15/04/2021
Ayiti sou Anbago!
Daprè listwa nou konnen plizyè anbago ekonomik. Anbago sila yo anpeche nou enpote ak ekspote pwodui nou yo. Men souvan se yon sanksyon pou fose peyi an tounen sou kèk desizyon ki pa nan avantaj kominote entènasyonal la. Sitiyasyon anbago sa yo toujou gen gwo konsekans sou ekonomi nou ak mòd vi nou. Jodia se vre yo pa bay nou yon anbago nan pò ak ayewopò nou yo. Men fwa sa nou gen anbago anndan pwòp peyi nou an. Nou viktim Anbago sosyal, ekonomik ak politik.
Anbago sosyal la se lè yo anpeche nou fonksyone nan chwazi mete gang sèl kòk chante nan tout katye popilè pou kreye twoub ak laperèz. Fasilite plis chomaj, grangou ak fuit majorite entelektyèl nou yo. Anpeche lekol fonksyone, efase tout lwazi pou jèn. Nou pèdi idantite n kòm moun.
Anbago ekonomik lan se lè yo anpeche n pwodui pwòp manje n pandan tè nou ase rich poun te sipann enpòte pwodui premyè nesesite yo lakay blan (diri, pwa, mayi, s*k, viv, elatiye..).
Anbago politik lan se lè yo inyore dwa n genyen poun chwazi moun nou vle dirije n. Chwa yo toujou fèt nan plas nou kit nou te vote ou non.
Pito yo bay nou anbago nan pò ak ayewopò n yo konsa nou va manje sa n gen lakay nou yo olye nou jwenn anbago anndan pwòp peyi nou kote n oblije swa mouri ak grangou oswa pati kite sa.
Dr Herode VARIN, MD
