EspacejeunE

31/01/2022

Premye atis Gonaïves ki moute asansē 😀😂Se Job wanted boys kap fe koze isit 😂

28/01/2022

Apre titan kote show a te an somēy, pour des raisons diverses, nou jije bon e nesesē pou nou tounen vin konplemante jounenw, fas ak tout sousi lavi ka pote sou chimen nou. # Ann Di welcome back EspacejeunE 🔥🙌🏾🎶 -

27/01/2022

Akymy X Bada tōg 🎶 Eske Nou pare ?

26/01/2022

🙌🏾

24/01/2022

Welcome back EspacejeunE show 🙌🏾🔥

03/04/2021

EspaceJeunE ak Bagay 9 night club pote pou ou yon pwojeksyon yon film ki soti depi 5 mars, kote anpil nan nou te konn gade #1 depi nou ti katkat oswa nou pat men'm espere yon lot # anko.

Un prince à New York 2 (Coming 2 america).

Pa bliye avan epi apre pwojeksyon film sa ki ap fet gratis ti cheri nan Bagay9 Night Club ki chita nan 27, Rue Clerveau, K-Soleil w'ap kapab fon ti enjoy ou ansanm ak Dj Fly.

Pop Corn, Fresco, Cocktail ap disponib nan menu an.






Pa kenbe'l fè'l mache paske gen plas pou nou tout e nou tout dwe la!

03/04/2021

Eskew sonje show sa ?

07/03/2021

Happy Birthday Tripotay Gonaives

07/03/2021

Nan okazyon jounen mondyal fanm ki se 8 Mars EspacejeunE ap Ōganize yon Show espesyal pou komemore dat sila a, nap genyen Almarie Jean François kòm Envite👩🏾‍🎓 Pa rete bel show sa😊 Anpil koze Pra’l pale🤩 🙏🏾

04/03/2021

Depi’l pa EspacejeunE Li pa show
👑😊

14/02/2021

Jodi a 14 Fevriye se yon gran jou pou EspacejeunE show, jou sa a make kreyasyon show sila, 14 Fevriye 2020, Premye pa a te fēt epi lōt pa yo patap rive fēt san Sipō nou tout. Nou remēsye tout Pēsonaj piblik ak atis ki te patisipe nan Show an pou premye ane li, tout moun ki konn ap sipōte nou epi tout Espektatē ki toujou prete nou atansyon pou swiv show an. San nou EspacejeunE show patap rive kote’l Ye a. Mēsi😇🙏🏾 🎉

20/01/2021

Demen Nap gen ZoeGar Wata Afrika nan show a🎵🎶 8hr:00PM⏱
Vinn poze Atis la kesyon🎶🤩
Envite zanmiw Vinn suiv bel show sa sou statut nou 👉🏾3772-0864

16/01/2021

Lē Polky tande EspacejeunE Pral Back🤣👊🏼🤩

06/12/2020

Bonswa ak tout fanatik EspacejeunE Show,

Dimanch 6 Desanm se dat estaf EspacejeunE Show deside rebalanse ak show an pou fè plezi ak fanatik li yo. An pasan, estaf EspacejeunE Show koube li byen ba devan chak grenn fanatik show an pou’l pote yon gran eskiz pou absans Show moman. Donk nou pwomet ou wap jwenn yon EspacejeunE Show kap pi bel toujou

Mèsi pou pasyans nou ak fidelite nou.

Responsable
Reginald Petit-homme dit Prezantatè T-REGI
Louvenson Saintil dit Sonlee Jounalis epi prezantatè Emisyon Pwojeksyon sou 99.5 lan ki se Radyo Antèn Kontinantal

06/12/2020

Pa rate Show sa🔥🔥🔥🔥add mwen konnya pouw suiv nou 😇37720864

07/10/2020

Kilès ki Junior Bernard?

18 Novanm se yon dat ki make istwa limanite men 18 Novanm 1997, se ta pra'l nesans Junior Bernard nan lopital la Pwovidans nan lakou Gonayiv. Bernard grandi nan yon fanmi ki gen twa pitit kote li se premye an. Pou sa ki gen pou wè ak etid primè li se nan Collège Diocésain Saint Paul li te fèl aprè li ta pra'l rantre nan Collège Immaculée de Conception epi Collège Vanutelli Saint Georges pou fini ak etid klasik li. Aprè etid klasik li Junior Bernard te deside rantre nan EDSEG(ki se Ekol Dwa Gonayiv) kote li te pran syans jiridik e li nan 3è ane. Malgre li nan Syans Jiridik sa pa anpeche reve devni yon gran antreprenè kote lap ka itil kominote lap evolye an. Junior Bernard gen anpil metye manyèl nan men'l tankou Sérigraphie, li konn Tente vit epi li fè Piercing byen anpil.

