majalah cakakak

19/04/2024

"Ocad pami tos ageung hoyong janten naon?" ceuk guruna nanya.
"Hoyong janten pilot, supados sami sareng pun bapa," walon Ocad.
"Oh, bapa Ocad tèh pilot?"
"Sanès. Maksad tèh pun bapa gè sami, nuju alitna gaduh cita-cita hoyong janten pilot,"

19/04/2024

Ocad keur ngobrol jeung dua urang baturna, bari sarua pada ngagulkeun akina.

"Aki urang mah baheula kungsi dikadèk ku samurai Jepang, tapi teu nanaon?" ceuk batur Ocad nu kahiji.

"Komo aki urang mah kungsi ditèmbak ku Walanda, tapi teu daèk keuna?" ceuk batur Ocad nu kadua, embung èlèh.

"Ah, can nanaon èta mah. Aki urang nu hèbat mah. Apan kungsi ngabitukeun geranat dina leungeunna," ceuk Ocad, teu kebat nyaritana, da niupan heula bala-bala nu geus aya dina leungeunna.

"Teu kua-kieu?" ceuk batur Ocad nu duaan nanya mèh bareng.

"Henteu, ukur . . . ancur awakna wungkul !" tèmbal Ocad bari ngahuapkeun bala-bala.

19/04/2024

"Naha enya tukang bebersih di kamar oprasi lila-lila sok diangkat jadi dokter?" ceuk Agus Ulèn nu anyar digawè jadi OB di rumah sakit, nanya ka babaturanana.

"Enya, asal tekun wè digawèna. Tatangga uing gè tukang beberesih di kamar mayit, ayeuna geus jadi mayit," tèmbal baturna.

19/04/2024

"Akang badè ngalamar Tini tèh ukur gaduh modal kawantun wungkul, da puguh sepi pangarti tuna harta. Hirup gè apan akang mah nunggelis, teu dulur teu baraya. Dumuk di rorompok sacangkèwok, èta gè masih kènèh ngontrak. Atuh padamelan dugi ka ayeuna teu acan gaduh anu matuh, masih kènèh serabutan !" ceuk Agus Ulèn nyarita ka Tini, bari tungkul.

"Kang, ari kitu-kitu teuing mah asa mending kènèh . . . maot wè!" tèmbal Tini.

21/03/2024

09/03/2024

"Ku naon lamun jumaahan teu meunang gandeng ?" ceuk guru agama nanya.

"Margi seueur anu nuju kulem !" tèmbal Ocad.

23/12/2023

Agus Ulèn kakara saminggu digawè jadi sales penyedot debu. Basa promo di hiji imah, kalawan percaya diri, Agus Ulèn ujug-ujug ngawurkeun runtah di luhureun karpèt. Mèmèh pribumi ngomong, manèhna nyarita ti heula.

"Upami abdi teu tiasa meresihan deui ieu karpèt dina waktos sapuluh menit, ku abdi runtahna bakal disedot nganggè pangambung !" ceuk Agus Ulèn sombong.

"Nya sok wè sedot ku irung ti ayeuna, da di bumi ieu mah teu acan aya listrikan!" tèmbal pribumi.

21/12/2023

"Kasawat naon Bapa tèh?" ceuk dokter nanya ka Kang Suryana.
"Tipes, Dok!" Kang Suryana nèmbalan.
"Geuning uninga?"
"Diwartosan ku tatangga, Dok!"
"Sok atuh urang parios. Euleuh, leres wè, geuning Bapa tèh tipes?"
"Geuning Dokter uninga?"
"Apan tatangga Bapa tèh rèrèncangan abdi!"

14/12/2023

HAYANG NYANDUNG

Kang Suryana boga niat hayang nyandung. Lantaran ngomong satarabasna mah bisi Ceu Ikoh ngambek jeung teu ngidinan, nya nulis sajak. Unina:

Ikoh, beubeulahan hatè.
Upama Ikoh bumi, nya Akang panonpoèna anu nyaangan unggal waktu.
Mangka inget, Akang anu salawasna nyorotkeun cahaya kadang-kadang ngalantarankeun bumi silo.
Saterusna akang perlu nyebutkeun,
yèn Gusti Alloh tèh teu nyiptakeun bumi wungkul, tapi jeung planèt nu sèjènna.
Èta planèt tèh sarua, pada-pada perlu kasinaran.
Jadi, Ikoh sing rèla upama Akang boga maksud hayang nyinaran planèt nu sèjènna.
Kanyataan kitu tèh mangrupa kodrat, nu kudu ditarimakeun ku Ikoh.

