Ukmrpr (2025)

03/10/2025

[強者越強👊]

美國早前減息，最開心一定係環球股市。英國富時指數都唔例外，目前9400點，相信朝住1萬點邁進。😉 大家有無stock ISA 把握下?

其中，超市今年既競爭可以話超觸目。morrison同asda越做越頹，aldi同lidl 乘勢掘起大肆擴張，英超黎講Tesco / Sainsbury / M & S都係做得相對好，有錢賺仲要多野揀，Tesco 尤其跑出! 筆者特別鐘意佢finest系列，d野真係靚d，價錢又唔會離地，睇睇佢股價? 創 12 年新高! 又預告聖誕超市減價戰! 😍

Tesco 財務表現正斗!
半年銷售額：£330 億鎊（截至 8 月 23 日），按年升 5.1%
全年盈利預測：£29 億至 £31 億，高於原先 £27 億至 £30 億嘅指引 !! 😯
股價表現：升 22.7p（5.3%）至 452.5p —— 係 12 年新高

今年累計升幅：26%!! 🤓

🛒 業務有咩咁省鏡先?

高端野需求勁：Tesco Finest 系列銷量一支獨秀，新產品好似開心果雪糕同濃縮冰咖啡飲品受歡迎。

Market share：升至 28.4%，反映 Tesco 正喺「大部分競爭對手」手中成功吸客。

clubcard accepted 🤣：Aldi 價格比拼同 Clubcard 折扣繼續吸引消費者。

=============

💬 CEO Ken Murphy 有乜講?!

2020 年上任既佢對稅收表達不滿：「唔好再加稅，enough is enough。」(筆者都想媽差埋一份)😆

對經濟前景憂慮：「消費者對財相 Rachel Reeves 嘅政策以及秋季財政預算案感到擔心。」

對聖誕旺季樂觀：「我哋對聖誕銷情超有信心，會繼續保持價格競爭力。」「屋企食飯嘅潮流可能係新冠疫情之後既遺留習慣，或者係純粹為慳錢。」

Murphy 預告下半年競爭會更激烈，各大超市將會出手壓低價格，我地消費者就最得益。🤑

=============

📉 Tesco 都曾經食過屎，股價喺 2013–2014 年暴跌，當時因為前 CEO Philip Clarke 領導下出現會計醜聞，以及Tesco 子公司係美國 Fresh & Easy 連鎖營運失敗收場。經歷多年調整後，一步一驚心，而家攪返好，憑住「價格 + 品質並重」策略，成功重奪投資者芳心。大家又有無入佢d股票? 變左可以又食又拎 😇🤣

#筆者都有投信心一票
#因為平時都係買佢
#西超主流
#馬莎都係好野

03/10/2025

[縱容係會出事?! 😨]

琴日曼城猶太會堂恐襲既歹徒，原來正處於涉及一宗涉嫌強姦案件既保釋期間，等候出庭。

《衞報》跟 (政府 / 警署) 放風，35歲既疑兇Jihad al-Shamie 過往有刑事定罪紀錄，但唔係涉及恐怖主義，佢亦唔係反恐部門或防止去極端化計劃嘅監察名單上。

消息人士透露:「佢有犯罪底，但冇任何跡象會搞出咁嘅襲擊。」😅🤡 (筆者好想問係邊個去界定... )

目前警方現正調查 Shamie 係咪同 2012 年針對保守黨前國會議員 John Howell 嘅死亡威脅有關。當時一封電郵署名「Jihad Alshamie」，內容包括「好似你咁嘅人應該死」。🫨 Howell 因為支持以色列立場而成為攻擊目標，當年佢曾公開表示自己同家人感到威脅。警方查緊嗰封電郵嘅發件人係咪就係今次恐襲嘅疑兇。🤯

