22/11/2023
കോഴിക്കോട്: തിരുനെല്ലിയുടെ കഥാകാരിയെന്നറിയപ്പെടുന്ന എഴുത്തുകാരിയും സാമൂഹിക പ്രവർത്തകയും അധ്യാപികയുമായിരുന്ന പി. വത്സല (84) അന്തരിച്ചു. കോഴിക്കോട് മുക്കം കെ.എം.സി.ടി. മെഡിക്കൽ കോളേജിൽ രാത്രി 11 മണിയോടെയായിരുന്നു അന്ത്യം. സംസ്കാരം വിദേശത്തുള്ള മകൻ എത്തിയ ശേഷം വ്യാഴാഴ്ച നടക്കുമെന്ന് ബന്ധുക്കൾ അറിയിച്ചു .
വയനാട്ടിലെ ആദിവാസികളുടെ ജീവിതത്തെ അടുത്തറിയുകയും എഴുതുകയും ചെയ്ത വത്സലയുടെ ആദ്യ നോവലായ നെല്ല് എസ് എൽ പുരത്തിന്റെ തിരക്കഥയിൽ രാമു കാര്യാട്ട് സിനിമയാക്കി .
നെല്ല് (1972), റോസ്മേരിയുടെ ആകാശങ്ങൾ (1993), ആരും മരിക്കുന്നില്ല (1987), ആഗ്നേയം (1974), ഗൗതമൻ (1986), പാളയം (1981), ചാവേർ (1991), അരക്കില്ലം (1977), കൂമൻകൊല്ലി (1984), നമ്പരുകൾ (1980), വിലാപം (1997), ആദിജലം (2004), വേനൽ (1979), കനൽ (1979), നിഴലുറങ്ങുന്ന വഴികൾ (1979) (നോവലുകൾ). തിരക്കിലല്പം സ്ഥലം (1969), പഴയപുതിയ നഗരം (1979), ആനവേട്ടക്കാരൻ (1982), 'ഉണിക്കോരൻ ചതോപാധ്യായ (1985), ഉച്ചയുടെ നിഴൽ (1976), കറുത്ത മഴപെയ്യുന്ന താഴ്വര (1988), കോട്ടയിലെ പ്രേമ (2002), പൂരം (2003), അന്നാമേരിയെ നേരിടാൻ (1988), അശോകനും അയാളും (2006), വത്സലയുടെ സ്ത്രീകൾ (2005), വത്സലയുടെ തിരഞ്ഞെടുത്ത കഥകൾ (2005), വത്സലയുടെ കഥകൾ (1989), പംഗരുപുഷ്പത്തിന്റെ തേൻ (1996), കഥായനം (2003), അരുന്ധതി കരയുന്നില്ല (1991), ചാമുണ്ടിക്കുഴി (1989) തുടങ്ങിയവയാണ് പ്രധാനകൃതികൾ.
2021-ലാണ് എഴുത്തച്ഛൻ പുരസ്കാരം നേടിയത്. നെല്ലിന് കുങ്കുമം അവാർഡ് ലഭിച്ചു. എസ്.പി.സി. എസിന്റെ അക്ഷരപുരസ്കാരം, നിഴലുറങ്ങുന്ന വഴികൾക്ക് കേരള സാഹിത്യ അക്കാദമി പുരസ്കാരം, സമഗ്രസംഭാവനയ്ക്കുള്ള പത്മപ്രഭാ പുരസ്കാരം, പുലിക്കുട്ടൻ എന്ന കൃതിക്ക് സംസ്ഥാന ബാലസാഹിത്യ അവാർഡ്, വിലാപത്തിന് സി.എച്ച്. അവാർഡ്, ലളിതാംബികാ അന്തർജനം അവാർഡ്, സി.വി. കുഞ്ഞിരാമൻ സ്മാരക മയിൽപ്പീലി അവാർഡ്, ബാലാമണിയമ്മയുടെപേരിലുള്ള അക്ഷരപുരസ്കാരം, പി.ആർ. നമ്പ്യാർ അവാർഡ്, എം.ടി. ചന്ദ്രസേനൻ അവാർഡ്, ഒ. ചന്തുമേനോൻ അവാർഡ്, സദ്ഭാവന അവാർഡ് എന്നിവയ്ക്ക് അർഹയായി.