Sabada maca èa sajak, gutrut Ceu Ikoh ngajawab ku sajak deui. Unina:

Kang Suryana, panutan Ikoh.
Upami Akang leres panonpoè anu salamina nyumirat ka satungkebning bumi kalawan adil,
Ikoh rèla cahaya Akang disumorotkeun ka planèt nu sanèsna.
Namung Ikoh apal, gagaduhan Akang mah apan sanès panonpoè, namung saukur LILIN PONDOK, anu nyaangan kamar urang ogè kakalicesan, lir bohlam 5 watt.
Kacindekanana, upama Akang rumasa mung gaduh LILIN PONDOK, ulah nyoba-nyoba hayang nyandung, bisi DIKETIG !!!

07/12/2023

GANTI GAYA

"Asa bosen, sabada 40 taun rumah tangga, kitu-kitu baè gaya tèh. Isuk mah poè Minggu, meungpeung barudak euweuh di imah, abdi hayang ngajaran gaya nu sèjèn, bari gègèlèhèan dina korsi," ceuk Ceu Ikoh nyarita ka Kang Suryana.

"Ih, ari akang mah salawasna bakal nuturkeun kahayang Ikoh. Der dina korsi gè, siapa takut?" walon Kang Suryana.

Isukna, sabada barudak ngencar, Ceu Ikoh noèl Kang Suryana ngajak kana korsi. Terus gègèlèhèan.

"Ari akang kudu kumaha?" ceuk Kang Suryana semu bingung.

"Akang mah terus gègèroh, nyeuseuh, jeung nyetrika!" walon Ceu Ikoh bari mencèt rèmot, nyetèl TV.

06/12/2023

"Uyut urang kungsi perang jeung Walanda. Aki urang kungsi perang jeung Jepang. Bapa urang kungsi perang jeung DI," ceuk Ocad nyarita ka babaturanana.

"Aèh, sigana kulawarga manèh mah teu bisa akur jeung batur nya ?" tèmbal babaturanana.

27/08/2023

Heuleut sababaraha poè sabada ngunggah vidèo keur tunangan jeung kabogoh bulèna, Lucinta Luna ngunggah deui vidèo keur rebèh ceurik. Ari nu jadi sababna, cenah tunanganana ujug-ujug kabur. Manèhna langsung nyalahkeun nètizen.

"Gara-gara dibuli ku nètizen, Alan kabur!" ceuk Lucinta bari ngajojowèt sakur foto manèhna anu babarengan jeung Alan. Ari Alan tèh kabogoh bulèna, anu kungsi nyègag ka Dedi Corbuzer basa keur diwawancara Dedi nyabit-nyabit yèn Lucinta tèh transgènder. Sigana harita mah Alan acan apaleun saha ari Lucinta nu sabenerna.

Papadaning kitu, loba netizen anu manghanjakalkeun Alan kabur. Sawarèh deui nyangka, boa burakrakanana hubungan Lucinta jeung Alan tèh, waktu tunangan tèa, loba nu ngadungakeun sangkan hubungan maranèhna sakinah mawadah ... wariah.

17/08/2023

MERDÈKA

BUDIMAN tèh pangusaha urang LURAGUNG. Ti pamajikanana nu ngaran ARIMBI, boga anak hiji ngaranna KURNIA, nu sapopoèna jadi PANGARANG. Kiwari Budiman bingung, sabab pamajikanana malik teu S**A, siga lain ka SAHABAT, alatan manèhna kawin deui ka DEBORAH anakna HARYANTO nu kawèntar sabagè PAKAR WISATA.

