11/05/2023
অনুগ্ৰহ কৰি বোৱাৰীবোৰক প্রেমৰ প্ৰস্তাৱ নিদিব
বোৱাৰীবোৰৰ এনেই একশ এবুৰি সমস্যা
বুকুত শিল বান্ধি
বোৱাৰীবোৰে সাঁতুৰি থাকে জীৱন নদীৰ সোঁতত।
মূল্যায়ণৰ মাপকাঠিত নিতে তললৈ নামি থাকে নম্বৰ
ৰাতিপুৱা দেৰিকে উঠিলে
চাদৰ মেখেলা নিপিন্ধিলে
মোবাইলত হাঁহি মাতি কথা পাতিলে
আৰু ফেচবুক ব্যৱহাৰত;
মুঠতে নিতে প্রতিদিনে
হকে বিহকে
হুৰাহুৰে কমি যায় নম্বৰ।
আপোনালোকেও আকৌ
বোৱাৰীবোৰক প্রেমৰ প্ৰস্তাৱ নিদিব
বাৰে বাৰে টুকুৰিয়াই নাথাকিব হৃদয় দুৱাৰত
বিষাদ নদীত ডুবি থকা কোনোবা গৰাকীয়ে
কেনেবাকৈ যদি খেৰ কূটা বুলি
আপোনাক খামুচি লয়
বহুজনৰ জীৱন হৈ পৰিব নৰক।
অনুৰোধ জনাইছোঁ আপোনাক,তেওঁক,সকলোকে
বোৱাৰীবোৰক প্রেমৰ প্ৰস্তাৱ নিদিব
ভুলটো সেই ভুল নকৰিব
বোৱাৰীবোৰক বোৱাৰী,পত্নী,মাতৃ হৈ থাকিব দিয়ক
তেওঁলোকৰ প্রেমিক হোৱাৰ সপোন নেদেখিব।
***** ✍✍️জোনালী পাঠক*****