我係小編

Home
我係小編

我係小編同大家分享及討論最新Digital Marketing及Social Media資訊，分享各小編實戰貼士，還是教學書「第一次做小編就上手」的作者！

03/02/2025

#小編筆記：IG新版砌Grid💯%成功實戰！
今日大年初五祝小編們開工大吉🧧，事事順利！Instagram Profile 轉做長方相令所有砌 Grid 相一夜變哂，就算用 Adjust Preview 方法都只不過夾硬變做正方但 Grid 比例同 Post 比例唔同可點砌？我哋度好試好長相都可砌 Grid 駁圖，詳情睇 Post 圖教你點對位。
🌟砌Grid計算：新版 Profile 相片同4:5比例1080x1350px 唔同，亦唔係3:4（差啲啲），如根據1350px高度按比例放大新版相片尺寸係1012x1350px，比1080px窄68px，亦即4:5比例圖片喺 Profile 顯示時左右兩邊會被裁走各34px，呢個數字係砌 Profile 相嘅關鍵！例如要左中右三個 Post 駁做長相，準備圖片時要計算好Profile 顯示闊度1012x3+2x34=3104。點解3104px?以下會逐一解釋及每張圖應該點裁先啱。
1️⃣第一張圖：3104px最左手面闊1080px嘅部分切出做第一張圖，留意返最左嘅34px只會出現喺 Post 而唔會顯示喺 Profile 入面，當做出血位唔好將重要內容放到咁邊。
2️⃣第二張圖：將長圖左手邊嘅1012px切走後將最左手邊闊1080px的部分切出 Save 做第二張圖，留心睇第二張圖同第一張圖有重疊嘅地方，但就係因為有重疊先可以喺 Profile 駁得返張圖。
3️⃣第三張圖：將裁後長圖（2092px）最右邊嘅1080px切出嚟，留意返最右嘅34px只會出現喺 Post 而唔會顯示喺 Profile 入面，當做出血位唔好將重要內容放到咁邊。
4️⃣5️⃣6️⃣砌6格Grid：如要駁6格就要做張3104x2700px(高1350p x2)嘅圖，再上下分開切就可以，因高度冇重疊所以唔使留出血位。
請多一次其實我哋唔建議大家砌 Grid 因為唔多人會入 Profile 睇，酬單一 Post 又會古古怪怪，但見到咁多小編仲被要求砌 Grid 所以度好位方便大家，記得支持呢個 Post 呀！

#我係小編

02/02/2025

#小編隨噏：🧧賀年WhatsApp貼紙數據及成效
大年初五小編們開工未呢？㊗️大家身體健康·心想事成。每逢過時過節都會喺 WhatsApp 收到好多節日或 Campaign 貼紙，惡攪同Memes貼紙當然好多人用但品牌出嘅貼紙成效又如何呢？根據 Whatsticker.online 於年初四（2025年2月1日）嘅熱門排名同2025年各銀行嘅賀年貼紙人氣度做參考，好多品牌都有推出賀年貼紙但就唔係個個都咁高人氣，以下分享少少心得希望可幫到大家做 WhatsApp 貼紙有更好嘅成效。
1️⃣行業因素：想貼紙多人用先要俾人見/知道你有貼紙，你嘅業務有冇成日同客戶 WhatsApp 溝通？服務性/個人化及經常要同客戶私訊嘅行業會比較有效，例如金融及保險業嘅 RM 或 Agent 會主動接觸客戶令貼紙曝光率及使用量大增。
2️⃣貼紙元素：用 WhatsApp 貼紙最緊要靚得嚟又有意思，以靚行先加上設計得意意思易明就最好，反而品牌元素唔需要咁多，要有但唔係重點（Logo 細啲啲）。
3️⃣Crossover：聯乘其他 IP/KOL 更有號召力，好多品牌本身冇一個形象代嘅角色或元素（Logo 都唔係個俾玩），如果 Crossover 其他 IP 角色會較易吸引下載。
4️⃣真實情景主題：加入真實情景做主題會比罐頭式恭賀說話實用同貼地，個個恭喜發財所以要諗諗專門或深入啲嘅字句。
5️⃣強制性使用：大大力鼓勵公司同事用！但千祈唔好迫到有關公災難，我都唔想喺連登見到大家。
如有做開 WhatsApp 貼紙嘅小編可以分享下心得或經驗，最後想預告我哋已搵到 Instagram Profile 長版砌 Grid 方法，唔會爛 Post 仲要靚仔，呢個星期會出分享大家敬請留意！

