https://www.facebook.com/1473323226217600/

Sajha Page

Home
India
Katpadi
Sajha Page

sajhapage is a Media/news company www.sajhapage.com is the popular online media . We publish news and entertaining stuff 24 hours a day for our visitors. Ltd.

We are a registered App Himalaya Pvt. company under DOI.

09/12/2024

छोरीको विवाहमा भारतीय प्रधानमन्त्री मोदीको शुभकामना पाएपछि गंगा दाहाल कृतज्ञ
नेकपा (माओवादी केन्द्र) का अध्यक्ष पुष्पकमल दाहालकी छोरी गंगा दाहालले भारतीय प्रधानमन्त्री नरेन्द्र मोदीलाई धन्यवाद ज्ञापन गरेकी छिन् । छोरी स्मितालाई विवाहको शुभकामना सन्देश पठाएको भन्दै गंगाले मोदीलाई सामाजिक सञ्जालमार्फत धन्यवाद ज्ञापन गरेकी हुन् ।

मोदीले गंगा दाहालको नाम उल्लेख गरेर भारतीय प्रधानमन्त्रीको लेटरहेडमा पठाएको शुभकामनामा स्मिता र उनका पतिलाई वैवाहिक जीवनको शुभकामना व्यक्त गरेका छन् । आफूलाई विवाह समारोहमा सरिक हुन निमन्त्रणा दिईएकोमा मोदीले धन्यवाद भनेका छन् । साथै, मोदीले प्रचण्डको नामसमेत उल्लेख गरेर शुभकामना दिएका छन् ।

09/12/2024

नगर प्रमुख गोपाल हमालज्यूको स्वास्थ्य सम्बन्धी उहाँका भाई श्री श्याम हमालज्यूले नगर प्रमुखज्यूलाई भर्खर भेटी सचिवालयमा दिनुभएको जानकारी

नगर प्रमुख श्री गोपाल हमालज्यूको उपचार अहिले पनि दिल्लीको साकेतस्थित म्याक्स अस्पतालको न्युरोइन्टेन्सिभ केयर आईसीयू र स्ट्रोक युनिटमा भइरहेको छ। चिकित्सकहरूले विभिन्न परीक्षणहरू र निगरानीको आधारमा उहाँको स्वास्थ्यमा सुधार भइरहेको बताएका छन्।

चिकित्सकहरूको भनाइअनुसार, नगर प्रमुखज्यूको अवस्था अब अपरेसन नगर्नुपर्ने अवस्थामा पुगेको छ। उहाँलाई अझै केही समय निगरानीमा राखी थप उपचार प्रक्रिया अघि बढाइनेछ।

नगर प्रमुखज्यूको शीघ्र स्वास्थ्य लाभको कामना गर्नुहुने सम्पूर्ण शुभचिन्तकहरू, शुभेच्छुकहरू, र जनसमुदायप्रति धनगढी उप-महानगरपालिका परिवार हार्दिक आभार प्रकट गर्दछ।

नगर प्रमुखको सचिवालय
धनगढी उप-महानगरपालिका

09/12/2024

सत्ता उलटफेरमा लाग्दैनौं, सरकारले सुशासनका पक्षमा काम गरोस् हाम्रो साथ रहन्छ: वर्षमान पुन
नेपाल कम्युनिष्ट पार्टी (माओवादी केन्द्र) का उपमहासचिव एवं पूर्वअर्थमन्त्री वर्षमान पुनले सरकारले सुशासनका पक्षमा काम गर्नुपर्ने बताएका छन् । प्रेस सेन्टर नेपाल तनहुँ शाखाले आज दमौलीमा आयोजना गरेको पत्रकार सम्मेलनमा उनले आर्थिक समृद्धि हासिल गर्न सुशासन महत्वपूर्ण भएको उल्लेख गरे ।

आर्थिक समृद्धिको लक्ष्य लिँदै सुशासन र जनताको पक्षमा काम गर्नुपर्ने अहिलेको आवश्यकता रहेको उपमहासचिव पुनको भनाइ थियो । उनले सरकारले यसका लागि गर्ने हरेक कार्यमा आफ्नो पार्टीको साथ रहने बताए । “सरकारले राम्रो काम गरोस् भन्ने हाम्रो चाहना हो । सरकारले जनताका पक्षमा र सुशासनका पक्षमा काम गर्नुपर्छ । यस्तो कार्यमा हाम्रो साथ र समर्थन रहनेछ । माओवादी पार्टी अहिले सरकार फेरबदलमा लाग्दैन”, उपमहासचिव पुनले भने ।

उनले लोकतन्त्रको विकल्प लोकतन्त्र मात्रै भएका तर वर्तमान शासन व्यवस्थाका बारेमा कुरा उठ्न थालेकाले यसको सुधार आवश्यक रहेकामा उनको जोड थियो । उपमहासचिव पुनले भने, “व्यवस्था त बदलियो तर अवस्था बदलिएन, हामी २०८४ को चुनावमा यही ‘एजेन्डा’ लिएर जनतामाझ जानेछौ । जनताले खोजेको पनि यही हो । अहिले हामी सङ्गठन सुधारको अभियानमा लागिरहेका छौँ।”

09/12/2024

बुढानीलकण्ठमा बसेको कांग्रेस केन्द्रीय कार्यसम्पादन समितिको बैठकले गरेका ४ निर्णयहरू
सत्ता साझेदार दल नेपाली कांग्रेसको केन्द्रीय कार्यसम्पादन समितिको बैठक सम्पन्न भएको छ । सोमबार सभापति शेरबहादुर देउवाको सभापतित्वमा सभापति निवास, बुढानीलकण्ठमा बैठक बसेको थियो । सो बैठकले विभिन्न चार वटा निर्णय गरेको छ ।

देउवा निवासमा बसेको बैठकले गरेको पहिलो निर्णय कांग्रेसका सभापति शेरबहादुर देउवाले नेपाली कांग्रेसको विधान, २०१७ (संशोधन सहित) को धारा २१ को उपधारा ४ बमोजिम केन्द्रीय कार्यसमितिका निर्वाचित सदस्य उमेश श्रेष्ठलाई कोषाध्यक्ष पदमा गरेको मनोनयनलाई अनुमोदन गर्नु रहेको छ । पूर्व राज्यमन्त्री समेत रहेका श्रेष्ठलाई २ साताअघि देउवाले कोषाध्यक्ष मनोनीत गरेका थिए । सो मनोनयन आजको बैठकले अनुमोदन गरेको हो ।

कांग्रेसको बैठकले गरेको दोस्रो निर्णय नेपाल तरूण र नेपाल किसान महासंघको विधान परिमार्जनको निर्णय हो । आजको बैठकले नेपाल तरूण दलको विधान, २०१० (संशोधन सहित) सातौं संशोधन २०८१ र नेपाल किसान महासंघको विधान, २००८ (संशोधन सहित) सातौं संशोधन २०८१ लाई परिमार्जन सहित पारित गरेको मुख्यसचिव कृष्णप्रसाद पौडेलले जानकारी दिए ।