============
今次放風法，唔知係咪想呼應早前內政大臣 Shabana Mahmood 修緊永居條例既做法，要求無犯罪紀錄先可以永居既條件。疑兇自細就黎左英國，受英國教育，後來2006年成為英國公民。

今次襲擊唔止有兩條友鄉左，更加突顯保釋監管漏洞同情報監察不足，特別係疑兇早有犯罪背景，但仍然能夠自由行動，仲有幾多case係咁，唔知英國警方又有無紀錄。

#岩岩撞著剛剛
#疏忽加上監察不足
#就會出事

03/10/2025

[首位女性坎特伯雷大主教⛪]

呢個任命可以話係突破歷史傳統，英國國教會首次出現女性坎特伯雷大主教 — Dame Sarah Mullally。😮

唐寧街宣佈，而家 63 歲、曾經做過護士同英格蘭首席護理官嘅 Sarah Mullally 女爵，將接替 Justin Welby，成為英國國教會第 106 任坎特伯雷大主教。呢個任命標誌住國教會近 500 年歷史上首次由女性出任最高領袖。😯

唔好忘記，無幾耐之前，威爾斯先出左個女性同性戀大主教，望落同梁榮忠好似。😳

===================
Mullally 現任倫敦主教，育有兩個囝囡。2025 年 1 月將喺坎特伯雷大教堂舉行法律程序，正式就任；之後仲會有隆重嘅「登座典禮」，屆時預料王室成員亦會出席。

特別有意義嘅係，10 年前佢就喺呢座大教堂被祝聖為 Crediton 主教。🧐

Mullally 出生於 Woking，16 歲時成為基督徒。佢話自己每一步人生，包括護士生涯同牧職，都係出於「服侍上帝與他人」。

「我學識點樣聽人講野，同時聽從上帝溫柔嘅提醒，帶人尋找希望同醫治。」對於新角色，佢承認責任重大，但表示「心裏有平安，並信靠上帝」。

-------------------
自 2014 年國教會允許女性成為主教以來，今次係首次揀選坎特伯雷大主教，外界一早估到會誕生首位女性領袖。第二年，即係 2015 年就有第一位女性主教，如今再邁進一步，被視為「歷史時刻」。

倡議平權組織 WATCH 表示熱烈歡迎，認為呢一步會推動教會進一步實現性別平等。不過，部分保守派仍強烈反對，甚至公開列出全英 587 間限制女性事奉嘅教會。😟

-------------------
Mullally過去有乜威水野?

Mullally 曾喺 NHS 擔任癌症護士，並喺 37 歲時成為英格蘭最年輕嘅首席護理官。佢因對護理嘅傑出貢獻獲封女爵。而家同老公 Eamonn Mullally 育有兩個成年後代 - Liam 同 Grace。😉

佢有乜棘手野要搞?😵‍💫

-同性婚姻爭議
-教會出席人數持續下跌
-處理教會虐待醜聞之後嘅信任危機
-如何回應極右翼嘅「基督教民族主義」

作為全球 8,500 萬聖公會信徒嘅精神領袖，大主教必須喺非洲保守派（部分國家仍禁止同性戀）同埋西方自由派之間取得平衡。😵

=========
Ipsos 最新民調顯示，大部分英國人（74%）對邊個出任大主教唔係太care。喺受訪嘅基督徒當中，62% 亦都係唔care。🥱

但有 28% 人希望大主教少啲講政治議題；亦有 17% 認為應該更加積極出聲。

你又點睇? 會唔會 care? 支唔支持女性出任?🥸

#坎特伯雷大主教

#大家考完忘記哂未

02/10/2025

[真情剖白🥹]

威廉王子原來係2月個陣，接受左加拿大演員Eugene Levy 既專訪，亮相一個叫 The Reluctant Traveller 既節目，罕有咁公開講自己對王室、家庭同未來嘅睇法，被形容係佢「最坦白、最真實」嘅一次訪問。😯

