡିକ ଅଧ‌ିକ ସକ୍ରିୟ । ଏମାନଙ୍କ ଗତି ବିଧ‌ିକୁ ନିୟନ୍ତ୍ରଣ କରିବାକୁ ସ୍ଥାନୀୟ ଏନ୍ଏସି ଅଞ୍ଚଳରେ ସିସିଟିଭି କ୍ୟାମେରା ଲଗାଇବାକୁ ବିକାଶ ପରିଷଦର ଏକ ପ୍ରତିନିଧି ମଣ୍ଡଳ, ସମ୍ପାଦକ ଶାନ୍ତନୁ କୁମାର ଦାସ, ଏମଡି ମୁସଲିମ ଅଖତର ଏବଂ ସାହାରୋଜ ଜେୟା ପ୍ରମୁଖ ଜିଲ୍ଲାପାଳଙ୍କୁ ଭେଟି ଗୁହାରି କରିଥିବା ଜଣାପଡ଼ିଛି। ପୂର୍ବରୁ ୪ ଥର ଜିଲ୍ଲାପାଳଙ୍କୁ ଜଣାଇଥିଲେ ମଧ୍ୟ କେବଳ ପ୍ରତିଶ୍ରୁତି ଛଡ଼ା ଏନେଇ କୌଣସି ଅଗ୍ରଗତି ହୋଇନଥିଲା। ଏ ନେଇ ଦୁଇ ଦୁଇ ଥର ସର୍ଭେ ଓ ଏନ୍‌ଏସିକୁ ଚିଠି ହୋଇଥିଲେ ମଧ୍ୟ ଅର୍ଥ ମଞ୍ଜୁର ହୋଇନଥ‌ିବାରୁ ଏହାର କାର୍ଯ୍ୟକାରିତାକୁ ନେଇ ଆଶଙ୍କା ଦେଖାଯାଇଛି। ଏଠାରେ ସୂଚନାଯୋଗ୍ୟ କି ଚମ୍ପୁଆ, ଝାଡ଼ଖଣ୍ଡ ରାଜ୍ୟ ଓ ମୟୂରଭଞ୍ଜ ଜିଲ୍ଲାକୁ ଲାଗି ରହିଥ‌ିବାରୁ ଅନେକ ସମୟରେ ଅପରାଧ ଘଟାଇ ଅପରାଧିମାନେ ଫେରାର ହୋଇଯାନ୍ତି। ଏଥି ସହ ୨୦ ନମ୍ବର ଜାତୀୟ ରାଜପଥ ଏ ସହର ଦେଇ ଯାଇଥ‌ିବାରୁ ମାଇନିଂରୁ ମାଲ ପରିବହନ କରି ଯାଉଥ‌ିବା ଭାରୀଯାନ ଗୁଡିକ ଅନେକ ସମୟରେ ଦୁର୍ଘଟଣା ଘଟାଇ ଫେରାର ହୋଇଯାଉଥ‌ିବା ନଜିର ରହିଛି।
ଅପରାଧକୁ ନିୟନ୍ତ୍ରଣ କରିବା ପାଇଁ ସିସିଟିଭି ଗୁରୁତ୍ୱପୂର୍ଣ୍ଣ କାରଣ ଏହା ଏକ ଦୃଶ୍ୟମାନ ପ୍ରତିରୋଧକ ଭାବରେ କାର୍ଯ୍ୟ କରିଥାଏ, ମୂଲ୍ୟବାନ ପ୍ରମାଣ ସଂଗ୍ରହ କରିଥାଏ ଏବଂ ରିଅଲ-ଟାଇମ ମନିଟରିଂରେ ସାହାଯ୍ୟ କରିଥାଏ | କେବଳ କ୍ୟାମେରାର ଉପସ୍ଥିତି ସମ୍ଭାବ୍ୟ ଅପରାଧୀଙ୍କୁ ନିରୁତ୍ସାହିତ କରିପାରେ, ରେକର୍ଡ ହୋଇଥିବା ଫୁଟେଜ୍ ଅନୁସନ୍ଧାନ ଏବଂ କାର୍ଯ୍ୟାନୁଷ୍ଠାନରେ ଆଇନ ଶୃଙ୍ଖଳାକୁ ସାହାଯ୍ୟ କରିଥାଏ | ଅତିରିକ୍ତ ଭାବରେ, ଘଟଣାଗୁଡ଼ିକୁ ଡକ୍ୟୁମେଣ୍ଟ୍ କରିବା ଏବଂ ସର୍ବସାଧାରଣ ସ୍ଥାନରେ ସୁରକ୍ଷା ପ୍ରଦାନ କରିବା ପାଇଁ ସିସିଟିଭିର କ୍ଷମତା ଅପରାଧ ହ୍ରାସ ତଥା ସାମଗ୍ରିକ ଜନସାଧାରଣଙ୍କ ସୁରକ୍ଷା ପାଇଁ ଯଥେଷ୍ଟ ସହାୟକ ହୋଇଥାଏ |