त्यस्तै बैठकले समानुपातिकतर्फको रिक्त गण्डकी प्रदेशसभा सदस्य पदमा स्याङ्जाकी सुनिता थापालाई सिफारिस गर्ने तेस्रो निर्णय गरेको छ। रिक्त स्थानमा पदपूपर्तिका लागि निर्वाचनमा आयोगमा भएको बन्दसूचीको क्रमसंख्याअनुसार उनको नाम निर्वाचन आयोगलाई सिफारिस गर्ने निर्णय गरेको हो ।

केही अघि गण्डकी प्रदेश सभा सदस्य विमला गौचनको मृत्यु भएपछि सो पद रिक्त थियो । निर्वाचनका बेला कांग्रेसले बुझाएको समानुपातिकतर्फको बन्दसूची अनुसार आदिवासी जनजाति क्लस्टरको १ नम्बरमा रहेकी गौचनको मृत्यु भएपछि पाँचौ नम्बरमा रहेकी स्याङ्जा चापाकोटकी थापा प्रदेशसभा सदस्य बन्ने भएकी हुन् ।

आदिवासी जनजाति महिलातर्फबाट म्याग्दीकी गौचनसहित पर्वतकी रेखा गुरुङ, कास्कीकी सरस्वती गुरुङ र लमजुङकी पार्वती तामाङ क्रमसंख्याअनुसार सामानुपातिक सांसद बनेर प्रदेश सभा छिरेका थिए । गौचनको निधन भएसँगै क्रम संख्याअनुसार स्याङ्जाकी सुनिताले प्रदेश सभा सदस्य बन्ने अवसर पाएकी हुन् ।

त्यस्तै बैठकले गरेको चौथो निर्णय पनि स्वर्गीय गौचनसँगै सम्बन्धित रहेको छ । गौचनको २०८१ कात्तिक २८ गते राति भएको निधनप्रति कार्यसम्पादन समितिको बैठकले गहिरो दुःख व्यक्त गरेको छ । बैठकले गौचनप्रति भावपूर्ण श्रद्धाञ्जली अर्पण गर्दै एक मिनेट मौन धारण गरी उनको आत्माको चीर शान्तिको कामना गर्नुका साथै शोक सन्तप्त परिवारजनप्रति गहिरो समवेदना प्रकट गर्ने निर्णय गरेको पौडेलले जानकारी दिए ।

09/12/2024

युवा गितकार उदयनारायण चौधरीको ‘लहान बजारमे’ गीत सार्वजनिक
सिरहा जिल्लाको लहान वरपरको सुन्दर दृष्यहरु समेटेर तयार पारिएको थारु गीत लहान बजारमे सार्वजनिक भएको छ । गितकार उदयनारायण चौधरी (उत्कर्षीं) को शब्द रहेको उक्त गीतमा गायक मनिष चौधरी र गायिका जलजला परियारको स्वर रहेको छ भने गीतको संगीत संयोजन विजय चौधरीले गरेका छन् ।

जितिया पर्वको गित चल गै दैया लैहरको अपार सफलतापछि बीएम म्यूजिक प्रोडक्सन काठमाण्डौले लहान बजारमे बोलको गीत आफ्नै अफिसियल युट्युब च्यानलमार्फत सार्बजनिक गरिएको हो ।

राष्ट्रिय थारु कलाकार मञ्च सिरहाको सहयोगमा निर्माण भएको भिडियोमा नितेश चौधरी र सुस्मिता चौधरीको अभिनय देख्न सकिन्छ । शिव चौधरीले खिचेको भिडियोलाई बिएम म्यूजिक प्रोडक्सनका संचालक विजय चौधरीले निर्देशन गरेका हुन् ।

09/12/2024

रविको मध्यरातमा गुँडसार: आयोगले आईजीपी बोलायो, बयान दिन पुगे एआईजी र डीआईजी
सहकारी ठगी, संगठित अपराध, सम्पत्ति शुद्धीकरणलगायतका आरोपमा छानबिनका लागि प्रहरी हिरासतमा रहेका राष्ट्रिय स्वतन्त्र पार्टी (रास्वपा) सभापति रवि लामिछानेमाथि सरकार र प्रहरीले ‘अमानवीय व्यवहार गरेको’ भन्दै परेको उजुरीमाथि राष्ट्रिय मानवअधिकार आयोगले छानबिन थालेको छ ।

केही दिनअघि चितवनबाट पोखरा लैजान क्रममा अमानवीय तबरबाट मध्यराति लगेको भन्दै रास्वपाका नेताहरुले आयोगमा उजुरी दिएका थिए । सो उजुरीबारे आयोग अनुसन्धान अघि बढाएको हो ।

आयोगले सोमबार रविमाथि भएको व्यवहारबारे छलफल गर्न नेपाल प्रहरीका प्रहरीप्रमुख आईजीपी बसन्त कुँवरलाई बोलाएको थियो । तर, कुँवरले आफू नगएर एआईजी टेकबहादुर तामाङ र प्रहरी प्रवक्ता एवम् डीआईजी दानबहादुर कार्कीलाई पठाएका छन् ।

उनीहरुले प्रहरीबाट कुनै पनि किसिमको दुर्व्यवहार नभएको र सुरक्षा संवेदनशीलताका कारण राति लैजानुपरेको बयान दिएका छन् । दुर्व्यवहार गरेर चितवनबाट पोखरा लगिएको भन्ने आरोपका बारेमा प्रहरीका उच्च अधिकारीसँगको छलफल पर्याप्त नभएको भन्दै त्यसबारे महानिरीक्षकसँग नै छलफल गर्ने आयोगले तयारी गरेको स्रोतको भनाइ छ ।

रविलाई चितवनबाट मध्यराती पोखरा लैजाँदा अमानवीय व्यवहार भएको भन्दै चौतर्फी प्रश्न उठ्न थालेको छ । आजमात्र प्रमुख प्रतिपक्षी दल नेकपा माओवादी केन्द्रका अध्यक्ष पुष्पकमल दाहाल प्रचण्ड र वरिष्ठ उपाध्यक्ष नारायणकाजी श्रेष्ठले लामिछानेमाथि सरकारले गरिरहेको अमानवीय र प्रतिशोधपूर्ण व्यवहारको निन्दा गरेका थिए । गत शुक्रबार रविलाई भेट्न नेपाल समाजवादीका अध्यक्ष डाक्टर बाबुराम भट्टराई हिरासतमै पुगेका थिए । यता राप्रपाका प्रमुख सचेतक ज्ञानेन्द्र शाहीले पनि शनिबार रविलाई भेटेका थिए ।

