Tiprasani kubui

05/12/2021

Swrwng jakya tangbiti
Kaisa hodao swngcharni jora bai mwchangwi tangbiti bo swlai jagwi tongo. Ahaikheno Tipra bosongni Bubagrabo samung tei rang
phaini lam romwi Tiperreh hasteo cha bagan bo swnam kha. Tippereh hasteo kwbangma cha bagan tabukbo tongkho. Phia bagano samung tangna bagwi phatarni borokno tubwna nangkha. Ah bosongni borok tabukbo cha bagan baino langma kwrwng tonkho. Kwpal hamyani kok khe haise, bubagrani mol ni simi tabukbo Tiprasa cha bagan ni tangbiti hodao gwdal rwyakho. Cha bagan kwchartwi lam kwtal swnam Jake kha. Cha bagan septarwi nok tangnai bangkha. Haste haphang cha bagan sokomorwi kwtal tangbitini lam romkha. Miship musuk rina nailiya, dudh phalmung tangbiti bo hama sokhorya. Mareng lotabo swnam manya. Da sorni samung bai bo hakchal. Hodao nangmani tangmung tabukbo swrwng jaknai tongkho.

08/08/2021

💐. Hadijak Bebakno💐
Tipra bosong sak baithang ni yakung bai bachajak bosong tongmani. Kanmung, chamung kupulung hukumu kwthar bai halok bojak tongmani. Naslemung, thokai bai hakchal tongmani. Phia hasteni tongmung swlaijagwi thangmabai Tipra rokni tangbiti, kanmung, chamungbo swlai jagwi thangkha. Harep, hathai, hapung jora no mwchangwi Rubber buphang bai mwchangkha. Baksa hapung hathai tongbo Rubber kaimanya tongnai rok kubun dophani rang gwnang rokno raida chayatwi hadiwi rwkha. Kubun dophani mungtwi ha ni sinimung kwrwi phano rang ajithani kesepmung kwrwi . Haste haphang ni sep bai pukhiri rok khurwi manphano Ahrok phiyogwi rang ajinani lam kwrwi. Haino hai Kubun dophani rang gwnang ni thani pukhiri bisi kwbang ma jora ni bagwi bedok na nangphikha. Amohai kheno hapung, hathai, kheto panthor kubun dophani rang gwnang ni yago kwlaijak. Kwtal tangbiti lam romna rwngya wngwi pai chana nangwi tongo. Sikla bosong sak baithang ni yakung bai tabukbo bachai manyakho. Haste haphang ni sep manthani ani nini sinilai soi soi kwrwi borok tabukbo sep chokhwrai tonjak go. Dophani borokno dophano thokai sakno gwnang hwnwi bolai tongo. Tangmung ni lamo seler wngrwrwk Raida chayatwi rang ajinani lam bangrwrwk. Kwtal Hukbar bai langma tabukbo kwrwng manyakho. Kaham bwthai, bwchwlwi tabukbo kaina rwngya kho. Mui kwthwng kai phalwi rang ajinai Tipra bosong lekhai se mankho. Langmani nangmani poderepod Chamung tabukbo swnam na rwngya kho. Kwbangkuk nangmani manwi kubun dopha ni thani yak phehel jak. Wani tharuk, kathi, thalik bwlai, wasung tabukle pogwi thangkha. Ha no karwi silverni twk sorok, tharuk, kathi, tabukbo Tiprasa swnam nai kwrwi. Thwng sitara dopha teibo lomwi tongo, raida sitara teibo bangrwrwk. Langma tabukbo kubun dophano bedok jak.

03/08/2021

03/08/2021

💐 Logi Thwimung (Sahomoron)💐
Bisi kwbangma swkang kubun dopha ni raidao Sai thwikhe bini logi hik bo muchungya twino ma sokjago. Kha ni kokthai khuk kuplulung hui raida halok bojakno goswi ma najao. Omohai sitara tei chaya raida Tippereh/ Tipra hoda twde tong khao swngmung achaio. Rajmalao khorok dok ni sai kwbang Bubagrani logi Rani logio thwimani kok swijak tongo. Danya Manikya (1490-1515 AD) ni hik Rani Kamala Devi bo Raja ni logi thwina nangkha . Dev Manikya (1522-1527 AD) ni hik bo logio ma thwikha. Amar Manikya ( 1577-1585 AD) ni logio Rani Amraboti bo mathwikha. Ratna Manikya (1685-1712 AD) ni hik bo logio ma thwikha. Mahendra Manikya (1712-1713 AD) ni hikbo logio ma thwikha. Mukunda Manikya ( 1733-1738 AD) ni hik okra Rani Prabhaboti bo logio ma thwikha. Krishna Manikya (1747-1783 AD) ni phayung Rajkumar Harimani (1775 AD) thwiphuru hik Ratna Mala bo logio ma thwikha. Baksa Rani thwina naiphano buphasong thwina nairwliya abohai kok bo swijak tongo. Kubun raida tei halok Tippereh raidao buljakma bagwi oh raida sitara manju jak khwna hwnwi gosithai kwlaio. Ahaiya kheba Rajmala swinai Bubagra rokno Hindu tong kwthar twinai hwnwi Hindu ni raida kwbang silchai swima bagwi oh kokthai rok bulkhana hwnwibo chongwi mano. Tamoni hwnmale kubui kwthar palainai, Twino Ama hwnai dopha bwrwi ni borom aswk tola kwlaiyana hwnwi khao swngmung achaio. Tabukbo Tippereh dopha bwrwini borom kuchugo no. Logi thwimung Tippereh dopha tongo hwnwi khao puitu khwlai manya.