改革王室，唔怕質疑傳統 🔹

一開波，當然係講王室。威廉強調自己並唔會盲目跟隨傳統，仲話：「改變喺我成為國王之後一定會做既野。傳統係好，但都要與時並進，可以真正影響到人，帶黎好既轉變，唔可以因為一d歷史原因而受到制肘。」🤠

佢表示自己唔怕改變，反而覺得「能夠帶黎正面轉變」先係最令人興奮嘅事。王室係要改革，但家庭先係最核心最重要。🥹

家庭壓力先至係最大考驗 🔹

「皇室工作唔算太大壓力，係家庭先至係最令我覺得 overwhelmed（難以承受）嘅地方。尤其係舊年，老豆同老婆都有癌症，真係好痛苦，我要同時平衡保護太太、三個小朋友以及工作，真係好困難... 真係好唔容易... 真係好大壓力...」🥺

「你可能會覺得，咁不幸既野唔會發生係我身上既，但偏偏現實就係咁殘酷，佢可以突然之間發生。」

「我好慶幸老婆大步檻過，對於佢咁堅強我好自豪。至於老豆，佢其實都需要關心架。」😉

====================
唔想重蹈父母錯誤、離婚嘅覆轍 🔹

威廉提起自己細個時經歷父母離婚，直言嗰啲「家庭破裂糾紛同壓力」對小朋友，即係佢自己影響好大，所以佢想畀 George、Charlotte、Louis 一個更穩定嘅屋企。佢同Kate盡量自己接送小朋友返學放學，晚餐一定全家一齊坐低食，而且「三個小朋友一律唔准玩手機」，佢話要等到佢哋大啲先考慮比佢地，如是者，大家有傾有講有交流，氣氛係好融洽，又會了解多左。☺️

佢希望唔會再出現以前傳媒瘋狂追擊影相有狗仔隊嘅情況，強調會「劃清界線，保護家庭生活」。😠

懷念祖父母 🔹

講到祖母伊利沙伯女王，威廉笑住話：「佢有全世界最好嘅下午茶，每次去探佢，我都一定食到好飽。」菲臘親王係度既場合：「永遠都會有笑聲! 搵佢地真係好warm。」又形容細個個時始終祖父母較傳統比較嚴，係到威廉都長大成人，就覺得同祖父母相處既時間越黎越融洽同開心。🥰

「我好掛住佢地。」

------------------------------------

點睇自己未來同 George 繼承皇位? 🔹

「我唔會每日朝早起身就諗呢件事，最重要係做返自己。如果唔係，呢個身份同責任都冇意義。」

講到 George 有一日都會成為國王，佢微笑咁講：「我希望將來個世界同我做緊嘅嘢，都可以令佢自豪有個咁既老豆。」😄

=================
生活就係咁，捱過左就雨過天青，但捱打個時真係好甘，要頂住，最緊要搵人支援自己，唔好諗唔開，就算係男人，都可以喊架，上帝永遠會比條路你行。🥹

📺 節目《The Reluctant Traveller》新一集《Living the Royal Life in the UK》已經喺 Apple TV+ 有得睇，筆者認為係值得睇下，威廉同Kate係點教d小朋友既觀點。

#星期五狗仔隊
#英國人物傳記
#皇室
#戴安娜
#伊莉沙白
#菲臘親王
#查爾斯
#威廉王子

02/10/2025

更新: The Home Office has confirmed Al-Shamie was a 35-year-old British national of Syrian descent, who entered the UK as a very young child, and was granted British citizenship in 2006 as a minor.