#我係小編

20/01/2025

#小編筆記：IG砌Grid 末日！變哂長方點算好😭
上年有傳 Instagram Profile 顯示 Post Thumbnail 會由正方形改做長方形，上星期好多 Acc 突發被轉做長方，令出開正方 Post 嘅 Profile 排版「不似預期」，正方圖會 Zoom in 顯示令圖中文字有機會被裁走。咁以後係咪出4:5 1080x1350 嘅圖做 Post 就冇事？以下同大家仔細度度同睇睇係咪咁簡單。
1️⃣4:5 長方圖效果
我哋早1-2年就開始用4:5 1080x1350出圖，Profile 改咗版都貌似可完全乎合新顯示比例，但放大發現左右都有少少裁走，放大返 Thumbnail 同原圖對比左右兩邊各有30 px被飛走，Thumbnail 顯示唔係太覺但如果用4:5比例就要預留左右兩邊出血位唔好放重要嘢喺兩邊。
2️⃣用Profile比例出Post
如4:5 Profile都被裁咁用 Profile 顯示嘅比例呢？放大去度以闊度為1080長度大約係1460，就試張1080x1460但發現又太長 Timeline 上顯示上下各有30多px會被裁，度極都冇一個比例可完美顯示，建議大家用4:5 1080x1350但留左右兩邊30px做出血。
3️⃣還我正方顯示
Instagram 可以俾大家可以喺長方之中用返Fit 原圖嘅比例顯示，雖然上下/左右會有黑色/白色 Bar 但起碼可以完全顯示內容，只要去 Post 右上嘅3點打開選單，再揀 Adjust preview 入到去揀 Fit 就會用返原圖顯示，唔乎合 Profile 長方比例嘅可揀用黑色或白色代替，唯一問題係要人肉每張做有啲浪費時間，同埋有啲 Post 如 Carousel 暫時都未成功 Save 到所以都唔好抱咁大期望。
4️⃣Acc 長方睇所有嘢都係長方
我哋咪分別用已被改成長方及仲係正方 Profile 嘅 Acc 試改/睇各大品牌嘅受影響程度，發現原來你 Acc 已轉長方所睇嘅其他 Acc 都會係長方，反之仲係正方就睇咩都仲係正方，所以要滿足哂所有人有啲困難，我哋建議舊正方 Post 就用 Adjust preview 改做 Fit，新 Post 就如1️⃣所講嘅4:5 1080x1350。
上年太多嘢忙希望今年出返多啲有用嘅分享俾大家，如有嘢想傾想夾歡迎 WhatsApp 傾傾，我哋做好多分享、Training 同教學ga😘。
#如大家發現有新玩法可交流下

#我係小編

14/11/2024

#小編新聞：Threads 明年有得落廣告🎉？
根據《The Information》報導，Threads 可能最快出年就會有得落廣告，Threads 預計一月開始俾少數廣告商製作同落廣告。其實 IG 負責人 Adam Mosseri 幾個月前都確認 Meta 「絕對」要計劃 Threads 落廣告，Meta 點會咁著數 Free 個平台俾大家玩仲要出咁多人力物力去攪？尤其過去三個月 Meta 的廣告帶嚟 398 億美金收入，佔總收入的 97%，加上 Threads 係一個有2.75億人用緊嘅平台有廣告都好正常。不過如果有廣告會唔會影響到 Threads 嘅生態？大家都見 Meta 啲 Ad 古古怪怪咩廣告都有，如果把關得唔好易攪死個台，眼見 Twitter(X) 已去到無王管嘅地步就知。
好多有開 IG 嘅品牌已有玩 Threads，係 Threads 嘅內容比 Facebook 同 Instagram 更人性化，好多小編都「做自己」用小編及打工仔角度出 Post 更易吸引到大眾關注，大家有冇同客做緊 Threads 啦？定努力搵緊港漂KOL探店同做緊管理小紅書嘅打工人呢？
#網上資料