20/09/2023

ନୁଆଁଖାଇ ପର୍ବ
ଆଜି ହେଉଛି ନୁଆଁଖାଇ , ଆପଣ ସମସ୍ତଙ୍କୁ ଚମ୍ପୁଆ NEWS ତରଫ ରୁ ନୂଆ ଖାଇ ଜୁହାର I ପଶ୍ଚିମ ଓଡ଼ିଶାରେ ପାଳିତ ହେଉଥିବା ଗଣପର୍ବ ହେଉଛି ନୁଆଁଖାଇ , ନୂତନ ଅମଳ ଧାନରୁ ପ୍ରସ୍ତୁତ ଅନ୍ନ ଦେବା ଦେବୀଙ୍କୁ ଅର୍ପଣ କରି ତାଙ୍କରି ପ୍ରସାଦ ନିଜେ ସେବନ କରିବାର ଏହି ପରମ୍ପରା କୁ ନେଇ ନୂଆ ଖାଇ ।

ଚାଷୀ ମାନଙ୍କ ର ନୂଆଧାନ ଜମି ରେ ଭାଦ୍ରବମାସ ବେଳକୁ ହୋଇଥାଏ । ଏହି ଧାନକୁ 'ମାଲୁଧାନ' କହନ୍ତି । ମାଲୁ ଧାନର ପ୍ରଥମ ଶସ୍ୟକୁ ଭଗବାଙ୍କୁ ଅର୍ପଣ କରିବା ଉଚିତ୍ ବୋଲି ଚାଷୀ ମାନେ କହନ୍ତି । ଏହାର କାରଣ ହେଉଛି ଭାଦ୍ରବ ମାସରେ ବର୍ଷର ପ୍ରଥମ ଶସ୍ୟ ଧାନ ସଂପୂର୍ଣ୍ଣ ପାଚି ଯିବାକୁ ବସେ ଧାନ ପାଚିଗଲେ ଏହା ପଶୁପକ୍ଷୀ ଖାଇଦେଲେ ତାହା ଅଇଁଠା ବା ଉଚ୍ଚିଷ୍ଟ ହୋଇଯିବ । ଉଦ୍ଦିଷ୍ଟ ଅନ୍ନକୁ ଭଗବାଙ୍କୁ ଦେବା ଅନ୍ୟାୟ ହେବ । ତେଣୁ ଚାଷୀମାନେ ବର୍ଷର ପ୍ରଥମ ଶସ୍ୟ ଧାନକୁ ଭାଦ୍ରବ ମାସରେ ଅର୍ପଣ କରି ଏହାକୁ ପ୍ରସାଦ ରୂପେ ଗ୍ରହଣ - କ' କରଥାନ୍ତି ।
ଓଡ଼ିଆ ପଞ୍ଜିକାନୁସାରେ ପ୍ରତିବର୍ଷ ଭାଦ୍ରବ ମାସ ଶୁକ୍ଳ ପକ୍ଷ ପଞ୍ଚମୀ ତିଥ୍ୟରେ ନୁଆଁଖାଇ ପାଳିତ ହୋଇଥାଏ । ଅନ୍ୟ ପର୍ବ ପାଇଁ ଆଗରୁ ଦିନ ନିର୍ଦ୍ଧାରିତ ହୋଇଥାଏ । ମାତ୍ର 'ନୁଆଁଖାଇ' ପାଇଁ ଲଗ୍ନ ନିରୂପଣ କରାଯାଏ । ଜନ୍ମାଷ୍ଟମୀ ରାତିରେ ପଣ୍ଡିତମାନେ ମା ସମଲେଇଙ୍କର ରାଶି ନକ୍ଷତ୍ରକୁ ଗଣନା କରି ଲଗ୍ନ ସ୍ଥିର କରନ୍ତି ।