Supaya pamajikakana tetep GOODWILL, Budiman MIOS ka GUNUNG TUA ngadon tapa di makam KRAMATJATI, bari dina hatèna miharep sugan jeung sugan meunang lampu ALADIN.
Peutingna, dina mangsa di langit katèmbong aya BINTANG KEJORA, ujug-ujug kadèngè sora tan katingal, cenah lamun rumah tangga hayang LANGGENG, teu kudu tapa, alusna mènta DOA IBU anu geus kauji PRIMA JASA-na dina ngagelarkeun hirup urang mulus RAHAYU.

Budiman sadar, buru-buru ninggalkeun makam karamat, ngaliwat ka GUNUNG SEMBUNG anu tutuwuhanana SUBUR JAYA. Dina hiji tangkal, katèmbong aya RAJAWALI jeung GAGAK RIMANG, siga nu nyeungseurikeun manèhna.

Dina pikirna, bener ogè sora tan katingal tèh, da ngadegkeun rumahtangga BAHAGIA mah carana lain ku tapa, tapi ku jujur jeung silih percaya anu ngadatangkeun PAHALA KANCANA.

Sabada sadar, Budiman naèk kana tangkal nu pangluhurna, panonna pinuh ku SINAR JAYA, terus ngagorowok meulah kasimpè: ARIMBIII ... DEBORAAAAH ... kuring hayang MERDÈKAAAAA !!! (TF)

27/07/2023

Dongèng hikmah

PAREBUT WARISAN MUNDING

Aya jalma boga budak tilu, tilar dunya. Dina wasiatna nyebutkeun yèn manèhna rèk ngawaris munding anu jumlahna 19 ka tilu anakna, ngabagikeunana kieu:

1/2 keur anakna anu cikal.
1/4 keur anakna anu kadua.
1/5 keur anakna anu bungsu.

Sabada dibagikeun, horèng hasilna:

Nu cikal meunang 1/2 x 19 = 9,5
Nu panengah meunang 1/4 x 19 = 4,75
Nu bungsu meunang 1/5 x 19 = 3,8

Lantaran hèsè ngabagikeunana, èta adi lanceuk tèh kalah pasèa rongkah, da saurang gè euweuh nu daèk ngèlèhan.

Bèja ngeunaan nu parebut warisan munding kaèmpèr-èmpèr ka jalma nu sarua bogaeun munding, tapi mundingna ngan hiji. Manèhna boga niat, mundingna rèk dibikeun, terus ditungtun dibawa ka imah nu keur parasèa.

"Tah, kuring masrahkeun ieu munding kalawan ihlas, sugan jeung sugan bisa ngarèngsekeun pasualan anu keur disanghareupan ku anjeun tiluan," ceuk èta jalma bari masrahkeun mundingna.

Sabada ditambahan hiji, jumlah munding tèh jadi 20, atuh ngitung warisanana jadi kieu:

Nu cikal meunang 1/2 x 20 = 10
Nu panengah meunang 1/4 x 20 = 5
Nu bungsu meunang 1/5 x 20 = 4
Jumlah = 19

Nu tiluan kalah silih rèrèt, manèhna sadar sabenerna munding nu diperlukeun tèh ukur 19, lain 20. Lantaran kitu, munding nu hiji deui mah, dititah dibawa deui ku nu mikeunna.

Catetan:
Hikmah tina ieu dongèng, lamun urang barang bèrè kalawan ihlas, acan tangtu barang nu dipiboga ku urang bakal leungit, da lir ibarat nimba cai dina sumur. Beuki mindeng nimbana, caina beuki ngalobaan sarta bakal leuwih hèrang.

08/06/2023

CERITA HITAM Megy Z tina JATUH BANGUN
jadi jalma TERKAYA DI DUNIA

♤
MEGI Z boga CERITA HITAM nu sabenerna moal dibèjakeun ka sasaha, paling ditepikeunana DARI HATI KE HATI, da rumasa JERITAN HATI gara-gara PAHITNYA CINTA ngan ukur nyimpen LUKA DALAM CINTA jeung SENYUM MEMBAWA LUKA.

♡
Sanajan MADU MALAM hargana MAHAL asa moal mungkin Megy Z jadi jalma TERKAYA DI DUNIA, da nu ngaranna TERLANJUR BASAH jeung loba DUSTA mah pasti hirupna bakal JATUH BANGUN nepi ka jadi jalma TERMISKIN DI DUNIA.