#我係小編

15/10/2024

#小編隨噏：實惠疑似「執笠」事件😱
尋晚各大 Group 同 FB/IG/Threads 都分享實惠疑似「執笠」Post 以8個字「多謝各位多年支持」而冇下文解釋咩事，經過大家一輪集體回憶、唏噓同終於佢都做唔住之後今早出Post原來係新減價 Campaign「告別舊原價，迎接「突破新價」」。第一個反應係「嘩！乜咁玩法！」，所以出個 Post 講講呢件事！最新發展：友台IKEA有回應。
實惠個品牌唔算細，要抽水搶曝光行為都應該有衡量過風險，每個部門都要精心配合，實惠今次狼來了冇錯成功食到「執笠」呢個 Hot Topic，但暫時眼見配套不足，可睇睇分析同建議：
1️⃣品牌形象：
實惠喺我心目中形象係大眾化，但華人社會玩「執笠」始終唔係咁「老黎」，如果業績唔好要盡地一煲，呢次短暫性陣亡未必可以會帶來銷售上升，反而造成品牌誠信疑惑，除非有極大嘅改動或品牌重生，否則都好難講得通用疑似「執笠」去Sell 新價而贏得業績，狼來了用得一次一唔可用第二次，如果係新形象全改舊公司名、Logo、網站一步步去帶出公司嘅重大轉變會更啱但而家有啲過火。
2️⃣客戶服務：
過去幾日喺實惠買咗傢俬等送貨同其他需要售後服務嘅客戶一定會打爆客戶服務熱線或爆 Inbox，我有一刻諗過可能佢有 Set 定個 Auto Reply（Chatbot 公司請 Sell 佢哋）同大家推介返係「突破新價」呢？上實惠用訊息查詢暫時未有自動回覆關於呢個新價 Campaign，似乎未有周詳考慮配套同後果。
3️⃣抽水反被抽：
友台 IKEA 個多鐘頭之前出咗抽水 Post，強調唔會玩「死」去表明自己更識得玩，如果實惠有另一手牌預備同 IKEA 玩落去有機會做到雙贏，但暫時見實惠「補鑊式」去 IKEA 抽水 Post 留言不如一齊玩減價秒間高下立見，如真係有計劃兩個品牌夾定咁玩，實惠似衝得太前令自己更難返身，各方面都係一面倒俾位對家入。
實惠出咗呢個 Post 證明想盡地一煲，雖然唔知有幾多客 Buy 呢次「突破新價」，但暫時睇落去係弊多於利，成功得到大量群組分享佢個Post但似乎「玩大咗」，反觀 IKEA 慢慢先抽先係贏家。雖然實惠抽到過咗火，但我好欣賞實惠呢次嘅勇氣，只不過要多少少考慮，加油呀！上嚟報過平安啦。
雙方嘅原Post Link係留言大家可去睇睇。
其實我咁耐都冇出post，差啲要多謝各位支持嗰個係我🙃

#我係小編

19/07/2024

#小編隨噏：Friday Blue - 國際藍畫面日💻🟦
今日Windows 國際藍畫面日，唔單止影響喺機場返鄉下嘅港人，令世界各地交通、銀行同商業活動受到影響，Don Don Donki連POS都用唔到。同朋友同事講開即刻分成兩派，第一派不嬲都唔支持AI，話有AI又點？唔係有用Copilot debug咩（笑咗）？點解救佢唔到？另一邊就覺得GenAI係萬能聖藥，話就係冇用AI幫手所以攪咪出事囉。兩邊都好極端同唔係好認清件事係咪AI可以預防到，遲下再講講公司同同事嘅GenAI趣事。

我反而想睇對家/同業會唔會出嚟抽水😂同埋咁大單嘢會點賠償呢？大部分MSA都講到自己99%運作正常，出事都有賠償上限，但呢次應該冇得走留名睇點收科。
#國際藍畫面日
#我係小編