09/12/2024

नगर प्रमुख यादवको सक्रियताले व्यवस्थित बन्यो प्रसिद्ध गढीमाई मेला
बाराको महागढीमाई नगरपालिकाको बरियारपुर गाउँमा हरेक पाँच वर्षमा लाग्ने प्रसिद्ध गढीमाई मेला जारी छ । सो मेला अन्तर्गत आज पशु बलि दिइएको छ । आइतबारदेखि मेलामा दिइने बलि र गढीमाई दर्शनका लागि दर्शनार्थीको घुईंचो लागेको छ ।

गढीमाई मन्दिरमा भाकल गरेपछि मनोकामना पूरा हुने भन्दै उनी दर्शनार्थीहरु महागढीमाई नगरपालिका–१ स्थित बरियापुरमा दर्शन गर्न आउने गरेका छन् । गढीमाई मन्दिरमा यही मङ्सिर १ गतेदेखि पञ्चवर्षीय गढीमाई मेला लागिरहेको छ ।

महागढीमाईको मेलामा नेपाल र भारतका विभिन्न स्थानबाट लाखौंको संख्यामा भक्तजनहरु सहभागी हुने गरेका छन् । श्रद्धालु भक्तजनहरूको निकै भव्य र सभ्य ढङ्गले उपस्थिति रहेको महागढीमाइ नगरपालिकाले जनाएको छ । मेलालाई व्यवस्थित र चुस्त बनाउनका लागि महागढीमाई नगरपालिकाका मेयरमा उपेन्द्रप्रसाद यादवले निक्कै सक्रियताकासाथ काम गरिरहेका छन् ।

मेयर यादवको कुशल कमाण्डले दर्शनका लागि गढीमाई आउने भक्तजनले सहजता महसुस गरिरहेको एक दर्शनार्थीले बताए । ‘अघिल्लो वर्ष भन्दा यसपटक गढीमाईको वातावरण व्यवस्थित बनेको पाएका छौं । सुरक्षा व्यवस्था पनि निक्कै चुस्त देखिन्छ । स्थानीय सरकारको उपस्थिति निक्कै गर्विलो देखिन्छ । नगरपालिकाले भक्तजनको हितलाई केन्द्रमा राखेर काम गरेको महसुस गरेका छौं’ मेलामा उपस्थित एक भक्तजनले भने ।

आफ्नो नगरभित्र लागेको मेलालाई सभ्य,भव्य र चुस्तदुरुस्त बनाउनका लागि मेयर यादवले आफ्नो सम्पूर्ण शक्ति लगाएका छन् । सुरक्षका हिसावले सो मेला निक्कै संवेदनशील मानिन्छ । तर, मेयर यादवको सक्रियतापूर्ण भूमिकाको कारण हालसम्म कुनै पनि अप्रिय घटना भएका छैनन् । यादवले सो मेलालाई व्यवस्थित बनाउका लागि सुरक्षा निकायसँग सहकार्य गर्दै आएका छन् ।

मेलामा उपस्थित भक्तजनको हितलाई ध्यानमा राख्दै नगरपालिकाले काम गरिरहेको छ । यादवले मेला व्यवस्थित बनाउन संघीय र प्रदेश सरकारसँग पनि समन्व गरिरहेका छन् । उपप्रधान तथा सहरी विकासमन्त्री प्रकाशमान सिंह र गृहमन्त्री रमेश लेखलाई गढीमाईको दर्शन गराउन उनले महत्वपूर्ण भूमिका खेलेका छन् । गढीमाईको दर्शन गर्न पुगेका सिंह र लेखकले यादवको सक्रियतापूर्ण कदमको खुलेरै प्रशंसा गरेका थिए ।

मेलामा पुगेका गृहमन्त्री लेखकले संघीय सरकारको तर्फबाट गर्नपर्ने सहयोग गर्न तयार रहेको र सुरक्षाका लागि सरकारले कुनै कसुर बाँकी नराख्ने प्रतिवद्धता जनाएका छ्न । लेखक र सिंहलाई गढीमाईको दर्शन गराउन मेयर यादवले भूमिका खेलेको स्रोतले जनाएको छ । गढीमाईमा दिईने पशु बलिको बारेमा विरोध भइरहँदा यसलाई समाधान गर्न र समन्वय गर्नमा पनि यादवले भूमिका खेलेका छन् । केही पशु अधिकारकर्मीहरुले पशुबली रोक्नुपर्ने पक्षमा आवाज उठाइरहेका छन् । तर, यादवले भने धार्मिक मान्यतासँग जोडिएको विषय भन्दै दुवै पक्षमा समन्वय गर्ने काम गरेका छन् ।

मेयर यादव गत स्थानीय तहको निर्वाचनमा नेपाली कांग्रेसको तर्फबाट निर्वाचित भएका थिए । कांग्रेसको तर्फबाट निर्वाचित भएपनि उनले अन्य पार्टीसँग पनि राम्रो समन्वय र सहकार्य गर्दै आइरहेका छन् । कांग्रेसबाट निर्वाचित भएपनि यादवको सम्बन्ध जनता समाजवादी पार्टी नेपालका अध्यक्ष उपेन्द्र यादवसँग पनि उत्तिकै सौहार्दपूर्ण रहेको बताइन्छ । बारा उपेन्द्र यादवको गृह जिल्ला पनि भएकाले उनीसँग समन्वय र सहकार्य गर्दै मेयर यादव अघि बढेका छन् ।

09/12/2024

पछाडि परेका समुदायलाई शिक्षा र रोजगारी दिएर अगाडि ल्याइनेछ : प्रधानमन्त्री ओली
प्रधानमन्त्री केपी शर्मा ओलीले पछाडि परेका समुदायलाई शिक्षा र रोजगारीमा सहज पहुँच दिएर अगाडि ल्याइने बताएका छन् ।

झापाको गौरादहमा आज आयोजित ताजपुरिया समाज कल्याण परिषद्को २९औँ स्थापना दिवसको कार्यक्रमलाई सम्बोधन गर्दै प्रधानमन्त्री ओलीले पछाडि पारिएको जनता लक्षित साना–साना उद्योग सञ्चालन गरेर रोजगारी सृजना गर्दै उद्यमी बनाउने बाटोमा सरकारले काम गर्ने बताए ।

प्रधानमन्त्री ओलीले आफ्नो समाजको कला, संस्कृति र परम्परालाई समसामयिक एवं आधुनिक सोचका साथ निरन्तरता दिन आग्रह गर्दै ताजपुरिया समुदायको मागलाई प्राथमिकताका साथ सम्बोधन गर्ने प्रतिबद्धता व्यक्त गरे । ताजपुरिया समुदायको हक, हित र उन्नतिका पक्षमा उठाइएका माग सम्बोधन गर्न सरकार तयार रहेको उल्लेख गर्दै प्रधानमन्त्री ओलीले भने, “तपाईंहरूले उठाउनुभएको मागउपर आवश्यक सुनुवाइ भई यथाशक्य छिटो सम्बोधन गरिने विश्वास दिलाउँदछु ।”