◇
Tanggal 19 NOVEMBER, ANNISA anu ngaku-ngaku AKU SEMUT MERAH geus nganyam BENANG BIRU supaya SERIBU BENANG CINTA nu ngaliwatan GUBUK BAMBU jeung AIR TUBA bisa ngarasakeun TAJAMNYA CINTA. Ari JANDAKU, ibarat GADING RETAK jeung KERTAS BASAH, pasti ngarasa TAKUT SENGSARA. Sanajan deukeut ka MATA AIR CINTA, ari geus waktuna SAKIT GIGI mah pasti ngarasa BERAT SEBELAH nu ahirna boga anggapan yen LEBIH BAIK SAKIT GIGI tibatan jadi ANJING DAN SAMPAH.

07/06/2023

"Untung abdi teu dilahirkeun di Inggris nya Pa ?" ceuk Ocad.
"Naha ?" tembal Kang Suryana malik nanya.
"Apan abdi mah teu tiasa nyarios ku basa Inggris ?" ceuk Ocad deui.

05/06/2023

Pendaftaran 200 rèbu, kanggè kaos, berekat tuang siang, sareng jogèd saolabna.

04/06/2023

Carpon Taufik Faturohman

BALADA CINTA TUKANG BUAH
JEUNG TUKANG SAYUR

Di Pasar Bojongkèom, aya tukang sayur bobogohan jeung tukang buah. Keur meujeuhna maskèt sono bogoh, tukang sayur ujug-ujug megatkeun hubungan. Puguh waè tumibana ka tukang buah asa dibèntar gelap tengah poè èrèng-èrèngan, asa tungkeb bumi alam. Dadana karasa eungap, lir diheumpikan anak setum. Bakat kuciwa jeung ambek, manèhna ngabeubeutkeun kiloan èntog, nepi ka ancur. Am dahar apel, saamis-amis dumadakan karasa pait. Terus ngagayem salak teu dipesèk heula cangkangna, nepi ka biwirna getihan. Batu kiloan ku manèhna dicapèk, nepi ka huntuna murudul. Bari kekerot nahan ambek, gasik nga-WA tukang sayur.

Nya naon SALAK akang, Enèng ujug-ujug ngedalkeun SAWO-nara? Akang NANGKA, pasti Enèng boga nu anyar, nu SARIKAYA-na KELEWIH ti akang. KADONGDONG-ra hubungan urang diteruskeun, sabab akang kungsi MARKISA tas Enèng, manggih foto lalaki nu RAMBUTAN-ana gondrong. Terus malem Salasa kamari, ku MATOA akang sorangan, di tèras imah Enèng nempo aya nu keur ALPUKET patangkeup-tangkeup. LÈMON èta SAMANGKA akang bener, yèn aya lalaki APEL ka Enèng, akang CÈRI hatè pisan, sabab akang mah STROWBÈRY napsu, nu ngalantarankeun hatè jadi GANAS. Batan dinyenyeri, KATAPANG èdan, akang rèk mepek BOLÈD, hayang ngabales panghina ti Enèng.

Jujur wè, ayeuna akang nandangan DALIMA, sabab hubungan urang jadi PONDOH. Enèng mah LÈCI pisan, megatkeun hubungan dina kaayaan akang keur sono bogoh. Napas akang jadi SIRSAK, hirup jadi MÈLON-kolis, siga jalma KONYAL, mindeng nginum PIR dioplos jeung JAMBU anti galow, ngalantarankeun awak GALINGGEM panas tiris. Lantaran lieur, keur diuk dina BANGKUANG ogè ujug-ujug LABU kana ubin.

MANGGU hubungan urang pegat, ngan Enèng CANGKUDU ngabuktikeun saha èta KALIKI nu nganjang tèh? Tibatan nyeri hatè, akang rèk eureun dagang, kajeun teuing ANGGUR.
Najan eungap MANALIKA asa aya nu nga-JERUK ku peureup kana dada, ayeuna akang pasrah, rèk buru-buru mènta BALINGBING-an ti emang nu jadi SUKUN sakti mandraguna. Tapi Enèng KADU inget kana hukum KORMA, talanjak kitu ka akang tèh pasti bakal aya wawalesna. BEUTI-keun wè sabada dijiad ku Emang, akang moal unggut kalinduan moal GEDANG kaanginan.

