Js Tv Telugu News

28/05/2023

ఆడపిల్ల పుట్టిందన్న ఆనందం; ఏనుగుపై ఊరేగించిన తండ్రి!!

ఆడపిల్ల పుట్టిందంటే ఇప్పటికీ చాలా ప్రాంతాలలో వివక్ష కొనసాగుతుంది. కడుపులో ఉన్నది ఆడ బిడ్డ అని తెలియగానే బలవంతంగా అబార్షన్లు చేయిస్తున్న వారు కూడా లేకపోలేదు. ప్రభుత్వం ఆడపిల్లల్ని కాపాడుకోవాలని పెద్ద ఎత్తున బేటీ బచావో బేటీ పడావో అంటూ ప్రచారం చేస్తున్నా ఆడ పిల్లల గొప్పతనం తెలియనివారు ఇంకా ఉన్నారు అంటే ఆశ్చర్యపోవాల్సిన అవసరం లేదు.
అయితే ఆడపిల్ల పుట్టిందని సంతోషాన్ని వ్యక్తం చేస్తూ ఘనంగా సంబరాలు చేసుకుంటున్న వారు కూడా లేకపోలేదు.ఆడపిల్ల పుట్టిందని, ఆడపిల్ల లక్ష్మీ సమానమని చెప్పే ప్రయత్నం చేస్తున్న వారు ఉన్నారు. తాజాగా అటువంటి ఘటనే మహారాష్ట్రలోని కొల్హాపూర్ జిల్లా పచ్ గావ్ లో జరిగింది.
35 ఏళ్లుగా ఆడ సంతానమే లేని ఆ కుటుంబంలో ఆడపిల్లలు పుట్టడంతో వారి సంతోషం అంబరాన్ని తాకింది. పట్టరాని సంతోషంతో తండ్రి, తనకు ఆడపిల్ల పుట్టింది అన్న విషయాన్ని అందరికీ తెలియ చేయాలని సంకల్పించారు. అందులో భాగంగా తన బిడ్డను ఇంటికి ఆహ్వానిస్తూ తండ్రి ఘన స్వాగతం పలికాడు.
మహారాష్ట్రలోని కొల్హాపూర్ జిల్లా పచ్ గావ్ లో నివసించే గిరీష్ పాటిల్ కు ఐదు నెలల క్రితం కూతురు పుట్టగా ఆయన సంతోషంతో ఉబ్బి తబ్బిబ్బయ్యారు. ముద్దుగా ఆమెకు ఐరా అని పేరు పెట్టుకున్నాడు. తొలిసారిగా నిన్న చిన్నారి ని తన ఇంటికి తీసుకొని వచ్చాడు. దీంతో ఆమెకు ఘన స్వాగతం పలకడానికి హంగామా చేశాడు.
ఏనుగు పై ఉరేగిస్తూ, డప్పు వాయిద్యాల మధ్య, తన బిడ్డను అందరికీ చూపిస్తూ ఇంటికి ఘనంగా తీసుకు వెళ్ళాడు గిరీష్ పాటిల్. 35 ఏళ్ల తర్వాత తమ వంశంలో ఆడపిల్ల పుట్టిందని, ఎంతో కాలంగా ఆడపిల్ల కోసం తమ వంశం ఎదురు చూస్తోందని ఆయన పేర్కొన్నారు. ఇంత కాలం తర్వాత తమకు ఆడపిల్ల పుట్టడంతో సంతోషంగా ఉన్నామని ఆయన తన ఆనందాన్ని వ్యక్తం చేశారు.

28/05/2023

New Parliament: నూతన పార్లమెంట్ భవనం ప్రారంభం.. నియంత్రిత ప్రాంతంగా ఢిల్లీ.

భవిష్యత్తులో ఎంపీల సంఖ్య పెరుగుతుందని, 100 ఏళ్ల కిందటి ప్రస్తుత భవనంలో వారు కూర్చోవడానికి స్థలం సరిపోవడం లేదని సెంట్రల్ విస్టా ప్రాజెక్ట్ కింద కొత్త పార్లమెంటు భవనం నిర్మించారు. సెంట్రల్ విస్టా ప్రాజెక్టు దాదాపు రూ. 20 వేల కోట్లు ఖర్చుచేశారు. వాస్తవానికి ఢిల్లీలోని రాజ్‌పథ్‌కు సమీపంలో ఉన్న ప్రాంతాన్ని సెంట్రల్ విస్టా అని పిలుస్తారు. ఇందులో రాష్ట్రపతి భవన్ నుంచి ఇండియా గేట్ సమీపంలో ఉన్న ప్రిన్సెస్ పార్క్ ప్రాంతం కూడా ఉంది. రాష్ట్రపతి భవన్, పార్లమెంట్, నార్త్ బ్లాక్, సౌత్ బ్లాక్, ఉప-రాష్ట్రపతి నివాసం కూడా దీని పరిధిలోకి వస్తాయి.
అత్యాధునిక సౌకర్యాలు, సకల హంగులతో నిర్మించిన ఈ పార్లమెంటు భవంతిని ప్రధాని నరేంద్ర మోదీ ఆదివారం ప్రారంభిస్తున్నారు. రాష్ట్రపతి ద్రౌపదీ ముర్ము చేతుల మీదుగా జరగాల్సిన ఈ కార్యక్రమం జరగడం లేదని చెప్పి 20 విపక్ష పార్టీలు ఈ కార్యక్రమాన్ని బహిష్కరించాలని ఇప్పటికే నిర్ణయించాయి. అయితే, అంగరంగ వైభవంగా నిర్వహించడానికి ఏర్పాట్లు చేశారు. రాజధాని ఢిల్లీని నియంత్రిత ప్రాంతంగా ప్రకటించి, ఉదయం 5.30 నుంచి మధ్యాహ్నం 3 గంటల వరకు వాహనాల రాకపోకలపై ఆంక్షలు విధించారు.
ఉత్తర్‌ ప్రదేశ్‌లోని మీర్జాపుర్‌ తివాచీలు, త్రిపుర వెదురుతో సిద్ధం చేసిన గచ్చు, రాజస్థాన్‌లో రూపుదిద్దుకున్న శిలాకృతులు.. ఇలా దేశంలో భిన్న సంస్కృతుల మేళవింపుగా కొత్త భవనాన్ని తీర్చిదిద్దారు. స్వాతంత్రం అనంతరం బ్రిటిషర్ల నుంచి అధికారం బదలాయింపునకు చిహ్నంగా తొలి ప్రధాని జవహర్ లాల్ నెహ్రూ స్వీకరించిన చోళుల కాలం నాటి‘రాజదండం’ (సెంగోల్‌)ను స్పీకర్‌ స్థానానికి సమీపంలో ఉంచుతారు. అలాగే, ప్రత్యేకంగా రూపొందించిన రూ.75 నాణేన్ని విడుదల చేస్తారు.
టాటా ప్రాజెక్ట్స్‌ లిమిటెడ్‌ నిర్మించిన కొత్త భవనంలో భారీస్థాయి ‘కాన్‌స్టిట్యూషన్‌ హాల్‌’, ఎంపీల కోసం ఒక లాంజ్‌, గ్రంథాలయం, కమిటీ హాళ్లు, విశాలమైన పార్కింగ్‌ ఏర్పాట్లు ఉంటాయి. త్రికోణాకారంలో నాలుగంతస్తుల్లో నిర్మించిన భవనం మొత్తం వైశాల్యం 64,500 చదరపు మీటర్లు. వీఐపీలు, ఎంపీలు, సందర్శకులకు వేర్వేరు ప్రవేశ ద్వారాలు ఏర్పాటు చేశారు.
ఇక, భవన నిర్మాణానికి వినియోగించిన టేకును నాగ్‌పూర్ నుంచి, ఫ్లోరింగ్ కోసం రాజస్థాన్‌లోని సర్‌మధుర నుంచి ఎర్ర చలువరాయి, అంబాజీ నుంచి తెల్ల చలువరాయి, కేసరియా ఆకుపచ్చరాయిని ఉదయ్‌పుర్‌ నుంచి, ఎర్ర గ్రానైట్‌ను అజ్‌మేర్‌ సమీపంలోని లఖా నుంచి.. ఫర్నిచర్‌ను ముంబయి నుంచి రప్పించారు. జాతీయ చిహ్నం కోసం సామగ్రిని ఔరంగాబాద్‌ నుంచి, ఉభయసభల్లో భారీ గోడలపై అశోక చక్రం కోసం ఇండోర్ నుంచి సామగ్రి తీసుకువచ్చారు. కొత్త పార్లమెంట్ భవనం సెంట్రల్ విస్టా ప్రాజెక్ట్‌లో భాగంగా ఈ ప్రాజెక్ట్ బ్లూప్రింట్‌ను గుజరాత్‌లోని ఆర్కిటెక్చర్ సంస్థ హెచ్‌సీపీ డిజైన్స్ రూపొందించింది.