Kilès ki Beji Assa?
Beji Assa se yon jèn rapè kap evolye nan vil Gonayiv. Karyè mizikal li komanse nan lane 2015 avek yon fwistal ki gen pou tit Fwaye'm Pyeje. Men an reyalite se depi a laj 13 zan nan lane 2010. Nan lane 2016, Beji ta pra'l entegre yon gwoup nan vil Gonayiv ki se Asasen Clan.

Ki kote li soti ak non Beji Assa?
Beji se yon konpozisyon Bernard ak Junior ki bay li epi li pran Assa nan non gwoup li an kise Asasen Clan.
Nan sa ki gen pou wè ak mizik solo li Beji Assa fè anpil mizik tankou: Koute'M, yon mizik atis lan ekri pou fè konprann ak tout fanatik ki panse li ap byen pase an se pa vre e li pwofite di pi devan menm sak pa renmen li toujou ap fredone mizik li. Koute'M se yon bel moso mizik atis lan te fè. Pete Kare avek ODD le Génie, Eske'w renmen'l avek Kolonel Freez epi fwistal Oxygène pou'n site sa yo selman. Pou pwojè byento Mikstep li gen pou'l soti e sou li wap jwenn MechansT, Cator, Dutty epi Ak-100 Fòs. Pou Bitmekè Sousbit ap la esi ap gen lot nan pa lontan l'ap kominike sa.
Selon Beji Assa li gen de bel pwojè kap mennen nan moman kise Di Yo m La ak Oxygène kise yon fwistal videyoklipe. Pi gwo rev li nan mizik se prodwi bel mizik pou fè fanatik li sèvi l lajan.

Kisa w panse de EspacejeunE?

Se yon fowòm kap travay byen jiska prezan, li pèmèt fanatik yo konnen atis yo yon lot fason tankou nan konnen plis sou lavi yo. Mwen swete nou kenbe la sitou m'konnen travay lan pa fasil.

Jou kap mèkredi 7 Oktob lan depi'l fè 8è pase nan estati prezantatè T-REGI pou'w kapab konnen plis sou kilès ki Junior Bernard oubyen Beji Assa.

19/09/2020

Lil touman Vs Lazer
Toujou Prezan🔥🎶🎵

17/09/2020

Kilès ki Felner Pierre?
Felner Pierre se yon jèn gason ki pran nesans li nan vil Gonayiv yon 27 Mas. Li se dènye
nan yon fanmi ki gen 4 pitit gason. Nan sa ki gen pou wè ak etid primè li se nan "Collège
Henry de Navarre" li te gen chans fè sa epi li ta pra'l rantre nan "Collège Eben Ezer" kote
li ta pral kite'l nan klas reto pou yon lot lekol. Li se youn pami anpil jèn kite reve devni
"Ingénieur" men sityasyon peyi an pa bal posibilite sa. Kontrèman ak anpil lot jèn Felner
son jèn responsab paske li gen yon bel pitit fi ki gen yon lane li renmen anpil epi ki toujou
bat pou'l ba li tout sa'l bezwen. Esak fè li konseye tout jèn ki ap rantre nan relasyon pou
yo asime responsabilite yo paske lè yon fi leve yon timoun san prezans papa li sa konn
koz anpil pwoblèm nan edikasyon timoun sa.

Kilès ki Lazer Hip Hop Keys?
Lazer komanse ekri mizik nan kaye li e se te toujou yon fyète pou'l ap montre tout jèn bò
lakay li sa'l ekri kom mizik alò se konsa anpil jèn ta pra'l di'l gen talan pouki li pa lanse'l
nan mizik? Epi san pran tan li ta pra'l soti premye moso li kite jis yon fwistal pou anonse
rantre li nan Rap kreyol lan kise "San ko wè". Tankou nou ta va di atis lan vle fè
konprann sa se tokèt lan chay lan dèyè. Touswit aprè li ta pral entegre youn nan gwoup
jèn nan vil lan ki se Hip Hop Keys. Answit, li gen anpil bel mizik solo tankou: Envensib,
Jòf, Dope Girl, Ma carrière ak Polis dèyè m. Men malerezman youn nan mizik sa yo pa
sou rezo yo koz atis lan pagen yon chèn You tube men li konte fè sa byento. Li te gen
chans feat ak Big Jim nan yon mizik ki titre "Ou ka fè sa". Youn nan pwogram ki make
lavi'l se sa li tal jwe kafou ayewopò an nan fèt gwoup Rock Fam lan. Tout rev li se devni
yon anbasadè pou'l kapab sipòte jèn ki gen talan nan Rap kreyol lan.

Kisaw panse de EspacejeunE?
Son bel show ki la pou sipòte tout jèn ki gen talan. M swete EspacejeunE siksè malgre
chimen an pa fasil.

07/09/2020

Ann ale Jenès la!!!! Nap Ini nou pou defann avni nou.
#

04/08/2020

🔥🔥

04/08/2020

Kilès ki Jean François?