18/07/2024

#小編筆記: Reels影片教學全集 - 30多個實戰技巧x例子
成日收到問關於Reels嘅問題，今次由統計數據、技巧同例子一次同大家分享，詳細內容喺晒圖入面，Feed字會List返咁多個Point俾大家方便閱讀。希望新手老手都有所得益，以下係Reels影片教學全集嘅內容主題：
1️⃣Reels小小大數據：一齊睇下Reels有幾多人用同幾犀利。
2️⃣尺吋大小安全範圍：1080x1920px有咩好處？
3️⃣影片長度：支援最長90秒，有俾建議大家應該做幾長。
4️⃣用Reels說故事：點解要做有故事性嘅Reels？
5️⃣影片內容分佈：Reels嘅內容點鋪排。
6️⃣有樣有人味：據統計顯示有人樣嘅Reels CTR成效較好。
7️⃣影片內容標題：影片標題十分重要，仲有方法快捷後加標題。
8️⃣出Reels頻率：一星期出幾多條Reels好？
9️⃣音樂及聲效：加聲怕唔怕啲人Mute咗聽唔到浪費心機？
🔟影片模板及音樂：用Template Layout同音樂方便又快捷。
1️⃣1️⃣Reels互動貼紙：Reels好似Stories咁可用互動貼紙啦！
1️⃣2️⃣-2️⃣1️⃣10個Reels內容點子。
2️⃣2️⃣-2️⃣9️⃣8個Reels過場及拍攝手法。
3️⃣0️⃣-3️⃣3️⃣4個Reels實戰品牌例子。
鐘意嘅麻煩大家CLSS(Comment, Like, Share & Save)，謝謝支持！

#我係小編

27/05/2024

#小編想當年：Pitching⚡️Pottermore🪄

新嚟嘅Intern好有興趣知大家遇過嘅工作趣事，上星期飲嘢同佢分享咗當年Pitching嘅經驗。喺英國有幸參與Pottermore(Wizarding World前身)嘅Pitch - 一個整合所有Harry Potter(下稱HP)資訊、粉絲討論同產品嘅官方網站，一個滿足所有HP迷嘅官方頻道，Scale好大所以拆做好多部分由3-4個部門負責，當年由Senior帶住做Art Direction、諗新功能同Demo，Overall大橋由之後有份做倫敦奧運Branding同事負責，來來回回玩咗3個幾月，去到Final Pitch大家都覺得準備充足嘅情況之下輸咗😥，輸在「唔夠死忠！唔夠愛！唔夠真！」。

Present當日所有人都打份過先出發，著住霍格華茲校服，手持Wand，ECD膊頭有隻假嘅白貓頭鷹，先嚟一句現形咒(Aparecium)打開序幕，過程流暢冇冷場又多互動，諗住十拿九穩，公佈輸Pitch大家都好驚訝輸咗啲乜？問返個客知道贏嗰間係PR底公司，當日派個Intern做主將，佢有Drama底加埋係瘋狂嘅HP迷，帶埋本睇到溶溶爛爛有羅琳簽名嘅書用5分鐘講身為粉絲有幾開心可參與呢個Pitch，再以忠粉角度講Pottermore應有嘅原素，冇互動Demo得Mockup，全程靠Intern精彩真人演出成功打動金主，最後仲可自肥同JK羅琳瘋狂對話。

輸係唔抵但輸俾個死忠粉絲真係冇計，但對家知道硬碰硬冇勝算不如搏一搏點知俾佢扑中，之後另一場合見返忠粉intern佢講當年其實好興奮，Present嗰陣不斷輸出甚至冇跟Script因都打定輸數倒不如將自嘅感覺講哂出嚟，佢當然係win-win贏Pitch即有份長工可惜嘅係成個Pottermore Porject玩唔夠3年要轉，但呢次經驗都真係幾特別。

呢期愛上分享啲小編技巧以外嘅故事，想聽多啲俾啲反應有機會再講吓歐洲同香港嘅廣告xDigital工作趣事。仲有仲有，Threads因字數關係會減短到500字，IG同FB會多返少少細節，請大家多多支持🙏🏻

#我係小編

03/05/2024

#小編推介：自加人工必備出糧工具！

好多小編都係Slasher，身兼多職除咗自由度高仲可以搵多啲錢得閒可以旅行放鬆吓，但個市唔好小編想加人工都難咗。而家恒生虛擬 KOL 兼 Slasher Hazel 就到處試工，最近連譚仔姐姐呢份工都撈埋，仲為我地介紹恒生 PayDay+ 做出糧戶口！只要係恒生Mobile App登記 PayDay+ 兼轉用恒生出糧可享高達6%港元儲蓄年利率，變相加人工！仲有一系列其他優惠，無論你想出糧後去旅行、買保險定投資，恒生都幫你賺到盡！快啲瀏覽 hangseng.com/payrolloffer8 了解更多啦！

最緊要而家新客戶開立 Preferred Banking 可享總值超過 $5,000 獎賞！快啲下載恒生 Mobile App 開戶啦：https://qr1.be/R2XN