28/05/2023

Jr NTR: ఎన్టీఆర్ ఘాట్‌ వద్ద తార‌క్‌.. ‘సీఎం సీఎం’ అంటూ నినాదాలు..

Jr NTR: సీనియ‌ర్ ఎన్టీఆర్ శ‌త జ‌యంతి సంద‌ర్బంగా ఎన్టీఆర్ ఘాట్‌ను అందంగా అలంక‌రించారు. ఉద‌యం నాలుగు గంటల ప్రాంతం నుంచే నంద‌మూరి కుటుంబ స‌భ్యులు ఆయ‌న‌కు నివాళులు అర్పించారు.
తెలుగు చిత్ర పరిశ్రమ ఎదుగుదలకు మూల స్తంభాల్లో ఒకరు.. తెలుగు వారి ఆత్మ గౌర‌వానికి ప్ర‌తీక స్వ‌ర్గీయ నంద‌మూరి తారక రామారావు (Nandamuri Taraka Rama Rao). తెలుగు వారి ఉనికి కోసం తెలుగు దేశం పార్టీని స్థాపించి తొమ్మిది నెల‌ల్లోనే ముఖ్య‌మంత్రి పీఠాన్ని అధిరోహించి చ‌రిత్ర‌ను సృష్టించారు. ఆదివారం (మే 28) రోజున సీనియ‌ర్ ఎన్టీఆర్ శ‌త జ‌యంతి. ఈ సంద‌ర్భంగా ట్యాంక్ బండ్ వ‌ద్ద‌నున్న ఎన్టీఆర్ ఘాట్ వ‌ద్ద‌ ఆయ‌న కుటుంబ స‌భ్యులు నివాళులు అర్పించారు.
ఎన్టీఆర్ త‌న‌యుడు, హిందూపూప‌ర్ ఎమ్మెల్యే, హీరో నంద‌మూరి బాల‌కృష్ణ‌ (Nandamuri Balakrishna), అలాగే మ‌న‌వ‌డు జూనియ‌ర్ ఎన్టీఆర్‌ (Jr Ntr), నంద‌మూరి రామ‌కృష్ణ (Nandamuri Ramakrishna) త‌దిత‌రులు ఎన్టీఆర్ ఘాట్‌ను సంద‌ర్శించి నివాళులు అర్పించారు. ముఖ్యంగా జూనియ‌ర్ ఎన్టీఆర్ ఎన్టీఆర్ ఘాట్‌కు చేరుకునే లోపు భారీ సంఖ్య‌లో అభిమానులు గుమిగూడారు. బౌన్స‌ర్స్ సాయంతో ఎన్టీఆర్ ఘాట్‌ను సంద‌ర్శించాల్సి వ‌చ్చిందంటే అభిమానుల సందోహాన్ని అర్థం చేసుకోవ‌చ్చు. తాత‌య్య‌కు ఎన్టీఆర్ నివాళులు అర్పించిన త‌ర్వాత ఎన్టీఆర్ ఏమీ మాట్లాడ‌కుండా వెళ్లిపోయారు.
అయితే ఎన్టీఆర్ ఘాట్‌ను తార‌క్ సంద‌ర్శించే క్ర‌మంలో అక్క‌డున్న అభిమానులు ‘సీఎం సీఎం..’ అంటూ నినాదాలు చేయటం కొస మెరుపు. ఇటీవ‌ల హైద‌రాబాద్‌లో జ‌రిగిన ఎన్టీఆర్ శ‌త జ‌యంతి వేడుక‌ల‌కు (NTR Centenary celebrations) తార‌క్ రాలేదు. ఇత‌ర హీరోలు వ‌చ్చిన‌ప్ప‌టికీ తార‌క్ రాక‌పోవ‌టం అనేది టాక్ ఆఫ్ ఇండ‌స్ట్రీగా మారింది. నంద‌మూరి అభిమానుల్లోనే రెండు గ్రూపులుగా విడిపోయి సోష‌ల్ మీడియాలో తిట్టుకున్నారు కూడా. అదే రోజున తార‌క్ పుట్టిన‌రోజు ఉండ‌టంతో ఆయ‌న‌ ముందుగానే విదేశీ టూర్ ప్లాన్ చేసుకున్నారు. దీంతో ఆయ‌న హాజ‌రు కాలేదు. అయితే మే 28న ఎన్టీఆర్ ఘాట్‌ను సంద‌ర్శించారు.
కనిపించని కళ్యాణ్ రామ్..సాధారణంగా ప్రతీ ఏడాది తమ్ముడు తారక్‌తో కలిసి ఎన్టీఆర్ ఘాట్‌ను (NTR Ghat)సందర్శించే నందమూరి కళ్యాణ్ రామ్ (Nandamuri Kalyan Ram) ఈసారి కనిపించలేదు. మరి తను విదేశీ ట్రిప్ నుంచి హైదరాబాద్ వచ్చారా లేదా? అనేది తెలియ రాలేదు. ఎన్టీఆర్ శత జయంతి వేడుకలకు జూనియర్ ఎన్టీఆర్ రాకపోవటంపై నందమూరి అభిమానుల్లో కొందరికీ నచ్చలేదు. తాతగారి వేడుకల కంటే విదేశీ ట్రిప్స్ ముఖ్యమై పోయాయా అని కూడా కామెంట్స్ చేసిన నెటిజన్స్ లేకపోలేదు. అయితే తనపై వచ్చిన విమర్శలకు తారక్ మాత్రం రియాక్ట్ కాలేదు. చాలా సైలెంట్‌గా ఉంటూ తన సినిమాలను తాను చేసుకుంటూ పోతున్నారు.

28/05/2023

Central Vista కొత్త పార్లమెంట్ భవనం వేడుకలు.. స్పీకర్‌తో కలిసి రాజదండం ప్రతిష్ఠించిన ప్రధాని..

సెంట్రల్ విస్టా ప్రాజెక్టులో భాగంగా దాదాపు రూ. 20 వేల కోట్ల వ్యయంతో నిర్మించిన నూతన పార్లమెంట్ భవనాన్ని ప్రధాని నరేంద్ర మోదీ, లోక్‌సభ స్పీకర్ ఓం బిర్లాలు ఆదివారం ఉదయం ప్రారంభించారు. ఉదయం పాత పార్లమెంట్ ఆవరణలో ఉన్న గాంధీ విగ్రహం వద్ద పూజలతో ప్రారంభోత్సం మొదలైంది. ఉదయం 7.30 నిమిషాలకు తొలుత గణపతి హోమం నిర్వహించారు. అనంతరం అధీనంల నుంచి స్వీకరించిన చరిత్రాత్మక రాజదండానికి సాష్టంగ ప్రమాణం చేశారు. స్పీకర్‌, అధీనంలతో కలిసి పార్లమెంట్ భవనంలోకి ప్రవేశించిన నరేంద్ర మోదీ.. లోక్‌సభలో సభాపతి ఛైర్ పక్కన ఆ రాజదండాన్ని ప్రతిష్టాపన చేశారు.
భవన నిర్మాణంలో పాల్గొన్న కార్మికులు, సిబ్బందిని మోదీ ఘనంగా సత్కరించారు. వారికి శాలువలు కప్పి, జ్ఞాపికలను అందజేశారు. ఆ తర్వాత అక్కడ నిర్వహించిన సర్వమత ప్రార్థనల్లో ప్రధాని పాల్గొన్నారు. ఈ కార్యక్రమంలో కేంద్ర మంత్రులు, ముఖ్య నేతలు, ఎంపీలు పాల్గొన్నారు. మధ్యాహ్నం 12 గంటల తర్వాత జాతీయ గీతం ఆలపించడంతో మరో కార్యక్రమం ఉంటుంది. పూజ కార్యక్రమాలు పూర్తయిన తర్వాత అందరూ లోక్‌సభ, రాజ్యసభ ఛాంబర్లను సందర్శించానున్నారు.
రెండో విడత ప్రారంభ వేడుకల్లో భాగంగా మధ్యాహ్నం 12.30 గంటలకు లోక్‌సభ ఛాంబర్‌లో జరిగే ఈ కార్యక్రమానికి ప్రధాని నరేంద్ర మోదీ సహా అతిథులు అందరూ హాజరవుతారు. అనంతరం రాజ్యసభ డిప్యూటీ ఛైర్మన్‌ హరివంశ్‌ నారాయణ్‌సింగ్‌ ప్రసంగించనున్నారు. ఆ తర్వాత రాష్ట్రపతి ద్రౌపదీ ముర్ము, ఉప రాష్ట్రపతి జగదీప్‌ ధన్‌ఖడ్‌ ప్రసంగాలు ఉంటాయి. ఈ సందర్భంగా పార్లమెంట్‌ నిర్మాణం సమయంలోని అనేక ఘట్టాలతో రూపొందించిన ప్రత్యేక వీడియోలను ప్రదర్శించనున్నారు.