Teu kungsi lila, HP manèhna ngageter dina kaayaan dadana anu ngageder. Barang diilikan, horèng aya WA, eusina jawaban ti tukang sayur.

Kang, Enèng tos BROKOLI ngawartosan, hubungan urang tos TOMAT. Upami Akang teras-terasan ngabahas naon sababna, CABÈ dèh. Terus TÈRONG, sanaos Enèng masih nyaah ka Akang, saur paripaosna siap di-BAWANG ku Akang ka mana waè, KACANG-i jadi saleuwi ka darat jadi sa-LOBAK, namung enèng KANGKUNG apal, Akang tèh WALUH GEDÈ timburu, KACAMBAH mun salah seueur ENGKOL. Akang tos sababaraha kali nyarios BIT, upami teu KADELÈ ku soca nyalira moal seueur curiga. Nu malem SALADAH ka bumi, nu saur Akang SUUK-na gondrong, wantun disumpah POLONG, èta PARIA nu sok ngamèn di pasar tèa. Geuning upami ngawih tèh sok JANTUNG dèngèeun. Timburu Akang nu kaleuleuwihi, sasat janten BOMBAY waktu, nu bituna ayeuna.

Ku enèng didungakeun Akang sing SÈRÈH kènging gentosna, mung JAGONG upami ngèngingkeun gegentos nu sasabar enèng.
Ayeuna mah urang silih dungakeun wè, saur Pance S Pondah mah, _KUCAY jalan terbaik._
Dugi ka iraha ogè, Enèng moal hilap, komo upami nuju nganggè acuk WORTEL bulu pamasihan Akang. Sabada pegat sareng Akang, enèng badè ngabuang manèh janten TKW di Saudi, sawios janten tukang PAPRIKA anggèan gè.

Pamungkas ti enèng, Akang ulah seueur nga-BAYEM waè tuangeun, bilih patuangan beuki BUNCIS-treuk. Tong hilap, sing rajin ngurud KUBIS, supados katingal langkung anom. Dugikeun SALAM ka wargi-wargi Akang, sakantenan enèng neda dihapunten.

Sabada dipegatkeun hubungan ku tukang sayur, èta tukang buah indit ka LURAGUNG, sabab aya BUDIMAN, emangna anu sapopoè jadi PANGARANG sakalian jadi pananyaan.
Gemet pisan lalakon pegat hubungan jeung tukang sayur, ku manèhna didongèngkeun. Emangna mèrè bongbolongan.

"Èta lalakon tèh, sarua pisan jeung kajadian nu kaalaman ku Pa HARYANTO, nu kungsi konsultasi ka dieu. Ti pamajikanana nu ngaran ARIMBI, boga anak hiji, dibèrè ngaran KURNIA. Ayeuna Pa Haryanto keur nandangan bingung, sabab pamajikanana malik teu S**A, siga lain ka SAHABAT, alatan manèhna kawin deui ka DEBORAH anakna RUDI nu kawèntar sabagè PAKAR WISATA,"

"Euh, hawatos pisan atuh. Rupina Pa Haryanto sami nuju ticengklak manah sapertos abdi. Kumaha saterasna, Mang?"
"Supaya pamajikanana tetep GOODWILL, Pa Haryanto indit ka GUNUNG TUA ngadon tapa di makam KRAMATJATI, bari dina hatèna miharep sugan meunang lampu ALADIN.
Peutingna, dina mangsa di langit katèmbong aya BINTANG KEJORA, ujug-ujug kadèngè sora tan katingal, cenah lamun rumah tangga hayang LANGGENG, teu kudu tapa, alusna mènta DOA IBU anu geus kauji PRIMA JASA-na dina ngagelarkeun hirup urang mulus RAHAYU. Buru-buru Pa Haryanto ninggalkeun makam karamat, ngaliwat ka GUNUNG SEMBUNG anu tutuwuhanana SUBUR JAYA. Dina hiji tangkal, katèmbong aya RAJAWALI jeung GAGAK RIMANG, siga nu nyeungseurikeun manèhna. Dina pikirna, bener ogè sora tan katingal tèh, da ngadegkeun rumahtangga BAHAGIA mah carana lain ku tapa, tapi ku jujur jeung silih percaya anu ngadatangkeun PAHALA KANCANA,"