Jean François se yon jèn ki pran nesans li nan youn nan vil ki bay anpil bel talan nan peyi Dayiti, vil sa rele Pòdpè. Li te gen chans leve andedan legliz e se la tou li te komanse
chante tou piti nan koral. Jean François tèmine ak etid klasik li nan lane 2015 nan "Lycée
Tertulien Gulbeau". Tout rev li se fè atis Pape Jhon li kreye an vinn youn nan pi gwo atis
peyi an. Yon rev li sou wout konkretize paske atis lan pa janm bouke travay aprè tout
mizik li gentan soti ak anpil gwo bout atis nan endistri mizikal ayisyen an.

Kote'w soti ak nom Pape John epi kilès ki Pape John?

Nan lane 2015, John te lanse premye mizik li e se aprè mizik sa tou anpil moun nan vil li
soti an ta pra'l komanse relel Pape paske fason li te depoze an fè anpil nan yo wè nan li
yon gran alò kom li te rele John li jis ajoute Pape lan ki vinn fè Pape John yon fason
pou'l remèsye fanatik li yo pou lanmou ak soutyen yo nan vil Pòdpè. Atis lan deja genyen
20 grenn mizik nan karyè mizikal li. Kidonk, ann pwofite site kek nan yo tankou; "Ou
lalala" li fè ak Big Jim Rock Fam, "Sanblan" ak K­Dilak, "Gen Badman la" ak Pikan epi Big
Jim boutonfen "M Santim Cool" li te gen chans fè an solo. Pou yon jèn ki pa entegre
mache mizikal lan lontan nou ka di Pape John pa yon atis parese tankou anpil lot e nap
pwofite voye yon gwo kout chapo bay TUF Production kap prodwi atis lan.

Kisa'w swete pou EspacejeunE?

Mwen swete nou kenbe red pa moli paske travay nap fè nan peyi an pozitif anpil.

Mèkredi 5 dawou, nap genyen atis Pape John kap vinn sou plato EspacejeunE lan pou
vinn pale ak prezantatè T­REGI. Kidonk, nou konnen anpil moun ta byen anvi konnen
kilès ki Pape John alò nou ba yo randevou pou mèkredi depi'l fè 8è nan lannwit.

28/07/2020

Kilès ki Jérome Steve Biko
Jérome Steve se yon jèn ki fè aparisyon li sou bout tè sa yon 13 Novanm nan vil Gonayiv. Li te gen chans fè etid primè li nan "Collège Henri de Navarre" epi li ta pral tèmine etid li nan "Collège Vanutelli Saint Georges".
Tankou tout jèn ki tal lekol Jérome Steve fè pati de jèn ki aprè etid klasik te vle rantre nan fakilte men koz esitiyasyon peyi an li oblije rete poze. Tout rev li se devni etnolog men tibilans politik ak kesyon kowonaviris lan fè l poko ka rive konkretize rev li.

Ki rev Jérome Steve Biko?
Se vre mwen vle devni yon etnolog men mwen reve vinn yonn nan pi gwo mayestro ki gen nan mond lan epi pou m yon referans nan sa ki gen pou wè de bit ak miksaj.

Kilès ki Biko Authentic?
Biko Authentic se yon jèn atis kap evolye nan endistri mizikal ayisyen an men li estab aktyelman nan vil Gonayiv. Li te komanse chante nan lane 2010 andedan legliz. Nan lane 2014, Biko Authentic ta pral lanse karyè atis li aprè li te finn sot patisipe nan "Star Ecolier" kote li te rive dezyèm. Sa pat pran anpil tan aprè poul te soti premye mizik solo li ki se "Fò n al lekol", yon mizik ki rakonte istwa de jèn ki lekol men se youn ki plis sousye paske paran li te pov e li te konnen poul rive se chimen lekol selman pou l pran. Lot lan li menm li te met espwa li sou kont dyaspora pandan li te inyore si mouche lanmò ka fwape tout pot nenpot kote w ye. Son mizik ki tradwi reyalite anpil jèn nan peyi an e nou ka di se te yon bel moso nan epok li te soti an e jis kounye a li rete yon mizik sosyal anpil jèn nan vil Gonayiv konnen. Aprè "Fò n al lekol" atis lan pat chome koz li te soti plizyè moso tankou; "Veye Hit mwen", yon mizik li te gen chans fè avek yon rapè Senma ki se Krispèk aprè sa li gen "Manmie Soso" ak "Y à danger" eksetera.

Ki rev Biko Authentic nan mizik?
M swete vinn yon modèl pou tout sak gen pou vini yo. Epi m swete gen yon karyè entènasyonal pou m ka kontinye fè fyète peyi m.

Kisa w panse de Espace jeune?
Se yon bel inisyativ kap pèmèt plis moun genyen plis enfomasyon sou atis yo. Menm si wout lan pa fasil m swete nou ret soude konsa nap fini pa konn gou siksè.