कार्यक्रममा समाजका अध्यक्ष पूर्णलाल ताजपुरियाले प्रधानमन्त्री ओलीलाई अभिनन्दन गरेको थियो । देशभर २१ हजार हाराहारीमा रहेको ताजपुरिया समुदायका मानिस पूर्वी नेपालको विशेषगरी झापा र मोरङ जिल्लामा बसोबास रहेको पाइन्छ ।

09/12/2024

‘तथ्यमा आधारित रहेर महिला हिंसा अन्त्यका लागि पहलकदमी जरुरी’
महिला अधिकारका क्षेत्रमा क्रियाशील सरोकारवालाहरूले तथ्य र तथ्याङ्कमा आधारित रहेर महिला हिंसाबाट सबैभन्दा बढी प्रभावित क्षेत्र र जातीय समूहमा हिंसा न्यूनीकरणका कार्यक्रम लैजानुपर्नेमा जोड दिएका छन् ।

दलित महिला सङ्घ (फेडो) ले आज यहाँ आयोजना गरेको ‘जातीय तथा लैङ्गिक आधारमा महिला र बालिकामाथि हुने हिंसासम्बन्धी अध्ययन प्रतिवेदन’ सार्वजनिकीकरण कार्यक्रमका वक्ताहरूले अनुमानको भरमा नभए तथ्यमा आधारित भएर पहलकदमी लिनुपर्ने बताए । “हिंसाका घटनाबारे सोलोडोलमा भन्ने गरिएको छ । अब महिला र बालिका हिंसामा परे भनेर मात्रै हुँदैन, कुन समुदाय र क्षेत्रका महिला बढी हिंसामा पर्ने गरेका छन् भनेर तथ्यका आधारमा हिंसा न्यूनीकरणका पहल गर्नुपर्छ”, वक्ताहरूको साझा मत थियो ।

कार्यक्रममा राष्ट्रिय महिला आयोगका अध्यक्ष कमला पराजुलीले अझै पनि हिंसाका धेरै घटनाका पीडित न्यायको पहुँचमा पुग्न नसकेकाले यसका लागि सरकार र अरू सबै निकायले गम्भीर भएर सोच्नुपर्ने बताइन् । उनले हिंसा शक्ति, सामथ्र्य र संरचनागत व्यवस्था पितृसत्तात्मक सोचको उपज भएकाले हरेक व्यक्ति यसका विरुद्ध जागरुक हुनुपर्ने धारणा राखिन् ।

“हिंसा संरचनात्मक सांस्कृतिक विभेदसँग जोडिएको छ । यसबाट कुनै समुदाय र क्षेत्रका महिला तथा बालिका अलग छैनन् । अभिलेखमा आउने, उजुरी गर्ने भनेको त कुनै पनि हिसाबले घटना दबाउन नसकेपछि मात्रै हो । अहिले पनि कर्णालीलगायत दूरदराज, मधेश र ग्रामीण क्षेत्रका घटना अभिलेखमै आउँदैनन्”, अध्यक्ष पराजुलीले भनिन्, “महिलाले हिंसाको प्रतिकार गर्नु भनेको घर छोड्नु हो, घर छोडेपछि कहाँ जाने ? भन्ने प्रश्न पनि छ । यसमा राज्य र हामी सबै सरोकारवाला निकायले अभिभावकत्व निर्वाह गर्नुपर्छ । त्यसअघि हरेक व्यक्तिलाई सचेत बनाउन आवश्यक छ ।”

राष्ट्रिय दलित आयोगका अध्यक्ष देवराज विश्वकर्मा आमनागरिकको सुरक्षाको प्रमुख दायित्व भएको सरकार र सरकारी निकायकाले यसमा सबैलाई समेटेर अगाडि बढ्नुपर्ने आवश्यकता औँल्याए । तीन तहका सरकार, संवैधानिक, कानुनी र हिंसा न्यूनीकरणका लागि थुप्रै संरचनात्मक व्यवस्था र थुप्रै राष्ट्रिय तथा अन्तर्राष्ट्रिय गैरसरकारी संस्थाले काम गरिरहे पनि जातीय र लैङ्गिक आधारमा हुने हिंसा नघट्नु गम्भीर समीक्षाको विषय भएको उनको भनाइ थियो ।

“तीन तहका सरकार, ऐन, कानुन बनेका छन्, तिनको कार्यान्वयन भइरहेको छ । तर पनि हिंसा भइरहेकै छ । अझै स्वस्फूर्त रूपमा उजुरी आउने अवस्था बनिसकेको पनि छैन । त्यसैले सरकारले मुख्य नेतृत्वदायी भूमिका निर्वाह गर्दै यसमा प्रभावकारी कदम चाल्नु अपरिहार्य छ”, अध्यक्ष विश्वकर्माले भने ।

वरिष्ठ अधिवक्ता मिरा ढुङ्गानाले हरेक निकायले गर्ने अध्ययनले देखाएका हिंसासम्बन्धी तथ्य र निष्कर्षअनुसार सबै निकायले आफ्नो दायित्व पूरा गर्नुपर्नेमा जोड दिइन् । उनले पछिल्लो समय वैवाहिक बलात्कार, बालिकामाथि बलात्कार र कार्यस्थलमा हुने हिंसाका सम्बन्धमा पनि आवश्यक अध्ययन गरी सोअनुसार क्रियाकलाप सञ्चालन गर्न आग्रह गरिन् ।

फेडोका संस्थापक दुर्गा शोवले नेपालमा सबैभन्दा बढी कुन समुदाय र क्षेत्रका महिला हिंसामा पर्छन् भनेर अहिले पनि व्यवस्थित अध्ययन हुन नसकेकाले हस्तक्षेपकारी कदम चाल्न नसकिएको बताइन् । तथ्य एकातिर र समस्या सम्बोधनका लागि हुने क्रियाकलाप अर्कैतिर केन्द्रित हुँदा महिला तथा बालिकामाथि हुने हिंसा न्यूनीकरणमा समस्या भइरहेको उनको भनाइ थियो । शोवले सरोकारवाला निकायलाई सोलोडोलोमा नभई खण्डीकृत तथ्याङ्क आग्रह गर्दै सोहीअनुसार समस्या सम्बोधनको पहलका लागि ध्यानाकर्षण गराइन् ।