28/05/2023

Bride Trapped Fire: పెళ్లైన కాసేపటికే మంటల్లో చిక్కుకుని నవ వధువు మృతి..

పెళ్లైన కాసేపటికే నవ వధువు మంటల్లో చిక్కుకుని ప్రాణాలు కోల్పోయింది. వివాహం తర్వాత సన్నిహితులు, కుటుంబసభ్యుల కోసం ఏర్పాటుచేసిన విందుకు కొద్ది గంటల ముందే ఆమె మంటలకు ఆహుతయ్యింది. ఈ విషాదకర ఘటన అమెరికాలోని విస్కాన్సిస్ నగరంలో చోటుచేసుకున్నట్టు ది ఇండిపెండెంట్ నివేదించింది. రీడ్స్‌బర్గ్‌కు చెందిన పైజీ రుడ్డీ అనే 19 ఏళ్ల యువతికి.. లోగాన్ మిచెల్ కార్డర్‌‌తో మే 22న వివాహం జరిగింది. అదే రోజు వరుడి తాతయ్య ఇంటికి దంపతులు వెళ్లారు. ఆ రాత్రి అక్కడ నిద్రలో ఉండగా జరిగిన అగ్ని ప్రమాదంలో వధువు ఊపిరాడక మృతిచెందింది.
అపస్మారక స్థితిలో ఉన్న ఆమెను ఆస్పత్రికి తీసుకెళ్లగా.. చికిత్స పొందుతూ చనిపోయింది. పొగ పీల్చడం వల్ల బ్రెయిన్ హెమరేజ్‌కి గురైనట్టు వైద్యులు తెలిపారు. స్థానిక అగ్నిమాపక విభాగం చీఫ్ క్రెయిగ్ డగ్లస్ మాట్లాడుతూ.. గాఢనిద్రలో ఉండటం వల్ల లోపలి నుంచి బయటకు రాలేకపోయారని తెలిపారు. దంపతులు ఉంటున్న ఇల్లు వరుడి తాతలకు చెందినదని, స్మోక్ డిటెక్టర్‌లు లేవని చెప్పారు. పొగతో ఊపిరాకడే రీడ్స్ చనిపోయినట్టు వివరించారు. ప్రమాదం ఎలా జరిగిందనేది తెలియరాలేదని, దర్యాప్తు కొనసాగుతోందని పేర్కొన్నారు. అయితే, ప్రమాదంపై పోలీసులు ఎటువంటి అనుమానం వ్యక్తం చేయడం లేదన్నారు.
అగ్నిమాపక సిబ్బంది చేరుకునేసరికి మరో ముగ్గురు ఇంటి నుంచి సురక్షితంగా బయటపడ్డారని తెలిపారు. పైజీ బంధువు మాట్లాడుతూ.. ఆమె ఎంతో ఉన్నతమైన వ్యక్తని, ఆమెలో నచ్చనిది ఏమీ లేదని వాపోయారు. ఇక, పైజీ అంత్యక్రియలను వచ్చేవారం నిర్వహించనున్నారు. ఎందుకంటే ఆస్పత్రి ఖర్చులు, అంత్యక్రియల కోసం గోఫండ్‌మీ ద్వారా నిధులు సేకరిస్తున్నారు. గతేడాది రీడ్స్‌బర్గ్ ఏరియా హైస్కూల్‌ నుంచి గ్రాడ్యుయేషన్ పూర్తిచేసిన రుడ్డీ.. మేడిసన్ ఏరియా టెక్నికల్ కాలేజీలో వెట్ టెక్ ప్రోగ్రామ్‌లో చేరేందుకు ప్రయత్నాలు చేస్తోంది.

29/10/2022

viral video: ఏనుగుని కాపాడిన అమ్మాయి.. గజరాజు రియాక్షన్ చూస్తే చప్పట్లు కొట్టాల్సిందే..!

ఏనుగులు చాలా తెలివైన జంతువులు. ఎమోషన్స్‌ని సరిగ్గా అర్థం చేసుకోగలవు. సహజంగా అవి మనుషుల జోలికి రావు.. వాటి జోలికి మనుషులు వెళ్తే తప్ప. చాలా అరుదుగా మనుషులపై ఎటాక్ చేస్తాయి. చాలా మంది ఏనుగులను ఇష్టపడుతూ ఉంటారు. గజరాజులకు నచ్చే ఆహారాన్ని పెడుతూ ఉంటారు. ఏనుగు పిల్లలు కూడా చాలా అందంగా, బుజ్జిగా ఉంటాయి. ఏనుగు కనపడితే చాలా మంది వాటి దగ్గరికి వెళ్లి ఫోటోలు కూడా తీసుకుంటూ ఉంటారు. మన భావాలని అర్థం చేసుకోవడంలో ఏనుగులు ముందుంటాయి. తాజాగా ఏనుగుకి సంబంధించి ఒక వీడియో ఇంటర్నెట్‌లో వైరల్‌గా మారింది. అందులోని అమ్మాయిపై ప్రశంసల జల్లు కురుస్తోంది.
వీడియోలో ఏముంది?
ఆ వీడియోని గమనిస్తే.. ఒక చెరుకు పొలానికీ, రోడ్డుకీ మధ్య బురదలో ఏనుగు కాళ్లు చిక్కుకుపోయాయి. అది చూసిన ఓ అమ్మాయి ఏనుగు దగ్గరికి వెళ్లి గజరాజు కాళ్ళని బయటకు తీసేందుకు ప్రయత్నించింది. కానీ ఆమెకు అంత బలం లేదు. ఆ ఏనుగు దాడి చేస్తుందేమో అనే భయం లోలోపల ఉన్నా.. మంచి మనసుతో ఆ అమ్మాయి.. ప్రాణాలకు తెగించింది. ఆమె తాలూకు వాళ్లు.. జాగ్రత్త అని చెబుతున్నా.. ఆమె వెనక్కి తగ్గలేదు. తన కోసం ఆమె పడుతున్న శ్రమను ఏనుగు గమనించింది. తను కూడా బురద నుంచి బయటకు వచ్చేందుకు గట్టిగా ప్రయత్నించింది. ఇలా రెండువైపులా జరిగిన ప్రయత్నం ఫలించింది. వెంటనే ఆ ఏనుగు ఆమెకి థాంక్స్ చెబుతున్నట్లుగా.. తొండంతో ఆశీర్వదించింది. ఈ వీడియోని చూసిన నెటిజన్లు ఫిదా అవుతున్నారు.
ఈ వీడియోని IFS ఆఫీసర్ సుశాంత నందా.. తన ట్విట్టర్ అకౌంట్‌లో అక్టోబర్ 27, 2022న షేర్ చేశారు. దీన్ని ఇప్పటివరకూ 84 వేల మందికి పైగా చూశారు. దాదాపు 7వేల మంది లైక్ చేశారు. దీనిపై నెటిజన్లు తమ ఫీలింగ్స్‌ని కామెంట్స్ రూపంలో చెబుతున్నారు. "సో టచింగ్" అని ఓ యూజర్ కామెంట్ ఇవ్వగా.. "జీవితంలో మనకు చిన్నపాటి ప్రోత్సాహం కావాలి. ఇది హృదయాన్ని టచ్ చేస్తోంది" అని మరో యూజర్ మెచ్చుకున్నారు.
"ఏనుగు ఎంతో ప్రేమగా నడుచుకుంది" అని మరో యూజర్ కామెంట్ ఇవ్వగా... ఇంకో యూజర్ "ఈ అమ్మాయి ధైర్యవంతురాలు" అని కామెంట్ చేశారు. "ఏనుగు ఆ అమ్మాయికి సెల్యూట్ చేసింది" అని రాశారు మరొక యూజర్. "ఈ ప్లానెట్ చాలా మంచిది. ఒకరికొకరు సాయం చేసుకుంటారు" అని మరో సోషల్ మీడియా యూజర్ కామెంట్ ఇచ్చారు.

03/10/2022

01/10/2022

పొల్యూషన్ సర్టిఫికెట్ చూపిస్తేనే పెట్రోల్.

30/09/2022

తిరుమలలో రేపే గరుడ సేవ.. భక్తులకు టీటీడీ కీలక సూచనలు, ఇలా చేయొద్దు!