Mèkredi 29 Jiyè, n ap gen Biko Authentic sou plato EspacejeunE avek prezantatè T-REGI k ap gen pou diskite sou anpil bagay e nap tou pwofite fè fanatik show an konnen kiles ki Biko Authentic lan.

21/07/2020

Kilès ki Thermitus James Herdjy Lenso ?

Thermitus J. H. Lenso, se yon jèn gason ki pran nesans li andedan vil "Maurice Sixto" an yon 4 Oktòb. Jan anpil moun ka konstate'l, Ayiti se yonn nan peyi kote anpil jèn leve sèlman ak manman yo paske papa yo pa souvan prezan. Alò, Thermitus se yonn nan jèn ki leve ak manman li epi yon ti sè li san prezans papa li.

Pou sa ki gen pou wè ak etid primè li se nan "Institution Mixte Louisma Molière" li te fè tout ti klas yo epi li ta pral tèmine etid li nan lane 2018 nan kolèj "Jules S. Milscent". Anpil fwa, jèn isit toujou chaje ak gran rèv lè yo lekòl pou di kisa yo anvi vin ye demen ebyen Thermitus te fè pati de gwoup jèn sa yo. Sa ki te nan tèt li se te etidye syans politik poul wè kijan li te ka sèvi peyi'l men fason politisyen isit ap fonksyone fè'l chwazi abandone rèv li pou'l aprann yon lòt bagay. Sin ta ka repete D-FI nap di ak Thermitus James:" Si'w grandi san modèl chwazi devni yon modèl pou sa kap vini yo". Pa abandone rèv ou paske ou wè yon gwoup moun ou wè kap fè saw vle ye mal pou'w dekouraje.

Kilès kiMawozo Djy?

Mawozo Djy, se yon non ki kreye nan lane 2017. Non sa te vini paske Thermitus James te vle vin ak yon non kap fasil pou tout moun epi ki komèsya'l tou sitou nou konnen nan sosyete nou an mo Mawozo an souvan repete pou nèg ki djèdjè. Jan nou tout ka wè sa, non an rive mache vre paske kounye a anpil moun bliye non Thermitus James lan pou yo di Mawozo Djy epi gen moun ki pa konn Thermitus ki konn Mawozo Djy. Menm jan ak anpil jèn, Mawozo Djy gen pwòp platfòm li ki rele " Noisey People ". Se yon platfòm ki kreye pou fè pwomosyon epi andedan menm platfòm sa Mawozo Djy gen show ki rele " KiMoun Ou Ye? ". Se yon show ki sanse rive sou tout moun paske lap fè yon bon travay nan ede kominote a konnen plis jèn kap evolye nan yon domèn isi.

Kisaw panse de EspacejeunE ?

Daprè mwen, EspacejeunE se yonn nan bèl show ki genyen, se yon lòt fason pou dekouvri kèk pèsonaj ki gen non anpil moun pat gen anpil enfòmasyon sou yo. Mwen swete estaf EspacejeunE lan kontinye fè bèl travay sa epi pou yo kontinye.

mercredi 22 jiyē , Mawozo Djy ap sou plato EspacejeunE ak prezantatè T-REGI pou'l vin di piblik lan èske li Mawozo tout bon oubyen se yon mwayen lap itilize pou'l ka mennen plis moun nan bak li.

10/06/2020

Kilès ki Dougenie Yamilee Jeudy oubyen Yamskween ?

Dougenie Yamilee Jeudy, se yon jèn fi ki fèt nan site Lumane Casimir an yon 11 Desanm. Li se premye nan yon fanmi ki gen 4 timoun. Nap raple Dougenie se yon jimèl. Li fè etid primè li kay Adler, pou kounya li nan klas tèminal nan "Collège la Rédemption". Menm jan ak anpil jèn, li gen rèv rantre nan yon inivèsite apre etid klasik li pou l al etidye. Se diplomasi ki plis entèrese l. Mete sou sa, Dougenie se yon jèn ki renmen dans anpil epi li swete vin yon gran dansè nan kèk lane k ap gen pou vini. Nan lane 2015, tou jèn li te rantre nan mannkina. Li gen pou non atis Yamskween.

Kilès ki Yamskween ?

