21/07/2020
KHAT LOLHINNA JONG KHATDIA LHILONNA BEP!
By: Thangminlun Haokip
Pakaiyin alhu ho akai ding in, akisonkun jouse aphong ding'e~ Bible (Psalms 145:14)
Mihem hinkhoa hin lolhinna leh losapna hin nitin in ei-umkim vel jing uvin ahi. Phatkhat in losapna kinei khata jongle, hichu tepsa ahipon - kikhel tei ding leh kikhel thei ding, masang'a sang'a kihambol cheh joh nading'a patepna a iki lah thei uleh kipana le lolhinnan malam'a eigaldot jing uve ti geldoh jing ding ahi.
Tulai themjilna lam'a simlai khangdong tampin themvetna ina nei hou vetlhah na, koichu lolhing'a koijohchu lolhinglou ham tia themvetna result ho ahung pot laitah in, mi tampin lolhinna leh pachanna sangtah tah imu jeh uvin mitin pachatna-loui leh goul, nuleh pa, khosung vengsung, jilkung chengleh gamsung leh namsung'a kipunkhomna chom chom ho akon hijongleh pachatna leh kipapi na-ngaisang na inei uvin, kipapi i- um lheh uvin ahi. Henge, kipapi poute tia iseiyu ahipon, kipapi ding'a lomtah ahiuve, ahin simlai tampin lolhinna leh pachanna amujing lai tah a aning langkhat'a lolhin joulou jeh a guhthim cha a mitlhi kitheh hul'a, keidia kinepna umlou hitam, lolhinna hi kachan lou ding hitam, eikineppi ding leh ei tilkhou ding loui leh goul, sopi-ule nao kanei lou ngap hitam, tia alunglhah nikhoa alung suthou ding leh tilkhou ding jeng cha jong neilou khopma, lunglhadai pum'a kingaisea hinkho mang, khatvei tou losap jeh a ahinkho phal ngam leuva, thisan so leuva hinkho mang khangdong tampi aum da pon ahi. Ahileh ama ho hi ity ding'u hitam? Alolhing sa ho ipachat jing uva aham doh sun in amaho thu jeng seina a ikam uleh ileiyu ile uva, langkhat na hiche tilkhou na leh pachatna ngaicha keova umho donlou va i-um uhi dih hinam? Hijeh a hi nule paten ichateu alosap nikhouva akan talou ding'a ilung han uva ilung nopmo sang uva ibol thei pennu -Pathen heng'a dilsua ichate ding'u va taona a ilhan doh joh uva,tunin lolhing jou tahih jong'u leh malam'a akiham bol cheh thei nadiuva kinepna nei talouleh leh lunglhadai tasa ichateu hi eihon itilkhou lou uleh konba atilkhou ding'u hitam? Hijeh a hi minu mipa ten panmun lentah ineiyu hi ihaimil lou ding'u ahi.
Vannoiya minthang tah leh kihil na theitah, Thomal Alva Edison, tunia nomtah a sun hihen jaan hileh nomtah a meivah ikivah theinau, jaan jeng jong sunlai bang'a nomtah a i-um theinau chuleh thil dang tampi jong hinsem doh pa hi, aneolaiyin nikhat a school uva konin lekhathot anu heng ahung lhung in, nachapa hi hilaiya kaithei taponte, amahi lunggel lam'a ngol-lungngong ahibouve, tin ahinsei peh phat uvin anun agelleh na asan, mitlhi thonggo bangin ana long tan ahi. Ahin thu kisei chu atahsan pon, chutia tahsan tah sang chun ama tah akipan in, min angol bang'a agel jeng achapa khankho ding gelnan, inmunna ahin buipi tan ahileh, k*m tampi jou ama thi nung in achapa chu vannoiyin a-itih a ahaimilou ding khat ahung hidoh tan ahi.Ama hinkhoa konna mudoh thei tampi aum in ahi-hichu kinepna aumlou teng tilkhouna leh tahsan na aumleh, losapna cheng chu lolhinna ding'a , losapna a konna pui doh thei ding lampi joh ahijin ahi. Chuleh nuleh paten panlentah ineiyu jong mudoh thei ahi.