"Yaktos, kitu pisan. Dupi ayeuna, abdi kedah kumaha, Mang?"
"Tinggal MERDEKA-keun diri, eusian hatè ku SINAR JAYA,"
"Namung abdi nyeri hatè pisan, Mang. Asa dihina!"
"Lamun kitu kaayanana, ceuk Rhoma Irama mah asa ANEH TAPI NYATA, aya lalaki dipegatkeun ku kabohoh jadi BIMBANG, siga anu KEHILANGAN TONGKAT? Èta tèh akibat pikiran Alo masih kapangaruhan ku BISIKAN SETAN. Ayeuna mah tinggalkeun sagala anu HARAM, laksanakeun PERJUANGAN DAN DOA, tingkatkeun TAQWA, lobakeun SEDEKAH jeung mèrè SUMBANGAN, emang yakin SETAN PASTI KALAH,"

"Mudah-mudahan wè. Mung anu matak nyeri hatè, nu megatkeun hubungan tèh istri, Mang!"
"Èta tèh balukar ayana EMANSIPASI WANITA anu sulukna HABIS GELAP TERBITLAH TERANG. Alo ulah peunggas harepan, komo nepi ka eureun dagang mah, sabab bisa GALI LOBANG TUTUP LOBANG, ngajual PIANO jeung GITAR TUA. Lalaki mah ulah MENANGIS jeung MERATAP nepi ka jadi SEBUJUR BANGKAI, sabab èta tèh TABIR KEPALSUAN. Alo ulah daèk di-ADU DOMBA jeung kabogohna anu anyar, sabab dina tetempoan emang mah, manèhna MANDUL alatan pagawèanana JUDI, nginum MIRASANTIKA, jeung unggal peuting BAGADANG. Kalem, aya dua tatangga emang nu gareulis keur gaganti nu megatkeun mah, ANI anu jadi PRIMADONA DESA jeung SHOHIBAH anu geus sataun jadi JANDA KEMBANG. Pèk ku Alo pilih hiji, sugan wè jadi ISTRI YANG SETIA,"
"Wah nyeri ku istri mah landongna kedah ku istri deui, Mang. Abdi moal milih hiji, duanana badè dilamar!"

"TERLALU!"

10/05/2023

TUKANG BUAH JEUNG TUKANG SAYUR

Aya duda tukang buah bobogohan jeung tukang sayur nu dagangna bareng di hiji pasar. Dina hiji poè, tukang sayur ujug-ujug megatkeun hubungan, terus tukang buah nga-WA 👇

Nya naon SALAK akang, Enèng ujug-ujug ngedalkeun SAWO-nara? Naha Enèng NANGKA akang salingkuh, atawa akang dianggap jalma KONYAL dumèh sok nginum PIR dioplos jeung ja-JAMBU?

Jujur wè, ayeuna akang nandangan DALIMA, sabab Enèng mah LÈCI, megatkeun hubungan dina kaayaan akang keur bogoh-bogohna. Napas akang jadi SIRSAK, hirup jadi MÈLON-kolis. Hitut gè jadi mindeng teu ka-KERMOT. Komo basa akang MARKISA tas Enèng, manggih foto lalaki, hatè jadi GANAS. Hirup akang jadi teu puguh, asa dilèlèwè ku kawih dina laras PELOK. Akang keur diuk dina BANGKUANG gè labuh, hayang jeung KADU ngabuktikeun saha nu sok APEL ayeuna ka bumi Enèng. Tibatan nyeri hatè, akang rèk eureun dagang, kajeun teuing ANGGUR.

Najan kana dada karasa aya nu nga-JERUK ku peureup, ayeuna akang pasrah bari mènta BALINGBING-an ti nu jadi kolot. Tapi Enèng sing inget kana hukum KORMA, talanjak kitu ka akang tèh pasti bakal aya wawalesna. Insya Alloh, sabada pegat hubungan, akan moal unggut kalinduan moal GEDANG kaanginan.