తిరుమల శ్రీవారి బ్రహ్మోత్సవాల్లో ముఖ్యమైన గరుడసేవ అక్టోబర్ 1న జ‌ర‌గ‌నుంది. ఈ వాహ‌న సేవ‌కు వచ్చే భ‌క్తులంద‌రికి వాహ‌న దర్శనం కల్పించేందుకు టీటీడీ విస్తృత ఏర్పాటు చేసిన‌ట్లు టీటీడీ ఈవో ధ‌ర్మారెడ్డి తెలిపారు. శ్రీ‌వారి ఆల‌య‌ నాలుగు మాడ వీధుల్లో హార‌తి పాయింట్లు, గ్యాల‌రీల‌ను ఈవో, డీఐజి ర‌వి ప్ర‌కాష్‌, జిల్లా ఎస్పీ ప‌ర‌మేశ్వ‌ర్‌రెడ్డితో క‌లిసి ప‌రిశీలించారు. దాదాపు మూడు లక్షల మంది భక్తులకు శ్రీ‌వారి గ‌రుడ వాహ‌న దర్శనం కల్పించేందుకు అన్ని ఏర్పాట్లు పూర్తి చేసినట్లు తెలిపారు. ఈ ఏడాది సౌత్ వెస్ట్ గేటు, నార్త్ వెస్ట్ గేటు, నార్త్ ఈస్ట్ గెట్ల వద్ద ఉన్న హారతి పాయింట్ల‌లో హారతులకు బ‌దులు భక్తులను స్వామి వారి వాహ‌న సేవకు అనుమ‌తిస్తామ‌న్నారు.
ఒకరు హార‌తి ఇచ్చే సమయంలో దాదాపు ఐదు మందికి ద‌ర్శ‌నం క‌ల్పించ‌వ‌చ్చ‌ని చెప్పారు. కావున ఈ ఏడాది హార‌తుల‌ను రద్దు చేసి సామ‌న్య భక్తులకు దర్శనం కల్పించాలని నిర్ణయించినట్లు తెలియ‌జేశారు. ప్రతి హార‌తి పాయింట్లో 10 వేల‌ మందికి గరుడసేవ దర్శనం కల్పించేందుకు అవకాశం కలుగుతుందన్నారు. అదేవిధంగా గ్యాలరీల‌లో రెండు లక్షల మంది, ఆలయం ఎదురుగా ఉన్న నాదనీరాజన మండపం వద్దకు షాపింగ్ కాంప్లెక్స్ నుండి భక్తులను రెండవసారి అనుమతించడం ద్వారా మరో 25 వేల మందికి అద‌నంగా దర్శనం కల్పించవచ్చన్నారు. త‌ద్వారా దాదాపు 2.75 ల‌క్ష‌ల నుండి నుండి 3 లక్షల మందికి స్వామి వారి గరుడసేవ దర్శనం చేయించవచ్చని వివ‌రించారు.
మరోవైపు అక్టోబర్ 1న శ్రీవారి గరుడ సేవకు సంబంధించి పోలీసులు కీలక నిర్ణయాలు తీసుకున్నారు. సెప్టెంబర్ 30 మధ్యాహ్నం 12 గంటల నుంచి తిరుమలకు బైక్‌లు నిషేధించారు. అలాగే వాహనదారులు అంతా తిరుపతిలో నిర్దేశించిన అలిపిరి బస్ స్టాండ్ పాత చెక్ పెయింట్ ఇస్కాన్ గ్రౌండ్, మెడికల్ కాలేజి గ్రౌండ్, నెహ్రు మున్సిపల్ గ్రౌండ్‌లలో పార్కింగ్ చేసుకునేలా ఏర్పాట్లు చేశారు. గరుడసేవ భక్తులు తిరుపతిలో పార్కింగ్ స్థలాలు ఏర్పాటు చేశామన్నారు. పార్కింగ్ విషయానికి వస్తే.. చెర్లోపల్లి నుంచి జూ పార్క్‌కి సమీపంలో.. భారతీయ విద్యా భవన్ స్కూల్ గ్రౌండ్‌లో కార్లు, జీపులు మొదలైన చిన్న వాహనాలు సైన్స్ సెంటర్‌కు ఎదురుగా ఉన్న భారతీయ విద్యా భవన్ స్కూల్ గ్రౌండ్ నందు పార్కింగ్ చేయాలని పోలీసులు కోరారు. అంతేకాదు బైకుల్ని గరుడ కూడలి దగ్గర ఉన్న పాత చెక్ పాయింట్ , ISKON గుడి ఎదురుగా ఉన్న గ్రౌండ్, మెడికల్ కాలేజీ గ్రౌండ్, మెటర్నిటీ ఆస్పత్రికి ఎదురుగా ఉన్న నెహ్రూ మున్సిపల్ స్కూల్ గౌండ్ లో ద్విచక్ర వాహనాలు పార్కింగ్ చేయాలని సూచించారు.
తిరుమలకు వచ్చే భక్తులు ఇబ్బంది పడకుండా ట్రాఫిక్ మళ్లించారు. నగరంలో Sign Boards చూసి ట్రాఫిక్ కు అంతరాయం లేకుండా సహకరించాలని పోలీసులు కోరారు. తిరుమలలో భక్తులు APSRTC బస్‌లను ప్రయాణం కోసం ఉపయోగించుకోవాలని.. అలాగే తిరుపతి, తిరుమలలో అపరిచిత వ్యక్తులతో పరిచయం పెంచుకోవడం మంచిది కాదని సూచిస్తున్నారు. అలాగే విలువైన వస్తువులు, అవసరమైనది తప్ప.. భక్తులు ఇక ఏవీ తీసుకురావొద్దన్నారు. రూమ్‌లలో విలువైన వస్తులను ఉంచి బయటికి వెళ్లొద్దని.. ఎవరైనా అపరిచిత అనుమానాస్పద వ్యక్తులు కనిపిస్తే పోలీసుకు సమాచారం ఇవ్వాలన్నారు.

30/09/2022

కొంపముంచిన శిష్యులు.. గురువు గారూ.. గురువు గారూ.. అంటూ జోగిపేటలో భారీ మస్కా!

గురువును మించిన శిష్యులను మనం చాలా మందిని చూసుంటా.. కానీ, ఈ విధంగా గురువును ముంచిన శిష్యులను మనం చాలా అరుదుగా చూసుంటాం. పాపం.. గురువు గారు.. నమస్కారం, మేము మీ విద్యార్థులం అంటూ టీచర్‌కే భారీ మస్కా వేశారు. పక్కా ప్లాన్‌తో స్కెచ్ వేసి ఏకంగా రూ. 30 లక్షల నగదు, పది తులాల బంగారాన్ని దోచుకెళ్లిపోయారు. మద్యం మత్తులో ఉన్న ఆ రిటైర్డ్ ఎంప్లాయ్‌కి పొద్దున్నే కానీ తెలియలేదు తాను నిండామునిగాను అని. ఈ ఘటన సంగారెడ్డి జిల్లాలో ఆలస్యంగా వెలుగులోకి వచ్చింది.
జోగిపేట ఎస్సీ బాలుర హాస్టల్ ప్రాంతంలో రిటైర్డ్ టీచర్ లక్ష్మీనారాయణ ఒంటరిగా ఉంటున్నారు. రెండు నెలల కిందట మార్కెట్ యార్డ్ ఆవరణలో ఆయన మద్యం సేవిస్తుండగా.. అటుగా వచ్చిన ఇద్దరు యువకులు.. గురువు గారూ బాగున్నారా? మమ్మల్ని గుర్తుపట్టారా? మేము మీ స్టూడెంట్స్ అంటూ లక్ష్మీనారాయణతో మాటలు కలిపారు. ఇలా చాలా సార్లు కలవడంతో పరిచయం ఏర్పడింది.
అయితే, ఈ నెల 24న లక్ష్మీనారాయణ మార్కెట్ యార్డ్ వద్ద మద్యం తాగేందుకు వెళ్లగా.. అక్కడికి వచ్చిన ఇద్దరు యువకులు అక్కడ దోమలు ఉన్నాయని.. అన్నాసాగర్ వద్ద తమకు తెలిసిన మంచి చోటుందని అక్కడికి తీసుకెళ్లారు. లక్ష్మీనారాయణకు ఫుల్‌గా మద్యం పట్టించారు. ఇంకా మద్యం, తినడానికి ఏమైనా తెస్తామంటూ టీచర్‌ని అక్కడ వదిలేసి ఆయన బైక్ తీసుకెళ్లారు.
బైక్ తాళానికే ఇంటి తాళం ఉంటుదని తెలుసుకున్న ఆ ఇద్దరు యువకులు.. తమ ప్లాన్ ప్రకారం అన్నాసాగర్ వద్దకు తీసుకెళ్లారు. అక్కడ లక్ష్మీనారాయణను ఒంటరిగా వదిలేసి నేరుగా ఆయన ఇంటికే వెళ్లారు. ఇంటి తాళం తీసి లోపలికి వెళ్లి బీరువా పగలగొట్టి కేవలం 14 నిమిషాల్లోనే దొంగతనం పూర్తి చేసుకున్నారు. సాయంత్రం 4 నుంచి 5 గంటల మధ్యలో లక్ష్మీనారాయణను అక్కడ వదిలేసిన యువకులు.. 8 గంటలైనా రాకపోవడంతో దగ్గరి బంధువుల ఇంటికి వెళ్లాడు.
24వ తేదీ రాత్రి ఇదంతా జరగ్గా.. 25వ తేదీ బంధువుల ఇంటి నుంచి పొద్దున్నే లేచి తన ఇంటికెళ్లిన లక్ష్మీనారాయణ ఒక్కసారిగా షాక్‌కు గురయ్యాడు. ఇంటికి తాళం లేకుండా కేవలం గడి పెట్టి ఉండటంతో లోపలికి వెళ్లి చూడగా బీరువాలోని డబ్బులు, బంగారం కనిపించక పోవడంతో నేరుగా పోలీస్ స్టేషన్‌కి వెళ్లి ఫిర్యాదు చేశాడు. మొత్తం రూ.30 లక్షల నగదు, పది తులాల బంగారం చోరీకి గురైందంటూ వాపోయాడు. ఆ ఇద్దరి యువకుల పేర్లు తెలవవని.. వాళ్లది సంగారెడ్డి అని మాత్రమే చెప్పారంటూ ఫిర్యాదులో పేర్కొన్నారు.