除另有註明外，PayDay+ 優惠及Preferred Banking 獎賞推廣期至 2024 年 6 月 30 日。以上優惠受條款及細則約束，詳情請向恒生銀行有限公司各分行職員查詢或瀏覽 hangseng.com/payrolloffer8。借定唔借？還得到先好借！
此推廣適用於身處香港人士。
以上資料由恒生銀行有限公司所提供。

#恒生銀行 #恒變生無限 #恒生出糧戶口 #人工加 #全城人工加 #我係小編

30/04/2024

#小編筆記：Threads十大注意事項
上年出Threads玩咗兩星期之後做CD-ROM，上星期回歸試咗各種玩法，大家可去我哋Threads 睇睇，同呢邊唔同我哋分享好多職場生存技巧，以下分享10個Threads注意事項（第十點好重要）：

1️⃣同好群：FB/IG主打朋友群，Threads就針對有共同喜好者，冇Fol但有共同興趣會見到相關內容，平台主張擴大同好而家好易接觸新朋友同上粉。

2️⃣粉多未必紅：平台以同好優先所以跟蹤咗但未必睇到新文，粉絲多但都爆唔係次次爆，粉少內容到位都可跑出，粉絲數量不再是重點。

3️⃣流量密碼：多互動、長停留時間閱讀會影響接觸量，有投票功能引互動，簡單問題亦好常見，適當發文時間（返工、午飯、放工及週五、六晚）！

4️⃣寧濫勿缺：曝光率同出文頻率疑似掛勾所以冇高質Post都可短打出心情雞湯文保持熱度，長短Post日日出可穩定成長。

5️⃣內容方向：廢文之外，Memes、少布同獵奇相都吸引眼球，正經Mode就出知識學習型、個人經歷、職人技巧及實用問題/分享。

6️⃣媒體格式：同FB/IG唔同Threads唔洗有片有圖，純文字都可以跑出，內容方向同熱度比媒體更重要，亦方便小編可減少製作資源。

7️⃣三行定律：IG App會建議Threads文，建議時會顯示頭三行所以頭三行極度重要，可用第一行做標題，如有圖會縮小放右邊。

8️⃣字字珠璣：觀察及測試各類型Threads文長文有助跑數但字數不過500，盡量分行/段較易睇同可霸多啲位，建議在標題加Emoji。

9️⃣真性情：玩得Threads要放下品牌、KOL嘅達人包袱，不妨多啲分享慘慘經驗、工作日常、多發問並引發同理心吸引互動！

🔟IG跑數必備：睇圖第十點呀，我哋過去一週嘅Threads同IG實戰經驗！

玩Threads帶動IG曝光率大增，零廣告零新IG post都加Follower，同埋未有廣告同植入式產品介紹所以大家可安心玩，總之冇包袱地玩就好。

#我係小編

22/04/2024

#小編筆記：Instagram 輪播爛圖錯圖解決方法
自從 Instagram 可以出 10+張圖做輪播之後，成日都想借啲意用多啲，但除咗第一次用冇事之外之後幾個 Acc 用都出現圖片重複、黑圖同爛圖等問題，Del Post 再出出到唔知邊次先得真係心力交瘁。經過幾十次出完即 Del 嘅經驗終於搵到個9成冇事既方法，無論你有得用10+未都睇定先，睇哂呢個 Post 啲圖就知答案啦！請多多支持！

#我係小編

19/04/2024

#小編筆記：META AI 生字生圖生片同你試
新鮮出爐 Meta AI ！Meta 官方宣佈今日開始 FB, IG, WhatsApp 同 Messenger 都可以用 Meta AI, 我哋同大家試用睇下有幾勁 ! 以下講返啲重點想睇詳情圖入面啲字啦：

1️⃣Meta 官方產品一定有對平台嘅獨特性, 介面方面易用唔洗轉台唔俾你離開 Meta。

2️⃣引用 Google （有埋 Link ）即時資料即時性大增。

3️⃣生圖同其他工具差唔多, 手指問題仲有但人物面相算自然， AI 味仍然有但唔算太濃。

4️⃣生片唔OK

5️⃣唔識中文！

6️⃣香港未有得用！暫時得美國、澳大利亞、加拿大、加納、牙買加、馬拉威、新西蘭、尼日利亞、巴基斯坦、新加坡、南非、烏干達、贊比亞和津巴布韋可以用。

7️⃣唔及 Gemini ( Meta AI 唔識 Google 我係小編呀....) 。

我知香港未有得用但當佢學好中文應該就有，大家覺得 Meta AI 幫唔幫到手定係都係一般般呢？大家去 IG 睇返呢個 Post 會開心啲 (一樓有 Link)。btw, 未有 Whatsapp acc 有，如有小編有可 screencap 個樣睇睇。