Yamskween se yon pèsonaj ki soti andedan non Yamilee. Se yon non komèsyal li ye pou li paske sou tout rezo sosyal yo se li li afiche. Yamskween te gen chans patisipe nan anpil aktivite ki te fèt nan Site endepandans lan tankou Fashion Show nan lane 2017 ak konkou estil Medoostore nan lane 2020 an. Anpil moun ap kesyone l pou konnen poukisa l ap evolye nan domèn lan san ajans. Alò, li chwazi evolye konsa nan lane 2017 paske lè li te kòmanse nan ajans li te ye an yo te plis konn itilize l olye yo ede l. Kidonk, sa ta pra l pouse l evolye sèl. Malgre l ap evolye san ajans sa pa anpeche li travay anpil paske pou kounya li difisil pouw pale de yon mannken pou w pa site non Yamskween. Soti 2016 pou rive nan lane 2018 li te fè pati jèn mannken nan vil Gonayiv ki te gen plis popilarite. Pou kounya, l ap evolye sou IG, sa deja ede l jwenn kèk kontra ki pèmèt li ka kòmanse rekonpanse tèt li pou tout sakrifis li te konn ap fè yo. Selon Yamskween tout rèv li nan mannkina se travay nan respè tèt li ak lanmou li gen pou metye an pou l ka rive kote li vle an. Anplis de sa li vle pami sa non yo fè plis eko nan peyi an.

Ki enpresyon ou genyen de show EspacejeunE lan?

Selon mwen, m panse n ap fè yon gwo travay nan vil Gonayiv epi tou vil lan te bezwen aktivite sa yo paske sa ap ede n konnen plis yon pakèt jèn nan peyi an. Kidonk m ap swete nou siksè nan travay lan epi kenbe fè m.

Mèkredi kap 11 Jen an se ap yon plezi pou nou nan EspacejeunE pou n pataje ak piblik lan kèk ti detay sou kilès ki Dougenie Yamilee Jeudy an oubyen Yamskween. Alò si w ta renmen pozel yon kesyon n ap jis envitew pataje nimewo WhatsApp ou ak nou pou w ka swiv show moman ki prezante pa T-REGI.

03/06/2020

Kilès ki Johnkee Lebrun oubyen KYKY KAYP?

Johnkee Lebrun, son jèn gason ki pran nesans li nan Site endepandans lan yon 20 jiyè. Grandi nan yon fanmi ki gen twa(3) pitit kote se li menm ki premye. Johnkee te gen chans fè etid primè li nan École Notre dame de la Visitation epi etid segondè li nan Collège Faustin 1er kote'l te gen chans finil nan lane 2019. Depi'l tou piti tout rèv li se te antre nan yon fakilte medsin poul te ka etidye La medsin, men jan granmoun toujou dil la, laj mennen larezon, Johnkee te deside abandone rèv sa paske li wè'l pra'l fè twòp tan e sal swete reyalize yo ap pran twòp tan. Alò, li deside antre nan yon inivèsite nan vil Gonayiv ki rele Universidad Centro Technologia Del Caraïbe kote'l ap etidye Kontabilite e li nan premye ane.

Eske si'n kontinye pale'w de Johnkee Lebrun w ap konn kiyès si w pat kanmarad klas li? Kòm nou menm nan EspacejeunE nou la pou n fèw konnen doub fas jèn yo, kidonk nou pra'l pale w de pèsonaj Johnkee kreye an ki se KYKY KAYP.

Kiyès ki KYKY KAYP?

KYKY KAYP son pèsonaj Johnkee kreye poul kapab reyalize yon pakèt bagay nan vil la e se non komèsyal li tou. KYKY soti nan Johnkee e KAYP la vle di KONNEN ATIS YO PLIS ki se yon show ki fèt sou rezo sosyal yo pou ede sosyete nap evolye a gon ide de atis li yo. KAYP kreye nan lane 2019 e nan menm ane sa KYKY KAYP ta pra'l pran sou zepòl li yon jèn Dj ki selon li menm gen anpil talan, men ki pa jwenn ankadreman ki rele DJ Hurricane. Se vre li jèn men foug li ak detèminasyon li fèl vize pi wo nivo a pou gwo Show sa li met sou pye a e'l kwè depi tout bagay ap byen mache pou li se plis lap ede jèn parèy li ki gen kapasite nan yon domèn.

Kisa'w panse de EspacejeunE?
M panse EspaceJeune ap fè yon travay pozitif nan vil la, ede jèn yo pran plezi yo ak ede moun konn lòt pi plis. An gwo, travay la pozitif. Kidonk, m swete nou kenbe menm liy lan poun kontinye frape rèd rèd.

Jodi mèkredi 3 Jen an se ap yon plezi poun fè piblik EspacejeunE nan fè konesans ak envite nou an ki se KYKY KAYP oubyen Johnkee Lebrun. Nan jou sa, w ap gen chans konn plis de li pandan w ap ka pozel nenpòt kesyon ou vle. Pou w kontinye konn jèn ki chaje talan yo, pwofite swiv show EspacejeunE nan pouw ka gon ide de jèn kap evolye nan yon domèn kelkonk nan sosyete an.

29/05/2020

Kiyès ki Voltaire LORIENT oubyen Prince VOLTAIRE?