31/07/2021

💐KER 💐
Asar taal ni sukla astomi tithio Kharsai/Kharchi/Chibwrwi mwtai rehai mani 14 dini ulo Ker palai jago. Rajakhor ni ari boma jaga phatarni bo hornwi kebo habwi manya tei nonkhorwi bo thangwi manya. Ker wngkha ari. Sak berem hamya, bwrwi ok kupulung rok ari ni bising tongkhe puilani simi no kubun jaga tongwinani dagijago. Oh mwtai rwmung belai kwthar tei kutuk. Rajakhoro khe Bubagrani sak ham tei luku rokni hamkwrai ni bagwi oh mwtai rwmung sirisitini simi rwi phaijagwi tongo. Kami amchai bo kami ni lukurok pal baksa khe kami hamkwraini bagwi tabukbo mwtai rwi tongo. Kami ni okrarok rwchapmung bai mwtai rwo tei kami Prasad bo bago. Mwtai rwmungo wa no jotoni sai nangkukgo tei rathar mungbo tongo. Rajakhoro khe chontai galim rok mwtai rwo. Kami rogo khe ochai/ojhai mwtai rwo. Kha duma kok wngkha Tripura ni kubun mwtai nogo mwtai rwnairok haste haphang bai chubachu manma hai Galim rok rang chubachu manya. Nok nukhung khibiwi mwtaini samung tangna nango hwnwi kha dujak ma bo phaio. Kwtal aguli tabukbo mwtai rwjago. Phia ari boma rok seterebwi paikha. Kwcham agulini mwtai tonma thai bo kosorobwi thangkha. Luku rok puitu chama, manima, palaima phataro phunuklaio, phia kha bisingo bebak kwmajak. Tong kwtharni raida baino kaisa dopha ni hukumu, mukumu, tongmung, chamung , palaimung langmabai gwdaljak. Phia chwngno lama swlai lama koroi kubun tong kwthar bai gwdalwi jwngjal nangjak

17/07/2021

💐 Kharchai/ Kharchi/Chibwrwi 💐
Luku hamkwrai ni bagwino mwtai rokno palaima, surima, khuluma achaimung. Abo hai kheno Tipra bosongo bo mwtai palaimung tongo. Okra rokni khugo tei Rajmala bijab ni bisingtwi saiman kha-Bubagra Tripur thwimani ulo Rani Hiraboti salsa twimao tukuna thangphuru mwtai chibwrwi khul buphang bedek romwi chonglai tongma nuk kha tei buphang tola kotorma miship bachajak nugwi mwtai rokni sama moti khajani risa mishipni sago khitarwi rwkha. Miship holong hai borsai thangkhe mwtai rokno Rajakhoro tubui palai kha. Mwtai rok wngkha- Subrai/Shivrai/Mwtai kotor, Lampra, Mailuma, Khuluma, Burasa, Akhata-Bikhata, Thumnai-Bonirok, Naksu, Goirokya/Gariya-Kaliya/Kalaiya, Haichukma, Swkal (Bwrwirok), Sri Jamdu/Jamdut, Sangroma, Twima akorok. Mwtai rokni tongmung, chamung raida pher phano Asar talni shuklo astomi tithi ni salo salsa pal kheno mwtai rwjagwi tongo. Tiprasa ni nukhungo rondokgo Mailuma Khuluma, nok kuna Naksu, Twima, Kokti salo Sangroma, Lampra tei joto mwtaino palai khulum jagwi tongo. Swngmung achaio, Maharani chibwrwi mwtai manya swkang ni simino oh mwtairok Tiprasa bosong palai jagwi de tong ? Tamoni hwnmaba Tiprasa ni palaimung, khulumung go oh mwtairokno raida halok go nagjak. Haiya khe mwtai manya swkang Tiprasa bosong bo mwtaino khulumlai palai phaikhwna ? Chibwrwi mwtai bebak nino bwsak kwrwi, bokhorok simi. Hwngkhe Maharani Hiraboti bokhorok simi de man ? Bokhorok manwi tongkhe aphuru ni simi de Tiprasa bosong murti takjak mwtai puitu chana chengkha ? Kharchai mwtai wathwi waraja bai wathop swui mwtai rwjago abo kubui. Wakwthang baino sak swnamwi twini got , ri, khum bogwi palai jago. Naran, Bariphang, Yakchu, Galem ni chubachu bai Chontai tabuk bo Kharchai mwtai Puran Haveli Saidra twima twi rukhung tabukbo kwthar raida bai palai jagwi tongo. Tiprasa hoda no karwibo kubun hoda ni lukubo oh mwtaino khulum kha tei Ter khwlai hohom dodom khe bayabchari motom halok bolai jotono khulum lai tongo.

