23/01/2025
ଘେଁସ ବିଦ୍ୟୁତ ସେକ୍ସନାଲ ଅଫିସ ଠାରେ ଚାଷୀ ଙ୍କୁ ଟାଟା ପାୱାର କର୍ମଚାରୀଙ୍କ ଆକ୍ରମଣ ଘଟଣାରେ ବୁଧବାର ଦିନ ଜିଲ୍ଲାର ଅଗ୍ରଣୀ କୃଷକ ସଙ୍ଗଠନ ସହିଦ ମାଧୋ ସିଂ ଆଞ୍ଚଳିକ କୃଷକ ସଙ୍ଗଠନ ପକ୍ଷରୁ ଘେଁସ ଗୁରୁ ଭବନ ଠାରେ ଜିଲ୍ଲାର ବିଭିନ୍ନ କୃଷକ ସଙ୍ଗଠନ ମାନଙ୍କ ଏକ ଗୁରୁତ୍ବପୂର୍ଣ୍ଣ ବୈଠକ ଅନୁଷ୍ଠିତ ହୋଇଯାଇଛି । ଆୟୋଜିତ ବୈଠକରେ ବିଗତ ଦିନରେ ଘେଁସ ଇଲେକ୍ଟ୍ରିକାଲ ସେକ୍ସନାଲ ଅଫିସ ରେ ଟାଟା ପାୱାର କର୍ମଚାରୀଙ୍କ ଚାଷୀଙ୍କୁ ମରଣାନ୍ତକ ଆକ୍ରମଣ ଘଟଣା ଓ ବିଦ୍ୟୁତ ସମସ୍ୟା ନେଇ ଆନ୍ଦୋଳନାତ୍ମକ ପନ୍ଥା ଗ୍ରହଣ କରାଯିବା ନେଇ କୃଷକ ସଙ୍ଗଠନ ପକ୍ଷରୁ ସୂଚନା ମିଳିଛି । ବୈଠକରେ ଚଳିତ ଜାନୁଆରୀ ମାସ ଗତ ୧୬ ତାରିଖ ଦିନ ଘେଁସ ସ୍ଥିତ ଇଲେକ୍ଟ୍ରିକାଲ ସେକ୍ସନାଲ ଅଫିସ ଠାରେ ବି.ନୁଆଁପାଲି ଗ୍ରାମର ଚାଷୀ ସୁରେଶ ଭୋଇଙ୍କୁ ବିଜୁଳି ବିଲ୍ କୁ କେନ୍ଦ୍ର କରି ଟାଟା ପାୱାର ବିଦ୍ୟୁତ କର୍ମଚାରୀ ମାରଣାନ୍ତକ ଆକ୍ରମଣ କରିଥିବା ନେଇ ଆଲୋଚନା ହୋଇ ବୈଠକ ମଧ୍ୟରେ ଉଦବେଗ ପ୍ରକାଶ ପାଇଥିଲା । ତେବେ ଚାଷୀଙ୍କୁ ଆକ୍ରମଣ କରିଥିବା ସଂପୃକ୍ତ କର୍ମଚାରୀ ମାନଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ସ୍ବରୁପ ଆଗାମୀ ପାଞ୍ଚଦିନ ମଧ୍ୟରେ ସେମାନଙ୍କୁ ଚାକିରୀରୁ ନିଲମ୍ବିତ କରାଯିବା କିମ୍ବା ଅନ୍ୟତ୍ର ବଦଳି କରାଯିବାକୁ ବୈଠକରେ ଯୋଗଦେଇଥିବା ମେଲଛାମୁଣ୍ଡା ଥାନାଧିକାରୀ ,ବରଗଡ଼ ବିଦ୍ୟୁତ ବିଭାଗୀୟ ଯନ୍ତ୍ରୀ ଓ ସୋହେଲା ତହସିଲଦାର ଙ୍କ ସହିତ ଆଲୋଚନା କରିଥିଲେ । ଯଦି ଆଗାମୀ ପାଞ୍ଚଦିନ ମଧ୍ଯରେ କାର୍ଯ୍ୟାନୁଷ୍ଠାନ ନିଆନଯାଏ ତେବେ ଜିଲ୍ଲାର କୌଣସି ବିଦ୍ୟୁତ ଉପଭୋକ୍ତା କୌଣସି ପ୍ରକାର ବିଦ୍ୟୁତ ବିଲ୍ ଦେବେନାହିଁ ଓ ରାଜରାସ୍ତାକୁ ଓହ୍ଲାଇବେ ଏବଂ ଏଥିପାଇଁ ବିଭାଗୀୟ ପ୍ରଶାସନ ହିଁ ଦାୟୀ ରହିବେ ବୋଲି ଅଫିସର ମାନଙ୍କୁ ଚରମବାଣୀ ଶୁଣାଇଥିଲେ କୃଷକ ସଙ୍ଗଠନ । ତେବେ ଚାଷୀଙ୍କୁ ଆକ୍ରମଣ ଘଟଣା ନେଇ ସୋହେଲା ତହସିଲଦାର ଶୁଭ୍ରରଞ୍ଜନ ନାୟକ ତୀବ୍ର ନିନ୍ଦା କରିବା ସହିତ ଘଟଣାର ତଦନ୍ତ ପୂର୍ବକ ଆକ୍ରମଣକାରୀଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବା ପାଇଁ କୃଷକ ସଙ୍ଗଠନ ଙ୍କୁ ପ୍ରତିଶୃତି ଦେଇଥିଲେ ।