==================
[曼城猶太會堂恐襲事件]

事件造成至少 2 人死亡，仲有 3 至 4 人嚴重受傷。警方現場擊斃疑兇，另拘捕兩個同案有關嘅人。

今日其實係猶太人最神聖嘅贖罪日（Yom Kippur），曼城 Crumpsall 嘅 Heaton Park Hebrew Congregation 猶太會堂發生恐襲。疑兇先用車撞人，之後再持刀亂斬。曼城警方即時派出武裝警員，現場開槍擊斃疑兇，又懷疑疑兇身上有炸彈，現場有引爆動作。警方正係展開反恐調查。

內政大臣Mahmood上左曼城搵市長Andy，又去左曼城警察總部支援事件。目前英格蘭多間猶太會堂加強警力駐守。猶太社群收到警告，要暫時關閉會堂大門，唔好喺禮拜後聚集喺外面，保障人身安全。

事件而家震驚全國，政界、地方領以及唔同社區組織都譴責襲擊，強調會支持猶太社群，防止進一步恐怖威脅。
===============
警方本來仲諗緊批唔批今晚係曼城市中心既支持巴勒斯坦遊行，佢地訴求係支援加沙。坊間好多聲音話，係贖罪日殺猶太人，好明顯係報復以色列。

以色列總理內塔尼亞湖喺社交平台 X 發文，回應事件：「以色列同英國猶太社群一齊哀悼曼城恐襲遇難者，對恐怖主義示弱只會帶來更多恐怖主義。唯有堅強同團結，先可以擊敗恐怖主義。」

大家呢排出外，小心人身安全以免殃及池魚。

--------------------------
同一日，警方批准英格蘭、威爾斯前線警員配備「超級電槍」，今日起20 個警隊（接近全國一半警隊）會正式使用 Taser 10「超級電槍」。呢款電槍一次可以發射 10 支高壓電箭，唔使reload。

內政部話已經測試左兩年嘅技術、醫療同安全先批准。配備呢支野主要原因係近一年，警員被襲擊案件差唔多升左一倍，達到 55,000 宗 —— 平均每 10 分鐘就有一個差佬遇襲。同時，刀械暴力喺疫情之後回升，挨近歷史高位。

#今次單野都係用刀
#曼城街坊出外小心

呢單野同2023年哈馬斯襲擊以色列音樂節有咩分別?! 仲要時間上非常接近，2年前係10月7日發生，今年係早多5日。以巴血海深仇，有人話恐襲點都唔岩，但長年累月既迫害，都令好多家庭分散，兩邊咁樣落去，真係唔知點先停得到。

02/10/2025

[舖天蓋地]

自從之前單新聞之後，大曼城周邊全部掛滿哂英國旗同英格蘭旗，堅係人民力量。

相信唔止呢度，全國都係咁😉

政府，你禁到幾多吖？😆

#英國旗
#人民力量

02/10/2025

[國慶佳節]

定七月十四? 👻

「迎國慶‧ 華服嘉年華」係西九海旁玩四日。有外國遊客讚揚花朵細節與人物面容逼真，但市民唔領情:「你會唔會去四川旅行，但係食菠蘿包？」又有市民潑冷水，指風格不太傳統，認為比較似內地手機遊戲角色。😅

睇睇邊個主辦? "由民建聯等團體主辦的... "

有媒體向主辦方之一紫荊文化集團查詢是否有留意到對設計既負評等，其回覆稱花燈系藝術創作既審美係好個人化架 😉 意譯: 睇就睇，唔睇就過主。

至於活動資金? 全部由主辦方自籌，不過無透露具體金額。意譯: 整左出黎比你班友仔睇仲咁多嘰吉? 下次可能 _ 都無得你食。🤡

#紫霞仙子
#香江仙子
#整左架啦
#唔好嘈啦 😉

01/10/2025

[蝴蝶效應🦋]

今次係講咸爺既七旋斬，將佢帶到今時今日既地位。好多成名既足球選手，唔少都搵大錢之後嫖賭飲蕩吹，欠落周身債，但咸爺可以話係食腦又憑住副偈打造個人品牌超成功既俵俵者。😇