28/06/2021

ADC bahai tong?
Tiprasa rokni kok, hukumu, mukumu khatwi sak baithang ni yakung bai bachai tangthani, porithani, sithani bwskang bachai manna bagwi hasteni bisingo sak bai chalokna bagwi TTAADC swnam jakkha. Phia 37 bisi laithangbo tiprasa rokni biyal birman kagwi manliya. Phan kisa, sep kisa majra berwi thokogwi khao puitu rwnaibo bangkha. ADC ni amchai swkagwi general amchai swnam marok kebo khorang tisaliya. Kwbang tongthai police, TSR, CRPF, BSF rokni tong kotor swnam najak marok kebo mungsa khorang tisaliya. Bolong khatwi, park swnamwi kwbang haa najagwi tongmabo nukliya. Nok kwrwi, ha kwrwi , ha ni sinimung documents kwrwi tiprasa tabukbo tongo. Mwnam kosok hamya khibima jaga bo ADC amchai no. Swrwngmung, nwngjaknai twi, sak ham nai jaknai tabukbo nangmaswk kwrwi. Lama tongbo malkhung kwrwi, chati kwrwi kami tabukbo tongo. Tangbiti huk chanai tabukbo tongkho. Rang ajimungni sep bai tabukbo hakchal. Swrwngnani sep tabukbo seplejak. Sabono majra bernai ? Kereng raida thwnglai thani kwchak kuphur kormo rong silai bulai toklai nasle lai hodao haphang ni sep rok seple lai tongo. Corruption ADC amchai ni haphangni tongkhoro no jotonisai kwbang. Thokoknai, sep seplenai tiprasano kwbang. Tharima kisa laitete tongnai no samung, sanmung hui tonai tiprasano. Kaham swrwngmung bai lam kaham phunuknai kwrwi hwnke teibo birman manai abo kubui.

11/06/2021

💐 Kwthar palaimung 💐
Tipra hoda Bharat hakotorni jotonisai kwcham tongnai. Tong kwchang hamjaknai, laitete khe tongnai hoda ni surilaimung, palaimung bo belai kubui tei hoda ni raida bai gothok jak. Lampra, Naksu, mailuma, khuluma, Twima palaino kha bomwi tang kosong tanglai langma katilai jao. Maharaj Trilochan Shiv/Suburai ni dagimung bai kharchwi mwtai swnam kha. Tabuk mwtairokni goron swnam jak chibwrwi mwtai joto baino khulum jagwi tongo. Gariya mwtaibo kubun haste kwplai wngwi Tipra haste tubujakma se. Bonobo goron swnamwi haste gwnangwi palai tongo. Bubagra rokbo twrwk twrwk goron gwnang mwtai swnamwi palaina chengkha. Tripureswari mwtai, Tripuresh Vairabh Shiv mwtai, Bhubaneswari mwtai, Kali mwtai, Jaganath mwtai, Vishnu mwtai, Durga mwtai akorokni mwtai nok swnam rwkha. Tipra hoda ni kubui palaimung pogwi kubun hodani kwbangma mwtai rokbo tabuk Tipra sarokbai muitu khujagwi palai jagwi tongo. Mwtaio ratharmung ni raida agini simino tongo. Baksa raida no chajakya wngwi Vaishnab tongkwthar chajak kha. Unakuti hathaio mwtai goron kwbangma sabo swnam kha tabukbo sai manya. Chakrak ma hathaio mwtai swnamjak tabukbo tongo. Tipra ni tong kosong belai kwcham. Hayung bai mwchangwi tangbiti bai gwdalwi palaimung bo palai jago. Twino langma Tipra hoda agini simino sai manjak. Aboni bagwi twima palaimung hodao tongo. Bubagrarokbo twi ganano tongthai swnam langkha. Thangwi tongnani bagwi nangkukma chamung Maino agini simi no rondogo khulum phaio. Ri-chum swnam nani khul no bo khulumo. Hamya chaya katina bagwi nukhungo noksu mwtai rwo. Kaham samung ni chengmung Lampra rwo. Goron gwnang mwtaino palai ma nukjakya. Kwthar kubuino palainai tei khulumnai bosong Tipra hoda. Tabuk kubun hodani mwtai rok, raida rok swrwgte swrwngte teibo jwngjal hapjak.