Ieu jawaban WA ti tukang sayur 👇

Kang, Enèng tos BROKOLI ngawartosan, hubungan urang tos TOMAT. CABÈ dèh.
Terus TÈRONG, sanaos Enèng masih nyaah ka Akang, saur paripaosna siap di-BAWANG ku Akang ka mana waè, namung Akang KANGKUNG uninga kaayaan sepuh Enèng nu tiktikbrek ngantosan dipundut umur. Alatan kitu, waktos ku sepuh dijodokeun ka wargi, Enèng teu tiasa nolak. Malih waktosna nikah ogè tos SÈRÈH, sasih payun. Upami saur akang asa nuju dilèlèwè ku kawih laras pelok, sugan ka payun mah Akang tiasa dibeberah ku kawih dina laras SALÈDRI.

Ayeuna mah urang silih dungakeun wè, saur Pance S Pondah mah, KUCAY jalan terbaik. Dugi ka iraha ogè, Enèng moal hilap ka Akang, komo upami nuju nganggè acuk WORTEL bulu pamasihan Akang, teu sirikna asa nuju dikalèng ku Akang.

Aya SALAM ti Ema sareng Bapa kanggè Akang. Kahadè, Akang ulah seueur nga-BAYEM waè tuangeun, bilih beuki ngagendutan.

03/05/2023

Ocad nu dititah molahkeun "kuliat" ku guruna, kalah nyanyi:
Kuliat Ibu Pertiwi
sedang bersusah hati

03/05/2023

OBROLAN DINA ANGKOT

Aya bapa-bapa karyawan kabupatèn naèk angkot. Di satengahing perjalanan ngajak ngobrol ka supir.
"Tos sabaraha taun akang janten supir angkot tèh?" ceuk bapa-bapa nanya.
"15 taun," tèmbal supir angkot.
"Ih, tos 15 taun mah kedahna tos gaduh angkot nyalira,"
"Kè, dupi Bapa tos sabaraha taun didamel di kabupatèn tèh?" supir angkot malik nanya.
"20 taun,"
"Ih, tos 20 taun mah kedahna tos gaduh kabupatèn nyalira,"

30/04/2023

Ieu tèh nu disebut kasenian "Lèngsèr Ambu" tèa, anu sakapeung rujit nempona da sok dibarengan ku nu bèbèncongan. Ku ayana èta pintonan, suasana pernikahan anu sakral jadi èncèr jeung leungit aurana.

Sabenerna, lèngsèr tèh juru warta, nu sok ngiberan rahayat ngeunaan kaayaan atawa kajadian di karajaan. Jadi, lèngsèr mah jalma (jabatan) biasa, henteu kudu dibodorkeun: huntu diompongan, leumpang bongkok, nyorèndang kanèron, udud padud gedè, jeung dikongkorong tasbè sagedè-gedè bal pingpong.

Lain ngahulag, pèk tèh teuing midangkeun kasenian samodèl kitu gè, da kasenian mah apan hirup. Ngan ngaranna ulah lèngsèr, merenahna "Abah Ambu", lain "Lèngsèr Ambu".

Tah, lantaran katulah jeung mijah teuing, èta Ambu nepi ka tikunclung ka susukan. Nya pasti wirang, da diluar skènario. Mun kajadianana di Jepang, seniman kitu pasti langsung harakiri, bakat ku teu kuat nahan kaèra.

30/04/2023

Foto kènca, rèlif (diorama) nu aya di lokasi wisata Tangkubanparahu, ngagambarkeun Sangkuriang keur najong parahu. Ari foto katuhu, nuduhkeun tempat pangkas rambut, langganan Sangkuriang mun dicukur.

29/04/2023

Parancah panyinglar lapar.

26/04/2023

Orok nu dinamian NUGRAHA AULIA (GAGAH) tèh, 28 taun ka pengker masih dihao hakeng ku lanceuk-lanceukna. Alhamdulillah, dinten ieu badè ijab sareng kabul, mungkas lalagasanana ka urang Cihaurbeuti.