महिला, बालबालिका तथा ज्येष्ठ नागरिक मन्त्रालयका उपसचिव मीना पौडेलले आफ्नो मन्त्रालयले अध्ययनका निष्कर्षलाई आफ्ना दस्तावेजमा समावेश गरी सम्बोधनका लागि आवश्यक कार्यक्रम अगाडि बढाउने प्रतिबद्धता व्यक्त गरिन्।

कार्यक्रममा फेडोका अध्यक्ष कला स्वर्णकार, महासचिव रेणु सिजापतिलगायतले आफ्नो धारणा राखेका थिए । अध्ययनमा आर्थिक वर्ष २०८०/८१ र चालु आर्थिक वर्षका पछिल्ला तीन महिनामा देशभर भएका महिला तथा बालिकामाथिका हिंसाका अभिलेखको विश्लेषण गरिएको छ । यसका लागि राष्ट्रिय मानव अधिकार आयोग, राष्ट्रिय महिला आयोग र राष्ट्रिय दलित आयोग गरी तीनवटा संवैधानिक निकाय, नेपाल प्रहरी र महिला अधिकारका क्षेत्रमा क्रियाशील छवटा सङ्घसंस्थाका अभिलेख (दस्तावेज समीक्षा) को विश्लेषण गरिएको छ ।

यसैगरी, काठमाडौँसहित सबै प्रदेशको प्रतिनिधित्व हुनेगरी गोरखापत्र दैनिक, कान्तिपुर दैनिक र अनलाइनखबर डटकमसहित १० वटा सञ्चारमाध्यममा प्रकाशित चार सय ५९ विषयवस्तुको विश्लेषण गरिएको थियो । ‘जातीय तथा लैङ्गिक आधारमा महिला र बालिकामाथि हुने हिंसासम्बन्धी अध्ययन’ पत्रकार टिकाराम सुनारले गरेका हुन् ।

09/12/2024

तिलगङ्गा नेत्र विश्वविद्यालय विधेयक सकारात्मक छः शिक्षामन्त्री भट्टराई
शिक्षा, विज्ञान तथा प्रविधिमन्त्री विद्या भट्टराईले तिलगङ्गा नेत्र विश्वविद्यालय विधेयक सकारात्मक रहेको बताएकी छिन् ।

राष्ट्रियसभाको विधायन व्यवस्थापन समितिमा आज ‘तिलगङ्गा नेत्र विश्वविद्यालय विधेयक २०८१’ माथि भएको सैद्धान्तिक छलफलमा उनले आँखा स्वास्थ्यको क्षेत्रमा उत्कृष्ट प्राज्ञिक केन्द्रका रूपमा विश्वविद्यालयको स्थापना हुनु राम्रो रहेको बताइन् ।

उनले भनिन्, “आँखा शरीरको महत्वपूर्ण तथा संवेदनशील अङ्ग हो । आँखा स्वास्थ्य क्षेत्रमा यसको अध्ययन, अध्यापन, अनुसन्धान आवश्यक छ । विश्वविद्यालय निर्माण गर्न आवश्यक छ । यो विधेयकलाई परिस्कृत गरेर अगाडि बढाउनुपर्छ ।”

बैठकमा विधेयक संशोधन प्रस्तावकर्ता सांसद पदमबहादुर परियारले विधेयक समसामयिक रहेको बताउँदै नेपालमा आँखा स्वास्थ्यमा काम गर्ने अरू पनि संस्था रहेकाले उनीहरुलाई पनि समेट्ने विषयमा छलफल गर्नुपर्ने बताए ।

संशोधन प्रस्तावकर्ता अर्का सांसद मदनकुमारी शाह (गरिमा)ले विधागत रूपमा विश्वविद्यालय बन्नु राम्रो थालनी भएको बताइन् । उनले भनिन्, “दक्षताको हिसाबले पनि यो विश्वविद्यालय बन्नु राम्रो हो । यो स्वागतयोग्य निर्णय हो । तिलगङ्गाले आफैँ लेन्स उत्पादन गरेर निर्यात गर्नु पनि एकदमै राम्रो पक्ष हो ।”

समितिकी सदस्य सांसद जयन्तीदेवी राईले तिलगङ्गाले आँखा स्वास्थ्यमा सबैको मन जितिसकेको बताउँदै यो विधेयकलाई नरोक्न र यसलाई छिटो बढाउनुपर्ने बताइन् ।

09/12/2024

नागरिकका गुनासो सुन्न ‘हेल्लो स्वास्थ्य’
स्वास्थ्य तथा जनसङ्ख्या मन्त्रालयले स्वास्थ्य सेवासम्बन्धी गुनासो सम्बोधन गर्न ‘हेल्लो स्वास्थ्य’ सेवा सुरुआत गरेको छ । स्वास्थ्य मन्त्रालय तथा मातहतका निकाय र स्वास्थ्य सेवासँग सम्बन्धित गुनासा टेलिफोन, ह्वाट्सएप, भाइबर, इमेल तथा हुलाकबाटसमेत पठाउन यस्तो व्यवस्था गरिएको मन्त्रालयले जनाएको छ ।

टेलिफोन नम्बर ‘१११५’ मा फोन गरेर, भाइबर र ह्वाट्सएप ‘९८५१३३०५९२’ नम्बरमा आफ्ना गुनासा सन्देशमार्फत पठाउन सकिने व्यवस्था गरिएको छ । यसैगरी इमेलमार्फत ‘हेल्लो हेल्थ एट एमओएचपी डट जिओभी डट एनपी’ मा पनि गुनासा पठाउन सकिनेछ । स्वास्थ्य तथा जनसङ्ख्यामन्त्री प्रदीप पौडेलले आमनागरिकको स्वास्थ्य सेवासम्बन्धी गुनासो सम्बोधन गर्न इकाइ स्थापना गर्ने मन्त्रीस्तरिय निर्णयपछि हेल्लो स्वास्थ्य स्थापना गरिएको जनाइएको छ ।

गुनासो सम्बोधन गर्न मन्त्रालयका प्रमुख कन्सल्ट्यान्ट ट्रपिकल मेडिसिन डा अनुप बाँस्तोलाको संयोजकत्वमा गत मङ्सिर १४ गते इकाइ गठन गर्ने निर्णय गरिएको थियो । इकाईमा सूचना अधिकारी डा भक्तबहादुर केसी, सूचना प्रविधि निर्देशक रमेशराज सुवेदी तथा शाखा अधिकृत गौरीप्रसाद आचार्य सदस्य छन् ।

यसअघि इपिडिमियोलोजी तथा रोग नियन्त्रण महाशाखा टेकुमा रहेको हटलाइन नम्बरमा अरु माध्यमसमेत थप गरेर गुनासो तथा सेवासम्बन्धी जानकारी लिने व्यवस्था मिलाइएको मन्त्रालयका प्रवक्ता डा प्रकाश बुढाथोकीले जानकारी दिए ।