Voltaire LORIENT son jèn gason ki ta pra'l fè aparisyon li sou latè yon 8 Oktòb nan yon zòn ki rele Osous nan ti Dedinn. Lèl gen 2 lane, paran li te deside vin rete ak li nan vil Gonayiv. Depi lè sa, li pa janm retounen ankò. Voltaire te gen chans fè klas primè li nan yon lekòl ki rele École Mixte Évangélique d'Haïti e aprè li ta pra'l fè mwatye nan klas segondè li nan Lise Jefwa epi'l te rive fini ak etid klasik li nan kolèj Faustin 1er nan lane 2017. Touswit aprè filo, Voltaire te deside antre nan EDSEG(Lekòl Dwa Gonayiv la) kote li ta pra'l etidye syans jiridik. Pou jounen jodi a, li nan twazyèm ane ladan l. Fòk nou di tou, Voltaire pa sèlman yon etidyan nan syans jiridik, men li son pasyone de Latizay e'l gen entansyon kreye yon atelye atizay.

Tout rèv li se pou'l te devni avoka oubyen diplomat paske se nan sa yo li te wè tèt li, men nan lane 2019, vil Gonayiv ta pra'l fè konesans ak yon jèn talan ki se Prince VOLTAIRE. Alòs, kiyès ki Prince VOLTAIRE?
Gen moun ki rele'l patriyòt paske premye mizik ki debite karyè li se Yon Patriyòt men nou menm nou kontinye ap rele'l Prince Voltaire paske, nan tèks li, nou jwenn li diferan de anpil atis ki antre nan mouvman rap la. Prince Voltaire son patriyòt kap panse pou peyi'l ak tout fanatik li yo se sak fè aprè Yon Patriyòt li te kontinye travay pou fè melomàn yo plezi ak yon moso ki gen pou Tit Oblije kote'l te gen chans envite yon jèn talan lap bay bourad ki rele Baby Céline. Nan mizik sila , Oblije, Prince Voltaire chwazi dekri reyalite peyi a ki pa bay posibilite pou paran fè edikasyon pitit yo pandan li pwofite denonse kèk bagay li twouve ki pa ta sipoze fèt e li wè kap fèt. Answit, li ta pra'l soti Mon Souhait, son moso mizik atis la te chwazi ekri pou pote konsèy ak kèk jèn ki panse lè yo kite ak yon moun tout sak enpòtan pou yo se wè moun sa ap mal viv, men pou atis la li pa konsa paske li vle pou moun sa viv byen ak kontinye viv nan lajwa ak moun ki vinn nan vi'l la. Apre, li ta pra'l soti Le K.O e kounye a lap travay sou yon moso ki gen pou tit Tanizya. Pou yon jèn ki lanse karyè li nan kòmansman lane 2019 la, nou ka di atis la pwodiktif anpil paske li gentan gen plizyè mizik ki deja sou mache mizikal ayisyen an.

Dimanche Prince VOLTAIRE ap nan EspacejeunE, alòs kisa'w panse de show EspacejeunE nan?
Son inisyativ oze e ki bèl anpil sèlman map swete nou elaji kad la ak eseye bat pou'n inove pandan nap pouse pou pi douvan.

Jodi a se Prince VOLTAIRE ou dekouvri, men demen ou ka gen chans dekouvri yon lòt ankò paske nou menm nan EspacejeunE nou la pou'n fè piblik la fè konesans ak tout jèn ki gen talan kap evolye nan yon domèn ki kapab itil kominote a. Dimanche 31 me se ap yon sèl randevou depi'l fè 8è nan aswè ak envite nou Prince VOLTAIRE epi prezantatè nou ki se T-REGI.

20/05/2020

Kilès ki Jemsly Raymond oubyen Dj Zadd?

Jemsly Raymond son jèn gason ki ta pra'l fè aparisyon li sou latè yon twa (3) mas. Grandi nan yon fanmi ki gen twa (3) timoun bò manman e li chaje ak frè ak sè bò papa li. Li pat gen chans leve ak manman li paske manman li pa ayiti, men li te gen chans leve nan men yon matant ki te pran swen li tankou se pwòp pitit gason li. Li fè etid primè li nan lekòl Eben Ezer, se nan menm lekòl sa li te gen chans fini ak etid klasik li nan lane 2017. Touswit aprè, li te monte nan kapital peyi an pou'l te ka al fè yon etid inivèsitè e se la li ta pra'l antre UNIKA pou'l tal etidye kominikasyon e li nan twazyèm ane nan sa'l ye an. A prezan lap viv ak yon gran frè li bò papa nan kapital peyi an.