#我係小編

17/04/2024

#小編日常：搵工轉工
而家出面好多位炒咗或現職走咗之後都唔再請，個市唔好開少咗位同要縮減人手，但身邊總有小編因各種原因想轉工，剛返新發現環境同工作都不似預期而萌生轉工念頭。
上星期有朋友辭咗份半年唔夠嘅工，人工OK公司名都可以但做嘅嘢有啲浪費時間，唔算係上咗賊船但如果有更好機會就算辛苦啲都應該走，所以一有 Offer 就建議佢走咗先再算。過去幾個月好多小編都問轉唔轉工好，通常第一句都叫佢地搵咗先，但如果現職已經好忙要行出第一步都唔容易，所以可先諗諗以下幾點：
#人工：最實際嘅衡量單位，而家份工/ Offer 人工算OK 嗎？諗得走都係唔滿意而家人工，咁新工多幾多％？多幾多都好過幾個月都會習慣，反而要睇新工加薪比率，個人覺得冇15%都冇著數，如20%以上就係正常啦，但記住老細都計過數出幾多糧好有可能喺工作量度表現出嚟。
#前途：無論係進升機會、有冇嘢學、公司名聲、類別同規模會幫到你搵下份工，有時啲人唔理你實際做過啲咩，公司名響都夠照，好多人會用公司名去騙工，唔係叫大家有樣學樣但公司名最主要係用嚟過 HR。進升機會就要睇 Team Structure 同公司發展，One Man Band 進升機會唔多但多嘢做多嘢學。另外喺出名難頂嘅公司做得耐都係一種成就。
#滿足感：每個人對滿足感都好唔同，有啲人冇嘢做會想走，做啲嘢覺得冇價值又想走，但我會叫大家諗當前你最想得到嘅係咩，新鮮人要有嘢學唔怕忙，老海鮮要安穩薪高糧準，多年冇升嘅想快啲升一級，想自己攪公司接外快嘅想要人脈同多啲 Free time，所以轉工要諗好自己個 Objective 唔好轉完都係原地踏步或面對相同嘅問題。
想搵一份工滿足哂以上三個願望？Sorry 就算有都唔多同做緊嘅人身在福中不知福唔會睇呢個 Post。大家諗轉工都總有好多理由，有錢做得耐就話冇成就，冇錢就話做咩做得咁辛苦，同一樣嘢做得耐又話冇新鮮感同冇嘢學，但大家冇錯，人會隨時間而改變尤其 Digital 員工同 Digital 市場一樣轉得咁快，所以好多小編都定期諗轉工㗎。歡迎 PM 分享或傾下搵工轉工問題，有問必答但一定唔快（我都打緊幾份工）。有需要亦可去我哋嘅 Facebook Group 小編 R Job Market 睇睇。
#搵工
#轉工

#我係小編

09/04/2024

#小編日常：Facebook 應唔應該@所有人？
Facebook 上年開始可以俾 Page/ Group 小編出 Post/ Comment @所有人，即係 Tag 所有 Follower，佢地會收到 Notification，但小編應唔應該用同幾時用好呢？

我哋粗略計過 Page 使用 @所有人比 Group 多30-40%（可能 Group 求生意志冇咁強），而暫時用嘅 Page 多數係中小企，使用量比媒體多30%，例子如下：
1️⃣新產品發佈/開售
2️⃣多謝大家支持
3️⃣出咗新Post（任何內容）

通常被@入去睇原來係普通 Post 覺得有啲小題大做，冇正式做調查但身邊嘅小編都有同感，覺得@我應該同我有關唔係咩都開地圖炮，而個 Notification 只係話某某 Page/ Group @你冇內容其實都好難吸引人入去。

我哋之前都有用過幾次，發現用咗都唔係返多好多數，因本身對 Post 有興趣嘅 Facebook 已經派咗俾佢入埋去睇，如果要通知先知即係本身對個 Page/ Group 嘅興趣不太大，你 Send 10 個 Notification 俾佢都唔太幫到忙，最大問題係被 @多兩次會嬲有可能會流失粉絲！