09/12/2024

सरकारले प्रतिनिधिसभा धकेल्ने खोज्दैछ भन्ने सूचना छ, विशेष अधिवेशन बोलाउँछौं : प्रचण्ड
नेकपा (माओवादी केन्द्र) का अध्यक्ष पुष्पकमल दाहालले सरकारले संसद्को अबको अधिवेशनलाई धकेल्न खोजेको सूचना प्राप्त भएको खुलासा गरेका छन् । उनले आवश्यक पर्यो भने विशेष अधिवेशन बोलाएर भएपनि सदनभित्रैबाट संघर्षको सुरुवात गर्ने घोषणा गरे ।

राष्ट्रिय कर्मचारी महासङ्घको स्थापना दिवसको अवसरमा आज (सोमबार) काठमाडौंमा आयोजित कार्यक्रमलाई सम्बोधन गर्दै उनले यस्तो बताएका हुन् । उनले भने,‘यो सरकारले प्रतिनिधिसभा सकेसम्म धकेल्न बल गर्दैछ भन्ने हामीलाई सूचना प्राप्त छ। हामीले जरुरी पर्यो भने विशेष अधिवेशा बोलाएर संघर्षको सुरुवात सदनभित्रैबाट गरिनेछ । एजेण्डा सेट सदनबाट गरिनेछ । ती एजेण्डाको आधारमा सडकमा लाखौं जनतासँग मिलेर प्रतिक्रियावादीहरुको तमाम षड्यन्त्र चकनाचुर पारिनेछ ।’

सो अवसरमा उनले एकथरीले माओवादी आन्दोलन सिद्दियो भनेर ह्युमिलियट गरेको स्मरण गराए । उनले एकथरीले माओवादीलाई एकचोटी विभाजन गर्न खोजेको पनि सुनाए । उनले भने,‘माओवादी विभाजन गरेर प्रचण्डलाई ह्युमिलियट गर्ने, षड्यन्त्र ठुलै थियो । माओवादी विभाजन गरेर प्रचण्डलाई ह्युमिलियट गरेर भाग्नपर्ने बनाउने, कतिपयले मलाई सुझाव दिए, अब सन्यास लिए हुन्छ भनेर । वैरागीजस्तो, मेरा दिन सिद्दिए भनेर भने हुन्छ भनेर सुझाव दिनेहरु पनि फेला परे । तर, मैले त १८ महिना अगाडि नै माओवादीसामू नयाँ संकल्प र अठोट गरेर हिँडेको थिएँ । सरकारबाट छोड्दै गर्दा प्रतिक्रियावादीहरुलाई चूनौति दिएर निस्किएको थिएँ । त्यही आत्मविश्वासको साथ हामी सबै प्रदेशमा गयौं । अहिले यहाँसम्म आईपुग्दा पार्टीभित्र अभूतपूर्व एकता भएको देख्छु । जनतामा हिजो हामीले गर्न खोजेको राम्रा कामहरु र अहिले एमाले नेतृत्वको सरकारले गरेका नराम्रा कामहरु दुई वटा मिलाउँदा जनताको आशा र भरोसा हामीप्रति बढेको छ ।’

09/12/2024

अभिनय गरेर कलाकार चिनाउँदै सरोज, आश्मा र जिवेश

09/12/2024

धनुषामा धान खरिद सुरु
खाद्य व्यवस्था तथा व्यापार कम्पनी लिमिटेड मधेश प्रादेशिक कार्यालय, जनकपुरधामले धान खरिद प्रक्रिया सुरु गरेको छ । धनुषाको किसानबाट यस वर्ष ३२ हजार क्वीन्टल सोना मन्सुली धान खरिद गर्ने गरी आजदेखि सुरु भएको कार्यालय प्रमुख देवेन्द्र राईले जानकारी दिए । यसवर्ष सरकारले सोना मन्सुली धानको समर्थन मूल्य प्रतिक्वीन्टल तीन हजार पाँच सय ८० रुपैया ६२ पैसा तोकिएको छ ।

यहाँ स्थानीय तहका कृषि शाखाको सिफारिसमा तथा किसानले तोकिएको मापदण्ड पूरा गरेर ल्याएमा धान खरिद चेकमार्फत भुक्तानी गर्ने व्यवस्था मिलाइएको कार्यालय प्रमुख राईले बताए । यसअघि सो कार्यालयको धान खरीदका लागि धनुषाका प्रमुख जिल्ला अधिकारी राजुराम कडरियाको अध्यक्षतामा जिल्ला प्राथमिक धान खरिद समितिको बैठकबाट निर्णय गरी धान खरिद प्रक्रिया सुरु गरिएको उनले जानकारी दिए ।

बास्मती धानको मूल्य निर्धारण नभएकाले तत्काल त्यसको खरिद नहुने पनि जनाइएको छ । धनुषामा यस वर्ष ४१ हजार पाँच सय ६६ हेक्टर क्षेत्रफल जमिनमा एक लाख ६६ हजार दुई सय ६० मेट्रिकटन धान उत्पादन भएको कृषि ज्ञान केन्द्रले जनाएको छ ।

09/12/2024

जल–ऊर्जा–खाद्य समस्यालाई सम्बोधन गर्न विश्वव्यापी सहकार्य आवश्यकः ऊर्जामन्त्री खड्का
ऊर्जा, जलस्रोत तथा सिँचाइमन्त्री दीपक खड्का थाइल्याण्डको बैँककमा आयोजित अन्तर्राष्ट्रिय माटो तथा जल सम्मेलनमा सहभागी भएका छन् ।

संयुक्त राष्ट्र खाद्य एवं कृषि सङ्गठन (एफएओ) को आयोजनामा थाइल्याण्डको बैँककमा आजदेखि सुरु भएकोसम्मेलनमा उनी सहभागी भएका हुन् । सम्मेलनमा आज सम्बोधन गर्दै मन्त्री खड्काले पानीको अभाव व्यवस्थापन र माटोको क्षयीकरण रोक्दै दिगो कृषि र खाद्य प्रणालीको विकासमा उच्चस्तरीय कार्ययोजना आवश्यक रहेको बताएको उनको सचिवालयले जनाएको छ ।

ऊर्जा, जलस्रोत र सिँचाइ क्षेत्रमा जलवायु परिवर्तनले पारेको असरलाई सम्बोधन गर्न सबै लाग्नुपर्नेमा जोड दिँदै ऊर्जामन्त्री खड्काले नेपालको अर्थतन्त्रको आधार कृषि भएकाले दिगो र लचिलो कृषि खाद्य प्रणाली सिर्जना गर्न विज्ञान, नवप्रवर्तन र नीतिलाई एकीकृत गर्न गरिने बताए । नेपालले सन् २०३५ सम्ममा २८ हजार ५०० मेगावाट जलविद्युत् उत्पादन गर्ने लक्ष्य लिएको तर जलवायु परिवर्तनका असरले हिमाली क्षेत्र परेको असरले यो क्षेत्र नराम्ररी प्रभावित भइरहेको उनको भनाइ थियो ।