25/05/2021

💐. Dangor/Damboor/Dumbur ni Birman 💐
Atharamura hathai ni Saima twisa tei Longthorai hathaini Raima twisa kwtharlaima thai Twipra hasteo Dangor/Dangur/Dumbur/Damboor hwnwi sini jago. Raima tei Saima twisa kwnwi kwtharlai kwtal sinimung Gumti/Gomati twima ni mung manphikha. Bubagra ni molono oh thaino Hindu kwthar twimung ni tirtha Prayag bai baksa borom rwkha. Raima Saima twisa no Ganga twima hai borom rwkha. Bubagra bo Hangrai salo hai yakheva pous taal ni paithak salo kwthar twi tukumung, bekereng khibimung, sandai rokno puitu khwlai Tiprasa rokno lam phunuk kha. Twibum thaio Rani kundo, Kamala kundo mungrok pharjak tongmani. 1969 bisio twima no twi thewi twibum swnamwi chati achairwna ni samung chengkha. Dangor ganao tongnai Tiprasa mungsa siliya tamo khwlai nai. Amchaini lukurokni swngmung, kasumung no borom rwyawino haphang muchungtwi tang bwtang romkha. Huk khwlai chanai rokni ha lele, nok twi lomwi kami yakarna nangkha. Ha ni sinimung kwrwi ni bagwi chubachu bo manliya. Kharlai birlai, police mayung bai nok huk swbai jak kha. Tiprasa hoda piring poroi ma wngkha. Twi kwcharo berai nainani bagwi Narkel kai naithok swnam kha. Berai nairok maching jora hapung hathai, twibum, toksa toktwi, buphang waphang rung choklai tongthok laio. Haste haphang rang ajinani lam romkha. Phia ha kwmajak, nok kwmajak bwsarokni mwkhango tabukbo mwnwimung huijak. Kwmajak bosong ni laitete tongmung, chamung, ajimung, kanmung, mwnwimung sabo kiphil rwi manai?

22/05/2021

💐. Swrwngmung seplejak 💐
Kokborok/Tipra kok sanai 184 jona bubagrarok Tripura no naikul kha. Bubagra rokni bwsarokno Swina porina swrwngna bagwi maktham wanjwi phwrwngnai tubukha. Bubagrani dagimung samungbo kok wanjwi baino swikha tei awai khwlai jak kha. Kami amchaini rwngnok bo kok wanjwi baino phwrwngna chengkha. Sakni kok tongbo swinani swi thai kwrwi hwnwi kubun kok baino porilai kha. Bubagrani molo ha lele wanjwi tongma amchai kwbang rwngnok swnam jak kha. Tiprasa ni kami amchai lama kwrwi, kha warya, nogo tongya majra berwi swrwngmung seple jak kha. Paithak ni bubagra ni molo Tiprasa rwngkwrwng rok sak tharma bai Tiprasa kamibo rwngnok kwbang swnam na chengkha. Tangwi chanani ha khatwi kwlangkha. Bubagrarok tangwi chanani rwngmung hukbar, mwkhwi yongphak ni khwtwng, sor, pitol taknani akorok bo swrwng nani sep rwkha. Phia kubun hoda ni borok sep manma hai Tiprasa sep manliya. Rwngnogo swrwngmao bo mugli, wansa, thuruk sep manma hai Tiprasa manliya. Tipra/Kokborok bai swrwng nani chaitok mung nukjak liya. Swrwngmungo tabukbo kubun dopha bai kha baksa khe yapri sei manliya. Christian missionary Tiprasano kwtal pohor ni lama phunuk bai kha. Kami gwnangwi English bai Tiprasano porinani sep rwkha. Manthai seple jakmano twi kha teibo dusa kha. Kok wanjwi bai swina nailiya, Roman English bai swinani cheng kha. Tongmung chamung bo swlaijak ma nukha. Wanjwi kok bai porwi haphang ni samung kotor barja manai rok khe wanjwi ni raida, chamung, palaimung bai lomwi Tipra kok swno pogwi thangkha. English bai pori nai rok khe palaimung, chamung, tongmung, kanmung phatar hayung ni swrwng ma bai lomkha. Swrwngmung poderepod khe Tipra hoda gwdal kha. Phia sakni kok bai swrwng nani tabukbo kaham khe naikul jakya. Puila rwng berem phwrwngnai kisa, kwtal phwrwng nai bo chitok jakya. Tipra kok wanjwi, English kokthai solok nwchang kha. Kokborok kokthai chalwi thang kha. Swrwngmung wngkha kaisa hoda ni raida, hukumu, mukumu bai manju jak se, tabukle juda se wngkha.