仲記得當年佢黎香港大球場，有幾多fans衝落去同呢位萬人迷合照打卡，如今既佢係點相信唔使多講大家都知。今年封爵既佢原來財運亨通，理財有道，收埋巨額分紅。😚

佢嘅控股公司 DRJB Holdings 舊年派咗 7500萬美金股息，佢透過旗下公司Footwork Productions 攞到其中 45%分紅 (大概2500萬鎊)。另外 55% 股息就比左Authentic Brands Group ——三年前用2.69億美金入股 DRJB Holdings。

佢而家代言既品牌就犀利啦，平時大家去大家樂會飲既 Stella Artois、噴香水既 Hugo Boss、SharkNinja、Verizon 等等，仲有製作公司 Studio 99，舊年成功推出 Netflix 《Beckham》紀錄片，今年仲有關於 Victoria Beckham 嘅新紀錄片，遲下就有得睇，到時筆者再提大家，佢d生意真係百足咁多爪。
==========

DRJB Holdings 2024年業績表現稅前利潤達到4500萬美金，比上一年升近 25%，收入達 9200萬美金，真係肥過肥仔水。

數下佢仲有乜影響力?
前英格蘭隊長、國際邁阿密創辦人，同美欺密密吸金，超過 1.6 億社交媒體fans，商業價值極高，範範都掂，唯獨屋企大仔Brooklyn唔太生性令佢操心，不過仔大仔世界，佢又好開明，就算阿仔唔出席佢50大壽，佢都唔似嬲嬲豬，可能當年反叛既佢，都明白囝囡有自己一片天好重要，唔通成世黏老豆做敗家仔咩?

咸爺雖然由仔變佬，但就好似紅酒咁越陳越醇，食埋腦，又教人如何不愛他? ☺️

#萬人迷
#吸金能力
#食腦
#搞球隊
#七旋斬
#封爵

01/10/2025

[最後今日😉]

玩左2星期Zilch，大概收集左讀者們覺得最正既野，同埋最常遇到既問題，呢度集體講一講。😄

1. 開左戶入到個app，係home個一頁揀 "pay now" 以後所有野default "pay now" 賺回贈，如果你想分期，先揀 "pay over 6 weeks"。

2. 去任何商戶買野，去 shop 個一頁，分清楚你係網上買野，定係門市買野，揀返 "online" 或者 "in-store" 既對應項，然後搜索商戶，之後揀 "pay now"，去左佢張虛擬卡個一頁，呢個時候按 "enable card for 2 hours" ，網上消費就直接入卡資料 / 門市消費你就開nfc 近場通訊，拍卡，咁你既消費就會係你張登記左既debit card度扣。而相應既cashback會入左個app度。

你係 "online" 度未必搵到門市要既商戶，相反亦然，呢點要清楚。

3. 下次消費，搜索商戶，之後揀 "pay now"，揀 "apply ###x rewards to purchase" ，咁就可以一次過用哂你之前儲落既cashback，無門檻唔使等唔使累積滿指定金額，然後按 "choose pay now"，照舊enable card for 2 hours" ，照舊如上操作。

4. council tax 如果唔接受信用卡，就要去paypoint 比先有0.5% 回贈。road tax 測試左有0.5% 回贈。

5. 入油: bp / esso / tesco petrol / asda petrol / morrison petrol - 全部2%回贈。

6. 買餸: aldi / lidl / heron foods / iceland - 2% 回贈 ===== costco 門市 0.5% 回贈 / 上網 2% cashback ===== costco入油用唔到請注意。

7. 餐廳: papa john / five guys / iceland / pizza hut / pizza express / 勁多餐廳全部2%回贈。

8. 移英港人大部分日常接觸商戶 - 座底0.5% 回贈，媲美ae 最普通回贈白金卡，但其實98%商戶都係呢個app搵到，即係座底2%回贈。一個月使1500鎊計，用0.5%回贈既話，一年慳90鎊。用2%回贈既話，慳360鎊。
==================