मन्त्री खड्काले जल–ऊर्जा–खाद्य समस्याधलाई दिगो रूपमा सम्बोधन गर्न विश्वव्यापी सहकार्यका लागि आग्रहसमेत गरे । उनले जलवायु सङ्कट र सामाजिक–आर्थिक चुनौतीको सामना गर्दै जलस्रोत व्यवस्थापनमा उत्कृष्ट अभ्यास र प्राविधिक प्रगति प्रवर्द्धन गर्न थप सहकार्य, ज्ञान र साझेदारी आवश्यक रहेको बताए ।

तीन दिनसम्म चल्ने उक्त सम्मेलनमा नेपाल, थाइल्याण्ड, आयसल्याण्ड, पाकिस्तान, कम्बोडिया, भुटान, चिली जापानलगायतका दुई दर्जनभन्दा बढी देशका मन्त्री तथा उच्चपदस्थ अधिकारीको सहभागिता रहेको छ ।

09/12/2024

बीमा प्राधिकरणका अध्यक्ष सूर्यप्रसाद सिलवालविरुद्ध भ्रष्टाचारको मुद्दा दायर
नेपाल बीमा प्राधिकरणका अध्यक्ष सूर्य प्रसाद सिलवालविरुद्ध भ्रष्टाचारको मुद्दा दायर भएको हो । सोमबार अख्तियार दुरुपयोग अनुसन्धान आयोगले अध्यक्ष सिलवालविरुद्ध विशेष अदालतमा भ्रष्टाचारको मुद्दा दायर गरेको आयोगका प्रवक्ता नरहरि घिमिरेले जानकारी दिए ।

सिलवालले नागरिकतामा पटक-पटक जन्म मिति संशोधन गरी नागरिकता तथा राहदानीमा केरमेट र जालझेल गरेको, नेपाल बीमा प्राधिकरणको अध्यक्षको हैसियतमा ६५ वर्षको उमेरको हदबाट अनिवार्य अवकाश हुनु पर्नेमा २०८० साल साउन १६ गतेवाट ६६ औं वर्षमा प्रवेश गर्दासमेत पदमा वहाल नै रही पछिल्लो नौ महिनादेखि राष्ट्रसेवक पदको दुरुपयोग गरी लाभ, सुविधा र अधिकारको प्रयोग गरी रहेकोले उनीविरुद्द मुद्दा दायर गरेको हो ।

सिलवालको जिल्ला प्रशासन कार्यालय पर्साबाट २०३२-११-२४ गते जारी भएको नेपाली नागरिकता प्रमाण पत्र प्राप्त गर्दा उमेर १६ वर्ष उल्लेख भएको, जिल्ला प्रशासन कार्यालय काठमाडौवाट नेपाली नागरिकताको प्रतिलिपि प्राप्त गर्दा मिति २०६६-०१-१७ गते जारी नागरिकतामा जन्म मिति २०१६-०७-२२ उल्लेख भएको, त्रिभुवन विश्वविद्यालयवाट जारी डिप्लोमा तहको ट्रान्सक्रिप्टमा जन्म मिति २०१५-०४-१५ उल्लेख भएको, स्वंयले भरेको नोकरी तथा वैयक्तिक विवरण (सिटरोल) मा समेत ट्रान्सक्रिप्टको नै जन्म मिति २०१५-०४-१५ उल्लेख गरी विवरण भरी निजामती सेवामा मिति २०४३-०४-०१ गते राप। तृतीय श्रेणीको पदमा नियुक्ति लिएको, सोही जन्म मितिको आधारमा निजामती किताबखानाबाट निवृत्तिभरण अधिकार पत्र प्राप्त गरी, मिति २०७३-०४-१५ गते अनिवार्य अवकाश प्राप्त गरेको देखिएकोवाट शंका लागेर छानबिन हुँदा भ्रष्टाचारजन्य कसुर गरेको पुष्टि भएको अख्तियारको जिकिर छ ।

09/12/2024

महारानीझोडामा जग्गाधनी दर्ता प्रमाणपूर्जा वितरण शुभारम्भ
प्रधानमन्त्री केपी शर्मा ओलीले झापाको गौरादह नगरपालिका–४ र ५ अन्तर्गतको जग्गाधनी दर्ता प्रमाणपूर्जा वितरण कार्यको आज यहाँ शुभारम्भ गरेका छन् ।

साबिक महारानीझोडा गाविसका चार हजार घरधुरीका करिब आठ हजार कित्ता जग्गाको नापी प्रमाणित नभएका कारण लामो समयदेखि समस्या झेलिरहेका स्थानीयवासीले नेपाल सरकारको पछिल्लो निणर्यसँगै जग्गा प्राप्त गर्न लागेका हुन् । वर्तमान सरकारले गठन आदेशबाट समिति बनाई समाधानको पहल गरेपछि जग्गाधनी प्रमाणपूर्जा वितरण कार्य सम्भव भएको हो ।

सो अवसरमा प्रधानमन्त्री ओलीले व्यवस्था परिवर्तनपछि जनताको अवस्थामा परिवर्तन भएन भन्नेहरुका लागि जवाफ मिल्ने गरी अहिलेको संयुक्त सरकारले काम गरिरहेको बताउँदै जनताको हरेक समस्याको समाधान गर्ने प्रतिबद्धता व्यक्त गरे ।

मुलुकमा अस्थिरता मच्चाउने र देशको समस्या समाधान भएको देख्न नसक्नेहरुले सरकार ढल्न लाग्यो भनेर हल्ला फैलाए पनि त्यो कदापि सम्भव नहुने उल्लेख गर्दै प्रधानमन्त्री ओलीले वर्तमान सरकार गठनका क्रममा नेपाली कांग्रेस र नेपाल कम्युनिष्ट पार्टी (एमाले) बीच भएको सहमतिअनुसार अबको १८ महिनापछि कांग्रेसका सभापतिलाई सत्ता हस्तान्तरण गर्ने पुनः स्मरण गराए ।

09/12/2024

प्याजमा आत्मनिर्भर हुन विदुरमा ‘प्याज पकेट’ कार्यक्रम
नुवाकोटको विदुर नगरपालिकाले प्याजमा आत्मनिर्भर बनाउन ‘प्याज पकेट’ कार्यक्रम सञ्चालनमा ल्याएको छ ।