Tunia simlai ho jong khatvei komle lolhinna neijou ji hih jongleu hen lunglha paijeng louva, phatchesa a losapna hocheng nungsunna, lunggel thah neipumma hinkho thah iman diu dei ahi. Chuleh thilsoh jouse hi aphachom cheh ding leh ajeh umma soh ahi ti geldoh jing'u hite. Chuleh nitin ihinkho man nah uva hi thil se hihen thilpha hijongleh hung jing ding ahin, hiche hohi iti ikimaito pidiu ham tihi eiho khutna um ahi. Tunin losam jong leuhen phat tampi aum nalaiye, tu hinkho aum nalaiye, janhi chu achesa ahitan gel-gel datan ajehchu achesa ahitan, hung kile kit talou dia che ahitai chuleh jing nikhoa ding gelna a tunia iphat-u isuh mang uva kingaisea hinkho iman jing ding' u ham? Ahipoi, lolhinna hi tepsa ahipon, chutobang ma a chu losapna jong tepsa le gonsa ahideh poi-kikhel thei ahin tunin losam jongleu hen ilolhin na ding'u phat hung lhung tei ding ahi.
Tunin milolhing tampi a konnin kihilna thei tampi imudoh taovin-lolhinna din kihambol angaiye, gunchu angaiye, phat manthem angaiye, thaset louding ahi, nang in jong namu thei ahi, nalolhinna ding'a hiche hi ngai ahi tiho tampi neova pat a ihin jah jing peh uleh ihin het jing'u ahitan, ahin tunia iding'a henasa a helou kisa leh janasa a jalou kisa a, milolhing sa hon paochamtuh in 'voh-eh chon masa' kiti hon athilto uva konna eihil nahouhi donlou dailou bang'a ikoiyu ahidem? Hiche lungput ineiyu hi ikhel ding'u dei ahi. Ajehchu hichun losapna le hinkho kipalouna joh a eilhut diu joh ahi.
Keima tah injong kahin to ahitan, khatvei losap manna hinkho phal ngam leuva thisan iso uhi, kagelleh kaponan-keimatah themvetna a losam bang in kakilah in, lhaset aum lheh jeng'e. Henge, pohnat aumme iloui igoul khat in lolhinlelna ahin neiteng, ihet soh diu katahsanne. Chuleh ilunggel u ana sang khaji tan, hinnom jong umlou khop in ina kingaise jiuvin, lunggel a chapan nalai jeh leh hetkhel jeh pen ahiding katahsanne. Athupi penna tilkhouna lhah sam jeh leh ilungput-u, insung mite cheng lunggel them loujeh hipen ding ahi. Ajeh chu kitillhouna leh pachatna aumteng ahatlou khat jong hat thei, aphalou khat jong chu kisem phathei, alosam khatjong hung kiham bolla lolhinna ahin nei thei ahi. Thuchih khat in 'Losapna umlouva ity hetna naneiya nalolhin ding ham? ' tia asei hi igeldoh uva, losapna umlouva lolhinna aum theilou hi ihet ding'u dei ahi.
Arianna Huffington, Greek-American mi lekhasun themtah leh sumkolveina lam'a lolhing tah nu chun, 'Losapna hi lolhinna ding'a kalbi ahi' atihi geldoh kit ute. Hijehchun tunia adeh a nule paten ichateu losam khata jongleu lunglha paijeng louleh kinepna dailhah sah jeng louva, ity itilkhou thei uva kinepna ineisah jing thei ding'u ham ti joh igel uva, chate chung'a pan ithah lah kit ding'u deisah ahi. Chuleh simalai khangdong ho ding'a hetdia dei um chu tunia lolhinna inei thei khah tahlou jong ule lunglhadai leh kingaise louva, kinepna neipum'a pan ilah jing uva, ilolhin lel nahou chu lolhinna ding'a kihilna a ilah uva, kaloui kagoul in bon amuthei leh keijong amaho tobang kahin, kabolthei ahi, tia eima leh eima kitilkhouva kiham bol ding ahi.
Hiti ahijeh a hi mikhat lolhinna chu eidia lhiso nabep hisah louva, mibon alolhin thei leh tia, ilhilon khat tah ujongleh hichu nikhat teng kipana mitlhi sodoh natei ding'a tunia kinem lel louva, Pathen song jingleh geldoh jing pum' a hinkho iman ding uvin iki tem uve.