30/09/2022

KCR: నేడు యాదాద్రికి సీఎం కేసీఆర్.. ఇంకొన్ని రోజుల్లోనే నేషనల్ పార్టీ అనౌన్స్!

ముఖ్యమంత్రి కేసీఆర్ ఇవాళ యాదగిరిగుట్ట లక్ష్మీ నరసింహస్వామిని దర్శించుకోనున్నారు. దసరా సందర్భంగా జాతీయ పార్టీ ప్రకటన నేపథ్యంలో కేసీఆర్ పర్యటనకు ప్రాధాన్యత సంతరించుకుంది. సతీసమేతంగా యాదాద్రికి వెళ్తున్న ముఖ్యమంత్రి.. అక్కడ ఆలయ విమాన గోపురానికి స్వర్ణ తాపడం కోసం బంగారాన్ని విరాళంగా సమర్పించనున్నారు. ఉదయం 10:30 గంటలకు ప్రగతి భవన్ నుంచి రోడ్డు మార్గంలో బయల్దేరి 11:30 గంటలకు ఆలయానికి చేరుకుంటారు.
ఆలయ విమాన గోపురం కోసం దాతల నుంచి విరాళాల సేకరిస్తున్న సమయంలో.. తాను కూడా కిలో 16 తులాల బంగారాన్ని ఇస్తానంటూ ముఖ్యమంత్రి కేసీఆర్ గతంలో ప్రకటించారు. ఈ నేపథ్యంలో లక్ష్మీనరసింహ స్వామిని సందర్శించి బంగారాన్ని సమర్పించనున్నారు. సీఎం పర్యటన నేపథ్యంలో అధికారులు పెద్ద ఎత్తున ఏర్పాట్లు చేస్తున్నారు. స్వామి వారిని సందర్శించుకున్న అనంతరం ఆలయంలోని వివిధ పనుల పురోగతిని కేసీఆర్ పరిశీలించనున్నారు.
అదేవిధంగా, రేపు కేసీఆర్ హనుమకొండ జిల్లా పర్యటనకు వెళ్లనున్నారు. ములుగు రోడ్డులోని ప్రతిమ రిలీఫ్ ఇన్‌స్టిట్యూట్ ఆమె మెడికల్ సైన్సెస్ ప్రారంభ నేపథ్యంలో ఉదయం 9 గంటలకే రోడ్డు మార్గంలో ముఖ్యమంత్రి బయల్దేరుతారు. ప్రగతి భవన్ నుంచి ప్రారంభమై 11:15 నిమిషాలకు హనుమకొండ చేరుకుంటారు. మెడికల్ సైన్సెస్ ప్రారంభం తర్వాతా 2 గంటలకు హైదరాబాద్ పయనమవుతారు.

30/09/2022

ఆరోగ్యపరీక్షలు అటకెక్కాయా? అయ్యా ఆరోగ్యమంత్రిగారూ.. హరీష్ రావును టార్గెట్ చేసిన వైఎస్ షర్మిల.

తెలంగాణ రాష్ట్రంలో అధికారంలో ఉన్న టిఆర్ఎస్ ప్రభుత్వం పై, సీఎం కేసీఆర్ పై విమర్శలు గుప్పిస్తున్న వైఎస్ షర్మిల ప్రజా ప్రస్థానం పాదయాత్రను కొనసాగిస్తున్న విషయం తెలిసిందే. తాజాగా నర్సాపూర్ నియోజకవర్గంలో ప్రజాప్రస్థానం పాదయాత్రలో వైయస్ షర్మిల తెలంగాణ వైద్య ఆరోగ్య శాఖ మంత్రి హరీష్ రావు ను టార్గెట్ చేశారు. తెలంగాణ రాష్ట్రంలో ప్రభుత్వ ఆసుపత్రిలో వైద్య సేవలు ఎలా ఉన్నాయో కుటుంబ నియంత్రణ ఆపరేషన్ల వైఫల్యంతో ప్రజలకు అర్థమైంది అంటూ పేర్కొన్నారు.
మంత్రి హరీష్ రావు పై విమర్శనాస్త్రాలు సంధించిన వైఎస్ షర్మిల అయ్యా ఆరోగ్యమంత్రి! మీ సర్కారు సేవలు, సర్జరీల బాగోతం మొన్న కుటుంబ నియంత్రణ ఆపరేషన్లలో చనిపోయిన మహిళలని చూస్తే తెలుస్తుంది అంటూ చురకలంటించారు. కార్పొరేట్ హాస్పిటల్స్ కు మీరు ఆరోగ్యశ్రీ డబ్బులు ఎగ్గొడితే, అప్పులు చేసి వైద్యం చేయించుకోలేక, దేవుడి మీద భారం వేసి, సర్కార్ దవాఖాన్లకు వస్తేనే ప్రభుత్వ ఆసుపత్రుల్లో సర్జరీలు పెరిగాయి తప్పితే మీరు సౌకర్యాలు కల్పిస్తే కాదు మంత్రి గారు అంటూ వైయస్ షర్మిల తనదైన శైలిలో మంత్రి హరీష్ రావు పై మండిపడ్డారు.
2018 ఎన్నికల ముందు హడావుడి చేసిన కంటి వెలుగు ఆ ఏడాదే కంటికి కనపడకుండా పోయిందని వైయస్ షర్మిల అసహనం వ్యక్తం చేశారు. ఇక రాష్ట్ర వ్యాప్తంగా ప్రజలకు ఇంటింటికీ చేస్తామని చెప్పిన ఆరోగ్య పరీక్షలు అటకెక్కాయని షర్మిల పేర్కొన్నారు. పైలెట్ ప్రాజెక్టు కింద పరీక్షలు చేస్తే 47 శాతం మందికి అనారోగ్యమే అని తేలితే, వచ్చిన ఫలితాలతో మీ కండ్లు బైర్లు కమ్మాయన్నారు వైయస్ షర్మిల. ఇక రాష్ట్రం మొత్తం చేస్తే జనానికి మందులకు డబ్బులు పెట్టడం ఇష్టం లేక ఆరోగ్య పరీక్షలు బంద్ పెట్టారు అని షర్మిల వ్యాఖ్యానించారు. ఆఖరికి రోగాలకు మందులు ఇవ్వడానికి కూడా మీ దగ్గర డబ్బులు లేకుండా చేశారు అని వైయస్ షర్మిల వ్యంగ్యాస్త్రాలు సంధించారు.
ఇక ఇదే సమయంలో వైఎస్ఆర్ హయాంలో రాష్ట్రం ఏ విధంగా ఉంది అన్నది గుర్తు చేసిన షర్మిల వైఎస్ఆర్ హయాంలో వ్యవసాయం పండగ అయిందని, ఉచిత విద్య, వైద్యం అందని, బడులు బాగు పడ్డాయని పేర్కొన్నారు. పిల్లలకు స్కాలర్ షిప్ లు, ఫీజు రియంబర్స్మెంట్ లు అందాయని షర్మిల వెల్లడించారు. మహిళలు ఆర్థికంగా ఎదిగారని పేర్కొన్న షర్మిల, మళ్లీ వైఎస్సార్ సంక్షేమ పాలన రావాలన్నా, సమస్యలు తొలగిపోవాలంటే వైయస్సార్ తెలంగాణ పార్టీని ఆశీర్వదించాలని విజ్ఞప్తి చేశారు.
అంతేకాదు కాంగ్రెస్ పార్టీపై తీవ్రస్థాయిలో విరుచుకుపడిన షర్మిల వైయస్ రాజశేఖర్ రెడ్డి 30 ఏళ్ల పాటు కాంగ్రెస్ పార్టీలో ఉండి, రెండు సార్లు పార్టీని అధికారంలోకి తీసుకు వచ్చి, కేంద్రంలో కూడా కాంగ్రెస్ పార్టీని అధికారంలోకి వచ్చేలా చేశారని పేర్కొన్నారు. కానీ కాంగ్రెస్ పార్టీ వైఎస్సార్ పేరును ఎఫ్ఐఆర్లో చేర్చి వెన్నుపోటు పొడిచిందని వైయస్ షర్మిల వ్యాఖ్యానించారు. ఆయన మరణం పైన కనీసం ఎంక్వయిరీ కూడా చేయలేదని వైయస్ షర్మిల మండిపడ్డారు. బతికుండగా రాజశేఖర్ రెడ్డిని పొగిడిన కాంగ్రెస్ పార్టీ ఆయన చనిపోగానే నిందలు వేసిందని ఆమె ఆరోపించారు. నిందలు వేసిన రాజశేఖర్ రెడ్డి ఫోటోలు పెట్టుకుని కాంగ్రెస్ నేతలు ఇప్పుడు ఓట్లు ఎట్లా అడుగుతున్నారని వైయస్ షర్మిల మండిపడ్డారు. తన తండ్రి వైఎస్ఆర్ బతికి ఉంటే కాంగ్రెస్ పార్టీపై ఉమ్మేవారని వైయస్ షర్మిల వ్యాఖ్యానించారు.