講咁耐係咪叫大家唔應該用？但佢可以免費通知 Fans 挑戰 Algorithm 喎！我哋建議係唔到非必要都唔好用，就算用都唔好短時間內用，個人覺得每月用一次都太多，半年到一年冇咁覺眼，使用建議如下：
1️⃣終極年度產品/服務（一年重中之重嗰個 Post）
2️⃣重要或特別通知如結束營業同會影響服務嘅資訊

唔 @所有人但反而可@頭號粉絲因佢地都係忠粉但都唔好太過份，最好係同頭粉有關同一至兩個月一次就好了。本嚟想@所有人去出呢個 Post 但都係算啦唔好騷擾大家😂

#我係小編

08/04/2024

#小編隨噏
今日應該放完哂假返工啦！返工前睇下我哋有咩噏？之前有小編問關於內容轉化同出抽水 Post 嘅問題，上星期孖劇亭亦喺講 Conglomerate 業績當中提到貼文互動量與業績關係，我諗好多小編同老闆都會問做 Social 做得好有咩用？如果做到過過千 Post Like 同大堆 Fans 對業績有冇幫助？

拆解以上問題前講講返數先，同業績扯得上關係嘅數就唔止係互動量，仲要有人俾錢先算返到數，好多品牌都係賣產品服務，無論業務有實體鋪定網上商店，賣咩都好都係返到單先算入帳，當然業績好與壞仲有好多因素，可能唔係 Social 做得咁好業績仲差呢！但如果要用內容角度去睇，先了解社交內容對消費者購買行為嘅影響。

大家一日睇咁多 Post，要用戶睇完個 Post 去買產品服務除咗價錢吸引更加要吸引用戶注意，如果隻隻都係老正 Post 平鋪直敍賣貨真係好悶，小編為跑數們各出奇謀用唔同手法去吸睛，希望將產品服務資訊帶俾大家而做貼市、唔離地同令網民有共鳴嘅內容去吸引大家注意，提高互動量帶動派俾更多人睇增強曝光，而最貼市嘅就一定係抽時事民生水同玩味重嘅話題。

抽水同玩味重嘅 Post 所得到嘅 Like 多數會比產品介紹嘅多，但諗諗網民俾 Like 嘅出發點係咩？大部分 Like 都係俾抽水同玩嘢行為，對品牌嘅愛同對品牌形象嘅讚賞，完咗之後會記得邊個品牌抽邊個水抽邊件事同玩咗啲咩，但有份抽水嘅產品服務就冇咩印象，抽水 Post 吸返嚟嘅 Fans 好多都係想再睇抽水 Post 而 Follow。所以業內公認高質素內容嘅品牌都唔只係一味抽水，Content Mix 除咗抽水仲有其他 Content pillar 如產品服務介紹同用戶口碑，當大家有需要購買相關產品嘅時候就會較易聯想到：「啊！呢件嘢邊個邊個好似有得賣喎！」，咁當然都有直接返單嘅機會啦！

要做好 Social Content 要識抽真係唔容易，做到網民會等佢出 Post 睇佢點抽仲要出手快、狠同準，所以如果唔太有把握就唔好亂嚟，做得唔好弄巧反拙影響品牌形象就唔好啦，見過唔少眼高手低嘅抽水 Post 睇到個人好尷尬。

講完品牌講下自媒體/KOL，而家網媒有 B2B 同 B2C 兩條返數方法，B2B 嚟自廣告或品牌合作，將品牌嘅產品服務宣傳俾讀者增加曝光率，B2C 如 YouTube 、Meta 都有內部分成，加埋 Patreon 及其他訂閱平台令 B2C 成為另一條自媒體/KOL返數新出路。

當品牌或 Media agency 搵台嘅時候除咗睇價錢仲會睇粉絲數量、Post 互動量同內容。粉絲多唔代表接觸量一定大但媒體基本上都係睇人數當收視，就算 Fans 多但質素好重要，如全部都係 SEA 粉想搵本地客都幾難。Post Like 要多先反映到有人睇，留言就要睇埋內容，如介紹新嘢會好多 Tag 朋友嘅 Comment，實用知識 Post 就會多 Share 多 Save。Post 內容要有獨特性如分析、評論或最快最新嘅資訊就容易上到粉返到數，大家訂閱你個台都係對你個人或打造出嚟形象嘅支持，所以一定要有個人風格，抽唔抽水就睇返自己人設啦，唔好太盡亂搶 Foc 一陣跟車太貼燒襯。