12/05/2021

💐. HALOK. 💐
Aswk gwdwkma ni kokya jephuru Tipra hoda buini biyal birman ni bagwi sakni langma no bedogwi rwmani. Nukhung ni chajaknai manwi je tongsakno bagwi chalai mwnwilai langma kati laio. Nokgwrai kasa khe tamo chanai, tamo nwngnai, boro thunai wansukya, tongthok manise kul paiya. Tabukni ni hai khao koro motho wngjakya. Satung watwi manjagwi Huk khwlaino nukhung ni chamung ni biyal supung laio. Tangmung tangbaiya phano sandai nogo berailaima thakya. Sandai halok cherlaima kwbang kebono karwi, khagwi kwdwkma sal romwi nuklaiya tong manya. Tongthok, tongthokya jora chuvachuni mungsa deralaiya. Dengwi, rwsamo Mai, Swthui, romphe jotono pal khe suklaio. Yagul khil lai yagul sulaio. Nukhung jotono je mansak bagwi chalaio. Kothok thokya nok ari mui tunnani poklaiya. Kamini pandao jotono chuba laio. Tabukni hai Decorator, catering, chair, table, one time maireng , songnai kwrwi. Hao pal botok khe achuklai thalik bwlaio mai chalai no nukhung hamari rwthani mungsa kebengmung achaiya. Sandai ni halok khuk koroya khe saimano. Kami hamkwrai jotono thansa khe kok chaplai mwtai barokgo tei khulum laio. Mungsa kebengmung achaiya. Tabuk hai nukhung kaisao janija palaimung, manimung kwrwi. Nukhung ni okra no belai borom rwlaio. Mai kwtal chana swkang mwtai baroklai kamini jotono pal khe tongthok lai mai kwtal chalaio. Tabukkhe hoda ni raida no twi swngmung kwbang achaikha, palai nai mani nai kisa wng kha. Raida kaham no poklai sai manya lamao yapri selai andwra gunda yapri usta khulai tongo. Sandai halok no sini phano sini na nailiya, kubun hoda ni raida no chajak ma bagwi. Tipra hoda ni raida, palaimung bwswk kubui cherwi naikhe naibaiya.

09/05/2021

💐 Rajniti ni Jwngjal 💐
Sakni tei luku ni manthai, chamung, nwngmung, kanmung ni bagwi jotono ukuluk tei bwskang twi Rajniti hai ya kheba kereng raida bai gwdaljak. Tipra hasteo Tipereah bosong ni 184 jona sai kwbang Bubagra chalangmani ulo Bharat hakotor bai manjui luku chongmari ni raidao Tipra sarokni kwbangma jwngjal achai kha. Swrai swrai Tiprasa ni swrwngmung phuarwnai, kubun dopha bai thokok jamano kasunai bodol nangmani jora swlai patham romnai bodolbo Rajniti bodol bai gwdalwi thang na nangkha. Luku chong mari ni raida bai gwdalwi kubun hasteni kwbangma luku kharlai birlai wngwi Tipra hasteo tongthai swnam bai kha. " Langon Jar Bhumi Tar" raida boi hathai, ha lele thai manbai kha. Raima-Saima ni Dangor twi bhand therwi thangwi chanani mungsa lam phunukyawi mung kwrwi haa twi lomrwi Tiprasa rokno police, mayung bai nok huk swbai norwi rohorkha. "Jhum Purnabason" hwnwi luku thokai tabukbo paiyakho. 1980 bisi kotorma naslemung ni sitara patimung Tiprasa rok ha lele ni kharna nang kha. Tripura haste ni kwbang amchai khobwi ADC swnam phano twrwk twrwk ADC ni swkagwi General amchai swnam tongo. Bubagra rokni laibuma hui sitara kok pirwi Tipra lukuno piring- poroi swnam kha. Kereng raida langmao bojagwi Tiprasa no Tiprasani manthai cha banta sekna rwngkha, sai na rwngkha, naslena rwngkha, khak na rwngkha. Bharat hakotorbai manju mani 70 salni kwbang jora laimani ulobo Tipra sarokni chamung biyal, kanmung biyal, tongthai biyal. Kaham nwngjaknai twi, rwngmung, simung, lama, phereng chati, sakham nok bai tabukbo hakchal. Chongmari phaikhe Bumi putro, Adibasi, Janjati, pahari, Banobasi kokthai kami amchai ni nobaro kupulung. Kami amchai Rajniti ni mung rwi Tiprasano Tiprasani nok-huk sokcha laio, bwtharlaio, sikiri sokoro khwlai laio. Haphangni hamkwrai samung nini ani rong sil lai kwbangma sep sepwlai tonglaio. Tiprasa kami amchaini sep, tangbwtang jai khe naikuljakya, tangjakya. Sak baithang ni yakung bai bachana ni naharmung tabukbo belai hakchal.