Gah,
pernikahan tèh
munggaran lèsotna jangkar
laju parahu meulah lautan
umbul-umbulna Dienul Islam
kompasna Qur'an jeung Hadis
pangwelahna kaimanan
jeung kaihlasan

Hiji mangsa
dina liuhna angin laut
lelerna lambak samudra
parahu anjog ka darmana
: sakinah, mawadah, warohmah

25/04/2023

NAHAN SABAR

AYA tukang ngamèn asup ka pakarangan imah Kang Suryana. Tuluy nyanyi bari ngahitar. Kabeneran Kang Suryana keur aya di tepas dina kaayaan nyeri huntu.

TUKANG NGAMÈN (NYANYI):
Sungguh terpaksa, aku menyanyi, mengharap tuan bermurah hati. Coba dengarkan, aku menyanyi, membawa suara jeritan hati.

KANG SURYANA:
Gandèng Jang, Bapa tèh keur nyeri huntu.

TUKANG NGAMÈN:
Daripada sakit hati, lebih baik sakit gigi ini. Biar tak mengapa ...

KANG SURYANA:
Na ari Ujang kalah ngalèlèwè. Bener Bapa tèh keur nyeri huntu. Gandèng! Indit siah ka ditu!

TUKANG NGAMÈN:
Ku akan pergi, meninggalkan dirimu, menyusuri liku hidupku. Janganlah kau bimbang, dan jangan kau ragu, berikanlah senyuman padaku.

KANG SURYANA:
Èh, kalah ngahajakeun. Hayang nyaho ambek Bapa ?

TUKANG NGAMÈN:
Ingin marah silahkan, ingin diam silahkan. Asal jangan kau putuskan cintaku.

KANG SURYANA:
Gusti, sigana kudu ambek enyaan ieu mah. Hayang dipaèhan manèh tèh?

TUKANG NGAMÈN:
Lebih baik kau bunuh, aku dengan pedangmu. Daripadaaaaaa kau bunuh aku dengan cintamu.

KANG SURYANA:
Gustiiiiii. Mèmangna aing tèh bogoh ka sia?

TUKANG NGAMÈN:
Jujurlah padaku, bila kau tak lagi cinta. Tinggalkanlah aku, bila tak mungkin bersama. Jauhi diriku, lupakanlah aku, selamanyaaaa ....

KANG SURYANA (BARI NGAMANG-NGAMANG GELAS):
Dibaledog ku gelas siah!

TUKANG NGAMÈN:
Gelas-gelas kaca, tunjukkan padaku, siapa diriku ini. Ayah aku tak punya,
Ibu pun aku tiada, siapa pun aku tak punya.

BELEWER KANG SURYANA MALÈDOGKEUN GELAS. KEUNA PISAN KANA TARANG TUKANG NGAMÈN.

TUKANG NGAMÈN (BARI INDIT):
Astagfirullloh, robal baroya. Astagfiruloooh minal hotoya.
***

24/04/2023

"Sok wè tong asa-asa, Kang. Bisi badè wasiat mah, geura wakcakeun! Bilih akang sesah nyarios, wasiatna tiasa diserat!" ceuk Ceu Ikoh barang nempo Kang Suryana eueuleugeugan, napasna siga anu beuki sesek.

Gutrut Kang Suryana nulis. "Wasiat"-na pondok: "Èta selang oksigèn ku Ikoh ulah ditincak!" cenah.

23/04/2023

Roda Kang Suryana anu dipakè dagang roko di buruan alun-alun diangkut ku Satpol PP. Sabada diuruskeun ku baraya Kang Suryana nu boga pangkat, kacindekanana Satpol PP rèk mèrè parurugi.

"Abdi mah nyuhunkeun 10 juta wè," ceuk Kang Suryana.

"Ma enya hayang digantian 10 juta? Paling ogè 3 juta, 1 juta rodana, 2 juta modalna ?" ceuk patugas Satpol PP.

"Leres pisan Pa, namung di lebet roda tèh aya pun bojo. Waktos eta roda diangkut, pun bojo nuju mondok di lebetna. Tah nu 7 juta mah kanggè ngagentosan pun bojo," tèmbal Kang Suryana.