30/09/2022

నారా బ్రాహ్మణిపై అసభ్యకర పోస్టులు.

సోషల్ మీడియాలో నారా బ్రాహ్మణిపై అసభ్యకర పోస్టులు పెట్టిన వ్యక్తికి దేహశుద్ధి చేశారు. ఉమ్మడి కృష్ణా జిల్లాకు చెందిన కోదాటి నరసింహ అనే వ్యక్తి ఖమ్మం టేకులపల్లిలో ఆర్‌ఎంపీగా పనిచేస్తున్నాడు. తన ఫేస్‌బుక్‌లో మాజీ ముఖ్యమంత్రి నారా చంద్రబాబునాయుడు కోడలు నారా బ్రాహ్మణిపై అసభ్య పదజాలంతో పోస్టులు పెట్టడంతోపాటు వ్యక్తిగతంగా కించపరిచాడు. ఖమ్మం తెలుగుదేశం పార్టీ నాయకులు ఈ విషయాన్ని గుర్తించారు.
వీరు కోదాటి నరసింహను ఫోన్ లో ప్రశ్నించగా ముస్తఫానగర్‌ వైఎస్సార్ కాంగ్రెస్ పార్టీ కార్యాలయంలో ఉన్నానని చెప్పాడు. అక్కడికి వెళ్లి వ్యక్తిగతంగా ఎందుకు పోస్టులు పెట్టావని అడగటంతో వారిపై అతను దురుసుగా ప్రవర్తించాడు. ఆగ్రహానికి గురైన నాయకులు అతనికి దేహశుద్ధి చేశారు. నారా, నందమూరి కుటుంబాలకు చెందిన వ్యక్తులపై వ్యక్తిగతంగా అసభ్య పదజాలం వాడితే సహించేది లేదని తెలుగుదేశం పార్టీ లోక్‌సభ కమిటీ అధ్యక్షుడు కూరపాటి వెంకటేశ్వర్లు హెచ్చరించారు.
ఏపీలో అధికార వైసీపీ, ప్రతిపక్ష టీడీపీ మధ్య సోషల్ మీడియాలో యుద్ధం జరుగుతోంది. ఒక పార్టీ నేతలపై మరో పార్టీ నేతలు పెడుతున్న పోస్టులు శ్రుతిమించుతున్నాయి. ప్రత్యర్థులుగా కాకుండా శత్రువుల్లా ఇరుపార్టీల నేతలు వ్యవహరిస్తున్నారు. ఈ క్రమంలోనే ఫేస్ బుక్, ట్విటర్, వాట్సాప్ తదితర సోషల్ మీడియా గ్రూపులో పార్టీ తరఫున కాకుండా వ్యక్తిగతంగా కామెంట్లు చేస్తున్నారు. పార్టీ పరంగా ఏమైనా ఉంటే మనం మనం చూసుకుందామని, కుటుంబంలోని స్త్రీలను ఇందులోకి లాగవద్దని ఇటీవలి బీఏసీ సమావేశంంలో ముఖ్యమంత్రి జగన్, టీడీపీ నేత అచ్చెన్నాయుడు ఒప్పందానికి వచ్చారు. కానీ పోస్టులు ఇంకా ఇంకా పెరుగుతూనే ఉండటంపై ప్రజాస్వామ్యవాదులు ఆందోళన వ్యక్తం చేస్తున్నారు.

30/09/2022

తిరుపతివాసులు, తిరుమల వెళ్లేవారికి ముఖ్యమైన అలర్ట్.. ఈ మార్పులు గమనించండి, పాస్‌లు ఎక్కడిస్తారంటే.

తిరుపతివాసులకు ముఖ్యమైన గమనిక. అక్టోబర్ 1న శ్రీవారి గరుడసేవ (Tirumala Garuda Seva) ఉండటంతో ట్రాఫిక్‌ ఆంక్షలు విధించారు. అక్టోబరు 1 ఉదయం 6 గంటల నుంచి నిర్దేశించిన ప్రదేశాల్లో ఉచితంగా పాసులు అందజేస్తారన్నారు. కడప జిల్లా నుంచి వచ్చే భక్తులు కుక్కల దొడ్డి దగ్గర ఉన్న కేశవరెడ్డి హైస్కూల్‌, కరకంబాడి రోడ్డులోని అన్నమాచార్య ఇంజినీరింగ్‌ కళాశాల వద్ద కారు పాసులు ఇస్తారు. నెల్లూరు వైపు నుంచి వచ్చే వాహనాలకు ఏర్పేడు శ్రీ ఇంజినీరింగ్‌ కళాశాల దగ్గర.. చెన్నై వైపు నుంచి వచ్చే కార్లకు ఆగస్త్య ఎన్‌క్లేవ్‌ నియర్‌ టోల్‌ప్లాజా దగ్గర.. చిత్తూరు వైపు నుంచి వచ్చే వాటికి ఐతేపల్లి అగ్రికల్చరల్‌ ల్యాండ్‌లో, మదనపల్లె నుంచి వచ్చే వాటికి శ్రీ విద్యానికేతన్‌ ఇంజిజనీరింగ్‌ కాలేజ్‌ వద్ద పాసులు ఇవ్వనున్నారు. భక్తులు సహకరించాలని పోలీసులు కోరారు.
తిరుమల శ్రీవారి బ్రహ్మోత్సవాల్లో గరుడ సేవ (Tirumala Garuda Seva) చాలా ముఖ్యమైనది. దీంతో పోలీసులు అప్రమత్తం అయ్యారు. భద్రతా, ట్రాఫిక్‌ సమస్యల దృష్ట్యా ఈ నెల 30న శుక్రవారం మధ్యాహ్నం 12 గంటల నుంచి తిరుమల, తిరుపతి ఘాట్ రోడ్లలో బైకుల రాకపోకలపై నిషేధం విధించారు. తిరిగి 2న మధ్యాహ్నం నుంచి అనుమతిస్తారు. మరోవైపు వాహనదారులు అంతా తిరుపతిలో నిర్దేశించిన ప్రాంతాల్లో పార్కింగ్ చేసుకునేలా ఏర్పాట్లు చేశారు. తిరుమలలో భక్తులు ఏపీఎస్ బస్‌లను ప్రయాణం కోసం ఉపయోగించుకోవాలని సూచిస్తున్నారు.
ఇటు టీటీడీ (TTD) కూడా గరుడ సేవ (Tirumala Garuda Seva) కోసం భారీ ఏర్పాట్లు చేసింది. దాదాపు మూడు లక్షల మంది భక్తులు వస్తారని అంచనా వేస్తున్నారు. ఈ ఏడాది కీలక నిర్ణయం తీసుకున్నారు.. సౌత్ వెస్ట్ గేటు, నార్త్ వెస్ట్ గేటు, నార్త్ ఈస్ట్ గేట్ల దగ్గర ఉన్న హారతి పాయింట్ల‌లో హారతులకు బ‌దులుగా.. భక్తులను స్వామి వారి వాహ‌న సేవకు అనుమ‌తిస్తారు. అందుకే ఈ ఏడాది హార‌తుల‌ను రద్దు చేసి సామ‌న్య భక్తులకు దర్శనం కల్పించాలని నిర్ణయం తీసుకున్నారు.
ప్రతి హార‌తి పాయింట్లో 10 వేల‌ మందికి గరుడసేవ దర్శనం కల్పించేందుకు ఏర్పాట్లు చేశారు. అలాగే గ్యాలరీల‌లో రెండు లక్షల మంది, ఆలయం ఎదురుగా ఉన్న నాదనీరాజన మండపం వద్దకు షాపింగ్ కాంప్లెక్స్ నుండి భక్తులను రెండవసారి అనుమతించడం ద్వారా మరో 25 వేల మందికి అద‌నంగా దర్శనం కల్పించవచ్చు అంటున్నారు. భక్తులు ఇబ్బంది పడకుండా అన్ని ఏర్పాట్లు చేశారు. అంతేకాదు తిరుమలకు వచ్చే భక్తులు.. వీలైనంత వరకు సొంత వాహనాలను కొండపైకి తీసుకురావొద్దని కోరింది. 20వేల వాహనాలు దాటిన తర్వాత కొండపైకి వాహనాలను అనమతించేది లేదన్నారు. భక్తులు సహకరించాలని టీటీడీ, పోలీసులు కోరారు.