07/05/2021

💐. Chamung 💐
Swngcharo thangwi tongna bagwi chanabo nango. Kaisa hoda ni bai tei kaisa hoda ni chamung pher mabo nugo. Sirisitini simi jani ja bosongni chamung janija khugo haptwi chalai phaio. Phia tabuk swngchar gwnangwi kwbangma hodani podere pod chamung chanai nai mano. Saboni bwswk thok, sakni bagwi bo chamung kaham sailai swnam chai mano. Sakbai gothokya chamung chai poderepod sak beram bo manjaklai tongo. Thok kwbang, masala kwbang chalai sak deralai tongo. Tipereah sarokni chamung thok nangya, masala nangya sakni bagwi belai kaham. Kubun hodani lukubo sak hamya wngkhe rugui, sogwi chana chengwi tongo. Mui songna kwrwng Tipra sani chamung swngcharni raida bai gwdaljak. Mosokdeng, Gudok, bwtwi, chakhwi, chatang, awanduru chanani mungsa biyal kwrwi. Bolong ni muikwthwng, hukni muikwthwng no poderepod khe songwi chai chamung no twi mungsa wanama kwrwi. Motom bahai kholna kwrwng, bwlai-bwthai naitugwi chana kwrwng tabuk buini chamung chai sak hamya beram bai lam bojagwi tongo. Sakni chamung chana nailiya, buini chamungni bahai manwi. Buino charwna bo lachima hapkha, buibo teibo chamungno twi kok hamya pirkha. Mui bahai motom khwlainani khundurupui, banta chinibo tongo. Mui chwnarwnani swtui chwngbo kaiyo. Tipra sarok chamung kaham chai kwswrang sak heleng, kwrak samung tangnai tongmani, tabukle sakni goron solya wngrwrwk. Agini Hrishi Muni jotono chamung laite, pot bangya chamung no chai ayuk kolok basilang bai kha. Tiprasa ni chamung bai abo kwbang pherya. Berma chana swrwngmani aswk sal balukyakho. Tiprasani chamung no twi chaitoklai naikhe teibo kaham kok achainai. Tiprasano karwibo kubun lukurokbo cha borok chamung chai sak kaham khe tongwi mano. Chamungno twi wanama kwrwi, selengma kwrwi, naslema kwrwi. Kubun poderepod beram manjakma jora Tiprasani organic chamung jotoni sak kaham khe ton nani jora lam kaham phunuk mano abo jotono gosithai.

06/05/2021

💐Tippereah/Tipra/Kokborok 💐
Tipperarh/Tipra kok sanai bosong ni 184 ni sai kwbang Raja oh Tipra haste no naikulkha. Phia Bharat hakotor bai gwdalmani ulo 1979 bisio se Tipra kokno Tripura haste haphang ni kok hwnwi goswi naharo. Tipra/kokborok sanai 184 jona Raja chanlangwi phano se oh kok phuar mao kesep tei chaitokma kisa. Jotoni sai kha kham mani kok wngkha-tabukbo oh kokni swi thai (script) kwrwi. Bo swi thai bai kokthai swinai tabukbo kok banglaijak. Hayung gwnangwi English kok nangma bagwi borok kisa bosongni kok kwmai tongo, swi thai kwrwi khe teibo jwngjalo. Chwngsajak kok Tamil, Telegu, Marathi, Bengali, Hindi akorok bo kebengmung nangwi tongo. Baksa hoda buini swi thai solok nai hukumu, mukumu, laibuma nwthangwi narwkna bagwi chaitoklai tongo. Hodao sakni kokbai kok sanai kisa wngkhe kok teibo dati komorna chengo, hoda ni borok joto tongmabo sakni kok saliya hwnkhe teibo dati mwramo. Sakni kok bai dati simahai kubun kok bai manya. Phwrwng mungni puila rem rogo Tipra/kokborok phwrwngnai kisa, bukcha achukthai bo tabukbo supung jakya. Tipra/kokborok no charwi tisana bagwi kwbangma committee swnam jak kha, phia soi soi samung tabukbo charwi manyakho. Baksa Bengali kothai bai swinani kok sao, baksa English roman ni kok sao, baksa khe Dev nagori (Sanskrit) ni kok sao, tabukbo chabwi manlaiya. Jora haikheno lai thango, phia swi thai chongwi manlaiya. Oh jwngjalni buphuru kaksinai ?(teibo porina hwnkhe Jwngjal bijab naidi)

04/05/2021

💐 Ajimung 💐
Tipra rokni tangbiti bolong bai gwdaljak. Langmani nangkukma chamung akorok bebakno bolong bai gwdaljak. Huk khwlai mai, khul, mui kwthwng, thai bai kupulung nukhung mungsa wanana kwrwi tongmani. Sakni chumung sakno tagwi kanmano, chuak bogwi mai kwtal chalai hodao kaham halok bona kwrwng, sakni yakung bai bachajak bosong tongmani. Walai suklai hamjakya, buini chamung, kanmung, tongmung mokol kai hamya swrwngya tongmani. Phia Bharat hakotor bai gwdalmani ulo Tiprasa ni bebakno swlai jagwi thangna nangkha. Kubun dophani tangbiti bai huk chanai ni tangbiti pherma bagwi teibo jwngjalo kwlai kha. Twrwk twrwk kubun dophani raida tongmung tiprasa ni laite raidao kubul jagwi tangbiti swlai jagwi thangkha. Yakung bai bachajak bosong yakung belwi kubun dophano tabukbo yak phehelwi ma tongkha. Kubun ni swrwngmung swrwngte swrwngte sakni rwngmung pogwi thangwi tongo. Nukhung ni mui kwthwng-thaikwthwng nok ari bagwi chamano pogwi phalna swrang kha. Biyalno mwthakna bagwi poderepod rang ajinani lam romkha. Bolongni chamung naitukgwi phalwi nukhung ni biyal mwthakna chengkha. Kubun dopha bai swnamjak manwi achugwi phalna chengkha. Huk chamung yakarwi kisasa ha lele bo mai kaina chengkha. Hapung hathai buphang, waphang tanbai Rubber kaina chengkha. Hayung ni kwbangma rang ajimungni lam bo romkha. Phia tabukbo kami amchai nangmaniswk mui kwthwng, thaikwthwng, maichwlam thairwi manya kho. Pai chanai kwbang, kainai kisa. Langma kubun dophani tangbiti naharwi tabukbo hama kolok rohorwi tongo. Twisa-twima rukhung tabukbo sak nangya haino kwlaijak, kheto panthor waisa mai thairwi tabukbo pok pok kwlaijak. Sikla hayung belai selema hapjak. Aichuk bachai kolomtwi khikwlai Rubber bwtwi thumuibo nangmaswk rangni borom manya. Watwino nasingwi hukba tangna nangma bagwi nangkukma swk thairwi manya. Bolong kuthukni chamung naitukgwi Lama gana gana achugwi phalmabai nukhungni birman tabukbo kagwi manya. Kwbang ajimung tabukbo naharwi nuhurya !