9. 配合nx rewards 用 - 超市買完餸用zilch 有2% 回贈 - 實體單影相比nx rewards email - 額外2%回贈 + claim 埋18鎊月費。

10. 配合nx rewards 用 - 馬莎 one4all gift card 8 折買餸，實體單影相比nx rewards email 額外2%回贈 - 即係埋單78折。一個月買餸使200鎊計，一年慳528鎊。

11. 迎新限時送10鎊去到10月3號咋~ 今日最後機會，有讀者用手機click link 去左download個app，之後lost track，要搵cs補返筆者電郵先有10鎊，呢度建議可能用電腦視窗開戶，咁就一定track到。如果開左戶未有10鎊既就歡迎pm筆者攞返電郵，然後問zilch cs攞獎賞~💪

#10鎊迎新
#生活買野起碼98折

#有需要既讀者請把握善用
#黎緊又加能源費

01/10/2025

[別人笑我太瘋癲😉]

我笑他人看不穿。Bonnie Blue 可能就係咁樣睇呢個笑貧不笑娼既世界，掌握流量密碼既佢，吸金能力當然係頂尖，資產估計達 3,400 萬鎊，每個月收入可達 150 萬鎊以上，更加係 Channel 4 嘅紀錄片《1000 Men and Me: The Bonnie Blue Story》入面公開自己嘅故事。🤯

Bonnie 真名 Tia Billinger，1999 年出世，嚟自英格蘭Derbyshire Draycott。佢係好出名既女優，曾經聲稱12 小時內同 1,057 個男人搞野一炮而紅，唔止靠身體，仲食腦，明白名氣所帶黎既影響力同財富。🫰

佢更加成功團結 "屋企人"，打理佢呢壇 "家族" 生意。黎自單親家庭既佢，屋企人包括老母、嫲嫲同繼父，全部都支持佢，仲落手落腳參與佢嘅事業。佢老公 Oliver Davidson（青梅竹馬，2019 年結婚）更加係最初鼓勵佢入行嘅人，仲幫手打理佢嘅工作。 (咁咪即係馬夫? 😨] Bonnie 講過：「一家人同心協力一齊分錢，大家都開心。」🫨

話說佢19 歲個時本來只係喺 NHS 做招聘，覺得人生無無聊，之後去左澳洲住，係男友鼓勵下開始做「cam girl」，其後更成為 OnlyFans 最有人氣既表演者，不斷以誇張噱頭吸引眼球，例如：

-比大學生免費同佢搞野，只要肯畀佢拍片。
-喺迎新周同 150 個大學生性交。
-佢甚至計劃過做「人體寵物園」：將自己困喺玻璃箱，畀人任意發生性行為，最後因為太極端被 OnlyFans 收皮封埋acct。
-轉戰 Fansly 之後，東山再起靠知名度吸金。

最震撼你三觀既可能係佢阿媽，坦言第一次知道後係有少少驚訝，但兩次熟三次大結局，奉行西方教育全力支持阿囡做成人產業，事關拍出黎d片既分紅，好大一部分都打係阿媽本銀行薄仔。 "佢開心，大家開心，佢拍片既時候又安全，作為阿媽無理由唔支持" 阿媽對住鏡頭話。 😯 (好似講到好合理咁，大家可以睇套紀錄片)

2024 年傳出佢同老公仔 Oliver 計劃離婚，雖然 Bonnie 強調分開「同工作無關」，但外界指主要爭議係因為佢嘅巨額財富。Oliver 嘅老母接受訪問媽爆 Bonnie「邪惡、操控慾強」，又話對方切斷咗佢仔嘅分紅：「我個仔一蚊都分唔到。」

人越大越識分辨到邊個對你好，邊個對你唔好，Bonnie可能係呢個過程中，慢慢搵返自己。唔評論情色產業，但Bonnie的確同Sophie一樣，有驚人既生意觸覺同吸金能力。

#單親家庭
#英國人物傳記
#笑貧不笑娼既時代

你又點睇? 會點教囝囡? 又鐘唔鐘意Bonnie Blue / Sophie Rain 既諗野思路同副偈? 😃

01/10/2025

[Jet2新開10條新航線 👏]

darling hold my hands... 大家都識唱啦🤣

4個目的地，都係正野，係曼城、伯明瀚同埋愛丁堡街坊好消息!