1939 ഓഗസ്റ്റ് 28-ന് കാനങ്ങാട് ചന്തുവിന്റെയും ഇ. പത്മാവതിയുടെയും മൂത്തമകളായി ജനിച്ച വത്സലയുടെ പ്രാഥമികവിദ്യാഭ്യാസം നടക്കാവ് സ്കൂളിലായിരുന്നു. തുടർന്ന് പ്രീഡിഗ്രിയും ബിരുദവും പ്രോവിഡൻസ് കോളേജിൽ. ബി.എ. ഇക്കണോമിക്സ് ജയിച്ച ഉടൻ അധ്യാപികയായി കൊടുവള്ളി സർക്കാർ ഹൈസ്കൂളിൽ ആദ്യനിയമനം ലഭിച്ചു. പിന്നീട് കോഴിക്കോട് ഗവ. ടീച്ചേഴ്സ് ട്രെയിനിങ് കോളേജിൽനിന്ന് ബി.എഡ്. പഠനം പൂർത്തിയാക്കി. നടക്കാവ് ഗേൾസ് ഹയർസെക്കൻഡറി സ്കൂളിൽ അധ്യാപികയായി ജോലിയിൽ പ്രവേശിച്ചു. 32 വർഷത്തെ അധ്യാപനജീവിതം. അവസാനത്തെ അഞ്ചുവർഷം നടക്കാവ് ടി.ടി.ഐ.യിൽ പ്രധാനാധ്യാപികയായിരുന്നു. 1993 മാർച്ചിൽ അവിടെനിന്നാണ് വിരമിക്കുന്നത്.
സാഹിത്യ അക്കാദമിയുടെ പ്രസിഡന്റ്, വൈസ് പ്രസിഡന്റ് എന്നീ സ്ഥാനങ്ങൾ വഹിച്ചു. അക്കാദമിയിൽനിന്ന് എം. മുകുന്ദൻ സ്ഥാനമൊഴിഞ്ഞപ്പോഴാണ് പ്രസിഡന്റുസ്ഥാനം ഏറ്റെടുക്കേണ്ടിവന്നത്. 1961-ൽ കോഴിക്കോട് കേന്ദ്രീകരിച്ച് എൻ.വി. കൃഷ്ണവാരിയരുടെയും കുറ്റിപ്പുഴ കൃഷ്ണപിള്ളയുടെയും നേതൃത്വത്തിൽ രൂപവത്കരിച്ച കേരള സാഹിത്യസമിതിയിലെ നിറസാന്നിധ്യംകൂടിയായിരുന്നു വത്സല. കഴിഞ്ഞ 17 വർഷമായി സാഹിത്യസമിതി അധ്യക്ഷകൂടിയായിരുന്നു അവർ.
മലാപ്പറമ്പ് എൻ.ജി.ഒ. ക്വാർട്ടേഴ്സിലെ 'അരുൺ' വീട്ടിലായിരുന്നു താമസം. കൊടുവള്ളി ഗവ. ഹൈസ്കൂൾ, നടക്കാവ് ഗേൾസ് ഹയർസെക്കൻഡറി സ്കൂൾ, നടക്കാവ് ടി.ടി.ഐ., എന്നിവിടങ്ങളിൽ അധ്യാപികയായി ജോലി ചെയ്തിട്ടുണ്ട്.
നടക്കാവ് ഗവൺമെന്റ് സ്കൂൾ അധ്യാപകനായിരുന്ന കക്കോട് മറോളി എം. അപ്പുക്കുട്ടിയാണ് ഭർത്താവ്.
മക്കൾ: ഡോ. എം.എ. മിനി (ഗവ. വെറ്ററിനറി ആശുപത്രി, മുക്കം), എം.എ. അരുൺ (ബാങ്ക് ഉദ്യോഗസ്ഥൻ, ന്യൂയോർക്ക്). മരുമക്കൾ: ഡോ. കെ. നിനകുമാർ, ഗായത്രി.