30/04/2021

💐. Lakai 💐
Swngcharo masaphano mungsa manwi ni biyal khe tongna muchungya. Jotono joto mansak parisak nukhungni biyal no kakna muchungo. Jora ni raida swlai jagwi tongmabai nukhungo haiya kheba langmao nangmani manwi bo teibo bangrwrwk. Salsa ni ajimung salsa ni nangmano supung manya. Ulni bagwi khatimung tabukbo wansuk manya. Jora kisao datino tharimano, muchungmano supung na thangtani teibo birman nangwi tongo. Nok ari solok sanmani ulo rang chubanai bodol Ujjivan, Bandan, pariwar mungtwi kwbangma bodolni thani chubachu nao. Hati barsa laikhe rang sunani bagwi ayang uyang rang naituknani chengo. Rang chubachu nai naithok, tongthok, chathok samungo swbaima bango, yakung bai bachanani lam koroi tongo. Kaisa subaiya swkang tei kaisa bai manju rwi langmao teibo jwngjal nangwi tongo. Jora kisa bai kwbang ajina muchungwi thwng sitara thwngwi teibo biyal nangwi tongo. Kha tharima kwbang, muchungma kwbang, phia sak tharma kisa. Ration card buini yago yapharjak, bwsa kwlwi bo phal na nangkha. Sak phalmung hai lam sitarabo hoda lomwi tongkha. Kwthang tongsak no lakai bai halok boi nukhung, kami amchai Tipra hoda chacha rara nangjak. Buphuru hoda lakai ni yakni yoknai sabo sai man?

26/04/2021

💐Kephek tei thwng sitara bai gwdaljak Sikla Hayung💐😢
Salbrumno phekjaknai manwi phalnai, chanai romjak tongphano hoda teibo khephek chamung bai lomwi tongo. Tipra hoda kotorma swraimung nangjak tabuk. Oh jwngjal ni majra sabono se bernai ? Phalnai no? Chanai no ? Ma-pha no? Hoda ni kwtal raida no? Haste haphang no? Kubui khe chwng Ma-phano puila majra ma gosithai. Bwsa rokno kaham rwngnogo porirwna muchungwi saichung aguli khor no karwi bo kubun haste porina ma rohoro. Naichomnai kwrwi ni sep nai bayab hamya bai kwtharwi sakbo kephek tei thwng sitara bai datino gwdal paio. Kami amchai sikla baksa rwng yakheli ni datino chokhwrai kephek tei thwng sitara ni jwngjalo kwlai kubui imang hui tonkha. Porwi tongnai sikla rok choital kok sanabo kiriliya tei lachiliya. Bupha-Bupha ni kok bo khwnaliya tei khwnanabo nailiya. Sirisitini bojak raida bai hakchal wngma bagwino hodao oh jwngjal nangwi tongo. Tang biti bai gwdalyaui thwng sitara Tir, Tash, Jandi Munda akorok thwngwi ajimani sai swbai ma bango. Jora kisa bai kwbang ajina muchungwi sakno thwng sitara bedoklai tongo. Nukhungo puitu chalaima kisa wngkha, hamya raida swrwngnai bangkha. Kubun hodha ni hamya raida kanmung, chumung akorok swrwngma bangkha, kaham raida swrwngma kisa. Kwbangma sikla phek jaknai manwi bai lomwi kha sitara, tongmung sitara, lam sitara konene bokhorok samung khwlaiya ur patijak. Jolima, Naslemung kwbang wngwi teibo sakno chukya swnam khibiui tongo. Sitara kokthai khugo hamchajak, Mobile kaisa no borokni puila tei paithak. Biyal ni nukhungo chubanani jora kwrwi phia hor kuthuk kuthuk gurinani jora tongo. Kami amchai loko loko samung kwrwi thwng sitara thwngwi raida hamya teibo bojakgwi tongo. Mela, Orchestra ni mungbai sikla hayung teibo jwngjalo kwlwgwi tongo. Sak baithang ni yakung bai bachanani lam korolai tongo. Siklarok khangar depjak, mokol kwchak, guja, kerem. Sikla rokni muchung ma, tharima kwbang, phia sak tharma kisa. Sikla lam sitara kwlwgwi tongmano kubui lama tubuna nangnai.