08/09/2022

అమరావతిపై సీఎం జగన్ మరో సంచలన నిర్ణయం - టీడీపీకి ఇరకాటం..!!

అమరావతికి సంబంధించి ఏపీ ప్రభుత్వం మరో కీలక నిర్ణయం తీసుకుంది. తాజాగా జరిగిన కేబినెట్ సమావేశంలో అమరావతి భూముల అంశం పైన చర్చ జరిగింది. సీఆర్డీఏ చట్ట సవరణకు ఆమోదం తెలిపింది. అమరావతి పరిధిలో రాష్ట్రంలోని పేదలకు ఇళ్ల స్థలాల కేటాయింపుకు అవకాశం కల్పిస్తూ నిర్ణయం చేసింది. రాజధాని నిర్మాణానికి రైతుల నుంచి సమీకరించిన భూమిలో 'నవరత్నాలు-పేదలందరికీ ఇళ్లు' పథకం కింద రాజధాని బయటి ప్రాంతాలకు చెందినవారికి ఇళ్లస్థలాలు కేటాయించాలన్న ప్రభుత్వ నిర్ణయాన్ని గతంలో హైకోర్టు నిలిపివేసింది.
టీడీపీ ఈ పిటీషన్ వేయించిందంటూ సీఎంతో సహా వైసీపీ నేతలు విమర్శలు చేసారు. పేదలకు స్థలాలు ఇస్తే అక్కడ సమతుల్యత దెబ్బ తింటుందని అఫిడవిట్ లో పేర్కొన్నారంటూ ప్రతిపక్షాలను టార్గెట్ చేసారు. ఇప్పుడు కేబినెట్ సమావేశంలో రాజధాని పర్స్పెక్టివ్‌ ప్లాన్‌, బృహత్తర ప్రణాళిక, మౌలిక వసతుల ప్రణాళికలో మార్పులు చేసుకునేందుకు వీలుకల్పిస్తూ సీఆర్‌డీఏ చట్టంలో ప్రతిపాదించిన సవరణలకు రాష్ట్ర మంత్రివర్గం బుధవారం ఆమోదం తెలిపింది. 2014నాటి సీఆర్‌డీఏ చట్టంలోని 41(1), 41(3) సెక్షన్లను సవరించడంతో పాటు, కొత్తగా 41(6) సెక్షన్‌ను చేర్చింది. 2(22) సెక్షన్‌ను సవరించడంతోపాటు, కొత్తగా 53(1) సెక్షన్‌ను జతచేసింది. దీంతో రాజధానిలో అందుబాటు ధరలో గృహనిర్మాణ పథకానికి రాష్ట్రంలోని ఏ ప్రాంతంవారైనా అర్హులేనని, ఆ పథకం రాజధానిలోని 29 గ్రామాల ప్రజలకే పరిమితం కాదని ఆ సెక్షన్‌లో ప్రభుత్వం పొందుపరిచింది.
రాజధానికి రైతులిచ్చిన భూముల్లో బయటివారికి ఇళ్ల స్థలాలు కేటాయింపు జోనల్‌ రెగ్యులేషన్‌ విధానానికి వ్యతిరేకమని హైకోర్టు ధర్మాసనం 2020 మార్చి 23న స్పష్టంచేసింది. ఇప్పుడు రాజధాని మాస్టర్‌ప్లాన్‌లో ఇష్టానుసారం మార్పులు చేసేందుకు వీలుకల్పిస్తూ ప్రభుత్వం సీఆర్‌డీఏ చట్టానికి సవరణలు తీసుకొచ్చారు. సీఆర్‌డీఏ చట్టంలో గతంలో లేని సెక్షన్‌ 53(1)ని ప్రభుత్వం ఇప్పుడు కొత్తగా ప్రతిపాదించింది. రాజధానిలో కేంద్ర, రాష్ట్ర ప్రభుత్వ పథకాల కింద ఇళ్ల నిర్మాణానికి స్థలాలు పొందేందుకు రాష్ట్రంలోని పౌరులందరూ అర్హులేనని, 29 గ్రామాలకే పరిమితం చేయరాదని పేర్కొంది. మొత్తం 54,307 మంది ఆర్థికంగా వెనుకబడిన వర్గాల ప్రజలకు రాజధానిలో ఇళ్లస్థలాలు కేటాయిస్తూ ప్రభుత్వం 2020 ఫిబ్రవరి 25న జీవో నం.107 జారీ చేసింది. దాన్ని రాజధాని రైతులు హైకోర్టులో సవాలు చేశారు.
దానిపై హైకోర్టు ధర్మాసనం తీర్పు చెబుతూ... రైతుల నుంచి సేకరించిన భూముల్లో ఇళ్లస్థలాలు ఇవ్వడం సీఆర్‌డీఏ చట్ట నిబంధనలకు విరుద్ధమని తేల్చిచెప్పింది. రాజధాని పరిధిలో స్థలాల కేటాయింపులో రాష్ట్రప్రభుత్వానికి ఎలాంటి పాత్రా ఉండదని తేల్చిచెప్పింది. ప్రభుత్వం జారీచేసిన జీవో నం.107ని సస్పెండ్‌ చేసింది. దాంతో ఇప్పుడు ప్రభుత్వం చట్టాన్నే సవరించాలని నిర్ణయించింది. ఇప్పుడు ప్రభుత్వ నిర్ణయం పైన రాజధాని తరపు కేసులు వాదిస్తున్న న్యాయవాదులు స్పందించారు. ప్రభుత్వ నిర్ణయాన్ని తప్పు బడుతున్నారు. ఇక, టీడీపీ దీని పైన ఏ రకంగా స్పందించినా..పేదలకు ఇళ్ల స్థలాలు ఇచ్చేందుకు అడ్డుపడుతోందంటూ కౌంటర్ ఎటాక్ చేసేందుకు వైసీపీ సిద్దమవుతోంది.

08/09/2022

టీమిండియాలో అనిశ్చితి - అస్థిరత..!!

దుబాయ్: ఆసియా కప్ 2022 టోర్నమెంట్ ఆరంభం అయ్యేంత వరకూ టీమిండియా కేప్టెన్ రోహిత్ శర్మ.. అభిమానుల దృష్టిలో హీరో. సూపర్ మేన్. ఎలాంటి క్లిష్ట పరిస్థితుల్లోనైనా జట్టును ఒడ్డుకు చేర్చగలిగే సామర్థ్యం ఉన్న సారథి. ఆసియా కప్ తొలి రెండు మ్యాచ్‌ల తరువాత అతనిపై ఉన్న అంచనాలు మరింత పెరిగాయి. ఆకాశాన్నంటాయి. గ్రూప్ దశ తొలి మ్యాచ్‌లో పాకిస్తాన్‌ను మట్టి కరిపించిన ఉదంతం- రోహిత్ శర్మను కోట్లాదిమంది అభిమానులకు ఆరాధ్యుడిని చేశాయి.
అదే దూకుడుతో హాంకాంగ్‌ను ఓడించడంతో అంచనాలు మిన్నంటాయి. ఇదంతా- ఆసియా కప్ 2022 టోర్నమెంట్ గ్రూప్ దశ ముగిసేంత వరకే. సూపర్ 4లో టీమిండియా ఆడిన రెండు మ్యాచ్‌లు అతణ్ని పాతాళానికి తొక్కేశాయి. నిప్పులు చిమ్ముకుంటూ నింగికి నేనెగిరిపోతే నిబిడాశ్చర్యంతో వీరే.. నెత్తురు కక్కుకుంటూ నేలకు నే రాలిపోతే నిర్దాక్షిణ్యంగా వీరే.. అనడానికి రోహిత్ శర్మ ప్రత్యక్షసాక్షిగా నిలిచాడు. ఆసియా కప్ 2022 ఫైనల్స్ చేరాలంటే గెలిచిన తీరాల్సిన రెండు సూపర్ 4 మ్యాచ్‌లల్లోనూ ఘోరంగా ఓడింది భారత్.
ఈ రెండు మ్యాచ్‌లో ఓటమి ప్రభావం ఇప్పుడు రోహిత్ శర్మపై పడుతోంది. ఆయనపై విమర్శలు వెల్లువెత్తుతున్నాయి. రోహిత్ శర్మ స్పోర్టివ్‌నెస్ కోల్పోతోన్నాడని, ఫీల్డ్‌లో వ్యక్తిగతంగా అగ్రెసివ్‌నెస్ కనపర్చుతున్నాడని అంటున్నారు. ఇది ఏమంత మంచిది కాదని స్పష్టం చేస్తోన్నారు. ప్రత్యర్థిని ఓడించడంలో, బౌలింగ్‌ను తుత్తునీయలు చేయడంలో చూపించాల్సిన దూకుడు వైఖరిని సొంత జట్టు ప్లేయర్ల మీద ప్రదర్శిస్తోన్నాడని చెబుతున్నారు.
ఫీల్డ్‌లో రోహిత్ శర్మ అన్‌కంఫర్టబుల్‌గా ఉంటోన్నాడని పాకిస్తాన్ మాజీ పేస్ బౌలర్ షోయబ్ అఖ్తర్ వ్యాఖ్యానించాడు. గట్టిగా అరుస్తూ కనిపిస్తోన్నాడని, ఇది మంచిది కాదని చెప్పాడు. రవిచంద్రన్ అశ్విన్, రవి బిష్ణోయ్ క్యాచ్‌లు డ్రాప్ చేసిన తరువాత రోహిత్ శర్మ ప్రదర్శించిన ఆగ్రహావేశాలు, అగ్రెసివ్‌నెస్- టీమిండియా క్యాంప్‌లో అస్థిరతకు దారి తీస్తుందని అంచనా వేశాడు. టీ20 ప్రపంచకప్ టోర్నమెంట్‌కు ుందు అలాంటి పరిస్థితులు ఏ జట్టుకు కూడా మంచిది కాదని పేర్కొన్నాడు.
ఆసియా కప్‌లో టీమిండియా మరీ అంత అధ్వాన్నంగా ఆడిందని తాను అనుకోవట్లేదని షోయబ్ అఖ్తర్ చెప్పాడు. అంచనాలకు అనుగుణంగా ఆడలేకపోయారంతేనని అన్నాడు. నేలకు రాలిన ప్రతీసారీ భారత జట్టు మల్లీ అదే వేగంతో పైకి లేస్తుందని, టీ20 ప్రపంచకప్‌కు సన్నాహాలు చేస్తుందని చెప్పాడు. ఈ ఓటముల నుంచి గుణపాఠాలను నేర్చుకోవాల్సిన అవసరం జట్టుకు ఉందని, తుదిజట్టులో ఎలాంటి ప్లేయర్లను తీసుకోవాలనడానికి ఇది ఉపయోగపడుతుందని చెప్పాడు.