而家對比疫情個時d航線真係多返好多，大家都想直航啦，唔通去歐洲仲轉機，玩鬼咩。之前出過一個post關於3月同10月避寒，今次當然再接再勵。

Jet 2有咩搞作? 睇下面新增航點：

1. 塔林（Tallinn），愛沙尼亞

2025 年 11 月開航
適逢 11 月 21 日開始嘅聖誕市集
航點：伯明翰（Birmingham）、曼城（Manchester）、愛丁堡（Edinburgh）

2. 拉帕爾馬島（La Palma），加那利群島

2026 年 4 月開航
比較寧靜嘅小島，以大自然同靜修為主
航點：倫敦史坦斯特（Stansted）、曼城

3. 薩摩斯島（Samos），希臘

2026 年 5 月開航
以沙灘、歷史同慢活氣氛著名
航點：倫敦史坦斯特、曼城

4. 西西里島（Sicily），意大利

2026 年 5 月開航
古蹟、美食、南意文化特色
航點：曼城、伯明翰、紐卡素（Newcastle）

================
Jet2 今年其實已經新增西班牙 Jerez 航線，夏天又開左克羅地亞嘅 P**a 同伊斯特里亞海岸（Istrian Coast），所以咪淨係去米蘭巴塞羅娜個d熱門遊客位，查實東歐以及南歐都仲有好多秘境可以去。

真心，英國留得耐左，物慾都少左，鐘意睇自然風景同人文風情多左。Jet2 目前喺英國有 13 個機場出發，航點超過 75 個目的地。上面兩個航點筆者特別鐘意Samos 同西西里😇

#旅遊報復 🤣
#幾十鎊就飛得
#唔係唔飛卦
#人文秘境

01/10/2025

[一連幾跪 😳]

哈佛都唔例外。

侵侵話已經同哈佛大學達成協議，結束雙方長期嘅爭拗。據佢講，哈佛會支付 5 億美元，用嚟成立一個「大型職業學校網絡」 (trade school)，由哈佛營運，教授人工智能、引擎等技術。

呢單deal幾乎完成，只係等教育部長 Linda McMahon 簽字確認就可以落實。佢仲話呢筆錢會用嚟「做偉大嘢」，同時仲話：「哈佛嘅罪孽被赦免。」😆

========================
點解哈佛肯比5億美金?
特朗普上任後切斷咗哈佛 26 億美元研究資金，仲取消咗部分聯邦合約，甚至威脅要限制國際學生入學。

白宮聲稱哈佛延誤處理「反猶太主義」問題，先凍結撥款，但早前波士頓一位聯邦法官裁定，研究經費同歧視指控無直接關係，所以要求恢復撥款。

除咗哈佛，哥倫比亞大學（Columbia）同布朗大學（Brown）都已經「畀咗保護費」：哥大 2 億美金、布朗 5,000 萬美金。作為交換，學校要接受政府對「男性／女性」嘅定義，並取消招生考慮種族因素，簡單講，未來只會招最強既學生，唔使再睇DEI面色，因為DEI證實左只會DIE，Jaguar就係好好既例子 🤣

#逐個擊破
#先擊破科企
#再擊破頂尖學府

Ukmrpr

03/10/2025

03/10/2025

03/10/2025

02/10/2025

02/10/2025

02/10/2025

02/10/2025

01/10/2025

01/10/2025

01/10/2025

01/10/2025

01/10/2025

Address

Telephone

Website

Alerts

Contact The Business

Shortcuts

Share