21/04/2021

Garia /Gairokya/Gariya ni kubui kothoma
Chaitra tal ni paithak Hari Baishu, Baisu ni ulo bisi kwtal ni puila tal Baisakh talni puila salni simi Tiprasarok Garia/Garoiya/Gorokya mwtai no khulum laio. Oh mwtaino baksa khe Mwtai kotor (Shiv) hwnwi palaio. Baksa khe mwtai kotorni bwsla Ganesh hwnwi palaio. Phia Tripura haste ni laibuma Rajmala naikhe saimano oh mwtaibo sirisitini simino Tiprasa rokbai palai phaijakmaya. Herombo (Kacchar) ni bubagra no mechenwi oh mwtaino haste tubumani kok bo jotono sio. Tiprasa rok tabuk baksa khe wasok, baksakhe mwkhang swnamwi palailai tongo. Mwkhango mokol koltham, Trisul nukmabai chwng bono Mwtai kotor hwnwi sinilaio. Gouri ni sajla Ganesh no swngchar gwnangwi puila khulumung yaphar na nango, oh koktwi rik khe Tring bisi kwtal ni puila salni simi no Gariya mwtai no tipra sarok bisi ni puila mwtai barokgo. Phia mwtai rwmungo ratharmung tongo. Oh salono nukhung ni rondok gobo mwtai baruklaio. Awang, chuak, kwkha rok chalai mwsalai surilai kami amchai tabukbo tongthok laio. Nukhungni hamari tei mai khul kwbang thaina bagwi surilaio. Garia ni sak de tong kwrwi, saboni rup abo kotor kok ya, kotor kok wngkha Tiprasa tabukbo oh nwtaino kwthar khe palai khulum tongkho. Tiprasa kubui kwthar no palainai, maninai, khulumnai twrwk twrwk mang swnamwi sirisitini mwtai tei kubun dopha ni raidao manjui jwngjal nangwi tongo. Hoda, dopha hwnwi khakhyaui kaisa kaham raida swnamwi jotono thansa khe raida halokno swnam na nango. Jotonono Goirokya, Garia ter ni kha kaham yapharo.

15/04/2021

1431 Tripurabdha ni kubui kok
Mol swlaijakmano rigwino hayung gwnangwi bisi kwtal palaimani nukjago. Baisakh talono hayung gwnangwi bisi kwtal palaima nukjago. Mongolian hoda ni ahomiya, Dimasa, Bado, Garo luku rokbo Rangoli Bihu, Bishu tei Baisagu hwnwi Baisakh talono Bisi kwtal palai laio. Manipurni Mekhli bo Meiti Chiroba palai laio. Punjab ni Sikh bo Baisakh talono bisi kwtal palaio. Odisha bo Maha Bishu mungbai bisi kwtal palaio. Tamilnadu bo Putandu palaio. West Bengal tei Tripurabo baisakh talono bisi kwtal palai laio. Bharat Ha kotorno karwibo Nepal, Bangladesh, Srilanka, Mayanmar, Thailand, Mongolian haobo Baisu, Sangrai kwbangma mungbai Baisakh talono bisi kwtal lamsok laio. Tripura hasteobo agi Raja rokni molo Baisakh talono Tripurabdha haiya kheba Tring bisi kwtal palai jago. Chaitro molni paithak salnwi Hari Baisu tei Baisu hwnwi tabukbo Tipra hoda palai jagwi tongo. Puila Baisakhni simino Baba Garia mwtaino khulumnabo chengo. Swngcharni joto kwthang manwi ni hamkwrai tei Mai-Khul kwbang kaham thairwna bagwi kami amchai pal khe surilai tongthotok khe awang chuak chalai langmani biyal birman no kaknani chaitok laio. Tripura tongnai Tiprasa no karwibo Bangladesho tongnai Tiprasa rokbo oh sal no hohom dodom kheno tabukbo palai tongo. Huk tangbiti bai gwdalwino Tiprasarokbo bisi kwtal palaio. Baksa khe wanjwi ni bisi kwtal no swrwngwi Tiprasa rokbo Baisakh talo bisi kwtal palai laio hwnwi wansukgo. Phia abo soi kok ya. Bangabdha chengya swkang bisi tham swkangno Tripurabdha (Tring) chengjak. Shokabdha nino Bangabdha tei Tripurabdha bo tikhi lai jakha. Sal, tal athukirini sanskrit mungni no talni mung bo narwk jakkha. Talni(month) mung wanjwi kok bai pharjakma ya. Puila Baisakh ni puila kokthai bo Tiprasa ni kokthai no. Baksakhe pohela hwno. Bisi kwtal ni salo Bubagra hasteo lelama sal hwnwi awai khwlai mabo nukjak kha. Phia tabuk Tiprasa rokbo nangmani sai kwbang chaitoklai ma bagwi Baisakh talo Tring bisi kwtal palaimabo siring soro wngna nang kha.