19/11/2025
*प्रेस विज्ञप्ति*
*नीरज तमाङ जिम्बा*
*बिधायक दार्जिलिङ दार्जीलिङ बिधानसभा क्षेत्र*
*मिति: [१९ नोभेम्बर २०२५]*
आज मैले भारतका माननीय प्रधानमन्त्रीज्यूलाई औपचारिक रूपमा पत्र लेखी, पश्चिम बंगालका माननीय मुख्यमन्त्रीद्वारा संघीय सरकारका गोर्खा अन्तरवार्ताकार प्रति व्यक्त गरिएको आपत्तिहरूप्रति मेरो स्पष्ट र जिम्मेवार धारणा प्रस्तुत गरेको छु। दार्जीलिङ , कालेबुङ, खर्साङ, तराई–डुवर्स अनि देश विदेशमा रहेका सम्पूर्ण भारतीय गोर्खा समुदायले मेरो अटल र पारदर्शी धारणा बुझून् भन्ने उद्देश्यले यो जानकारी सार्वजनिक रूपमा राख्दैछु।
मुख्यमन्त्रीज्यूले व्यक्त गर्नुभएको आपत्तिहरू न त संवैधानिक रूपमा टिक्छन्, न त ऐतिहासिक दृष्टिले मिल्दछन्, न त गोर्खा समुदायको वास्तविक चाहनालाई प्रतिबिम्बित गर्छन्। GTA ऐन २०११ लाई गोर्खा प्रश्नको अन्तिम र पूर्ण समाधानका रूपमा चित्रण गर्नु तथ्यगत रूपमा गलत छ। GTA एक प्रशासनिक संयन्त्र मात्र हो न त यसले आफ्नो कानुनी उद्देश्य पुरा गर्न सकेको छ, न त त्यसको आत्मा वा मर्म अनुसार काम गर्न सकेको छ। GTA ले पत्र र मर्म दुवैमा असफल भइसकेको स्पष्ट यथार्थलाई बेवास्ता गर्नु गम्भीर भूल हुनेछ।
संघीय सरकारले अन्तरवार्ताकार नियुक्त गर्नु संवैधानिक रूपमा पूर्ण रूपमा सही कदम हो। गोर्खा प्रश्न सधैँ राष्ट्रिय चरित्रको विषय रहँदै आएको छ,पहिचान, प्रतिनिधित्व र इतिहाससँग जोडिएको पुरानो मुद्दा। भारतका सिमानामा र रणभूमिमा निरन्तर बलिदान दिने गोर्खा समुदायको आवाज सुन्नु संघीय सरकारको कर्तव्य हो, साथै राष्ट्रको हित पनि हो। आफ्नै नागरिकहरूको वैध माग सुन्न राज्यको अनुमतिबाट रोक्न खोज्नु असंवैधानिक मात्र होइन, अव्यवहारिक पनि हो।
मुख्यमन्त्रीज्यूले “पूर्ण शान्ति” को दाबी गर्नुभएको छ, तर पहाडको वास्तविकता त्यसबाट धेरै टाढा छ। मौनतालाई शान्ति भन्न सकिँदैन। न्याय, सम्मान र पहिचान आधारित समाधान नै वास्तविक शान्ति हो। आज पहाडमा देखिएको शान्तता गोर्खाहरूको धैर्यता हो ,संतुष्टिको संकेत होइन। मैले प्रधानमन्त्रीज्यूलाई पठाएको पत्रमा यी सबै पक्षहरू स्पष्ट रूपमा उल्लेख गरेको छु। राष्ट्रिय हितले माग गर्छ कि गोर्खा समुदायसँग संरचित, इमानदार र सम्मानपूर्वक संवाद होस्। संघीय सरकारद्वारा सुरु गरिएको प्रक्रियालाई म पूर्ण समर्थन गर्दछु, किनकि यो कदम संविधानसंगत मात्र होइन, अत्यन्तै आवश्यक र धेरै ढिलो गरि आएको एक न्यायपूर्ण पहल हो।भारतीय गोर्खाहरूले राष्ट्रलाई कहिल्यै असफल पारेका छैनन्। हामीले भारतको सीमालाई रगतले रक्षा गरेका छौँ, संस्थाहरूमा समर्पणका साथ सेवा गरेका छौँ, राष्ट्रनिर्माणमा आफ्ना पुस्ताहरू अर्पण गरेका छौँ। अतः आज गोर्खा समुदायले उठाएको आवाज राष्ट्रले गम्भीरतापूर्वक सुन्नै पर्छ। राज्य सरकारद्वारा गरिएको आपत्तिहरू संविधानिक परीक्षणमा टिक्दैनन् र गोर्खाहरूको आकांक्षामा मेल खान्नन्।
म मेरो सम्पूर्ण समुदायलाई आश्वस्त गर्न चाहन्छु—म गोर्खाहरुको प्रश्नको न्यायपूर्ण र सम्मानजनक समाधानका निम्ति दृढ, जिम्मेवार र स्पष्ट प्रतिबद्धतासहित उभिएको छु। हाम्रो माग वैध छ, हाम्रो इतिहास सत्य छ, र हाम्रो अधिकार कुनै पनि अवस्थामा बेवास्ता हुन सक्दैन।
सत्य, न्याय र भारतीय गोर्खाहरूको अधिकारको निम्ति जारी।
*नीरज तमाङ जिम्बा*
*बिधायक*
*दार्जीलिङ बिधानसभा क्षेत्र।*
![*प्रेस विज्ञप्ति**नीरज तमाङ जिम्बा**बिधायक दार्जिलिङ दार्जीलिङ बिधानसभा क्षेत्र**मिति: [१९ नोभेम्बर २०२५]*आज मैले भारतका...](https://img4.medioq.com/677/686/856264336776861.jpg)