08/09/2022

మునుగోడులో కోమటిరెడ్డి వెంకటరెడ్డిపై సంచలన ఆరోపణ: రాజగోపాల్ రెడ్డికి మద్దతుగా; కాంగ్రెస్ ఆరా!!

మునుగోడు ఉపఎన్నిక రాజకీయాలు ఆసక్తికరంగా మారుతున్నాయి. మునుగోడు ఉప ఎన్నికల్లో విజయం సాధించటం అధికార ప్రతిపక్ష పార్టీలకు ప్రతిష్టాత్మకంగా మారగా, ఉప ఎన్నికలపై ఏ పార్టీకి ఆ పార్టీ వ్యూహాత్మకంగా ముందుకు వెళుతున్నాయి. ఇక మునుగోడు ఉప ఎన్నికల్లో విజయం సాధించాలని, తిరిగి తన ఎమ్మెల్యే స్థానాన్ని దక్కించుకోవాలని కోమటిరెడ్డి రాజగోపాల్ రెడ్డి ఇప్పటికే క్షేత్ర స్థాయిలోకి వెళ్లి పర్యటిస్తూ పెద్ద ఎత్తున ప్రచారం చేస్తున్నారు. ఇక మన మునుగోడు మన కాంగ్రెస్ పేరుతో కాంగ్రెస్ పార్టీ కూడా ఎన్నికల క్షేత్రంలో ప్రచార పర్వానికి శ్రీకారం చుట్టింది. జిల్లా మంత్రి జగదీష్ రెడ్డి ఆధ్వర్యంలో, మునుగోడులో టిఆర్ఎస్ పార్టీ చాపకింద నీరులా పనిచేసుకుపోతోంది.
ఇదిలా ఉంటే మునుగోడు ఉపఎన్నికలో కీలకమైన కోమటిరెడ్డి బ్రదర్స్ పై తాజాగా ఓ సంచలన ఆరోపణ మునుగోడు నియోజకవర్గంలో చక్కర్లు కొడుతుంది. మునుగోడు ఉప ఎన్నికల్లో బీజేపీ నేత, తన సోదరుడైన కోమటిరెడ్డి రాజగోపాల్ రెడ్డికి మద్దతుగా నిలవాలని ఎంపీ కోమటిరెడ్డి వెంకటరెడ్డి ఫోన్ చేశారని కాంగ్రెస్ పార్టీ సభ్యులు కొందరు ఆరోపణలు చేయడం సంచలనంగా మారింది. మునుగోడు ఉపఎన్నికలో కోమటిరెడ్డి రాజగోపాల్ రెడ్డి కి మద్దతుగా నిలవాలని కోమటిరెడ్డి వెంకట్ రెడ్డి తనకు ఫోన్ చేశారని ఊకొండి ఎంపీటీసీ సభ్యురాలు భర్త సైదులు గౌడ్ ఆరోపించారు. అంతేకాదు సైదులు గౌడ్ మీడియాతో మాట్లాడుతూ తనను కోమటిరెడ్డి రాజగోపాల్ రెడ్డికి సహకరించాలని కోమటిరెడ్డి వెంకటరెడ్డి కోరారని, అయితే తాను నిరాకరించానని తెలిపారు.
ఇలాగే ఆయన పలువురు కాంగ్రెస్ నేతలకు ఫోన్లు చేస్తున్నారంటూ ఆరోపించారు. కాంగ్రెస్ పార్టీకి వెన్నుపోటు పొడిచే వారికి ప్రజలే గుణపాఠం చెబుతారని వారన్నారు. ఇక ఆయన మాత్రమే కాకుండా బుధవారం మునుగోడు నియోజకవర్గంలో కాంగ్రెస్‌ శ్రేణుల బృందం సమావేశం నిర్వహించి ఆ పార్టీ ఎంపీ కోమటిరెడ్డి వెంకట్‌రెడ్డి తన తమ్ముడు రాజ్‌గోపాల్‌రెడ్డి కోసం ఉప ఎన్నికల్లో పని చేయాలని ఒత్తిడి తెస్తున్నారని ఆరోపించారు. కోమటిరెడ్డి వెంకట్ రెడ్డి కాంగ్రెస్‌లోనే ఉన్నారని, బీజేపీకి పని చేయాలని కోరుతున్నందున ఆయనపై పార్టీ నాయకత్వం చర్యలు తీసుకోవాలని డిమాండ్ చేశారు. వెంకట్ రెడ్డి కూడా త్వరలోనే బీజేపీలో చేరతారని వారు అభిప్రాయం వ్యక్తం చేస్తున్నారు.
ఇదిలాఉంటే కోమటిరెడ్డి వెంకట్ రెడ్డి తాను ఎవరికీ అలాంటి ఫోన్ కాల్స్ చేయలేదని ఖండించారు. కావాలని కొందరు తన పరువు తీసేందుకు కుట్ర చేస్తున్నారని ఆరోపించారు . అవసరమైతే పార్టీకి ప్రచారం చేస్తానని ముందే చెప్పాను. నేను ఎవరినైనా వేరే పార్టీ కోసం పనిచేయాలని ఎందుకు అడుగుతాను, ఎవరైనా కాంగ్రెస్ నాయకులను వేరే పార్టీ కోసం పని చేయమని అడుగుతారా? అని ఆయన ప్రశ్నిస్తున్నారు.
ఇదిలా ఉంటే తాజాగా కోమటిరెడ్డి వెంకట్ రెడ్డి పై వస్తున్న ఆరోపణల నేపథ్యంలో కాంగ్రెస్ పార్టీ ఈ వ్యవహారంపై దృష్టి సారించింది. నిజంగానే కోమటిరెడ్డి వెంకటరెడ్డి, కోమటిరెడ్డి రాజగోపాల్ రెడ్డికి మద్దతు తెలపాలని కాంగ్రెస్ పార్టీ శ్రేణులను తప్పుదారి పట్టించే ప్రయత్నం చేస్తున్నారా? అన్న అంశాన్ని కాంగ్రెస్ పార్టీ అధినాయకత్వం ఆరా తీస్తుంది. ఏదేమైనా మునుగోడు ఉపఎన్నిక కోమటిరెడ్డి వెంకటరెడ్డికి పెద్ద తలనొప్పి తెచ్చిపెట్టింది. కాంగ్రెస్ పార్టీ అధిష్టానం ముందు తన నిజాయితీని చూపించుకోలేక, ఇక నియోజకవర్గంలో సోదరుడి నిర్ణయంతో బలంగా తిరగలేక, పార్టీ రాష్ట్ర నాయకత్వంతో సఖ్యత లేక, కోమటిరెడ్డి వెంకటరెడ్డి నానా ఇబ్బందులను ఎదుర్కొంటున్నారు.