Lane 2016 se youn nan lane ki fèn fè konesans ak anpil jèn talan e se ta pra'l menm ane sa vil Gonayiv ta pra'l bay nesans ak yon gwo bout Dj ki pasyone anpil de sa'l ap fè a e ki pa bay lajan priyorite nan vi'l paske li gon rèv pou'l konkretize, rèv sa se wè li vin yon Dj nasyonal pou'n pa di entènasyonal tankou anpil Dj lòt peyi. DJ sa reponn sou non se DJ Zadd. Ki kote non Zadd la soti?
se kesyon anpil moun ap poze, men kite m di'w non sa son non yon moun ki te enpòtan nan vi'm te deside mwen jis paske li te vle rele m diferan de tout lòt moun ki te gen chans konnen'm sou non Jems oubyen Jemsly tou. Alò, se konsa mwen ta pra'l tou kenbe non sa pou'm te lanse'm paske m te twouve non an komèsyal pou mwen. Zadd pwofite di mèsi ak moun sa ki te ba'l gwo non sa e voye yon gran salitasyon pou moun ki nan vi'l kounye a. 21 Jiyè 2019, Zadd te gen chans jwe avèk kèk atis ki gen non nan endistri mizik ayisyen an tankou: Steeve J Bryan, Kolonel Freez ak Dj Winner nan lakou Pòtoprens. Selon li, sa se te jis yon pa sou wout siksè li paske li toujou kontinye ap aprann de chak grenn moun nan mouvman Dj an pou'l kapab rive pèfeksyone travay li plis.

Kisa EspacejeunE vle di pou ou Dj Zadd?

M renmen inisyativ sa, se yon bèl show ki pèmèt nou konnen ak aprann plis bagay de kèk moun ou konn abitye tande pale de li nan sosyete a. E prezans mwen nan show EspacejeunE nan montre'm non sa map fè a gen valè e anviwònman map evolye a gen bagay pozitif kontrèman ak sa anpil moun konn ap di.
Answit, li fè m anvi travay plis toujou pou'm pa pase konfyans piblik kap swiv mwen ak kwè nan talan m genyen an anba pye. Boutofen, m'swete estaf EspacejeunE lan kenbe la pa lage paske yap fon gwo travay nan vil lan.

EspacejeunE toujou kontan chak fwa li fè piblik lan fè konesans ak yon jèn kap evolye nan yon domèn nan sosyete a, lap pwofite di demen mèkredi 20 me a nap gen Dj Zadd avèk nou ki pra'l ede fanatik yo konn kiyès li ye plis.

18/05/2020

-Regi Espace Jeune Show Te pase nan konnen atis yo plis pou jodi a ou menm kouri klike la pouw gade kijan sa te ye KAYP👉🏻Tel:4218-7117👇🏻👇🏻👇🏻👇🏻👇🏻

https://m.facebook.com/story.php?story_fbid=605009823441614&id=359695654639700

Se toujour yon plezi lè konnen atis yo plis ap pèmèt ou konnen plis de atis lakay ou yo se pou rezon sa aswè a nou genyen avek nou *T-Regi Jeune show*

Ki bon non T-Regi???
Réginald Petit-Homme

Kilèw fèt et kibò?
1er novembre 199. (Gonaives )

Ou te lekol Kibò?
M'te lekol Lise Jefwa

T-Regi entegre nan mouvman sa depi kile?
14 fev 2020

Poukiw kreye Espace Jeune show
Mwen kreye EspacejeunE nan lide pou'n fè jèn ki aktif sou WhatsApp yo konnen byen, anpil jèn ka evolye nan yon domèn kelkonk nan sosyete an.

Apres show a kisa T-Regi fe anko
Mwen se etidyan an Dwa e'm se Designer tou

Eske gen kont ant ou menm ak lot medya yo
Mwen se moun tout moun sa vle di'm pa konn gen kont ak moun alevwa poum ta gen kont ak medya.

Pouki T-Regi pasyone de Model yo konsa?
M'pa selman pasyone de modèl se de fanm m'pasyone menm. M selman renmen ankouraje yon paket nan yo pou vizyon yo ak devouman yo.

Enfomasyon fè nou Konnen ke T-Regi gen relasyon santimantale avèk Deese Solena konfime sa pou nou
Déesse Solena se moun pam relasyon m'gen ak li se jis relasyon amikal.

Tag 3 model nan vil gonayiv


Anpil medam fè konnen ou se yon neg ki brize kè poukiw fe sa?
M'pa konn fè moun mal sa ka rive'm ak yon moun sa paka mache olye'm fè'l soufri chak jou'm jis dil ke'n pap ka kontinye pou limite dega. Alò si se konsa medam yo ka di sa yo vle men pou mwen se pa brize okontrè m'souvan sensè ak yo.

Selon Tripotay Gonaives Promo Espace Jeune patisipe nan anpil krèy nan vil lan si oui konfime si non Demanti
Mwen ak EspacejeunE se de mond diferan e'm pa raplem ke'm patisipe nan Krèy alevwa pou EspacejeunE

Ki pi gwo probleme T-Regi gen ak neg gonayiv yo?
Tout nēg Gonaives Se frēm
M'pa gen problème ak yo men Mpa konn si yo gen Avem

Dekri espace Jeune show nan 3 mo
Show WhatsApp moman

Voye yon mesaj pou Noisey People
M swete'w kontinye konsa bro e sa wap fe an ap pemet plis moun konn jèn peyi nou yo. Epi pa janm bliye sa bro fete lèw Genyen fè Pouchòp lèw pèdi!! G5

Facebook : KONNEN ATIS YO PLIS
Instagram : KONNEN ATIS YO PLIS
Tél :4218-7117
KAYP

13/05/2020

Kiyès ki Dawoonah Pierre oubyen Chichie?