所以品牌做 Social 多 Like 多互動雖然未必可直接轉化做錢，但對 Branding、PR 同為日後做轉化鋪路絕對有幫助。而自媒體就真係要多 Like 多 Fans，但要留意質素唔好打嗎啡亂買假粉。今日講住咁多，祝各小編有美好的一天（為今早開09會自我勉勵中）。

#網上圖片
#冇食到蕃茄炒蛋新地
#我係小編

05/04/2024

#小編筆記：Instagram 貼文圖片影片尺寸及實戰2024
今年唔出文住出咗 Post 先，Instagram Carousel 可出 20 張相於是做一條長相同大家講講各個貼文格式嘅圖片/影片尺寸，仲加多咗 Carousel、Reels 同 Stories 嘅例子，尤其 Reels 內容劇本值得留意，想得到最佳體驗去 IG 搵返睇呢個 Post 嚟睇啦，Instagram search：imsiupin，留言有 Post Link。做呢個 Post 用咗唔少時間希望大家多多支持。
#小插曲：頭先 IG 出幾次都喺第10張相之後重複同一張圖或黑畫面... 試咗幾次發現出多圖有個小 trick，仲 FC 緊但有興趣知可 PM😅。

#我係小編

26/03/2024

#小編日常：IG 又壞咗？Boost Post Like 去咗邊？ #已經冇事鳥🐦
好多小編都用 Instagram In-App boost post 去跑 follower 順便追埋 post like，因為不嬲用呢個方法返到嘅 like 會顯示喺原 post 上面。呢兩日發現 Instagram 用廣告得來的 post like 冇顯示喺原 post（Organic仲有），但後台 Insights 上又正常顯示，不嬲都加哂做面數無啦啦先嚟分家，當以為可能壞1-2個 post 嘅時候原來之前所有 boost 過嘅 post 都突然被「分數」令小編月尾交數要諗點解畫，呢次係 Instagram 又壞咗定係偉大嘅 Meta 準備俾小編們新嘅挑戰呢？LM 睇更進... 最新消息, 冇事了！
#好壞唔壞月尾先嚟壞

#我係小編

Address

Telephone

+85260220426

Website

https://www.imsiupin.com/

Alerts

Be the first to know and let us send you an email when 我係小編 posts news and promotions. Your email address will not be used for any other purpose, and you can unsubscribe at any time.

Contact The Business

Send a message to 我係小編:

Videos

#小編推介：自加人工必備出糧工具！

#小編推介：自加人工必備出糧工具！好多小編都係Slasher，身兼多職除咗自由度高仲可以搵多啲錢得閒可以旅行放鬆吓，但個市唔好小編想加人工都難咗。而家恒生虛擬 KOL 兼 Slasher Hazel 就到處試工，最近連譚仔姐姐呢份工都撈埋，仲為我地介紹恒生 PayDay+ 做出糧戶口！只要係恒生Mobile App登記 PayDay+ 兼轉用恒生出糧可享高達6%港元儲蓄年利率，變相加人工！仲有一系列其他優惠，無論你想出糧後去旅行、買保險定投資，恒生都幫你賺到盡！快啲瀏覽 hangseng.com/payrolloffer8 了解更多啦！最緊要而家新客戶開立 Preferred Banking 可享總值超過 $5,000 獎賞！快啲下載恒生 Mobile App 開戶啦：https://qr1.be/R2XN 除另有註明外，PayDay+ 優惠及Preferred Banking 獎賞推廣期至 2024 年 6 月 30 日。以上優惠受條款及細則約束，詳情請向恒生銀行有限公司各分行職員查詢或瀏覽 hangseng.com/payrolloffer8。借定唔借？還得到先好借！此推廣適用於身處香港人士。以上資料由恒生銀行有限公司所提供。 #恒生銀行 #HangSengBank #恒變生無限 #PayDayPlus #恒生出糧戶口 #PreferredBanking #人工加 #全城人工加 #imsiupin #我係小編

Shortcuts

Address
Telephone
Alerts
Contact The Business
Videos
Claim ownership or report listing
Want your business to be the top-listed Media Company?

Country:

City: