14/09/2020
খোৱাঙত বিজেপি ভেৰণীয়া গুণ্ডাই সাংবাদিক যুগান্ত দিহিঙীয়াক প্ৰাণে মৰাৰ অপচেষ্টাঃ গৰিহণা সাংবাদিক সুৰক্ষা মঞ্চৰ
ডিব্ৰুগড়ঃ ৰাজ্যত এতিয়া যেন নিৰাপত্তা নাইকিয়া হৈছে সাংবাদিকৰ। দুৰ্নীতিৰ বিৰুদ্ধে বাতৰি পৰিৱেশন কৰাৰ বাবেই দেওবাৰে দৈনিক জনমভূমি কাকতৰ সাংবাদিক যুগান্ত দিহিঙীয়াক বিজেপিৰ এজন ভেৰুণীয়া গুণ্ডাই আক্ৰমণৰ অপচেষ্টা চলায়। মৰাণৰ সমীপৰ খোৱাঙৰ এটা পথত হোৱা দুৰ্নীতিৰ সন্দৰ্ভত দুদিনৰ পূৰ্বে মৰাণৰ দৈনিক জনমভূমি কাকতৰ সাংবাদিক যুগান্ত দিহিঙীয়াই বাতৰি পৰিৱেশন কৰাৰ পিছত আজি সাংবাদিক গৰাকীক বিজেপি কৰ্মী তথা ঠিকাদাৰ পন্থী ভেৰুণীয়া গুণ্ডা খোৱাঙৰ দিলিপ বাইলুং নামৰ লোকজনে সাংবাদিক জনে বাতৰিৰ সক্ৰান্তত ঘৰৰ পৰা ওলাই যাওতে বাটত আগুছি ধৰি চোকা অস্ত্ৰৰে প্ৰাণে মৰাৰ অপচেষ্টা চলায়। উপায়ন্ত হৈ সাংবাদিকজনে প্ৰাণৰ মমতাত দৌৰি পলায় আহিবলৈ সক্ষম হয়। উল্লেখযোগ্য যে পথটোত সংঘটিত হোৱা এই দুৰ্নীতিৰ বাতৰি প্ৰচাৰ হোৱাৰ পিছতে খণ্ড উন্নয়ণ বিষয়াই তাৎক্ষণিক ভাৱে তদন্ত ঘোষণা কৰে। আজি পথটো পুনৰ মেৰামতি কৰিছে ঠিকাদাৰজনে। কিন্তু এই ভেৰুণীয়া গুণ্ডাজনে সাংবাদিক জনক পথটোৰ সন্দৰ্ভত ঠিকাদাৰ পক্ষলৈ কালি মেনেজ কৰিবলৈ সাংবাদিক জনৰ ঘৰলৈ আহিছিল। সাংবাদিকজনে লোকজনক ঘৰৰ পৰা উঠাই পথাই দিয়াত আজি সাংবাদিক যুগান্ত দিহিঙীয়াক আক্ৰমণৰ লক্ষ্য কৰি লয়। ইফালে এই ঘটনাৰ সন্দৰ্ভত সাংবাদিকজনে ব্যক্তিজনৰ বিৰুদ্ধে খোৱাং আৰক্ষী থানাত এজাহাৰ দাখিল কৰাৰ লগতে খোৱাং আঞ্চলিক ছাত্ৰ সন্থাইও খোৱাং থানাত দোষীক গ্ৰেপ্তাৰ আৰু শাস্তিৰ দাবীত স্মাৰক পত্ৰ দাখিল কৰিছে। এই দুৰ্ভাগ্যজনক ঘটনাটোক গৰিহণা দিছে ডিব্ৰুগড় জিলা ছাত্ৰ সন্থাৰ সহকাৰী সম্পাদক ৰাহুল কোঁৱৰ, খোৱাং আঞ্চলিক ছাত্ৰ সন্থাৰ উপ-সভাপতি অংকিত গগৈ, মৰাণ সমষ্টি উন্নয়ণ পৰিষদৰ সভাপতি চন্দন গগৈৰ লগতে ডিব্ৰুগড় জিলা সাংবাদিক সুৰক্ষা মঞ্চৰ সভাপতি দিবাকৰ দত্ত, কাৰ্যকৰী সভাপতি তপন কুমাৰ শইকীয়া, সাধাৰণ সম্পাদক প্ৰণৱ ডেকাবৰুৱা, তাই আহোম ছাত্ৰ সন্থা আৰু চুতীয়া ছাত্ৰ সন্থা আদি সংগঠন সমূহে।
