18/01/2025
भारतीय गोर्खा समुदायका अपेक्षाहरूलाई सम्बोधन गर्न प्रधानमन्त्री नरेन्द्र मोदीलाई बिधायक निरज जिम्बा तामाङ द्वारा पत्राचार ।
भारतीय गोर्खा समुदायका दीर्घकालीन मागहरूलाई सम्बोधन गर्न दार्जीलिङ विधानसभा क्षेत्रका विधायक निरज जिम्बा तामाङले भारतका माननीय प्रधानमन्त्री श्री नरेन्द्र मोदीलाई औपचारिक पत्राचार गरेका छन् ।
प्रधानमन्त्रीज्यूको दूरदर्शी नेतृत्वप्रति गहिरो विश्वास राख्दै लेखिएको यस पत्रमा भारतीय गोर्खा समुदायका दुई मुख्य र अझै समाधान हुन नसकेका महत्त्वपूर्ण विषयहरूको उल्लेख गरिएको छ। पत्रमा दार्जीलिङ पहाडलाई संविधानको छैटौँ अनुसूचीमा समावेश गर्ने माग गरिएका छन् ।
पत्रमा सन् २००५ मा स्वर्गीय सुबास घिसिङज्यूको नेतृत्वमा हस्ताक्षरित ऐतिहासिक त्रिपक्षीय सम्झौताबारे स्मरण गरिएको छ। यस सम्झौताले दार्जीलिङ पहाडलाई भारतको छैटौँ अनुसूचीमा समावेश गर्ने परिकल्पना गरेको थियो। मन्त्रिपरिषद् र संसदीय स्थायी समितिको गृह मामिला सम्बन्धी समर्थन हुँदाहुँदै पनि, राजनीतिक हस्तक्षेप र गलत सूचनाका कारण यो प्रक्रिया अघि बढ्न सकेन। यस प्रतिबद्धतालाई पुनःआवाज दिने र कार्यान्वयन गर्ने आवश्यकता छ, जसले यस क्षेत्रको राजनीतिक स्थिरता, सामाजिक-आर्थिक प्रगति, र सांस्कृतिक संरक्षण सुनिश्चित गर्नेछ।
पत्रमा छुटेका गोर्खा समुदायलाई अनुसूचित जनजातिमा समावेश गर्ने माग गर्दै ,पत्रले पश्चिम बंगालका ११ र सिक्किमका १२ गोर्खा समुदायलाई अनुसूचित जनजातिको सूचीमा समावेश गर्न संवैधानिक मान्यता प्रदान गर्ने माग पुनः उठाएको छ। यस मान्यताले उनीहरूको सामाजिक-आर्थिक भविष्यलाई सुरक्षित गर्नुका साथै उनीहरूको सांस्कृतिक सम्पदालाई पनि जोगाउनेछ। भारतीय गोर्खा समुदायले सधैं राष्ट्रप्रतिको अटल देशभक्ति प्रदर्शन गर्दै आएका छन्। राष्ट्रको सुरक्षामा निस्वार्थ योगदान दिनुका साथै रणनीतिक रूपमा महत्त्वपूर्ण क्षेत्रहरू दार्जीलिङ, कालेबुङ, तराई, र डुवर्समा शान्ति कायम राख्न उनीहरूको महत्त्वपूर्ण भूमिका रहेको छ। पत्रमा गोर्खाहरूले राष्ट्र प्रति दिएको त्याग अनि योगदानको चर्चा गर्दै उल्लेख गरिएको छ कि उनीहरू सधैं युद्ध र शान्ति दुवै समयमा भारतमाताका विश्वासी सन्तरी बनेका छन्। पत्रमा प्रधानमन्त्रीज्यूले न्याय र समावेशिताप्रतिको प्रतिबद्धता देखाउँदै नागा शान्ति प्रक्रिया, जम्मू-कश्मीरको पुनर्गठन, र बोडो तथा मिजो जस्ता वञ्चित समुदायहरूको सशक्तीकरणजस्ता जटिल मुद्दाहरूलाई सफलतापूर्वक समाधान गर्नुभएको उल्लेख छ।
यी अपेक्षाहरू पूरा गरेर, प्रधानमन्त्रीज्यूले भारतीय गोर्खा समुदायको उज्ज्वल र न्यायपूर्ण भविष्यको मार्ग प्रशस्त गर्न सक्नुहुन्छ। उहाँले "गोर्खाको सपना, मेरो सपना" भनेर व्यक्त गर्नुभएको वाक्यांशको सार्थकता पूरा हुने विश्वास व्यक्त गरिएको छ। यस पत्रको मर्म बुझ्नका लागि सञ्चारमाध्यम र जनतामा अपिल गर्दै, भारतीय गोर्खा समुदायको न्याय सुनिश्चित गर्न सहयोग पुर्याउन बिधायक निरज जिम्बा तामाङ द्वारा आग्रह गरिएको छ।