विगतका वर्षमा परीक्षणको सुरु गरेको यस कार्यक्रमलाई चालु आर्थिक वर्षदेखि वडा नं ७ मा व्यावसायिक उत्पादन गरी नगरलाई प्याजमा आत्मनिर्भर बनाउने लक्ष्य लिएको नगरप्रमुख राजन श्रेष्ठले जानकारी दिए । उनले पालिकालाई आत्मनिर्भर बनाउँदै किसानको आर्थिक उपार्जन वृद्धिमा समेत सहयोग पुर्‍याउन ‘प्याज पकेट’ कार्यक्रमलाई गौरवको योजनाका रूपमा सञ्चालन गरिएको बताए ।

“प्याज पकेट क्षेत्रका किसानलाई आवश्यक पर्ने उन्नत जातका बिरुवाका लागि नगरपालिकाले अनुदानमा बीउ उपलब्ध गराएको छ”, नगरप्रमुख श्रेष्ठले भने,“दुईवटा कृषि सहकारीलाई उन्नत जात (रेड क्रियोल)को बीउबाट बिरुवा उत्पादन गरेर पकेट क्षेत्रका किसानलाई सहुलियत शुल्कमा वितरणको प्रबन्ध मिलाएका छौँ ।”

विगतका परीक्षणका रूपमा सञ्चालन गरिएको कार्यक्रम प्रभावकारी बन्नुका साथै स्थानीय किसानको आयआर्जन वृद्धिमा सहयोग पुर्‍याउन थालेपछि प्याजको व्यावसायिक उत्पादनलाई जोड दिइएको पालिकाको कृषि शाखाले जनाएको छ ।

बीउ उपलब्ध गराएका किसानले बिरुवा रोप्न सुरु गरेदेखि उनीहरूलाई बजारिकरणसम्म सहयोग पुर्‍याउन विभिन्न कार्यक्रम समावेश गरिएको छ । कार्यक्रम सफल बनाउन कृषि औजार, सिँचाइ पाइप, प्राविधिक परामर्श दिइने जनाइएको छ ।

Address

Katpadi

Website

facebook.com

Alerts

Be the first to know and let us send you an email when Sajha Page posts news and promotions. Your email address will not be used for any other purpose, and you can unsubscribe at any time.

Contact The Business

Send a message to Sajha Page:

Videos

अभिनय गरेर कलाकार चिनाउँदै सरोज, आश्मा र जिवेश

अभिनय गरेर कलाकार चिनाउँदै सरोज, आश्मा र जिवेश #aashmabishwokarma #sarojadhikari #jibeshgurung #nareshbhattarai

जिबेस गुरुङको लक्ष्य के ? #jibeshgurung #sarojadhikari #aashmabishwokarma #nareshbhattarai #reelsvideo

आश्मा र सरोजसँगै कार्यक्रमलाई झन रमाईलो बनाउन सरप्राईज गेस्टको रुपमा आईपुगे जिबेस गुरुङ

आश्मा र सरोजसँगै कार्यक्रमलाई झन रमाईलो बनाउन सरप्राईज गेस्टको रुपमा स्टुडियोमै आईपुगे जिबेस गुरुङ #jibeshgurung #aashmabishwokarma #sarojadhikari #nareshbhattarai

मेरो अहिले साइली एल्बम बजारमा आएको छ - राजु परियार

मिनरल वाटर गीत गाउँदै जिबेस गुरुङ #jibeshgurung #aashmabishwokarma #sarojadhikari #nareshbhattarai

पछिल्लो समय गीत तथा संगीतमा हुने अवार्डहरू मा विकृतिहरू फैलिरहेको छ - बिबि अनुरागी

मिनरल वाटर गीत गाएर जिबेस गुरुङले तताए स्टुडियो

मिनरल वाटर गीत गाएर जिबेस गुरुङले तताए स्टुडियो #jibeshgurung #aashmabishwokarma #sarojadhikari #meroautasathichha #nareshbhattarai

सरोज र आश्माले कार्टून क्रु जुनियर ल्याउनुको कारण यस्तो

सरोज र आश्माले कार्टून क्रु जुनियर ल्याउनुको कारण यस्तो #aashmabishwokarma #sarojadhikari #meroautasathichha #nareshbhattarai

पत्रकार महासंघको निर्वाचन : रमेश विष्टको नेतृत्वमा

पत्रकार महासंघको निर्वाचन : रमेश विष्टको नेतृत्वमा श्रमजीवी पत्रकारहरुको साझा प्यानल सार्वजनिक (नामसहित)

नेपालको लोकतन्त्र, नागरिक अधिकार, मानव अधिकार, अभिव्यक्ति स्वतन्त्रता,

नेपालको लोकतन्त्र, नागरिक अधिकार, मानव अधिकार, अभिव्यक्ति स्वतन्त्रता, प्रेस स्वतन्त्रताजस्ता लोकतन्त्रका गहनाहरुलाई आत्मसात् गर्दै, रक्षा गर्दै र त्यसलाई प्रवद्र्धन गर्नलाइ मेरो उम्मेद्दावारी हो।

पछिल्लो समय गीत तथा संगीतमा हुने अवार्डहरू मा विकृतिहरू फैलिरहेको छ - बिबि अनुरागी

सरोज र आश्मासँग विवाहका कुरा, कहिले गर्छन् यी जोडीले विवाह ?

सरोज र आश्मासँग विवाहका कुरा, कहिले गर्छन् यी जोडीले विवाह ? #aashmabishwokarma #sarojadhikari #meroautasathichha #nareshbhattarai

Sajha Page

09/12/2024

09/12/2024

09/12/2024

09/12/2024

09/12/2024

09/12/2024

09/12/2024

09/12/2024

09/12/2024

09/12/2024

09/12/2024

09/12/2024

09/12/2024

09/12/2024

09/12/2024

09/12/2024

09/12/2024

09/12/2024

Address

Website

Alerts

Contact The Business

Videos

अभिनय गरेर कलाकार चिनाउँदै सरोज, आश्मा र जिवेश

आश्मा र सरोजसँगै कार्यक्रमलाई झन रमाईलो बनाउन सरप्राईज गेस्टको रुपमा आईपुगे जिबेस गुरुङ

मिनरल वाटर गीत गाएर जिबेस गुरुङले तताए स्टुडियो

सरोज र आश्माले कार्टून क्रु जुनियर ल्याउनुको कारण यस्तो

पत्रकार महासंघको निर्वाचन : रमेश विष्टको नेतृत्वमा

नेपालको लोकतन्त्र, नागरिक अधिकार, मानव अधिकार, अभिव्यक्ति स्वतन्त्रता,

पछिल्लो समय गीत तथा संगीतमा हुने अवार्डहरू मा विकृतिहरू फैलिरहेको छ - बिबि अनुरागी

सरोज र आश्मासँग विवाहका कुरा, कहिले गर्छन् यी जोडीले विवाह ?

Shortcuts

Share

Category