29 Septanm, jou fèt Sen Michel, Sen Gabriel ak Sen Raphaël, se jou sa tou Dawoonah Pierre ta pra'l parèt sou bout tè sa. Jenn fanm sila grandi nan yon fanmi ki gen de timoun: yon gason ak yon fanm. Dawoonah grandi avèk manman li se sa ki ta pra'l fè'l pran manman'l kòm modèl paske aprè lanmò papa'l, se manman li kite fi ak gason pou ba yo moso pen ledikasyon. Li te gen chans frekante yon lekòl nan vil Gonayiv ki rele "Sacré Cœur", yon lekòl anpil moun konnen sou non Madame Dufort. Aprè etid primè li, paran'l te mete'l nan CIC. Pou konnya, li nan klas filo nan lekòl sila.

Jounen jodi a, anpil moun ap poze kesyon pou yo konnen kiyès Ki Millie Chie? Alòs kite'm di'n Millie Chie son antrepriz Dawoonah kreye nan lane 2018 nan lide pou itil kominote Gonayivyèn lan nan sa ki gen pou wè ak "Make up". Millie Chie gen yon estaf 8 moun kap dirije'l. Gen nan yo ki la pou anbeli bote'w men tou gen nan yo ki la pou fotografye travay lan pandan gon lòt pati ki la pou sipèvize travay lan. Selon kek kliyan Millie Chie se referans lan paske yo bay bon sèvis e tout pèsonèl kap travay andedan Millie Chie toujou pran swen tout kliyan paske pou yo san kliyan pagen biznis. An gwo, nou ka di se yon gwo ekip serye ki deside pote touch yo nan vil la. Se vre yo jèn men sa pa anpeche yo vize lwen tankou nan lanse pwòp liy kosmestik yo ak enplante yon lekòl bote pou ka bay plis jèn tankou yo opòtinite pou travay.

Se toujou yon plezi pou nou EspacejeunE chak fwa nou ride gran piblik lan fè konesans ak envite nou yo e si yon moun ta bezwen yon andwa nan vil Gonayiv pou'l jwenn yon travay ki pwofesyonèl nan sa ki gen pou wè ak makiyaj, nou ap sèlman refere ou ak Millie Chie ki sitye nan Ri Jan Jak tou kole lekò Shekina. An plis, nap di ak tout moun ki ta anvi konn plis de Dawoonah oubyen Chichie pa ezite vinn swiv show EspacejeunE lan jou kap mèkredi 13 me an.

05/05/2020

Kiles ki Andy Saint-Fleur?

Andy se yon jèn ki pran nesans li nan vil Gonayiv yon 3 Jen. Li se denye pitit nan yon fanmi ki gen 4 pitit. Pou sa ki gen a wè ak etid li Andy te gen chans fè etid primè li kay frè(Cyr-guillot) e li ta pral fini nan kolèj Penyèl nan lane 2017. Touswit aprè filo paran li ta pral fè l rantre nan UNDH kote li ta pral lanse li nan Administrasyon e san pran tan li ta pral fini pa konprann se yon erè lap fè nan etidye yon bagay li pa renmen.
Nan fen lane 2017 pou rive lane 2018, Andy ta pral paret nan yon rejis kote anpil jèn ye kise kameraman. San pran tan detèminasyon li ak disiplin li te kontre kòn pou ede l jwenn yon plas nan vil Gonayiv. Andy pat pran anpil tan poul te kreye yon pwodiksyon ki pot non l ki se AndyProdz, yon pwodiksyon ki sanse gen 2 lane e ki gen 5 moun ki fòme li kote gen 4 gason yon fi. Selon Andy pi meyè fason yon moun ka rive nan vi an se travay an ekip e se nan lojik sa li te oblije mete ak 4 lot jèn detèmine parey li pou fonde Andy Prodz. Jodi a nan vil Gonayiv Andy Prodz se yon referans paske travay li yo pale pou li epi ankò yon pakèt moun temwanye de respè ak pwofesyonalis chak grenn manm nan Andy Prodz genyen pou moun ki souvan pran sèvis nan Pwodiksyon an.
Sou demand anpil moun ki konn abitye swiv show EspacejeunE lan yo mande nou poun fè Andy vinn sou plato an. Alò ekip EspacejeunE lan te pran kontak ak li jis avan li paret sou plato an pou yo ka pataje ak piblik lan kiles ki Andy Saint-Fleur an. Kidonk si w ta anvi konet li plis pa ezite vinn swiv show EspacejeunE lan jou kap mèkredi 6 me an.